ការនាំចេញរបស់កម្ពុជាសម្រេចបានជិត ២,៦ពាន់លានដុល្លារក្នុងរយៈពេលពីរខែដំបូងឆ្នាំនេះ

ដោយ ប៊ី

ភ្នំពេញៈ ការនាំចេញរបស់កម្ពុជា មានតម្លៃប្រមាណដល់២៥៦៣លានដុល្លារក្នុងរយៈពេលពីរខែដំបូងនៃឆ្នាំនេះ បានកើនឡើង២៤ភាគរយ បើធៀបនឹងរយៈពេលដូចគ្នាកាលពីឆ្នាំមុន ទោះបីជាមានផលប៉ះពាល់ក្នុងស្រុក និងពិភពលោកពីការរីករាលដាលជំងឺ Covid-19 ក៏ដោយ។ នេះបើយោងតាមទិន្នន័យចុងក្រោយរបស់ក្រសួងសេដ្ឋកិច្ច និងហិរញ្ញវត្ថុ។

វិស័យឯកជនជឿជាក់ថា ការនាំចេញរបស់កម្ពុជា នឹងទទួលរងការវាយប្រហារយ៉ាងខ្លាំងចាប់ពីខែនេះទៅ ព្រោះសហរដ្ឋអាមេរិក និងអឺរ៉ុបដែលរងការបំផ្លិចបំផ្លាញខាងសេដ្ឋកិច្ចដោយសារការផ្ទុះឡើងជំងឺ COVID-19 បញ្ឈប់ការនាំចូលសម្លៀកបំពាក់ ស្បែកជើង និងកាបូប។

យោងតាមទិន្នន័យរបស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ប្រទេសកម្ពុជា បាននាំចូលទំនិញមានតម្លៃជាង៣,៦ពាន់លានដុល្លារ ក្នុងរយៈពេលនេះកើនឡើង ២២ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

ទិន្នន័យបង្ហាញថាការនាំចេញសម្លៀកបំពាក់ ស្បែកជើង កង់ និងអង្ករនាំឱ្យមានកំណើន។ ការនាំចូលសំខាន់របស់កម្ពុជាគឺសមារៈសំណង់គ្រឿងម៉ាស៊ីន និងឥន្ធនៈ។

សមាគមរោងចក្រកាត់ដេរនៅកម្ពុជា (GMAC) បានអំពាវនាវដល់អ្នកបញ្ជាទិញទាំងអស់ដែលទិញពីកម្ពុជាធ្វើការជាមួយគ្នា ដើម្បីអាចដោះស្រាយបញ្ហាលំបាកនានាបានក្នុងអំឡុងមានវិបត្តិ នៃការរីករាលដាលជាសកលនូវជំងឺឆ្លង Covid-19 ។

យោងតាមលិខិតចំហររបស់សមាគមកាត់ដេរ នៅកម្ពុជាជូនចំពោះអ្នកបញ្ជាទិញទាំងអស់ដែលទិញពីកម្ពុជាខែមេសា ឆ្នាំ២០២០នេះ ដែលបានចេញផ្សាយនៅថ្ងៃទី ២ ខែមេសា ឆ្នាំ ២០២០ នេះ ឱ្យដឹងថា ការឆ្លងរាលដាលជាសកលនៃជំងឺកូវីដ១៩ បានធ្វើឱ្យមានចលាចលដល់ជីវិតរស់នៅ និងអាជីវកម្មរបស់យើងទាំងអស់គ្នា។

លិខិតដដែលបន្តថា សមាគមរោងចក្រកាត់ដេរនៅកម្ពុជា (GMAC) សូមអំពាវនាវដល់អ្នកបញ្ជាទិញទាំងអស់ ដែលបានទិញពីកម្ពុជា មេត្តធ្វើការងារជាមួយយើងទាំងអស់គ្នាអាចដោះស្រាយបញ្ហាលំបាកទាំងនេះបាន។

លិខិតដដែលបន្ថែមថា ភាគីទាំងអស់នៅក្នុងចង្វាក់ផ្គត់ផ្គង់សម្លៀកបំពាក់សកលកំពុងទទួលរងបន្ទុកដ៏ធ្ងន់ធ្ងរក្រៃលែង ដែលបង្កឡើងដោយជំងឺកូវីដ១។ ទោះយ៉ាងណាក្តីក្រុមហ៊ុនផលិត (រោងចក្រ) ប្រតិបត្តិការរលើប្រាក់ចំណូលតិចតួច ហើយមានសមត្ថភាពតិចតួចខ្លាំងណាក់ ក្នុងការរែកបន្ទុកបែបនេះ បើធៀបនឹងអតិថិជនរបស់អ្នកបញ្ជាទិញ។

បន្ទុកដោយផ្ទាល់ដែលប្រឈមមុខដោយកម្មកររបស់យើង ដែលនៅតែត្រូវការទទួលទានអាហារ និងដោះស្រាយតម្រូវការគ្រួសារ គឺជាបន្ទុកដ៏ធំក្រៃលែង។

សមាគមសូមជំរុញអ្នកបញ្ជាទិញ មេត្តាគោរពតាមលក្ខណ្ឌនៃកិច្ចសន្យារបស់ខ្លួន ហើយបំពេញកាតព្វកិច្ចរបស់ខ្លួន ដោយទទួលយកការដឹកទំនិញ ហើយទូទាត់ប្រាក់សម្រាប់ទំនិញដែលបានផលិតរួចហើយ និងទំនិញដែលបច្ចុប្បន្នកំពុងផលិត។ នេះនឹងធ្វើឱ្យយើងអាចបន្តផ្តល់ការងារ ដល់កម្មករ៧៥ម៉ឺននាក់របស់យើង និងធ្វើឱ្យយើងមានសមត្ថភាពបើកប្រាក់ឈ្នួលជូនកម្មករ និងធានាដល់ជីវភាពរបស់ប្រជាពលរដ្ឋកម្ពុជា រាប់លាននាក់។

