ដោយ ប៊ី

ភ្នំពេញ៖ កម្ពុជាក្នុងចំណោមបណ្តាប្រទេសចំននួន ៩ ស្ថិតក្នុងក្រសែភ្នែករបស់ក្រុមហ៊ុនផលិតថាមពលនៅអារ៉ាប៊ីសាអ៊ូឌីតដែលគ្រោងនឹងចំណាយទុន ១០ ពាន់លានដុល្លារដើម្បីពង្រីកអាជីវកម្មខ្លួន។

ក្រុមហ៊ុនអភិវឌ្ឍន៍ និងប្រតិបត្តិករ ACWA នៃគំរោងផលិតថាមពល និងបន្សុទ្ធទឹកដែលមានមូលដ្ឋាននៅអារ៉ាប៊ីសាអ៊ូឌីតបានរាយការណ៍ថា ក្រុមហ៊ុនមានបំណងពង្រីកទីផ្សារថ្មីចំនួន ១០ នៅទូទាំងពិភពលោកក្នុងឆ្នាំ ២០២០ ដែលជាផ្នែកមួយនៃការវិនិយោគ ១០ ពាន់លានដុល្លារ។

នាយកប្រតិបត្តិនៃក្រុមហ៊ុន ACWA Power លោក Paddy Padmanthan បាននិយាយថា ក្រុមហ៊ុនបានដេញថ្លៃគម្រោងថាមពលកកើតឡើងវិញនៅក្នុងប្រទេសចំនួន ៥ រួមមានប្រទេសអេត្យូពី ទុយនេស៊ី កម្ពុជា អាស៊ែបៃហ្សង់ និងអ៊ូសបេគីស្ថាន។ នេះយោងតាមកាសែត Thomson Reuters។

នាយកប្រតិបត្តិរូបនេះបន្ថែមថា ក្រមហ៊ុនក៏កំពុងអភិវឌ្ឍគម្រោងថាមពលកកើតឡើងវិញនៅឥណ្ឌូណេស៊ីក្នុងតម្លៃប្រមាណ ៥០០ លានដុល្លារ និងមានគោលបំណងពង្រីកផលប័ត្ររបស់ខ្លួននៅហ្ស៊កដានី និងម៉ារ៉ុកក៏ដូចជាការពង្រីកប្រតិបត្តិការរបស់ខ្លួននៅអារ៉ាប់ប៊ីសាអូឌីត និងអារ៉ាប់រួម។

ពាក់កណ្តាលនៃផលប័ត្ររបស់ក្រុមហ៊ុន ACWA Power មានមូលដ្ឋាននៅប្រទេសអារ៉ាប់ប៊ីសាអូឌីតជាមួយបណ្តាប្រទេសដែលមានមូលនិធិទ្រព្យសម្បត្តិរដ្ឋ និងមូលនិធិវិនិយោគសាធារណៈ (PIF) ដែលកាន់កាប់ ២៥% របស់ក្រុមហ៊ុនក្រុមហ៊ុន៕

ដោយវុត្ថា

ភ្នំពេញៈ រដ្ឋបាលរាជធានីភ្នំពេញ គ្រោងដាំដើមឈើ៤០០០០ដើម នៅតាមទីកន្លែងនានា ដូចជាសាលារៀន វត្តអារាម មន្ទីរពេទ្យ តាមផ្លូវ និងតាមមាត់ទន្លេជាដើម ដើម្បីប្រែក្លាយរាជធានីភ្នំពេញជាទីក្រុងបៃតង។

នៅក្នុងរបាយការណ៍វេទិកានគរូបនីយកម្មកម្ពុជា របស់ក្រសួងរៀបចំដែនដី នគរូបនីយកម្ម និងសំណង់ដែលបានផ្សព្វផ្សា យកាលពីម្សិលមិញនេះ បានស្រងសំដីរបស់ លោក ស៊ុយ សេងរិទ្ធ អភិបាលរងរាជធានីភ្នំពេញ បានមានប្រសាសន៍ថា រាជធានីភ្នំពេញបានដាក់ចេញនូវអាទិភាពចំនួន៨ ដើម្បីសម្រេចឱ្យបាននូវចក្ខុវិស័យរបស់ខ្លួន តាមរយៈការអភិវឌ្ឍន៍ទីក្រុងបៃតង។

