ដោយ ៖ រ៉ាណេត

ភ្នំពេញ ៖ រដ្ឋបាលរាជធានីភ្នំពេញ បានត្រៀមសាលារៀនចំនួន ៣៧ខ្នង ស្មើនឹង៦៩៩បន្ទប់ សម្រាប់ដាក់កម្មករ-កម្មការិនីរោងចក្រ ជាង១៥០០០នាក់ ដែលទើបវិលត្រឡប់មកពីស្រុកកំណើតតាមបណ្តាខេត្តនានាបន្ទាប់ពីឈប់សម្រាកក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឱ្យនៅដាច់ដោយឡែករយៈពេល១៤ថ្ងៃតាមវិធានការចត្តាឡីស័ក្ដ។

តាមប្រភពព័ត៌មានបឋមពីមន្ត្រីរដ្ឋបាលរាជធានីភ្នំពេញនៅរសៀលថ្ងៃទី១៦ ខែមេសា ឆ្នាំ២០២០នេះ បានឱ្យដឹងថា ដើម្បីទប់ស្កាត់នូវការរីករាលដាលនៃជំងឺ Covid-19 ដែលតម្រូវឱ្យកម្មករ កម្មការិនី ដែលត្រឡប់មកពីបណ្តាខេត្តចូលមករាជធានីភ្នំពេញត្រូវធ្វើចត្តាឡីស័ករយៈពេល ១៤ ថ្ងៃ។

ប្រភពដដែលបានបញ្ជាក់ថា សម្រាប់ការត្រៀមធ្វើចត្តាឡីស័កចំពោះកម្មករ-កម្មការិនី គឺមានធ្វើនៅតាមបណ្តាខណ្ឌនានានៅក្នុងរាជធានីភ្នំពេញ រួមមាន នៅខណ្ឌពោធិ៍សែនជ័យចំនួនប្រមាណ ៧២៥៨ នាក់, ខណ្ឌដង្កោ ប្រមាណ២៣៤១ នាក់, ខណ្ឌកំបូល ប្រមាណ១២៥១ នាក់, ខណ្ឌមានជ័យប្រមាណ ២១១៦ នាក់, ខណ្ឌសែនសុខ ប្រមាណ១០៦៨នាក់, ខណ្ឌព្រែកព្នៅ ប្រមាណ ៧៦ នាក់, ខណ្ឌច្បារអំពៅ ប្រមាណ ៨៧ នាក់, ខណ្ឌឬស្សីកែវប្រមាណ ១៣០២ នាក់, ខណ្ឌទួលគោក ប្រមាណ៧១នាក់, ខណ្ឌចំការមនប្រមាណ៩៥នាក់, ខណ្ឌដូនពេញប្រមាណ ២ នាក់ និងខណ្ឌជ្រោយចង្វារប្រមាណ ៦០ នាក់។

អគ្គលេខាធិការរងសមាគមកាត់ដេរកម្ពុជា (GMAC) កាំង ម៉ូលីកា បានសម្ដែងនូវការសោកស្តាយចំពោះទង្វើរបស់កម្មករ-កម្មការិនីមួយចំនួនដែលមិនចូលរួមគោរព និងអនុវត្តតាមការណែនាំរបស់ប្រមុខរដ្ឋាភិបាលក្នុងការដាក់បំរាមជាកំហិតចរាចរណ៍ឆ្លងខេត្តក្នុងគ្រាដែលប្រឈមនឹងការរីករាលដាលជំងឺឆ្លង Covid-19។

តាមរយៈគណនីទំនាក់ទំនងសង្គម លោក កាំង ម៉ូលីកា បានសរសេរថា “ចូលរួមសហការទេ ពេលនេះនាំគេឯងរវល់ពេញភូមិហើយ ឯណាលុយសម្រាប់ បាយ ទឹក កន្ទេល ខ្នើយ មុង ភួយ និងសម្ភារៈ បរិក្ខាពេទ្យ? អ្នកណាខ្លះត្រូវចូលរួមរៀបចំភស្តុភារ (logistics) អោយ? បាត់ប្រាក់ខែ បាត់ចំណូលទៀត ហ៊ឹម! រង់ចាំសេចក្តីណែនាំបន្ថែមទៀតពីក្រសួងការងារ”។

