ចាប់បើកលក់ហើយគម្រោង ផាក លែន 50M របស់ជីបម៉ុងលែន បញ្ចុះតម្លៃ 8%!

ដោយរតនា

ភ្នំពេញៈ ក្រុមហ៊ុនជីប ម៉ុង លែន នឹងបើកលក់គម្រោងថ្មីរបស់ខ្លួនផាក លែន 50M ជាផ្លូវការ ចាប់ពីថ្ងៃទី១៨ដល់១៩ ខែមករា ឆ្នាំ២០២០ នៅទីតាំងគម្រោងផាក លែន 50M ផ្ទាល់ជាមួយនឹងការបញ្ចុះតម្លៃរហូតដល់8% និងរំលស់100%។

ផាក លែន 50M ស្ថិតនៅតាមបណ្តោយផ្លូវ50M (ម៉ែត្រ) កែងផ្លូវ30ម៉ែត្រ (ផ្លូវព្រៃស) ក្នុងតំបន់ចំការដូង ដែលជាទីតាំងមានសក្តានុពលសេដ្ឋកិច្ច និងសន្ទុះអភិវឌ្ឍន៍ខ្លាំង។ គម្រោងនេះមានចង្ងាយត្រឹមតែ2នាទីប៉ុណ្ណោះ ពីផ្សារចំការដូង និង10នាទីពីផ្សារ AEON III និងផ្សារទំនើប ជីប ម៉ុង 60ម៉ែត្រ, ឬ 15នាទីពីផ្សារទំនើប ជីប ម៉ុង 271។

រឹតតែពិសេសជាងនេះ គម្រោងផាកលែន50M ក៏មានផ្សារទំនើបជីប ម៉ុង 50M ផ្ទាល់ក្នុងគម្រោង ក៏ដូចជាក្លឹបហាត់ប្រាណ អាងហែលទឹក សួនកុមារ សួនច្បារបៃតង ដែលកាន់តែផ្តល់ភាពងាយស្រួល ដល់ការរស់នៅបែបស៊ីវិល័យ និងទាន់សម័យជូនអតិថិជន។

គម្រោង ផាក លែន 50M ជាគម្រោងដ៏ធំ ដែលនឹងសាងសង់លំនៅឋានប្រណិតៗជាច្រើនប្រភេទដូចជា វីឡាឃ្វីន វីឡាឃ្វីន A វីឡាភ្លោះ វីឡាកូនកាត់A វីឡាកូនកាត់B និង លំនៅឋានម៉ូតថ្មី៣ប្រភេទគឺ៖ វីឡាឃ្វីនB ហ្សបហៅស៍ A I និង ហ្សបហៅស៍ A II។

លំនៅឋាននីមួយៗត្រូវបានរចនាឡើង ដោយយកចិត្តទុកដាក់ បែបសម័យថ្មី ជាមួយនឹងគុណភាពល្អ សំណង់រឹងមាំ ដែលស័ក្តិសមបំផុតសម្រាប់ការរស់នៅ និងប្រកបអាជីវកម្មផ្សេងៗ។

កុំភ្លេចមកចូលរួមនៅថ្ងៃកម្មវិធីបើកលក់ផ្ទាល់ ដើម្បីធ្វើការកក់ផ្ទះក្នុងក្តីស្រមៃរបស់លោកអ្នក ជាមួយនឹងទីតាំងល្អៗឲ្យបានមុនគេ ក៏ដូចជាទទួលបានប្រូម៉ូសិនបញ្ចុះតម្លៃរហូតដល់8% ដែលមិនធ្លាប់មានពីមុនមក ជាពិសេសក៏មានការបង់រំលស់100% ផងដែរ។សម្រាប់ព័ត៌មានបន្ថែម 061 997 888 |https://www.facebook.com/chipmongland/ | www.chipmongland.com

តើ “អនិកម្មភាពខ្ពស់” មានន័យដូចម្តេច?