លោកបន្តថា ការដាក់ចេញនូវអាទិភាពទាំង៨នេះ ធ្វើឡើងដើម្បីប្រែក្លាយជាទីក្រុងដែលមានបរិយាបន្ន ភាពធន់ និងចីរភាព ដូជាការរៀបចំផែនការអភិវឌ្ឍន៍ទីក្រុង ការឆ្លើយតបចំពោះភាពងាយរងគ្រោះ ថាមពល ការដឹកជញ្ជូន បរិស្ថាន សមណង់ ផលិតកម្ម  ការគ្រប់គ្រងសំណល់រឹង ការអភិវឌ្ឍលំហសាធារណៈ និងការការពារបេតិកភណ្ឌវប្បធម៌។

លោកបន្តថា ផែនការអភិវឌ្ឍន៍អភិវឌ្ឍន៍ទីក្រុងប្រកដោយចីរភាព សម្រាប់រាជធានីភ្នំពេញ ត្រូវបានប្រកាសផ្សព្វផ្សាយ ដែលផ្តល់ឱ្យភាគីពាក់សំខាន់ៗ នូវផែនទីបង្ហាញផ្លូវឆ្ពោះទៅសម្រេចឱ្យបាននូវការអភវិឌ្ឍន៍បៃតង។

លោកឃួង ស្រេង អភិបាករាជធានីភ្នំពេញកាលពីកន្លងមកថ្មីៗនេះ បានដាក់ចេញ Master Plan ដាំដើមឈើក្នុងរាជធានីភ្នំពេញ ដើម្បីលើកកម្ពស់សោភណភាពទីក្រុងផង និងជាការរួមចំណែកកាត់បន្ថយការបំពុលបរិស្ថាន ដែលកើតចេញពីយានជំនិះប្រចាំថ្ងៃផងដែរ ហើយការដាំដើមឈើតាមមហាវិថី វិថី និងផ្លូវជាតិសំខាន់ៗត្រូវតែដាំដើមឈើឡើងវិញ។

លោកថ្លែងថា ប្រភេទដើមឈើដែលត្រូវយកមកដាំ មានដើមក្ងោក ដើមត្របែកព្រៃ ដើមបេង នាងនួន ធ្នង់ គគីរ ដើមរាំងដើមឈើទាល និងដើមសណ្ដាន។ លោកក៏បានស្នើថា យើងទាំងអស់គ្នាត្រូវចូលរួមរក្សាធម្មជាតិ ដើមឈើដែលមានស្រាប់ ដើមឈើគឺជាជីវិតរបស់មនុស្ស ដើមឈើពិតជាមានសារៈសំខាន់ណាស់ក្នុងបរិស្ថាន ធម្មជាតិ និងជាអុកស៊ីហ្សែនសម្រាប់មនុស្សស្រូបយកគ្រប់ៗរូប៕

ដោយ ប៊ី
ភ្នំពេញ៖ ក្រុមហ៊ុន Pestech International Bhd បានចុះហត្ថលេខាកិច្ចសន្យាតម្លៃ ៧,៣៤ លានដុល្លារអាមេរិកសម្រាប់គម្រោងរុករករ៉ែមួយនៅប្រទេសកម្ពុជា ដែលនឹងពាក់ព័ន្ធនឹងដំណើរការសម្រាប់ការបញ្ជូនអគ្គិសនី ២៣០/១១ គីឡូវ៉ុលសម្រាប់អណ្តូងរ៉ែមាសអូរខ្វាវ។
ក្រុមហ៊ុន Pestech បានឱ្យដឹងថា គម្រោងនេះគឺជាទ្រព្យសកម្មបញ្ចូនអគ្គិសនីទៅកាន់អណ្តូងរ៉ែមាសដំបូងគេដែលត្រូវអនុវត្តដោយក្រុមហ៊ុនបុត្រសម្ព័ន្ធរបស់ខ្លួនឈ្មោះ Pestech (ខេមបូឌា) ភីអិលស៊ី និងបានចាប់ផ្តើមនៅថ្ងៃទី ១ ខែមីនា ហើយនឹងត្រូវបញ្ចប់ក្នុងរយៈពេល ១២ ខែនៃការចាប់ផ្តើម។

