កិច្ចព្រមព្រៀង​ពាណិជ្ជកម្ម​ដ៏​ធំ​ក្នុង​ពិភពលោក (RCEP) បង្ហាញ​ពី​ការវិវត្តន៍​ឆ្ពោះទៅរក​ការចុះហត្ថលេខា​នៅ​ចុងឆ្នាំ​នេះ

ដោយៈ ប៊ី

ភ្នំពេញៈ រដ្ឋមន្ត្រី​មកពី​ប្រទេស​ចំនួន១៥ នៅ​អាស៊ី​ប៉ាស៊ីហ្វិក​បាន​បន្ត​កិច្ចចរចា​របស់ខ្លួន ដើម្បី​បង្កើត​ភាពជា​ដៃគូ​សេដ្ឋកិច្ច​គ្រប់​ជ្រុងជ្រោយ​ក្នុង​តំបន់ (RCEP) កាលពី​សប្តាហ៍​មុន ដោយ​គ្មាន​ការចូលរួម​ពី​ប្រទេស​ឥណ្ឌា ដែល​បាន​ដើរ​ចេញពី​កិច្ចព្រមព្រៀង​ពាណិជ្ជកម្ម​សេរី (FTA)ដ៏​ធំ​កាលពី​ខែវិច្ឆិកា។


ថ្លែង​តាម​វីដេអូ Conference ក្រុម​រដ្ឋមន្ត្រី​បាន​និយាយថា ប្រទេស​សមាជិក​បានធ្វើ​ឱ្យមាន​វឌ្ឍនភាព​គួរឱ្យកត់សម្គាល់ ក្នុងការ​ឆ្ពោះទៅរក​ការចុះហត្ថលេខា លើ​កិច្ចព្រមព្រៀង​នេះ​នៅ​ខែវិច្ឆិកា​ឆ្នាំនេះ ដែល​យឺត​ជាង​កាលវិភាគ ខណៈ​ប្រទេសផ្សេងៗទៀត​កំពុង​ព្យាយាម​ធ្វើឱ្យ​ប្រសើរឡើង​នូវ​សេដ្ឋកិច្ច ដែល​រង​ការបំផ្លាញ​ដោយ​ជំងឺ COVID-19 ។

សមាជិក RCEP ដែលមាន​បណ្តា​ប្រទេស​អាស៊ាន​ទាំង១០ និង​ចិន ជប៉ុន កូរ៉េខាងត្បូង អូស្ត្រាលី និង​នូ​វែ​ល​សេ​ឡង់ ក៏បាន​បើកទ្វារ​ចំហ​សម្រាប់​ប្រទេស​ឥណ្ឌា​ផងដែរ ដោយហេតុថា ប្រទេស​នេះ​បាន​ចូលរួម​ក្នុង​កិច្ចចរចា RCEP ចាប់តាំងពី​បាន​បង្កើតឡើង​ក្នុង​ឆ្នាំ២០១២ ។

ប្រទេស​សមាជិក​បាន​និយាយ នៅក្នុង​សេចក្តីថ្លែងការណ៍​រួមមួយ​ថា មានការ​ទទួលស្គាល់​ស​ក្តា​នុព​ល​របស់​ប្រទេស​ឥណ្ឌា ក្នុងការ​ចូលរួមចំណែក​ដល់​ភាពរុងរឿង​ក្នុង​តំបន់។

ប្រទេស​ឥណ្ឌា​បាន​ដកខ្លួន​ចេញពី​ការចរចា RCEP ចំពេល​មានការ​ភ័យខ្លាច​ថា ការលុបបំបាត់​ពន្ធគយ នឹង​ផ្តល់​អត្ថប្រយោជន៍​ធំ​ដល់​ប្រទេស​ចិន ដែល​ការនាំចេញ​តម្លៃ​ទាប​មានការ​ប្រកួតប្រជែង​ខ្ពស់​នៅក្នុង​ទីផ្សារ​ឥណ្ឌា។

ប្រទេស​ចិន​មាន​ចំនួន ៣០% នៃ​ឱនភាព​ពាណិជ្ជកម្ម​រប​ស់​ឥណ្ឌា ដែល​កើនឡើង ១៦០ពាន់​លាន​ដុល្លារ​កាលពី​ឆ្នាំមុន។

ប្រទេស​ឥណ្ឌា​ក៏មាន​ឱនភាព​ពាណិជ្ជកម្ម ជាមួយ​ប្រទេស​សមាជិក RCEP ចំនួន១០ទៀតផង​ដែរ ហើយ​វិស័យ​ផលិតកម្ម និង​សេវាកម្ម​របស់ខ្លួន​មិន​ត្រូវបាន​មើលឃើញថា​មានការ​ប្រកួតប្រជែង​គ្រប់គ្រាន់ ដើម្បី​ការពារ​ផលប្រយោជន៍​ជាតិ​ឡើយ។ ការជំទាស់​ពី​កសិករ និង​អ្នកធ្វើ​ឧស្សាហកម្ម បាន​បង្ខំ​រដ្ឋាភិបាល​ទីក្រុង​ដេលី ឱ្យ​ដើរ​ចេញពី​កិច្ចព្រមព្រៀង​នេះ។

បើសិន​មាន​ចូលរួម​ពី​ឥណ្ឌា កិច្ចព្រមព្រៀង RCEP នឹងមាន​ប្រជាជន​ប្រហែល​ពាក់កណ្តាល​នៃ​ចំនួន​ប្រជាជន​ពិភពលោក និង​មួយ​ភាគបី​នៃ​ផលិតផល ក្នុងស្រុក​សរុប​របស់​ពិភពលោក។ បើ​គ្មាន​ប្រទេស​ឥណ្ឌា កិច្ចព្រមព្រៀង​នេះ នឹង​នៅតែមាន​ចំនួន​ប្រជាជន​ប្រមាណ ២,២ពាន់​លាន​នាក់​ហើយ​ស្មើ នឹង ២៩%នៃ​ផលិតផល​ក្នុងស្រុក​សរុប​របស់​ពិភពលោក។

ឥណ្ឌា​នៅតែ​ប្រកាន់​ជំហរ​ថា ខ្លួន​នឹងមិន​ចូលរួម​ក្នុង​ភាពជា​ដៃគូ​នេះ ក្នុង​ទម្រង់​បច្ចុប្បន្ននេះ។

រដ្ឋមន្ត្រីក្រសួង​កិច្ចការ​ខាងក្រៅ​ប្រទេស​ឥណ្ឌា លោក S Jaishankar បាន​ថ្លែង​កាលពីពេលថ្មីៗថា “វា​សំខាន់​ណាស់ ដែល​មិន​ធ្លាក់ចូល​ទៅក្នុង​ជំរើស​ខុស” ។