ដោយ Propertyarea.asia

ភ្នំពេញៈ អនិកម្មភាពខ្ពស់ (High employment) មានន័យថា ការផ្លាស់ប្តូរការងាររបស់កម្មករ ត្រូវបានចាត់ទុកថាជានិកម្មភាពជម្លោះ (Frictional unemployment)។ និកម្មភាពទាំងអស់ លើសពីនិកម្មភាពជម្លោះត្រូវ បានចាត់ទុកថាជានិកម្មភាពអចេតនា (Unintended unemployment)។

ការកាត់បន្ថយនិកម្មភាពប្រភេទនេះ គឺជាទិសដៅនៃគោលនយោបាយម៉ាក្រូសេដ្ឋកិច្ច។

ឧទាហរណ៍ អង្គការអន្តរជាតិ ដែលបានបង្កើតឡើងនៅឆ្នាំ១៩៤៥ ក្នុងគោលបំណងលើកកម្ពស់ស្ថិរភាពហិរញ្ញវត្ថុអន្តរជាតិ និងសហប្រតិបត្តិការរូបិយវត្ថុ ជួយសម្របសម្រួលពាណិជ្ជកម្មអន្តរជាតិ និងជំរុញអនិកម្មភាព កំណើនសេដ្ឋកិច្ចប្រកមដោយចីរភាព និងកាត់បន្ថយភាពក្រីក្រក្នុងពិភពលោក៕

ស្ដាប់សម្ដីស្ត្រីជើងខ្លាំងក្នុងវិស័យអចលនទ្រព្យនិយាយពីទីផ្សារខុនដូឆ្នាំ២០២០

ដោយៈ រ៉ាណេត 

ភ្នំពេញៈ ស្ត្រីជើងខ្លាំង២រូប ដែលសុទ្ធតែមានជំនាញ និងបទពិសោធន៍ជាច្រើនឆ្នាំនៅក្នុងវិស័យអចលនទ្រព្យបានអះអាងថា សម្រាប់ទីផ្សារខុនដូនៅក្នុងឆ្នាំ២០២០នេះ នៅតែបន្តភាពល្អប្រសើរ ទាំងសកម្មភាពអភិវឌ្ឍសាងសង់ ក៏ដូចជាការលក់ផងដែរ។

នៅក្នុងឆ្នាំ២០២០នេះ ទីផ្សារខុនដូនៅកម្ពុជា នៅតែអាចរក្សាបាននូវភាពល្អប្រសើរដដែល មិនថាសកម្មភាពនៃការវិនិយោគ ការសាងសង់ និងការទិញ-លក់ នោះទេ ខណៈដែលវិស័យមួយនេះ នៅក្នុងប្រទេសថៃ កំពុងបង្ហាញសញ្ញាដាំក្បាលចុះគួរឱ្យព្រួយបារម្ភ។

នាយិកាប្រចាំប្រទេសក្រុមហ៊ុនអន្តរជាតុ CBRE Cambodia លោកស្រី អាន សុធីតាបានលើកឡើងថា ទីផ្សារខុនដូសម្រាប់ឆ្នាំ២០២០នេះ នៅតែមានដំណើរការល្អ ដោយសារមានការផ្គត់ផ្គង់កាលពីចុងឆ្នាំ២០១៩កន្លងទៅ កើនឡើងប្រមាណ២០,០០០ យូនីត ។ លោកស្រីបានបន្តថា ខុនដូប្រភេទកម្រិនសមរម្យ មានតម្លៃចន្លោះពី១២០០ដុល្លារឡើងក្នុងមួយម៉ែត្រការ៉េ និងខុនដូកម្រិតធម្យមមានតម្លៃចាប់ពី១៥០០ ទៅ២៥០០ដុល្លារ ក្នុងមួយម៉ែត្រការ៉េ បានដាក់លក់កាលពីចុងឆ្នាំ២០១៩ និងនៅដើមឆ្នាំ២០២០នេះច្រើន ដើម្បីឆ្លើយតបទៅនឹងតម្រូវការនៅក្នុងស្រុក។

លោកស្រីបានបញ្ជាក់ថា “បច្ចុប្បន្ននេះពលរដ្ឋខ្មែរភាគច្រើន បានងាកមកចាប់អារម្មណ៍ខ្លាំងលើវិស័យខុនដូ។ ប៉ុន្តែសម្រាប់ខុនដូកម្រិតខ្ពស់ ដែលមានតម្លៃចាប់ពី៣ ០០០ ដុល្លារឡើងក្នុងម៉ែត្រការ៉េ គឺជនបរទេសចាប់អារម្មណ៍វិនិយោគច្រើន ហើយភាគច្រើនពិសេសជនជាតិចិន”។ លោកស្រីបន្ថែមថា “និយាយជារួមទីផ្សារខុនដូនៅក្នុងប្រទេសកម្ពុជា នៅតែមានទីផ្សារល្អប្រសើរ តាមរយៈកិច្ចសហការជាមួយធនាគារក្នុងផ្តល់ប្រាក់កម្ចី ដែលផ្តល់ភាពងាយស្រួលដល់ប្រជាពលរដ្ឋនៅក្នុងស្រុក”។

