ដោយ ៖ រ៉ាណេត

ព្រះសីហនុ ៖ បន្ទាប់ពីជួបបញ្ហានៃព្រឹត្តិការណ៍សង្គមផ្ទួនៗគ្នាចាប់តាំងពីដើមខែមករា ឆ្នាំ២០២០ បានធ្វើឱ្យវិស័យអចលនទ្រព្យ ក៏ដូចជាចរន្តនៃការទិញលក់មានការធ្លាក់ចុះ។ ប៉ុន្តែ បច្ចុប្បន្ននេះ ស្ថានភាពទីផ្សារអចលនទ្រព្យនៅទូទាំងក្រុងព្រះសីហនុបានចាប់ផ្ដើមបង្ហាញពីសញ្ញាវិជ្ជមានឡើងវិញ ជាមួយនឹងសកម្មភាពសាងសង់សំណង់អគារធំៗបន្ទាប់ពីផ្អាកមួយរយៈ ។

មន្ត្រីរដ្ឋបាលខេត្តព្រះសីហនុ លោក នង ឌីណារ៉ា ប្រធានពិធីការរដ្ឋបាលខេត្តបានបង្ហើបប្រាប់តាមទូរស័ព្ទកាលពីព្រឹកថ្ងៃទី១៨ ខែឧសភា ឆ្នាំ២០២០នេះថា បន្ទាប់ពីមានភាពស្ងប់ស្ងាត់ដែលបណ្តាលមកពីការផ្ទុះនូវជំងឺឆ្លង Covid-19 ចាប់តាំងពីដើមឆ្នាំរហូតមកដល់ពេលនេះ ភាពល្អប្រសើរនៅក្រុងព្រះសីហនុចាប់ផ្ដើមត្រឡប់មកវិញហើយ ដោយសូម្បីតែការសាងសង់សំណង់គម្រោងធំៗមួយចំនួនដែលវិនិយោគ និងអភិវឌ្ឍន៍ដោយក្រុមហ៊ុនចិនក៏ចាប់មានដំណើរខ្លះៗដែរ។

លោក នង ឌីណារ៉ា បានមានប្រសាសន៍បញ្ជាក់ថា “បច្ចុប្បន្ននេះ តាមភាពជាក់ស្ដែងយើងឃើញថា ភាពល្អប្រសើរនៅក្នុងខេត្តដែលជាមជ្ឈមណ្ឌលពាណិជ្ជកម្មមួយនេះបានចាប់ផ្តើមបង្ហាញសញ្ញាវិជ្ជមានជាបណ្តើរៗ ដែលក្នុងនោះរាប់ទាំងវិស័យទេសចរណ៍ វិស័យអចលនទ្រព្យ និងសំណង់ ជាពិសេសការកសាងហេដ្ឋារចនាសម្ព័ន្ធទាំង៣៤ខ្សែ ដែលសម្រេចបានជាង៩០ភាគរយ និងគ្រោងបញ្ចប់នៅពេលដ៏ខ្លីខាងមុខនេះ”។

លោកបានបញ្ជាក់ថា “សកម្មភាពនៃការសាងសង់នៅតាមគម្រោងសំណង់ធំៗ បច្ចុប្បន្នចាប់ផ្តើមដំណើរការបន្តិចម្ដងៗដោយកម្លាំងកម្មករ និងអ្នកជំនាញចិនដែលកំពុងស្នាក់នៅក្នុងខេត្តតាំងពីដើមឆ្នាំ ពោលគឺពួកគាត់មិនមែនជាអ្នកចំណូលថ្មី ដែលទើបតែចាកចេញមកពីប្រទេសចិននៅពេលថ្មីៗនេះទេ។ ប៉ុន្តែយើងសង្ឃឹមថា នៅក្នុងពេលដ៏ខ្លីឆាប់ៗខាងមុខនេះ ភាពស្រស់ស្រាយនៃក្រុងព្រះសីហនុទាំងមូលនឹងវិលត្រឡប់មកវិញ បន្ទាប់ពីមានការបើកជើងហោះហើរមកពីបណ្តាប្រទេសនានា”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ថា “សំណង់នៅទូទាំងខេត្តព្រះសីហនុ គឺបាន និងកំពុងធ្វើការអភិវឌ្ឍ ប៉ុន្តែត្រូវទទួលរងនូវផលប៉ះពាល់តាំងពីអំឡុងបុណ្យចូលឆ្នាំចិន ហើយរួមផ្សំជាមួយការបិតហ្គេមអនឡាយ ជាពិសេសវិបត្តិនៃជំងឺ Covid-19 តែម្ដង ដែលធ្វើឱ្យវិស័យមួយនេះកាន់តែប៉ះពាល់ធ្ងន់ធ្ងរ”។

លោកថា “ស្ថិតនៅក្នុងស្ថានភាពបែបនេះ គ្រប់គម្រោងសំណង់ទាំងអស់គឺគេគ្រាន់តែផ្អាកជាបណ្តោះអាសន្ននៅក្នុងដំណាក់កាលមួយតែប៉ុណ្ណោះ ដោយសារតែការគោរពទៅតាមការណែនាំរបស់រដ្ឋាភិបាលក្នុងការទប់ស្កាត់ការីករាលដាលនៃជំងឺឆ្លង ហើយម៉្យាងទៀតក៏មានភាពលំបាកក្នុងការរកកម្លាំងកម្មករជំនាញផងដែរ”។

