ដោយៈ រ៉ាណេត

ភ្នំពេញៈ បន្ទាប់ពីទទួលបានការណែនាំ ពីសំណាក់ប្រមុខរាជរដ្ឋាភិបាល សម្ដេចតេ ហ៊ុន សែន នាយករដ្ឋមន្ត្រីកម្ពុជា សមាគមរោងចក្រកាត់ដេរនៅកម្ពុជា បានអំពាវនាវដល់បណ្តាសមាជិករបស់ខ្លួនទាំងអស់ ត្រូវអនុវត្តនូវកាតព្វកិច្ច ដូចដែលមានចែងនៅក្នុងច្បាប់ស្ដីពីការងារឱ្យបានខ្ជាប់ខ្ជួន។

ក្រោយការប្រកាសរបស់រាជរដ្ឋាភិបាលកម្ពុជា នៅត្រឹមល្ងាចថ្ងៃទី៧ ខែមេសា ឆ្នាំ២០២០នេះ សមាគមរោងចក្រកាត់ដេរនៅកម្ពុជា ហៅកាត់ GMAC បានធ្វើការអំពាវនាវតាមរយៈគណនីផ្លូវការណ៍របស់ខ្លួន ចំពោះរោងចក្រសហគ្រាស ដែលព្យួរសង្វាក់ផលិត​កម្ម ឬការងារជាបណ្តោះអាសន្ន ដោយបានលើកយកគោលការណ៍ ផ្តល់ប្រាក់ឧបត្ថម្ភសង្គមចំនួន៧០ដុល្លារ សម្រាប់កម្មករនិយោជិតមួយនាក់មកបញ្ជាក់ផងដែរ។ 

ដោយឡែករោងចក្រសហគ្រាស ដែលនៅបន្តដំណើការ ឬមិនមានការព្យួរសង្វាក់ផលិតកម្ម ឬការងារជាបណ្តោះអាសន្ន ត្រូវអនុវត្តន៍កាតព្វកិច្ចដូចដែលមានចែងនៅក្នុងច្បាប់ស្តីពីការងារដដែល។ ជាមួយគ្នានេះ សមាជិករបស់សមាគមទាំងអស់ ត្រូវរង់ចាំសេចក្តីណែនាំលំអិតរបស់ក្រសួងការងារ និងបណ្តុះបណ្តាលវិជ្ជាជីវៈ ដែលនឹងចេញនៅក្នុងពេលឆាប់ៗនេះ។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍បញ្ជាក់នៅក្នុងសន្នីសីទសារព័ត៌មានពាក់ព័ន្ធនឹងជំងឺ Covid-19 កាលពីព្រឹកថ្ងៃទី៧ ខែមេសា ឆ្នាំ២០២០ នេះថា រដ្ឋាភិបាលកម្ពុជា និងផ្តល់ថវិកាបដិភាគប្រមាណ៤០ដុល្លារអាមេរិក និងរោងចក្រសហគ្រាស៣០ដុល្លារអាមេរិក សរុប៧០ដុល្លារអាមេរិកដល់កម្មករ ដោយមិនបាច់ចូលរួមវគ្គបណ្តុះបណ្តាលជំនាញវិជ្ជាជីវៈ និងមិនមកធ្វើការនោះទេ៕

ដោយវុត្ថា

ភ្នំពេញៈ សម្ដេចតេជោហ៊ុន សែន នាយករដ្ឋមន្ត្រីនៃកម្ពុជា សម្រេចកាត់បន្ថយថវិ​កា​ពីស្ថាប័នរដ្ឋប្រមាណ៩១៨លានដុល្លារអាមេរិក សម្រាប់ត្រៀមបម្រុងទុក ដើម្បីប្រយុទ្ធប្រឆាំនឹងជំងឺCovid-19 ខណៈដែលកម្ពុជាបាននឹងកំពុងប្រយុទ្ធឆាំង ស្របពេលដែលប្រ​ទេ​សនៅក្នុងពិភពលោក មិនទាន់បានប្រកាសពីការរកឃើញថ្នាំព្យាបាលនៅឡើយ។

