អ័រគីដេ ពង្រីកគំរោងថ្មីជាមួយនឹងទីតាំងសក្តានុពលនៅពោធិ៍ចិនតុង

ដោយគង់ សូរិយា

ភ្នំពេញៈ ក្រុមហ៊ុនOKIDE DEVELOPMENT(អតីតក្រុមហ៊ុនអ័រគីដេវីឡា)បានចាប់ផ្តើមពង្រីកគំរោងអភិវឌ្ឍន៍លំនៅដ្ឋានថ្មីរបស់ខ្លួន ដែលមានទីតាំងនៅតំបន់ពោធិចិនតុង ជាតំបន់ដែលកំពុងមានការរីកចម្រើនលឿន និងងាយស្រួលតភ្ជាប់មកកណ្តាលរាជធានីជាមួយនឹងហេដ្ឋារចនាសម្ព័ន្ឋសម្បូរបែប។

យោងតាមសេចក្តីប្រកាសព៌តមានរបស់ក្រុមហ៊ុនOKIDE DEVELOPMENT ដែលគេហទំព័រPropertyarea.asiaទើបទទួលបាននាព្រឹកថ្ងៃទី១៩ ឧសភានេះបានឲ្យដឹងថា គំរោងថ្មីនេះត្រូវបានដាក់ឈ្មោះថា អ័រគីដេ ដឺពោធិ៍ចិនតុង ជាមួយនឹងទីតាំងក្បែរវត្តតាំងកសាង ជិតអាកាសយានដ្ឋានអន្តរជាតិភ្នំពេញ ជាតំបន់ទីប្រជុំជនថ្មី ដែលផ្តល់ភាពងាយស្រួលក្នុងការរស់នៅ និងប្រកបអាជីវកម្ម
ដោយគិតគូរដល់ផាសុខភាព និងមានហេដ្ឋារចនាសមស្រប សំរាប់ការរស់នៅគម្រោងថ្មីអ័រគីដេ ដឹពោធិ៍ចិនតុង បានផ្តោតលើគុណភាព សោភ័ណភាព និងហេដ្ឋារចនាសម្ព័ន្ឋធំទូលាយ ព្រមទាំងសួនច្បារ ដែលអាចផ្តល់់ការរស់នៅ ប្រកបដោយផាសុខភាពដល់អតិថិជន។

គម្រោងទីតាំងថ្មី របស់ក្រុមហ៊ុនORKIDE DEVELOPMENT មានទីតាំងស្ថិតនៅផ្លូវ105K សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលភាគច្រើនគេស្គាល់ថាជាផ្លូវវត្តតាំងកសាង។

សេចក្តីប្រកាសព៌តមានដដែលបានឲ្យដឹងថា គម្រោងថ្មីនេះ ក្រុមហ៊ុននឹងផ្តល់ជូននូវរចនាបទបែបសម័យទំនើប ប្លែកពីម៉ូតគម្រោងផ្សេងៗពីមុន ដោយសម្រឹតសម្រាំងយកមកជូនទីផ្សារកម្ពុជា នូវបែបផែនការរស់នៅទំនើបថ្មីមួយ ដែលពុំធ្លាប់មាន។

ក្រុមហ៊ុនOKIDÉ DEVELOPMENT នឹងចាប់ផ្តើមបើកលក់គំរោងថ្មីនេះ ជូនអតិថិជន នៅថ្ងៃទី8 ខែមិថុនា ឆ្នាំ2020 ខាងមុខនេះ ជាមួយនឹងការផ្តល់ជូនអតិថិជន នឹកស្មានមិនដល់ថែមទៀតផង។

អតិថិជនចង់ទិញ ដើម្បីឳកាសវិនិយោគ និងរស់នៅក្នុងគម្រោងថ្មីនេះ អតិថិជនអាចទទួលបានព័ត៌មានឲ្យកាន់តែច្បាស់លម្អិត ដោយផ្តល់លេខទូរស័ព្ទរបស់លោក អ្នកតាមរយៈប្រអប់សារហ្វេសប៊ុកផេក https://www.facebook.com/orkidedevelopment/ ឬ ខលទូរស័ព្ទ 085 999 809 ក្រុមការងារផ្នែកលក់នឹងធ្វើការទំនាក់ទំនងទៅកាន់ អ្នកលោកវិញនៅមុនពេលបើកលក់៕

រដ្ឋបាលរាជធានីភ្នំពេញនឹងសាងសង់ផ្លូវក្រោមដីចំនួន ៣ បន្ថែមទៀតនាពេលខាងមុខ

ដោយ ៖ រ៉ាណេត

ភ្នំពេញ ៖ រដ្ឋបាលរាជធានីភ្នំពេញ បានបញ្ជាក់សារជាថ្មីទៅលើគម្រោងសាងសង់ផ្លូវក្រោមដីចំនួន៣ទីតាំងបន្ថែមយ៉ាងប្រាកដ ដើម្បីកាត់បន្ថយវិបត្តិកកស្ទះចរាចរណ៍ដែលកំពុងកើតមានជាប្រចាំថ្ងៃនៅពេលបច្ចុប្បន្ននេះ។

អភិបាលរាជធានីភ្នំពេញ លោក ឃួង ស្រេង បានមានប្រសាសន៍ប្រាប់អ្នកសារព័ត៌មានកាលពីថ្ងៃទី១៨ ខែឧសភា ឆ្នាំ២០២០ថា គម្រោងសាងសង់ផ្លូវក្រោមដីទាំង៣ខ្សែរ ស្ថិតនៅក្នុងខណ្ឌផ្សេងគ្នា គឺដើម្បីដោះស្រាយបញ្ហាកកស្ទះចរាចរណ៍ដែលតែងកើតមានរាល់ថ្ងៃ និងជាការឆ្លើយតបទៅនឹងសំណូមពររបស់ប្រជាពលរដ្ឋផងដែរ។