សមាគមកសូមអំពាវនាវដល់អ្នកបញ្ជាទិញទាំង មេត្តារក្សាការទទួលខុសត្រូវចំពោះអ្នកផ្គត់ផ្គង់ និងកម្មករដែលបំរើការងារ ក្នុងវិស័យកាត់ដេររបស់យើង។ តាមរយៈការរួមគ្នា ប្រាកដណាស់ យើងអាចពុះពារឈ្នះជំងឺឆ្លងរាលដាលជាសកលនេះ ហើយអាចការពារជីវិតរបស់កម្មករយើង និងគ្រួសាររបស់ពួកគេ ហើយធានាដល់ការរស់រាននៃអាជីវកម្មរបស់យើង៕

កំពង់ផែស្វយ័តភ្នំពេញរកចំណូលបានជាង ៧លានដុល្លារក្នុងត្រីមាសទី១ឆ្នាំនេះ

ដោយៈរ៉ាណេត

ភ្នំពេញៈ នៅក្នុងត្រីមាសទី១ ឆ្នាំ២០២០នេះ ទោះស្ថិតនៅក្នុងភាពប្រឈមនៃវិបត្តិសេដ្ឋកិច្ចដោយសារជំងឺ Covid-19 សម្រាប់កំពង់ផែស្វយ័តក្រុងភ្នំពេញ នៅតែអាចរកបានចំណូលពីសេវាកម្ម លើកដាក់ទំនិញផ្សេងៗជាង៧លានដុល្លារ ដែលចំនួននេះមានការកើនឡើងខ្ពស់បើប្រៀបធៀបទៅនឹងឆ្នាំកន្លងទៅ។

យោងតាមសេចក្ដីប្រកាសព័ត៌មានរបស់កំពង់ផែស្វយ័តភ្នំពេញ ក្រុមការងារទទួលបាននៅថ្ងៃទី១៥ ខែមេសា ឆ្នាំ២០២០បានបង្ហាញថា នៅក្នុងត្រីមាសទី១ ដើមឆ្នាំ២០២០នេះ កំពង់ផែស្វយ័តភ្នំពេញរកប្រាក់ចំណូលសរុបបានជាង៧,៦ លានដុល្លារ ខណៈដែលចំណូលបានមកពីការលើកដាក់ ក្រោមដងយោងមានជាង២,៧លានដុល្លារ និងចំណូលលើកដាក់នៅលើទីលានមានជាង២,៤លានដុល្លារ រួមជាមួយនឹងចំណូលបានពីសេវាកម្មផ្សេងៗមួយចំនួនទៀត។

សេចក្ដីប្រកាសដដែលបានបញ្ជាក់ទៀតថា លទ្ធផលការងារអាជីវកម្ម សេវាកម្មនៅត្រីមាសទី១ ឆ្នាំ២០២០នេះ គឺទំនិញជា ប្រេងឥន្ធនៈមានជាង ៩៣ម៉ឺនតោន កើនឡើង ៣ភាគរយ, នាវាផ្ទុកទំនិញឆ្លងកាត់ ៦២៥គ្រឿង កើនឡើង ១៤ភាគរយ, នាវាទេសចរណ៍មាន ១២៦ជើង ធ្លាក់ចុះ ៧ភាគរយ, បរិមាណកុងតឺន័រមាន ៧៤.៣៣៣ ធីអ៊ីយូរកើនឡើង ២៦ភាគរយ និងបរិមាណអ្នកដំណើរមានជាង ៩០០០នាក់ ធ្លាក់ចុះប្រមាណ ២២ភាគរយ បើប្រៀបធៀបនឹងត្រីមាសទី១ កាលពីឆ្នាំ២០១៩ កន្លងទៅ។

ដោយឡែក សម្រាប់លទ្ធផលការងារអាជីវកម្ម សេវាកម្ម ដែលបានអនុវត្តក្នុងខែមីនា ឆ្នាំ២០២០ ត្រូវបានគេមើលឃើញថា ទំនិញជាប្រេងឥន្ធនៈមានជាង២៦ម៉ឺនតោន ធ្លាក់ចុះ១៣ភាគរយ នាវាផ្ទុកទំនិញឆ្លងកាត់មាន១៧១គ្រឿង ធ្លាក់ចុះ១៦ភាគរយ នាវាទេសចរណ៍មាន ២៨ជើង ធ្លាក់ចុះ ៣៩ភាគរយ។ បរិមាណកុងតឺន័រមាន២៤.៤៧៣ ធីអ៊ីយូ កើនឡើង១៧ភាគរយ និងបរិមាណអ្នកដំណើរមាន១ ៥១៩នាក់ ធ្លាក់ចុះ៦៥ភាគរយ បើប្រៀបធៀបរយៈពេលដូចគ្នាកាលពីឆ្នាំ២០១៩ ៕

អ្នកជំនាញអះអាងថាតម្លៃអចលនទ្រព្យធ្លាក់ចុះប្រមាណ ២០ទៅ ៣០ភាគរយ

ដោយ វុត្ថា

ភ្នំពេញៈ តម្លៃអចលនទ្រព្យនៅក្នុងប្រទេសកម្ពុជា បានធ្លាក់ចុះចន្លោះពី២០ទៅ ៣០ភាគរយ ក្នុងអំឡុងពេលប្រទេសកម្ពុជា កំពុងប្រយុទ្ធប្រឆាំងទៅនឹងការរាតត្បាតជាសកលនៃជំងឺ Covid-19 នាពេលបច្ចុប្បន្ននេះ។

