កម្ពុជាគ្រោងស្ថាបនាហេដ្ឋារចនាសម្ព័ន្ធបន្ថែមដើម្បីត្រៀមសា្វគមន៍ព្រិត្តិការណ៍ ស៊ីហ្គេមឆ្នាំ២០២៣

ដោយ ប៊ី

ភ្នំពេញៈ សាលារាជធានីភ្នំពេញ គ្រោងនឹងសាង់សង់ផ្លូវពីរខ្សែថ្មីបន្ថែម មុនការប្រកួតកីឡាស៊ីហ្គេមឆ្នាំ២០២៣ ដែលផ្លូវ២ខ្សែនេះ នឹងជួយរំដោះការកកស្ទះពីផ្លូវជាតិលេខ៦។

គម្រោងសាងសង់ផ្លូវថ្មីពីរនេះ ត្រូវបានលើកឡើង ក្នុងកិច្ចប្រជុំទាក់ទងនឹងការរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ នៅថ្ងៃអង្គារ ទី១៩ ខែឧសភា ឆ្នាំ២០២០។ កិច្ចប្រជុំនេះផ្តោតសំខាន់លើរបៀបវារៈចំនួន២ សំខាន់ៗ គឺការពិនិត្យពិគ្រោះយោបល់ស្តីពី ហេដ្ឋារចនាសម្ព័ន្ធតភ្ជាប់នឹងពហុកីឡដ្ឋានជាតិមរតកតេជោ និងបទបង្ហាញទិសដៅការងារ-តួនាទី ភារកិច្ចរបស់គណៈកម្មការជំនាញសំខាន់ៗចំនួន៦ ក្នុងចំណោម១៤គណៈកម្មការ។

លោកវ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍គូសបញ្ជាក់ថា ហេដ្ឋារចនាសម្ព័ន្ធផ្លូវថ្នល់តភ្ជាប់ពីរាជធានីភ្នំពេញ ទៅពហុកីឡដ្ឋានជាតិមរតកតេជោ ដែលជាកន្លែងប្រារព្ធពិធីបើក-បិទនៃព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលនឹងមានប្រជាពលរដ្ឋប្រមាណពី៥ ទៅ៦ម៉ឺននាក់ នឹងចូលរួមក្នុងពេលតែមួយ។

លោកបានបន្តថា “យើងត្រូវការរៀបចំផ្លូវអាទិភាពសម្រាប់ការតភ្ជាប់ ដោយសាលារាជធានីភ្នំពេញ បានរៀបចំគម្រោងរួចហើយនូវការសាងសង់ផ្លូវថ្មី ចំនួន២ខ្សែ ដោយខ្សែទី១ភ្ជាប់ពីផ្លូវOCIC ឆ្ពោះទៅវិមានឈ្នះ ឈ្នះ និងខ្សែទី២ គឺជាផ្លូវស្របតាមដងទន្លេសាប តភ្ជាប់ពីស្ពានមិត្តភាពកម្ពុជា-ជប៉ុន និងស្ពានមិត្តភាពកម្ពុជា-ចិន ឆ្ពោះទៅដល់ចំណុចស្ពានលីយ៉ុងផាត់ (បុកមកមហាវិថីឈ្នះឈ្នះដែរ)”។

លោកវ៉ាត់ ចំរើនបានឱ្យដឹងទៀតថា នេះជាគម្រោងរបស់សាលារាជធានីភ្នំពេញដែលគ្រោងនឹងសាង់សង់ផ្លូវពីរខ្សែថ្មីនេះ ឲ្យបានរួចរាល់នៅក្នុងឆ្នាំ២០២២ ពោលគឺមុនការប្រកួតកីឡាស៊ីហ្គេម ឆ្នាំ២០២៣ ដែលផ្លូវ២ខ្សែនេះ នឹងជួយរំដោះការកកស្ទះពីផ្លូវជាតិលេខ៦បាន”៕

រដ្ឋាភិបាលសម្រេចបន្ថយថ្លៃអគ្គិសនីចំនួន ២៥ ភាគរយ ដល់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្មរយៈពេល ៥ ខែ

ដោយ ៖ វុត្ថា

ភ្នំពេញ ៖ រដ្ឋាភិបាលសម្រេចដាក់ឱ្យអនុវត្តផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្មដោយបន្ថយថ្លៃអគ្គិសនីចំនួន ២៥ភាគរយ ចាប់ពីខែមិថុនា ដល់ខែតុលា ឆ្នាំ២០២០ខាងមុខនេះ ដើម្បីជួយសម្រួលការលំបាកក្នុងការបង់ថ្លៃអគ្គិសនីរបស់ទីតាំង ឬបន្ថយសកម្មភាពផលិតកម្មអាជីវកម្ម។

សេចក្តីសម្រេចដែលចុះហត្ថលេខាដោយលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ដែលបានផ្សព្វផ្សាយនៅថ្ងៃទី២០ ខែឧសភា ឆ្នាំ ២០២០នេះ ឱ្យដឹងថា នេះជាការជួយលើកទឹកចិត្តចំពោះការប្រើប្រាស់អគ្គិសនីរបស់ទីតាំងដែលមានបរិយាកាសអំណោយផល អាចបង្កើតសកម្មភាពផលិតកម្ម ឬអាជីវកម្មក្នុងរយៈពេលអនុវត្តការណែនាំរបស់រាជរដ្ឋាភិបាលកម្ពុជាក្នុងការទប់ស្កាត់ការចម្លងមេរោគ Covid-19 ។

ផែនការអនុគ្រោះ និងលើកទឹកចិត្តចំពោះការប្រើប្រាស់អគ្គិសនីរបស់វិស័យឧស្សាហកម្ម កសិកម្ម ពាណិជ្ជកម្ម និងសេវាកម្ម ពីខែមិថុនា ដល់ខែតុលា ឆ្នាំ ២០២០ មានខ្លឹមសារដូចខាងក្រោម៖

១) ផ្តល់ការអនុគ្រោះលើកលែងការបង់ថ្លៃអគ្គិសនីតាមលក្ខខណ្ឌអប្បបរមា និងលើកលែកការបង់ថ្លៃ តាមលក្ខខណ្ឌអនុភាព រួចអនុញ្ញាតឱ្យបង់ថ្លៃ អគ្គិសនីត្រឹមតែចំនួនគីឡូវ៉ាត់ម៉ោង ដែលប្រើប្រាស់ជាក់ស្តែង តាមអត្រាថ្លៃមធ្យម ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្ម ណាដែលរងគ្រោះដោយការព្យួរ ឬបន្ថយសកម្មភាពផលិតកម្ម ឬអាជីវកម្ម ទោះជាទីតាំងនោះប្រើប្រាស់អគ្គិសនីដែលផ្គត់ផ្គង់អគ្គិសនីកម្ពុជា ឬ ក៏ផ្គត់ផ្គង់ដោយអ្នកផ្គត់ផ្គង់ឯកជន ដែលទិញប្រភពអគ្គិសនីពីអគ្គិសនីកម្ពុជាក៏ដោយ។

២) រក្សាស្ថានភាពផ្គត់ផ្គង់ និងការបង់ថ្លៃអគ្គិសនីដូចមុន ដោយមិនមានការកែប្រែចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្មណា ដែលមិនមានការប៉ះពាល់ធំដុំ អាចបន្តដំណើរការផលិតកម្ម ឬអាជីវកម្មរបស់ខ្លួនជាធម្មតាមប្រហាក់ប្រហែលពេលមុន។

៣) ផ្តល់ការលើកទឹកចិត្តដោយបន្ថយថ្លៃអគ្គិសនីចំនួន ២៥ភាគរយ លើការបង់ថ្លៃអគ្គិសនី ដែលប្រើប្រាស់លើសពីចំនួនប្រើប្រាស់ប្រចាំខែមធ្យមក្នុងរយៈពេល ៣ខែដើមឆ្នាំ (ពីខែ មករា ដល់ខែមីនា) ចំពោះទីតាំងឧស្សាហកម្ម កសិកម្ម ពាណិជ្ជកម្ម និងសេវាកម្មណា ដែលបរិយាកាសអំណោយផលអាចបង្កើតសកម្មភាពផលិតកម្ម ឬអាជីវកម្មរបស់ខ្លួន ជួលទប់ការថយចុះនៃសេដ្ឋកិច្ច ក្នុងរយៈពេលអនុវត្តការណែនាំរបស់រាជរដ្ឋាភិបាលកម្ពុជាក្នុងការទប់ស្កាត់ការចម្លងមេរោគ Covid-19 ៕

ចំណេះដឹង! អ្វីជាយន្តការភាពជាដៃគូគយ-ផ្នែកឯកជន?

