ដោយ ៖ រ៉ាណេត 

ភ្នំពេញ ៖ ខុសប្លែកពីតំបន់មួយចំនួនដែទទួលរងនូវសំពាធពីវិបត្តិសាកលលោកកំពុងកើតមាន សម្រាប់ភាគខាងលិចរាជធានីភ្នំពេញ ត្រូវបានគេសម្លឹងឃើញថា ចរន្តនៃការទិញ-លក់អចលនទ្រព្យ ដីធ្លី នៅតែបន្តមានសកម្មភាព ហើយភាគច្រើនសម្រាប់បម្រើឱ្យវិស័យលំនៅដ្ឋាន។ 

អគ្គនាយកក្រុមហ៊ុនអចលនទ្រព្យ Show Up Real Estate លោក អុិន ណាង បានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី១៨ ខែឧសភា ឆ្នាំ២០២០នេះថា បើទោះជាស្ថិតនៅក្នុងការគំរាមកំហែងពីភាពភ័យខ្លាចនៃជំងឺឆ្លង ស្ទើរតែគ្រប់តំបន់ជាយក្រុងទាំងអស់គឺនៅតែបន្តមានចរន្តទិញ-លក់ ដែលជាតម្រូវការទីផ្សារក្នុងស្រុក ហើយភាគច្រើនសម្រាប់បម្រើឱ្យវិស័យលំនៅដ្ឋាន ហើយក្នុងចំណោមតំបន់ទាំងអស់នេះ នៅភាគខាងលិចក្រុងហាក់មានភាពសកម្មជាងគេ។ 

លោក អុិន ណាង បានមានប្រសាសន៍បន្តទៀតថា “ជាការពិត នៅក្នុងអំឡុងពេលនៃការរាលដាលវិបត្តិជំងឺ Covid-19 គម្រោងអភិវឌ្ឍន៍មួយចំនួនធំនៅកម្ពុជាបានជួបភាពស្ងប់ស្ងាត់ ប៉ុន្តែគម្រោងដែលសកម្មភាពទាំងនេះភាគច្រើនគឺជាគម្រោងអភិវឌ្ឍន៍ធំៗ ដែលមានម្ចាស់ទុននៅបរទេស ដោយឡែកសម្រាប់គម្រោងតូចៗ ដូចជាការអភិវឌ្ឍលំនៅដ្ឋានកម្រិតមធ្យម និងក្រោមមធ្យម ក៏ដូចជាគម្រោងទិញ-លក់ដីឡូតិ៍ផ្សេងៗនៅតែបន្តមានសកម្មភាព”។ 

លោកបានបញ្ជាក់ទៀតថា  “ជាក់ស្ដែង តាមរយៈក្រុមហ៊ុនរបស់ខ្ញុំ គឺមានអតិថិជនជាច្រើនកំពុងស្វែងរកទិញដីក្នុងទំហំធំសម្រាប់ធ្វើការអភិវឌ្ឍន៍ទៅលើគម្រោងបង្កើតសហគ្រាស និងបណ្តុំលំនៅដ្ឋាននៅតំបន់ជាយក្រុង ដែលក្នុងនោះតម្រូវការនៅប៉ែកខាងលិចក្រុង ស្ថិតក្នុងខណ្ឌដង្កោ គឺមានច្រើនគួរសម មិនចាញ់តំបន់ឃ្មួញ ដែលស្ថិតនៅក្នុងខណ្ឌសែនសុខនោះទេ ប៉ុន្តែទាស់ត្រង់តម្លៃគឺស្ថិតក្នុងកម្រិតខ្ពស់ដូចគ្នាទៅនឹងកាលពីចុងឆ្នាំ២០១៩កន្លងទៅ មុនពេលផ្ទុះជំងឺឆ្លង”។  

លោកឧកញ៉ា តេង រិទ្ធី អគ្គនាយកក្រុមហ៊ុនអចលនទ្រព្យ R Investment Group  បានមានប្រសាសន៍ថា “តាមមើលឃើញរបស់ខ្ញុំ មិនថាតំបន់ក្នុងក្រុង ឬជាយក្រុងនោះទេ ការទិញ–លក់ នៅតែមានសកម្មភាពធម្មតា ទាស់ត្រង់ថា តម្លៃមិនអាចឡើងច្រើននោះទេ ពោលគឺមានភាពប្រហាក់ប្រហែលគ្នានឹងឆ្នាំចាស់កន្លងទៅ”។ 