ជាមួយគ្នានេះលោកក៏បានបញ្ជាក់ឱ្យដឹងផងដែរថា ប្រសិនបើលទ្ធភាពក្នុងការទប់ស្កាត់ និងឈានទៅរកការលុបបំបាត់នៃការរីករាលដាលនៃជំងឺឆ្លង Covid-19 នៅក្នុងបណ្តាប្រទេសនានាក្នុងតំបន់ ជាពិសេសប្រទេសចិន វិស័យអចលនទ្រព្យ នីងក៏ដូចជាវិស័យមួយចំនួនទៀតនៅកម្ពុជា នឹងកាន់តែល្អប្រសើរជាងនេះ៕

ដោយ ៖ រ៉ា​ណេ​ត

ភ្នំពេញៈ ការវិនិយោគ​ក្នុង​អនុវិស័យ​អចលនទ្រព្យ ត្រូវបាន​ផ្តោតទៅលើ​ទីផ្សារ​ដីធ្លី ដោយសារតែ​ឱកាស នៃ​ការទទួលបាន​ចំណេញ​មាន​កម្រិត​ខ្ពស់ និង​ងាយស្រួល​ក្នុង​ការទិញ-លក់។

ទោះជា​បែបនេះ​ក្ដី អ្នកជំនាញ​នៅក្នុង​វិស័យ​មួយ​នេះ​បាន​ព្រមាន​ថា ការទិញ-លក់​ដីធ្លី មិនមែន​សុទ្ធតែ​ទទួលបាន​ចំណេញ​ខ្ពស់​ទាំងអស់នោះ ផ្ទុយទៅវិញ វិបត្តិ​និង​ហានិភ័យ​ក៏​អាច​កើតមាន ប្រសិនបើ​ការវិនិយោគ​មិនមាន​ភាព​ឆ្លាត​វៃ។

អគ្គនាយក​ក្រុមហ៊ុន​ភ្នាក់ងារ​អចលនទ្រព្យ​អន្តរជាតិ Century21 Advance Property លោក ឡុង គីម​សួគ៌ ដែលជា​អ្នកជំនាញ និង​មានបទពិសោធន៍​នៅក្នុង​វិស័យ​ដីធ្លី​ច្រើនជាង១០ឆ្នាំ បាន​មានប្រសាសន៍ប្រាប់​តាម​ទូរស័ព្ទ កាលពី​ថ្ងៃ​ចុង​សប្ដាហ៍​កន្លងទៅ​ថា ទីផ្សារ​ដីធ្លី​នៅ​កម្ពុជា គឺមាន​ភាពទូលំទូលាយ ហើយ​ក៏មាន​អ្នកវិនិយោគ​នៅក្នុង​វិស័យ​មួយ​នេះ​ច្រើន​ណាស់ដែរ ដោយសារតែ​គេ​សម្លឹង​ឃើញ​ពី​ឱកាស​ចំណេញ​ច្រើន។

លោក​បន្តទៀតថា “ខ្ញុំ​ទទួលស្គាល់ថា ការវិនិយោគ​ដីធ្លី​ងាយស្រួល​ក្នុងការ​ទទួលបាន​ឱកាស​ចំណេញ និង​មាន​ទីផ្សារ​ធំ​ទូលាយ ប៉ុន្តែ​រាល់​ការវិនិយោគ​ទាំងអស់​ក៏ត្រូវ​តែមាន​ភាពច្បាស់លាស់ និង​ស្វែងយល់​ពី​ឱកាស​នៃ​ការទទួលបាន​ចំណេញ​យ៉ាង​ប្រាកដ” ។ លោក​បន្តថា “សម្រាប់​អ្នក​ដែលមាន​ធនធាន​គ្រប់គ្រាន់ អាចធ្វើ​ការវិនិយោគ​នៅ​តំបន់​ណាឆ្ងាយៗ ដោយ​មិនមាន​ក្ដីបារម្ភ​ពី​ការ​កប់​ទុក​សាច់ប្រាក់​ដោយ​ទេ ប៉ុន្តែ​សម្រាប់​អ្នក​ដែលមាន​ធនធាន​មធ្យម ឬ​មាន​ចំណែក​នៃចំ​ណុល​ធនាគារ ដើម្បី​បង្កើន​ទុនវិនិយោគ​គឺជា​កត្តា​មួយ​ដែលមាន​អត្រា​ប្រឈម​ខ្ពស់” ។

លោក​ឡុង គីម​ស៌ួ​គ​បាន​បន្តទៀតថា អត្រា​នៃ​ការទទួលបាន​ចំណេញ​ពី​ា​រ​វិនិយោគ​ដី គឺ​ត្រូវបាន​ធ្វើឡើង​នៅក្នុង​តំបន់​ដែលមាន​គម្រោង និង​សកម្មភាព​អភិវឌ្ឍន៍​ច្បាស់លាស់ ជាពិសេស​គម្រោង​អភិវឌ្ឍ​ហេដ្ឋារចនាសម្ព័ន្ធធំៗ ដែល​អាច​ទាក់ទាញ​កំណើន​ប្រជា​សាស្ត្រ។