ស្រដៀងគ្នានេះ លោកស្រី Grace Rachny Fong នាយិការក្រុមហ៊ុនអចលនទ្រព្យអន្តរជាតិCentury21 Cambodia យល់ស្របទៅនឹងការលើកឡើងខាងលើ ប៉ុន្តែសម្រាប់អ្នកវិនិយោគ ក៏គួរតែផ្លាស់ប្ដូរនូវយុទ្ធសាស្ត្រថ្មី ដើម្បីជំរុញដល់ការលក់ឱ្យមានកំណើនខ្ពស់។ លោកស្រីបានបញ្ជាក់ថា នៅក្នុងឆ្នាំ២០២០នេះ ភាគច្រើនអភិវឌ្ឍន៍បានរៀបចំ និងប្ដូរយុទ្ធសាស្ត្រក្នុងការលក់របស់ខ្លួន ដើម្បីបង្កើនទំនុកចិត្តដល់អតិថិជនរបស់ខ្លួនដោយការធានា ក្នុងការធ្វើឱ្យអតិថិជនទទួលបានចំណេញ បន្ទាប់ពីការទិញយ៉ាងតិចរយៈពេល៣ឆ្នាំក្នុងអត្រាចន្លោះពី៦-៨ ភាគរយ។

លោកស្រីបានបន្តទៀតថា “ការផ្តល់នូវទំនុកចិត្តដល់អតិថិជន ជារឿងមួយសំខាន់បំផុត ក្នុងការជំរុញកំណើនលក់ប្រកបដោយភាពជោគជ័យ ជាពិសេសការធានាអតិថិជនអាចទទួលបានភាគចំណេញដោយការជួយត្រឡប់មកវិញ ហើយយុទ្ធសាស្ត្រនេះអាចដំណើរការបានល្អ ក៏អាស្រ័យជាមួយក្រុមហ៊ុនភ្នាក់ងារ ដែលមានជំនាញក្នុងការរកភ្ញៀវធ្វើជាជំនួយ”។
លោកស្រីGraceបានបន្តទៀតថា អ្នកអភិវឌ្ឍន៍គប្បីពិគ្រោះយោបល់ជាមួយក្រុមហ៊ុនភ្នាក់ងារជំនាញលក់ ទៅលើការរៀបចំរចនា ការចាត់ចំណាត់ថ្នាក់យូនីតនីមួយៗ និងការចាប់យកអតិថិជនគោលដៅរបស់ខ្លួន ទើបមិនប្រឈមនឹងហានិភ័យ៕

ចំណេះដឹង! តើអ្វីជាគោលនយោបាយបើកចំហរសេដ្ឋកិច្ចកម្ពុជា?

ដោយវុត្ថា

ភ្នំពេញៈ កម្ពុជាគឺជាប្រទេសបើកចំហរសេដ្ឋកិច្ច ជាមួយគោលនយោបាយគាំពារវិនិយោគល្អជាងគេនៅក្នុងតំបន់ ក្នុងការស្វាគមន៍ការវិនិយោគផ្ទាល់ពីបរទេស។

រាជរដ្ឋាភិបាលកម្ពុជា បានដាក់ចេញនូវគោលនយោបាយ បើកចំហរជើងមេឃនេះ គឺគ្មានការរើសអើង ចំពោះការធ្វើពាណិជ្ជកម្មឆ្លងកាត់ព្រំដែន ហើយវិនិយោគិនបរទេសមានសិទ្ធិកាន់កាប់ភាគហ៊ុនបានទាំងស្រុង និងអាចប្រមូលប្រាក់ចំណេញពីការធ្វើធុរកិច្ចបាន១០០ភាគរយ។

អ្នកវិនិយោគមិនត្រឹមតែអាចគ្រប់គ្រងជំនួញ និងប្រមូលប្រាក់ចំណេញបាន១០០ភាគរយប៉ុណ្ណោះទេ ប៉ុន្តែពួកគេថែមទាំងអាចរីករាយ ជាមួយប្រព័ន្ធអនុគ្រោះពន្ធផ្សេងៗផ្តល់ដោយសហគមន៍អឺរ៉ុប សហរដ្ឋអាមេរិក ប្រទេសចិន និងប្រទេសផ្សេងៗទៀត។

