ដោយវុត្ថា

ភ្នំពេញៈ អ្នកនាំពាក្យក្រសួងក្រសួងរៀបចំដែនដី នគរូបនីយកម្មនិងសំណង់ លោ​ក​សេង ឡូតបានអះអាងថា ក្នុងត្រីមាសទី១ ឆ្នាំ ២០២០ កន្លងកមកនេះ កម្ពុជានៅតែទទួ​លបានគម្រោងវិនិយោគ លើវិស័យសំណង់ជាហូហែ បើទោះបីកពិភពលោកកំពុងទទួលរងនូវផលប៉ះពាល់ ដោយសារសារការរីករាលដាលជាសកលនៃជំងឺ Covid- 19។

អ្នកនាំពាក្យរូបនេះបានបន្តថា គិតត្រឹមបំណាច់ត្រីមាសទី១ ឆ្នាំ២០២០នេះ សំណើរ នៃគម្រោងវិនិយោគលើវិស័យសំណង់ មិនទាន់រងផលប៉ះពាល់នោះទេ នៅតែមានកំណើន បើធៀបទៅនឹងរយៈពេលដូចគ្នានឹងឆ្នាំ២០១៩ កន្លងមកនេះ។

លោកបន្តថា “យើងនិយាយទៅហាក់បីដូចជាគេមិនជឿ តែសំណើរនៅតែមានការកើនឡើង។ នេះបើពិនិត្យទៅលើការស្នើសុំសាងសង់ តែយើងមិនទាន់បានទៅពិនិត្យជាក់ស្តែងនៃសាងសង់ថាយ៉ាងម៉េចនៅឡើយទេ”។ លោកបន្ថែមថា “គម្រោងដែលគេស្នើសុំសាងសង់ មានទាំងបុរី អគារខ្ពស់ លំនៅឋាន រោងចក្រ និងអាគារស្នាក់នៅរួមជាដើម ហើយបើពិនិត្យមើលជាក់ស្តែងគឺមានកំណើនខ្ពស់ បើធៀបទៅនឹងឆ្នាំ២០១៩ តែខ្ញុំមិនចាំភាគរយទេ តែមានកំណើនខ្ពស់”។

លោកសេង ឡូតបន្ថែមថា យើងមិនទាន់ដឹងថាទៅមុខទៀត វាយ៉ាងមិចនោះទេ តែយើងរង់់ចាំមើលទាំងអស់គ្នា។ តែលោកថាជារួមមិនថានៅតែស្រុកយើងនោះទេ នៅស្រុកគេក៏ទទួលរងនូវផលប៉ះពាល់អវិជ្ជមាន ពីបញ្ហាឆ្លងនៃជំងឺ Covid-19នេះដែរ ។ ចឹងទេ យើងរងចាំមើលស្ថានភាពនេះ ទាំងអស់គ្នាតទៅមុខទៀត។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់បង្ហាញថា តម្លៃទំហំទុនវិនិយោគវិស័យសំណង់ ទូទាំងប្រទេសនៅឆ្នាំ២០១៩ មានតម្លៃសរុបប្រមាណជាង១១ពាន់លានដុល្លារអាមេរិក ដោយបានកើនឡើងជាង៧៨ភារគរយ ធៀបនឹងរយៈពេលដូចគ្នាឆ្នាំ២០១៨។

របាយការណ៍ដដែលបន្តថា ការកើនឡើងនៃទំហំវិនិយោគ ក៏ដូចជាគម្រោងវិនិយោ​គលើវិស័យសំណង់ក្នុងឆ្នាំ២០១៩ ដោយសារតែមានគម្រោងសាងសង់ជាច្រើន រួមមានអគារពាណិជ្ជកម្មចម្រុះ សណ្ឋាគារ រមណីយដ្ឋាន ក្លឹបកម្សាន្ដ គម្រោងសាងសង់ផ្សារទំនើប អគារការិយាល័យ សំណង់អគារស្នាក់នៅរួមខ្ពស់ៗ សំណង់លំនៅដ្ឋានជាលក្ខណៈបុរី សំណង់អគាររោងចក្រឧស្សាហកម្មកាត់ដេរ និងស្បែកជើង និងគម្រោងអភិវឌ្ឍន៍តំបន់សេដ្ឋកិច្ចពិសេស៕

ដោយៈ រ៉ាណេត

ភ្នំពេញៈ អ្នកជំនាញបាននិយាយថា គិតចាប់ពីឆ្នាំ២០២០ ក្នុងរយៈពេល១០ឆ្នាំទៅមុខទៀត តម្រូវការលំនៅដ្ឋានសាងសង់ជាប់ដី នៅតែមានប្រជាប្រិយភាពក្នុងការវិនិយោគ និងអភិវឌ្ឍន៍ដើម្បីឆ្លើយតបទៅនឹងទីផ្សារក្នុងស្រុក ដែលកំពុងមានភាពខ្វះខាតនៅឡើយ។