លោកតាំង ហ៊ួរ នាយិកាក្រុមហ៊ុន AMATAK PROPERTY SERVICE Co., Ltd. បានប្រាប់ឱ្យដឹងនៅថ្ងៃទី១៥ ខែមេសា ឆ្នាំ ២០២០កន្លងមកថា ប្រតិបត្តិការទិញលក់នៅក្នុងវិស័យអចលនទ្រព្យ នៅតែបន្តមាននៅក្នុងអំឡុងនៃប្រទេសកម្ពុជា មានករណីឆ្លងជំងឺកូវីដ១៩ហើយបានធ្វើឱ្យវិញក៏បានធ្លាក់ចុះ២០ទៅ ៣០ភាគរយ។

លោកស្រីពន្យល់ថា “មូលហេតុធ្វើឱ្យតម្លៃអចលនទ្រព្យ នៅក្នុងប្រទេសកម្ពុជា ធ្លាក់ថ្លៃក្នុងចន្លោះពី ២០ទៅ៣០ភាគរយ ដោយសារតែសារម្ចាស់អចលនទ្រព្យ មានការលក់ប្រញាប់ និងកុនលុយយកទៅបង់ធនាគារ ឬដោះស្រាយបញ្ហាផ្សេង ស្របពេលដែលកម្ពុជាកំពុងមានវិបត្តិជំងឺកូវីដ១៩។ លោកស្រីបន្ថែមថា “ពីមុនអ្នក់លក់ក្រោមតម្លៃទីផ្សារបែបនេះ មានចំនួនតិចតួច តែបច្ចុប្បន្ននេះ អ្នកលក់តម្លៃក្រោមទីផ្សារមានច្រើន។

លោកស្រីបន្តថា “អ្នកខ្លះបង្ខំលក់ដោយសារ មានការភ័យខ្លាចពីជំងឺកូវីដ១៩ ដែលទាមទាឱ្យលក់ធូថ្លៃ ហើយអ្នកខ្លះក៏គេមិនលក់ដែរ ព្រោះគេយល់ថាអាជំងឺកូវីដ១៩ ហ្នឹងមិនយូទេ វានឹងបាត់ហើយ។

លោកស្រីបន្ថែមទៀតថា ទន្ទឹមគ្នានេះ អ្នកដែលមានលុយច្រើន ក៏ឆ្លៀតឱកាសដើររកទិញទុកសម្រាប់លក់ យកចំណេញនាពេលខាងមុខ និងអ្នកខ្លះក៏ទិញយកទៅអភិវឌ្ឍន៍ជាអគារខុនដូ លំនៅឋាន រោងចក្រ និងសគ្រាសផ្សេង។

តែយ៉ាងៃណាក៏ដោយលោកស្រីថា ការធ្លាក់ថ្លៃអចលនទ្រព្យនាពេលនេះ គឺអូសបន្លាយក្នុងរយៈពេលខ្លីប៉ុណ្ណោះ ពោលវានឹងងើបឡើងវិញ ក្រោយពីស្ថានភាពជំងឺកូវីដ ១៩ស្ងប់ស្ងាត់ទៅវិញនាពេលខាងមុខនេះ។

នៅក្នុងឆ្នាំ២០២០នេះ សម្រាប់វិស័យអចលនទ្រព្យនៅកម្ពុជា ត្រូវបានអ្នកជំនាញអះអាងថាទទួលរងផលប៉ះពាល់ធ្ងន់ធ្ងរ ជាងវិបត្តិសេដ្ឋកិច្ចកាលពីអំឡុងឆ្នាំ២០០៨ ប៉ុន្តែភាពអវិជ្ជមានទាំងនេះ អាចនឹងវិលត្រឡប់មករកភាពល្អប្រសើរវិញ ក្នុងរយៈពេលដ៏ខ្លី ក្រោយពីបញ្ចប់វិបត្តិជំងឺឆ្លង Covid-19 នៅពេលខាងមុខនេះ។

ចំណែកលោកស្រីអាន សុធីតា នាយិកាប្រចាំប្រទេសនៃ CBRE Cambodia បានមានប្រសាសន៍ឲឲ្យដឹងផងដែរថា តិចឬច្រើន ប្រទេសកម្ពុជាពិតជាទទួលរងនូវឥទ្ធិពលមួយនេះ ប៉ុន្តែសម្រាប់វិស័យអចលនទ្រព្យ ហាក់មានភាពល្អប្រសើរច្រើន ជាក់ស្ដែងនៅក្នុងត្រីមាសទីមួយកន្លងទៅនេះ ទាំងវិស័យសំណង់និងអចលនទ្រព្យ នៅតែបន្តរក្សាបានភាពល្អប្រសើរ។

លោកស្រីមានបន្តទៀតថា សម្រាប់វិស័យអចលនទ្រព្យនៅកម្ពុជា បើប្រៀបធៀបជាមួយប្រទេសជិតខាង គឺងាយនឹងមានឱកាសត្រឡប់មករកភាពល្អប្រសើរវិញ ក្នុងពេលដ៏ខ្លី ដោយសារតែតម្រូវការទីផ្សារភាគច្រើនជាជនជាតិក្នុងស្រុក ហើយចំពោះទីផ្សារក្រៅស្រុកភាគច្រើន មកពីប្រទេសចិន និងសិង្ហបុរី ដែលកំពុងទទួលបានសញ្ញាវិជ្ជមានជាបណ្តើរៗ ក្នុងរួចផុតពីវិបត្តិជំងឺ Covid-19 ស្របពេលដែលបណ្តាប្រទេសនានានៅប៉ែកអឺរ៉ុប កំពុងតែជួបសភាពធ្ងន់ធ្ងរ៕