សម្ដេចតេជោ ហ៊ុន សែន នៅក្នុងសន្និសីទសារព័ត៌មាននៅថ្ងៃទី៧ ខែមេសា ឆ្នាំ ២០២០នេះឱ្យដឹងថា រាជរដ្ឋាភិបាលត្រូវបង្ខំចិត្តកាត់បន្ថយការចំណាយពីរដង លើកទី១កាត់បន្ថយការចំណាយចំនួន៤៤៣លានដុល្លារអាមេរិក និងលើកទី២ កាត់បន្ថយការចំណាយចំនួន៤៧៥លានដុល្លារអាមេរិក ដែលសរុបទាំងពីរលើកនេះមានចំនួន៩១៨លានដុល្លារអាមេរិកសម្រាប់ត្រៀមបម្រុងទុក ដើម្បីប្រយុទ្ធប្រឆាំនិងជំងឺ Covid-19។

សម្ដេចតេជោថ្លែងថា “មកដល់ពេលនេះ ចំពោះស្តុកបម្រុងយុទ្ធសាស្ត្ររបស់រដ្ឋាភិបាល ដើម្បីប្រយុទ្ធប្រឆាំនឹង ជំងឺCovid-19 គឺបង្កើតឱ្យមានស្តុកពីរ ទី១ ស្តុករបស់ក្រសួងសុខាភិបាល ដែលត្រូវដកយកចំណាយជាប្រចាំទៅឱ្យតាមមន្ទីរពេទ្យ ដូច្នេះត្រូវបង្កើតស្តុកមួយដោយឡែកទៀត នោះគឺស្តុករបស់រាជរដ្ឋាភិបាល”។

សម្ដេចតេជោបន្តថា  កម្ពុជាកំពុងស្ថិតក្នុងដំណាក់កាល នៃសង្គ្រាមប្រឆាំងនឹងជំងឺCovid-19 ដែលជាជំងឺរីករាលដាលជាសកល ហើយដែលមកដល់ពេលនេះ សង្គ្រាមមួយនេះ ស្ថិតក្នុងស្ថានភាពទប់ទល់តែប៉ុណ្ណោះ។ គ្មានទេពាក្យដែលហៅថាវាយលុក ព្រោះយើងមិនដឹងថា សត្រូវពិតប្រាកដវានៅទីណានោះទេ ខុសគ្នាជាមួយនឹងផ្នែកយោធាដែលមានការវាយទប់ទល់ផង ឬការវាយលុក និងមានការដកថយ។

សម្ដេចតេជោបន្ដថា  “សម្រាប់យើងគ្មានទេពាក្យវាយលុក ហើយក៏គ្មានដែរពាក្យដែលថា ឈ្នះទៅលើសង្គ្រាមមហន្តរាយបែបនេះ គ្មានទេពាក្យដែលថាចំណេញ មានតែខាត គ្រាន់តែថាខាតតិចឬខាតច្រើនតែប៉ុណ្ណោះ”។ សម្ដេចសង្កត់ធ្ងន់ថា  “នេះជាចំណុចដែលយើងត្រូវដឹងជាមុន អំពីនិយមន័យនៃសង្គ្រាមប្រឆាំងនឹងជំងឺCovid-19 ។

ដូច្នេះសង្គ្រាមប្រឆាំងនឹងCovid-19នេះ យើងត្រូវដាក់ទៅក្នុងក្របខ័ណ្ឌយុទ្ធសា ស្ត្ររយៈពេលវែង ព្រោះជំងឺឆ្លងនេះមិនទាន់ឃើញសញ្ញាថមថយចុះនៅឡើយទេ ហើយក៏មិនទាន់មានថ្នាំព្យាបាលដែរ។

សម្ដេចតេជោហ៊ុន សែនបានបន្ថែមថា “ឥឡូវនេះយើងកំពុងបន្តប្រយុទ្ធនិងលើមុខព្រួញបី ក្នុងពេលតែមួយ ជាមួយនឹងសង្គ្រាមប្រឆាំងនឹងជំងឺCovid-19 ទី១ ប្រយុទ្ធនឹងការឆ្លងចូលមកពីខាងក្រៅ ទី២ទប់ស្កាត់អ្នកឆ្លងជំងឺទៅកាន់មនុស្សដទៃ និងទី៣ ខិតខំព្យា​បាលអ្នកឆ្លងជំងឺឱ្យជាសះស្បើយ”។