ខណៈ​ការវិលត្រឡប់ភ្លាមៗរបស់​ឥណ្ឌា គឺ​មិន​ទំនងជា​កើង​ឡើង ការចរចារ​ការទូត​នៅក្រៅ​ផ្លូវការ​នៅតែ​បន្ត។ មន្ត្រី​ជប៉ុន​នៃ​ក្រសួង​សេដ្ឋកិច្ច​ពាណិជ្ជកម្ម និង​ឧស្សាហកម្ម បាន​ប្រាប់​អ្នកយកព័ត៌មាន កាលពី​ថ្ងៃ​ព្រហស្បតិ៍​កន្លងមកនេះ​ថា “យើង​បាន​បញ្ជាក់ថា ប្រទេសនីមួយៗនឹង​ខិតខំ​ប្រឹងប្រែង ដើម្បី​ធ្វើឱ្យ​ប្រទេស​ឥណ្ឌា វិលត្រឡប់​មករក​កិច្ចពិភាក្សា​ឡើងវិញ” ។

ប្រទេស​វៀតណាម ដែល​បច្ចុប្បន្ន​ជា​ប្រធាន​ដឹកនាំ​អាស៊ាន និង​ដឹកនាំ​កិច្ចចរចា RCEP ក៏បាន​បង្ហាញ​ពី​ឆន្ទៈ​របស់ខ្លួន​ក្នុងការ​ដើរតួ​ជា​ស្ពាន​ជាមួយ​ឥណ្ឌា។

ច្បាស់​ណាស់ ទាំង​អាស៊ាន និង​ដៃគូ​ពាណិជ្ជកម្មសំខាន់ៗរបស់ខ្លួន​ដូចជា​ជប៉ុន និង​អូស្ត្រាលី​មិន មិនអាច​ទាញ​ឥណ្ឌា​ឱ្យចូល​រួ​មាន​បានទេ។ គំនិត​ជា​មូលដ្ឋាន​របស់​កិច្ចព្រមព្រៀង RCEPសម្រាប់​សមាជិក​ទាំងនេះ គឺ​ដើម្បី​បង្កើត​កិច្ចព្រមព្រៀង​ពាណិជ្ជកម្ម​មួយ ដែល​លាតសន្ធឹង​តំបន់ និង​ជៀសវាង​បង្កើត​តំបន់​សេដ្ឋកិច្ច ដែល​អាច​ផ្តោតលើ​ប្រទេស​ចិន​កាន់តែខ្លាំង​ឡើង។

ប្រទេស​ជប៉ុន គឺជា​អ្នកគាំទ្រ​ដ៏​ខ្លាំង​ចំពោះ​ការវិលត្រឡប់​របស់​ឥណ្ឌា។ ជាធម្មតា​ទីក្រុង​តូ​ក្យូ ចង់​ចូល​ទៅកាន់​ទីផ្សារ​ឥណ្ឌា​សម្រាប់​អ្នក​នាំចេញ​របស់ខ្លួន។ អូស្ត្រាលី​ក៏​សង្ឃឹម​ផងដែរ​ថា នឹង​ជំរុញ​ការនាំចេញ​ទៅកាន់​ប្រទេស​ឥណ្ឌា ខណៈពេលដែល​ការបង្កើន​ការវិនិយោគ​ផ្ទា​ល់ពី​បរទេស និង​ទំនាក់ទំនង​រវាង​ប្រជាជន​និង​ប្រជាជន តាម​យុទ្ធសាស្ត្រ​សេដ្ឋកិច្ច​ឥណ្ឌា​ដល់​ឆ្នាំ ២០៣៥ ។

ការវិលត្រឡប់​របស់​ឥណ្ឌា​ទៅ RCEP នឹង​ពង្រឹង​បណ្តាញ​អូស្ត្រាលី-ឥណ្ឌា-ជប៉ុន​នៅក្នុង​តំបន់​ឥណ្ឌូ​ប៉ាស៊ីហ្វិក ដោយ​លើកកម្ពស់​ចំណងទាក់ទង​សេដ្ឋកិច្ច ដើម្បី​ពង្រឹង​នូវ​ភាព​ស្អិតរ​មួ​ត ក្នុង​តំបន់​ប្រឆាំងនឹង​ការជ្រៀតជ្រែក​របស់​ចិន។

ទន្ទឹមនឹងនេះ លក្ខខណ្ឌ​ប្រឈម ដែល​បង្កើតឡើង​ដោយ​ជំងឺ COVID-19 គួរ​លើកទឹកចិត្ត​ដល់​ប្រទេស​ឥណ្ឌា ឱ្យ​ក្រឡេកមើល​កិច្ចព្រមព្រៀង RCEP ។ សេដ្ឋកិច្ច​ឥណ្ឌា​បាន​រង​ផលប៉ះពាល់​យ៉ាងធ្ងន់ធ្ងរ ដោយសារ​ជំងឺ Covid-19 និង​ភាព​អត់​ការងារ​ធ្វើ​កំពុង​កើនឡើង។

លើសពីនេះ​ទៀត ចំណង​ទំនាក់ទំនង​ការទូត និង​សេដ្ឋកិច្ច​ជាមួយ​ប្រទេស​ចិន ត្រូវបាន​ប៉ះពាល់​ដោយ​ជម្លោះ​រវាង​គ្នា កាលពី​ខែមិថុនា​រវាង​កងទ័ព របស់​ប្រទេស​ទាំងពីរ នៅតាម​បណ្តោយ​ព្រំដែន​ជម្លោះ​នៅ​តំបន់​ហិ​ម៉ាឡៃ (Himalayas) ។

បណ្តាញ​ខ្សែសង្វាក់​ផ្គត់ផ្គង់​នៅ​ឥណ្ឌូ​ប៉ាស៊ីហ្វិក ដែល​បាន​ធ្វើឡើង​ក្រោម RCEP អាចជួយ​បង្កើន គោលដៅ​មហិច្ឆតា​របស់​ឥណ្ឌា ក្នុងការ​ក្លាយជា​ប្រទេស​សេដ្ឋកិច្ច​ដែលមាន​ទំហំ​ទឹកប្រាក់៥ទ្រី​លាន​ដុល្លារ​នៅ​ឆ្នាំ ២០២៥ ៕

ចំណេះដឹង! ហេតុអ្វី​បានជា​គេ​បង្កើត​តំបន់​សេដ្ឋកិច្ច​ពិសេស​ឡើង?