ចំណេះដឹង! តើមាននីតិវីធីអ្វីខ្លះក្នុងការស្នើសុំប័ណ្ណកាន់កាប់ដីធ្លី

ដោយ វុត្ថា

ភ្នំពេញៈ ដោយការកាន់កាប់ដីធ្លីអាចធ្វើឡើង ក្នុងរូបភាពពីរ ប័ណ្ណកាន់កាប់ក៏មានពីរប្រភេទដែរ៖ គឺប័ណ្ណភោគៈ និងប័ណ្ណកម្មសិទ្ធិ។

ដើម្បីទទួលបានប័ណ្ណនេះ ម្ចាស់ដីត្រូវដាក់ពាក្យសុំទៅការិយាល័យភូមិបាលស្រុក/ខ័ណ្ឌ តាមរយៈមេឃុំ/ចៅសង្កាត់ ដែលដីនោះតាំងនៅ។

នៅក្នុងជំហានដំបូង មេឃុំ/ចៅសង្កាត់ ត្រូវធ្វើការបញ្ជាក់លើចំណុចពីរ ទី១ បញ្ជាក់អំពីអត្តសញ្ញាណ ស្ថានភាព និងប្រវត្តិដី (កាលបរិច្ឆេទនៃការចូលកាន់កាប់) និងទី២ បញ្ជាក់អំពីអត្តសញ្ញាណរបស់ម្ចាស់ដី (ឈ្មោះ អត្រានុកូលដ្ឋាន ទីលំនៅ ជាដើម)។

នៅក្នុងករណី ដែលម្ចាស់ដី មានទីលំនៅ នៅឃុំ/សង្កាត់ផ្សេង ពីឃុំ/សង្កាត់ ដែលដីតាំងនៅ ការបញ្ជាក់ត្រូវធ្វើឡើងដោយឃុំ/សង្កាត់ពីរ៖ គឺឃុំ/សង្កាត់ ដែលដីតាំងនៅ ជាអ្នកបញ្ជាក់អំពីអត្តសញ្ញាណ និងស្ថានភាពដី ចំណែកឃុំ/សង្កាត់ ដែលជាលំនៅរបស់ម្ចាស់ដី គឺជាអ្នកបញ្ជាក់អំពីអត្តសញ្ញាណរបស់ម្ចាស់ដី។

បន្ទាប់ពីបាន ទទួលការបញ្ជាក់ពីពីមេឃុំ ឬចៅសង្កាត់រួចរាល់ហើយ ដំណាក់កាលបន្ទាប់មកទៀត គឺសុំទៅសាលាស្រុក/ខ័ណ្ឌ ដែលដីតាំងនៅ ដើម្បីចាត់ចែងឲ្យមន្ត្រីសុរិយោដីស្រុកចុះវាស់វែងកំណត់ព្រំដី។ នៅក្នុងការវាស់វែងនេះ ម្ចាស់ដី គឺជាចង្អុលបង្ហាញអំពីព្រំដី។ ចំណែកមន្ត្រីសុរិយោដីគ្រាន់តែជាអ្នកវាស់ប៉ុណ្ណោះ។ បន្ទាប់ពីបានវាស់វែងហើយ មន្ត្រីសុរិយោដីស្រុកនឹងរៀបចំគូសប្លង់ក្បាលដី។

នៅក្នុងការកសាងប្លង់សុរិយោដីនេះ សាលាស្រុកត្រូវធ្វើការផ្សព្វផ្សាយជាសាធារណៈ ដើម្បីទុកឱកាសឲ្យបុគ្គលពាក់ព័ន្ធធ្វើការតវ៉ា។ នៅមុនពេលចុះវាស់វែង ក៏មានការជូនដំណឹងជាសាធារណៈ (១៤ថ្ងៃមុនពេលចុះវាស់)។ នៅក្រោយពេលគូសប្លង់សុរិយោដីរួចហើយ ក៏មានការផ្សព្វផ្សាយជាសាធារណៈជាថ្មីម្តង់ទៀត អំពីប្លង់ដី និងអត្តសញ្ញាណម្ចាស់ដី។

៣០ថ្ងៃក្រោយការប្រកាសផ្សាយនេះ ប្រសិនបើគ្មានការតវ៉ាណាមួយទេនោះ អាជ្ញាធរស្រុក/ខ័ណ្ឌ នឹងបញ្ជូនសំណុំរឿងទៅឲ្យអាជ្ញាធរសុរិយោដីថ្នាក់ខេត្ត/ ក្រុង ជាអ្នកពិនិ ត្យសម្រេចជាចុងក្រោយ ក្នុងការចេញប័ណ្ណជូនដល់ម្ចាស់សាម៉ីដែលជាអ្នកសុំ៕

លោកឧបនាយករដ្ឋមន្ត្រី ជា សុផារ៉ា បង្ហាញសមិទ្ធិផលសំណង់ទំនប់សា្ទក់ទឹកនៅរដូវទឹកសម្រកក្នុងស្រុកក្រូចឆ្មារ

ដោយវុត្ថា

ភ្នំពេញ៖ លោក រឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបង្ហាញសមិទ្ធិផលសំណង់ទំនប់សា្ទក់ទឹកនៅរដូវទឹកសម្រកក្នុងស្រុកក្រូចឆ្មារ នៃខេត្តត្បូងឃ្មុំ គឺ សម្រាប់បំរើដល់ប្រជាពលពលរដ្ឋប្រើប្រាស់ស្រោចដំណំា និងដាំដុះកសិកម្មផ្សេងជាដើម។