លោកបានមានប្រសាសន៍បន្តទៀតថា “នៅតំបន់ខាងលិចក្រុង មានហេដ្ឋារចនាសម្ព័ន្ធធំៗច្រើន ដែលក្រៅពីផ្លូវសម្ដេចតេជោ ៦០ម៉ែត្រ នៅមានផ្លូវ៥០ម៉ែត្រ ផ្លូវ៣០ម៉ែត្រ និងផ្លូវសំខាន់ៗជាច្រើនទៀត ងាយស្រួលក្នុងការចេញចូលក្រុង ចេញទៅតាមបណ្តាខេត្តផ្សេងៗចេញទៅតាមផ្លូវជាតិលេខ១ ផ្លូវជាតិ២ ផ្លូវជាតិលេខ៣ និងភ្ជាប់ទៅកាន់ផ្លូវជាតិលេខ៤។ ក្រៅពីនេះ នៅមានគម្រោងធំៗជាច្រើនទៀត ដូចជាគម្រោងបុរី គម្រោងបណ្តុំផ្ទះល្វែង គម្រោងសាងសង់ផ្សារទំនើបធំៗ និងភាពអំណោយផលពីផ្លូវវាងក្រុង ផ្លូវ៣០ម៉េត្រ និងផ្លូវធំ ៦០ម៉ែត្រ (មហាវិថីសម្ដេចតេជោ ហ៊ុន សែន តែម្ដង) ” ៕

ដោយៈ រ៉ាណេត

ភ្នំពេញៈ គម្រោងអភិវឌ្ឍន៍ក្រុងកោះនរាហ៍ ស្ថិតប្របច្រាំងទន្លេបាសាក់ និងតតំបន់ចតុមុខបាននិងកំពុងស្ថាបនា ដោយក្រុមហ៊ុនOCICយ៉ាងសកម្ម ខណៈគំរោងស្ពានតភ្ជាប់ទីក្រុងនេះជាមួយទីក្រុងកោះពេជ្រ ចាប់ផ្តើមបុកគ្រឹះបណ្តើរៗ។

ប្រធានសមាគអ្នកជំនាញអចលនទ្រព្យកម្ពុជា លោកស្រី ចេវ សុឃុន បានមានប្រ​សាសន៍ប្រាប់តាមទូរស័ព្ទកាលពីរសៀលថ្ងៃទី១៨ ខែឧសភា ឆ្នាំ២០២០នេះថា បច្ចុប្បន្ននេះ មិនមែនទើបតែមានគម្រោងអភិវឌ្ឍន៍មួយនេះទេ គឺនៅមានគម្រោងជាច្រើនក៏កំពុងតែបង្ហាញវត្តមានរបស់ខ្លួននៅតំបន់ខាងលើនេះដែរ ដោយសារតែលក្ខខណ្ឌអំណោយផលនៃភូមិសាស្ត្រ ផ្តល់ភាពងាយស្រួល ក្នុងវិស័យពាណិជ្ជកម្ម និងផ្តល់បរិយាកាសល្អប្រសើរសំរាប់ការរស់នៅ។

លោកស្រីបញ្ជាក់ថា “ធម្មតាអ្នកវិនិយោគ ក៏ដូចជាអ្នកអភិវឌ្ឍន៍គឺពួកគាត់សុទ្ធតែបានសិក្សាលម្អិត និងស្គាល់ច្បាស់ពីសក្ដានុពលនៃតំបន់។ អ្វីដែលជាលក្ខណៈពិសេស និងទាក់ទាញការវិនិយោគ ក៏ដូចជាគម្រោងអភិវឌ្ឍន៍នានា មួយចំណែកអាចទទួលបានពីគម្រោងបង្កើតទីក្រុងកោះនរាហ៍ ដែលថ្ងៃខាងមុខអាចនឹងមានការតភ្ជាប់គ្នាទៅនឹងតំបន់កោះពេជ្រ ឆ្លងចូលដល់កណ្តាលក្រុងតែម្ដង”។