ជាក់ស្ដែង​ដូចជា​តំបន់​ខណ្ឌ​សែន​សុខ ដែល​កាលពី​ប៉ុន្មាន​ឆ្នាំមុន​គ្រាន់តែ​ជា​តំបន់​ជាយក្រុង​លិច​ទឹក ពោរពេញ​ទៅដោយ​ស្មៅ​ក្រាស់ កក់ និង​កំប្លោក​ជាដើម ប៉ុន្តែ​ក្រោយពេល​មានការ​អភិវឌ្ឍ​ហេដ្ឋារចនាសម្ព័ន្ធ​របស់​រដ្ឋាភិបាល គម្រោង​អភិវឌ្ឍន៍​ពី​វិស័យ​ឯកជន ដូចជា​ផ្សារ​ទំនើប AEON2 ផ្សារ​ម៉ាក្រូ ផ្សារ​ជីពម៉ុង ផ្សារ Global House រួម​ជាមួយនឹង​មជ្ឈមណ្ឌល​ពាណិជ្ជកម្ម​ជាដើម” ។

ជាមួយគ្នានេះ លោក​ក៏បាន​គ្រើនរំលឹក​ផងដែរ​ថា ការវិនិយោគ​ដីធ្លី​នៅពេល​បច្ចុប្បន្ននេះ សម្រាប់​នៅក្នុង​តំបន់​ក្រុង ហាក់​មិនមាន​ឱកាស​ចំណេញ​ខ្ពស់​នោះទេ ដោយសារតែ​មិនមាន​ដី​ទំនេរ​ច្រើន ហើយ​តម្លៃ​ក៏បាន​ឡើង​ខ្ពស់​រួចទៅហើយ។

តំបន់​ដែល​គួរ​ពិចារណា​ក្នុងការ​វិនិយោគ​ពេលនេះ និង​បន្តទៅ​ថ្ងៃ​ខាងមុខ​ដ៏​ខ្លី គឺ​ស្ថិតនៅតាម​បណ្តា​តំបន់​ជាយក្រុង ដែល​កំពុង​តែមាន​សក​ម្ម​ភាព​អភិវឌ្ឍន៍ ដី​នៅ​តំបន់​ជាប់ និង​ក្បែរ​ផ្លូវជាតិ​ដែលមាន​ចរន្ត​សេដ្ឋកិច្ច ដូចជា​ផ្លូវជាតិ​លេខ១,២,៣,៤,៥,៦,៤១, និង​ផ្លូវ​លេខ៥១ ដែលជា​តំបន់​តាំងនៅ​បណ្តា​រោងចក្រ សហគ្រាស និង​ឃ្លាំង​ផងដែរ៕

ដោយ ​វុត្ថា

ភ្នំពេញៈ អ្នកជំនាញ​បាន​អះអាងថា តំបន់​នៅ​ស្រុក​មុខកំពូល នៃ​ខេត្តកណ្តាល​តាម​បណ្តោយ​ផ្លូវជាតិ​លេខ៦ នឹង​ទាក់ទាញ​ការវិនិយោគ​លើ​លំនៅឋាន បែប​ទំនើប​នាពេល​ខាងមុខនេះ ខណៈ​តំបន់​នេះ​គឺជា​តំបន់​ថ្មី ដែលមាន​សក្តានុពល​ខ្ពស់ ចំពោះ​ការវិនិយោគ​លើ​វិស័យ​អចលនទ្រព្យ​គ្រប់​ប្រភេទ។

លោក កាង សុធី នាយក​ប្រតិបត្តិ​ក្រុមហ៊ុន Century 21 Land Station បានឱ្យដឹង​កាលពី​ចុង​សប្តាហ៍​មុននេះ​ថា ស្រុក​មុខកំពូល​បើ​ធៀប​ទៅនឹង បណ្តា​សង្កាត់​មួយចំនួន​នៅក្នុង​ទីក្រុង​ភ្នំពេញ គឺមាន​ភាព​ទាក់ទាញ​ក្នុងការ​វិនិយោគ លើ​លំនៅឋាន​បែប​ទំនើប ជាពិសេស​វិស័យ​អចលនទ្រព្យ ដែល​អាច​ចំណាយ​ដើមទុន​តិច ហើយ​អាច​ទុក​លក់​បន្ត​ដើម្បី​យកចំណេញ​នាពេលខាងមុខ​បាន​ផងដែរ។

លោក​ថ្លែងបន្តថា “សម្រាប់​នៅតាម​ផ្លូវជាតិ​លេខ​៦A ម្តុំ​ស្រុក​មុខកំពូល កំពុងមាន​សក្តានុពល ដែល​បង្កឱ្យមាន​ភាពអំណោយ​ផល​ច្រើន លើ​ការវិនិយោគ​អចលនទ្រព្យ” ។

លោក​ច្រឹ​ក សុខ​នី​ម ប្រធាន​សមាគម​អ្នកវាយតម្លៃ និង​អចលនវត្ថុ​កម្ពុជា​បានឱ្យដឹង​ដែរ​ថា នៅតាម​បណ្តា​ជាយក្រុង​រាជធានី​ភ្នំពេញ ជាពិសេស​នៅ​ចន្លោះ​ផ្លូវជាតិ​លេខ៥ និង​លេខ៦ A បាន​នឹង​កំពុង​ទាក់ទាញ​គម្រោង​វិនិយោគ​លើ​នៅ​ឋាន​កម្រិត​ខ្ពស់ ។