ស្ថានភាពជំងឺCovid-19 នៅទូទាំងប្រទេសកម្ពុជា គិតត្រឹមថ្ងៃទី៧ ខែមេសា ឆ្នាំ២០២០ រួមមាន អ្នកព្យាបាលជាសះស្បើយសរុបកើនដល់៥៨នាក់ អ្នកកំពុងសម្រាកព្យាបាល បានថយចុះមកនៅសរុប៥៧នាក់ អ្នកមានវីរុសCovid-19 ដែលបានរកឃើញនៅទូទាំងប្រទេសមានចំនួន១១៥នាក់៕

ដោយ ហ្សូលី

ចិន៖ សម្ភារៈវេជ្ជសាស្រ្តរបស់ប្រទេសចិនបានធ្វើការនាំចេញទៅកាន់ពីភពលោកដែលបានធ្វើឱ្យកំណើននៃការឡើងចេញមានទឹកប្រាក់ប្រមាណជា ១០ពាន់លានយ័ន ឬស្មើនឹងជាង ១,៤ពាន់លានដុល្លារ។

សម្ភារៈវេជ្ជសាស្រ្តនេះសម្រាប់យកទៅប្រយុទ្ធប្រឆាំងនៃវីរុសឆ្លងCovid-19 ដែលក្នុងនោះមានដូចជា ម៉ាសចំនួនជិត ៤ពាន់លាន សម្លៀកបំពាក់ការពារមេរោគចំនួនជិត ៣៨លានកំប្លេ ប្រដាប់ស្ទង់ឬម៉ាស៊ីនវាស់កម្តៅចំនួន ២,៤១ គ្រឿង។ លើសពីនេះក៏មានសម្ភារៈផ្សេងទៀតដូចជា បំពង់ខ្យល់ ឧបករណ៍ធ្វើតេស្ត និង វ៉ែនតាការពារផងដែរ។ នេះបើតាមការលើកឡើងរបស់មន្ត្រីរដ្ឋបាលគយ លោក ជីន ហាយ កាលពីសប្តាហ៍មុន។

មន្ត្រីក្រសួងពាណិជ្ជកម្មលោក Jiang fan បាននិយាយថា «លំហូរនៃការផ្គត់ផ្គង់វេជ្ជសាស្រ្តរបស់ប្រទេសចិន គឺជាជំនួយដ៏ស្មោះត្រង់ដែលផ្តល់ឱ្យប្រទេសដទៃទៀតនៅពេលដែលត្រូវប្រយុទ្ធប្រឆាំងនឹងការរាតត្បាត។ ហើយនេះគឺជាសកម្មភាពគួរឱ្យចងចាំមួយ។»

លោកបានបន្តថា ប្រទេសចិនតែងតែយកចិត្តទុកដាក់ខ្ពស់ចំពោះគុណភាពនិងសុវត្ថិភាពនៃការនាំចេញគ្រឿងផ្គត់ផ្គង់វេជ្ជសាស្ត្រ និងអនុវត្តការគ្រប់គ្រងយ៉ាងតឹងរឹងលើផលិតផលដែលពាក់ព័ន្ធ។

ក្នុងការពង្រឹងការត្រួតពិនិត្យគុណភាពគយនឹងមានតែការនាំចេញវេជ្ជសាស្រ្តផ្អែកលើវិញ្ញាបនប័ត្រនៃការចុះឈ្មោះដែលត្រូវបានអនុម័តដោយរដ្ឋបាលផលិតផលវេជ្ជសាស្រ្ត និងឯកសារដើម្បីបញ្ជាក់ថាពួកគេបំពេញតាមស្តង់ដារត្រួតពិនិត្យគុណភាពនៃទិសដៅនាំចេញរៀងៗខ្លួន។

លោក Jiang បានស្នើឱ្យអ្នកទិញផលិតផលវេជ្ជសាស្ត្រនៅក្រៅប្រទេសទិញពីអ្នកផ្គត់ផ្គង់ដែលផលិតផលរបស់ពួកគេត្រូវបានចុះបញ្ជីជាមួយនិយ័តករចិនហើយបញ្ជាក់ពីគុណភាពផលិតផលមុនពេលប្រើប្រាស់និងត្រូវអនុវត្តតាមនីតិវិធីប្រតិបតិ្តការនិងវិសាលភាពនៃការប្រើប្រាស់។