អគ្គនាយក្រុមហ៊ុន PREMIUM Group លោកម៉ាន់ ចាន់ឌី ដែលជាអ្នកអភិវឌ្ឍន៍ក្នុងវិស័យលំនៅដ្ឋានផងដែរនោះ បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទ៦ ខែមេសាឆ្នាំ២០២០ថា គតចាប់ពីឆ្នាំនេះរហូតដល់១០ឆ្នាំ ឬលើសពីនេះតម្រូវការលំនៅដ្ឋានជាន់ដី នៅតែមានមានប្រជាប្រិយភាពខ្ពស់ ជាងលំនៅដ្ឋានសហកម្មសិទ្ធិ (ខុនដូ) ។

លោកបន្តថា “ប្រជាជនខ្មែរនៅតែមិនទាន់មានការផ្លាស់ប្ដូរផ្នត់គំនិត មានផ្ទះ មានដី នៅឡើយ ហើយវិសាលភាពនៃផ្ទៃដីសម្រាប់អភិវឌ្ឍន៍លំនៅដ្ឋាន ក៏មិនទាន់មានភាពចង្អៀតនោះដែរ”។លោកបន្តថា “ទំនោរទៅរកលំនៅដ្ឋានបែបសហកម្មសិទ្ធិ ដូចបណ្តាជិតខាងនោះគឺនៅរយៈពេលយូរទៀត”។

យើងមើលពីភាពជាក់ស្ដែង ដែលចេញពីកណ្តាលក្រុងបន្តិច គឺនៅមានដីទំនេរច្រើន និងមានតម្លៃសមរម្យនៅឡើយ ដែលសមស្របទៅនឹងការវិនិយោគ និងអភិវឌ្ឍន៍លំនៅដ្ឋានជាប់ដី ដែលជាតម្រូវការពិតរបស់អតិថិជនក្នុងស្រុក។

នៅក្នុងឱកាសជាមួយគ្នានេះ លោកបានបញ្ជាក់ពីចរន្តទីផ្សារនៃលកើលំនៅដ្ឋានផងដែរ ស្ថិតនៅក្នុងស្ថានភាពដែលកំពុងប្រឈមជាមួយ ជំងឺឆ្លងជាសាកល Covid-19 ការទិញ–លក់ លំនៅដ្ឋានហាក់មានការធ្លាក់ចុះបន្តិច ប៉ុន្តែមិនទាន់ដល់ចំណុចសូន្យនោះទេ ដោយឡែកសកម្មភាពនៃការសាងសង់គឺនៅតែបន្ត មិនរងផលប៉ះពាល់ធ្ងន់ធ្ងរនោះទេ ។

ក្រសួងរៀបចំដែនដី នគរូបនីយកម្ម និងសំណង់បានឱ្យដឹងថា កម្ពុជានៅត្រូវការលំនៅឋានជាង១លានខ្នងបន្ថែមទៀតក្នុងឆ្នាំ២០៣០។ ទន្ទឹមនឹងតម្រូវការលំនៅដ្ឋាននេះ អ្នកជំនាញផ្នែកអចលនទ្រព្យនៅកម្ពុជា បានលើកឡើងថា តម្រូវការទីស្នាក់អាស្រ័យដែលមានលក្ខណៈជាផ្ទះជាប់ដី នៅតែទាក់ទាញ និងមានតម្រូវការខ្ពស់ពីសំណាក់ទីផ្សារក្នុងស្រុក។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម ធ្លាប់បានមានប្រសាសន៍កាលពីពេលថ្មីៗនេះថា ការរីកលូតលាស់ផ្នែកសេដ្ឋកិច្ច រួមជាមួ​យនឹងការកើនឡើងនៃចំនួនប្រជាជនកម្ពុជា បានជំរុញឱ្យការអភិវឌ្ឍឧស្សាហកម្មអចលនទ្រព្យរបស់កម្ពុជាមានការកើនឡើង។ ជាក់ស្ដែងនៅក្នុងរយៈពេលជាង១ទសវត្សរ៍ចុងក្រោយនេះ វិស័យអចលនទ្រព្យរបស់កម្ពុជា ទទួលបានកំណើនយ៉ាងខ្លាំងជារៀងរាល់ឆ្នាំ ជាពិសេសនៅរាជធានីភ្នំពេញ និងនៅតំបន់ជាយក្រុងនានា។