ដោយ វុត្ថា

ភ្នំពេញ៖ យន្តការភាពជាដៃគូគយ-ផ្នែកឯកជនត្រូវបានបង្កើតឡើងដោយប្រកាសលេខ ៩០៦ សហវ.ប្រក ចុះថ្ងៃទី០៩ ខែតុលា ឆ្នាំ២០០៩ របស់ក្រសួងសេដ្ឋកិច្ច និងហិរញ្ញវត្ថុ តាមរយៈការសម្រេចរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីលើកទឹកចិត្តឲ្យមានការចូលរួមរបស់ផ្នែកឯកជនក្នុងការជម្រុញនូវអនុលោមភាពច្បាប់ និងប្រសិទ្ធភាពនៃកិច្ចសម្រួលពាណិជ្ជកម្មនៅកម្ពុជា។

យន្តការនេះ ត្រូវបានប្រកាសជាផ្លូវការនាថ្ងៃទី២៦ ខែមករា ឆ្នាំ២០១០ ក្នុងគោល បំណងលើកកម្ពស់បរិយាកាសវិនិយោគ និងធុរកិច្ចល្អ ប្រកបដោយសមធម៌សម្រាប់ផ្នែកឯកជនបន្ថែមទៀត។

ដើម្បីបង្កើនប្រសិទ្ធភាពនៃដំណើរយន្តការនេះ ដោយឈរលើស្មារតីភាពជាដៃគូស្នើភាពគ្នារវាងគយ និងផ្នែកឯកជន ក្រសួងសេដ្ឋកិច្ចនិងហិរញ្ញវត្ថុបានសម្រេចចេញប្រកាសលេខ ៣២០ សហវ.ប្រក ចុះថ្ងៃទី២៦ ខែមីនា ឆ្នាំ២០១៥ ស្តីពីការកែសម្រួលសមាសភាពនិងកិច្ចដំណើរការភាព ជាដៃគូគយ-ផ្នែកឯកជន ដោយកែសម្រួលឲ្យមានសហប្រធានជាតំណាង អគរ និងផ្នែកឯកជនក្នុងសមសភាពថ្នាក់ដឹកនាំ និងក្រុមការងារបច្ចេកទេសទាំងបី ។

ក្រុមការងារបច្ចេកទេសទាំងបីមាន ៖

១. ក្រុមការងារគយ-ឧស្សាហកម្មបម្រើការនាំចេញវិស័យកាត់ដេរ

២. ក្រុមការងារគយ-ឧស្សាហកម្មបម្រើការនាំចេញវិស័យមិនមែនកាត់ដេរ

៣. ក្រុមការងារគយ-ធុរកិច្ចបម្រើទីផ្សារក្នុងស្រុក

យន្តការភាពជាដៃគូគយ-ផ្នែកឯកជនគឺជាយន្តការសម្របសម្រួលឲ្យមានកិច្ចសហការ និងការយោគយល់គ្នាទៅវិញទៅមក រវាងរដ្ឋបាលគយនិងផ្នែកឯកជនពាក់ព័ន្ធដើម្បីដោះស្រាយរាល់បញ្ហាពាក់ព័ន្ធនឹងគយឲ្យអស់លទ្ធភាពជាមុន មុននឹងឈានទៅដោះស្រាយកម្រិតអន្តរក្រសួង ឬដាក់ជូនវេទិការាជរដ្ឋាភិបាល-ផ្នែកឯកជន។ នេះគឺជាកត្តាមួយដ៏សំខាន់ក្នុងការធានានូវប្រសិទ្ធភាពនៃការអនុវត្តគោលនយោបាយនៃកិច្ចសម្រួល ពាណិជ្ជកម្មរបស់រាជរដ្ឋាភិបាលកម្ពុជា។

ដើម្បីបង្កើនប្រសិទ្ធភាពការអនុវត្តយន្តការភាពជាដៃគូគយនិងផ្នែកឯកជនប្រកបដោយប្រសិទ្ធភាព តម្រូវឲ្យមានកិច្ចសហប្រតិបត្តិការជិតស្និទ្ធបន្ថែមទៀតពីគ្រប់ភាគីពាក់ព័ន្ធ ដើម្បីរួមគ្នាដោះស្រាយ នូវរាល់បាតុភាពអសកម្ម ដែលនាំឲ្យកំណើនសេដ្ឋកិច្ចជាតិមិនស្របតាមគោលនយោបាយរបស់រាជរដ្ឋាភិបាលកម្ពុជា៕

ស្ថាប័នមីក្រូហិរញ្ញវត្ថុកាន់តែច្រើនបាននឹងកំពុងប្រែក្លាយទៅជាស្ថាប័នប្រាក់បញ្ញើរ និងសន្សំ

ដោយ វុត្ថា

ភ្នំពេញៈ ស្ថាប័នមីក្រូហិរញ្ញវត្ថុកម្ពុជា នាពេលបច្ចុប្បន្ននេះ បាននិងកំពុងប្រែក្លាយជាស្ថាប័នកម្ចីទៅជាស្ថាប័នបញ្ញើរ និងសន្សំ ដែលធ្វើឱ្យវិស័យសេដ្ឋកិច្ចកម្ពុជាកាន់តែមានសន្ទុះរីកចំរើន និងរក្សាបានក្នុងរង្វង់៧ភាគរយ ហើយបានធ្វើឱ្យជីវភាពរបស់ប្រជាពលរដ្ឋកាន់តែធូរធាពីមួយថ្ងៃទៅមួយថ្ងៃទៅមួយថ្ងៃ។

លោក ង៉ែត ជូ អ្នកជំនាញ និងជាអ្នកវិភាគសេដ្ឋកិច្ចឯករាជ្រ បានថ្លែងតាមរយៈការផ្សព្វផ្សាយរបស់សមាគមនមីក្រូហិរញ្ញវត្ថុកម្ពុជានៅថ្ងៃទី១៩ ខែឧសភានេះថា ស្ថាប័នមីក្រូហិរញ្ញវត្ថុកាលពីកន្លងមកនេះ ផ្តល់តែប្រាក់កម្ចី តែនាពេលច្ចុប្បន្ននេះ ផ្តល់សេវាកម្មប្រាក់បញ្ញើរ និងសន្សំ ដែលមានជម្រើសច្រើនដល់អតិថិជន និងជាផ្នែកមួយដ៏ល្អក្នុងវិស័យសេដ្ឋកិច្ច។

លោកបន្តថា “នេះជាការកសាងមូលដ្ឋានគ្រឹះ នៃសេដ្ឋកិច្ចរបស់ប្រទេសកម្ពុជា ជាជាងដែលយើងខ្ចីប្រាក់ មកពីខាងក្រៅស្រុកដែលមានថ្លៃដើមខ្ពស់ ក្នុងការបញ្ចេញសាច់ប្រាក់ក៏មានថ្លៃដើមខ្ពស់ផងដែរ” ។