មន្រ្តីរូបនេះបានបន្ថែមថា ប្រទេសចិនមានឆន្ទៈធ្វើការជាមួយសហគមន៍អន្តរជាតិដើម្បីបង្កើតបរិយាកាសល្អសម្រាប់ការនាំចេញការផ្គត់ផ្គង់ផ្នែកវេជ្ជសាស្រ្តនិងគាំទ្រដល់ការប្រយុទ្ធជាសកលប្រឆាំងនឹងជំងឺរាតត្បាតដែលមានឈ្មោះថា COVID-19៕

ដោយ ហ្សូលី

តូក្យូ៖ ប្រទេសជប៉ុនបានប្រកាសអាសន្នរយៈពេល ១ខែ និងបានត្រៀមគម្រោងថវិកាប្រមាណ ១ទ្រីលានដុល្លារដើម្បីជម្រុ្ដល់សេដ្ចកិច្ចក្នុងប្រទេស។ នេះបើតាមការលើកឡើងរបស់នាយករដ្ឋមន្ត្រីជប៉ុន លោក Shizo Abe នៅថ្ងៃអង្គារ ទី ០៧ មេសា ឆ្នាំ ២០២០នេះ។

ប្រទេសជប៉ុនបានប្រកាសដាក់ប្រទេសក្នុងកម្រិតប្រកាសអាសន្ន ដោយសារតែការផ្ទុះឡើងនៃចំនួនអ្នកឆ្លងមេរោក Covid-19 ក្នុងរយៈពេល ១ខែ បន្ទាប់ពីទទួលបានភ្លើងខៀវពីអ្នកជំនាញ។

គណៈរដ្ឋមន្រ្តីរបស់លោក Abe បានសម្រេចកញ្ចប់ជំរុញសេដ្ឋកិច្ចដ៏ធំមួយដែលមានតម្លៃ ១០៨ លានលានយ៉េន (៩៩០ ពាន់លានដុល្លារ) ដែលស្មើនឹង ២០ ភាគរយនៃផលិតផលសេដ្ឋកិច្ចរបស់ប្រទេសជប៉ុនដើម្បីទប់ស្កាត់ផលប៉ះពាល់ធ្ងន់ធ្ងរនៃជំងឺរាតត្បាតទៅលើប្រទេសដែលមានសេដ្ឋកិច្ចធំលំដាប់ទី ៣ នៅលើពិភពលោកមួយនេះ។

ចំនួននេះលើសពី ១១ ភាគរយនៃទិន្នផលសម្រាប់កញ្ចប់ជំរុញសេដ្ឋកិច្ចសហរដ្ឋអាមេរិកដែលបានដាក់ចេញដោយប្រធានាធិបតីដូណាល់ត្រាំនិង ៥ ភាគរយសម្រាប់ផលិតផលរបស់អាល្លឺម៉ង់។
លោកអាបេបាននិយាយថា ការចំណាយថវិកាផ្ទាល់នឹងមានចំនួន ៧ ភាគរយនៃសេដ្ឋកិច្ច ពោលគឺច្រើនជាងពីរដងនៃចំនួនទឹកប្រាក់ដែលប្រទេសជប៉ុនបានចំណាយបន្ទាប់ពីការដួលរលំនៃ Lehman Brothers កាលពីឆ្នាំ ២០០៨ ។

លោកអាបេបានប្រាប់សមាជិកសភាដែលកំពុងកាន់អំណាចនិងគណបក្សប្រឆាំងថា“ កញ្ចប់ជំរុញសេដ្ឋកិច្ចនឹងស្ថិតក្នុងចំណោមកញ្ចប់ធំបំផុតនៅលើពិភពលោក” ។ លោកបន្ថែមថា អាទិភាពរបស់រដ្ឋាភិបាលគឺដើម្បីការពារអាយុជីវិតនិងសុខភាពប្រជាជន។