ដោយ វុត្ថា

ភ្នំពេញៈ មូលហេតុ​ដ៏​សំខាន់​មួយ ដែល​ជំរុញ​ឲ្យ​រដ្ឋាភិបាល​ប្រទេសមួយ​បង្កើត​តំបន់​សេដ្ឋកិច្ច​ពិសេស​នេះ គឺ​ដើម្បី​ទាក់ទាញ​អ្នកវិនិយោគ​ពី​ក្រៅ​ស្រុក ឲ្យ​មក​បណ្ដាក់ទុន​រកស៊ី​នៅក្នុង​ប្រទេស​របស់ខ្លួន ព្រោះ​ការវិនិយោគ​ផ្ទាល់​ពី​ក្រៅប្រទេស (Foreign Direct Investment) មាន​សារៈសំខាន់ សម្រាប់​ស្រូប​ទាញ​ទុន​បន្ថែម​លើ​វិនិយោគិន នៅក្នុង​ស្រុក​ដែលមាន​ស្រាប់។

វត្ថុបំណង​សំខាន់ ផ្សេងទៀត គឺ​ដើម្បី​បង្កលក្ខណៈ​ល្អប្រសើរ សម្រាប់​ប្រទេសមួយ​ប្រកួតប្រជែង​ខាង​ទំនិញ/សេវាកម្ម និង​តម្លៃ​ទល់នឹង​ប្រទេស​ដទៃ នៅលើ​ទីផ្សារ​ក្នុង​តំបន់ និង​ទីផ្សារ​អន្តរជាតិ ផ្តល់​ការងារ​ធ្វើ​ជូន​ប្រជាពលរដ្ឋ និង​ជំរុញ​កំណើន​សេដ្ឋកិច្ចជាតិ ជាពិសេស​គេ​ច្រើន​ផ្ដោតលើ​ប្រកួតប្រជែង​ផ្នែក​ការនាំចេញ។

តំបន់​សេដ្ឋកិច្ច​ពិសេស សំដៅ​ទៅលើ​មជ្ឈមណ្ឌល​ពិសេស សម្រាប់​អភិវឌ្ឍន៍​វិស័យសេដ្ឋកិច្ច ដែល​ប្រមូលផ្ដុំ​នូវ​សកម្មភាព​ឧស្សាហកម្ម និង​សកម្មភាព​ពាក់ព័ន្ធ​ដទៃទៀត ហើយ​អាចមាន​តំបន់ឧស្សាហកម្ម​ទូទៅ និង​តំបន់​ផលិត​កែច្នៃ​នាំចេញ។ តំបន់​សេដ្ឋកិច្ច​ពិសេសនីមួយៗ ត្រូវមាន​មណ្ឌល​ផលិតកម្ម និង​អាចមាន​មណ្ឌល​ផលិតកម្ម​សេរី មណ្ឌល​សេវាកម្ម មណ្ឌល​លំនៅដ្ឋាន និង​មណ្ឌល​ទេសចរណ៍ ។

តំបន់​សេដ្ឋកិច្ច​ពិសេស ជា​គោលនយោបាយ​របស់​រដ្ឋា​ភិ​បាល ក្នុង​គោលបំណង​ទាក់ ទាញ​អ្នកវិនិយោគ​តាមរយៈ​ការអនុគ្រោះ​ពន្ធផ្សេងៗ និង​ការលើកទឹកចិត្ត​ច្រើនជាង​តំបន់ផ្សេងៗទៀត ក៏ដូចជា ការ​ផ្ដល់នូវ​នយោបាយ​ច្រកចេញចូល​តែមួយ ក្នុងការ​នាំចេញ និង​នាំចូល ដោយមាន​មន្ដ្រី​រដ្ឋាភិបាល​ជា​អ្នក​ផ្ដល់នូវ​សេវា​រដ្ឋបាល៕

អ្នកជំនាញ៖ ភ្នំពេញបន្តឈរលំដាប់ទី ១ ជាទីក្រុងវិនិយោគអចលនទ្រព្យទទួលបានផលចំណេញខ្ពស់

ដោយ ហ្សូលី

ភ្នំពេញ៖ វិស័យអចលនទ្រព្យនៅតាមបណ្តារខេត្តក្រុងនៅទូទាំងព្រះរាជាណាចក្រកម្ពុជាកំពុងរីកលូតលាស់ទៅមុខឥតឈប់ឈរ។ ការសិក្សាអន្តរជាតិបានបង្ហាញថា ទីក្រុងភ្នំេពញនៅតែស្ថិតឈរនៅលំដាប់ទី ១ក្នុងចំណោមទីក្រុងដទៃទៀតក្នុងតំបន់អាស៊ាន ជាទីក្រុងដែលទទួលបានផលចំណេញខ្ពស់ពីការវិនិយោគអចលនវត្ថុ។

កត្តាជាច្រើនដែលជម្រុញឱ្យទីក្រុងភ្នំពេញជាទីក្រុងល្អជាងគេ បើទោះបីជាប្រទេសកំពុងជួបប្រទះវិបត្តិជំងឺសាកលក៏ដោយ។ វិស័យខុនដូ បុរីលំនៅដ្ឋាន អាផាតមិន អគារពាណិជ្ជកម្ម និងដីធ្លី នៅក្នុងទិក្រុងភ្នំពេញ សុទ្ធសឹងតែមានគម្រោងអភិវឌ្ឍ និងចរន្តទិញលក់ឥតឈប់ឈរ។

ប្រធានក្រុមហ៊ុន Knight Frank ប្រចាំប្រទេសកម្ពុជា បានថ្លែងប្រាប់សារព័ត៌មានអន្តរជាតិសារជាថ្មីថា វិស័យអចលនទ្រព្យនៅទីក្រុងភ្នំពេញមានភាពរីកចម្រើន ហើយតំបន់សំខាន់ៗមួយចំនួនសុទ្ធតែមានសក្តានុពលសម្រាប់អភិវឌ្ឍគម្រោងអចលនទ្រព្យ និងទទួលបានផលចំណេញខ្ពស់។

ជាមួួយគ្នា សក្តានុពលនៃខណ្ឌនិមួយៗក្នុងទីក្រុងភ្នំពេញមានលក្ខណៈពិសេសរៀងខ្លួនៗ ដូចជា ខណ្ឌបឹងកេងកង ជាបណ្តុំគម្រោងខុនដូ អគារពាណិជ្ជកម្មផ្សារទំនើប រីឯខណ្ឌសែនសុខ ពោរពេញដោយបុរីលំនៅដ្ឋាន ចំណែកខណ្ឌទួលគោកមានអគារការិយាល័យជាដើម។ លើសពីនេះ ខណ្ឌផ្សេងៗទៀតដែលស្ថិតក្នុងទីក្រុងភ្នំពេញ បានរីកចម្រើនជាបន្តបន្ទាប់ ស្របតាមផែនការនិងស្ថានភាពសេដ្ឋកិច្ចប្រទេស។

អ្នកវិនិយោគមកពីហុងកុង ចិនដីគោក និងក្នុងតំបន់ មានការចាប់អារម្មណ៍ជាច្រើនក្នុងវិស័យលំនៅដ្ឋានក្នុងទីក្រុងភ្នំពេញ។ ក្រុមហ៊ុនអចលនទ្រព្យអន្តរជាតិ CBRE នៅតែព្យាករណ៍ថា ការផ្គត់ផ្គង់ខុនដូនៅឆ្នាំនេះនឹងកើនឡើង៣៤ភាគរយ។