គម្រោងរ៉ែមាសអូរខ្វាវ ដែលគ្រប់គ្រងដោយក្រុមហ៊ុនរុករករ៉ែដែលចុះបញ្ជីដោយអូស្រ្តាលី Emerald Resources NL ដែលជាក្រុមហ៊ុនរុករករ៉ែបានចុះបញ្ជីនៅអូស្រ្តាលីតាមរយៈក្រុមហ៊ុនបុត្រសម្ព័ន្ធ Renaissance Minerals (ខេមបូឌា) អិលធីឌី ពាក់ព័ន្ធនឹងការអភិវឌ្ឍអូរខ្វាវនៅខេត្តមណ្ឌលគីរី ភាគខាងកើតប្រទេសកម្ពុជា។
ក្រុមហ៊ុន បានឱ្យដឹងថា “គម្រោងនេះនឹងចូលរួមចំណែកជាវិជ្ជមានឆ្ពោះទៅរកប្រាក់ចំណូល និងប្រាក់ចំណូលរបស់ Pestech ស្របតាមដំណាក់កាលនៃការរីកចម្រើនរបស់គម្រោងដែលត្រូវបានទទួលស្គាល់នៅក្នុងឆ្នាំ ដែលបញ្ចប់នៅថ្ងៃទី ៣០ ខែមិថុនាឆ្នាំ ២០២០ ដល់ថ្ងៃទី ៣០ ខែមិថុនាឆ្នាំ ២០២១”។

ក្រុមហ៊ុននេះបានបន្ថែមទៀតថា ខ្លួននៅតែបន្តបម្រើសេចក្តីត្រូវការអគ្គិសនីដែលអាចជឿទុកចិត្តបាននៅក្នុងតំបន់ ដែលមានសារៈសំខាន់ ជាពិសេសចំពេលដែលការរីករាលដាលនៃ Covid-19 បច្ចុប្បន្ន។
ក្រុមហ៊ុន Pestech បានកើនឡើងមួយសេន ឬ ១,១ ភាគរយដល់ ៨៩ សេនដោយផ្តល់ឱ្យក្រុមហ៊ុននូវមូលធនទីផ្សារចំនួន ៦៧៩,៣៧ លានរីងហ្គីត (លុយម៉ាឡេស៊ី)៕

ដោយវុត្ថា

ភ្នំពេញ៖ រដ្ឋាភិបាលកម្ពុជាតាមរយៈក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគរោងចក្រកាត់ដេរថ្មីមួយទៀត តម្លៃ ៤ លានដុល្លារអាមេរិកស្ថិតនៅផ្លូវជាតិលេខ២១A ភូមិព្រែកត្រែង សង្កាត់សិត្បូ ក្រុងតាខ្មៅ ខេត្តកណ្តាល បើទោះកម្ពុជាបាននឹងកំពុងប្រយុទ្ធប្រឆាំងទៅនឹងជំងឺផ្លូវដង្ហើមប្រភេទថ្មី កូវីដ ១៩។

យោងតាមការផ្សព្វផ្សាយរបស់ក្រុមប្រឹក្សាអភិវឌ្ឍន៍កម្ពុជា បានឱ្យដឹងនៅល្ងាចថ្ងៃទី ២៦ខែមីនា នេះ ថា តាមសំណើសុំវិនិយោគលើគម្រោងបង្កើតរោងចក្រកាត់ដេរ និងចាក់សម្លៀកបំពាក់ របស់ក្រុមហ៊ុន CANAAN TEXTILE CO., LTD. គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនខាងលើ មានទុនវិនិយោគប្រមាណ៤លានដុល្លារអាមេរិក និងអាចបង្កើតការងារបានចំនួន ១.០២៣នាក់។

