ដោយវុត្ថា
ភ្នំពេញៈ បច្ចុប្បន្ននេះប្រទេសកម្ពុជា នៅតែមានកង្វះខាតលើភ្នាក់ងារជំនាញផ្តល់សេវាកម្មប្រកប ដោយវិជ្ជាជីវៈផ្នែកវិស័យអចលនទ្រព្យនៅឡើយ បើធៀបជាមួយនឹងចំនួនប្រជាពលរដ្ឋខ្មែរមានចំនួនច្រើន និងបើទោះវិស័យអចលនទ្រព្យនៅក្នុងប្រទេសកម្ពុជាមានការរីកចំនរើនយ៉ាងណាក្តី។
លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា នៅថ្ងៃទី៣១ ខែកក្កដា ឆ្នាំ២០២០នេះឱ្យដឹងថា បច្ចុប្បន្ននេះ មានអ្នកបំរើសេវាកម្មផ្នែកអចលនទ្រព្យប្រកប ដោយវិជ្ជាជីវៈជាផ្លូវការមានប្រមាណជាង៣០០០នាក់ ខណៈដែលអ្នកប្រើប្រាស់ សេវានេះមានប្រមាណ៧ពាន់នាក់ ក្នុងចំណោមដល់១៥.៥លាននាក់ នៅទូទាំងប្រទេស។
លោកថ្លែងថា “បើប្រៀបធៀបទៅនឹងចំនួនប្រជាពលរខ្មែរ នៅទូទាំងប្រទេសគឺនៅខ្វះច្រើនណាស់។ ដូច្នេះកម្ពុជាត្រូវការភ្នាក់ងារ ក្នុងការផ្តល់សេវាកម្មផ្នែកអចលនទ្រព្យនេះ កាន់តែច្រើនបន្ថែមទៀត ខណៈដែលវិស័យអចលនទ្រព្យនៅក្នុងប្រទេសមានការរីកចំរើនជាលំដាប់”។
លោកបន្ថែមទៀតថា “ដោយមើលឃើញពីចំណុចខ្វះខាតនេះ ហើយទើបសមាគម ក្នុងអាណត្តិរបស់លោកជាប្រធាន តែងតែបណ្តុះណ្តាលភ្នាក់ងារ ឱ្យមានជំនាញនិងវិជ្ជាជីវៈខ្ពស់ ក្នុងការប្រកបមុខរបរលើវិស័យអលចលនទ្រព្យ ដែលរហូតមកដល់ពេលនេះ មានចំនួនប្រមានជាង១៦០០នាក់”។
លោកបញ្ជាក់ទៀតថា ដើម្បីជំរុញឱ្យវិស័យអចលនទ្រព្យកាន់តែរីកចំរើន និងមានភ្នាក់ងារកាន់តែច្រើន សមគមគ្រោងនឹងបង្កើតសាលាមួយទៀត ដែលមានឈ្មោះថា Diploma of Real Estate ដើម្បីបណ្តុះជំនាញ និងវិជ្ជាជីវៈវិស័យអចលនទ្រព្យដំបូងគេនៅកម្ពុជា សម្រាប់ផលប្រយោជន៍សង្គម និងជាតិ៕