លោកបន្តថា “តម្រូវការលំនៅឋានជាប់ដីនៅកម្ពុជា កំពុងមានកំណើនគួរឱ្យកត់សម្គាល់ ហេតុដូច្នេះហើយ ទើបអ្នកវិនិយោគក្នុងស្រុកបានសម្លឹងឃើញថា ទីផ្សារលំនៅឋានជាប់ដី ជាគោលដៅទាក់ទាញមួយពីសំណាក់ទីផ្សារក្នុងស្រុក ទើបអ្នកវិនិយោគវិស័យអចលនទ្រព្យ ជាពិសេសអ្នកអភិវឌ្ឍន៍តែម្ដង បានបោះទុនទៅលើវិស័យលំនៅឋានជាប់ដីនេះច្រើន”។ លោកបន្តថា “លំនៅដ្ឋានជាប់ដី ត្រូវបានគេអភិវឌ្ឍន៍ទៅកាន់តំបន់ជាយក្រុង ដោយសារតែតម្លៃដីធ្លីនៅកណ្ដាលក្រុងកាន់តែឡើងថ្លៃ ហើយគេទុកដីនៅកណ្ដាលក្រុងសម្រាប់អភិវឌ្ឍន៍ជាខុនដូ និងអគារខ្ពស់ៗ វាចំណេញជាង តែសម្រាប់អ្នកដែលចង់បានផ្ទះជាប់ដីនៅកណ្ដាលក្រុង ត្រូវចំណាយលុយច្រើន ដើម្បីទិញដី និងសាងសង់ដោយខ្លួនឯង ដូច្នេះ ពួកគេត្រូវផ្លាស់ប្តូរគោដៅទៅនៅតំបន់ជាយរាជធានី ”។

ក្រសួងរៀបចំដែនដី នគរូបនីយកម្ម និងសំណង់ បានបង្ហាញពីការព្យាករណ៍ថា សម្រាប់ឆ្នាំ២០៣០ កម្ពុជានឹងត្រូវការលំនៅដ្ឋាន នៅទូទាំងប្រទេសចំនួនជាង១លានខ្នង ខណៈក្នុង១ឆ្នាំៗ កម្ពុជាត្រូវការអភិវឌ្ឍលំនៅដ្ឋានប្រមាណជាង៥ម៉ឺនខ្នង ដែលក្នុងនោះសំណង់លំនៅដ្ឋានទូទៅប្រមាណ៤ម៉ឺនខ្នង និងលំនៅឋានក្នុងតម្លៃសមរម្យជាង៨ពាន់ខ្នង។

កាលពីឆ្នាំ២០១៩អ្នកអភិវឌ្ឍន៍សំណង់លំនៅដ្ឋាន បានស្នើសុំវិនិយោគលើសំណ​ង់លំនៅដ្ឋានមានចំនួន៧៣២គម្រោង ជាមួយតម្លៃទុនវិនិយោគជាង៦៦លានដុល្លារ  ស្មើនឹងជាង៣៨ពាន់ល្វែង។ ដោយឡែកសំណង់បុរីលំនៅដ្ឋាន និងបណ្ដុំលំនៅដ្ឋានមានលក្ខណៈជាបុរី នៅទូទាំងប្រទេសមានចំនួន៤០គម្រោង ស្មើនឹងជាង១៦ពាន់ខ្នង មានទុនប៉ាន់ស្មានប្រមាណជាង៨២១លានដុល្លារ ៕

ដោយ ៖ រ៉ាណេត

ភ្នំពេញ ៖ ទីផ្សារខុនដូនៅកម្ពុជា នៅពេលបច្ចុប្បន្ននេះ បើទោះជាកំពុងរងនូវភាពប្រឈមនឹងវិបត្តិជំងឺរលាកផ្លូវដង្ហើម Covid-19 ក៏ដោយ ប៉ុន្តែត្រូវបានអ្នកជំនាញអះអាងថានៅតែមានឱកាសវិនិយោគ និងទទួលបានផលចំណេញដដែល។

នាយិកាប្រចាំប្រទេសក្រុមហ៊ុនភ្នាក់ងារអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍កាលពីថ្ងៃចុងសប្ដាហ៍កន្លងទៅនេះថា វិស័យខុនដូនៅកម្ពុជាត្រូវបានអ្នកអភិវឌ្ឍន៍ធ្វើឡើងជា៣កម្រិតរួមមានកម្រិតខ្ពស់សម្រាប់បំពេញតម្រូវការទៅផ្សារមកពីក្រៅស្រុក(ទីផ្សារជនបរទេស) ខុនដូកម្រិតមធ្យម និងកម្រិតសមរម្យសម្រាប់បំពេញតម្រូវការទីផ្សារក្នុងស្រុកដែលជាជនជាតិខ្មែរ។