ក្រុងតាខ្មៅ ដែលស្ថិតនៅភាគខាងត្បូងនៃរាជធានីភ្នំពេញ គឺជាទីតាំងដែលមានអំណោយផលយ៉ាងប្រសើរ ក្នុងការអភិវឌ្ឍលើគ្រប់វិស័យ ជាពិសេសវិស័យអចលនទ្រព្យ រោងចក្រ និងសហគ្រាស។
យោងតាមរបាយការណ៍រដ្ឋបាលខេត្តកណ្តាលឱ្យដឹងថា ក្រុងតាខ្មៅ គឺជាទីប្រជុំជនរបស់ខេត្តស្ថិតនៅជាប់ដងទន្លេបាសាក់និងស្ទឹងព្រែកត្នោត មានសក្តានុពលអភិវឌ្ឍន៍លើវិស័យលំនៅឋាន រោងក្រសហគ្រាស កសិកម្ម មជ្ឈមណ្ឌលសិក្សាអប់រំ និងជាតំបន់ស្នាក់នៅដ៏ទាក់ទាញ ។
ក្រុងតាខ្មៅមានព្រំប្រទល់រដ្ឋបាលខាងលិចជាប់ខណ្ឌដង្កោនៃរាជធានីភ្នំពេញ ខាងកើតជាប់ទន្លេបាសាក់ខាងជើងជាប់ខណ្ឌមានជ័យនៃរាជធានីភ្នំពេញខាងត្បូងជាប់ស្រុកស្អាងនិងស្រុកកណ្តាលស្ទឹង ដែលមានប្រជាពលរដ្ឋរស់នៅប្រមាណ៦៧,៦២៦ នាក់ ។

ប្រជាពលរដ្ឋ ៧៩% ប្រកបរបរ ផ្នែកសេវាកម្ម (ដឹកជញ្ជូន មន្រ្តីរាជការ បុគ្គលិក កម្មករ…) ១៩.២៥% ប្រកបរបរកសិកម្ម ក្រៅពីនេះប្រកបរបរ ផ្សេងៗទៀត៕

ដោយ ហ្សូលី

ភ្នំពេញៈ ពហុកីឡាដ្ឋានមរតកតេជោ នៅតែបន្តដមណើរការសាងសង់ជាធម្មតា បើទោះបីជាកម្ពុជាកំពុងប្រឈម នឹងការរីករាលដាលនៃវីរុសកូរ៉ូណាឬកូវីដ១៩ក្តី។

អគ្គលេខាធិការ គណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានថ្លែងប្រាប់សារព័ត៌មានក្នុងស្រុកថា បច្ចុប្បន្នកីឡាដ្ឋានមរតកតេជោនេះ កំពុងតែដំណើរការសាងសង់ និងពន្លឿនឱ្យកាន់តែលឿន ជាពិសេសមានការតម្លើងគ្រឿងដង្គុំសំខាន់ៗដែលជិតរួចរាល់នៅពេលខាងមុខផងដែរ។

លោកបន្តថា “ពេលវេលាដែលកីឡដ្ឋានមរតកតេជោ អាចបញ្ចប់ការសងសង់ជាស្ថាពរនោះគឺនៅដំណាច់ឆ្នាំ២០២០ ព្រោះបើតាមការពិនិត្យនិងប៉ាន់ស្មាន ការសាងសង់នៅសល់ប្រមាណ២០ ទៅ៣០ភាគរយទៀត”។

លើសពីនេះ លោកបានមានប្រសាសន៍ថា ចំពោះស្ថានភាពបច្ចុប្បន្នពិតជាមិនមានអ្វីគួរឱ្យបារម្ភឡើយ ទោះមានវីរុសកូរ៉ូណាឬកូវីដ១៩ក៏ពិតមែន តែមិនបានប៉ះពាល់ដល់ដំណើរការសាងសង់ឡើយ។ ជាក់ស្តែងក្រុមហ៊ុនបានចាត់វិធានការមួយចំនួន បង្ការ និងទប់ស្កាត់វីរុស ទាំងកម្មករជនជាតិចិន និងកម្ពុជា ដែលមិនអនុញ្ញាតឱ្យចាកចេញពីបរិវេ​ណការដ្ឋានឡើយ។ ចំណែកឯបញ្ហាហិរញ្ញវត្ថុឯណោះវិញ គឺគ្មានអ្វីជាបញ្ហាចោទឡើយព្រោះថា គម្រោងមួយនេះមានដើមទុនស្រាប់ក្នុងការចំណាយ។