លោកអភិបាលរាជធានីភ្នំពេញបានមានប្រសាសន៍បញ្ជាក់ថា “ការស្ថាបនាផ្លូវក្រោមដីទាំងនេះ គឺជាយន្តការចាំបាច់ក្នុងការដោះស្រាយវិបត្តកកស្ទះចរាចរណ៍ជាលក្ខណៈយូរអង្វែងរបស់ប្រជាពលរដ្ឋឆ្លងកាត់ ដែលក្នុងនោះក៏ជួយសម្រួលដល់ការធ្វើដំណើរប្រកបដោយសុវត្ថិភាពរបស់និស្សិតសិក្សានៅសាកលវិទ្យាល័យភូមិន្ទភ្នំពេញ ប្រជាពលរដ្ឋទូទៅ ក៏ដូចជាទេសចរ ដែលធ្វើដំណើរឆ្លងកាត់ផងដែរ តាមរយៈផ្លូវក្រោមដីឆ្លងកាត់ផ្លូវសហព័ន្ធរុស្សុីចូលដល់វិទ្យាស្ថានភាសាបរទេស IFL តែម្ដង”។

ប្រធានមន្ទីរសាធារណការរាជធានីភ្នំពេញ លោក សាំ ពិសិដ្ឋ ក៏បានថ្លែងប្រាប់អ្នកសារព័ត៌មានផងដែរថា ចំពោះគម្រោងស្ថាបនាផ្លូវក្រោមដីនៅចំណុចមុខវិទ្យាស្ថានភាសាបរទេស គឺរត់ពីក្រោមផ្លូវសហព័ន្ធរុស្សុី ដោយតភ្ជាប់ពីផ្លូវ២៧១ ឆ្ពោះចូលទៅក្នុងវិទ្យាស្ថានភាសាបរទេសតែម្ដង ដែលបង្កភាពងាយស្រួលដល់និស្សិតចេញចូល និងមិនប្រឈមគ្រោះថ្នាក់ និងការកកស្ទះចរាចរណ៍ទៀតនោះទេ”។ លោកបានបន្តថា “ដោយឡែកនៅតំបន់ក្ដាន់២វិញ ដែលកំពុងស្ថាបនារង្វង់មូលថ្មីនៅពេលបច្ចុប្បន្ននេះ ក៏មានផ្លូវក្រោមដីផងដែរ ដោយត្រូវរត់ពីក្រោមផ្លូវសហព័ន្ធរុស្សុី តភ្ជាប់ពីផ្លូវ១៦៩ ឆ្ពោះទៅផ្លូវបឹងកក់ ដើម្បីរំដោះការកកស្ទះចរាចរណ៍នៅតំបន់នេះផងដែរ”។

ផ្លូវក្រោមដីទាំង៣ខ្សែដែលកំពុងត្រៀមសាងសង់ រួមមានទី១៖ ផ្លូវក្រោមដីឆ្លងកាត់ផ្លូវជាតិលេខ១ សាងសង់ដោយក្រុមហ៊ុន បុរី ប៉េង ហួត ដែលតភ្ជាប់ពីផ្សារទំនើប PH ECO Mall ស្ថិតនៅក្នុងសង្កាត់និរោធន៍ ខណ្ឌច្បារអំពៅ រាជធានីភ្នំពេញ ,ទី២៖ ផ្លូវក្រោមដីនៅម្ដុំមុខវិទ្យាស្ថានភាសាបរទេស និងទី៣ ផ្លូវក្រោមដីនៅម្ដុំក្ដាន់២ ជិតក្រសួងការពារជាតិ ៕

អ្នកជំនាញ៖ ការអភិវឌ្ឍនិងទិញ-លក់លំនៅឋាននៅតែមានភាពល្អប្រសើរ

ដោយវុត្ថា

ភ្នំពេញៈ អ្នកជំនាញបានអះអាងថា រហូតមដល់ពេលនេះ ការអភិវឌ្ឍ និងការទិញ–លក់លើវិស័យនៅឋាន នៅក្នុងប្រទេសកម្ពុជា ពុំមានសញ្ញាណាមួយថមថយនោះទេ មានតែការរីកចំរើន និងបោះជំហ៊ានទៅមុខ បើទោះបីកម្ពុជាទទួលរងនូវផលវិបត្តិខ្លះក៏ដោយ។

លោក ហ៊ឹម សីហា នាយកស្រាវជ្រាវនៃក្រុមហ៊ុន Vtrust Appraisal ដែលជាអ្នកធ្វើការផ្ទាល់លើវិស័យលំនៅឋាន បានប្រាប់គេហទំព័រ propertyarea.asia នៅថ្ងៃទី ១៩ ខែឧសភា ឆ្នាំ ២០២០នេះឱ្យដឹងថា ទោះបីកម្ពុជាទទួលរងនូវផលប៉ះពាល់ពីជំងឺកូវីដ១៩ ក្នុងរយៈពេលខ្លីក្នុងកន្លងមកនេះ សម្រាប់ការអភិវឌ្ឍគម្រោង និងការទិញ–លក់លំនៅឋាននៅតែដំណើរការធម្មតា។

លោកថ្លែងថា “ចាប់តាំងពីដើមឆ្នាំ រហូតមកដល់ពេលបច្ចុប្បន្ននេះ យើងឃើញមានគម្រោងលំនៅឋានធំៗ និងក្រុមអ្នកទិញ–លក់នៅតែមានការធ្វើសកម្មភាព ជាពិសេសលើលំនៅឋានពិតប្រកដ ឬផ្ទះដែលមានសំណង់គ្រប់គ្រាន់ តែបើដីធ្លីក្នុងទំហំធំៗអាចមានបញ្ហាខ្លះ”។

លោកបន្តថា លំនៅឋានពិតប្រកដ ឬលំនៅឋានដែលមានសំណង់គ្រប់គ្រាន់ មានតម្រូវការច្រើន និងគ្មានការថមថយ ជាពិសេសនោះអ្នកអភិវឌ្ឍន៍បានបញ្ចុះតម្លៃ ដែលមានភាពកាន់តែងាយស្រួលដល់ស្វែងរកទិញ។ ម្យ៉ាងទៀត កាលពីក្នុងអំឡុងពេលមានកូវីដ១៩ កន្លងមកនេះ ក៏មានអ្នកដើររកទិញច្រើនផងដែរ ដែលធ្វើឱ្យវិស័យនេះ នៅតែតម្រូវការជារៀងរហូត និងតទៅមុខទៀត។