លោក​បន្តថា ក្រៅពី​គម្រោង​វិនិយោគ​របស់​រដ្ឋាភិបាល ក៏មាន​គម្រោង​របស់​វិស័យ​ឯកជនធំៗកំពុង​វិនិយោគ​នៅ​តំបន់​នោះ ដែល​នេះ​វា​នឹង​ជះឥទ្ធិពល​ដល់​តំបន់​ក្បែរ​នោះ (ស្រុក​មុខកំពូល) និង​ធ្វើឱ្យ​តំបន់​នេះ កាន់តែ​មានការ​ទាក់ទាញ និង​សក្តានុពល​ខ្ពស់​លើ​វិស័យ​អចលនទ្រព្យ ជាពិសេស​វិស័យ​លំនៅឋាន។

អភិបាលខេត្ត​កណ្តាល លោក គង់ សោ​ភ័​ណ្ឌ ធ្លាប់បាន​បានទទួល​ស្គាល់​ដែរ​ថា ការអភិវឌ្ឍ​ទៅលើ​វិស័យ​លំនៅឋាន នៅ​ទូទាំង​ខេត្តកណ្តាល ពិតជា​មាន​ភាព​រីកចម្រើន​ខ្លាំង និង​កើតមាន​ស្ទើរ​ទូទាំង​ស្រុក​នានា ជាពិសេស​នៅតាម​តំបន់ ដែល​ព័ទ្ធជុំវិញ​រាជធានី​ភ្នំពេញ។

លោក​ថ្លែងថា ស្ទើរតែ​គ្រប់​តំបន់​នៅក្នុង​ខេត្តកណ្តាល ជាពិសេស​នៅតាម​តំបន់​មួយចំនួន ដែល​ស្ថិតនៅ​ហ៊ុ​ព័ទ្ធជុំវិញ​រាជធានី​ភ្នំពេញ គឺ​កំពុង​តែមាន​សក្ដានុពល​ក្នុងការ​វិនិយោគ និង​អភិវឌ្ឍន៍​ក្នុង​វិស័យ​សំណង់​គួរឱ្យកត់សម្គាល់ ដែល​ក្នុងនោះ​វិស័យ​លំនៅដ្ឋាន​កម្រិត​មធ្យម និង​សមរម្យ​បាន​ដើរតួ​ឈានមុខ​គេ ស្រប​ពេលដែល​កំណើន នៃ​ចំនួន​ប្រជាជន​បាន​កើនឡើង​រហូតដល់​ជាង ១លាន​នាក់។

ស្រុក​មុខកំពូល​នៅក្នុង​ចំណោម​ស្រុក​ចំនួន៤ ត្រូវបាន​ជ្រើសរើស និង​កំណត់​ជា​ប៉ូល​សេដ្ឋកិច្ច​ប្រចាំខេត្ត​កណ្តាល ដែល​ផែនការ​នេះ​ត្រូវបាន​គាំទ្រ​ដោយ​រដ្ឋបាលខេត្ត និង​មន្ទីរ​អភិវឌ្ឍន៍ជនបទ​ខេត្ត ដែល​អាចជួយ​ជំរុញ និង​លើកកម្ពស់​ដល់ទី​ផ្សា​រក​សិ​ករ ពា​ណិ​ជ្ជូ​ប​នីយកម្ម​កសិកម្ម (SAAMBAT) នៅ​ទូទាំង​ខេត្តកណ្តាល។

ស្រុក​មុខកំពូល ស្ថិតនៅ​ភាគ​ខាងជើង​នៃ​ខេត្តកណ្តាល មាន​ព្រំប្រទល់​រដ្ឋបាល​ខាងលិច​ជាប់​ស្រុក​ពញាឮ ខាងកើត​ជាប់​ស្រុក​ខ្សាច់កណ្តាល ខាងជើង​ជាប់​ស្រុក​បាធាយ និង​ស្រុក​កងមាស​នៃ​ខេត្តកំពង់ចាម និង​ខាងត្បូង​ជាប់​ខណ្ឌ​ឬ​ស្សី​កែវ នៃ​រាជធានី​ភ្នំពេញ៕

ដោយ​ស៊ីវ ម៉េង

ភ្នំពេញៈ ស្រប​ពេលដែល​បច្ចេកវិទ្យា​ដើរតួនាទី​កាន់តែ​សំខាន់​ឡើង ក្នុង​គ្រប់​និន្នាការ​អាជីវកម្ម ប្រធាន​សមាគម​អ្នកជំនាញ​អចលនទ្រព្យ​កម្ពុជា (CREA) បាន​អំពាវនាវ​ឲ្យ​ភ្នាក់ងារ​អចលនទ្រព្យ​ក្នុងស្រុក ខិតខំ​ព​ង្រឹ​ក​សមត្ថភាព​ផ្នែក Digital Marketing ។