លោកស្រីបានមានប្រសាសន៍បន្តទៀតថា “បច្ចុប្បន្ននេះ សម្រាប់ទីផ្សារខុនដូកម្រិតខ្ពស់មួយចំនួនគឺទទួលរងនូវផលប៉ះពាល់ដោយ សារតែទីផ្សារគោលដៅភាគច្រើនជាជនជាតិបរទេសដែលកំពុងតែមានភាពប្រឈមខ្លាំងនឹងការវាយប្រហារដោយជំងឺឆ្លង Covid-19 ប៉ុន្តែសម្រាប់ទីផ្សារខុនដូតម្លៃមធ្យម និងតម្លៃសមរម្យ នៅតែមានបន្តមានទីផ្សារដែលជាតម្រូវការនៅក្នុងស្រុកជាជនជាតិខ្មែរ”។

លោកស្រីបានបញ្ជាក់ថា “យើងទទួលស្គាល់នៅក្នុងដំណាក់កាលនៃការវាយប្រហារដោយជំងឺឆ្លង Covid-19 ពិតជាបានធ្វើឱ្យប៉ះពាល់ដល់វិនិស័យអចលនទ្រព្យនៅក្នុងកម្ពុជាមួយចំណែក ប៉ុន្តែសម្រាប់ផ្នែកការវិនិយោគលើវិស័យខុនដូកម្រិតមធ្យម និងកម្រិតសមរម្យ គឺនៅតែមានឱកាសដដែល ខណៈដែលអ្នកអភិវឌ្ឍន៍បានបែងចែកទីផ្សារគោលដៅបានយ៉ាងច្បាស់ ជាពិសេសមានការយកចិត្តទកដាក់ទៅលើទីតាំងផងដែរ។ តំបន់ដែលស្ថិតនៅក្នុងគោលដៅវិនិយោគ និងអភិវឌ្ឍន៍គឺស្ថិតនៅជាយក្រុងដែលមានហេដ្ឋារចនាសម្ព័ន្ធល្អ ដូចជានៅក្នុងខណ្ឌជ្រោយចង្វារ ខណ្ឌសែនសុខ និងខណ្ឌមានជ័យជាដើម ដោយសារតែតម្លៃដីនៅមានកម្រិត និងងាយស្រួលក្នុងការចេញចូលក្រុង”។

អគ្គនាយកក្រុមហ៊ុនអចលនទ្រព្យ TOWN CITY Real Estate Co,.Ltd លោក វ៉ន ចាន់ថន បានមានប្រសាសន៍កាលពីពេលថ្មីៗនេះថា ផ្អែកតាមភាពជាក់ស្ដែង ទីផ្សារខុនដូនៅដើមឆ្នាំនេះ គឺមានការធ្លាក់ចុះបន្តិច ដោយកសារតែវិបត្តិជំងឺ Covid-19 ប៉ុន្តែវានឹងត្រឡប់មករកភាពល្អប្រសើរឡើងវិញ បន្ទាប់ពីបញ្ហាមួយនេះត្រូវបានស្ងប់ស្ងាត់ទៅវិញ។

លោកបានបញ្ជាក់ថា ការលក់ខុនដូគឺមានកើនឡើងខ្លាំងកាលពីចុងឆ្នាំ២០១៩ ប៉ុន្តែវាបានធ្លាក់ចុះបន្តិចនៅដើមឆ្នាំ២០២០នេះ ដោយសារវិបត្តិសាកលដែលកំពុងតែកើតមាន ប៉ុន្តែវានៅមិនទាន់ធ្លាក់ចុះដល់កម្រិតព្រួយបារម្ភនោះទេ។ តាមការកត់សម្គាល់របស់ខ្ញុំ ខុនដូដែលមានតម្រូវការ និងងាយស្រួលលក់ គឺមានទីតាំងនៅប៉ែកខាងត្បូងក្រុង ដោយសារតែតំបន់នេះតម្លៃដីនៅមានកម្រិត ហើយមានហេដ្ឋារចនាសម្ព័ន្ធល្អ ជាពិសេសមានមហាវិថី ៦០ម៉ែត្រ ៥០ម៉ែត្រ និង៣០ម៉ែត្រ ហើយនៅជិតក្រុង ដែលជាតំបន់ពួកគាត់បម្រើការងារ ក៏ដូចជាសាលារៀនរបស់កូនៗរបស់គាត់”។

ខុនដូដែលត្រូវបានចាត់ទុកថាប្រភេទសមរម្យ គឺមានតម្លៃប្រមាណ១២០០ដុល្លារ។ ដោយឡែកខុនដូតម្លៃមធ្យមឬតម្លៃកណ្តាល គឺមានតម្លៃប្រមាណចាប់ពី១៥០០ដុល្លារឡើងទៅ ក្នុងមួយម៉ែត្រការ៉េហើយចំពោះប្រភេទខុនដូតម្លៃខ្ពស់គឺមានតម្លៃចាប់ពីប្រមាណ២៥០០ដុល្លារ ក្នុងមួយម៉ែត្រការ៉េឡើងទៅ និងស្ថិតនៅជាន់ខ្ពស់ៗ៕