លោកបានប្រាប់សភាថា “យើងបានសម្រេចចិត្តប្រកាសភាពអាសន្នព្រោះយើងបានវិនិច្ឆ័យថាការរីករាលដាលនៃមេរោគឆ្លងនៅទូទាំងប្រទេសឆាប់រហ័សនឹងជះឥទ្ធិពលយ៉ាងខ្លាំងដល់អាយុជីវិតនិងសេដ្ឋកិច្ច” ។

ការឆ្លងថ្មីៗកើនឡើងឥតឈប់ឈរនៅទីក្រុងតូក្យូអូសាកានិងតំបន់ផ្សេងទៀតបាននាំឱ្យមានការអំពាវនាវកាន់តែខ្លាំងឡើង។ ការឆ្លងមេរោគ Coronavirus នៅទូទាំងប្រទេសបានកើនឡើងដល់ ៤.០០០ នាក់ហើយជាមួយនឹងការស្លាប់ចំនួន ៩៣ នាក់គិតត្រឹមថ្ងៃច័ន្ទនេះ។

ភាពអាសន្ននឹងផ្តល់សិទ្ធិអំណាចដល់អភិបាលដើម្បីអំពាវនាវឱ្យប្រជាជនស្នាក់នៅផ្ទះនិងបិទអាជីវកម្ម។ អភិបាលក្រុងតូក្យូលោក Yuriko Koike បាននិយាយថា ទីក្រុងកំពុងពិភាក្សាជាមួយរដ្ឋាភិបាលកណ្តាលដើម្បីសម្រេចថាតើមធ្យោបាយប្រភេទណាដែលនឹងស្នើសុំឱ្យបិទឬកាត់បន្ថយម៉ោងធ្វើការ ខណៈពេលដែលមិនមានការរឹតត្បិតលើការទិញគ្រឿងទេសនិងថ្នាំ៕

ដោយ ប៊ី

អន្តរជាតិ៖ ផ្សាហ៊ុនរនៅអាស៊ីប៉ាស៊ីហ្វិកកំពុងកើនឡើង បន្ទាប់ពីថ្ងៃល្អបំផុតរបស់ Wall Street ក្នុងរយៈពេលពីរសប្តាហ៍។ នេះបើយោងតាមការចុះផ្សាយរបស់សារព័ត៌មាន CNN នៅថ្ងៃនេះ។

ភាគហ៊ុនរបស់ក្រុមហ៊ុន Nikkei របស់ជប៉ុនបានកើនឡើង ២,៣ ភាគរយ នៅក្នុងការជួញដូរកាលពីថ្ងៃអង្គារ។

ក្រុមហ៊ុន KOSPI (KOSPI) របស់កូរ៉េខាងត្បូងបានកើនឡើង ១ ភាគរយ ហើយក្រុមហ៊ុន Hang Seng (HSI) របស់ហុងកុងបានកើនឡើង ០,៨ ភាគរយ។ ក្រុមហ៊ុន S&P/ASX 200 បានកើនឡើង ០,២ ភាគរយ។

ក្រុមហ៊ុន Shanghai Composite របស់ចិនបានកើនឡើង ១,៤ ភាគរយ ដែលបានបើកឡើងវិញ បន្ទាប់ពីថ្ងៃឈប់សម្រាកកាលពីថ្ងៃច័ន្ទ។

ទីផ្សារភាគហ៊ុននៅ Wall Street បានប្រមូលផ្តុំគ្នានៅថ្ងៃច័ន្ទនេះដោយសុទិដ្ឋិនិយមថា ការរាតត្បាតនៃជំងឺឆ្លង COVID-19 ពិភពលោកអាចនឹងមានស្ថេរភាព។ ក្រុមហ៊ុន Dow បានបញ្ចប់នៅថ្ងៃជួញដូរ ដោយកើនឡើង ៧,៧ ភាគរយ ហើយ ក្រុមហ៊ុន S&P 500 និង Nasdaq ទាំងពីរបានបិទខ្ពស់ជាងប្រហែល ៧ ភាគរយ។

