រដ្ឋាភិបាលផ្អាកការយកវិភាគទានលើរោងចក្រកាត់ដេរនិងក្រុមហ៊ុនបម្រើសេវាកម្មក្នុងវិស័យទេសចរណ៍

ដោយ ៖ រ៉ាណេត

ភ្នំពេញ ៖ រដ្ឋាភិបាលកម្ពុជា តាមរយៈក្រសួងការងារ បណ្តុះបណ្តាល និងវិជ្ជាជីវៈ បានធ្វើការណែនាំយ៉ាងលម្អិតទៅលើការព្យួរកិច្ចសន្យាការងារ និងការផ្អាកបង់ភាគទាន ប.ស.ស សម្រាប់រោងចក្រ សហគ្រាស គ្រឹះស្ថានក្នុងវិស័យកាត់ដេរ និងទេសចរណ៍ ដែលរងផលប៉ះពាល់ធ្ងន់ធ្ងរដោយសារជំងឺ Covid-19 រួមជាមួយកាតព្វកិច្ចផ្សេងៗដែលត្រូវអនុវត្ត។

នៅក្នុងសេចក្ដីប្រកាសព័ត៌មានស្ដីពីការណែនាំរបស់រដ្ឋាភិបាលកម្ពុជា ពីវិធានការបន្ថែមសំដៅជួយដល់វិស័យឯជន និងកម្មករនិយោជិតដែលរងផលប៉ះពាល់ធ្ងន់ធ្ងរពីការរីករាលដាលនៃជំងឺ Covid-19 (ជុំទី៣ ថ្ងៃទី៧ ខែមេសា ឆ្នាំ២០២០)។

យោងច្បាប់ស្ដីពីការងារ ក្រសួងការងារ និងបណ្តុះបណ្តាលវិជ្ជាជីវៈ សូមណែនាំដល់ម្ចាស់រោងចក្រ សហគ្រាស គ្រឹះស្ថាននានាក្នុងវិស័យកាត់ដេរ និងទេសចរណ៍ ក្នុងដែនរាជធានីភ្នំពេញ ខេត្តសៀមរាប ខេត្តព្រះសីហនុ កែប កំពត ដែលខ្វះវត្ថុធាតុដើម ឬគ្មានការបញ្ជាទិញ ឬមិនមានទីផ្សារនាំចេញ ក៏ដូចជាមិនមានអតិថិជនប្រើប្រាស់សេវាកម្ម ដែលមានផលលំបាកណាមួយ រហូតនាំឱ្យមានការព្យួរសកម្មភាពផលិត ឬអាជីវកម្មជាបណ្តោះអាសន្ន។

ជាមួយគ្នានេះ សម្រាប់បងប្អូន កម្មករ និយោជិត ដែលបម្រើការងារនៅក្នុងរោងចក្រ សហគ្រាស គ្រឹះស្ថានទាំងនោះ ត្រូវរួមគ្នាជាដាច់ខាតបំពេញនូវនិតិវិធីនៃការព្យួរកិច្ចសន្យាការងារ និងការស្នើសុំផ្អាកបង់ភាគទានវបេឡាជាតិសន្ដិសុខសង្គម (ប.ស.ស) នឹងត្រូវអនុវត្តដូចបានចែងលម្អិតនៅក្នុងសេចក្ដីប្រកាសខាងក្រោម ៖

ទីផ្សារអាមេរិក នៅតែបន្តឈរលំដាប់ទី១ លើការបញ្ជាទិញពីកម្ពុជា

ដោយ ៖ រ៉ាណេត

ភ្នំពេញ ៖ ក្នុងចំណោមទីផ្សារធំៗនៅតាមបណ្តាប្រទេសទាំង៦ រួមជាមួយនឹងបណ្តាប្រទេសមួយចំនួនទៀតនៅក្នុងទីផ្សារអាស៊ាន សហរដ្ឋអាមេរិកនៅតែបន្តឈរនៅលំដាប់កំពូលលើការបញ្ជាទិញទំនិញពីកម្ពុជា។

តាមរយៈអគ្គនាយកដ្ឋានគោលនយោបាយនៃក្រសួងសេដ្ឋកិច្ច និងហិរញ្ញវត្ថុ បានបង្ហាញនូវវឌ្ឍនភាពនៃផលិតផលផលសរុបសម្រាប់នាំចេញជាក់ស្តែងនៅក្នុងរយៈពេល ២ខែ ដើមឆ្នាំ២០២០ នេះ មានទំហំទឹកប្រាក់សរុបប្រមាណ ២ ៥៦៣ លានដុល្លារអាមរិក ក្នុងនោះចំពោះទីផ្សារនាំចេញទៅកាន់សហរដ្ឋអាមេរិក នៅតែបន្តឈរក្នុងលំដាប់ថ្នាក់ទី១ បន្ទាប់ពីប្រទេសនាំចេញចំនួន៦ផ្សេងទៀត ដោយបូកបញ្ជូលទាំងប្រទេសក្នុងអាស៊ានផងដែរ។

នៅក្នុងរបាយការណ៍ដដែលបានបង្ហាញទៀតថា ជុំវិញការនាំចេញទៅកាន់ប្រទេសទាំង៦នេះ ក្នុងនោះការនាំចេញសរុបទៅកាន់សហរដ្ឋអាមេរិក មានកំណើនជិត ៤៣ភាគរយ, នាំចេញទៅកាន់សហភាពអឺរ៉ុប មានប្រមាណ ២៥ភាគរយ, ជប៉ុន ៥ភាគរយ, អាស៊ានជាង ៦ភាគរយ, អង់គ្លេសប្រមាណ ៦ភាគរយ និងការនាំចេញទៅកាន់ប្រទេសផ្សេងៗទៀតសរុបមានកំណើនជាង ២០ភាគរយផងដែរ។