ជាមួយគ្នានេះ លោកក៏បានកោតសរសើរដល់បងប្អូនកម្មករផ្សេងទៀត ដែលបន្តធ្វើការជាធម្មតាពេលបុណ្យចូលឆ្នាំខ្មែរ ដែលនឹងទទួលបានថ្ងៃឈប់សម្រាកចំនួន៥ថ្ងៃជំនួសវិញផងដែរ ៕

ដោយ ៖ រ៉ាណេត

មណ្ឌលគីរី ៖ រហូតមកដល់ពេលនេះ គម្រោងសាងសង់ព្រលានយន្តហោះក្នុងខេត្តមណ្ឌលគីរី គឺស្ថិតនៅក្នុងដំណាក់កាលសិក្សានៅឡើយ ដោយនៅមិនទាន់អាចកំណត់ពីពេលវេលាចាប់ផ្តើមអនុវត្តជាក់លាក់នៅឡើយនោះទេ ខណៈដែលទំហំនៃថវិការវិនិយោគត្រូវបានអ្នកជំនាញធ្វើការប៉ាន់ស្មានស្ថិតនៅក្នុងរង្វង់៦០លានដុល្លារ។

មានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងទិសដៅការងាររដ្ឋលេខាធិការដ្ឋានអាកាសចរស៊ីវិល នៅទីស្ដីការគណៈរដ្ឋមន្ត្រី កាលពីព្រឹកថ្ងៃទី១៦ ខែមេសា ឆ្នាំ២០២០ លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា រហូតមកដល់ពេលនេះគម្រោងនៃការសាងសង់ព្រលានយន្តហោះ ស្ថិតនៅខេត្តមណ្ឌលគីរី គឺនៅមិនទាន់កំណត់ថាអាចចាប់ផ្តើមដំណើរការនៅពេលណាឱ្យប្រាកដនោះទេ ដោយពេលនេះគឺស្ថិតនៅក្នុងដំណាក់កាលសិក្សានៅឡើយ។

លោកបានមានប្រសាសន៍បញ្ជាក់ថា “ការសិក្សាពីគម្រោងសាងសង់គឺអាចចំណាយពេលប្រហែល១ឆ្នាំ ហើយបន្ទាប់មកយើង Submit ឱ្យរដ្ឋាភិបាល ដើម្បីពិនិត្យ និងសម្រេចថា តើការអភិវឌ្ឍអាកាសយានដ្ឋានព្រលានយន្តហោះខេត្តមណ្ឌលគីរីនេះ គួរធ្វើរដ្ឋ ឬគួធ្វើដោយរដ្ឋជាមួយឯកជន ឬធ្វើដោយឯកជនផ្ទាល់ ដែលជាជម្រើសផ្សេងទៀតបន្ទាប់ពីការសិក្សា”។

លោកបានបន្តទៀតថា “ការសិក្សារបស់យើងនេះ ក៏ផ្តោតទៅលើផលប៉ះពាល់ និងវិភាគពីកត្តាសេដ្ឋកិច្ចផងដែរ ថាតើការសាងសង់អាកាសយានដ្ឋាននេះមានផលជាវិជ្ជមានផ្នែកសេដ្ឋកិច្ចយ៉ាងម៉េច និងអវិជ្ជមានយ៉ាងម៉េង….ចឹងទាល់តែការសិក្សាទៅលើចំណុចទាំង៣នេះចប់ បានគេសម្រេចចិត្តបាន។ ដោយឡែកពាក់ព័ន្ធទៅនឹងខ្ទង់ចំណាយទៅលើការអភិវឌ្ឍ និងសាងសង់ព្រលានយន្តហោះនេះ បើតាមខ្ញុំស្មានប្រមាណ ៦០លានដុល្លារ”។