លោក រឧបនាយករដ្ឋមន្ត្រី ជា សុផារ៉ា នៅថ្ងៃទី ១៥ ខែមេសា ឆ្នាំ ២០២០ នេះ បានឱ្យដឹងថា សំណង់ទំនប់សា្ទក់ទឹកនៅរដូវទឹកសម្រកនេះជាសមិទ្ធផលដែលតែងតែទទួលការគាំទ្រណែនាំពីសម្តចតេជោនៅភូមិសាស្រ្តព្រែកតាកុច ដែលអាចស្រោចស្រប់ ឃុំជំនីក ឃុំរការខ្នុរ ឃុំឈូក ឃុំប៉ើស១ ក្នុងស្រុកក្រូចឆ្មារ។

លោកឧបនាយករដ្ឋមន្ត្រីបានមានប្រសាសន៍ថា “ផែនការយូរអង្វែង ចំណាយតិច ដោយចែកទឹកមិនចែកអង្ករ បន្លែ ផ្លែឈើត្រី …តាមរយះធើ្វទំនប់សា្ទក់ទឹកនៅរដូវទឹកសម្រក ជៀសវាងទឹកហូរចូលទន្លេមេគង្គចេញអស់ គោក ប្រេះក្រហែង រកជំនួយអង្ករ រកម៉ាស៊ីន រៃលុយទិញប្រេង ចែកវេនយាមម៉ាស៊ីន ចែកម៉ោងដាក់ទឹកស្រោចថ្នាំ ស្រោចពោត ដំណាំផ្សេងៗ”។

លោកឧបនាយករដ្ឋមន្រ្តី ជា សុផារ៉ា ធ្លាប់បានថ្លែងក្នុងពិធីជួបសំណេះសំណាលជាមួយប្រជាពលរដ្ឋនៅស្រុកក្រូចឆ្មារ ខេត្តត្បូងឃ្មុំ កាលពីកន្លងមកនេះ ថា ការសាងសង់ទំនប់ស្ទាក់ទឹកនេះ គឺសម្រាប់ស្តុកទឹកទុកប្រើប្រាស់ក្នុងរដូវប្រាំង និងជាប្រយោជន៍ក្នុងការងារបង្កបង្កើនផល ធ្វើស្រែចំការផ្សេងៗរបស់ប្រជាកសិករ ក៏ដូចជាអាចផ្តល់ត្រីសំរាប់ពួកគាត់បរិភោគចិញ្ចឹមជីវិតផងដែរ៕

ខុនដូជិត៣០០០យូនីតបានបញ្ចប់ការសាងសង់និងដាក់ចូលទីផ្សារក្នុង ត្រីមាសទី១ឆ្នាំនេះ

ដោយៈ រ៉ាណេត

ភ្នំពេញៈ រយៈពេល៣ខែដើមឆ្នាំ២០២០នេះ ខុនដូចំនួនជិត៣០០០យូនីតបានបញ្ចប់ការសាងសង់ និងដាក់ចូលក្នុងទីផ្សារ ខណៈតម្រូវការយូនីតខុនដូហាក់មានកំនើនយឺតដោយសារវិបត្តិCovid-19។

យោងតាមរបាយការណ៍ដែលទើបចេញផ្សាយ ដោយក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodiaបានឲ្យដឹងនៅរសៀលថ្ងៃទី១៥ ខែមេសា ឆ្នាំ២០២០នេះបានឲ្យដឹងថា សម្រាប់ទីផ្សារខុនដូឬអាគារសហកម្មសិទ្ឋ នៅតែបន្តភាពរឹងមាំ ដោយអ្នកអភិវឌ្ឍន៍មានភាពជឿជាក់ និងមានទំនុកចិត្តខ្ពស់។

នៅក្នុងរបាយការណ៍ដដែលនេះបានបញ្ជាក់ថា ជាក់ស្តែងនៅត្រឹមរយៈពេល៣ខែកន្លងទៅនេះ គម្រោងអភិវឌ្ឍន៍ខុនដូចំនួន៥ត្រូវបានបញ្ចប់ការសាងសង់ ដោយបានចាក់បំពេញបន្ថែមចំនួន២៨៤៣យូនីត កើនប្រមាណ១៦ភាគរយ បានជំរុញឱ្យចំនួនសរុបឡើងដល់២0,៨៥១យូនីត ក្នុងនោះខុនដូមានប្រមាណ៤៥,៦ភាគរយ ជាគម្រោងនៅជាយក្រុង។

ជាមួយនឹងភាពល្អប្រសើរនៃទីផ្សារខុនដូ ដូចបានបង្ហាញខាងលើនេះ បច្ចុប្បន្ននេះក៏មានគម្រោងអភិវឌ្ឍន៍សំណង់ខុនដូថ្មីៗ សរុបចំនួន៨ ស្មើនឹងប្រមាណ៤ ៥២១ យូនីត បាន និងកំពុងត្រៀមខ្លួនក្នុងការចូលរួមផ្គត់ផ្គង់ទីផ្សារផងដែរ។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ប្រាប់តាមទូរស័ព្ទនៅថ្ងៃទី១៥ ខែមេសា ឆ្នាំ២០២០ថា វិបត្តិនៃជំងឺ Covid-19 ពិតជាបានគំរាមកំហែងដល់សេដ្ឋកិច្ចជាសាកល ដែលក្នុងនោះប្រទេសកម្ពុជាក៏ទទួលរងនូវឥទ្ធិពលអាក្រក់មួយនេះផងដែរ។