ពហុកីឡដ្ឋានមរតកតេជោ គឺជាហិរញ្ញប្បទានឥតសំណងរបស់រដ្ឋាភិបាលប្រទេសចិន ដែលគ្រោងចំណាយទុនប្រមាណ១៦០លានដុល្លារ ដែលអាចផ្ទុកមនុស្សបានជាង៦ម៉ឺននាក់ សាងសង់នៅលើផ្ទៃដីជាង១៦ហិកតា ស្ថិតក្នុងសង្កាត់ព្រែកតាសេក ខណ្ឌជ្រោ​យ​ចង្វារ ដើម្បីត្រៀមធ្វើជាម្ចាស់ផ្ទះកីឡាស៊ីហ្គេម ឆ្នាំ២០២៣៕

ដោយគង់ ម៉ាលីន

ភ្នំពេញ៖ ក្រុមហ៊ុនចិនធំមួយ Empire World ដែលគ្រោងវិនិយោគសាងសង់ទីក្រុងរណបថ្មីមួយ នៅក្រុងបាវិត ខេត្តស្វាយរៀងបានជាប់គាំង ខណៈមានការរាយការណ៍ថា គំរោងរបស់ក្រុមហ៊ុននេះក៏បានជាប់គាំងនៅទីក្រុងកូឡាឡាំពួរ ប្រទេសម៉ាឡេស៊ីផងដែរ។

អគ្គនាយកក្រុមហ៊ុនEmpire World លោកAric Looដែលជាអ្នកវិនិយោគគំរោងទីក្រុងរណបនេះ បានមានប្រសាសន៍ឲ្យដឹងក្នុងកំឡុងពេលរៀបចំពិធីសម្ភោធគំរោងនេះកាលពីដើមឆ្នាំមុនថា លោកបានសិក្សាពី​បណ្តាប្រទេសក្នុងតំបន់អាស៊ាន និងបណ្តាទីក្រុងសំខាន់ៗរបស់កម្ពុជា ទើបចុងក្រោយសម្រេចវិនិយោគគំរោងទីក្រុងរណបនេះឡើង ដែលជាគំរោងលំដាប់អន្តរជាតិដ៏ធំមួយ ដែលមានផ្ទៃដីជាង១០០០ហិកតា ប៉ុន្តែដំណាក់លកាលទី១ យើងអភិវឌ្ឍន៍ទីក្រុងនេះលើ​ផ្ទៃដី៥៧ហិកតា។

លោកបន្តថា “ទីក្រុងរណបនេះមានរួមបញ្ចូលនូវកាស៊ីណូ សណ្ឋាគារកម្រិតផ្កាយ៥ អាផាតម៉ិនប្រណីត បណ្តុំនៃភោជនីយដ្ឋាន និងមជ្ឈមណ្ឌលបច្ចេកវិទ្យា ដើម្បីធ្វើយ៉ាង​ណាជួយរដ្ឋាភិបាលគ្រប់គ្រងGame Onlineនៅកម្ពុជា”។លោកបន្តថា “រហូតមកទល់ពេ​លនេះមានក្រុមហ៊ុនចំនួនជាង៤០ហើយ បានសហការជាមួយយើង និងហាងអាហារ និងភេជ្ជៈល្បី​ៗប្រមាណ១០០បានចុះកុងត្រា ដើម្បីបើកនៅក្នុងគំរោងនេះរួចហើយ”។

ក្រៅពីទីក្រុងរណបនេះ ក្រុមហ៊ុនរបស់ចិនមួយទៀត ក៏បានបើកដំណើរការសាងសង់ទីក្រុងរណបលើផ្ទៃដី៧ហិកតា នៅក្នុងទីក្រុងបាវិតរួចហើយ ដោយដាក់ឈ្មោះទីក្រុង​ហេងហេង។

លោកAric Looបានមានប្រសាសន៍ឲ្យដឹងទៀតថា ក្រុងបាវិតមានលក្ខណៈពិសេ​សជាច្រើន ដោយស្ថិតនៅក្នុងគំរោងខ្សែក្រវ៉ាត់១ ផ្លូវមួយរបស់ចិន និងមានទីតាំងនៅកៀ​កនឹងក្រុងហូ ជីម៉ិញប្រទេសវៀតណាម ដែលងាយស្រួលក្នុងការដឹកជញ្ជូននិងពង្រីក​ការតភ្ជាប់លើវិស័យពាណិជ្ជកម្ម។