សុទិដ្ឋិនិយមនោះបានធ្លាក់ចុះក្នុងកំឡុងពេលជួញដូរជាច្រើនម៉ោង។ សន្ទស្សន៍ភាគហ៊ុនរបស់ក្រុមហ៊ុន Dow (INDU) បានធ្លាក់ចុះចុងក្រោយ ០,១ ភាគរយ ឬ ២០ ពិន្ទុ។ ភាគហ៊ុនក្រុមហ៊ុន S&P 500 មានស្ថេរភាព ។

ក្រុមហ៊ុន Nasdaq (COMP) នាពេលអនាគតបានធ្លាក់ចុះត្រឹមតែ 0.2 ភាគរយ។

វាមានសញ្ញាបង្ហាញថា វិនិយោគិនប្រហែលជាលែងព្រួយបារម្ភអំពីជំងឺ COVID-19 និងផលប៉ះពាល់របស់វាលើសេដ្ឋកិច្ចដូចដែលពួកគេធ្លាប់មាននៅក្នុងប៉ុន្មានសប្តាហ៍ថ្មីៗនេះ៕

ដោយៈ រ៉ាណេត

ភ្នំពេញៈ ក្រសួងទេសចរណ៍បានសម្រេចចាត់វិធានបន្ទាន់ បិទអាជីវកម្មម៉ាស្សាសុខភាព និងស្ប៉ា ដែលស្ថិតក្រោមការគ្រប់គ្រងរបស់ក្រសួងទេសចរណ៍ ជាបណ្តោះអាសន្នដើម្បីទប់ស្កាត់ និងប្រយុទ្ធប្រឆាំងនឹងការរីករាលដាលជំងឺឆ្លង Covid-19 រហូតដល់មានការជូនដំណឹងជាថ្មី។

ក្រសួងទេសចរណ៍ចេញសេចក្តីជូនដំណឹង ដល់មន្ទីរទេសចរណ៍រាជធានី ខេត្ត      ឱ្យ​សហការជាមួយរដ្ឋបាលរាជធានី ខេត្ត និងសមត្ថកិច្ចពាក់ព័ន្ធ ចាត់វិធានការបិទអាជីវកម្មម៉ាស្សាសុខភាព និងស្ប៉ា ដែលស្ថិតក្រោមការគ្រប់គ្រងរបស់ក្រសួងទេសចរណ៍ ជាបណ្តោះអាសន្ន ចាប់ពីថ្ងៃទី៧ ខែមេសា ឆ្នាំ២០២០ រហូតដល់មានការជូនដំណឹងជាថ្មី។

នៅក្នុងសេចក្ដីជូនដំណឹងដដែលបានបញ្ជាក់ថា ដើម្បីចូលរួមបង្ការ និងទប់ស្កាត់ការរីករាលដាលជាសាកលនៃជំងឺCovid-19  និងអនុវត្តតាមសេចក្ដីណែនាំរបស់ក្រសួងសុខាភិបាលស្ដីពី វិធានការនៃការការពារការចម្លងវីរុស Covid-19 ក្រសួងទេសចរណ៍សូបអំពាវនាវដល់ប្រធានមន្ទីរទេសចរណ៍រាជធានី ខេត្ត សហការជាមួយរដ្ឋបាលរាជធានី ខេត្ត និងសមត្ថកិច្ចពាក់ព័ន្ធចាត់វិធានការបិទអាជីវកម្ម ដែលពាក់ព័ន្ធនឹងការលើកឡើងខាងនេះជាបណ្តោះអាសន្ន ដោយចាប់អនុវត្តពីថ្ងៃជូនដំណឹងនេះតទៅ។

សេចក្ដីលម្អិតដូចបានបង្ហាញនៅក្នុងលិខិតជូនដំណឹងដូចខាងក្រោម ៖

ដោយវុត្ថា

ភ្នំពេញៈ ក្រុមហ៊ុន Cambodia Airways ប្រកាសពង្រីកធុរៈកិច្ចរបស់ខ្លួន និងវិនិយោគទុនបន្ថែមទៀត ដើម្បីចូលរួមអភិវឌ្ឍន៍ប្រទេសកម្ពុជា បន្ទាប់ជម្ងឺផ្លូវដង្ហើមCOVID-19 បញ្ចប់នាពេលនាខាងមុខ។