ចំណែកការនាំចេញផលិតផលវាយនភណ្ឌទៅកាន់ទីផ្សារសំខាន់ៗទាំងនេះ ក្នុងរយៈពេល២ខែ ឆ្នាំ២០២០ នេះដែរ គឺស្ថិតនៅក្នុងលំដាប់រឹងមាំនៅឡើយ ដោយក្នុងនោះការនាំចេញទៅកាន់ទីផ្សារអាស៊ាន មានកំណើនជាង ៤១ភាគរយ បើប្រៀបធៀបទៅនឹងឆ្នាំ២០១៩ ក្នុងរយៈពេលដូចគ្នាមានជាង ៥១ភាគរយ។ ដោយឡែក ទីផ្សារអាមេរិកមានប្រមាណ ៤០ភាគរយ ខណៈដែលក្នុងឆ្នាំ២០១៩ មានជាង ៤៨ភាគរយ , ជប៉ុន ១៨ភាគរយ, សហភាពអឺរ៉ុបជាង ៧ភាគរយ, អង់គ្លេស ដក ៣ភាគរយ (-៣ភាគរយ), និងការនាំចេញទៅកាន់ប្រទេសផ្សេងៗ មានចំនួនជាង ២០ភាគរយ ផងដែរ ៕

រដ្ឋាភិបាលកំពុងតែរៀបចំផែនការស្ដារ និងអភិវឌ្ឍន៍ព្រលានយន្តហោះខេត្តបាត់ដំបងឡើងវិញ

ដោយ ៖ រ៉ាណេត

បាត់ដំបង ៖ ស្របតាមគោលនយោបាយអភិវឌ្ឍន៍របស់រដ្ឋាភិបាល និងការចង្អុលបង្ហាញពីសំណាក់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បច្ចុប្បន្ន មន្ត្រីជំនាញផ្នែកអាកាសចរស៊ីវិល បាន និងកំពុងរៀបចំផែនការស្នើសុំគណៈកម្មការគោលនយោបាយសេដ្ឋកិច្ច ដើម្បីស្ដារ និងអភិវឌ្ឍន៍អាកាសយានដ្ឋានខេត្តបាត់ដំបង ដើម្បីសម្រួល និងបម្រើដល់វិស័យដឹកជញ្ជូនក្នុងស្រុក។

អគ្គនាយករងបច្ចេកទេស រដ្ឋលេខាធិការដ្ឋានអាកាសចរស៊ីវិល លោក ស៊ីន ចាន់សិរីវុត្ថា បានមានប្រសាសន៍នៅក្នុងពិធីសន្និសីទសារព័ត៌មានស្ដីពីវឌ្ឍនភាព និងទិសដៅការងារបន្តរបស់រដ្ឋលេខាធិការដ្ឋានអាកាសចរស៊ីវិល នៅទីស្ដីការគណៈរដ្ឋមន្ត្រី កាលពីថ្ងៃទី១៦ ខែមេសា ឆ្នាំ២០២០ថា អាកាសយានដ្ឋានខេត្តបាត់ដំបងនៅពេលបច្ចុប្បន្ននេះ គឺជាប្រភេទអាកាសយានដ្ឋានក្នុងស្រុក មានលក្ខណៈតូចចង្អៀត និងទ្រុឌទ្រោម ដែលយើងត្រូវតែពិនិត្យ ដើម្បីស្ដារ និងកែលម្អរឡើងវិញឱ្យស្របតាមទៅស្ដង់ដារអន្តរជាតិ ដែលការផ្តួចផ្ដើមនេះត្រូវបានរដ្ឋមន្ត្រីទទួលបន្ទុកអាកាសចរស៊ីវិល បានប្រគល់ការងារឱ្យក្រុមមន្ត្រីជំនាញ ដើម្បីលើកសំណើរ ថាតើត្រូវកែលម្អរ និងអភិវឌ្ឍន៍អាកាសយានដ្ឋានមួយនេះរបៀបណា។

លោក ស៊ីន ចាន់សិរីវុត្ថា បានមានប្រសាសន៍ថា “ជាជំហានដំបូងយើងគិតថា ត្រូវស្ដារឡើងវិញដើម្បីឱ្យបានគ្រប់ស្ដង់ដារសុវត្ថិភាពត្រឹមកម្រិត 3C ដែលយើងអាចទទួលចុះចតយន្តហោះក្នុងស្រុកប្រកបដោយសុវត្ថិភាព។ បន្ទាប់មកទៀត យើងបានពិនិត្យមើលផែនការអភិវឌ្ឍន៍របស់នគរូបនីយកម្មនៅខេត្តបាត់ដំបង ដែលបានបង្ហាញពីភាពសមស្រប ទៅនឹងផែនការនៃការអភិវឌ្ឍ និងយល់ស្របក្នុងការកែសម្រួល និងស្តារអាកាសយានដ្ឋានមួយនេះឡើងវិញសម្រាប់ប្រើប្រាស់ក្នុងរយៈពេលខ្លី និងមធ្យម ប៉ុន្តែសម្រាប់រយៈពេលវែង គឺចាំបាច់ត្រូវតែមានការផ្លាស់ប្ដូរទីតាំងថ្មី។