លោកស្រី​ចេ​វ សុ​ឃុន ប្រធាន CREA បាន​មានប្រសាសន៍​ឲ្យ​ដឹង​កាលពី​រសៀល​ថ្ងៃទី១៧ ឧសភា​កន្លងមក​ថា ការពង្រឹង​សមត្ថភាព​ផ្នែក​បច្ចេកវិទ្យា និង Digital Marketing កាន់​តែមាន​សារៈសំខាន់​ខ្លាំង​ឡើង​ក្នុង​វិស័យ​អចលនទ្រព្យ។

ហេតុនេះ​ភ្នាក់់ងារ​អចលនវត្ថុ​ក្នុងស្រុក គួរតែ​ពង្រឹងសមត្ថភាព​ផ្នែក​ទាំងនេះ ដើម្បី​ដើរ​ឲ្យ​ទាន់​សម័យកាល​នៃ​បច្ចេកវិទ្យា ពិសេស​កំឡុងពេល​ពិភពលោក​កំ​ពូ​ង​ជួប​វិបត្តិ Covid1-19 ដែលជា​ពេលវេលា​ដ៏​លំបាក​ក្នុងការ​ធ្វើដំណើរ ហើយ​បច្ចេកវិទ្យា Digital ត្រូវបាន​ដើរតួនាទី​កាន់តែ​សំខាន់​ក្នុង​វិស័យ​អចលនទ្រព្យ និង​អាជីវកម្ម​នានា។

លោកស្រី​បន្តថា “បណ្តាញ​ទំនាក់ទំនង​សង្គម​ដូចជា Facebook, Instagram, Telegram, Twitter, Google Map ជាដើម​សុទ្ធតែជា​បណ្តាញ​សង្គម ដែល​អ្នករក​ស៊ីក្នុង​វិស័យនេះ គួរផ្តោត​លើ​ការសិក្សា​រៀនសូត្រ និង​អភិវឌ្ឍន៍​សមត្ថភាពរ​បស់​ខ្លួន​កាន់តែ​ប្រសើរឡើង” ។

លោកស្រី​បន្តថា “ក្នុងពេល​សេដ្ឋកិច្ច​កំពុង​ប្រឈម​នឹង​វិបត្តិ​នៃ Covid-19 ការទំនាក់ទំនង​តាម​បណ្តាញ​សង្គម និង​រកមើល​ទីតាំង​ដី​តាមរយៈ Google Map បានរួម​ចំណែក​ច្រើន​ក្នុងការ​កាត់បន្ថយ​ពេលវេលា កាត់បន្ថយ​ការចំណាយ ពិសេស​កាត់បន្ថយ​ការឆ្លង​រាលដាល​នៃ​មេរោគ Covid-19 ផងដែរ” ។

ជាមួយគ្នានេះ លោកស្រី​ចេ​វ សុ​ឃុន​បាន​ថ្លែងអំណរគុណ​ដល់​ប្រមុខ​នៃ​រាជរដ្ឋាភិបាល​កម្ពុជា សម្តេច​តេ​ជោ​ហ៊ុន សែន​ដែល​បានដាក់​ចេញ​វិធានការណ៍​ទាន់ពេលវេលា ក្នុងការ​ទប់ស្កាត់​ការរីក​រាលដាល​មេរោគ ​Covid-19 ពិសេស​បាន​ជួយ​ឲ្យ​អ្នកជំងឺ​ទាំង១២២ នាក់ ដែល​បាន​ឆ្លង​ជំងឺ​នេះ​និង​បាន​សំរាក​ព្យាបាល​នៅ​កម្ពុជា បាន​ជះ​សះស្បើយ១០០ភាគរយ​រហូតមកទល់​ពេលនេះ៕

ដោយៈ រ៉ា​ណេ​ត

ភ្នំពេញៈ បើទោះជា​គម្រោង​អភិវឌ្ឍន៍ ព្រលានយន្តហោះ​អន្តរជាតិ​ភ្នំពេញ​ថ្មី ដែល​ស្ថិតនៅ​ក្នុងស្រុក​កណ្តាលស្ទឹង ខេត្តកណ្តាល ត្រូវបាន​សម្រេច​លទ្ធផល​ប្រមាណ៣០ភាគរយ​រួចទៅហើយ​ក្ដី ប៉ុន្តែ​សម្រាប់​កិច្ចអភិវឌ្ឍន៍​លើ​វិស័យ​អចលនទ្រព្យ​នានា នៅ​ជុំវិញ​គម្រោង​នេះ ដូចជា​ការទិញ-លក់ ដោះដូរ​ដីធ្លី ហាក់​មិនមាន​ភាព​ផុសផុល ដែល​អាច​ជំរុញ​ឱ្យ​តម្លៃ​ដី​ឡើងថ្លៃ​ខ្ពស់​នោះទេ។

ប្រធាន​សមាគម​អ្នកវាយតម្លៃ និង​ភ្នាក់ងារ​អចលនវត្ថុ​កម្ពុជា លោក​ច្រឹ​ក សុខ​នី​ម បាន​មានប្រសាសន៍ប្រាប់​តាម​ទូរស័ព្ទ កាលពី​ល្ងាច​ថ្ងៃ​ចុង​សប្ដាហ៍​កន្លងទៅនេះ​ថា សម្រាប់​សកម្មភាព នៃ​ការអភិវឌ្ឍ​ពី​វិស័យ​ឯកជន នៅ​តំបន់​ជុំវិញ​គម្រោង​នេះ អាច​ត្រូវការ​ពេលវេលា​យូរ​បន្តិចទៀត ហើយ​តម្លៃ​ដីធ្លី​ក៏​ដូចគ្នា​ដែរ ពោលគឺ​ទាល់តែ​មានការ​អភិវឌ្ឍ មាន​តម្រូវការ​ប្រើប្រាស់​ដី ទើប​តម្លៃ​មានការ​កើនឡើង។