លោក Jame Hodge អនុប្រធានក្រុមហ៊ុន CBRE ប្រចាំនៅកម្ពុជា បានលើកឡើងថា រាជធានីភ្នំពេញជាមូលដ្ឋានគ្រឹះដ៏សំខាន់ក្នុងការធ្វើដំណើរវែងឆ្ងាយទៅមុខ ដោយពុំមានបញ្ហាអ្វីកើនឡើងច្រើននោះទេ ដែលបណ្តាលឲ្យអ្នកវិនិយោគក្នុងវិស័យអចលនទ្រព្យទទួលបានផលច្រើន និងយូអង្វែង។

តម្រូវការអចលនទ្រព្យពីសំណាក់ប្រជាពលរដ្ឋខ្មែរមានការកើនឡើងខ្ពស់ រីឯច្បាប់វិនិយោគនៅក្នុងប្រទេសកម្ពុជាមានភាពងាយស្រួលដល់អ្នកវិនិយោគិនបរទេស ធ្វើឲ្យវិស័យអចលនទ្រព្យកើនឡើជាលំដាប់រហូតមកដល់ពេលនេះ បណ្តាលឲ្យអ្នកវិយោគទទួលបានផលច្រើនជាងប្រទេសដទៃក្នុងតំបន់អាស៊ាន៕

តំបន់សេដ្ឋកិច្ចពិសេសTai Seng នាំទំនិញទៅកាន់ទីផ្សារអន្តរជាតិក្នុងទំហំទឹកប្រាក់ ៣១ លានដុល្លារ

ដោយវុត្ថា

បាវិត៖ តំបន់សេដ្ឋកិច្ចពិសេស Tai Seng Bavet នៅក្រុងបាវិត នៃខេត្តស្វាយរៀង បាននាំចេញនូវមុខទំនិញមួយចំនួនទៅកាន់ទីផ្សារអន្តរជាតិនូវទំហំទឹកប្រាក់ប្រមាណជាង ៣១ លានដុល្លារអាមេរិក ។

យោងតាមរបាយការណ៍របស់រដ្ឋបាលខតំបន់សេដ្ឋកិច្ចពិសេស Tai Seng Bavet ដែលបានផ្សាយនៅថ្ងៃទី ១ ខែកញ្ញា ឆ្នាំ ២០២០នេះ ឱ្យដឹងថា នៅក្នុងខែសីហា ឆ្នាំ ២០២០នេះ បាននាំចេញនូវមុខទំនិញមួយចំនួនរួមមានសម្លៀកបំពាក់ កង់ កង់អគ្គិសនី ស្បែកជើង និងផលិតផលផ្សេងៗទៀត ដែលមានទំហទឺកប្រាក់ ៣១ លានដុល្លារអាមេរិក។

របាយការណ៍ដដែលបន្តថា មុខទំនិញដែលបាននាំចេញទៅកាន់ទីផ្សារអន្តរជាតិ មានសម្លៀកបំពាក់ចំនួន ៣,៦ លានដុល្លារអាមេរិក កង់មានចំនួនជាង ២៣,៣ លានដុល្លារអាមេរិក កង់អគ្គិសនីមានចំនួន ៤១ ម៉ឺនដុល្លារអាមេរិក ស្បែកជើង ២៩ ម៉ឺនដុល្លាអាមេរក និងទំនិញផ្សេងទៀត មានចំនួនជាង ៤ លានដុល្លារអាមេរិក បើធៀបជាមួនឹងខែកក្កដា កើនឡើងប្រមាន០,៥ ភាគរយ។

តំបន់សេដ្ឋកិច្ចពិសេសTai Seng Bavet រហូតមកដល់បច្ចុប្បន្ននេះ មានក្រុមហ៊ុន-រោងចក្រចំនួន៣៤ កំពុងប្រតិបត្តិការអាជីវកកម្មរបស់ខ្លួន និង ផែស្ងួតមួយ មានផ្ទៃដីវិនិយោគសរុបជាង២០០ហិកតា និង មានដើមទុនវិនិយោគ សរុបចំនួនជាង ១៣៩ លាន ដុល្លារអាមេរិក ដោយក្នុងនោះមានក្រុមហ៊ុន-រោងចក្រ ស្មើ៨៨ភាគរយ កំពុងមានសកម្មភាពផលិត និងនាំចេញ។

នៅក្នុងខែសីហា ឆ្នាំ ២០២០ នេះ តំណាក្រសួងពាណិជ្ជកម្មប្រចាំរដ្ឋបាលតំបន់សេដ្ឋកិច្ចពិសេសតាយសេង បាវិត បានផ្តល់ C/O ដល់បណ្តាក្រុមហ៊ុនដែលមានទីតាំងនេះ សរុបចំនួន ៤៧៣ ច្បាប់ ដែលទម្រង់ CRF ចំនួន ២៤៨ ច្បាប់ ក្នុងការនាំទំនិញចេញទៅកាន់ទីផ្សារអន្តរជាតិ៕

អគ្គនាយកដ្ឋានពន្ធដារ ពន្យល់ឆ្លើយតបទៅមតិរិះគន់ស្ដីពីពន្ធលើចំណេញមូលធន ២០ភាគរយ

ដោយ ៖ រ៉ាណេត

ភ្នំពេញ ៖ ក្រោយមានការរិះគន់ទៅលើសេចក្ដីប្រកាសរបស់ក្រសួងសេដ្ឋកិច្ច និងហិរញ្ញវត្ថុ ស្ដីពីការអនុវត្តពន្ធលើចំណេញមូលធន ដែលមានអត្រាពន្ធ២០ភាគរយ លើតែចំណែកដែលចំណេញក្រោយកាត់កងចំណាយ៨០ភាគរយ អគ្គនាយកនៃអគ្គនាយកដ្ឋានពន្ធដារបានធ្វើការបកស្រាយ និងពន្យល់ទៅលើនីតិវិធីនៃការគណនានៃចំនួនពន្ធដែលត្រូវបង់ជៀសវាងមានការភ័ណ្ឌច្រឡំកាន់តែខ្លាំង និងប្រៀបធៀបទៅនឹងការអនុវត្តពន្ធនៅប្រទេសជិតខាង។

នៅក្នុងកិច្ចសម្ភាសន៍ និងជជែកពីបញ្ហាពន្ធលើចំណេញមូលធនដែលមានអត្រា២០ភាគរយ ជាមួយបណ្តាញផ្សព្វផ្សាយព័ត៌មាន Freshnews និងត្រូវបានផ្សព្វផ្សាយនៅថ្ងៃទី១ ខែកញ្ញា ឆ្នាំ២០២០នេះ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ លោក គង់ វិបុល បានធ្វើការពន្យល់ និងបកស្រាយបញ្ជាក់ទៅលើមតិរិះគន់ដោយការភ័ន្តច្រឡំមួយចំនួនដែលបានលើកឡើងជាសំណួរជុំវិញការតម្រូវឱ្យអនុវត្ត ។