លោកបណ្ឌិតប៊ុន មុនី អនុប្រធានសមាគមមីក្រូហិរញ្ញវត្ថុកម្ពុជា បានឱ្យដឹងដែរថា ធនាគារបានដាក់ការិយាល័យនៅតែក្នុងទីប្រជុំជន។ ចំណែកស្ថាប័មីក្រូហិរញ្ញវត្ថុមានទិសដៅជួយដល់ប្រជាពលរដ្ឋក្រីក្រ នៅតាមបណ្តាទីជនបទ ហើយវិស័យនេះ បាននឹងកំពុងលើកម្ពស់ និងលើកស្ទួយដល់ជីវភាពរបស់ប្រជាពលរដ្ឋខ្មែរបានយ៉ាងល្អ។

លោកបន្តថា “ស្ថាប័ននេះបានឆ្លើយតបទៅនឹងតម្រូវការ ជាក់ស្តែងរបស់ប្រជាពលរដ្ឋ និងបន្តជួយ ឱ្យវិស័យនេះ អាចរស់រានបានដោយខ្លួនឯង ប្រកបដោយនិរន្តរភាពនាពេលអនាគត” ។ លោកបន្តថា “វិស័យមីក្រូហិរញ្ញវត្ថុកម្ពុជា នឹងបន្តជាចលករយ៉ាងសំខាន់ ចូលរួមជាមួយរាជ រដ្ឋាភិបាលដើម្បីអភិវឌ្ឍសេដ្ឋកិច្ច សង្គម និងកសាងលើកកម្ពស់ ជីវភាព ប្រជាពលរដ្ឋកម្ពុជា” ។

លោក រ័ត្ន សុវណ្ណនរៈ អគ្គនាយកត្រួតពិនិត្យធនាគារជាតិកម្ពុជា បានឱ្យដឹងដែរថា កម្ពុជាបានរៀបចំសន្និសីទ បើកឱ្យដំណើរការវិស័យមីក្រូហិរញ្ញវត្ថុកាលពីឆ្នាំ ២០១៦ ហើយរហូតមកដល់ពេលនេះ វិស័យនេះបាននឹងកំពុងរីកចំរើនយ៉ាងខ្លាំង ជាពិសេសបានកៀរគរប្រភពមូលធនពីខាងក្រៅប្រទេស មកវិនិយោគនៅក្នុងប្រទេសកម្ពុជាលើវិស័យនេះ។

លោកបន្តថា “ធនាគារជាតិនៃកម្ពុជា បាននឹងកំពុងរៀបចំសិក្ខាសាលាផ្សព្វផ្សាយនៅតាមបណ្តាខេត្តនានាផ្សព្វផ្សាយ ដល់ប្រជាពលរដ្ឋទូទៅ និងអាជ្ញាធរមូលដ្ឋានឱ្យបានយល់ជ្រោតជ្រាបអំពី សារៈសំខាន់នៃវិស័យមីក្រូហិរញ្ញវត្ថុ និងហានិភ័យនានា” ។

លោករំពឹងថា វិស័យមីក្រូហិរញ្ញវត្ថុនឹងរួមចំណែក ក្នុងសមាហរណកម្មអាស៊ាន តាមរយៈការផ្តល់សេវាហិរញ្ញវត្ថុ ឱ្យបានសម្បូរបែបដល់ប្រជាពលរដ្ឋ នៅតាមទីប្រជុំជន និងជនបទ៕

អ្នកជំនាញអះអាងថាទីផ្សារជួលវិស័យខុនដូចាប់ផ្តើមកម្រើកឡើងវិញ

ដោយៈ រ៉ាណេត

ភ្នំពេញ ក្រោយភាពធូរស្រាលពីវិបត្តិនៃជំងឺឆ្លង Covid-19 នៅក្នុងប្រទេសកម្ពុជាកាលពីពេលថ្មីៗនេះ វិស័យអចលនទ្រព្យ ដែលធ្លាប់ទទួលរងនូវភាពស្ងប់ស្ងាត់ បានចាប់ផ្តើមកម្រើកឡើងវិញបន្តិចម្ដងៗ ដោយក្នុងនោះទីផ្សារជួយខុនដូ ក៏កំពុងមានសកម្មភាពឡើងវិញផងដែរ។

ចាប់តាំងពីពាក់កណ្តាលខែមេសា ឆ្នាំ២០២០ ក្រៅពីទីផ្សារទិញ-លក់អចលនទ្រព្យមួយចំនួនចាប់ផ្ដើមមានសកម្មភាពឡើងវិញ សម្រាប់តែទីផ្សារជួលខុនដូរ ដែលធ្លាប់ទទួលរងនូវភាពស្ងប់ស្ងាត់តាំងពីដើមឆ្នាំមកនោះ បានបង្ហាញពីភាពល្អប្រសើរជាបណ្តើរៗឡើងវិញហើយ។ នេះបើតាមការបញ្ជាក់ពីសំណាក់លោក ខន គង្គា អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA កាលពីរសៀលថ្ងៃទី១៩ ខែឧសភា ឆ្នាំ២០២០ កន្លងមកនេះ។

អ្នកជំនាញនៅក្នុងវិស័យខុនដូ លោក ខន គង្គាបានមានប្រសាសន៍បន្តថា “ចាប់តាំងពីដើមខែមករា ឆ្នាំ២០២០ ស្របពេលដែលការទិញ-លក់ នៅក្នុងវិស័យអចលនទ្រព្យកម្ពុជា ទទួលរងនូវភាពស្ងប់ស្ងាត់នោះ ទីផ្សារជួលខុនដូ ក៏ជួបឱបភាពផងដែរ ដែលបណ្តាលមកពីវិបត្តិនៃជំងឺ Covid-19 មានការផ្ទុះឡើងនៅក្នុងប្រទេសចិន និងបន្តសាយភាយទៅដល់បណ្តានានាជាបន្តបន្ទាប់” ។

លោកបានបន្តទៀតថា ភាពល្អប្រសើរនៃទីផ្សារជួលខុនដូយើងឃើញថា បានងើបឡើងវិញនៅពាក់កណ្ដាលខែមេសា ជាពិសេសនៅដើមខែឧសភានេះ បន្ទាប់ពីកម្ពុជាទទួលបានភាពធូរស្រាល និងអាចទប់ស្កាត់ការរីករាលនៃជំងឺឆ្លងបានយ៉ាងប្រសើរ។ ជាក់ស្ដែងពេលនេះ មានអតិថិជនក្នុងស្រុក និងបរទេសមួយចំនួន ជាពិសេសជនជាតិចិន បានធ្វើការកក់ជួលយូនីតខុនដូតាមរយៈ Online ជាបន្តបន្ទាប់។

លោកបន្តថា “ខ្ញុំគិតថាបន្តិចទៀតនេះ នឹងកាន់តែប្រសើរជាងនេះ ជាពិសេសនៅចុងឆ្នាំ២០២០ ប្រសិនបើរដ្ឋាភិបាលកម្ពុជា ក៏ដូចជារដ្ឋាភិបាលចិន អាចគ្រប់ការឆ្លងរាលដាលក្នុងប្រទេសបាន ហើយបើកឱ្យមានការធ្វើដំណើរឆ្លងប្រទេសឡើងវិញ” ។

