ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយកដ្ឋមន្ត្រីនៃកម្ពុជា បានប្រកាសផ្អាកប្រារព្វពិធីបុណ្យចូលឆ្នាំខ្មែរ នាពេលខាងមុខនេះ ហើយអនុញ្ញាតឱ្យពលរដ្ឋធ្វើការធម្មតា ទាំងវិស័យរដ្ឋ និងឯកជន ដើម្បីបង្ការទប់ស្កាត់ការរីករាលដាលនៃជំងឺ Covid-19 នៅក្នុងប្រទស។

សម្តេចតេជោ ហ៊ុន សែន នៅក្នុងសន្នីសីទកាសែតពាក់ព័ន្ធជំងឺ Covid-19 នៅកម្ពុជា នៅថ្ងៃទី ៧ ខែមីនា ឆ្នាំ ២០២០ នេះ បានស្នើដល់ពលរដ្ឋខ្មែរគ្រប់រូប មេត្តាយោគយល់ចំពោះការផ្អាកពិពីបុណ្យចូលឆ្នាំខ្មែរ ខាងមុនេះ ហើយនឹងលើកពេលទៅធ្វើថ្ងៃសមស្របណាមួយនៅថ្ងៃក្រោយបន្ទាប់ពីបញ្ចប់ការរីករាលដាលនៃជំងឺ Covid-19។

សម្តេតេជោបន្តថា “បើប្រកាសអោយឈប់ ហើយមិនអោយទៅស្រុកកំណើន ចឹងអោយឈប់ធ្វើអី ដូច្នេះ មានតែធ្វើការធម្មតាទាំងវិស័យរដ្ឋ និងឯកជន”។ សម្តេចតេជោ ហ៊ុន សែន ថា “ថវិកាឧបត្ថម្ភដល់មន្ត្រីរាជការ មិនត្រូវបានដកមកវិញ និង អំពាវឱ្យកម្មករកម្មារិនី ធ្វើការធម្មតាដើម្បីទទួលបានបៀវត្ស” ៕

ដោយវុត្ថា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបញ្ជាឱ្យលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ឱ្យផ្អាកជើងហោះហើរមួយគ្រឿងដែលដឹកពលរដ្ឋខ្មែរចំនួន ១៥០រូបមកពីម៉ាឡេស៊ី និងមកដឹកពលរដ្ឋខ្លួនត្រឡប់ទៅវិញដែលជាប់នៅក្នុងប្រទេសកម្ពុជា។

សម្តេចតេជោ ហ៊ុន សែន នៅក្នុងសន្និសីទព័ត៌មានពិសេសមួយ ពាក់ព័ន្ធបច្ចុប្បន្នភាពនៃជំងឺកូវីដ១៩ នៅកម្ពុជានៅថ្ងៃទី៧ ខែមេសា ឆ្នាំ២០២០នេះឱ្យដឹងថា សម្តេចតេជោសម្រានមិនលក់បន្ទាប់ពីទទួលបានព័ត៌មាន ពីលោក ម៉ម ប៊ុន ហេង រដ្ឋមន្ត្រីក្រសួងសុខាភិបាលថាមានយន្តហោះម៉ាឡេស៊ីមួយគ្រឿងដឹកពលរដ្ឋខ្មែរចំនួន ១៥០ នាក់ មកពីម៉ាឡេស៊ី មកាន់កម្ពុជានៅព្រឹកនេះ ហើយដឹកពលរដ្ឋដែលជាប់គាំងនៅក្នុងប្រទេសកម្ពុជាត្រឡប់ទៅវិញ។

ភ្លាមៗនោះ សម្តេចតេជោ បានប្រាប់ទៅលោកឧបនយកដ្ឋមន្ត្រីប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិឱ្យមានការផ្អាកការហោះហើរមកកាន់កម្ពុជាជាបន្ទាន់ បើមានការហោះហើរ ត្រូវតែមានយន្តហោះទទេ តែត្រូវមានលាយលក្ខឱ្យបានត្រឹមត្រូវ តែមិនចឹងទេ មកដល់កម្ពុជាភ្លាម និងចាក់សំាងយន្តហោះរួចហើយឱ្យត្រឡប់ទៅវិញ។

សម្តេចតេជោបានអំពាវនាវដល់ពលរដ្ឋកម្ពុជាដែលកំពុងនៅក្នុងប្រទេសម៉ាឡេស៊ីដែលមានបំណងមកកាន់ប្រទេសកម្ពុជាក្នុងកាលៈទេសនេះ សុំស្នាក់នៅទីនោះមួយរយៈសិន ដើម្បីបង្ការ និងទប់ស្កាត់ការរីករាលដាលនៃជំងឺ Covid-19 នៅក្នុងប្រទេសកម្ពជា និងសូមមានការយោគយល់ចំពោះបញ្ហានេះ ដោយសារកន្លងមកនេះមានពលរដ្ឋខ្មែរមួយបានឆ្លងបន្ទាប់ពីត្រឡប់មកពីប្រទេសម៉ាឡេស៊ីផងដែរ។