លោក គង់ វិបុល បានបញ្ជាក់ថា “ការលើកទ្បើងពីមតិមួយចំនួនតូច ដោយប្រៀបធៀបវិធានការប្រទេសថៃ និងកម្ពុជា គឺមិនត្រឹមត្រូវនោះទេ ដោយលើកឡើងថា ថៃសម្រេចកាត់បន្ថយពន្ធឲ្យប្រជាពលរដ្ឋមានថវិកាទិញរថយន្តថ្មីប្រើប្រាស់ឯខ្មែរយើងដាក់ពន្ធបន្ថែម។ សូមជម្រាបថា ចំពោះករណីនេះ គឺខុសគ្នាស្រឡះ នៅប្រទេសថៃគេអនុវត្តពន្ធលើរូបវន្តបុគ្គល (Personal Income Tax) ជាយូរណាស់មកហើយគឺប្រមាណជាងកន្លះសតវត្សមកហើយ ខណៈដែលកម្ពុជាមិនទាន់អនុវត្តពន្ធប្រភេទរូបវន្តបុគ្គលនេះនៅទ្បើយទេ ដោយរាជរដ្ឋាភិបាលផ្តល់លទ្ធភាពឱ្យប្រជាពលរដ្ឋបង្កើនកម្រិតជីវភាពរបស់ខ្លួនរហូតមក”។

លោកបានបន្តទៀតថា “ចំពោះពន្ធលើចំណេញមូលធនវិញ គឺខុសគ្នា យើងមិនមែនយកពន្ធលើប្រជាពលរដ្ឋទូទៅនោះទេ គឺយកពន្ធតែលើចំណេញមូលធន ឧទាហរណ៍ ប្រជាពលរដ្ឋ ឬអ្នកមានអចលនទ្រព្យលក់ទ្រព្យនោះ ហើយបានចំណេញទើបយកពន្ធ ប្រសិនការទិញលក់អចលនទ្រព្យនោះ មិនមានការចំណេញ គឺមិនមានការយកពន្ធលើចំណេញមូលធននេះទេ។ ខ្ញុំយល់ថា ខ្លឹមសារអត្ថបទប្រៀបធៀបរវាងវិធានការផ្នែកពន្ធរវាងកម្ពុជា និងថៃ នេះមិនបានឆ្លុះបញ្ចាំងការពិតទេ ព្រោះខ្មែរយើងមិនទាន់អនុវត្តពន្ធលើរូបវន្តបុគ្គល (Personal Income Tax) ទេ ហើយប្រជាពលរដ្ឋក៏មិន ដែលបានបង់ពន្ធប្រភេទនេះដែរ។ ម្យ៉ាងទៀត បើទោះបីជាប្រទេសថៃកាត់បន្ថយពន្ធនេះ ក៏ប្រជាពលរដ្ឋថៃ នៅតែត្រូវបង់ពន្ធប្រភេទនេះដែរ ចំណែកឯកម្ពុជា គឺប្រជាពលរដ្ឋពុំមានតម្រូវឱ្យបង់ពន្ធប្រភេទនេះទេ”។

ក្រសួងសេដ្ឋកិច្ច និងហិរញ្ញវត្ថុ បានចេញប្រកាសស្តីពីពន្ធលើចំណេញមូលធន ដែលមានអត្រាពន្ធថេរ ២០ភាគរយ។ តាមពិតការអនុវត្តពន្ធលើចំណេញមូលធននេះ ត្រូវចាប់ផ្តើមអនុវត្តន៍ចាប់ពីថ្ងៃទី០១ ខែកក្កដា ឆ្នាំ២០២០តទៅ ប៉ុន្តែត្រូវបានពន្យារពេលក្នុងការអនុវត្តរហូតដល់ថ្ងៃ០១ ខែមករា ឆ្នាំ២០២១។

សម្រាប់ពន្ធលើចំណេញមូលធននេះ មិនមែនជាការបង្កើតពន្ធថ្មីនោះឡើយ ពោលគឺពន្ធលើចំណេញមូលធននេះត្រូវបានកំណត់ក្នុងច្បាប់ឱ្យប្រមូលតាំងពីប្រមាណជាង ១០ ឆ្នាំកន្លងមកហើយ។

ដោយឡែកនៅក្នុងអំទ្បុងពេលនៃការរាតត្បាតនៃជំងឺ Covid-19 នេះ រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំង ចំពោះជីវភាពប្រជាពលរដ្ឋ ក៏ដូចជាស្ថានភាពសេដ្ឋកិច្ចទាំងមូល ដោយបានដាក់ចេញនូវវិធានការគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ ចំនួន៥លើករួចមកហើយ ក្នុងនោះក៏មានវិធានការផ្នែកពន្ធដារផងដែរ ជាអាទិ៍ការលើកលែងពន្ធមួយចំនួន សម្រាប់វិស័យងាយទទួលរងហានិភ័យ ដូចជា វិស័យទេសចរណ៍ (សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍) វិស័យអាកាសចរណ៍ វិស័យធនាគារ និងមីក្រូហិរញ្ញវត្ថុ ព្រមទាំងវិស័យអចលនទ្រព្យផងដែរ៕

ទឹកប្រាក់ជាង១៨លានដុល្លារបានពីចំណូលលក់បណ្ណចូលទស្សនាតំបន់អង្គរក្នុងរយៈពេល៨ខែ

ដោយ ៖ រ៉ាណេត

ភ្នំពេញ ៖ នៅក្នុងរយៈពេល៨ខែ ឆ្នាំ២០២០ ដែលកំពុងទទួលរងនូវការគំរាមកំហែងពីវិបត្តិជំងឺឆ្លង ការលក់បណ្ណចូលទស្សនានៅតំបន់រមណីយដ្ឋានអង្គរ ទទួលបានជាង១៨លានដុល្លារ ធ្លាក់ចុះជាង៧៣ភាគរយបើប្រៀបធៀបរយៈពេលដូចគ្នាកាលពីឆ្នាំ២០១៩។

តាមរយៈសេចក្ដីប្រកាសជាផ្លូវការរបស់គ្រឹះស្ថានអង្គរនៅរសៀលថ្ងៃទី១ ខែសីហា ឆ្នាំ២០២០នេះបានបង្ហាញថា ចំនួនទេសចរសរុបក្នុងរយៈពេល៨ខែឆ្នាំ២០២០ មានការធ្លាក់ចុះរហូតដល់ប្រមាណជាង៧៤ភាគ ខណៈដែលចំណូលទទួលបានពីការលក់ប័ណ្ណចូលទស្សនានៅតំបន់រមណីយដ្ឋានអង្គរមានចំនួនជាង១៨លានដុល្លារ ធ្លាក់ចុះជាង៧៣ភាគរយធៀបទៅនឹងរយៈពេលដូចគ្នាក្នុងឆ្នាំ២០១៩កន្លងទៅ។