ដោយឡែក នៅក្រោមក្របខណ្ឌភាពជាដៃគូសេដ្ឋកិច្ចទូលាយកម្រិតតំបន់ (RCEP)រដ្ឋាភិបាលកម្ពុជា បានដាក់ចេញនូវគោលនយោបាយបើកចំហរជើងមេឃ ដើម្បីស្វាគមន៍រាល់ការហោះហើរដោយត្រង់ ពីបណ្តាប្រទេសនានានានៅទូទាំងពិភពលោកសំដៅទាក់ទាញវិនិយោគិន និងភ្ញៀវទេសចរណ៍ ចូលមកទស្សនាប្រទេសកម្ពុជាឲ្យបានកាន់តែច្រើន៕

ខេត្តព្រះសីហនុពង្រឹងកិច្ចអភិវឌ្ឍន៍តាមរយៈផែនការវិនិយោគរបស់ខ្លួន

ដោយៈ រ៉ាណេត 

ព្រះសីហនុៈ រដ្ឋបាលខេត្តព្រះសីហនុបានបើកកិច្ចប្រជុំ ស្តីពីការពិនិត្យលើសេចក្តីព្រាងកម្មវិធីវិនិយោគ៣ឆ្នាំរំកិល ២០២០-២០២២ ដើម្បីត្រួតពិនិត្យសេចក្តីព្រាងកម្មវិនិវិនិយោគ៣ឆ្នាំរំកិលរបស់រដ្ឋបាល ខេត្តព្រះសីហនុជំពូកទី១ ស្តីពីស្ថានភាពទិន្នន័យសេដ្ឋកិច្ច សង្គមកិច្ចប្រចាំឆ្នាំ២០២០។

លោក ឈិន សេងងួន អភិបាលរងខេត្តព្រះសីហនុបានមានប្រសាសន៍ថា ខេត្តព្រះសីហនុ មានវិស័យសេដ្ឋកិច្ច សំខាន់ៗដូចជា វិស័យឧស្សាហកម្ម ពាណិជ្ជកម្ម ទេសចរណ៍ និងវិស័យកសិកម្ម ដែលជា គោលដៅសម្រាប់ធ្វើការអភិវឌ្ឍខឿនសេដ្ឋកិច្ចរបស់រាជរដ្ឋាភិបាល សក្តានុពលរួមមាន កំពង់ផែសមុទ្រទឹកជ្រៅ តំបន់សេដ្ឋកិច្ចពិសេស ព្រលានយន្តហោះអន្តរ ជាតិខេត្តព្រះសីហនុ និងឆ្នេរសមុទ្រដ៏ស្រស់ស្អាតប្រភពសត្តានុពល និងធនធានធម្មជាតិទាំងអស់នេះបាន និងកំពុងជំរុញការអភិវឌ្ឍន៍សេដ្ឋកិច្ចខេត្តព្រះសីហនុ មានការរីកចម្រើនជាលំដាប់ បច្ចុប្បន្នបាននិងកំពុងអនុវត្តន៍ ឱ្យបានសម្រេចនូវគោលនយោបាយរបស់រាជរដ្ឋាភិបាល ដើម្បីជំរុញការអភិវឌ្ឍកំណើនសេដ្ឋកិច្ចរបស់ខេត្ត។

លោកបន្តថា “តាមគោលនយោបាយរបស់រាជរដ្ឋាភិបាលកម្ពុជា ប្រែក្លាយអភិវឌ្ឍន៍ខេត្តព្រះសីហនុទៅជា “តំបន់សេដ្ឋកិច្ចគំរូពហុបំណង” ធ្វើឱ្យ ខេត្តទេសចរណ៍មាត់សមុទ្រមានឈ្មោះ ជាទីក្រុងឧស្សាហកម្មបៃតងអាស៊ានយ៉ាងយូរ នៅត្រឹមឆ្នាំ២០២៥”។លោកបន្ថែមថា “អនាគតខេត្តព្រះសីហនុ ដែលបច្ចុប្បន្នជា “តារារះនាទិសនារតី” និងក្លាយទៅជាគោលដៅគន្លឹះជាក់ស្តែង៤ សម្រាប់ជំរុញការអនុវត្តគោលនយោបាយ អភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥”។

ខេត្តព្រះសីហនុជាប៉ូលសេដ្ឋកិច្ចសំខាន់ និងជាមជ្ឈមណ្ឌលឧស្សាហកម្ម ពាណិជ្ជកម្ម និងទេសចរណ៍រីកចម្រើនប្រកបដោយចីរភាព និងមានតុល្យភាពខាងបរិស្ថាន។ ពង្រឹងការអនុវត្តគោលនយោបាយយុទ្ធសាស្ត្រ ចតុកោណតំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភាជាស្នូលយុទ្ធសាស្ត្រចតុកោណ ដើម្បីបង្កើនល្បឿន នៃការកែទម្រង់អភិបាលកិច្ចល្អ៕