លោកស្រី តាំង ហ៊ួរ នាយិកាក្រុមហ៊ុនអចលនទ្រព្យ Amaktak Property Service បានប្រាប់ឱ្យដឹងដែរថា លំនៅឋាននៅតែមានតម្រូវការខ្ពស់ ជាពិសេស វិស័យលំនៅឋានសម្រាប់ប្រកបអាជីវកម្ម ដែលអនុញ្ញាតឱ្យអ្នកទិញ អាចមានលទ្ធភាពប្រកបអាជីវកម្មបាន ឬបង្កើតមុខរបរផ្សេងៗទៅតាមតម្រូវការ។ លោកស្រីបន្តថា ម៉្យាងទៀត អ្នកអភិវឌ្ឍលំនៅដ្ឋានមួយចំនួន បានផ្តល់ជូនលក្ខខណ្ឌបង់ប្រាក់ងាយស្រួលដូចជា ការបង់រំលស់ សម្រួលរយៈពេលបង់ឱ្យមានរយៈពេលវែង និងមានការយោគយល់ដល់អតិថិជន ដោយបត់បែនទៅតាមស្ថានភាពអតិថិជនទៀតផង ។

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីពេលថ្មីៗនេះ បានស្នើដល់ក្រុមហ៊ុនដែលធ្វើការ អភិវឌ្ឍន៍លំនៅឋានទាំងអស់ ពិនិត្យលទ្ធភាពក្នុងការបញ្ចុះតម្លៃជូនប្រជាពលរដ្ឋ ដែលមានតម្រូវការផ្ទះជាចាំបាច់ ខណៈដែលរាជរដ្ឋាភិបាលសម្រេចលើកលែងពន្ធប្រថាប់ត្រា ចំពោះផ្ទះដែលមានតម្លៃក្រោម៧ម៉ឺនដុល្លារ ក្នុងរយៈពេល១ឆ្នាំផងដែរ។

យោងតាមរបាយការស្រាវជ្រាវរបស់អ្នកជំនាញ បានអះអាងកន្លងមកនេះថា ប្រទេសកម្ពុជា មានតម្រូវការលំនៅឋានប្រមាណ៥ម៉ឺនខ្នងក្នុងមួយឆ្នាំៗ ខណៈភាគច្រើនជាតម្រូវការបស់យុវជន ដែលទើបរៀងការរួច និងអ្នកដែលមានវ័យកណ្តាល៕

ការស្ថាបនាផ្លូវល្បឿនលឿភ្នំពេញ-ព្រះសីហនុសាងសង់មានវឌ្ឍនភាពតិចតួច ខណៈការដោះស្រាយផលប៉ះពាល់មិនទាន់បបញ្ចប់

ដោយវុត្ថា

ភ្នំពេញៈ គម្រោងសាងសង់ផ្លូវល្បឿនលឿន(Expressway ) ភ្នំពេញ–ព្រះសីហនុ មានប្រវែងប្រមាណជាង១៩០ គីឡូម៉ែត្រ សម្រេចបានបាន២០,៦៥% និងដោះស្រាយផលប៉ះពាល់បាន៨៨,៨៤% គិតត្រឹមខែមេសា ឆ្នាំ ២០២០ ។ នេះបើយោងតាមក្រសួងសាធារណការ និងដឹកជញ្ជូន បានឱ្យដឹងនៅថ្ងៃទី ១៩ ខែឧសភា ឆ្នាំ ២០២០នេះ។

ក្រុមហ៊ុនសាងសង់ផ្លូវល្បឿនលឿនភ្នំពេញ ខេត្តព្រះសីហនុបានឱ្យដឹងកាលពីពេលថ្មីៗនេះ ថា បច្ចុប្បន្នការស្ថាបនាផ្លូវនេះ មានផលប៉ះពាល់ ដូចជា បង្គោលភ្លើងចំនួន១២ដើម ដែលក្រុមការងារមិនអាចសាងសង់ផ្លូវទី២ ប៉ះនឹងតំបន់គ្រប់គ្រងដោយបរិស្ថាន ដែលមិនអាចយកគ្រឿងចក្រចូលបាន។

លោកគួច ចំរើន អភិបាលខេត្តព្រះសីហនុឱ្យដឹងថា បញ្ហាប្រឈមទៅនឹងបង្គោលភ្លើង រដ្ឋបាលខេត្តនឹងបញ្ជូនក្រុមការងារចុះពិនិត្យ និងសម្រួលការដ្ឋានសង់ផ្លូវបណ្តោះអាសន្ន ដើម្បីយកគ្រឿងចក្រចូល ត្រូវមាននិយាមការច្បាស់លាស់ ដើម្បីស្នើទៅក្រសួងសាម៉ីជួយដោះស្រាយ។

គម្រោងសាងសង់ផ្លូវល្បឿនលឿននេះ ត្រូវបានបើកការដ្ឋានសាងសង់ នាថ្ងៃទី ២២ ខែ មីនា ឆ្នាំ ២០២០ ដោយសម្តេចតេជោហ៊ុន សែននាយករដ្ឋមន្រ្តីនៃកម្ពុជា។ ការស្ថាបនាផ្លូវនេះ គ្រោចំណាយរយៈពេលសាងសង់ចំនួន៤៨ខែ ហើយគ្រោងនឹងបញ្ចប់ការសាងសង់មុនពេលកំណត់នាចុងឆ្នាំ២០២២នេះ ដោយគ្រោងប្រើប្រាស់ថវិកាវិនិយោគប្រមាណ ២.០០០លានដុល្លារអាមេរិក៕

ធនាគារវិនិយោគអឺរ៉ុបទទួលបានជំនួយឥតសំណង ១២,៧ លានអឺរ៉ូ ដើម្បីសាងសង់រោងចក្រផលិតទឹកស្អាតនៅសង្កាត់បាក់ខែង

ដោយ ប៊ី
ភ្នំពេញ៖ ធនាគារវិនិយោគអឺរ៉ុប EIB ទទួលបានជំនួយ ១២,៧ លានអឺរ៉ូពីសហភាពអឺរ៉ុបសម្រាប់សាងសង់រោងចក្រប្រព្រឹត្តិកម្មទឹកស្អាតនៅសង្កាត់បាក់ខែង និងបណ្តាញចែកចាយទឹក ៥០០ គីឡូម៉ែត្រនៅរាជធានីភ្នំពេញ។
ហេដ្ឋារចនាសម្ព័ន្ធនឹងនាំមកនូវសុវត្ថិភាពទឹកផឹកនិងលើកកម្ពស់គុណភាពនៃការរស់នៅរបស់ប្រជាជនចំនួន ៧០០,០០០ នាក់ ដែលមកពីតំបន់ក្រីក្រមួយចំនួននៅក្នុងទីក្រុង។ នេះបើយោងតាមសេចក្តីប្រកាសព័ត៌មានរបស់ធនាគារវិនិយោគអឺរ៉ុប EIB នៅថ្ងៃនេះ។