នៅក្នុងរបាយការណ៍ស្រាវជ្រាវដែលចេញដោយ ក្រុមហ៊ុនភ្នាក់ងារអចកនទ្រព្យអន្តរជាតិ CBRE Cambodia កាលពីពេលកន្លងទៅនេះបានបង្ហាញថា នៅទូរាជធានីភ្នំពេញ មានគម្រោងខុនដូចំនួន៥ ស្មើនឹង២៨៤៣យូនីត បានទៅក្នុងទីផ្សារក្នុងត្រីមាសទី ១ នៃឆ្នាំនេះ ដែលបានធ្វើឱ្យខុនដូមានកំនើនរហូតដល់២០,៨៥១ យូនីត។ ទន្ទឹមនឹងនេះដែរ ការជួលប្រចាំខែជាមធ្យមក្នុងមួយម៉ែត្រការ៉េ សម្រាប់យូនីតដែលមានតម្លៃខ្ពស់គឺ ១៤,២១ដុល្លារ ធ្លាក់ចុះ ០,៤ភាគរយពីមួយត្រីមាស ទៅមួយត្រីមាស និង ១១,៧៩ដុល្លារសម្រាប់យូនីតខ្នាតមធ្យមធ្លាក់ចុះ ០,៦ភាគរយ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍កាលពីពេលថ្មីៗនេះថា ខុនដូនៅកម្ពុជាត្រូវបានអ្នកអភិវឌ្ឍន៍ធ្វើឡើងជា៣កម្រិត រួមមាន កម្រិតខ្ពស់សម្រាប់បំពេញតម្រូវការទៅផ្សារមកពីក្រៅស្រុក (ទីផ្សារជនបរទេស) ខុនដូកម្រិតមធ្យម និងកម្រិតសមរម្យសម្រាប់បំពេញតម្រូវការទីផ្សារក្នុងស្រុកដែលជាជនជាតិខ្មែរ។

លោកស្រីបន្តទៀតថា “បច្ចុប្បន្ននេះទីផ្សារខុនដូកម្រិតខ្ពស់មួយចំនួន ទទួលរងនូវផលប៉ះពាល់ ដោយសារតែទីផ្សារគោលដៅភាគច្រើន ផ្តោតលើជនបរទេសដែលកំពុងតែមានភាពប្រឈមខ្លាំង នឹងការវាយប្រហារដោយជំងឺឆ្លង Covid-19 ប៉ុន្តែសម្រាប់ទីផ្សារខុនដូតម្លៃមធ្យម និងតម្លៃសមរម្យ នៅតែមានបន្តមានទីផ្សារដែលជាតម្រូវការនៅក្នុងស្រុកជាជនជាតិខ្មែរ” ។

លោកស្រីបានបញ្ជាក់ថា យើងទទួលស្គាល់នៅក្នុងដំណាក់កាល នៃការវាយប្រហារដោយជំងឺឆ្លង Covid-19 ពិតជាបានធ្វើឱ្យប៉ះពាល់ ដល់វិនិស័យអចលនទ្រព្យនៅក្នុងកម្ពុជាមួយចំណែក ប៉ុន្តែសម្រាប់ផ្នែកការវិនិយោគលើវិស័យខុនដូកម្រិតមធ្យម និងកម្រិតសមរម្យ គឺនៅតែមានឱកាសដដែល៕

IMF ជំរុញប្រទេសជាសមាជិករក្សាលំហូរពាណិជ្ជកម្ម កំឡុងពេលនេះជាជាងផ្តោតលើភាពតានតឹងរវាងអាមេរិក និងចិន

ដោយ ប៊ី

ភ្នំពេញៈ មូលនិធិរូបិយវត្ថុអន្តរជាតិ (IMF) ជំរុញប្រទេសជាសមាជិក (G7) រក្សាការប្រាស្រ័យទាក់ទងគ្នា និងលំហូរពាណិជ្ជកម្ម ដែលគាំទ្រកំណើនសេដ្ឋកិច្ចពិភពលោកអស់រយៈពេលជាច្រើនទសវត្សរ៍កន្លងមកនេះ ជាជាងផ្តោតលើភាពតានតឹងរវាងសហរដ្ឋអាមេរិក និងចិនដែលបានកើនឡើងនៅក្នុងប៉ុន្មានសប្តាហ៍ថ្មីៗនេះកំឡុងពេលនេះ។

នៅពេលត្រូវបានសួរអំពីភាពតានតឹងជាថ្មីរវាងសហរដ្ឋអាមេរិក និងចិនដែលជាប្រទេសមានសេដ្ឋកិច្ចធំជាងគេទាំង២ នៅលើពិភពលោកលោកស្រី Kristalina Georgieva នាយកគ្រប់គ្រងនៃមូលនិធិរូបិយវត្ថុអន្តរជាតិ (IMF) បាននិយាយថា លោកស្រីកំពុងជំរុញប្រទេសជាសមាជិក(G7) ឱ្យរក្សាការប្រាស្រ័យទាក់ទងគ្នា និងលំហូរពាណិជ្ជកម្ម ដែលគាំទ្រកំណើនសេដ្ឋកិច្ចពិភពលោក អស់រយៈពេលជាច្រើនទសវត្សរ៍កន្លងមកនេះ។

ប្រទេស G7 រួមមាន កាណាដា បារាំង អាល្លឺម៉ង់ អ៊ីតាលី ជប៉ុន អង់គ្លេស និងអាមេរិក។

លោក Georgieva បានមានប្រសាសន៍ថា “យើងចាំបាច់ត្រូវរក្សាលំហូរពាណិជ្ជកម្មឱ្យបើកចំហ ជាពិសេសសម្រាប់ការផ្គត់ផ្គង់វេជ្ជសាស្ត្រ និងស្បៀងអាហាររយៈពេលវែងដើម្បីស្វែងរកវិធី ដើម្បីជំនះនូវអ្វីដែលកំពុងកើតឡើង កំឡុងពេលវិបត្តិនេះ” ។ លោកបន្តថា “យើងចង់បន្តកសាងអនាគត ប្រកបដោយវិបុលភាពសម្រាប់ទាំងអស់គ្នា ដោយជម្នះវិបត្តិជំងឺCOVID-19នេះ” ។

ភាពតានតឹងរវាងសហរដ្ឋអាមេរិក និងចិនបានកើនឡើងនៅក្នុងប៉ុន្មានសប្តាហ៍ថ្មីៗនេះ ដោយមន្ត្រីទាំងសងខាងបានស្នើកិច្ចព្រមព្រៀងដ៏លំបាកមួយ នៃសង្គ្រាមពាណិជ្ជកម្មរយៈពេល១៨ខែដ៏ជូរចត់ ដែលអាចត្រូវបានគេបោះបង់ចោលជាច្រើនខែ បន្ទាប់ពីវាត្រូវបានចុះហត្ថលេខា។

លោកស្រី Georgieva បានព្រមានប្រឆាំងនឹងការវិលត្រឡប់ ចូលទៅក្នុងរបបគាំពារនិយម។

លោកស្រីបានប្រាប់សារព័ត៌មានរ៉យទ័រថា “យើងមិនគួរងាកចេញពីអ្វីដែលបានធ្វើការសម្រាប់ប្រជាជនគ្រប់ទីកន្លែងនោះទេ រួមមាន ការបែងចែកនៃកម្លាំងពលកម្ម និងកិច្ចសហការ និងពាណិជ្ជកម្ម ដែលធ្វើឱ្យតម្លៃទំនិញ និងសេវាកម្មធ្លាក់ចុះ និងភាពក្រីក្រនៅក្នុងប្រទេស និងនៅទូទាំងប្រទេសទាំងអស់ថមថយ” ។

IMF ត្រូវបានបង្កើតឡើងបន្ទាប់ពីសង្គ្រាមលោកលើកទី២ ដើម្បីលើកកម្ពស់ស្ថេរភាពហិរញ្ញវត្ថុ ជួយសម្រួលដល់ពាណិជ្ជកម្ម និងកាត់បន្ថយភាពក្រីក្រនៅជុំវិញពិភពលោក។

លោកស្រី Georgieva បានបន្ថែមថា IMFបានផ្តល់ហិរញ្ញប្បទានបន្ទាន់ដល់ប្រទេសចំនួន៥៦ ចាប់តាំងពីវិបត្តិបានចាប់ផ្តើម ហើយនឹងសម្រេចលើសំណើ ៤៧បន្ថែមទៀតឱ្យបានឆាប់តាមដែលអាចធ្វើទៅបាន។

អ្នកនាំពាក្យរបស់ IMF បាននិយាយថា ហិរញ្ញប្បទានបន្ទាន់ចំនួន២១ពាន់លានដុល្លារ ដែលមានអត្រាការប្រាក់ទាបបំផុត ត្រូវបានផ្តល់ឱ្យប្រទេសនានា រហូតមកដល់ពេលនេះ។

លោក Georgieva បាននិយាយថាមូលនិធិនេះ ក៏អាចផ្តល់ជំនួយក្នុងការជួយដល់ប្រទេសក្រីក្របំផុត ក្នុងការទូទាត់ការផ្តល់សេវាបំណុលរបស់ពួកគេទៅឱ្យ IMF រហូតដល់ចុងឆ្នាំ បន្ទាប់ពីការប្តេជ្ញាចិត្តផ្តល់ប្រាក់កម្ចីថ្មីពីសមាជិករបស់ខ្លួន៕ Economic Times

វិភាគ៖ តើអ្នកវិនិយោគចិនមានសារសំខាន់ដូចម្តេចក្នុងវិស័យអចលនទ្រព្យនៅកម្ពុជា?