លោកស្រីចេវ សុឃុនបានបន្តទៀតថា ក្រៅពីគម្រោងអភិវឌ្ឍន៍ធំៗទៅលើសំណង់អាគារពាណិជ្ជកម្មដែលមានតម្លៃរាប់រយ រាប់ពាន់ដុល្លារ ងាកមកវិស័យលំនៅដ្ឋានក្នុងតំបន់ច្បារអំពៅ ក៏មានភាពផុសផុលផងដែរ ដោយសារតែមានភាពងាយស្រួលក្នុងការរស់នៅ មានហេដ្ឋារចនាសម្ព័ន្ធឆ្លងកាត់ច្រើន។ ជាក់ស្ដែងបច្ចុប្បន្ននេះ បានបន្តរហូតដល់ប្រមាណជិត២០គីឡូម៉ែត្ររាជធានីភ្នំពេញ តាមបណ្តោយផ្លូវជាតិលេខ១  ក៏មានការអភិវឌ្ឍវិស័យលំនៅដ្ឋានដោយគម្រោងបុរីធំៗផងដែរ។

ជាមួយគ្នានេះ លោក ខន គង្គា អគ្គនាយកក្រុមហ៊ុនអចលនទ្រព្យអន្តរជាតិ ERA បានមានប្រសាសន៍ថា ការបោះទុនវិនិយោគនៅតំបន់ច្បារអំពៅ ដែលស្ថិតនៅតាមផ្លូវជាតិលេខ១ ជាពិសេសនៅជាប់តំបន់ទន្លេ គឺជាការសម្រេចចិត្តប្រកបដោយភាពត្រឹមត្រូវ ដែលតំបន់នេះ អំណោយផលយ៉ាងខ្លាំងទៅលើវិស័យខុនដូ អាផាតមិន សណ្ឋាគារលំដាប់ខ្ពស់ ក៏ដូចជាលំនៅដ្ឋានកម្រិតផងដែរ។

លោកបានបន្តទៀតថា “តំបន់កោះនរាហ៍ដែលបច្ចុប្បន្នកំពុងមានការចាក់ដី ថ្ម បំពេ​ញនៅតាមច្រាំងទន្លេ ដើម្បីអភិវឌ្ឍជាទីក្រុងថ្មីមួយទៀតរបស់ក្រុមហ៊ុន OCIC បន្ទាប់ពីទីក្រុងកោះពេជ្រនេះ វានឹងកាន់តែមានសក្ដានុពល ប្រជាប្រិយភាពខ្លាំងក្នុងការទាក់ទាញលើការវិនិយោគលើគម្រោងធំៗបន្ថែមទៀត ដែលស្រដៀងគ្នាទៅនឹងតំបន់ទីក្រុងរណបកោះពេជ្រនៅពេលបច្ចុប្បន្ននេះផងដែរ”។

ជាមួយនឹងការលើកឡើងពីសក្ដានុពល តំបន់ជុំវិញគម្រោងអភិវឌ្ឍទៅក្រុងរណបទី២របស់ក្រុមហ៊ុនOCIC និងភាពល្អប្រសើរនៃទីផ្សារអចលនទ្រព្យ តាមរយៈគម្រោងអភិវឌ្ឍន៍ធំៗដែលមានតម្លៃសរុបរាប់ពាន់ដុល្លារនេះ វានឹងជះឥទ្ធិពលល្អទៅដល់តំបន់នៅក្បែរ ដែលជួយជំរុញតម្លៃឱ្យឡើងថ្លៃក្នុងរយៈពេលដ៏ខ្លី។

អគ្គនាយករងក្រុមហ៊ុនOCIC លោកទូច សំណាងធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ការស្ថាបនាច្រាំងទន្លេ និងចាក់ដីបំពេញ រួមទាំងហេដ្ឋារចនាសម្ព័ន្ឋដទៃទៀត គ្រោងនឹងចំណាយទឹកប្រាក់ប្រមាណ២០០០លានដុល្លារអាមេរិក ដោយបច្ចុប្បន្នការស្ថាបនាបានចាប់ផ្តើម ជាមួយនឹងផែនការបញ្ចប់ការសាងសង់ហេដ្ឋារចនាសម្ព័ន្ឋទាំងស្រុងនៅឆ្នាំ២០២៣ខាងមុខ។