លោក Chen Bo ប្រធានក្រុមប្រឹក្សាភិបាលនៃក្រុមហ៊ុន Cambodia Airways នៅក្នុងជំនួបជាមួយ លោក ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការដ្ឋានអាកាសចរស៊ីវិល នាថ្ងៃទី៧ ខែមេសា ឆ្នាំ ២០២០នេះថា ក្នុងពេលឆាប់ខាងមុខពេលដែលស្ថានភាពជម្ងឺCOVI-19 បញ្ចប់នាពេលខាងមុខ ក្រុមហ៊ុនCambodia Airways នឹងពង្រីកធុរៈកិច្ចរបស់ខ្លួន និងវិនិយោគទុនបន្ថែមទៀតដើម្បីចូលរួម អភិវឌ្ឍប្រទេសកម្ពុជា។

លោកបន្តថា “ពេលនេះជាពេលលំបាកសម្រាប់គ្រប់ប្រទេសទាំងអស់ ដោយសារជម្ងឺឆ្លងផ្លូវដង្ហើមថ្មី និងគ្រប់ជើងហោះហើរទាំងអស់របស់ក្រុមហ៊ុន ត្រូវបានផ្អាកបណ្តោះអាសន្នសិន គឺមានតែដឹកជញ្ជូនទំនិញប៉ុណ្ណោះ”។ លោកបន្តថា “យើងសង្ឃឹមថា ជម្ងឺផ្លូវដង្ហើម COVID-19 នឹងបាត់នាពេលឆាប់ៗខាងមុខ”។

លោកបណ្ឌិតម៉ៅ ហាវណ្ណាល់ រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុករដ្ឋលេខាធិការដ្ឋានអាកាសចរស៊ីវិលឱ្យដឹងដែរថា  ទំនាក់ទំនង និងកិច្ចសហប្រតិបត្តិការល្អរវាង ក្រុមហ៊ុនCambodia Airways និងរដ្ឋលេខាធិការដ្ឋានអាកាសចរស៊ីវិលកន្លងមកនេះ និងការផ្តល់ជំនួយសម្ភារៈសម្រាប់ការបង្ការ និងទប់ស្កាត់ការរីករាលដាល ជំCovid-19ដល់រដ្ឋលេខាធិការដ្ឋានអាកាសចរស៊ីវិល គឺជាការបង្ហាញនូវសមានចិត្តដ៏ល្អនៅក្នុងគ្រាដ៏លំបាក។

លោកបន្តថា “ទំនាក់ទំនងកម្ពុជា-ចិនជាទំនាក់ទំនងពិសេស និងជាប្រពៃណី ដែលមានជាយូរលង់ណាស់មកហើយ និងមានទំនាក់ទំនងអភិវឌ្ឍគ្រប់ជ្រុងជ្រោយ ក្រោមការដឹកនាំដោយ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃកម្ពុជា ក្រោមពាក្យស្លោក កម្ពុជា-ចិន មិត្តភាពដែកថែក”។

លោកបន្ថែមថា ជាពិសេសនាពេលថ្មីៗ ក្នុងគ្រាលំបាកសម្តេចតេជោ ហ៊ុន សែន បាន ធ្វើទស្សនកិច្ចនៅប្រទេស ចិនដោយបានជួបជាមួយ ប្រធានធិបតី លោក Xi Jinping និងនាយករដ្ឋមន្ត្រី លោក Li keqiang ដោយបានទទួលនូវការគាំទ្រពីថ្នាក់ដឹកនាំ និងប្រជាជនចិនចំនួន៣ចំនុច ដែលស្នើដោយសម្តេច សម្រាប់ការអភិវឌ្ឍកម្ពុជា ទី១ រក្សានូវការវិនិយោគរបស់វិនិយោគិនចិន បើទោះបីមានការដកEBA របស់សហគមន៏អឺរ៉ុបក៏ដោយ ទី២ បង្កើនការវិនិយោគបន្ថែមទៀតរបស់ប្រទេសចិននៅកម្ពុជា និងទី៣-គាំទ្រនូវការបន្តវិនិយោគបន្ថែមទៀត និងអំពាវនាវឱ្យក្រុមហ៊ុនវិនិយោគល្អៗ ទៅកាន់ក្រុងព្រះសីហ​នុ៕