តាមព៌តមានជាក់លាក់បានឲ្យដឹងថា បច្ចុប្បន្នមានជនជាតិចិន និងអ្នកវិនិយោគចិនប្រមាណ៥០,០០០នាក់ បាននិងកំពុងធ្វើការ និងវិនិយោគនៅទីក្រុងនេះ ដែលនៅឆ្នាំ២០២៥ខាងមុខ ទីក្រុងបាវិតនឹងមានមនុស្សរស់នៅប្រមាណ២០ម៉ឺននាក់។

លោកAric Looបានបន្តថា គោលដៅនៃការអភិវឌ្ឍទីក្រុងរណបនេះ យើងនឹងសហការជាមួយដៃគូវិនិយោគអន្តរជាតិដទៃទៀត ដែលបច្ចុប្បន្នមានក្រុមហ៊ុនកាន់តែច្រើ​នបានចាប់អារម្មណ៍ ក្រៅពីដៃគូដែលយើងមានប្រមាណ៤០ក្រុមហ៊ុនរួចហើយ។

រដ្ឋាភិបាលកម្ពុជាបានដាក់ក្រុងបាវិត ជាតំបន់អភិវឌ្ឍន៍ឧស្សាហកម្ម ក្នុងគោលន​យោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ជាមួយទីក្រុងពីរផ្សេងទៀត គឺខេត្តព្រះសីហនុ និងក្រុងប៉ោយប៉ែត។

ក្រុងនៃឧស្សាហកម្មមានន័យថា រដ្ឋាភិបាលនឹងរៀបចំហេដ្ឋារចនាសម្ព័ន្ឋទាំងផ្នែក​រ៉ឹង និងផ្នែកទន់ ដើម្បីប្រែក្លាយជាមជ្ឈមណ្ឌលឧស្សាហកម្ម ពាណិជ្ជកម្ម និងហិរញ្ញវត្ថុលំ​ដាប់ពិភពលោក។

ទោះជាយ៉ាងណារហូតមកទល់ពេលនេះ មិនមានការពន្យល់ណាមួយពីថ្នាក់ដឹកនាំក្រុមហ៊ុនEmpire Worldទាក់ទងនឹងមូលហេតុនៃការពន្យាពេលរបស់គំរោងនេះទេ ប៉ុន្តែប្រភពព៌តមានដែលអាចទុកចិត្តបានអះអាងថា ការជាប់គាំងគំរោងនេះដោយ​សារការស្ទះលំហូរសាច់ប្រាក់មកពីប្រទេសចិន ដោយសាររដ្ឋាភិបាលចិនបានរឹតបន្តឹងលំហូរមូលធនចេញក្រៅប្រទេស៕

ដោយៈ រ៉ាណេត

ភ្នំពេញៈ រដ្ឋាភិបាលកម្ពុជាត្រូវការកម្ចីហិរញ្ញប្បទាន ពីបរទេសប្រមាណ៧,៥៣១ ប៊ីលានរៀល ស្មើនឹងប្រមាណ១,៨៤៨លានដុល្លារ ដើម្បីបង្កើនល្បឿន និងធ្វើពិពិធកម្មសេដ្ឋកិច្ចឱ្យកាន់តែល្អប្រសើរនៅឆ្នាំ២០២០នេះ។

យោងតាមព្រឹត្តិបត្រស្ថិតិបំណុលសាធារណៈកម្ពុជា ក្នុងឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុបានបង្ហាញឱ្យដឹងថា ដោយសម្អាងទៅលើទិដ្ឋភាពជាក់ស្ដែង សំខាន់ៗដូចជា កំណើននៃតម្រូវការទុនវិនិយោគយ៉ាងគំហុក នៅក្នុងវិស័យហេដ្ឋារចនាស ម្ព័ន្ធ និងសេវាសាធារណៈ ទាំងទំហំ បរិមាណ និងគុណភាព សម្រាប់ជម្រុញកំណើនសេដ្ឋកិច្ចកម្ពុជា ឱ្យកាន់តែល្អប្រសើរ នៅក្នុងដំណាក់កាលថ្មីឆ្នាំ២០២០នេះ តាមការព្យាករណ៍ កម្ពុជាត្រូវការកម្ចីហិរញ្ញប្បទាន ពីក្រៅប្រទេសប្រមាណ១៨៤៨លានដុល្លារ។