ជំនួយឥតសំណងរបស់សហគមន៍អឺរ៉ុបនឹងពង្រីកបណ្តាញចែកចាយទឹកទៅដល់តំបន់ក្រីក្របំផុតនៅទីក្រុង។ វាបំពេញបន្ថែមនូវការវិនិយោគដែលមានទឹកប្រាក់ ១៨៥ លានអឺរ៉ូពីធនាគារវិនិយោគអឺរ៉ុប (EIB) និងទីភ្នាក់ងារអភិវឌ្ឍន៍បារាំង AFD។ ជាមួយការលាយបញ្ចូលគ្នានៃធនាគារ EIB ភ្នាក់ងារ AFD និងហិរញ្ញប្បទានសហគមន៍អឺរ៉ុបនឹងផ្តល់ទឹកស្អាតដល់ទីក្រុងភ្នំពេញ ដែលមានការរីកលូតលាស់យ៉ាងឆាប់រហ័ស ដែលតម្រូវការសម្រាប់ទឹកស្អាតត្រូវបានរំពឹងថានឹងកើនឡើងជិតទ្វេដងពីតម្រូវការបច្ចុប្បន្ននៅឆ្នាំ ២០៣០។

គ្រួសារប្រហែល ៨៦ ០០០ គ្រួសារនៅតាមសង្កាត់ក្រីក្របំផុតមួយចំនួននៅភ្នំពេញនឹងទទួលបានទឹកស្អាតប្រើប្រាស់ជាលើកដំបូងមិនធ្លាប់មាន ហើយជួយកាត់បន្ថយប្រភេទជំងឺមួយចំនួនឱ្យបាន ២៦ ភាគរយ។ គម្រោងនេះនឹងជះឥទ្ធិពលជាវិជ្ជមានដល់គ្រួសារក្រីក្របំផុត ព្រោះវានឹងកាត់បន្ថយការចំណាយប្រចាំថ្ងៃលើពិសារទឹកប្រចាំថ្ងៃ។ សព្វថ្ងៃប្រជាជនកម្ពុជាជិត ៧០ ភាគរយមិនមានប្រព័ន្ធផ្គត់ផ្គង់ទឹកស្អាត រួមទាំង ២៨ ភាគរយ នៃប្រជាជនរស់នៅភ្នំពេញ។
លោក Andrew McDowell អនុប្រធាននៃធនាគារ EIB បានមានប្រសាសន៍ថា “ធនាគារEIB សូមស្វាគមន៍ការផ្តល់ជំនួយរបស់សហភាពអឺរ៉ុបសម្រាប់គម្រោងផ្គត់ផ្គង់ទឹកបាក់ខែង ព្រោះវានឹងធ្វើអោយប្រសើរឡើងនូវគុណភាពនៃការរស់នៅរបស់ប្រជាជនរាប់ពាន់នាក់នៅក្នុងទីក្រុង។

លោក Andrew បានបន្តថា “គម្រោងនេះបង្ហាញពីអំណាចនៃកិច្ចសហប្រតិបត្តិការអឺរ៉ុប និងសាមគ្គីភាពជាមួយប្រទេសកម្ពុជា និងប្រជាជនរបស់ខ្លួន។ ការគាំទ្រ និងកិច្ចសហប្រតិបត្តិការរបស់យើងជាមួយរាជរដ្ឋាភិបាលកម្ពុជាកំពុងផ្តល់អំណាចដល់យើង ដើម្បីពង្រឹងភាពជាដៃគូ និងការគាំទ្ររបស់ EIB នៅក្នុងប្រទេសដើម្បីរួមចំណែកដល់ការអភិវឌ្ឍប្រកបដោយចីរភាពរបស់ប្រទេសកម្ពុជា”។

លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាបានមានប្រសាសន៍ថា “ទឹកគឺជាប្រភពដ៏សំខាន់នៃជីវិត ហើយការទទួលបានទឹកគឺជាសិទ្ធិជាមូលដ្ឋានរបស់មនុស្ស ហើយការរស់នៅដោយគ្មានទឹកស្អាតអាចបណ្តាលឱ្យមានជំងឺ និងភាពក្រីក្រ ហើយវាក៏ជាការគំរាមកំហែងដល់សុខភាពសាធារណៈផងដែរ”។

លោកស្រី បានបន្ថែមថា “គម្រោងទឹកស្អាតបាក់ខែងគឺជាគម្រោងវិនិយោគធំបំផុតរបស់អឺរ៉ុបនៅកម្ពុជាដែលផ្តល់ហិរញ្ញប្បទានដោយដៃគូអឺរ៉ុប និងកម្ពុជាជាច្រើនដែលក្នុងនោះជំនួយឥតសំណងរបស់សហភាពអឺរ៉ុបនឹងជួយធានាដល់សិទ្ធិរបស់សហគមន៍ក្រីក្រនៅភ្នំពេញ ក្នុងការទទួលបានទឹកស្អាត និងតម្លៃសមរម្យ”៕

រដ្ឋាភិបាលអនុញ្ញាតឱ្យមានការសាងសង់ស្ពានបេតុងខ្សែកាបតភ្ជាប់រវាទីក្រុងកោះពេជ្រ និងទីក្រុងកោះនរាថ្មី

ដោយវុត្ថា

ភ្នំពេញ៖ រដ្ឋាភិបាលកម្ពុជាតាមរយៈក្រសួងសេដ្ឋកិច្ចនិ ងហិរញ្ញវត្ថុ បានផ្តល់ជាគោលការណ៍អនុញ្ញាតឱ្យក្រុមហ៊ុន OCIC សាងសង់ស្ពានបេតុងខ្សែកាបតភ្ជាប់រវាទីក្រុងកោះពេជ្រទៅកាន់ទីក្រុងកោះនរាថ្មី ដែលស្ពាននេះ នឹងរួមចំណែកកាត់បន្ថយការកកស្ទះចរាចរណ៍យ៉ាងសំខាន់។