ជាមួយនឹងលទ្ធផលដែលទទួលបាន និងបង្ហាញពីការធ្លាក់ចុះយ៉ាងគំហុកនេះ រាជរដ្ឋាភិបាលធ្លាប់បានធ្វើការព្យាករណ៍ថា នៅក្នុងឆ្នាំ២០២០ កំណើនសេដ្ឋកិច្ចកម្ពុជាអាចនឹងធ្លាក់ចុះប្រមាណ-១,៩ភាគរយ ហើយវិស័យពាក់ព័ន្ធដូចជាទេសចរណ៍ សណ្ឋាគារ និងអនុវិស័យដូចជាភោជនីយដ្ឋាន អាហារដ្ឋាន អាចនឹងមានការធ្លាក់ចុះរហូតដល់-៩,៧ភាគរយ ។

តែទោះជាយ៉ាងណា ក្នុងរយៈពេលប្រមាណជាងមួយខែចុងក្រោយនេះ គេសង្កេតឃើញថា ចលនាទេសចរក្នុងបានងើបឡើងវិញបន្តិច ដែលភាគច្រើនកើននៅតាមតំបន់កម្សាន្តបែបធម្មជាតិ ដូចជាតំបន់ឆ្នេរ តំបន់មាត់ព្រែក និងតំបន់ភ្នំ ៕

តើអ្វីនៅពីក្រោយគម្រោងផ្លូវរថភ្លើងល្បឿនលឿនតម្លៃជាង ៧០០០លានដុល្លារ ក្នុងប្រទេសថៃត្រូវបានពន្យាពេល?

ដោយ ៖ ហ្សូលី

បាងកក ៖ មួយរយៈចុងក្រោយនេះ រដ្ឋាភិបាលថៃបានកំពុងយកចិត្តទុកដាក់ក្នុងការពង្រឹងការអភិវឌ្ឍផ្លូវរថភ្លើងល្បឿនលឿន តភ្ជាប់ទៅព្រលានយន្តហោះអន្តរជាតិចំនួន ៣ក្នុងប្រទេស ខណៈដែលពេលនេះត្រូវបានប្រឈមមុខនឹងការពន្យាពេលសាងសង់។

ក្រុមហ៊ុនផ្លូវដែករដ្ឋថៃ State Railway of Thailand បានបង្ហើបពីមូលហេតុធំបណ្តាលឱ្យមានផលប៉ះពាល់នៃការស្ថាបនាគម្រោងយក្សនេះ ដោយសារតែបញ្ហាខ្វះខាតថវិកា។ តម្លៃសរុបនៃការស្ថាបនាគម្រោងផ្លូវដែកល្បឿនលឿននេះ មិនទាន់ត្រូវបានអនុញ្ញាតជាផ្លូវការនៅឡើយទេ រង់ចាំការសិក្សាបន្ថែមទៀត ខណៈនេះដំណាក់កាលទី ១នៃការសាងសង់ផ្លូវដែកត្រូវបានពន្យាពេល។

ទោះជាយ៉ាងណា រដ្ឋលេខាធិការក្រសួងសាធារណការ លោក Chaiwat Thong Kamkoon បានប្រាប់សាធារណជនថា ថវិកានេះនឹងត្រូវបែងចែកឱ្យច្បាស់រវាងវិស័យឯកជន និងរដ្ឋាភិបាលឱ្យបានមុនដំណាច់ឆ្នាំនេះ។ រដ្ឋាភិបាលថៃនឹងមានចំណែកចូលរួមបោះទុនវិនិយោគក្នុងគម្រោងនេះប្រមាណ ៦០ ភាគរយ។

គម្រោងផ្លូវដែកល្បឿនលឿនមានការស្ថាបនាខ្សែរថភ្លើងប្រវែង ២២០គីឡូម៉ែត្រ តភ្ជាប់ព្រលានយន្តហោះអន្តរជាតិចំនួន ៣ ធំៗរបស់ប្រទេសថៃមានដូចជា ព្រលានយន្តហោះដុងមឿង ព្រលានយន្តហោះសុវណ្ណភូមិ និងព្រលានយន្តហោះ U tapao ដែលរដ្ឋាភិបាលថៃបានអនុម័តកាលពីឆ្នាំ ២០១៨ និងចុះហត្ថលេខាព្រមព្រៀងសាងសង់នៅខែតុលា ឆ្នាំ២០១៩។ វាក៏តភ្ជាប់រវាងខេត្ត-ក្រុងចំនួន ៥ មានដូចជា ក្រុងបាងកក ខេត្តសាមុទប្រាកាន់ ខេត្ត Chachoengsao ខេត្តឈុនបុរិ និងខេត្តរ៉ាក់យ៉ង។

ជារួម គម្រោងនេះនឹងរាប់បញ្ចូលខ្សែផ្លូវដែកដែលមានស្រាប់ ២៩ គីឡូម៉ែត្រ និងផ្លូវដែកថ្មី ១៩១ គីឡូម៉ែត្រ។ចំណែកឯក្រុមហ៊ុនម៉ៅការសាងសង់គម្រោងផ្លូវដែកដ៏ធំនេះ ក៏ត្រូវបានជ្រើសរើសរួចរាល់ហើយ។

កាលពីដើមឆ្នាំនេះ រដ្ឋាភិបាលថៃតាំងចិត្តស្ថាបនាបណ្តាញផ្លូវដែកក្នុងប្រទេសឱ្យកាន់តែមានប្រសិទ្ធភាពបន្ថែមទៀត ដោយត្រូវចំណាយថវិកាសរុបប្រមាណ ២១ពាន់លានដុល្លារ ក្នុងគោលបំណងរឹតបន្តឹងប្រព័ន្ធដឹកជញ្ជូននិងកាត់បន្ថយជាតិពុលក្នុងបរិស្ថាន៕

គម្រោងអភិវឌ្ឍន៍តំបន់ឆ្នេរកម្សាន្តទំហំ ២០០ហិកតា ក្នុងខេត្តកំពតចាប់ផ្តើមដំណើរការសាងសង់ហើយ

ដោយ ៖ រ៉ាណេត

កំពត ៖ គម្រោងអភិវឌ្ឍន៍មណ្ឌលកម្សាន្តនៅតាមតំបន់ឆ្នេរដែលមានទំហំរហូតដល់២០០ហិកតា ក្រោមការបណ្តាក់ទុនវិនិយោគពីសំណាក់ក្រុមហ៊ុនឯកជនក្នុងស្រុក ស្ថិតនៅក្នុងស្រុកទឹកឈូ ខេត្តកំពត បានចាប់ផ្តើមអនុវត្តជាជំហានដំបូងហើយ ខណៈដែលរដ្ឋបាលខេត្តកំពុងរៀបចំបង្កើតសេចក្ដីព្រាងបង្កើតគណៈកម្មការ និងអនុគណៈកម្មកាដើម្បីគ្រប់គ្រងគម្រោងអភិវឌ្ឍន៍នេះ។