សម្តេចតេជោ ហ៊ុន សែន បញ្ជាក់ថា តាមការពិតការរកឃើញអ្នកឆ្លងជំងឺ Covid-19 នៅក្នុងប្រទេសកម្ពុជា នាពេលនេះ គឺដោយសារមានការនាំចូលពីខាងក្រៅប៉ុណ្ណោះ មិនទាន់មានការឆ្លងនៅក្នុងសហគមន៍នោះទេ ក្នុងន័យនេះ ក៏យើមិនបណ្តែតបណ្តោយផងដែរ៕

ដោយ ប៊ី

ភ្នំពេញៈ គណៈកម្មការជាតិប្រយុទ្ធប្រឆាំងនឹងជំងឺCOVID-19 បានទទួលថវិកាប្រមាណ១០លានដុល្លារហើយ ដែលបានមកពីសប្បុរសជនចូលរួមបរិច្ចាគ បូករួមទាំងថវិកាបៀវត្សរ៍ ដែលចូលរួមដោយមន្រ្តីរាជការ ដើម្បីត្រៀមសម្រាប់យកទៅជួយប្រជាពល រដ្ឋក្នុងស្ថានការណ៍ ដែលកម្ពុជាកំពុងប្រយុទ្ធប្រឆាំងជំងឺ COVID-19។

តបតាមការអំពាវនាវរបស់ សម្តេចតេជោ ហ៊ុន សែន នាយករដ្ឋមន្រ្តីកម្ពុជា ក្នុងការរៃអង្គាសមូលនិធិសម្រាប់ប្រយុទ្ធប្រឆាំងជំងឺឆ្លងCOVID-19 កាលពីថ្ងៃទី៤ មេសា កន្លងទៅនេះ គណៈកម្មការជាតិប្រយុទ្ធប្រឆាំងនឹងជំងឺCOVID-19 បានទទួលថវិកាប្រមាណជាង១០លានដុល្លារហើយ ដែលបានមកពីសប្បុរសជនចូលរួមបរិច្ចាគផង និងបូករួមទាំងថវិកាបៀវត្សរ៍ដែលចូលរួមដោយមន្រ្តីរាជការយើងផង។

សម្តេចតេជោបានបញ្ជាក់ថា “យើងត្រៀមថវិកានេះ សម្រាប់យកទៅជួយប្រជាពល​រដ្ឋក្នុងស្ថានការណ៍ ដែលកម្ពុជាកំពុងប្រយុទ្ធប្រឆាំងជំងឺCovid-19 ដូចជាទិញម៉ាស និងសម្ភារៈបរិក្ខាររបស់គ្រូពេទ្យ ទិញអាល់កុល និងត្រៀមបម្រុងសម្រាប់ជួយប្រជាពលរដ្ឋទៅតាមតម្រូវការជាក់ស្តែង និងចាំបាច់បន្ទាន់”។

ទន្ទឹមនឹងនោះដែរ សម្តេចតេជោនាយករដ្ឋមន្រ្តីបានបញ្ជាក់ថា “កម្ពុជាពេលនេះ គឺកំពុងបញ្ចេញកម្លាំង ខិតខំធ្វើការងារ ដើម្បីជាផលប្រយោជន៍របស់ប្រជាពលរដ្ឋយើង”។សម្តេចបន្តថា “កុំទុកឲ្យប្រជាពលរដ្ឋណាម្នាក់ស្លាប់ ដោយយើងមិនបានដឹងហើយមិនបានដោះស្រាយ”។

សម្តេចបន្ថែមថា មិនមែនគ្រាន់តែបញ្ហាCovid-19ទេ ក៏ប៉ុន្តែយើងត្រូវពិនិត្យមើលប្រជាពលរដ្ឋយើងដែលខ្វះខាតស្បៀង គឺត្រូវផ្តល់ស្បៀងអាហារឲ្យពួកគាត់បានជាបន្ទាន់ឆាប់បំផុត។ កុំអោយពួកគាត់ខ្វះស្បៀងអាហារអោយសោះ ក្នុងពេលដែលសភាពការណ៍មានការប្រែប្រួលពីក្រៅប្រទេស និងពីក្នុងប្រទេស គឺត្រូវគ្រប់គ្រងអ្វីៗដែលមានក្នុងប្រទេសរបស់យើង ហើយត្រូវចាត់ចែងនូវធនធានទាំងអស់ ដែលមានក្នុងប្រទេសរបស់យើងសម្រាប់ជួយនឹងបម្រើ ប្រជាពលរដ្ឋរបស់យើងអោយបានទាន់ពេល។

សម្តេចបានអរគុណដល់សប្បុរជនទាំងក្នុង និងក្រៅប្រទេស ព្រមទាំងមន្រ្តីរាជការទាំងអស់ ដែលបានចែករំលែកបរិច្ចាគប្រាក់ខែផ្ទាល់ខ្លួន ចូលរួមក្នុងការប្រយុទ្ធប្រឆាំងនឹងជំងឺឆ្លងCovid-19 ។ សូមជូនពរបងប្អូនទាំងអស់ជួបតែសំណាងល្អគ្រប់ៗគ្នា៕