អ្នកស្រាវជ្រាវសេដ្ឋកិច្ចនៃរាជបណ្ឌិតសភាកម្ពុជា លោកបណ្ឌិតហុង វណ្ណៈ បានមានប្រសាសន៍ឲ្យដឹងកាលល្ងាចថ្ងៃទី២៦ ខែមីនាឆ្នាំ២០២០ថា រាល់គម្រោង និងតម្រូវការកម្ចីហិរញ្ញប្បទាន ពីបរទេសរបស់រដ្ឋាភិបាល គឺសុទ្ធតែត្រូវបានឆ្លងកាត់នូវការសិក្សាលម្អិតពីតម្រូវការជាក់ស្ដែង និងលទ្ធភាពរបស់កម្ពុជាក្នុងការសងបំណុលទាំងអស់។

លោកបណ្ឌិតអះអាងថា “មិនមែនមានតែកម្ពុជានោះទេ ដែលត្រូវការហិរញ្ញប្បទានពីបរទេស ដែលក្នុងសូម្បីតែបណ្តាប្រទេសអភិវឌ្ឍន៍មួយចំនួន នៅក្នុងតំបន់ក៏មានតម្រូវការដូចគ្នា សំខាន់ត្រង់ថាម្ចាស់កម្ចី ជាពិសេសធនាគារពិភពលោក និងធនាគារអភិវឌ្ឍន៍អាស៊ី យល់ស្របទៅនឹងលទ្ធភាពរបស់ប្រទេសមានតម្រូវការមូលធន និងការផ្តល់កម្ចីតែប៉ុណ្ណោះ”។

លោកបន្តថា សម្រាប់តម្រូវការ និងការខ្ចីបុលរបស់កម្ពុជាក្នុងឆ្នាំ២០២០នេះ បូកនឹងបំណុលចាស់ ដែលកម្ពុជាជំពាក់បរទេស វានៅមិនទាន់ហួសពីលទ្ធភាព ក្នុងការសងត្រឡប់នោះទេ ព្រោះមុនពេលផ្តល់នូវកម្ចី ប្រទេសម្ចាស់ជំនួយ ក៏ដូចជាធនាគារពិភពលោក និងធនាគារអភិវឌ្ឍន៍ជាដើម គឺពួកគេសិក្សាយ៉ាងលម្អិតទៅលើលទ្ធភាពនៃការផ្តល់ និងលទ្ធភាពនៃការសង់របស់កម្ពុជា។

លោកបញ្ជាក់ថា “ជាទូទៅរាល់ទំហំនៃប្រាក់កម្ចីទាំងអស់ ត្រូវបានគេធ្វើការគណ​នា និងប្រៀបធៀបក្នុងអត្រាប្រមាណ២០ភាគរយ នៃចំនួនGDPសរុប ដែលអាចសមស្របទៅនឹងលទ្ធភាពសង់ត្រឡប់។

ដោយឡែកតម្រូវការហិរញ្ញប្បទានសម្រាប់ឆ្នាំ២០២០នេះ ក៏មិនទាន់លើសលប់សម្រាប់កម្ពុជានោះដែរ ហើយភាគច្រើនគម្រោងជំនួយមួយចំនួន ក៏ត្រូវបានម្ចាស់ជំនួយ និងរដ្ឋាភិបាលកម្ពុជា បានធ្វើការព្រមព្រៀងរួចជាបណ្តើរៗ ដែលក្នុងនោះរួមមានដូចជាគម្រោងជំនួញស្ថាបនាផ្លូវជាតិលេខ៥ (ជំនួញរបស់ជប៉ុន) គម្រោងស្ថាបនាផ្លូវជាតិលេខ១០ (ជំនួញរបស់ចិន) និងគម្រោងផ្លូវជាតិលេខ២ (ជំនួញរបស់កូរ៉េ)ជាដើម៕