លោកបានបញ្ជាក់ទៀតថា “បន្ទាប់ពីបានត្រួតពិនិត្យទិដ្ឋភាពបច្ចេកទេស និងសេដ្ឋកិច្ចគ្រប់ជ្រុងជ្រោយ យើងបានរៀបចំសំណើរដើម្បីដាក់ជូនគណៈកម្មការគោលនយោបាយសេដ្ឋកិច្ចក្នុងការអនុញ្ញាតជាគោលការណ៍ឱ្យយើងបានស្ដារ និងកែលម្អរអាកាសយានដ្ឋានក្នុងខេត្តបាត់ដំបងនេះឡើងវិញ ហើយបច្ចុប្បន្ន ផែនការនេះកំពុងតែត្រូវបានដំណើរត្រួតពិនិត្យ”។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា ធ្លាប់បានមានប្រសាសន៍នៅក្នុងពិធីបុណ្យទន្លេលើកទី៦ នៅខេត្តបាត់ដំបងថា “បើទោះបីរយៈពេលនេះមិនទាន់ត្រូវការ ក៏ប៉ុន្តែនៅពេលខាងមុខនេះ យើងច្បាស់ជាត្រូវការនូវព្រលានយន្តហោះ សម្រាប់ខេត្តបាត់ដំបង។ ដូច្នេះបានជាខ្ញុំស្នើឲ្យឯកឧត្តមអភិបាលខេត្ត ស្នើឱ្យសម្តេចក្រឡាហោម ស ខេង យកចិត្តទុកដាក់ទៅលើការគ្រប់គ្រង ដីធ្លីនៅក្នុងតំបន់នេះ និងជៀសវាងនូវការកសាងសំណង់ខ្ពស់ ដែលវាអាចប៉ះពាល់ដល់ការហោះហើរ នៅពេលដែលយើងពង្រីកនូវព្រលានយន្តហោះមួយនេះ”។

សម្តេចតេជោបានបន្តទៀតថា “បើទោះបីព្រលានយន្តហោះបាត់ដំបង មិនអាចក្លាយជាព្រលានយន្តហោះអន្តរជាតិក្តី ប៉ុន្តែនៅពេលប្រជាជនមានការរីកចម្រើនផ្នែកជីវភាព តម្រូវការធ្វើដំណើររបស់ប្រជាពលរដ្ឋកាន់តែខ្ពស់ ដូច្នេះតម្រូវឱ្យមានការហោះហើរក្នុងស្រុក ទើបត្រូវរៀបចំចក្ខុវិស័យទុកជាមុនបែបនេះ” ៕

ព្រឹទ្ធសភាអនុម័តច្បាប់ដាក់ប្រទេសជាតិស្ថិតក្នុងភាពអាសន្នជាផ្លូវការ

ដោយ វុត្ថា

ភ្នំពេញ៖ ព្រឹទ្ធិសភាកម្ពុជា បានអនុម័តសេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន ទាំងស្រុងជាផ្លូវការ ដោយឥតកែប្រែចំនួន ៥៤សំឡេងនៃចំនួនសមាជិកព្រឹទ្ធសភាទាំងមូល។

យោងតាមសេចក្តីប្រកាសព័ត៌មានរបស់ព្រឹទ្ធសភាស្តីពីលទ្ធផលនៃសម័យប្រជុំវិសាមញ្ញព្រឹទ្ធសភា នីតិកាលទី ៤ នាថ្ងៃទី ១៧ ខែមេសា ឆ្នាំ ២០២០ នេះ ឱ្យដឹងថា សេចក្តីព្រាងច្បាប់នេះ តាក់តែងឡើងមានគោលបំណងកំណត់អំពី បែបបទ នីតិវិធី និងលក្ខខណ្ឌ នៃការប្រកាសដាក់ប្រទេសជាតិស្ថិតក្នុងភាពអាសន្ន នៅពេលប្រជាជាតិប្រឈមមុខនឹងគ្រោះថ្នាក់ ព្រមទាំងការគ្រប់គ្រងប្រទេសជាតិស្ថិតក្នុងភាពអាសន្ន ដើម្បីការពារសន្តិសុខជាតិ និងសណ្តាប់ធ្នាប់សាធារណៈ ការការពារអាយុជីវិត និងសុខភាពរបស់ប្រជាពលរដ្ឋ ព្រមទាំងការពារទ្រព្យសម្បត្តិ និងបរិស្ថាន។

សេចក្តីព្រាងច្បាប់នេះ មានវិសាលភាពអនុវត្តនៅពេលដែលប្រទេសជាតិត្រូវបានដាក់ស្ថិតក្នុងភាពអាសន្ន ស្របតាមមាត្រា២២ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា។

សេចក្តីព្រាងច្បាប់នេះ មានគុណប្រយោជន៍ក្នុងការគ្រប់គ្រងប្រទេសជាតិស្ថិតក្នុងភាពអាសន្ន ដោយបានផ្តល់មូលដ្ឋានគតិយុត្តជាក់លាក់ដល់ការអនុវត្តមាត្រា២២ថ្មី មាត្រា៨៦ មាត្រា១០២ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា ជាមូលដ្ឋានគតិយុត្តកំណត់នូវបែបបទ នីតិវិធី និងលក្ខខណ្ឌ នៃការប្រកាសដាក់ប្រទេសជាតិស្ថិតក្នុងភាពអាសន្ន ជាមូលដ្ឋានគតិយុត្តកំណត់អំពី សិទ្ធិអំណាចរបស់រាជរដ្ឋាភិបាល ដើម្បីដាក់ចេញនូវវិធានការចាំបាច់នានា ក្នុងការគ្រប់គ្រងប្រទេសជាតិស្ថិតក្នុង ភាពអាសន្ន ។