ដោយ ប៊ី

ភ្នំពេញ៖ បច្ចុប្បន្នមានការសង្កេតឃើញថា ប្រជាជនចិនចាប់ផ្តើមត្រឡប់មកកម្ពុជាបណ្តើរៗ ប៉ុន្តែគេមិនទាន់ច្បាស់ថា តើការមកដល់របស់ពួកគេក្នុងគោលបំណងអ្វី ខណៈមានទស្សនៈជាច្រើនជុំវិញ ការត្រឡបមកវិញរបស់វិនិយោគិនចិនថា នឹងផ្តល់ប្រយោជន៍ច្រើនចូលក្នុងវិស័យអចលនទ្រព្យ ដែលកំពុងរងផលប៉ះពាល់ដោយជំងឺរាតត្បាត COVID-19 ។

កាលពីពេលថ្មីៗនេះ សេដ្ឋកិច្ចរបស់ប្រទេសចិនត្រូវបានរំពឹងថា នឹងងើបឡើងវិញនៅក្នុងត្រីមាសទី២ ខណៈអ្នកជំនាញអចលនទ្រព្យកម្ពុជា បានអះអាងការងើបឡើងវិញនៃសេដ្ឋកិច្ចចិន នឹងជះឥទ្ធិពលវិជ្ជមាន ដល់វិស័យអចលនទ្រព្យនៅកម្ពុជា ដោយសារវិនិយោគិនចិនឈរនៅលំដាប់លេខ១ក្នុងវិស័យនេះ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុនីម បានប្រាប់គេហទំព័រ Propertyarea.asia នៅថ្ងៃនេះថា ចិនបានបោះទុនវិនិយោគច្រើនជាងគេ នៅក្នុងវិស័យអចលនទ្រព្យនៅកម្ពុជា ខណៈវិនិយោគចិនមានភាពវ័យឆ្លាត និងដឹងច្បាស់ពីសក្តានុពលរបស់វិស័យអចលនទ្រព្យនៅកម្ពុជា។

លោកបានថ្លែងថា “មុននឹងវិនិយោគក្នុងវិស័យអ្វីមួយ អ្នកវិនិយោគបរទេស មិនថាតែចិននោះទេ ពួកគេសុទ្ឋតែបានសិក្សាច្បាស់លាស់ជាមុនសិន។ ដូចបានឃើញគម្រោងជាច្រើន ដែលវិនិយោគដោយជនជាតិចិននៅកម្ពុជា ជាគំរោងដែលផ្តល់ផលប្រយោជន៍ និងចំណេញយ៉ាងច្រើននាពេលអនាគត” ។

លោកបានថ្លែងថា “បញ្ហាប្រឈមបច្ចុប្បន្នគឺជាបញ្ហារយៈពេលខ្លី ហើយនៅពេលអ្វីៗត្រឡប់មករកសភាពធម្មតាឡើងវិញ វិស័យអចលនទ្រព្យនៅកម្ពុជានឹងកំណើនកាន់តែខ្លាំងជាងមុនទៅទៀត” ។ លោកបានបន្តថា “ការងើបឡើងវិញសេដ្ឋកិច្ចចិន គឺជារឿងល្អមួយសម្រាប់អចលនទ្រព្យនៅកម្ពុជា ព្រោះគាត់នឹងមកបន្តការវិនិយោគនៅកម្ពុជា” ។

ចិនឈរក្នុងលំដាប់ទី១ ដែលបានចាក់បញ្ចូលការវិនិយោគផ្ទាល់ពីបរទេស ក្នុងវិស័យអចលនទ្រព្យនៅកម្ពុជា ខណៈទុនវិនិយោគរបស់ចិនមានប្រមាណជាង ១០០០ពាន់ប៊ីលានរៀល ស្ថិតនៅនាំមុខក្នុងចំណោមប្រទេសធំៗចំនួន៤ផ្សេងទៀត ដែលកំពុងវិនិយោគលើវិស័យនេះ។ នេះបើយោងតាមរបាយការណ៍ប្រចាំឆ្នាំ ២០១៩ របស់ធនាគារជាតិនៃកម្ពុជាដែលចេញកាលពីដើមខែនេះ។

របាយការណ៍បានឱ្យដឹងថា “លំហូរចូលទុនវិនិយោគ ក្នុងវិស័យអចលនទ្រព្យនេះ ក្នុងនោះ ចិនមានទុនវិនិយោគជាង១ពាន់ប៊ីលានរៀល ដោយឈរក្នុងលំដាប់ទី១,សិង្ហបុរី ចំនួន ២៧១ប៊ីលានរៀល ឈរក្នុងលំដាប់ទី២, អាមេរិកជាង ២១៤ ប៊ីលានរៀល ឈរក្នុងលំដាប់ទី៣, កូរ៉េខាងត្បូងចំនួន ១០៩ ប៊ីលានរៀល, ជប៉ុន ៦២ ប៊ីលានរៀល និងប្រទេសផ្សេងៗទៀតប្រមាណជាង ៧៨ ប៊ីលានរៀល” ។

ជាមួយគ្នានេះ នាយិកាប្រចាំប្រទេសក្រុមហ៊ុនភ្នាក់ងារ អចលនទ្រព្យអន្តរជាតិ CBRE Cambodia លោកស្រីអាន សុធីតា បានមានប្រសាសន៍ឲ្យដឹងផងដែរថា ការងើបឡើងសេដ្ឋកិច្ចរបស់ប្រទេសចិន នឹងផ្តល់ផលវិជ្ជមាន ដល់វិស័យអចលនទ្រព្យនៅកម្ពុជា ខណៈបច្ចុប្បន្នវិបត្តិការ COVID-19 ធ្វើឱ្យមានផលប៉ះពាល់ជាសកល មិនត្រឹមតែកម្ពុជាប៉ុណ្ណោះទេ។

លោកស្រីបានបន្តថា “ការបើកសេដ្ឋកិច្ចរបស់ប្រទេសចិន នឹងផ្តល់ប្រយោជន៍ដល់វិស័យអចលនទ្រព្យនៅកម្ពុជា ប៉ុន្តែវាទាមទាររយៈពេលទៅខាងមុខ សម្រាប់កម្ពុជាទទួលបានចំហាយកំណើនសេដ្ឋកិច្ចរបស់ចិន” លោកបានលើកឡើងថា “យើងដឹងហើយ ចិនឈរនៅលំដាប់កំពូលនៃអ្នកវិនិយោគ ក្នុងវិស័យអចលនទ្រព្យនៅកម្ពុជា” ។

សេដ្ឋកិច្ចរបស់ប្រទេសចិនត្រូវបានរំពឹងថា នឹងងើបឡើងវិញនៅក្នុងត្រីមាសទី២ បន្ទាប់ពីបានធ្លាក់ចុះនៅក្នុងត្រីមាសទី១ ចំពេលដែលការរីករាលដាលនៃជំងឺ Covid-19 ។ នេះបើតាមការព្យាករណ៍របស់សេដ្ឋវិទូកាលពីសប្តាស៍មុន។