លោកបន្តថា ជាមួយនឹងគំរោងទីក្រុង ដែលមានលក្ខណៈស្រដៀងគ្នានឹងទីក្រុងកោះពេជ្រ ក្រុមហ៊ុនក៏បាននិងកំពុងសិក្សាស្ពានពីរខ្សែ ដោយផ្តោតលើជម្រើសលើទឹក​ដែលគ្រោងចំណាយប្រមាណ៦០លានដុល្លារអាមេរិក និងជម្រើសមួយទៀតជាស្ពានឆ្លងកាត់ក្រោមទន្លេ ដែលគ្រោងចំណាយទឹកប្រាក់២០០លានដុល្លារអាមេរិក ប៉ុន្តែជម្រើសទាំងពីរនេះមិនទាន់សម្រេចជ្រើសរើសយកជំរើសមួយណានៅឡើយ៕

ដោយរតនៈ

ភ្នំពេញៈ បើយើងក្រឡេកមើលការអភិវឌ្ឍសំណង់ លំនៅឋាននាពេលបច្ចុប្បន្នកំពុ ងតែសាងសង់យ៉ាងមមាញឹកជាមួយនឹង លំនៅឋានជាច្រើនប្រភេទ ដែលមានដូចជា វីឡាទោល វីឡាភ្លោះ វីឡាកូនកាត់ ផ្ទះល្វែងជាដើម។

ក្នុងនោះលំនៅឋានមួយប្រភេទ ដែលគេមិនអាចមើលរំលងបាន នោះគឺហ្សបហោស៍ ដែលជាលំនៅឋាន កំពុងតែទទួលបានការពេញចិត្ត នឹងចង់បានពីសំណាក់អតិថិជន ព្រោះថាលំនៅឋានប្រភេទនេះ អាចប្រកបអាជីវកម្ម ព្រមទាំងអាចស្នាក់នៅផងដែរ។

ហ្សបហោស៍ លំនៅឋានអាជីវកម្ម ត្រូវបានសាងសង់ឡើង ក្នុងទីតាំងល្អដែលជាទីប្រជុំជនពាណិជ្ជកម្ម មានមនុស្សរស់នៅច្រើនកុះករ ក្នុងតំបន់អភិវឌ្ឍ ទើបស័ក្តិសមសម្រាប់ការប្រកបអាជីវកម្មផងដែរ។

បើក្រឡេកមើលការអភិវឌ្ឍ តាមបណ្តោយផ្លូវជាតិលេខ ១ ចាប់ពីស្ពានព្រះមុនីវង្ស ដល់តំបន់បឹងស្នោ កំពុងតែរីកដុះដាលទៅដោយគម្រោងអភិវឌ្ឍន៍ លំនៅដ្ឋានជាច្រើន រួមទាំងផ្សារទំនើប ធនាគារ សាលារៀន មន្ទីរពេទ្យ ភោជនីយដ្ឋាន ហាងទំនិញ បានក្លាយជាទីតាំងប្រជុំជនពាណិជ្ជកម្មមួយ ជាពិសេសតំបន់បឹងស្នោរផ្ទាល់តែម្តង។