ជាសេសច្បាប់នេះនិងឱ្យរដ្ឋសភា ព្រឹទ្ធសភាទទួលបានពីរាជរដ្ឋាភិបាលនូវការរាយការណ៍ជាប្រចាំអំពីវិធានការបានដាក់ចេញក្នុងពេលប្រទេសជាតិស្ថិតក្នុងភាពអាសន្ន នឹងអាចស្នើសុំព័ត៌មានចាំបាច់បន្ថែម ផ្សេងៗទៀតពីរាជរដ្ឋាភិបាលក្នុងក្របខ័ណ្ឌនៃការត្រួតពិនិត្យ និងការវាយតម្លៃអំពីវិធានការដែលបាន ដាក់ចេញក្នុងពេលដែលប្រទេសជាតិស្ថិតក្នុងភាពអាសន្ន ដើម្បីការពារសន្តិសុខជាតិ និងសណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ព្រមទាំងការពារទ្រព្យសម្បត្តិ និងបរិស្ថាន។

សេចក្តីព្រាងច្បាប់នេះតាក់តែងឡើងមាន ៥ជំពូក និង១២មាត្រា ត្រូវបានរដ្ឋសភានៃព្រះរាជា-ណាចក្រកម្ពុជា អនុម័តយល់ព្រមចំនួន ១១៥សំឡេង នៃចំនួនសមាជិករដ្ឋសភាទាំងមូល កាលពីថ្ងៃទី១០ខែមេសា ឆ្នាំ២០២០ នាសម័យប្រជុំលើកទី៤ នីតិកាលទី៦៕

សម្តេចតេជោ៖ សប្បុរសជនដែលបានចូលរួមជាថវិកាសម្រាប់ប្រយុទ្ធជាមួយជម្ងឺ Covid-19 កើនដល់ជាង ១៣ លានដុល្លារ

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឱ្តដឹងថា រហូតមកដល់ពេលនេះ រាជរដ្ឋាភិបាលបានទទួលជំនួយពីសប្បុរសជនជាថវិកាចំនួន ជាង ១៣ លានដុល្លារអាមេរិកសម្រាប់ប្រយុទ្ធជាមួយជម្ងឺ Covid-19 នៅក្នុងប្រទេសកម្ពុជា។

សម្តេចតេជោ ហ៊ុន សែន បានសរសេរនៅលើទំព័រហ្វេសបុកផ្លូវការនៅថ្ងៃទី ១៧ ខែមេសា ឆ្នាំ ២០២០ នេះថា គិតត្រឹមព្រឹកថ្ងៃ១៧មេសា២០២០នេះ សប្បុរសជនដែលបានចូលរួមជាថវិកាសម្រាប់ប្រយុទ្ធជាមួយជម្ងឺកូវីត១៩មានចំនួនទឹកប្រាក់ចំនួន ១៣.៥៩៧.២៩៥ ដុល្លារ ដោយមិនទាន់គិតពីជំនួយជាសំភារះបរិក្ខា ដូចជាម៉ាស់ អាកុល សាប៊ូសំភារះពេទ្យ ដែលមានតម្លៃរាប់លានដុល្លារថែមទៀត។

សម្តេចតេជោបន្តថា “ដោយឡែកការរួមវិភាគទានតាមរយះការបរិច្ចាគបៀវត្សទាំងស្រុងឬមួផ្នែកនៃមន្ត្រីពីគ្រប់ស្ថាបន័ថ្នាក់ជាតិ ថ្នាក់ក្រោមជាតិនិងកងកម្លាំង ប្រដាប់អាវុធគ្រប់ប្រភេទគិតត្រឹមព្រឹកថ្ងៃ១៦មេសា២០២០នេះមានចំនួន១៤.៧៥១នាក់ និងនៅសល់មួយចំនួនទៀតដែលកំពុងផ្ទៀងផ្ទាត់នៅក្រសួងមុខងារសារធារណះ”។

សម្តេចតេជោបន្ថែមថា “នេះជាចលនាជាតិដ៏ខ្លាំងក្លាមួយរបស់ប្រជាជនកម្ពុជាយើងក្នុងការប្រយុទ្ធជាមួយជម្ងឺដ៏កាចសាហាវនេះដែលទូលព្រះបង្គំខ្ញុំព្រះករុណាខ្ញុំសូមថ្លែងអំណរព្រះគុណថ្វាយព្រះមហាក្សត្រ ថ្វាយសម្តេចម៉ែ ប្រគេនព្រះសង្ឃគ្រប់ព្រះអង្គ ជូនជនរួមជាតិមន្ត្រីរាជការគ្រប់ថ្នាក់ និងកងកម្លាំងប្រដាប់អាវុធគ្រប់ប្រភេទដែលបានចូលរួមក្នុងចលនាជាតិដ៏ធំមួយនេះ”៕