លោក Piao Renjin អ្នកវិភាគប្រចាំក្រុមហ៊ុន NH Investment & Securities នៅទីក្រុងសេអ៊ូលបាននិយាយថា ប្រទេសចិនបានឆ្លើយតបយ៉ាងឆាប់រហ័ស ចំពោះការរីករាលដាល នៃការគ្របដណ្តប់លើជំងឺ Covid-19 ដោយមានកញ្ចប់ថវិកាជំរុញសេដ្ឋកិច្ច និងហិរញ្ញវត្ថុ នាំឱ្យមានការស្ទុះងើបឡើងវិញ យ៉ាងឆាប់រហ័សនៅក្នុងទីផ្សារហិរញ្ញវត្ថុ។

អ្នកវិភាគរូបនេះបាននិយាយថា “រដ្ឋាភិបាលចិនត្រូវបានគេព្យាករណ៍ថា នឹងពង្រីកវិធានការជំរុញសារពើពន្ធនិងរូបិយវត្ថុ ហើយអ្នកអាចមើលឃើញការងើបឡើងវិញ នៅក្នុងប្រទេសចិនក្នុងត្រីមាសទី២” ៕

កាលពីថ្ងៃពុធទី៥ ខែកុម្ភៈ ឆ្នាំ ២០២០ សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដំណើរទស្សនកិច្ចផ្លូវការទៅប្រទេសចិន។

អ្នកវិភាគបានលើកឡើងថា ដំណើរទស្សនកិច្ចរបស់សម្តេចតេជោ នឹងផ្តល់ផលវិជ្ជមានច្រើនដល់កម្ពុជា ដោយនឹងនាំមកវិនិយោគចិនចូលកម្ពុជាបន្ថែម ខណៈវិនិយោគចិនបាន និងកំពុងឈរលើលំដាប់កំពូលនៃវិនិយោគិនបរទេសនៅកម្ពុជា។

លោកបណ្ឌិតហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានធ្លាប់ប្រាប់គេទំព័រ Propertyarea.asia ថា ដំណើរទស្សនកិច្ចរបស់សម្តេច ទៅជួបជាមួយ ឯកឧត្តមស៊ី ជីនពីង កាលពីពេលថ្មីៗនេះ មានសញ្ញាល្អច្រើន ហើយនឹងមានវិនិយោគត្រឡប់វិញ ព្រោះក្រុមហ៊ុនធំៗនៅប្រទេសចិន ជាទូទៅមានការជាប់ពាក់ព័ន្ធ និងការគាំទ្ររ ដ្ឋាភិបាលចិន។

លោកមានប្រសាសន៍ថា “កត្តានេះហើយដែលប្រធានាធិបតីបានអះអាងថា ចិន មានគម្រោងរួចហើយ គិតគូររួចហើយ ដូច្នេះអ្នកវិនិយោគចិនប្រាកដជាត្រឡប់មកវិញ” ។

លោកបានថ្លែងថា “វាជាកិច្ចសហប្រតិបត្តិការ លើយុទ្ធសាស្ត្រគ្រប់ជ្រុងជ្រោយ និងគោលនយោបាយជោគវាសនាតែមួយ របស់ប្រទេសទាំងពីរ និងកិច្ចព្រមព្រៀងនៅតែមានជាធរមាននៅឡើយ” ។ លោកបន្តថា “ក្នុងករណីដែលមានវិនិយោគិនមួយចំនួនមកប្រទេសកម្ពុជា ហើយត្រឡប់នៅវិញ គឺមានតែមួយចំនួនតូចទេ ដោយសារការរកស៊ីរបស់គាត់មិនចំណេញ កត្តាខ្លះទៀតមកពី EBA ដូរទៅរកស៊ីនៅប្រទេសផ្សេង កត្តាខ្លះទៀតដូរឈ្មោះក្រុមហ៊ុនរកស៊ី” ។

វិស័យជាទូទៅដែលភាគីចិន នឹងមកវិនិយោគវិស័យច្រើន ក្នុងនោះវិស័យកាត់ដេរ វិស័យថាមពល វិស័យរ៉ែ វិស័យទេសចរណ៍ អចលនទ្រព្យ លើកសិកម្ម វិស័យអេឡិចត្រូនិច និងធានាគារផងដែរ។

លោកបណ្ឌិតហុង វណ្ណៈបាននិយាយថា “ការត្រឡប់មកវិញរបស់អ្នកវិនិយោគចិននឹងផ្តោតទៅវិស័យចំរុះ ប៉ុន្តែយើងមិនមានហេតុផលណា ដើម្បីពន្យល់ថាតើវិស័យមួយណាលេចធ្លោជាងវិស័យណាទេ។ វាទៅតាមការចាប់អារម្មណ៍របស់វិនិយោគិនចិន។លោកឱ្យដឹងទៀតថា “ការវិលត្រឡប់មកវិញលើកនេះ មានរយៈវែង ឬខ្លីអាស្រ័យទៅលើវិស័យដែលគាត់វិនិយោគ។ វិស័យឧស្សហកម្មធនមធ្យម និងធ្ងន់ វិស័យកសិកម្ម និងវិស័យអចលនទ្រព្យធំៗគឺវិស័យដែលមានវិនិយោគរយៈពេលវែង” ។

លំហូរនៃការវិនិយោគដោយផ្ទាល់ពីបរទេស ចូលក្នុងវិស័យអចលនៈទ្រព្យ (រួមបញ្ចូលទាំងអចលនទ្រព្យ និងខុនដូគ្រប់ប្រភេទ) នៅកម្ពុជាត្រូវបានប៉ាន់ប្រមាណថា មានចំនួនជាង៤៣៧លានដុល្លារក្នុងឆ្នាំ២០១៩ ។ នេះបើយោងតាមទិន្នន័យពីរបាយការណ៍ត្រួតពិនិត្យប្រចាំឆ្នាំរបស់ធនាគារជាតិនៃកម្ពុជា ដែលបានចេញផ្សាយ នៅថ្ងៃទី២៧ ខែមេសាឆ្នាំ ២០២០ ។

ក្នុងចំណោមលំហូរនៃការវិនិយោគ ដោយផ្ទាល់ពីបរទេសសរុប ទៅក្នុងវិស័យអចលនទ្រព្យប្រទេសចិន មានទំហំទុនវិនិយោគធំជាងគេនៅកម្ពុជា។ ប្រទេសចិនបានចូលរួមវិភាគទានប្រហែល៥៨,៨ ភាគរយ (ឬជាង២៦២ លានដុល្លារ) នៃនៃការវិនិយោគដោយផ្ទាល់ពីបរទេសសរុប បន្ទាប់មកប្រទេសសិង្ហបុរី ១៥,២ ភាគរយ ឬ៦៧,៧៥ លានដុល្លារ អាមេរិក៥៣,៥ លានដុល្លារ ២៧,២៥លានដុល្លារពីប្រទេសកូរ៉េខាងត្បូង និង១៥,៥ លានដុល្លារពីប្រទេសជប៉ុន និង ១៩,៥ លានដុល្លារពីប្រទេសដទៃទៀត៕

តើរវាងលំនៅដ្ឋាន និងដីធ្លី គួរតែវិនិយោគទៅលើវិស័យណាទើបបានផលចំណេញខ្ពស់?