ដោយ ហ្សូលី

សៀមរាបៈ ផ្លូវសម្រាប់ជិះកង់ស្ថិតនៅក្នុងតំបន់ប្រាសាទអង្គរវត្ត បានស្ថាបនាក្នុងលទ្ធផលប្រមាណ៦០ភាគរយហើយ បើទោះបីជាកម្ពុជាកំពុងប្រឈមនឹងវិបត្តិជំងឺCovid-19 ក៏ដោយ។ នេះបើតាមឱ្យដឹងពីមន្ត្រីអាជ្ញាធរជាតិអប្សរា នៅថ្ងៃទី៦ មេសា ឆ្នាំ ២០២០នេះ។

មន្រ្តីអាជ្ញាធរជាតិអប្សរាបានអោយដឹងថា ផ្លូវជិះកង់នេះ ជាសមិទ្ទផលថ្មីសំរាប់ភ្ញៀវទេសចរជិះកង់កំសាន្ត និងផ្ដល់ភាពងាយស្រួលដល់ប្រជាពលរដ្ឋ សិស្សានុសិស្សធ្វើដំនើរ ពិសេសលើកកម្ពស់សោភ័ណ្ឌភាពរមណីដ្ឋានអង្គរ។ ផ្លូវនេះមានប្រវែងសរុប២៣,២គីឡូម៉ែត្រ គឺនៅជុំវិញតំបន់អង្គរជាផ្លូវទ្វេទិស មានទទឹង២ម៉ែត្រដោយអាចធ្វើដំណើរប  ញ្ជ្រាស់គ្នាបាន និងមានចង្អូររំដោះទឹកសងខាង។

អ្នកនាំពាក្យ និងជាប្រធាននាយកដ្ឋានអាជ្ញាធរជាតិអប្សរា លោក ឡុង កុសល បានមានប្រសាសន៍ឲ្យដឹងថា ការស្ថាបនាផ្លូវកង់នេះ អាជ្ញាធរជាតិអប្សរាបានគិតគូរជាចម្បង លើការអភិរក្សបុរាណដ្ឋាន ដោយគ្មានការជីកកាយដីជ្រៅ និងប្រើជើងតាងអំពីបេតុង ត្រង់កន្លែងមានស្ពានឡើយ ដោយគិតដល់បរិស្ថាន និងទេសភាពវប្បធម៌ ពិសេសបញ្ចៀ​សផលប៉ះពាល់ដល់ព្រៃឈើដែលមានស្រាប់។

លោកបន្តថា “អាជ្ញាធរជាតិអប្សរា បានគិតដល់សុវត្ថិភាពត្រង់ចំណុចឆ្លងកាត់ និងផ្លូវបំបែក ដោយបានរៀបចំរបាំងផ្លូវបំបែក និងដាក់ស្លាកសញ្ញាហាមឃាត់ម៉ូតូឆ្លងកាត់”។ លោកបន្តថា “មកដល់ពេលនេះអាជ្ញាធរជាតិអប្សរា កំពុងតែពន្លឿននៅការសាងសងផ្លូវកង់នេះ ដោយបានចាក់ដី និងឈូសឆាយដីសំរេចបានជិត៦០ភាគរយហើយ ដើម្បីធ្វើយ៉ាងណាសម្រួលចរាចរណ៍ដល់ទេសចរជិះកង់ ជាពិសេសកាត់បន្ថយការកកស្ទះ និងគ្រោះថ្នាក់ចរាចរណ៍លើផ្លូវធំផងដែរ”។

ដូចនេះកិច្ចការងារនៅក្នុងពេលបច្ចុប្បន្ន គឺត្រូវសម្រុកក្នុងការបង្ហាប់ដី ផ្ទៃខាងលើនៃផ្លូវកង់ អោយមានសុវត្តិភាពល្អប្រសើរក្នុងការជិះ។

ផ្លូវជិះកង់នេះ មានភាពបត់បែនតាមធម្មជាតិ និងបត់បែនតាមដើមឈើតូចធំ ចាប់ពីចំណុចផ្លូវលំក្បែរកន្លែងត្រួតពិនិត្យសំបុត្រចាស់ លើផ្លូវហ្សាលដឺហ្គោល កាត់តាមក្រោ​យអង្គរវត្ត កាត់តាមប្រាសាទក្រវ៉ាត់ ឆ្ពោះទៅខាងកើតប្រាសាទបន្ទាយក្ដី កាត់តាមប្រាសា​ទតាព្រហ្ម រហូតដល់ស្ពានប្រាសាទតាកែវ។

ចំណែកផ្លូវកង់វង់ធំវិញផ្តើមពីស្រះស្រង់ កាត់តាមប្រាសាទប្រែរូប រហូតដល់ខ្លោង​ទ្វារដីឆ្នាំង ដោយភាគច្រើននៅក្នុងព្រៃ។ ហើយផ្លូវកង់នេះគឺមិនអនុញ្ញាតអោយឡាន ឬម៉ូតូ ឆ្លងកាត់បានឡើយ៕