អ្នកនាំពាក្យ៖ ក្រុមហ៊ុនអាកាសចរណ៍ចំនួន៤៧ កំពុងប្រតិបត្ដិការអាជីវកម្មនៅកម្ពុជា

ដោយ វុត្ថា

ភ្នំពេញៈ ក្រុមហ៊ុនអាកាសចរណ៍ ដែលបានកំពុងប្រតិបត្ដិការអាជីវកម្មមានចំនួន ៤៧ក្រុមហ៊ុន ក្នុងនោះក្រុមហ៊ុនអាកាសចរណ៍ ក្នុងស្រុកមានចំនួន៦ក្រុមហ៊ុន និងក្រុមហ៊ុនអាកាសចរណ៍អន្តរជាតិមានចំនួន៤១ក្រុមហ៊ុន។ ចំណែកអាកាសយានស៊ីវិលដែលបានចុះបញ្ជីប្រតិបត្ដិការអាជីវកម្មសរុបមានចំនួន១២គ្រឿង។

លោកជា អូន រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលបានថ្លែងក្នុងសន្និសីទសារព័ត៌មានស្ដីពី “វឌ្ឍនភាព និងទិសដៅការងារបន្ដរបស់រដ្ឋលេខាធិការ ដ្ឋានអាកាសចរស៊ីវិល” ថ្ងៃទី១៦ ខែមេសា ឆ្នាំ២០២០កន្លមកបានឱ្យដឹងថា ក្រៅពីនេះនៅមានក្រុមហ៊ុនអាកាសចរណ៍មួយចំនួនទៀត ដែលបាននឹងកំពុងស្នើសុំវិញ្ញាបនបត្រប្រតិបត្តិការហោះហើ (AOC) ពីរដ្ឋលេខាធិការដ្ឋានអាកាសចរស៊ីវិល ដើម្បីដំណើរការហោះហើរដឹកជញ្ជូនអ្នកដំណើរ និងទំនិញក្នុងស្រុក និងក្រៅស្រុកនៅកម្ពុជា។

លោកបន្តថា “បច្ចុប្បន្នមានប្រទេសចំនួន៤៦ បានចុះហត្ថលេខាកិច្ចព្រមព្រៀងសេវាកម្មដឹកជញ្ជូនតាមផ្លូវអាកាស ចុះហត្ថលេខាអនុស្សារណៈយោគយល់ និងឯកភាពជាគោលការណ៍ខ្លឹមសារនៃកិច្ចព្រមព្រៀងជាមួយនឹងកម្ពុជា។

លោកស៊ីន ចាន់សិរីវុត្ថា អគ្គនាយករងបច្ចេកទេស និងជាអ្នកនាំពាក្យអាកាសចរស៊ីវិលបានឱ្យដឹងថា ក្រុមហ៊ុនអាកាសចរណ៍នៅក្នុងប្រទេសកម្ពុជា ដែលកំពុងប្រកបអាជីវកម្មក្នុងវិស័យអាកាសចរណ៍ បានទទួលនូវរងផលប៉ះពាល់ធ្ងន់ធ្ងរ ពីការរីករាលដាលនៃជំងឺ COVID-19 ហើយត្រូវបានលើកលែងការបង់ពន្ធអប្បបរមាចំនួន១០ភាគរយ សម្រាប់រយៈពេល៣ខែ ចាប់ពីខែមីនា រហូតដល់ខែឧសភា ឆ្នាំ២០២០ដែលគ្មានការតម្រូវឲ្យបង់ប្រាក់រំដោះពន្ធលើប្រាក់ចំណូលនោះទេ។

លោកបន្តថា រហូតមកដល់បច្ចុប្បន្ននេះ មិនទាន់មានក្រុមហ៊ុនអាកាសចរណ៍ ក្នុងស្រុកណាមួយរបស់កម្ពុជា ប្រកាសក្ស័យធនដោយសារ Covid-19 ឡើយ ខណៈយោងតាមស្ថិតិបានឲ្យដឹងថា បន្ទាប់ពីកើតមានជំងឺកូវីដ១៩នេះ ក្នុងខែមករាឆ្នាំ២០២០ ភ្ញៀវមានការថយចុះជាមធ្យមប្រមាណ២០ភាគរយ។ កាលពីខែកុម្ភៈមានការថយចុះប្រមាណ៥០ភាគរយ នៅក្នុងខែមីនាថយចុះជាង៧០ភាគរយ ហើយចំពោះខែមេសានេះ មានការថយចុះ រហូតដល់ជាង៩០ភាគរយ គិតត្រឹមថ្ងៃទី៤ ខែមេសា ឆ្នាំ២០២០នេះ។

យោងតាមរបាយការណ៍របស់រដ្ឋលេខារដ្ឋាន អាកាសចរស៊ីបានឱ្យបង្ហាញថា គិតត្រឹមបំណាច់ឆ្នាំ២០១៩ ចំនួនអ្នកដំណើរសរុប១១,៦៣៤,៩៥៣នាក់ ក្នុងនោះអ្នកដំណើរអន្តរជាតិចំនួន១០,២៦០,៥៨២នាក់ និងអ្នកដំណើរក្នុងស្រុកចំនួន១,២៩៣,៩៨២នាក់។ ការដឹកជញ្ជូនទំនិញតាមផ្លូវអាកាសសរុបមានចំនួន៧៨,៩៥៩តោន ក្នុងនោះការដឹកជញ្ជូនទំនិញជាអន្តរជាតិមានចំនួន៧៧,៦៤៥តោន និងការដឹកជញ្ជូនទំនិញក្នុងស្រុកមានចំនួន១,៣១៤ តោន។