ដោយ ហ្សូលី

ភ្នំពេញៈ វិស័យអចលនទ្រព្យកម្ពុជាកំពុងកម្រើកឡើងវិញសន្សឹមៗ មិនថាវិស័យលំនៅដ្ឋាន ឬដីសាងសង់ផ្ទះនោះឡើយ ប្រជាពលរដ្ឋកម្ពុជាកំពុងសម្រុកទិញអចលនទ្រព្យសម្រាប់វិនិយោគ។

ដើម្បីដោះស្រាយចម្ងល់របស់អ្នក ដែលមានបំណងចង់ជាវអចលនវត្ថុ ប៉ុន្តែមិនទាន់ហ៊ានសម្រេចចិត្ត គប្បីដឹងពីព័ត៌មានជាក់ច្បាស់ជាមុនសិន។ ដូច្នេះអ្នកជំនាញបានចែករំលែកព័ត៌មានមួយចំនួនថា តើរវាងដីនិងលំនៅដ្ឋានគួរវិនិយោគលើមួយណា ដើម្បីទទួលបានផលចំណេញនៅថ្ងៃអនាគត? ។

លោក អ៉ិន ណាង អគ្គនាយកក្រុមហ៊ុនអចលនទ្រព្យ Show Up Real Estate បានមានប្រសាសន៍តាមទូរសព្ទមកគេហទំព័រ Property Area Asia នៅរសៀលថ្ងៃទី ១៩ ខែ ឧសភា ឆ្នាំ ២០២០ នេះថា ជាដំបូងវាអាស្រ័យទៅលើស្ថានភាពអតិថិជនដែរ ប្រសិនបើពួកគាត់មិនទាន់មានលំនៅដ្ឋានរស់នៅទេនោះ គួរណាតែទិញផ្ទះជៀសវាងការជួលផ្ទះ។

លោកបន្តថា “បើសិនជាពួកគាត់មានផ្ទះរួចហើយ គួរណាតែទិញដីវិញល្អជាង ដោយសារតែដី អាចមានឱកាសចំណេញច្រើនជាងការទិញផ្ទះ។ ម្យ៉ាងនៅពេលអនាគត ផ្ទះនោះអាចក្លាយជាសំណង់ចាស់បាន។ លោកបន្តថា “ជាទូទៅ កាលណាអ្នកទិញផ្ទះគឺខាងក្រុមហ៊ុនបានបូកទាំងថ្លែ សំណង់ និងដីរួចហើយ ហេតុនេះវាមានតម្លៃថ្លៃជាងដី។

ចំណែកឯដីវិញ ពួកគាត់អាចទិញបានទំហំធំ ហើយការចំណាយលើការសាងសង់មិនថ្លៃខុសគ្នាប៉ុន្មានទេពីមួយឆ្នាំទៅមួយឆ្នាំនោះ។ វាអាចខុសគ្នាតិចតួចអាស្រ័យទៅលើគ្រឿងសំណង់ តែបើថ្លៃដីវិញគឺខុសគ្នាច្រើនពីមួយឆ្នាំទៅមួយឆ្នាំ។

អ្នកជំនាញរូបនេះសង្កត់ធ្ងន់ថា សព្វថ្ងៃនេះមិនមែនផ្ទះថ្លៃទេ គឺជាដីទេដែលមានតម្លៃថ្លៃ ដូចនេះបើសិនជាអាចគួរតែវិនិយោគទៅលើដីវិញ វាមានឱកាសចំណេញខ្ពស់ជាង ជាពិសេសដីនៅតាមជាយក្រុងតែម្តង។

យ៉ាងណាមិញ កាលពីថ្មីៗនេះអ្នកជំនាញអចលនទ្រព្យ និងជាអគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century 21 Advance Property លោក ឡុង គីមសួគ៌ បានលើកឡើងវិញថា ការវិនិយោគទៅលើវិស័យដីធ្លី មិនមែនទទួលបានចំណេញទាំងអស់នោះឡើយ ព្រោះវាអាចនឹងមានហានិភ័យ ដូច្នេះអ្នកទិញគប្បីចេះសម្លឹងមើលឱកាសសិនមុននឹងលក់ចេញ។ សម្រាប់អ្នកដែលមានធនធានគ្រប់គ្រាន់ អាចទិញនៅតំបន់ឆ្ងាយៗ ប៉ុន្តែបើអ្នកមានជីវភាពមធ្យម ឬជាប់បំណុលធនាគារគឺមានអត្រាប្រឈមខ្ពស់។

ចំណែកឯនាយិកាក្រុមហ៊ុន Amatak Property Service លោកស្រី តាំង ហ៊ូរ វិញធ្លាប់បានថ្លែងមកកាន់គេហទំព័រ Property Area Asia ថា មិនថាវិស័យដីធ្លី លំនៅដ្ឋាន អគារអ្វីនោះទេ កាលណាតែវិនិយោគនូវគម្រោងដែលច្បាស់លាស់ និងទីតាំងមានសក្តានុពល គឺសុទ្ធតែទទួលបានផលចំណេញនៅពេលអនាគតទាំងអស់៕

បើមានថវិកាក្រោម ១០ម៉ឺនដុល្លារ តើគួរទិញលំនៅដ្ឋាននៅតំបន់មួយណាក្នុងរាជធានីភ្នំពេញ?

ដោយ ហ្សូលី

ភ្នំពេញ៖ ទីផ្សារលំនៅដ្ឋានកំពុងមានភាពរីកលូតលាស់ជាបន្តបន្ទាប់នៅក្នុងប្រទេសកម្ពុជា ដែលនេះជាសបញ្ជាក់ឱ្យឃើញពីសក្តានុពលនៃការវិនិយោគអចលនទ្រព្យ និងតម្រូវការអចលនវត្ថុក្នុងប្រទេស។ ដោយឡែក ស្ថិតក្នុងស្ថានការណ៍វិបត្តិសេដ្ឋកិច្ចពិភពលោកដោយសារការរងឥទ្ធិពលពីមេរោគរាតត្បាត តើអ្នកដែលមានថវិកាសមល្មមក្រោម ១០ ម៉ឺនដុល្លារ គួរតែសម្រេចចិត្តទៅវិនិយោគនៅតំបន់មួយណាក្នុងទីក្រុងភ្នំពេញ?

អ្នកជំនាញអចលនទ្រព្យ លោក សោម កែវម៉ាលីដា បានមានប្រសាសន៍ប្រាប់តាមទូរសព្ទមកកាន់គេហទំព័រ Property Area Asia នៅថ្ងៃទី ១៩ ខែឧសភា ឆ្នាំ ២០២០នេះថា សម្រាប់បងប្អូនដែលចង់ជាវលំនៅដ្ឋានសម្រាប់រស់នៅក៏បានផងឬថ្ងៃក្រោយចង់លក់ចេញវិញដើម្បីទទួលបានផលចំណេញទៅថ្ងៃក្រោយនោះ អាចវិនិយោគទៅលើតំបន់ជាយក្រុងបាន។

លោកបន្តថា ក្នុងករណីដែលអ្នកមានថវិកាត្រឹម ៧ ម៉ឺន ឬក្រោម ១០ ម៉ឺនដុល្លារនោះ អាចសម្លឹងមកតំបន់ក្បែរផ្លូវជាតិលេខ ២ ឬផ្លូវជាតិលេខ ៣ តំបន់កៀនស្វាយ និងតំបន់អរិយក្សត្រ ត្រើយម្ខាងក៏បាន ព្រោះតំបន់ទាំងអស់នេះសុទ្ធតែល្អនៅក្នុងពេលអនាគត។

ជាមួយគ្នានេះ អគ្គនាយកក្រុមហ៊ុនអចលនទ្រព្យ Easy Property លោក ម៉ម សិរីបញ្ញា បានលើកឡើងថា សម្រាប់អ្នកមានថវិកាក្រោម ១០ម៉ឺនដុល្លារ អាចទិញលំនៅដ្ឋានបាននៅក្នុងតំបន់ខណ្ឌដង្កោរ ឬខណ្ឌកំប៉ូល ព្រោះថានៅតំបន់នេះកំពុងមានការអភិវឌ្ឍជាហូរហែទៅលើវិស័យលំនៅដ្ឋាន។ ម្យ៉ាង ទីតាំងនោះគឺសាកសមសម្រាប់គ្រួសារខ្នាតតូចដែលចង់រស់នៅក្នុងទីក្រុងភ្នំពេញ ថ្វីត្បិតតែឆ្ងាយពីកណ្តាលក្រុងក៏ពិតមែន តែហ៊ុមព័ទ្ធទៅដោយផ្សារ ឬតំបន់រកស៊ី។