បច្ចុប្បន្ននេះ តំបន់បឹងស្នោរ លែងស្ងប់ស្ងាត់ដូចកាលពីមុនឡើយ ក្រោយពេល គម្រោងដ៏ធំមួយរបស់បុរី ប៉េង ហួត ដែលមានឈ្មោះថាហ្គ្រេនស្តាផ្លាទីនីម និងហ្គ្រនស្តាផ្លាទីនីម អេកូ ខលឡិកសិន បានលេចរូបរាងឡើង។ លើផ្ទៃដីជាង៣០០ហិចតា គម្រោងដ៏ធំនេះ បានប្រែក្លាយតំបន់បឹងស្នោរ ជាទីក្រុងរណបមួយ ដ៏សម្បូរបែប ដែលរួមមាន ឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹងធម្មជាតិ ផ្លូវជិះកង់ ផ្លូវរត់ហាត់ប្រាណ និងកន្លែងក្មេងលេង ដែលពោរពេញទៅដោយបរិយា​កាសបែបធម្មជាតិ ពិតជាផ្តល់ជូននូវ បទពិសោធន៍ថ្មីប្លែក និង ភាពសម្បូរបែបនៃការរស់នៅបែបថ្មី ថែមទាំងមានសួនកម្សាន្តបែបអឺរ៉ុប សាលារៀនអន្តរជាតិ កីឡដ្ឋាន ស្ថានីយពន្លត់អគ្គីភ័យ ខុនដូ និងផ្សាទំនើប ទៀតផង។

ក្រៅតែពីភាពសម្បូរបែបខាងលើ ក្នុងគម្រោងដ៏ធំនេះ ក៏បានបែបចែកតំបន់សម្រា​ប់រស់នៅ និងតំបន់ពាណិជ្ជកម្ម ដែលមានលំនៅដ្ឋានជាច្រើនប្រភេទសម្រាប់អតិថិជនធ្វើការជ្រើសរើស។

រីឯ គម្រោងដឹស្តាផ្លាទីនីម ប៉ូឡារីស ១ ដឹស្តាផ្លាទីនីម ប៉ូឡារីស ២ ដឹស្តាផ្លាទីនីម រ៉ូសាតូ និងគម្រោងថ្មីមួយទៀត ដឹស្តាផ្លាទីនីម អេកូ សាន់រ៉ាយ សុទ្ធសឹងតែជាគម្រោងពាណិជ្ជកម្មដែលសក្តិសមសម្រាប់ប្រកបអាជីវកម្មគ្រប់ប្រភេទ ព្រោះគម្រោងខាងលើ ប្រមូលផ្តុំទៅដោយសាលារៀនអន្តរជាតិ កីឡដ្ឋាន ស្ថានីយពន្លត់អគ្គីភ័យ ខុនដូ និងផ្សាទំនើប ស្ថិតក្នុងតំបន់ពាណិជកម្មរួមគ្នាតែមួយ។

លំនៅឋាន ប្រភេទហ្សបហោស៍នេះមានជាច្រើនប្រភេទ ដូចជា ហ្សបហោស៍A ហ្សបហោស៍B ហ្សបហោស៍C ហ្សបហោស៍D និងហ្សបហោស៍ Classic  រួមបញ្ចូលរចនាបថយ៉ាងល្អឥតខ្ចោះ ដោយផ្អែកលើគុណភាព ប្រណិតភាព សោភណ្ឌភាព ភាពស៊ីវិល័យ និងភាពច្នៃប្រឌិតខ្ពស់ ដែលមានបន្ទប់គេង៤ បន្ទប់ទឹក៥ ព្រមទាំងបរិវេណទទួលភ្ញៀវ ដែលមានបរិយាកាសស្រស់ស្រាយ កន្លែងទទួលទានអាហារ បន្ទប់ចម្អិនអាហារ និងកន្លែងចតរថយន្តធំទូលាយ ដែលស័ក្តិសមបំផុត សម្រាប់ការរស់នៅ និងប្រកបអាជីវកម្ម របស់លោកអ្នក។

សម្រាប់ព័ត៌មានបន្ថែមសូមទាក់ទងទូរសព្ទលេខ 015 90 6789 Email: [email protected] ឬចូលទៅកាន់គេហទំព័រ Facebook: www.facebook.com/boreypenghuoth៕

ដោយ ហ្សូលី

សឹង្ហបុរីៈ ប្រទេសសិង្ហបុរីបានជួបប្រទះព្យុះបក់បោក លើវិស័យអចលនទ្រព្យជាលើកដំបូងក្នុងប្រវត្តិសាស្រ្ត ជាហេតុនាំឱ្យការរិនិយោគលើវិស័យនេះ ធ្លាក់ចុះជិត៨០ភាគរយ នៅត្រីមាសទី១ដើមឆ្នាំ២០២០នេះ ដោយសារសន្ទុះនៃការធ្លាក់ចុះវិបត្តិសេដ្ឋកិច្ចពិភ​ព​លោក។