គម្រោងអភិវឌ្ឍព្រលានយន្តនៅខេត្តមណ្ឌលគីរី ត្រូវបានរដ្ឋបាលខេត្តត្រៀមទីតាំង និងរៀបចំរួចរាល់ហើយ ដោយមានទំហំប្រមាណ ៣០០ ហិកតា ស្ថិតនៅក្នុង ស្រុកអូររាំង ប៉ុន្តែនៅមិនទាន់មានការឈូសឆាយនៅឡើយនោះទេ ព្រោះកំពុងតែស្ថិតនៅក្នុងតំណាក់កាលនៃការសិក្សានៅឡើយ។ ជាមួយនឹងគម្រោងនៃការសាងសង់ព្រលានយន្តហោះនៅភូមិភាគប៉ែកឦសាននេះ ត្រូវបានអ្នកជំនាញក្នុងវិស័យទេសចរណ៍អះអាងថា នឹងចូលរួមក្នុងការលើកស្ទួយវិស័យទេសចរណ៍ ការលើកកម្ពស់ក្នុងវិស័យដឹកជញ្ជូនកាន់តែល្អផងដែរ៕

ដោយ ហ្សូលី

ភ្នំពេញ៖ តម្លៃប្រេងឥន្ធនៈត្រូវបានក្រសួងពាណិជ្ជកម្មសហការជាមួយក្រសួងសេដ្ឋកិច្ចនិងហិរញ្ញវត្ថុរួមជាមួយក្រសួងរ៉ែនិងថាមពលសម្រេចឱ្យស្ថានីយប្រេងឥន្ធនៈនៅកម្ពុជាជួុយសម្រួលបញ្ចុះតម្លៃលក់រាយដល់ប្រជាពលរដ្ឋ។នេះបើតាមសេចក្តីជូនដំណឹងស្តីពីថ្លៃលក់រាយប្រេងឥន្ធនៈនៅតាមស្ថានីយរបស់ក្រសួងពាណិជ្ជកម្មចេញផ្សាយនៅថ្ងៃទី១៦ខែមេសាឆ្នាំ២០២០នេះ។

ដើម្បីជាការសម្រួលដល់ជីវភាពរបស់ប្រជាជនកម្ពុជា និងមានការចូលរួមសហការពិក្រុមហ៊ុនចែកចាយប្រេងឥន្ធនៈនៅកម្ពុជា ប្រមុខរាជរដ្ឋាភិបាលគឺសម្តេចតេជោ ហ៊ុន សែន បានសម្រេចឱ្យមានការបញ្ចុះតម្លៃលក់រាយប្រេងឥន្ធនៈនៅទូទាំងប្រទេសកម្ពុជាចំនួន ៤សេន ដុល្លារ/លីត្រ។ បទបញ្ជានេះនឹងត្រូវចាប់អនុវត្តតាម ចាប់ពីថ្ងៃទី ១៦ ខែមសា ដល់ថ្ងៃទី ៣០ ខែមេសា ឆ្នាំ ២០២០នេះ។

បន្ថែមពីនេះ ក្រសួងពាណិជ្ជកម្មបានបញ្ជាក់ថា តម្លៃលក់រាយប្រេងឥន្ធនៈនៅក្នុងប្រទេសកម្ពុជា ក្រសួងពាណិជ្ជកម្មមិនមែនជាអ្នកកំណត់ឡើង ព្រោះក្រសួងមានតួនាទីស្រង់តម្លៃឡើង–ចុះនៃប្រេងនៅលើទីផ្សារអន្តរជាតិរួចមកគណនាតែប៉ុណ្ណោះ។ការអះអាងនេះគឺដើម្បីចៀសវាងកុំឱ្យសាធារណៈជននិងស្ថានីយ៍ប្រេងឥន្ធនៈមានការយល់ច្រឡំ។

កាលពីដើមខែមេសានេះ ក្រសួងពាណិជ្ជកម្មបានចេញសេចក្តីប្រកាសថា ប្រេងឥន្ធនៈនៅគ្រប់ស្ថានីយ៍ទាំងអស់នៅក្នុងប្រទេសកម្ពុជា និងត្រូវទម្លាក់តម្លៃដើម្បីលើកកម្ពស់សេដ្ឋកិច្ចកម្ពុជា ដែលកំពុងប្រឈមនឹងហានិភ័យដោយសារមេរោគរាតត្បាត Covid-19។

គោលបំណងនៃការទម្លាក់តម្លៃនេះ គឺដើម្បីធានាបាននៅនិរន្តភាពជូនដល់អ្នកប្រើប្រាស់ តម្រូវការរបស់ប្រជាជនកម្ពុជា និងជួយស្តារសេដ្ឋកិច្ចប្រទេសជាតិទាំងមូល ក្នុងស្ថានភាពដែលប្រទេសរួមទាំងសកលលោកកំពុងទទួលរងនូវវិបត្តិជម្ងឺឆ្លងកូវីដ ១៩។