អ្នកជំនាញអចលនទ្រព្យមួយរូបទៀតគឺលោក ហៃ រ៉ាវី នាយកក្រុមហ៊ុនអចលនទ្រព្យ Daily Realty Group ធ្លាប់មានប្រសាសន៍កាលពីពេលកន្លងទៅថា អ្នកដែលមានជីវភាពមធ្យមចង់ស្វែងរកលំនៅដ្ឋានសមស្របក្នុងការរស់នៅនិងចង់ស្ថិ្តតនៅក្នុងតំបន់ទីប្រជុំជន ឬអាចលក់ចេញវិញបាននៅថ្ងៃអនាគត សូមសាកល្បងក្រឡេកទៅខណ្ឌច្បាតអំពៅ ឬព្រែកព្នៅ។

លោកបញ្ជាក់ប្រាប់ពីហេតុផលដែលគួរទិញលំនៅដ្ឋាននៅតំបន់នោះ ព្រោះទីនោះមានប្រជាពលរដ្ឋសម្រុកទៅច្រើន និងមានរោងចក្រ សហគ្រាស នៅជុំវិញ ជាពិសេសហេដ្ឋារចនាសម្ព័ន្ធមានភាពរលូនស្រួលទៀតផង៕

អ្នកជំនាញមើលឃើញសញ្ញាវិជ្ជមានលើវិស័យទេសចរណ៍ និងបដិសណ្ឋារកិច្ច ក្រោយCovid-19 នៅក្នុងប្រទេសមានភាពធូរស្រាល

ដោយវុត្ថា

ភ្នំពេញ៖ អ្នកជំនាញ អះអាងថា វិស័យទេសចរណ៍ និងបដិសណ្ឋារកិច្ចនៅក្នុងប្រទេសហាក់មានសញ្ញាវិជ្ជមានឡើងវិញ បន្ទាប់ពីមើឃើញប្រជាពលរដ្ឋខ្មែរក្នុងរយៈពេលកន្លងមកនេះចេញធ្វើសកម្មភាពទេសចរណ៍នៅតាមបណ្តាគោលដៅទេសចរណ៍នានា និងក្រោយCovid-19 មានភាពធូរស្រាល។

លោក ស្រី ឆាយ ស៊ីលីន ប្រធានសមាគមទីភ្នាក់ងារទេសចរណ៍កម្ពុជា (CATA) បានប្រាប់គេហទំព័រ propertyarea.asia នៅថ្ងៃទី ១៩ ខែឧសភា ឆ្នាំ ២០២០នេះ ឱ្យដឹងថា ប្រជាពលរដ្ឋកម្ពុជាមានការត្រេកអរចំពោះការធូរស្រាលនៃស្ថានភាពនៃជំងឺកូវីដ ១៩ នៅក្នុងប្រទេស ហើយបានធ្វើដំណើរទេសចរណ៍ស្ទើរតែគ្រប់គោលដៅទេសចរណ៍នៅក្នុងប្រទេសរៀងរាល់ចុងសប្តាហ៍។

លោកស្រីបន្តថា នេះ ជាសញ្ញាវិជ្ជមានមួយសម្រាប់វិស័យទេសចរណ៍ និងបដិសណ្ឋារកិច្ចរបស់កម្ពុជា ស្របពេលដែលរាជរដ្ឋាភិបាលតាមរយៈក្រសួងទេសចរណ៍បាននឹងកំពុងលើកកម្ពស់ និងជំរុញចលនាទេសចរណ៍នៅក្នុងស្រុក។

លោកស្រីបន្ថែមថា បើសិនជាមានការអូសបន្លាយក្នុងរយៈពេលយូនោះ វានឹងធ្វើឱ្យប៉ះពាល់ដល់វិស័យសេដ្ឋកិច្ច និងពាណិជ្ជកម្មនៅក្នុងប្រទេស តែយ៉ាងណាក៏ដោយក៏នៅមានហានីភ័យចំពោះប្រជាពលរដ្ឋដែលពុំបានការពារខ្លួននៅពេលធ្វើដំណើរទេសចរណ៍ខ្លះដែរ ខណៈដែលជំងឺនេះនៅតែបន្តមានវត្តមាននៅលើសកលលោក។

លោកស្រីបញ្ជាក់ថា នៅពេលឃើញមានប្រជាពលរដ្ឋកម្សាន្តច្រើនបែបនេះ វាជួយជំរុញឱ្យវិស័យបដិសណ្ឋារកិច្ច និងសេវាកម្មនានាងើបឡើងវិញ ហើយអាចឈរជើងបានតែ មិនទាន់ផលចំណេញនោះទេ។

អគ្គលេខាធិការសម្ព័ន្ធទេសចរណ៏ជាតិកម្ពុជា លោក ហូ វណ្ឌី បានអះអាងស្រដៀងគ្នាដែរថា ក្នុងរយៈពេលប៉ុន្មានសប្តាហ៍កន្លងមកនេះ ឃើញមានប្រជាពលរដ្ឋខ្មែរមានសកម្មភាពទេសចរណ៍នៅក្នុងស្រុក ដែលនេះ គឺជាសញ្ញវិជ្ជមានថ្មីមួយសម្រាប់វិស័យនេះ ស្របពេលដែលរាជរដ្ឋាភិបាល ជាពិសេសស្ថាប័នជំនាញបានប្រកាសពីស្ថានភាពធូស្រាលនៃជំងឺកូវីដ ១៩នៅក្នុងប្រទេស តែយ៉ាងណាក៏ត្រូវមានការគិតគូដល់ការការពារពីជំងឺនេះផងដែរខណៈជំងឺនេះ មិនទាន់ផុតរលត់នៅឡើយទេ។

លោកថ្លែងបន្តថា សញ្ញាវិជ្ជមាននេះ នឹងធ្វើឱ្យសេវាកម្មទាំងបីរបស់កម្ពុជានឹងដំណើរការឡើងវិញ គឺសេវាកម្មម្ហូបអាហារ សេវាកម្មដឹកជញ្ជូន និងសេវាកម្មស្នាក់នៅ ហើយក្រៅពីនេះ ក៏អាចរស់រានមានជីវិញផងដែរ តែយ៉ាងណាក៏ដោយវាមិនទាន់មានស្ថានភាពល្អប្រសើរនៅឡើយទេ ។

រដ្ឋមន្ត្រីក្រសួងទេសចរណ៍ លោក ថោង ខុន កាលពីកន្លងមកនេះ បានដាក់ចេញផែនការជំរុញចលនាទេសចរណ៍ក្នុងប្រទេស ឱ្យដំណើរការនៅតាមខេត្តគោលដៅ និងជាវិធានការមួយដ៏សំខាន់ដែលអង្គការទេសចរណ៍ពិភពលោកទទួលស្គាល់ ក្នុងពេលដែលវិស័យទេសចរណ៍ត្រូវទទួលរងនូវផលប៉ពាល់ពីជំងឺឆ្លង ឬវិបត្តិសេដ្ឋកិច្ចសកល។

លោកបន្តថា ការធ្វើដំណើរបស់ទេសចរក្នុងស្រុក នឹងចូលរួមចំណែកទ្រទ្រង់យ៉ាងសំខាន់ ដល់មូលដ្ឋានអាជីវកម្មទេសចរណ៍ នៅពេលដែលការធ្វើដំណើររបស់ទេសចរអន្តរជាតិមានការធ្លាក់ចុះ៕