លោកស្រីបានបន្តទៀតថា “តិចឬច្រើន ប្រទេសកម្ពុជាពិតជាទទួលរងនូវឥទ្ធិពលមួយនេះ ប៉ុន្តែសម្រាប់វិស័យអចលនទ្រព្យហាក់មានភាពល្អប្រសើរច្រើន ជាក់ស្ដែងនៅក្នុងត្រីមាសទីមួយកន្លងទៅនេះ ទាំងវិស័យសំណង់និងអចលនទ្រព្យនៅតែបន្តរក្សាបានភាពល្អប្រសើរ”។

លោកស្រីមានបន្តទៀតថា សម្រាប់វិស័យអចលនទ្រព្យនៅកម្ពុជា បើប្រៀបធៀបជាមួយប្រទេសជិតខាង គឺងាយនឹងមានឱកាសត្រឡប់មករកភាពល្អប្រសើរវិញ ក្នុងពេលដ៏ខ្លី ដោយសារតែតម្រូវការទីផ្សារភាគច្រើនជាជនជាតិក្នុងស្រុក ហើយចំពោះទីផ្សារក្រៅស្រុកភាគច្រើន មកពីប្រទេសចិន និងសិង្ហបុរី ដែលកំពុងទទួលបានសញ្ញាវិជ្ជមានជាបណ្តើរៗ ក្នុងរួចផុតពីវិបត្តិជំងឺCovid-19 ស្របពេលដែលបណ្តាប្រទេសនានានៅប៉ែកអឺរ៉ុប កំពុងតែជួបសភាពធ្ងន់ធ្ងរ៕

ក្រុមហ៊ុន Huawei សន្យាពង្រីកការវិនិយោគនៅកម្ពុជាបន្ថែមទៀត

ដោយវុត្ថា

ភ្នំពេញ៖ លោក Yuya Yao នាយកប្រតិបត្តិក្រុមហ៊ុន Huawei ប្រចាំនៅក្នុងប្រទេសកម្ពុជាបានឱ្យដឹងថា ក្រុមហ៊ុន Huawei នឹងបន្តវិនិយោគបន្ថែម មិនត្រឹមតែក្នុងវិស័យទូរគមនាគមន៍ប៉ុណ្ណោះទេ ប៉ុន្តែថែមទាំងពង្រីកសកម្មភាពធុរកិច្ចផ្សេងទៀត ក្នុងវិស័យឌីជីថលផងដែរ។

លោក Yuya Yao នៅក្នុងជំនួបពិភាក្សាការងារ ជាមួយ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ នៅថ្ងៃទី ១៥ ខែមីនា ឆ្នាំ ២០២០ នេះ ឱ្យដឹងថា ក្រុមហ៊ុន Huawei បាន វិនិយោគលើវិស័យបច្ចេកវិទ្យាព័ត៌មាន និងទូរគមនាគមន៍ ចាប់តាំងពីឆ្នាំ ១៩៩៩ មក ដែលបានផ្តល់ការងារដល់ប្រជាជនកម្ពុជា និងរួមចំណែកដល់ការអភិវឌ្ឍសេដ្ឋកិច្ចកម្ពុជា។

លោកនាយកប្រតិបត្តិក្រុមហ៊ុន Huawei រូបនេះ ក៏បានសន្យាសហការធ្វើការយ៉ាងជិតស្និទ្ធជាមួយក្រុមមន្ត្រីជំនាញក្រោមឱវាទក្រសួងលើគម្រោងនានា ដែលពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធទូរគមនាគមន៍សំខាន់ៗរបស់កម្ពុជា។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានឱ្យដឹងថា ក្រសួងបានបង្កើតបរិស្ថានសម្រាប់ការរីកលូតលាស់វិស័យឌីជីថល និងស្នើឱ្យក្រុមហ៊ុនពិនិត្យលទ្ធភាពផ្តល់ការគំាទ្រតាមរយៈជំនាញ និងបទពិសោធន៍របស់ខ្លួនលើកិច្ចសហប្រតិបត្តិការជាមួយវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន (NIPTICT) ដើម្បីបណ្តុះបណ្តាលកសាងសមត្ថភាពមន្រ្តីរាជការក្រសួង និងនិស្សិត ព្រមទាំងការប្រើប្រាស់អ៊ីនធឺណិត និងបច្ចេកវិទ្យាបានទូលំទូលាយក្នុងចំណោមប្រជាពលរដ្ឋទូទៅ៕

គម្រោងចាស់ៗលើវិស័យអចលនទ្រព្យនៅតែបន្តសាងសង់ធម្មតា

ដោយវុត្ថា

ភ្នំពេញ៖ គម្រោងធំៗ លើវិស័យវិស័យអចលនទ្រព្យដែលសល់ពីឆ្នាំចាស់នៅនៅតែបន្តមានសសកម្មភាពសាងសង់ធម្មតា បើទោះបីកម្ពុជាបានឹងកំពុងប្រយុទ្ធប្រឆាំងទៅនឹងការរីករាលជាសកលនៃជំងឺ Covid-19 យ៉ាងណាក្តី។

លោក ម៉ាន់ ច័ន្ទឌី អគ្គនាយកក្រុមហ៊ុន Premium housing Co, Ltd បានប្រាប់ឱ្យដឹងនៅថ្ងៃទី ១៥ ខែមេសា ឆ្នាំ ២០២០ នេះឱ្យដឹងថា សកម្មភាពនៃការសាងសង់លើគម្រោងចាស់ៗ នៃវិស័យសំណង់ និងអចលនទ្រព្យនៅតែមានភាពរស់រវើក បើទោះបីកម្ពុជាមានករណីឆ្លងជំងឺកូវីដ ១៩ ក៏ដោយ ។