យោងតាមលិខិតមួយច្បាប់របស់លោក ឃួង ស្រេង អភិបាល នៃគណៈអភិបាលរាជធានីភ្នំពេញដែលគេហទំព័រ propertyarea.asia ទទួលបាននៅថ្ងៃទី ១៩ ខែឧសភា ឆ្នាំ ២០២០ នេះ ផ្ញើរជូន លោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា ក្រុមហ៊ុន OCIC ស្នើសុំគោលគារណ៍ទៅនាំចូលនូវសម្ភារៈ និងគ្រឿងចក្រមួយចំនួនដែលមានតម្លៃ សរុប ៤០, ៨៨៨ ៥៨០ ដុល្លារអាមេរិក ដោយពន្ធ និងអាការផ្សេងៗ ជាបន្ទុករបស់រដ្ឋ ហើយនឹងដឹកមកកាន់រាជធានីភ្នំពេញតាមមាត់ច្រកអន្តរជាតិនានាក្នុងពេលឆាប់ៗ ខាងមុខនេះ ។

លិខិតដដែលនេះ បញ្ជាក់ថា ក្រុមហ៊ុន OCIC បានទទួលគោលការណ៍អនុញ្ញាតពីរាជរដ្ឋាភិបាលក្នុងការអភិវឌ្ឍន៍កោះនរា ស្ថិតក្នុងខណ្ឌច្បារអំពៅ រាធានីភ្នំពេញ តាមរយៈលិខិតលេខ ១០៨៥ សជណ.កស ចុះថ្ងៃទី ២៨ ខែតុលា ឆ្នាំ ២០១៨ របស់ទីស្តីការគណៈរដ្ឋមន្ត្រី ។

លិខិតដដែលបន្តថា តាមផែនការក្រុមហ៊ុននឹងស្ថាបនាស្ពានបេតុងខ្សែកាបចំនួន ១ ខ្សែ ដើម្បីតភ្ជាប់ទីក្រុងកោះពេជ្រ ទៅគម្រោងអភិវឌ្ឍកោះនរា ហើយស្ពាននេះ នឹងជួយកាត់បន្ថយការកកស្ទះចរាចរណ៍របស់ប្រជាពលរដ្ឋនៅស្ពានមុនីវង្ស បានមួយកម្រិតធំ ពេលស្ថាបនារួច។

អគ្គនាយករងក្រុមហ៊ុន OCIC លោកទូច សំណាងធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ការស្ថាបនាច្រាំងទន្លេ និងចាក់ដីបំពេញ រួមទាំងហេដ្ឋារចនាសម្ព័ន្ឋដទៃទៀតបានចាប់ផ្តើម ជាមួយនឹងផែនការបញ្ចប់ការសាងសង់ហេដ្ឋារចនាសម្ព័ន្ឋទាំងស្រុងនៅឆ្នាំ២០២៣ខាងមុខ។
លោកបន្តថា ក្រុមហ៊ុនកន្លងមកបានសិក្សាស្ពានពីរខ្សែ ដោយផ្តោតលើជម្រើសលើទឹកដែលគ្រោងចំណាយប្រមាណ៦០លានដុល្លារអាមេរិក និងជម្រើសមួយទៀតជាស្ពានឆ្លងកាត់ក្រោមទន្លេ ដែលគ្រោងចំណាយទឹកប្រាក់២០០លានដុល្លារអាមេរិក ៕

ក្រុមហ៊ុន Oakwood គ្រោងពង្រីកសាខាអចលនទ្រព្យរបស់ខ្លួនចំនួន ២០បន្ថែម នៅរយៈពេល ២ឆ្នាំខាងមុខ

ដោយ ៖ ហ្សូលី

ភ្នំពេញ ៖ ក្រុមហ៊ុន Oakwood Asia Pacific Limited គឺជាក្រុមហ៊ុនលំនៅដ្ឋានសាជីវកម្មពិភពលោកមួយ ដែលគ្រោងនឹងពង្រីកសាខាអចលនទ្រព្យរបស់ខ្លួនឱ្យបានចំនួន ២០ បន្ថែមទៀត ក្នុងរយៈពេល ២ឆ្នាំខាងមុខទៀត។

ក្រុមហ៊ុន Oakwood បានធ្វើផែនការរៀបចំជាបន្ទាន់នូវការពង្រីកសាខារបស់ខ្លួននៅក្នុងតំបន់អាស៊ីប៉ាស៊ីហ្វិកចំនួន ២០ បន្ថែមទៀត ក្នុងគោលបំណងពង្រីកមុខមាត់ និងកេរ្តិ៍ឈ្មោះក្រុមហ៊ុនឱ្យកាន់តែទូលំទូលាយ និងល្បីល្បាញ។ នេះបើតាមសេចក្តីប្រកាសព័ត៌មានរបស់ក្រុមហ៊ុនមួយនេះកាលពីសប្តាហ៍មុន។

នៅក្នុងសេចក្ដីប្រកាសដដែលបានបង្ហាញពីគោលបំណងនៃការពង្រីកមុខជំនួញនេះ គឺដើម្បីផ្តល់សេវាកម្មបដិសណ្ឋាកិច្ច និងផ្តោតសំខាន់ទៅលើការគ្រប់គ្រងវិស័យនេះផងដែរ។ គម្រោងនេះបានបង្កើតឡើងដោយមានកិច្ចសហការជាដៃគូយុទ្ធសាស្ត្ររវាងក្រុមហ៊ុន Oakwood ជាមួយនឹងក្រុមហ៊ុនផ្តល់សេវាកម្មអន្តរជាតិ Dwellworks ក្នុងការពង្រឹងនូវកេរ្តិ៍ឈ្មោះ និងបម្រើការស្នាក់នៅរបស់ភ្ញៀវទូទាំងសកលលោក។