ចំនួនជើងហោះហើរសរុប១៣៣,៨៣៥លើក ក្នុងនោះជើងហោះហើរអន្តរជាតិចំនួន៤៥,៦១០លើក ជើងហោះហើរក្នុងស្រុកចំនួន១៥,០៩២លើក និងជើងហោះហើរឆ្លងកាត់ដែនអាកាសរបស់ប្រទេសកម្ពុជាមានចំនួន៧៣,១៣៣លើក៕

លោក ច្រឹក សុខនីម៖ ការទទួលផលចំណេញពីការវិនិយោគអចលនទ្រព្យមិនមែនជារឿងងាយនោះទេ

ដោយៈ រ៉ាណេត

ភ្នំពេញ៖ ការវិនិយោគទៅលើវិស័យអចលនទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់ មិនមែនសុទ្ធតែងាយទទួលបាននោះទេ។ ផ្ទុយទៅវិញ ដើម្បីអាចគេចផុតពីហានិភ័យលើការវិនិយោគ ឬខាតបង់ទ្រព្យ និងពេលវេលាចាំបាច់ត្រូវតែមានភាពប្រាកដប្រជា និងយល់ដឹងពីវិស័យមួយនេះឱ្យបានច្បាស់លាស់ ជៀសវាងការវិនិយោគដោយភាពប្រថុយប្រថាន។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានចែករំលែកពីចំណោះដឹង និងបទពិសោធន៍ផ្ទាល់ខ្លួន ពាក់ព័ន្ធទៅនឹងការវិនិយោគក្នុងវិស័យអចលទ្រព្យប្រកបដោយប្រសិទ្ធភាព និងទទួលបានប្រាក់ចំណេញខ្ពស់ ដើម្បីវិនិយោគលើអចលនទ្រព្យ ទទួលបានប្រាក់ចំណេញ អ្នកត្រូវវិនិយោគដោយមើលទៅលើស្ថានការណ៍ ពេលវេលា ស្ថានភាពផ្លូវទីតាំង និងសមស្របនឹងតម្រូវការជាក់ស្ដែង។

អ្នកជំនាញក្នុងវិស័យអចលនទ្រព្យរូបនេះ ក៏បានលើកឡើងផងដែរថា “មិនមែនអ្នកមានលុយ ទិញអចលនទ្រព្យទុកលក់បន្តសុទ្ធ តែអាចមានឱកាសទទួលបានចំណេញនោះទេ ហើយបើអាចចំណេញក៏ត្រូវចំណាយពេលយូរ ឬច្រើនឆ្នាំ ឬចំណេញបានតិចតួច មិនស្មើនឹងការប្រាក់ដាក់នៅធនាគារក៏មានដែរ ប្រសិនបើការទិញអចលនទ្រព្យទាំងនោះ មិនត្រូវបានឆ្លងកាត់ការសិក្សា ការវិនិច្ឆ័យពីតម្រូវការពិតប្រាកដ ពោលគឺជាការវិនិយោគដោយភាពប្រថុយប្រថាន និងគ្មានជំនាញផ្បាស់លាស់។

លោកសុខនីមបានបញ្ជាក់ថា មុននឹងសម្រេចចិត្តទិញ ត្រូវអង្កេតតាមដានអចលនទ្រព្យគោលដៅគ្រប់ពេលវេលា ដើម្បីឱ្យដឹងពីអ្វីដែលបានកើនឡើង ក្នុងកន្លែងនោះ ឬតំបន់នោះថាតើ នឹងមានហាងលក់ដូរកំពុងសង់ ឬក៏មានគម្រោងសាងសង់អគារខ្ពស់ដែរឬទេ? ហើយត្រូវធ្វើផែនការគ្រប់យ៉ាងឱ្យបានហ្មត់ចត់ និងដំណើរការតាមជំហានមួយៗច្បាស់លាស់មុនពេលសម្រេចចិត្ត ដោយគិតតាមក្បួនខ្នាតឱ្យបានល្អិតល្អន់ជាមុន។ យើងត្រូវគិតថាទិញយកមកធ្វើអ្វី? បានផលតបស្នងត្រឡប់មកវិញប៉ុន្មាន ហើយអាចប៉ះពាល់ដល់លំហូរសាច់ប្រាក់ឬទេ។

លោកថា ទាំងនេះគ្រាន់តែជាចំណុចបឋម ដែលត្រូវយកចិត្តដាក់ពិចារណាមុនការសម្រេចចិត្តវិនិយោគ ដើម្បីចៀសផុតពីហានិភ័យ៕

រដ្ឋាភិបាលគ្រោងបោះទុនជាង ៣០០០លានដុល្លារពង្រីកវិសាលភាពព្រលានយន្តហោះទាំងអស់នៅកម្ពុជា

ដោយ វុត្ថា

ភ្នំពេញៈ រដ្ឋាភិបាលគ្រោងបោះទុនជាង ៣០០០លានដុល្លារអាមេរិក ក្នុងការពង្រីកនិងស្តារឡើងវិញនូវព្រលានយន្តហោះ ទាំងអស់នៅក្នុងប្រទេសកម្ពុជា ដើម្បីជំរុញឱ្យវិស័យអាកាសចរណ៍កម្ពុជា កាន់តែការតែទំនើប និងអាចឱ្យយន្តហោធុនធំអាចចុះចតបាន។