លោក​បន្តថា “តំបន់​នេះ​យ៉ាងហោចណាស់​ក៏ត្រូវ​ចំណាយពេល ៣-៤ ឆ្នាំ​ទៀត​ដែរ ទម្រាំ​គម្រោង​សាងសង់​ព្រលានយន្តហោះ​សម្រេច​លទ្ធផល។ ដូច្នេះ​ក្រោយពេល​គម្រោង​ដ៏​ធំ ដែលមាន​តម្លៃ​រាប់ពាន់​ដុល្លារ​មួយ​នេះ​លេចចេញ​ជា​រូបរាង ទើប​មាន​សកម្មភាព​អភិវឌ្ឍន៍​ពី​វិស័យ​ឯកជន” ។

បច្ចុប្បន្ននេះ បើ​និយាយ​ពី​ការទិញ​លក់ ហាក់​មិនមាន​ភាព​សកម្ម​ដូច​កាលពី​ឆ្នាំ​កន្លងទៅ​នោះទេ ដោយសារតែ​ភាគច្រើន​ដី​នៅ​តំបន់​ជុំវិញ គម្រោង​ព្រលានយន្តហោះ​ថ្មី ត្រូវបាន​អ្នកវិនិយោគ​ទិញ​ទុក​រួចទៅហើយ ហើយក៏​នៅ​មិនទាន់​បង្ហាញ​ពី​គម្រោង​អភិវឌ្ឍន៍​នៅឡើយ។ ដូច្នេះ​នៅពេល​គម្រោង​អភិវឌ្ឍន៍​នានា មិនទាន់​បានបង្ហាញ តម្លៃ​ដី​ក៏​មិនទាន់​ឡើងថ្លៃ​ខ្ពស់​ដូចគ្នា។

នាយិកា​ក្រុមហ៊ុន​ភ្នាក់ងារ​អចលនទ្រព្យ AMATAK Property Service លោកស្រី តាំង ហួរ បាន​មានប្រសាសន៍​បញ្ជាក់ប្រាប់​ពី​តម្លៃ​ដី នៅ​ជុំវិញ​តំបន់​គម្រោង​សាងសង់​ព្រលានយន្តហោះ​ផងដែរ​ថា តម្លៃ​ដី​នៅ​ជុំវិញ​តំបន់​នេះ​មាន​ភាពខុស​គ្នាច្រើន រវាង​ដី​ដែល​ស្ថិតនៅ​ជិត​គម្រោង ហើយ​ជាប់​ផ្លូវធំ និង​ដី​ភូមិ​ដែល​ស្ថិតនៅ​ខាងក្នុង​ឆ្ងាយ​ពី​ផ្លូវធំ។

លោកស្រី​បាន​បន្តថា “ដី​ដែល​ស្ថិត​នៅជាប់​ផ្លូវធំ សម្រាប់​តំបន់​លំនៅដ្ឋាន​មានតម្លៃ​ចន្លោះ​ជាង២០០ដុល្លារ​ក្នុង​មួយ​ម៉ែត្រការ៉េ ហើយ​ដី​ដែលមាន​ទំហំ​ធំ អាចមាន​តម្លៃ​ចាប់ពី១០០ដុល្លារ​ឡើងទៅ” ។ លោកស្រី​បន្ថែមថា “ដោយឡែក​ដី​ដែល​ស្ថិតនៅ​ផ្លូវ​ខាងក្នុង ឬ​ដី​ភូមិ អាចមាន​តម្លៃ៦០ដុល្លារ​ចុះក្រោម​ក្នុង​មួយ​ការ៉េ ហើយ​បើ​ចូលក្នុង​កាន់តែ​ឆ្ងាយ​ពី​ផ្លូវជាតិ ឬ​ផ្លូវធំ​កាន់តែ​មានតម្លៃ​ទាប​ជាង៤០ដុល្លារ​ចុះក្រោម” ។

ជាមួយនឹង​ការ​បង្ហើប​ប្រាប់​ពី​តម្លៃ​ដី នៅ​តំបន់​ជុំវិញ​គម្រោង​អភិវឌ្ឍន៍​ព្រលានយន្តហោះ​អន្តរជាតិ-ភ្នំពេញ​ថ្មី ដែល​ស្ថិតនៅ​ក្នុងស្រុក​កណ្តាលស្ទឹង ខេត្តកណ្តាល ត្រូវបាន​លោកស្រី​តាំង ហួរ​លើកឡើង​ផងដែរ​ថា មិនយូរ​ទៀត​នោះទេ ឬ​អាច​នៅ​ដើមឆ្នាំ​ក្រោយនេះ តម្លៃ​ដី​នឹងមាន​ការកើនឡើង ដោយ​សារភាព​អំណោយផលសំខាន់ៗមួយចំនួន ដែល​ចូលរួម​ជំរុញ​កំណើន​តម្លៃ​ដីធ្លី ដូចជា វិបត្តិ​នៃ​ជំងឺឆ្លង Covid-19 នៅ​កម្ពុជា​ត្រូវបាន​រាជរដ្ឋាភិបាល​ទប់ស្កាត់ និង​គ្រប់គ្រង​បាន គម្រោង​សាងសង់​ផ្លូវជាតិ២ចាប់ផ្តើម​ដំណើរការ រួម​ជាមួយនឹង​ការបង្ហាញ គម្រោង​អភិវឌ្ឍន៍ថ្មីៗពី​វិស័យ​ឯកជន ដូចជា​គម្រោង​សំណង់​បណ្តុំ​លំនៅដ្ឋាន ក៏ដូចជា​គម្រោង​បុរី​មួយចំនួន​ផងដែរ៕