នាយកប្រតិបត្តិ Oakwood និងនាយកគ្រប់គ្រងប្រចាំតំបន់អាស៊ីប៉ាស៊ីហ្វិក លោក Dean Schreiber បានមានប្រសាសន៍ថា ភាពជាដៃគូស្របនឹងទិសដៅយុទ្ធសាស្ត្ររបស់ក្រុមហ៊ុនទាំង២ ដែលអនុញ្ញាតឱ្យក្រុមហ៊ុន Oakwood ផ្តោតលើការអភិវឌ្ឍ និងកំណើនផលប័ត្របដិសណ្ឋារកិច្ចរបស់ខ្លួន ចំណែកឯ Dwellworks មានតួនាទីពង្រីកយុទ្ធសាស្ត្ររបស់ខ្លួននៅក្នុងវិស័យលំនៅដ្ឋាន។

លោកបានមានប្រសាសន៍ថា “ Dwellworks គឺជាក្រុមហ៊ុនដ៏ឆ្នើមម្នាក់សម្រាប់បម្រើវិស័យឧស្សាហកម្មលំនៅដ្ឋានសាជីវកម្ម និងជាដៃគូយូរអង្វែងរបស់ក្រុមហ៊ុនយើង” ។

លោកបញ្ជាក់ថា “ពួកគេមានបទពិសោធន៍ស៊ីជម្រៅ និងស្គាល់ច្បាស់ពីដំណើរការអាជីវកម្មរបស់យើង ក៏ដូចជាការប្តេជ្ញាចិត្តរួមគ្នាក្នុងការផ្តល់សេវាកម្មពិសេសដល់អតិថិជន និងភ្ញៀវ។ ដំណាក់កាលថ្មីដ៏សំខាន់នេះ នៅក្នុងការវិវឌ្ឍរបស់ Oakwood នឹងអនុញ្ញាតឱ្យយីហោនេះផ្តោតលើការពង្រឹងសេវាកម្មរបស់ខ្លួនលើវិស័យអចលនទ្រព្យ និងផ្លាស់ប្តូរទៅជាក្រុមហ៊ុនគ្រប់គ្រងបដិសណ្ឋារកិច្ច ដើម្បីតម្រូវតាមកំណើនតម្រូវការប្រកបដោយចីរភាព និងជោគជ័យក្នុងអាជីវកម្ម” ។

Oakwood មានផលិតផលសេវាកម្មចំនួន ៦ ដែលស្ថិតនៅក្រោមយីហោក្រុមហ៊ុម Oakwood ដែលក្នុងនោះរួមមានដូចជា Oakwood Premier, Oakwood Apartments, Oakwood Residence, Oakwood Suites, Oakwood ស្ទូឌីយោ និង Oakwood WaterWalk៕

ទីផ្សារជួលអគារនៅកម្ពុជា អាចបន្តដាំក្បាលចុះរហូតដល់ចុងឆ្នាំ២០២០

ដោយ ៖ រ៉ាណេត

ភ្នំពេញ ៖ បន្ទាប់ពីមានអត្រាថេរនៃតម្រូវការទីផ្សារជួលអាគារសម្រាប់ប្រើប្រាស់ជាការិយាល័យក្រុមហ៊ុន ស្ថាប័នអាជីវកម្មនានា នៅក្នុងត្រីមាសទី១ ឆ្នាំ២០២០កន្លងទៅនោះ នៅក្នុងត្រីមាសទី២ ជាពិសេសនៅក្នុងអំឡុងខែឧសភា តម្រូវការជួលនៅក្នុងវិស័យនេះមានភាពថមថយ ហើយនឹងបន្តធ្លាក់ចុះរហូតដល់ចុងឆ្នាំ២០២០ ខាងមុខនេះ។

អគ្គនាយកក្រុមហ៊ុន Basac Realty Co., Ltd លោក នី ទីណាត បានមានប្រសាសន៍ប្រាប់តាមទូរស័ព្ទកាលពីល្ងាចថ្ងៃទី១៨ ខែឧសភា ឆ្នាំ២០២០ថា ភាពប្រឈមនឹងការធ្លាក់ចុះតម្រូវការជួលអាគារសម្រាប់ប្រើប្រាស់ជាការិយាល័យ ក្រុមហ៊ុន ក៏ដូចជាអាជីវកម្មផ្សេងៗកំពុងកើតមានយ៉ាងគំហុក ដែលតម្រូវឱ្យបណ្តាម្ចាស់អាគារ និងក្រុមហ៊ុនអភិវឌ្ឍន៍នានាមានផែនការបញ្ចុះតម្លៃជួល ឬកម្មវិធីលើកទឹកចិត្តផ្សេងៗដើម្បីអាចរក្សាបានចំណែកទីផ្សារ។

លោក នី ទីណាត បានមានប្រសាសន៍បន្តថា “មិនថាតែចំពោះអាគារសម្រាប់បម្រើឱ្យវិស័យការិយាល័យកម្រិតខ្ពស់ អគារជាន់ផ្ទាល់ដី ឬអាគារដទៃទៀត សម្រាប់ជួលនោះទេ ភាគច្រើនគឺកំពុងជួបភាពប្រឈមដោយសារតែអតិថិជនបញ្ឈប់កុងត្រាជួល។ ហេតុផលដែលបញ្ឈប់កុងត្រា ក៏ព្រោះដំណើរការអាជីវកម្មជួបភាពរាំងស្ទះ ជាក់ស្ដែងដូចជាក្រុមហ៊ុនផ្នែកបដិសណ្ឋារកិច្ច និងទេសចរណ៍ មណ្ឌលកម្សាន្ត និងមណ្ឌលស្ទីមសូណា ជាដើមដែលត្រូវផ្អាកសកម្មភាព ហើយក្រុមហ៊ុនបម្រើសេវាខ្លះក៏ជួបបញ្ហាដូចគ្នា ដោយសារតែបាត់ចំណូលពីប្រតិបត្តិការរបស់ខ្លួន” ។

លោកបានគូសបញ្ជាក់ថា ដើម្បីចូលរួមលើកស្ទួយវិស័យនេះឱ្យមានភាពរឹងមាំ និងយូរអង្វែង ហើយអាចរក្សាបាននូវចំណែកទីផ្សារស្ថិតស្ថេរ ម្ចាស់អាគារ ក៏ដូចជាក្រុមហ៊ុនអភិវឌ្ឍន៍អាគារសម្រាប់ជួល គួរមានការបន្ធូរបន្ថយ ឬបញ្ចុះតម្លៃសម្រាប់អតិថិជនរបស់ខ្លួន ដែលយ៉ាងហោចណាស់ក្នុងរង្វង់ចាប់ពី ៣០-៥០ ភាគរយនៃតម្លៃចាស់ ទម្រាំវិបត្តិមួយនេះមានភាពស្ងប់ស្ងាត់ ហើយចរន្តសេដ្ឋកិច្ចចាប់ផ្តើមល្អប្រសើរឡើងវិញ ។