យោងតាមរបាយការណ៍និន្នការរបស់អាស៊ីប៉ាស៊ីហ្វិកបានឱ្យដឹងថា ការវិនិយោគលើវិស័យអចលនទ្រព្យ ក្នុងប្រទេសសិង្ហបុរីបានដាំក្បាលចុះចំនួន៧៨ភាគរយ ឬស្មើនឹងទឹកប្រាក់ប្រមាណ៤៣២លានដុល្លារអាមេរិក។ ការធ្លាក់ចុះនេះគឺមានភាពធ្ងន់ធ្ងរខ្លាំង បើប្រៀបធៀបនឹងតួលេខ ទៅនឹងរយៈពេលដូចគ្នាកាលពីឆ្នាំមុន ខណៈកាលពីឆ្នាំមុនមានកិច្ចព្រមព្រៀងចំនួន១៣ ឬស្មើនឹង៣២ភាគរយតែប៉ុណ្ណោះ ដែលបានខាតបង់ឬលុបចោល។

លោក David Green-Morgan ប្រធានគ្រប់គ្រងនៃទិន្នន័យរបាយការណ៍និន្នាការអាស៊ីប៉ាស៊ីហ្វិក បានមានប្រសាសន៍ឱ្យដឹងថា កាលពីឆ្នាំ២០១៩ សិង្ហបុរីរំពឹងខ្ពស់ណាស់ថា នឹងទទួលបានការវិនិយោគយ៉ាងគគ្រឹកគគ្រេង លើវិស័យអចលនទ្រព្យ ប៉ុន្តែវាប្រែទៅជាខុសពីការរំពឹងទុក ដោយសារការធ្លាក់ចុះនៃសេដ្ឋកិច្ចសកលលោក។

វិស័យអចលនទ្រព្យនៅជុំវិញតំបន់អាស៊ីប៉ាស៊ីហ្វិក បានដាំក្បាលចុះដល់ទៅ៥០ ភាគរយ ឬស្មើនឹងទឹកប្រាក់ជាង២១ពាន់លានដុល្លារ ក្នុងដើមឆ្នាំ ២០២០នេះ ដោយសារកត្តាការរាតត្បាតនៃមេរោគCovid-19 នៅប្រទេសចិន និងរាលដាលដល់បណ្តាប្រទេសនៅជុំវិញ។

របាយការណ៍ដដែលបានលើកឡើងថា វិនិយោគិនកំពុងដកថយពីការវិនិយោគទាំងឡាយមិនថា ជាការិយាល័យរួម និងអចលនវត្ថុលក់រាយនោះទេ ដែលវានឹងអាចមានរយៈពេលពេញមួយឆ្នាំតែម្តង ព្រោះជំងឺនេះមិនទាន់ងាកចេញ ពីប្រទេសសិង្ហបុរីនៅឡើយទេ។

យ៉ាងណាមិញក៏មានការលើកឡើង ពាក់ព័ន្ធនឹងវិស័យអចលនទ្រព្យ នៅបណ្តា       ប្រទេសជុំវិញផងដែរ។ ជាក់ស្តែងអ្នកជំនាញបានឱ្យដឹងថា បើប្រៀបធៀបរវាងវិស័យអចលនទ្រព្យនៅសិង្ហបុរី និងហុងកុង គឺហុងកុងមានការធ្លាក់ចុះច្រើនជាងសិង្ហបុរី ព្រោះគម្រោងធំៗដែលមានតម្លៃជាង២៥០លានដុល្លារ បានដកខ្លួនចេញភ្លាមៗ ដែលនេះគ្រាន់តែជាគម្រោងមួយប៉ុណ្ណោះ។

រីឯកូរ៉េខាងត្បូងវិញខាតបង់ដល់ទៅ៤.៥៣ពាន់លានដុល្លារ ក្នុងរយៈពេល៣ខែដើមឆ្នាំ ២០២០ ដែលនេះជាចំនួនលេចធ្លោជាងគេ៕ New York Times៕