លោកស៊ិនចាន់ សេរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិល នៅក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋលេខាធិការដ្ឋានអាកាសចរស៊ីវិល» ថ្ងៃទី១៦ ខែមេសា ឆ្នាំ២០២០កន្លងមកបានឱ្យដឹងថា ទឹកប្រាក់វិនិយោគជាង៣០០០លានដុល្លារអាមេរិក ក្នុងការពង្រីកវិសាលភាពនៃព្រលានយន្តហោះទាំង៣ ពោលគឺហេដ្ឋារចនាសម្ព័ន្ធទាំងអស់របស់កម្ពុជា។

លោកបន្ថែមថា “ទំហំទុននៃការវិយោគចំណាយលើព្រលានយន្ត នៅភ្នំពេញ សៀមរាប និងខេត្តព្រះសីហនុ រួមទាំងគម្រោងព្រលានយន្តហោះថ្មីៗផ្សេងទៀត។ អញ្ចឹងយើងគ្រោងចំណាយជាង៣០០០លានដុល្លារអាមេរិក។

ចំណែកលោក ជា អូន រដ្ឋលេខាធិការនៃរដ្ឋលេខាធិកាអាកាសចរណ៍កម្ពុជាបានឱ្យដឹងផងដែរថា រដ្ឋាភិបាលនឹងកំពុងតែដំណើរការ អភិវឌ្ឍហេដ្ឋារចនាសម្ព័ន្ឋអាកាសយានដ្ឋានជាតិ-អន្តរជាតិចំនួន៣ គឺអាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប អាកាសយានដ្ឋានអន្តរជាតិខេត្តព្រះសីហនុ ដែលគ្រប់គ្រងនិងធ្វើទំនើបកម្មអាកាសយានដ្ឋានដោយក្រុមហ៊ុន (SCA)។

លោកបន្តថា ក្រៅពីអាកាសយានដ្ឋានអន្តរជាតិ យើងមានអកាសយានដ្ឋានក្នុងស្រុកមួយចំនួនទៀតដូចជា អាកាសយានដ្ឋានបាត់ដំបង អាកាសយានដ្ឋានស្ទឹងត្រែង អាកាសយានដ្ឋានកោះកុង និងអាកាសយានដ្ឋានប៉ោយប៉ែត។

លោកបន្ថែមទៀតថា គម្រោងអាទិភាពដែលបានដាក់ជូនរាជរដ្ឋាភិបាល តាមរយៈក្រសួងផែនការ មានដូចជា៖

– គម្រោងស្តារនិងកែលម្អអាកាសយានដ្ឋានស្ទឹងត្រែង 4C

– គម្រោងសាងសង់អាកាសយានដ្ឋានអន្តរជាតិភ្នំពេញថ្មី 4E

– គម្រោងសាងសង់អាកាសយានដ្ឋានអន្តរជាតិសៀមរាប-អង្គរថ្មី 4E

– គម្រោងសាងសង់អាកាសយានដ្ឋានតារាសាគរនៅស្រុកបុទុមសាគរខេត្តកោះកុង 4C

– គម្រោងកែលម្អអាកាសយានដ្ឋានកោះកុង 4C

– គម្រោងសាងសង់អាកាសយានដ្ឋានមណ្ឌលគីរីថ្មី 3C (ទីតាំងថ្មី)

– គម្រោងសាងសង់អាកាសយានដ្ឋានរតនគីរីថ្មី 3C (ទីតាំងថ្មី)

– គម្រោងសាងសង់អាកាសយានដ្ឋានព្រះវិហារថ្មី 3C (ទីតាំងថ្មី)

– គម្រោងសាងសង់អាកាសយានដ្ឋានប៉ោយប៉ែត

– គម្រោងការសាងសង់មជ្ឈមណ្ឌលឧតុនិយមអាកាសចរស៊ីវិលកម្ពុជា៕

ក្រសួងដែនដីចេញវិញ្ញាបនបត្រសម្គាល់ម្ចាស់អចលនវត្ថុលើការគ្រប់គ្រងតំបន់អភិរ័ក្សរបស់ជាតិ

ដោយ វុត្ថា

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់ បានចេញ“វិញ្ញាបនបត្រសម្គាល់ម្ចាស់អចលនវត្ថុ” ជូនក្រសួងបរិស្ថានចំនួន១៨ប័ណ្ណ ក្នុងនោះ១០ប័ណ្ណ សម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល និងតំបន់អភិរក្សនៃដែនជម្រកសត្វព្រៃ ពាមក្រសោប ខេត្តកោះកុង ដែលគ្រប់ដណ្តប់លើផ្ទៃដីសរុប៤.៦៧២,៦១ហិកតា និង៨ប័ណ្ណសម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល នៃដែនជម្រកសត្វព្រៃភ្នំព្រេច ខេត្តមណ្ឌលគីរី ដែលគ្របដណ្តប់លើផ្ទៃដីសរុប៤៥.៥១៩,២៦ ហិកតា។