តាមរបាយការណ៍ស្រាវជ្រាវ ដែលចេញដោយក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia កាលពីពេលថ្មីៗនេះបានបង្ហាញថា នៅក្នុងត្រីមានទី១ ដើមឆ្នាំ២០២០ ទីផ្សារនៃការជួលអាគារការិយាល័យ គឺនៅមានតម្រូវការ ដែលស្ថិតនៅក្នុងអត្រាថេរ ដោយសារតែភាគច្រើនទីផ្សារជួលបានធ្វើឡើងតាំងពីចុងឆ្នាំ២០១៩ ឬដើមឆ្នាំ២០២០ ។

នៅក្នុងរបាយការណ៍ដដែលបានបញ្ជាក់ទៀតថា ចរន្តទីផ្សារនៃការជួលអគារសម្រាប់បម្រើជាការិយាល័យ ក្រុមហ៊ុននេះ បានចាប់ផ្តើមជួបឱនភាពនៅក្នុងត្រីមាសទី២ ជាពិសេស នៅក្នុងអំឡុងខែឧសភាឆ្នាំ២០២០ នេះ ហើយអាចនឹងបន្តធ្លាក់ចុះរហូតដល់ដំណាច់ឆ្នាំ២០២០ខាងមុខនេះ៕

ADB គ្រោងផ្តល់ហិរញ្ញប្បទាន ៨៩៥ លានដុល្លារ ដើម្បីជួយអភិវឌ្ឍន៍សេដ្ឋកិច្ចកម្ពុជារយៈពេល៣ឆ្នាំ

ដោយ ៖ ប៊ី

ភ្នំពេញ ៖ ធនាគារអភិវឌ្ឍន៍អាស៊ីបានរៀបចំកម្មវិធីដែលមានតម្លៃ ៨៩៥ លានដុល្លារសម្រាប់ការវិនិយោគថ្មីៗនៅកម្ពុជា ពីឆ្នាំ២០២០-២០២។ នេះបើយោងតាមរបាយការណ៍ប្រចាំឆ្នាំរបស់ធនាគារអភិវឌ្ឍន៍អាស៊ី (ADB) ដែលបានចេញផ្សាយនៅថ្ងៃទី១៨ ខែឧសភា ឆ្នាំ២០២០ ។

វិស័យដែលបានកំណត់គោលដៅសម្រាប់ការវិនិយោគ គឺកសិកម្ម ធនធានធម្មជាតិ និងការអភិវឌ្ឍជនបទ ទឹក និងហេដ្ឋារចនាសម្ព័ន្ធទីក្រុង សេវាកម្មផ្សេងៗទៀត វិស័យដឹកជញ្ជូន ការអប់រំ និងថាមពល។

តាមរយៈការងារបែបជឿនលឿន ធនាគារអភិវឌ្ឍន៍អាស៊ីនឹងជួយសម្រួលដល់កិច្ចពិភាក្សាគោលនយោបាយផ្អែកលើភាពជាក់ស្តែង ដោយសហការជាមួយដៃគូអភិវឌ្ឍន៍ និងចូលរួមជាមួយវិស័យឯកជន និងសង្គមស៊ីវិលនៅកម្ពុជា។

ទីប្រឹក្សាបច្ចេកទេសដែលទទួលបានហិរញ្ញប្បទានពីធនាគារអភិវឌ្ឍន៍អាស៊ីនឹងធ្វើការជាមួយរដ្ឋាភិបាល ដើម្បីជំរុញការធ្វើផែនការឆ្លងវិស័យ និងគាំទ្រដល់ការច្នៃប្រឌិត ជាពិសេសទទួលយកឱកាសសម្រាប់ប្រទេសកម្ពុជា ដើម្បីក្លាយជាសេដ្ឋកិច្ចឌីជីថល។

លោកស្រី Sunniya Durrani-Jamal នាយិកាប្រចាំប្រទេសកម្ពុជារបស់ធនាគារអភិវឌ្ឍន៍អាស៊ី (ADB) ធ្លាប់ឱ្យដឹងក្នុងឯកសារទាក់ទងនឹងចក្ខុវិស័យអភិវឌ្ឍន៍អាស៊ីកាលពីសប្តាហ៍មុនថា ការព្យាករណ៍របស់ ADB មានកម្រិតទាបជាងការព្យាករណ៍របស់ធនាគារពិភពលោក ដែលបានចេញផ្សាយកាលពីខែមុន ដោយបានព្យាករណ៍ថា កំណើនសេដ្ឋកិច្ចពិតប្រាកដរបស់ប្រទេសកម្ពុជា មានចំនួន២,៥ភាគរយ ក្នុងឆ្នាំ២០២០ ប៉ុន្តែនឹងស្ទុះងើបឡើងវិញដល់៥,៩ ភាគរយ ក្នុងឆ្នាំ២០២១ ។

ធនាគារនេះបន្ថែមថា “ការថមថយល្បឿន ត្រូវបានរងផលប៉ះពាល់ជាចម្បង ពីជំងឺ Covid-19 ដែលបណ្ដាលឱ្យមានការថមថយល្បឿនសេដ្ឋកិច្ច នៅក្នុងបណ្ដាប្រទេសអភិវឌ្ឍន៍សំខាន់ៗ និងសាធារណរដ្ឋប្រជាមានិតចិន (PRC) ព្រមទាំងការកាត់បន្ថយលទ្ធភាពទទួលបានការចូលទីផ្សារនាំចេញរបស់ប្រទេសនេះ” ។

លោកស្រី Durrani-Jamal បានថ្លែងថា “សេដ្ឋកិច្ចកម្ពុជាត្រូវបានរំពឹងថា នឹងស្ទុះងើបឡើងវិញដល់ ៥,៧ ភាគរយក្នុងឆ្នាំ២០២១ ដែលសន្មត់ថា ការរីករាលដាល Covid-19 នឹងត្រូវបញ្ចប់ ខណៈសកម្មភាពសេដ្ឋកិច្ចនឹងត្រឡប់មកធម្មតាឡើងវិញ” ៕