ដោយ ហ្សូលី

ភ្នំពេញ៖ សម្រាប់អ្នកវិនិយោគអចលនទ្រព្យ អ្នកដែលកំពុងស្វែងរកអចលនវត្ថុ មានបំណងចង់បានគម្រោងអចលនទ្រព្យច្បាស់លាស់ពីក្រុមហ៊ុនអភិវឌ្ឍអចលនទ្រព្យល្បីៗ និងទិញបានតម្លៃក្រោមទីផ្សារ ឬទទួលបានការបញ្ចុះតម្លៃដ៏ពិសេសក្នុងចំនួនភាគរយច្រើន សូមកុំរំលងឱកាសនេះឱ្យសោះ។

គ្រាន់តែធ្វើការចុះឈ្មោះចូលរួមក្នុងកម្មវិធី Black Friday Property Sale តាមរយៈលីងមួយនេះ https://propertysale.realestate.com.kh/property-area នោះលោកអ្នកអាចមានឱកាសទិញអចលនវត្ថុក្នុងតម្លៃដែលមិនធ្លាប់មានពីមុនមក។

តើកម្មវិធីនេះជាអ្វី? កម្មវិធី Black Friday Property Sale គឺជាកម្មវិធីលក់អចលនទ្រព្យក្នុងតម្លៃពិសេសតាមរយៈប្រព័ន្ធអនឡាញដំបូងគេនៅក្នុងប្រទេសកម្ពុជា និងជាគំនិតផ្តួចផ្តើមរបស់ក្រុមហ៊ុន RealEstate.com.kh។ កម្មវិធីនេះនឹងអនុញ្ញាតឱ្យអ្នកដែលស្វែងរកអចលនទ្រព្យ ឬអ្នកវិនិយោគអចលនទ្រព្យ អាចរកជាវអចលនវត្ថុក្នុងតម្លៃមួយទាបជាងទីផ្សារ និងមានទំនុកចិត្តក្នុងការទិញអចលនវត្ថុ ដោយសារតែក្រុមហ៊ុនជាដៃគូសហការសុទ្ធសឹងតែជាក្រុមហ៊ុនអភិវឌ្ឍអចលនទ្រព្យល្បីៗ និងមានការទទួលស្គាល់នៅក្នុងប្រទេសកម្ពុជា។

លោកអ្នកនឹងទទួលបានអចលនទ្រព្យក្នុងក្តីសុបិន ជាពិសេសអាចមានឱកាសចំណេញថវិកាច្រើនថែមទៀតផង។ ដើម្បីកុំឱ្យរំលងផុតពីដៃ សូមលោកអ្នករូតរះចុះឈ្មោះតាមរយៈលីងនេះ https://propertysale.realestate.com.kh/property-area និងត្រៀមខ្លួនទទួលយកឱកាសដ៏អស្ចារ្យ។ ព្រឹត្តិការណ៍ Black Friday Property Sale នឹងប្រព្រឹត្តទៅនៅថ្ងៃទី ១២ ខែ មិថុនា ឆ្នាំ ២០២០ ខាងមុខនេះ ចាប់ពីវេលាម៉ោង ៤ រសៀល ដល់ម៉ោង ៨ យប់។ ត្រឹមរយៈពេល ៤ម៉ោងប៉ុណ្ណោះ ដែលលោកអ្នកអាចនឹងទទួលបានផលចំណេញយ៉ាងច្រើនដែលមិនធ្លាប់មាន និងមិនងាយទទួលបានឱកាសនេះនោះឡើយ។

របៀបនៃការទិញអចលនទ្រព្យក្នុងកម្មវិធី Black Friday Property Sale

នៅពេលដល់ថ្ងៃទី ១២ ខែមិថុនា ម៉ោង ៤រសៀល ដែលព្រឹត្តិការណ៍ចាប់ផ្តើមនោះ ក្រុមការងារនឹងធ្វើការផ្តល់ព័ត៌មានទៅកាន់លោកអ្នកអំពីការបញ្ចុះតម្លៃ និងផ្តល់ការណែនាំពីរបៀបទិញក្នុងរយៈពេល ៤ម៉ោងនេះ។ ករណីដែលលោកអ្នករកឃើញប្រភេទអចលនវត្ថុដែលពេញចិត្ត លក្ខខណ្ឌកម្មវិធីគឺតម្រូវឱ្យធ្វើការកក់ប្រាក់ ៥០០ដុល្លារ ជាមុន។ លោកអ្នកមានរយៈពេល ១៤ថ្ងៃ ក្នុងការសម្រេចចិត្តជ្រើសរើស និងពិភាក្សាអំពីអចលនទ្រព្យជាក់លាក់ណាមួយជាមួយក្រុមហ៊ុនអភិវឌ្ឍន៍ ដើម្បីជួបពិភាក្សា ចុះកុងត្រាកិច្ចព្រមព្រៀងទិញ-លក់។ មិនតែប៉ុណ្ណោះ អ្នកក៏មានសិទ្ធិទទួលបានប្រាក់កក់ ៥០០ដុល្លារ មកវិញផងដែរ ប្រសិនបើអ្នកមិនពេញចិត្ត ឬសម្រេចចិត្តថាមិនទិញវិញ៕