ក្រៅពីនេះ  ដើម្បីរក្សាលំនឹងសេដ្ឋកិច្ច រដ្ឋាភិបាលបានត្រៀមថវិកាប្រមាណចន្លោះពី ៨០០លាន ដល់ ២ពាន់លានដុល្លារ ក្នុងការទប់ទល់ហានិភ័យសេដ្ឋកិច្ច និងប្រយុទ្ធប្រឆាំងជម្ងឺ Covid-19៕

ដោយ ៖ រ៉ាណេត

ភ្នំពេញ៖ មានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងទិសដៅការងាររដ្ឋលេខាធិការដ្ឋានអាកាសចរស៊ីវិល នៅទីស្ដីការគណៈរដ្ឋមន្ត្រីកាលពីព្រឹកថ្ងៃទី១៦ ខែមេសា ឆ្នាំ២០២០ លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា រហូតមកដល់ពេលនេះ វឌ្ឍនភាពនៃការសាងសង់អាកាសយានដ្ឋានអន្តរជាតិ- ភ្នំពេញថ្មី ដែលស្ថិតនៅក្នុងស្រុកកណ្តាលស្ទឹង ខេត្តកណ្តាល គឺកំពុងតែមានដំណើរការធម្មតា និងសម្រេចបានលទ្ធផលប្រមាណ ៣០ភាគរយ។

លោកបានមានប្រសាសន៍បន្តទៀតថា “រដ្ឋាភិបាលកម្ពុជា បាន និងកំពុងមានការយកចិត្តទុកដាក់ក្នុងការអភិវឌ្ឍប្រទេសជាតិ តាមរយៈវិស័យសំខាន់ៗជាច្រើន ដែលក្នុងនោះ វិស័យអាកាសចរណ៍ស៊ីវិល ក៏ស្ថិតនៅក្នុងវិស័យអាទិភាពផងដែរ”។ លោកបានបញ្ជាក់ថា “យើងមើលដោយនៅខាងក្រោមដូចជាមិនមានសកកម្មភាពនោះទេ ប៉ុន្តែបើមើលពលើអាកាសចុះក្រោម នោះនឹងឃើញទិដ្ឋភាពនៃការសាងសង់ព្រលានយន្តហោះអន្តរជាតិ-ភ្នំពេញ ដែលមកដល់ពេលនេះសម្រេចបានលទ្ធផលប្រមាណ៣០ភាគរយ”។

ជាមួយនឹងការបញ្ជាក់ពីលទ្ធផលនៃការសាងសង់ព្រលានយន្តនានានៅក្នុងប្រទេស លោក ស៊ិន ចាន់សេរីវុត្ថា បានលើកឡើងថា ក្រៅពីការសាងសង់ព្រលានយន្តហោះដែលស្ថិតនៅក្នុងខេត្តកណ្តាល ចំពោះគម្រោងសាងសង់ព្រលានហោះកម្រិតអន្តរជាតិចំនួន២ទៀតក៏ស្ថិតនៅក្នុងការយកចិត្តទុកដាក់ផងដែរ ដែលក្នុងនោះរួមមានអាកាសយានដ្ឋានអន្តរជាតិ-សៀមរាបថ្មី និងព្រលានយន្តហោះតារាសាគរ ស្ថិតនៅក្នុងខេត្តកោះកុងផងដែរ។

ពាក់ព័ន្ធទៅនឹងសកម្មភាពនៃការសាងសង់អាកាសយានដ្ឋានអន្តរជាតិ-សៀមរាប លោក ស៊ិន ចាន់សេរីវុត្ថា បានទទួលស្គាល់ថា ពិតជាមានភាពយឺតយ៉ាវបន្តិច ដោយសារបណ្តាលមកពីហេតុផលមួយចំនួន ជាពិសេសបណ្តាលមកពីសង្គ្រាមពាណិជ្ជកម្ម ចិន-អាមេរិក កាលពីពេលកន្លងទៅ រួមជាមួយនឹងវិបត្តិសាកលដែលកំពុងតែគំរាមកំហែង៕