យោងតាមសេចក្តីប្រកាសព័ត៌មានរបស់ក្រសួងបរិស្ថានស្តីពី ការចុះបញ្ជីដីរដ្ឋនៃដែនជម្រកសត្វព្រៃពាមក្រសោប ខេត្តកោះកុងនិងដែនជម្រកសត្វព្រៃភ្នំព្រេច ខេត្តមណ្ឌលគិរី នៅថ្ងៃទី ១៦ ខែមេសា ឆ្នាំ ២០២០កន្លងមកឱ្យដឹងថា ក្រសួងរៀបចំដែនដី នគរូបនីយកម្ម និងសំណង់កំពុងបន្តពិនិត្យចេញ “វិញ្ញាបនបត្រសម្គាល់ម្ចាស់អចលនវត្ថុ”សម្រាប់តំបន់អភិរក្សនៃដែនជម្រកសត្វព្រៃភ្នំព្រេច ខេត្តមណ្ឌលគិរី ហើយក្រុមការងារអនុវត្តគម្រោងបាននិងកំពុងបន្តនីតិវិធី និងដំណើរការចុះបញ្ជីដីរដ្ឋ នៅក្នុងតំបន់ប្រើប្រាស់ដោយចីរភាពនៃដែនជម្រកសត្វព្រៃទាំងពីរ ដូចជា ការបិទផ្សព្វផ្សាយជាសាធារណៈនូវឯកសារនៃការវិនិច្ឆ័យក្បាលដី ក្នុងរយៈពេល១៥ថ្ងៃ និងការចុះប្រតិបត្តិសកម្មភាពអាទិភាពនៅទីវាលជាក់ស្តែង។

ក្រសួងបរិស្ថានបញ្ជាក់ថា “នេះគឺជាលទ្ធផលប្រវត្តិសាស្ត្រសម្រាប់កម្ពុជា ដែលរាជរដ្ឋាភិបាលបានគាំទ្រ និងជំរុញឱ្យមានការចុះបញ្ជីដីរដ្ឋ នៅក្នុងតំបន់ការពារធម្មជាតិជាលើកដំបូង ហើយក៏ឆ្លុះបញ្ចាំងអំពីការយកចិត្តទុកដាក់ និងការប្តេជ្ញាចិត្តខ្ពស់របស់រាជរដ្ឋាភិបាលលើការងារការពារ និងអភិរក្សធនធានធម្មជាតិនៅកម្ពុជាផងដែរ។

ក្រសួងបរិស្ថាន ដែលជាសេនាធិការរបស់រាជរដ្ឋាភិបាល ទទួលបន្ទុកគ្រប់គ្រងតំបន់ការពារធម្មជាតិ នឹងបន្តដកស្រង់មេរៀន និងបទពិសោធពីគម្រោងនេះ ដើម្បីកែសម្រួលនីតិវិធី និងជំរុញដំណើរការចុះបញ្ជីដីរដ្ឋ នៅក្នុងតំបន់ការពារធម្មជាតិដទៃទៀតនៅទូទាំងប្រទេស៕

ចំណេះដឹង! អ្វីជាយុទ្ធសាស្ត្រកៀរគរចំណូល ២០១៩-២០២៣?

ដោយ វុត្ថា

ភ្នំពេញ៖ រាជរដ្ឋាភិបាលកម្ពុជាកាលពីពេលថ្មីៗនេះ បានអនុម័តនិងដាក់ឱ្យអនុវត្តន៍យុទ្ធសាស្ត្រកៀរគរចំណូល ២០១៩-២០២៣ មានចក្ខុវិស័យប្រែក្លាយប្រព័ន្ធចំណូលរដ្ឋឱ្យមានលក្ខណៈទំនើបដែលអាចឆ្លើយតបទៅនឹងតម្រូវការអភិវឌ្ឍន៍ និងការវិវត្តនៃរចនាសម្ព័ន្ធសង្គម-សេដ្ឋកិច្ចជាតិ។

ក្នុងន័យនេះ យុទ្ធសាស្ត្រកៀរគរចំណូល នឹងក្លាយជាឧបករណ៍គោលនយោបាយមួយយ៉ាងសំខាន់ ក្នុងការកៀរគរចំណូលរដ្ឋប្រកបដោយប្រសិទ្ធភាព និងស័ក្តិសិទ្ធិភាពខ្ពស់ តាមរយៈការដាក់ចេញ្ចនូវគោលបំណង និងគោលដៅ ព្រមទាំងវិធានការមុតស្រេចនានាសម្រាប់អនុវត្តក្នុងរយៈពេល៥ឆ្នាំខាងមុខ។

យុទ្ធសាស្ត្រកៀរគរចំណូលនេះមានគោលបំណង ធ្វើទំនើបភាវូបនីយកម្មរដ្ឋបាលនិងគោលនយោបាយចំណូលសារពើពន្ធ និងមិនមែនសារពើពន្ធ ដើម្បីធានាការប្រមូលចំណូលប្រកបដោយប្រសិទ្ធភាព និងស័ក្តិសិទ្ធិភាពខ្ពស់ កែលម្អបរិយាកាសវិនិយោគនិងតម្រង់ទិសការវិនិយោគ ពង្រឹងភាពប្រកួតប្រជែង និងជំរុញការធ្វើពិពិធកម្មសេដ្ឋកិច្ចជាតិ។

ស្របនឹងគោលបំណងខាងលើ, យុទ្ធសាស្ត្រនេះមានគោលដៅដូចជា ទី១ ប្រមូលចំណូលចរន្តសរុប ឱ្យកើនបានយ៉ាងតិចបំផុត០,៣ ពិន្ទភាគរយនៃ ផ.ស.ស. ជាមធ្យមក្នុងមួយឆ្នាំ និងទី២ បង្កើនគុណភាពសេវា និងផលិតភាពក្នុងការផ្តល់សេវាគ្រប់ប្រភេទនៃរដ្ឋបាលប្រមូលចំណូលសារពើពន្ធ និងមិនមែនសារពើពន្ធ៕