ដោយ ៖ រ៉ាណេត

ភ្នំពេញ ៖ នៅពេលនិយាយពីការវិនិយោគ គឺគេតែងនិយាយពីអត្រានៃការទទួលបានចំណេញ។ ដោយឡែកសម្រាប់វិស័យលំនៅដ្ឋាន តើគួរវិនិយោគបែបណា ដើម្បីប្រាកដថាអាចទទួបានចំណេញក្នុងអត្រាខ្ពស់។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance Property លោក ឡុង គីមសួគ៌ បានមានប្រសាសន៍ថា ការវិនិយោគនៅក្នុងវិស័យលំនៅដ្ឋានត្រូវបានអ្នកជំនាញបែងចែងចេញជាប្រភេទ រួមមានប្រភេទលំនៅដ្ឋានធម្មតា លំនៅដ្ឋានអាជីវកម្ម និងលំនៅដ្ឋានសហកម្មសិទ្ធិ។

លោក ឡុង គីមសួគ៌ បានមានប្រសាសន៍បញ្ជាក់ថា “ប្រភេទលំនៅដ្ឋានទាំង៣នេះគឺមានលក្ខណៈ និងគុណសម្បត្តិខុសគ្នា។ ជាទូទៅប្រភេទលំនៅដ្ឋានបែបធម្មតា គឺប្រជាពលរដ្ឋ ឬជាអតិថិជន សម្រេចចិត្តទិញក្រោមគោលបំណងចម្បងសម្រាប់រស់នៅ និងស្ថិតនៅទីតាំងដែលមានភាពស្ងប់ស្ងាត់ និងមានធម្មជាតិជុំវិញ។ ដោយឡែកសម្រាប់ប្រភេទលំនៅដ្ឋានអាជីវកម្ម ត្រូវបានអ្នកទិញមានគោលបំណង២ ដែលក្រៅពីអាចរស់នៅប្រកបដោយផាសុកភាព ថែមទាំងអាចប្រកបអាជីវកម្មបានថែមទៀត ដែលផ្ទះប្រភេទនេះមានតម្លៃថ្លៃ ហើយស្ថិតនៅតំបន់ទីប្រជុំ និងប្រមូលផ្តុំដោយអាជីវកម្មចំរុះ។ ជាមួយគ្នានេះ អ្នកវិនិយោគខ្លះសម្រេចចិត្តទុកសម្រាប់ជួលបន្តដើម្បីយកចំណូលប្រចាំខែ ប្រចាំឆ្នាំ ហើយអត្រានៃចំណេញក្រោយការលក់ទាំងស្រុងក៏មានខ្ពស់ផងដែរ ដែលលំនៅដ្ឋាននៅតំបន់ខ្លះអាចទទួលបានផលចំណេញទ្វេដងនៃតម្លៃដើម”។

លោក ឡុង គីមសួគ៌ មានប្រសាសន៍បន្តទៀតថា “សម្រាប់្រភេទលំនៅដ្ឋានសហកម្មសិទ្ធិ ឬខនដូ គឺមិនអាចប្រកបអាជីវកម្មបាននោះទេ ប៉ុន្តែស័ក្ដិសមទៅនឹងការវិនិយោគលើការទិញ-លក់ និងអាចជួលយកចំណូលប្រចាំខែ ប្រចាំឆ្នាំបានក្នុងតម្លៃខ្ពស់ ប៉ុន្តែអត្រានៃការឡើងតម្លៃនៃថ្លៃដើមគឺមានកម្រិតទាបជាងប្រភេទលំនៅដ្ឋានផ្ទាល់ដីបែបធម្មតា”។

ជាមួយនឹងការបញ្ជាក់ពីចំណុចវិជ្ជមាននៃប្រភេទលំនៅដ្ឋានទាំង៣ប្រភេទខាងលើនេះ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance Property លោក ឡុង គីមសួគ៌ បានបញ្ជាក់ថា គ្រប់ប្រភេទលំនៅដ្ឋានទាំងអស់គឺសុទ្ធតែមានគុណសម្បត្តិ ប៉ុន្តែសម្រាប់អ្នកដែលមានបំណងទិញសម្រាប់វិនិយោគ គម្បីសម្លឹងទៅលើប្រភេទលំនៅដ្ឋានអាជីវកម្ម ត្បិតលំនៅដ្ឋានប្រភេទនេះមានតម្លៃដើមថ្លៃ ប៉ុន្តែងាយស្រួលក្នុងលក់ចេញ និងមានអត្រាឡើងថ្លៃបានខ្ពស់ និងងាយស្រួលក្នុងការជួលផងដែរ៕