លោកបន្តថា “យើងមើលឃើញថាអត់មានការថមថយសកម្មសាងសង់លើគម្រោងចាស់ៗទេ សកម្មភាពនេះ នឹងធ្វើឱ្យវិស័យអចលនទ្រព្យកម្ពុជានៅតែមានភាពរីកចំរើននាពេលខាងមុខនេះ បើទោះបីបច្ចុប្បន្ននេះ មានស្ថានភាពនៅទ្រឹងដោសជំងឺកូវីដ ១៩ ។
លោក ច្រឹក សុខនីម ប្រធានាសមាគមអ្នកវាយតម្លៃអចលនវត្ថុកម្ពុជាបានឱ្យដឹងកន្លងមកនេះដែរថា វិស័យអចលនទ្រព្យទទួលរងនូវផលប៉ះពាល់ផ្ទួនៗ ចាប់តាំងពីចុងឆ្នាំ២០១៩ រហូតមកដល់ដើមឆ្នាំ ២០២០ តែយ៉ាងសកម្មភាពនៃការសងសង់គម្រោងចាស់នៅតែបន្តធ្វើសកម្មភាព មិនមានការថមថយនោះទេ។

លោកបន្តថា “យើងគម្រោងស្នើសុំវិនិយោគនៅដើមឆ្នាំនេះមានចំនួនច្រើន តែយើងមិនដឹងថា គាត់ធ្វើឬមិនធ្វើទេ តែសម្រាប់គម្រោងចាស់ៗ បើទោះបីមានកូវីដ១៩ ឬការបិហ្គេមអនឡាញក៏ដោយ តែខ្ញុំឃើញសកម្មភាពសាងសង់នូវគម្រោងធំៗទាំងនៅតែបន្ត មិនមានសញ្ញាណាមួយជាប់គាំងលើវិស័យអចលនទ្រព្យនោះទេ” ។

លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ធ្លាប់បានឱ្យដឹងដែរថា ក្នុងត្រីមាសឆ្នាំ ២០២០ នេះ ក្រសួងនៅតែទទួលបានពាក្យស្នើសុំវិនិយោគលើវិស័យសំណង់ និងអចលនទ្រព្យ ជាបន្តបន្ទាប់ តែ សម្រាប់ការសាងសង់ជាក់ស្តែងមិនទាន់ដឹងថាមានការផ្អាកសកម្ម ឬ យ៉ាងណានោះទេ ៕

អ្នកវិនិយោគផ្លាស់ប្ដូរយុទ្ធសាស្ត្រទីផ្សាររបស់ខ្លួន ដើម្បីលក់ខុនដូដល់អតិថិជន

ដោយ ៖ រ៉ាណេត

ភ្នំពេញ ៖ ស្ថិតនៅក្នុងស្ថានភាពដែលកំពុងតែប្រឈម និងរាតត្បាតពីជំងឺឆ្លង Covid-19 សម្រាប់ទីផ្សារ និងការលក់ក្នុងវិស័យខុនដូនៅកម្ពុជា ត្រូវបានអ្នកជំនាញអះអាងថា ហាក់មិនរងផលប៉ះពាល់ធ្ងន់ធ្ងរនោះទេ ខណៈដែលយុទ្ធសាស្ត្រនៃការលក់ត្រូវបានផ្តោតសំខាន់ទៅលើការលើកទឹកចិត្តអតិថិជនដោយការលក់បញ្ចុះតម្លៃ និងការបន្ថែមជូនសម្ភារៈប្រើប្រាស់។

អគ្គនាយកក្រុមហ៊ុនអចលនទ្រព្យអន្តរជាតិ ERA លោក ខន គង្គា បានមានប្រសាសន៍ប្រាប់តាមទូរស័ព្ទកាលពីថ្ងៃទី១៥ ខែមេសា ឆ្នាំ២០២០នេះថា ទីផ្សារខុនដូនៅពេលបច្ចុប្បន្ននេះ បើទោះជាស្ថិតនៅក្នុងស្ថានភាពគំរាមកំហែងពីជំងឺឆ្លង Covid-19 ក៏ដោយ ប៉ុន្តែនៅរក្សាបានភាពល្អប្រសើរ ដែលខុសពីបណ្តាប្រទេសជិតខាងមួយចំនួនដែលកំពុងមានជួបការធ្លាក់ចុះ។

លោក ខន គង្គា បានមានប្រសាសន៍បញ្ជាក់ថា “មិនថាការសាងសង់ ឬការលក់នោះទេ ទីផ្សារខុនដូនៅកម្ពុជា នៅតែរក្សាបានភាពល្អប្រសើរ មិនមានការធ្លាក់ចុះនោះទេ”។ លោកបន្តថា “តម្លៃខុនដូដែលបានដាក់លក់នៅលើទីផ្សារមិនមានការធ្លាក់ចុះ ហើយក៏មិនមានការឡើងថ្លៃនោះដែរ ប៉ុន្តែសម្រាប់គម្រោងធំៗមួយចំនួនបានផ្លាស់ប្ដូរវិធីសាស្ត្រក្នុងការលក់របស់ខ្លួនដោយការបន្ថែមជូនជាកាដូទៅដល់អតិថិជន ដូចជាបន្ថែមគ្រឿងសង្ហារឹម ឬសម្ភារៈប្រើប្រាស់ដែលត្រូវបានបំពាក់រួចជាស្រេចនៅក្នុងយូនីតនីមួយៗជាដើម”។