ខណ្ឌចំនួន ៣ ក្នុងរាជធានីភ្នំពេញ កំពុងលេចធ្លោក្នុងការជាវខុនដូ

ដោយ ៖ ហ្សូលី

ភ្នំពេញ ៖ រាជធានីភ្នំពេញកំពុងមានភាពទាក់ទាញយ៉ាងខ្លាំងទៅលើការវិនិយោគវិស័យអចលនទ្រព្យ និងច្រើនប្រភេទដូចជា លំនៅដ្ឋាន បុរីលំនៅដ្ឋាន អាគារការិយាល័យ អាផាតមិន និងខុនដូជាដើម ដោយក្នុងនោះមានខណ្ឌចំនួន ៣ ដែលកំពុងមានភាពលេចធ្លោសម្រាប់ចរន្តនៃការទិញលក់ប្រភេទខុនដូ។

សម្រាប់អ្នកដែលមានបំណងចង់ជាវ ឬវិនិយោគទៅលើអចលនវត្ថុ គប្បីដឹងពីចំនុចមួយចំនួនជាមុនសិន មុននឹងសម្រេចចិត្តដោយផ្អែកលើកត្តាសំខាន់ៗមួយចំនួន ដូចជា តម្លៃ ទីតាំងភូមិសាស្ត្រ និងទំហំជាដើម។ ជាក់ស្តែង អគារខុនដូដែលកំពុងមានភាពរីកដុះដាល និងមានចរន្តទិញលក់ច្រើនជាងគេនៅក្នុងរាជធានីភ្នំពេញ គឺមាននៅក្នុងខណ្ឌចំនួន ៣ ដែលមានលេចធ្លោជាងគេ។

យោងទៅតាមអ្នកជំនាញអចលនទ្រព្យដែលធ្លាប់បានមានប្រសាសន៍ប្រាប់គេហទំព័រ Property Area កន្លងមកបានឱ្យដឹងថា ខណ្ឌដែលមានសក្តានុពលចំពោះវិស័យខុនដូជាងគេរួមមានដូចជា៖

ខណ្ឌ៧មករា ៖ បើប្រៀបធៀបជាមួយតំបន់ដទៃទៀត ដូចជា បឹងកេងកង ឬ ផ្លូវ៦០ម៉ែត្រ ខណ្ឌ៧មករា មានភាពអភិវឌ្ឍលើវិស័យខុនដូតិចជាងគេ។ ទោះបីយ៉ាងនេះក៏ដោយ តំបន់នេះក៏ស្ថិតនៅក្នុងតំបន់ក្រុងដែលមានផ្សារទំនើប ភោជនីយដ្ឋាន សាលារៀនអន្តរជាតិ មន្ទីរពេទ្យធំ ហ៊ុមព័ទ្ធជុំវិញ ដែលបង្ហាញថា ខណ្ឌ ៧មករា ក៏ជាទីប្រជុំជនសម្បូរទៅដោយប្រជាពលរដ្ឋជិតខាងរស់នៅជុំវិញ។ ជាពិសេស បើនិយាយពីតម្លៃវិញទៀតសោត ខុនដូនៅខណ្ឌនេះមានតម្លៃទាបជាងខណ្ឌផ្សេងៗ ព្រោះនៅមានការអភិវឌ្ឍថ្មីជាបន្តបន្ទាប់ ស្ថាបត្យកម្ម និងរចនាបថមានភាពទាន់សម័យច្រើន និងមានគុណភាពខ្ពស់ ព្រមទាំងតម្លៃអាចទទួលយកបាន។

ខណ្ឌដូនពេញ ៖ គឺជាខណ្ឌមួយដែលស្ថិតនៅចំកណ្តាលបេះដូងនៃទីក្រុងភ្នំពេញ និងជាតំបន់បណ្តុំទៅដោយក្រុមហ៊ុន និងមុខជំនួញនានា។ ខណ្ឌនេះគឺរាប់បញ្ចូលទាំងរមណីយដ្ឋានមាត់ទន្លេ អគាររបស់រដ្ឋាភិបាល និងរមណីយដ្ឋានប្រវិត្តសាស្ត្រវត្តភ្នំ។ បច្ចុប្បន្នតំបន់នេះមានការអភិវឌ្ឍអគារខ្ពស់ៗជាច្រើន ដែលជាភស្តុតាងបង្ហាញថា ខណ្ឌដូនពេញជាខណ្ឌពោរពេញដោយសក្តានុពលវិនិយោគ។ តម្លៃអចលនវត្ថុខុនដូវិញក៏ខ្ពស់ដែរ ដរាបណាទីតាំងខុនដូកាន់តែនៅកៀកមាត់ទន្លេ នោះអចលនទ្រព្យកាន់តែថ្លៃទៅតាមនោះ។ ភាគច្រើនក្នុងខណ្ឌនេះ ក៏មានការអភិវឌ្ឍលើអគារពាណិជ្ជកម្មផងដែរក្រៅពីខុនដូ។

ខណ្ឌបឹងកេងកង ៖ តំបន់នេះគឺមានប្រជាប្រិយភាពជាងគេបង្អស់ក្នុងរាជធានីភ្នំពេញ ដោយសារសក្តានុពលនៃតំបន់។ បុគ្គលដែលជាវ ច្រើនតែជាអ្នកដែលមានធនធានច្រើន និងចង់បានការរស់នៅប្រកបដោយភាពទាន់សម័យ និងងាយស្រួល។ នៅក្នុងខណ្ឌនេះ ហ៊ុមព័ទ្ធទៅដោយសណ្ឋាគារ អគារខ្ពស់ៗ ភោជនីយដ្ឋាន ផ្សារទំនើប ស្ថានទូត ជំនួញអន្តរជាតិ និងសាលាអន្តរជាតិ។ ជាទូទៅ ត្រូវចំណាយយ៉ាងហោចណាស់ក៏ ២០០,០០០ដុល្លារដែរ ក្នុងមួយយូនីត ហើយនៅពេលក្រោយម្ចាស់អចលនវត្ថុសម្រេចចិត្តទិញ ក៏នឹងមានឱកាសចំណេញខ្ពស់ផងដែរនាពេលអនាគត៕ InvestAsian

1...2,4002,4012,402...3,254 Page 2,401 of 3,254