តាមរយៈប្រធានមន្ទីរទេសចរណ៍ខេត្តកំពត លោក សយ ស៊ីណុល បានបង្ហើបប្រាប់នៅរសៀលថ្ងៃទី១ ខែសីហា ឆ្នាំ២០២០នេះ ថា គម្រោងអភិវឌ្ឍន៍បង្កើតមណ្ឌលកម្សាន្តលក្ខណៈធម្មជាតិនៃតំបន់ឆ្នេរ (ឆ្នេរមាស) ដ៏ធំដែលមានទំហំដីសរុបប្រមាណ ២០០ហិកតា នៅភូមិទទឹងថ្ងៃ និងភូមិកែបថ្មី ឃុំបឹងទូក ស្រុកទឹកឈូ ខេត្តកំពត ក្រោមការវិនិយោគរបស់ក្រុមហ៊ុន IBG (Cambodia) Co,.Ltd បានចាប់ដំណើរការសាងសង់ក្នុងជំហានដំបូង។

លោក សយ ស៊ីណុល បានបន្តថា “ពេលនេះបើតាមខ្ញុំដឹង ខាងក្រោមហ៊ុនចាប់ចាប់ផ្តើមដំណើរការសាងសង់ក្នុងដំណាក់ដំបូង ដោយធ្វើការឈូសឆាយពង្រីកផ្លូវសម្រាប់ជួយសម្រួលដល់ការដឹកជញ្ជូនដីទៅចាក់បំពេញ និងឈូសឆាយដីវាលពង្រាបជាដើម ដើម្បីបង្កើតជាមណ្ឌលទេសចរណ៍លំដាប់ខ្ពស់ និងមានវិសាលភាពធំធេងប្រចាំនៅក្នុងស្រុកទឹកឈូរហូតដល់ប្រមាណ២០០ហិកតា”។

ជាគ្នានេះផងដែរ លោកបានបង្ហើបប្រាប់ផងដែរថា រហូតមកដល់ពេលបច្ចុប្បន្ននេះ គម្រោងវិនិយោគ និងអភិវឌ្ឍន៍ជាតំបន់ទេសចរធម្មជាតិកម្រិតខ្ពស់ក្រោមការចូលរួមពីសំណាក់ឯកជននៅក្នុងខេត្តកំពតមានចំនួន៨គម្រោងរួចមកហើយ ដែលចំនួននេះមិនបានរាប់បញ្ចូលពីគម្រោងបង្កើតតំបន់លំហែរខ្នាតតូចដែលស្ថិតនៅតាមតំបន់មាត់ព្រែកនោះឡើយ។

ខេត្តកំពតនាពេលបច្ចុប្បន្ននេះ មិនទាន់មានឆ្នេរដូចបណ្តាខេត្តដែលនៅជាប់មាត់សមុទ្រមួយចំនួនរបស់កម្ពុជានោះទេ ហើយទីតំាងឆ្នេរដែលបាននឹងកំពុងរៀបចំនេះ ស្ថិតនៅមិនឆ្ងាយពីទីរួមខេត្ត និងនៅជិតរមណីយដ្ឋានភ្នំបូកគោ ព្រមទាំងនៅមិនឆ្ងាយពីរមណីយដ្ឋានទឹកឈូនោះទេ ពោលគឺមានទីតំាងល្អសម្រាប់ភ្ញៀវទេសចរមកកំសាន្ត។ នៅពេលភ្ញៀវទេសចរមកលេងនៅក្នុងតំបន់ឆ្នេរនេះកាន់តែច្រើន នឹងផ្តល់ចំណូលដល់ពលរដ្ឋមូលដ្ឋានឱ្យមានការរីកចំរើន ហើយម្យ៉ាងវិស័យទេសចរណ៍ បានចូលរួមនៅក្នុងកំណើនសេដ្ឋកិច្ចជាតិយ៉ាងសំខាន់ តាមរយៈការផ្តល់ឱកាសការងារជូនពលរដ្ឋ និងសហគមន៍ទេសចរណ៍ នៅក្នុងមូលដ្ឋានបានកាត់តែច្រើន៕

គម្រោងផ្លូវ Asean Highway 1 របស់កម្ពុជាសម្រេចបានជាង ៤២ ភាគរយ

ដោយ ៖ វុត្ថា

ភ្នំពេញ ៖ គិតត្រឹមខែសីហា ឆ្នាំ២០២០ គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ ឬ ផ្លូវ Asean Highway 1 របស់កម្ពុជា សម្រេចបានប្រមាណ ៤២,៩៩ភាគយហើយ ខណៈបច្ចុប្បន្នកំពុងពន្លឿងការសាងសង់ឱ្យចប់តាមផែនការ។

ក្រសួងសាធារណការ និងដឹកជញ្ជូននៅថ្ងៃទី១ ខែកញ្ញា ឆ្នាំ ២០២០នេះ បានឱ្យដឹងថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ ៥ មានប្រវែងសរុបចំនួន ៣៦៦ គីឡូម៉ែត្រ ដោយឆ្លងកាត់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។

គម្រោងនេះត្រូវបានបែងចែកជា បីផ្នែកធំៗរួមមាន៖ ផ្នែកខាងជើង(បាត់ដំបង-សិរីសោភ័ណ) មានប្រវែងសរុប ៨៤,៧៤ គីឡូម៉ែត្រ ផ្នែកកណ្តាល(ធ្លាម្អម-បាត់ដំបង) មានប្រវែងសរុប ១៤៦,០៤គីឡូម៉ែត្រ និងផ្នែកភាគខាងត្បូង(ព្រែកក្តាម ខេត្តកណ្តាល-ធ្លាម្អម ខេត្តពោធិ៍សាត់) មានប្រវែងសរុប ១៣៥,២៤គីឡូម៉ែត្រ ដោយមានការពង្រីកកំណាត់ផ្លូវជាតិមានស្រាប់ពី២គន្លងទៅ៤គន្លង ទទឹង២៣ម៉ែត្រ ជាប្រភេទផ្លូវបេតុងកៅស៊ូ (AC) និងមានសួនច្បារចំកណ្តាល។

កំណាត់ផ្លូវជាតិលេខ៥ មានសារៈសំខាន់ណាស់សម្រាប់ការដឹកជញ្ជូននៅក្នុងស្រុក ក៏ដូចជាការតភ្ជាប់វិស័យដឹកជញ្ជូនក្នុងបណ្ដាប្រទេសជាសមាជិកអាស៊ាន និងមហាអនុតំបន់មេគង្គ ហើយក៏ត្រូវបានចាត់ទុកថាជាផ្នែកមួយនៃអាស៊ានហាយវ៉េលេខ ១(Asean Highway 1) ប្រចាំតំបន់អាស៊ីអាគ្នេយ៍ផងដែរ។