ជាមួយគ្នានេះ លោកបានបង្ហាញពីជំនឿថា ទីផ្សារខុនដូនៅកម្ពុជា នឹងមិនរងផលប៉ះពាល់ធ្ងន់ធ្ងរពីវិបត្តិជំងឺ Covid-19 នោះទេ ដោយសារតែតម្រូវការទីផ្សារខុនដូភាគច្រើនជាអតិថិជនក្នុងស្រុករហូតដល់ប្រមាណ៩០ភាគរយ។

ស្រដៀងគ្នានឹងការលើកឡើងខាងលើនេះ នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍តាមទូរស័ព្ទកាលពីថ្ងៃទី១៥ ខែមេសា ឆ្នាំ២០២០ផងដែរថា ការលក់ខុនដូនៅក្នុងកាលៈទេសៈនេះ មានភាពខុសគ្នាកាលពីចុងឆ្នាំ២០១៩បន្តិច ។

លោកស្រីបានបញ្ជាក់ថា “សព្វថ្ងៃអ្នកលក់ខុនដូបានប្រើវិធីសាស្ត្រផ្សេងគ្នាដើម្បីអាចទទួលបានចំណែកទីផ្សារ ដូចជាសម្រាប់អ្នកដែលទិញខុនដូទុកសម្រាប់លក់បន្តយកចំណេញ ពួកគេបានប្រើវិធីសាស្ត្របញ្ចុះតម្លៃចាប់ពី ៥-១០ភាគរយ អាស្រ័យតាមអ្នកដែលមានតម្រូវការសាច់ប្រាក់បន្ទាន់ ប៉ុន្តែសម្រាប់ក្រុមហ៊ុនដែលកាន់គម្រោងលក់ធំៗហាក់មិនមានការបញ្ចុះតម្លៃនោះ ដោយពួកគេអាចផ្ដល់ជូននូវអត្ថប្រយោជន៍ដល់អតិថិជន ដូចជាការធានាការជួលត្តឡប់មកវិញជាដើម។ គម្រោងដែលកំពុងតែបន្តសកម្មភាពលក់ពេលនេះ ភាគច្រើនជាគម្រោងចាស់ ប៉ុន្តែសម្រាប់គម្រោងថ្មីៗគឺនៅមិនទាន់មានការប្រកាសលក់នោះទេ ដោយពួកគេនៅរង់ចាំមើលពីស្ថានភាពដែលកំពុងតប្រឈម”។

លោកស្រី អាន សុធីតា បានបន្តទៀតថា “ភាពប្រឈមនៃទីផ្សារខុនដូនៅកម្ពុជាមិនមានភាពធ្ងន់ធ្ងរនោះ ផ្ទុយទៅវិញ ភាពល្អប្រសើរអាចនឹងត្រឡប់មករកសភាពដើមវិញក្នុងពេលដ៏ខ្លី ដោយសារតែទីផ្សារខុនដូនៅកម្ពុជា ភាគច្រើនមកពីប្រទេសចិន តែវ៉ាន់ សិង្ហបុរី ហើយប្រទេសទាំងនេះក៏កំពុងតែចាប់ផ្ដើមបង្ហាញពីការធ្លាក់ចុះនៃភាពប្រឈម រួមទាំងកម្ពុជាផងដែរ” ៕

កម្ពុជាបាននាំចេញត្បូង និងគ្រឿងអលង្ការតម្លៃប្រមាណ ៤២០ លានដុល្លារ ទៅកាន់ទីផ្សារអន្តរជាតិ

ដោយ ប៊ី

ភ្នំពេញ៖ របាយការណ៍ក្រសួងពាណិជ្ជកម្មបានឱ្យដឹងថា កម្ពុជាបាននាំចេញត្បូង និងគ្រឿងអលង្ការដែលមានតម្លៃជាង ៤១៨,២៩ លានដុល្លារអាមេរិកទៅកាន់ទីផ្សារអន្តរជាតិកាលពីឆ្នាំមុន។

សឹង្ហបូរីគឺជាទីផ្សារនាំចេញធំបំផុតរបស់កម្ពុជាដែលមានតម្លៃ ២២៦ លានដុល្លារ។ ប្រទេសថៃជាប់ចំណាត់ថ្នាក់លេខ ២ និងនាំចូលគ្រឿងអលង្ការដែលមានតម្លៃប្រហែល ១៦៥ លានដុល្លារអាមេរិក ខណៈដែលសហរដ្ឋអាមេរិកជាប់ចំណាត់ថ្នាក់លេខ ៣ និងនាំចូលជាង ២៣ លានដុល្លារ។

ទិសដៅនាំចេញផ្សេងទៀតរួមមានប្រទេសវៀតណាម (៣,៣៦ លានដុល្លារ) បែលហ្ស៊ិក (១,១៥ លានដុល្លារ) ជប៉ុន (១១ ម៉ឺនដុល្លារ) អ៊ីតាលី (១.៨៥១ ដុល្លារ) និងចិន (១,១៤២ ដុល្លារ) ។

កម្ពុជាក៏បាននាំចូលត្បូង និងគ្រឿងអលង្ការដែលមានតម្លៃជាង ១៩៤ លានដុល្លារផងដែរ ដើម្បីផ្គត់ផ្គង់ទីផ្សារក្នុងស្រុកកាលពីឆ្នាំមុន។

ទំនិញភាគច្រើនបានមកពីប្រទេសថៃសឹង្ហបូរី កាណាដា ប៊ែលហ្សិក និងហុងកុង ប៉ុន្តែកម្ពុជាក៏បាននាំចូលពីទិសដៅចំនួន ១៦ ផ្សេងទៀតរួមមានសហរដ្ឋអាមេរិក ឥណ្ឌា ចិន វៀតណាម ជប៉ុន ម៉ាឡេស៊ី កូរ៉េខាងត្បូង និងអ៊ីតាលីជាដើម៕