គម្រោងធ្វើឱ្យប្រសើរឡើងផ្លូវជាតិលេខ៥ នេះ តភ្ជាប់រាជធានីភ្នំពេញទៅតំបន់ជាយដែនប៉ែកខាងលិចប្រទេស លាតសន្ធឹងកាត់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ដែលត្រូវចំណាយទឹកប្រាក់ប្រមាណ ៥00 លានដុល្លារអាមេរិក ក្រោមកម្ចីឥណទានពីរដ្ឋាភិបាលជប៉ុន៕

អ្នកអភិវឌ្ឍន៍នៅតែមានសុទិដ្ឋិនិយមចំពោះទីផ្សារលំនៅដ្ឋាននៅតំបន់ជាយក្រុង

ដោយ ៖ រ៉ាណេត

ភ្នំពេញ ៖ ការគំរាមកំហែងពីវិបត្តិនៃជំងឺឆ្លងនៅពេលបច្ចុប្បន្ននេះ វាមិនមែនជាឧបសគ្គ និងធ្វើឱ្យទីផ្សារលំនៅដ្ឋានតម្លៃសមរម្យនៅកម្ពុជាទ្រុឌទ្រោមនោះឡើយ ផ្ទុយទៅវិញតម្រូវការលំនៅដ្ឋានជាក់ស្ដែងនៅតែបន្តមាន ខណៈដែលក្រុមហ៊ុនអភិវឌ្ឍន៍ជាច្រើនកំពុងមមាញឹកសាងសង់ ដើម្បីដាក់បញ្ចូលទៅក្នុងទីផ្សារ។

អគ្គនាយកក្រុមហ៊ុន PREMIUM GROUP លោក ម៉ាន់ ចាន់ឌី ដែលជាអ្នកអភិវឌ្ឍន៍ក្នុងវិស័យលំនៅដ្ឋានមួយរូប នៅព្រឹកថ្ងៃទី១ ខែកញ្ញា ឆ្នាំ២០២០នេះបានបង្ហាញពីភាពសុទិដ្ឋិនិយមចំពោះទីផ្សារលំនៅដ្ឋាននាពេលបច្ចុប្បន្ន ក៏ដូចជាបន្តទៅថ្ងៃអនាគតដែលតម្រូវការទីផ្សារនៅតែបន្តមាន ជាក់ស្ដែងត្រឹមតែតំបន់ទំនប់កប់ស្រូវដែលស្ថិតនៅជាយក្រុងមានគម្រោងសាងសង់មិនក្រោម១០គម្រោងនោះទេ ដែលមានចំនួនលំនៅដ្ឋានជិត១០០០ខ្នង។

តាមរយៈទូរស័ព្ទ លោកបានមានប្រសាសន៍ថា “មិនថាពេលនេះ ឬបន្តទៅថ្ងៃខាងមុខនោះទេ វិស័យលំនៅដ្ឋាននៅតាមតំបន់ជាយក្រុងនៅតែមានតម្រូវការ ដោយសារតែកំណើនប្រជាជនចូលមករស់នៅរាជធានីភ្នំពេញកាន់តែកើនឡើងជាលំដាប់ ជាក់ស្ដែងនិយាយត្រឹមតែវត្តមានរបស់និស្សិតដែលមកពីតាមបណ្តាខេត្តនានា ដើម្បីសិក្សាបន្ត និងបម្រើការងារមានរហូតជិតដល់៥ម៉ឺននាក់ក្នុងមួយឆ្នាំ”។

លោកបានបន្តទៀតថា “កំណើននៃចំនួននិស្សិត លំហូរនៃចំនួនប្រជាជនចំណូលថ្មីមកកាន់រាជធានីភ្នំពេញសុទ្ធតែមានតម្រូវការស្នាក់នៅ ខណៈដែលកំណើននៃចំនួនសំណង់លំនៅដ្ឋាននៅពេលបច្ចុប្បន្ននៅមិនទាន់គ្រប់តម្រូវការនៅឡើយនោះទេ។ លំនៅដ្ឋានដែលមានទីផ្សារ និងតម្រូវការខ្ពស់បច្ចុប្បន្ននេះ ជាប្រភេទលំនៅដ្ឋានតម្លៃមធ្យម ដែលស្ថិតនៅក្នុងចន្លោះ ជាង៦ម៉ឺន ទៅ៨ម៉ឺនជាង”។

លោក សរ បញ្ញា ដែលជាអ្នកជំនាញផ្នែកលក់អចលនទ្រព្យនៅក្នុងតំបន់ខណ្ឌដង្កោ បានមានប្រសាសន៍ស្រដៀងការលើកឡើងខាងលើនេះផងដែរ ដោយលោកបានបញ្ជាក់ថា “ស្ទើរតែគ្រប់គម្រោងនៅតំបន់ជុំវិញរាជធានីភ្នំពេញភាគច្រើនសុទ្ធតែមានទីផ្សារល្អ លើកលែងតែគម្រោងដែលស្ថិតនៅទីតាំងមិនសូវអំណោយផល ដែលពិបាកលក់”។

លោកបញ្ជាក់ថា “គម្រោងលំនៅដ្ឋានដែលស្ថិតនៅភាគខាងលិចក្នុងខណ្ឌដង្កោ គឺនៅតែមានស្ថានភាពល្អប្រសើរ ហើយអ្វីកាន់តែពិសេសគឺតម្លៃបានបន្តកើនឡើង ខណៈដែលអ្នកទិញក៏នៅតែមានសកម្មភាព។ នៅតំបន់នេះ គម្រោងភាគច្រើនមិននៅទ្រឹងនោះទេ ដោយសារតែទីតាំងគម្រោងមានអំណោយពីហេដ្ឋារចនាសម្ព័ន្ធដែលវិនិយោគដោយរដ្ឋាភិបាលជាច្រើនខ្សែ ជាពិសេសស្ថិតនៅជិតគម្រោងធំដូចជា ផ្សារទំនើប AEON3 ស្ថិតនៅផ្លូវ៦០ម៉ែត្រ មានផ្លូវ៥០ម៉ែត្រនៅអមជាមួយ ស្ថិតនៅជិតគម្រោងព្រលានយន្តថ្មីក្នុងខេត្តកណ្តាល និងគម្រោងទីក្រុងរណបផ្សេងៗទៀត”។

ជាមួយនឹងការរក្សាបាននូវស្ថានភាពល្អប្រសើរក្នុងទីផ្សារលំនៅដ្ឋាននាពេលនេះ លោក សរ បញ្ញា បានបង្ហាញពីភាពជឿជាក់ថា នៅក្នុងអំឡុងពេលឆ្នាំក្រោយ តម្លៃលំនៅដ្ឋានក្នុងខណ្ឌដង្កោអាចនឹងបន្តកើនឡើងមិនក្រោយ៣០ភាគរយនោះទេ ខណៈដែលតម្រូវការនៅតែមានកំណើនបន្តទៀត៕