កោះចំនួន ៣ នៅខេត្តព្រះសីហនុ កំពុងមានសក្តានុពលសម្រាប់ការវិនិយោគ

ដោយវុត្ថា
ភ្នំពេញ៖ នៅក្នុងប្រទេសកម្ពុជាមានកោះជាច្រើននៅតាមខេត្តដែលនៅជាប់ឆ្នេរសមុទ្រ ដែលធ្វើឱ្យវិនិយោគិនជាតិ និងអន្តរជាតិ ចាប់អារម្មណ៍ក្នុងការធ្វើការវិនិយោគជាលក្ខណៈរមណីយដ្ឋានបែបលំហែកាយ សាងសងសណ្ឋាគារ និង កន្លែងស្នាក់នៅជាដើម ដើម្បីឆ្លើយតបទៅនឹងការកើនឡើងនៃភ្ញៀវទេសចរជាតិ និងអន្តរជាតិ។

ខាងក្រោមនេះ គឺជាតំបន់កោះស្អាតៗទាំង៣ នៅក្នុងខេត្តព្រះសីហនុ ក្នុងចំណោមកោះចំនួន ៣២ ដែលពោរពេញទៅដោយសក្តានុពល ក្នុងការវិនិយោគដោយក្នុងនោះមានដូចជា៖

១. កោះរ៉ុង

កោះរ៉ុងគឺជាកោះធម្មជាតិដែលមានផ្ទៃ ទឹកសមុទ្រពណ៌ខៀវស្រងាត់ និងមាន ទេសភាពស្អាតប្លែកបើប្រៀបធៀបនឹងកោះមួយចំនួននៅលើទឹកដីខេត្ត ព្រះសីហនុ ហើយក៏ត្រូវបានគេចាត់ទុកថាជាកោះ ដែលមានឆ្នេរខ្សាច់ស្រស់ស្អាត បំផុតនៅ ឥណ្ឌូចិនថែមទៀតផង។

កោះរ៉ុងជាកោះមួយ ដែលមានចម្ងាយប្រមាណ២៥គីឡូម៉ែត្រពីឆ្នេរសមុទ្រក្រុងព្រះសីហនុមាន ផ្ទៃដីគ្របដណ្តប់៧៨ គីឡូម៉ែត្រការ៉េមានបណ្តោយប្រវែង១៥គីឡូម៉ែត្រ ទទឹងប្រមាណ៩គីឡូម៉ែត្រនិងមានចំណុចខ្ពស់បំផុតរបស់កោះមាន កម្ពស់១៣៣ម៉ែត្រពីនីវ៉ូទឹកសមុទ្រ។ ប្រសិនបើយើងធ្វើដំណើរពីកំពង់ផែទៅកាន់កោះរ៉ុងដោយកាណូតល្បឿនលឿននោះ គឺត្រូវប្រើពេលប្រមាណជា៣០នាទីនឹងបានទៅដល់កោះរុងជាមិនខាន។

បើប្រៀបធៀបជាមួយនឹងកោះមួយចំនួន កោះរ៉ុងហាក់មានប្រៀបច្រើនជាងគេ ក្នុងការទាក់ទាញអ្នកវិនិយោគ ព្រោះកោះនេះ មានគមនាគមន៍ផ្លូវទឹកដែលនាំយកអ្នកដំណើរ និងអ្នកទេសចរជារៀងរាល់ថ្ងៃរួចទៅហើយ។ ការវិនិយោគនៅលើកោះនេះ ភាគច្រើន ជាប្រទេសគម្រោង សណ្ឋាគារ រមណីយដ្ឋាន និងភោជនីយដ្ឋាន។

២. កោះរ៉ុងសន្លឹម

នៅក្បែរកោះរ៉ុង ក៏មានកោះដែលមានខ្សាច់សក្បុស នៅក្បែរនោះ គឺកោះរ៉ុងសន្លឹម។ លក្ខណៈពិសេសរបស់កោះរ៉ុងសន្លឹម គឺជាឆ្នេរខ្សាច់សដ៏វែង ជាមួយនឹងទឹកសមុទ្រពណ៌ខៀវស្រងាត់ បង្កើតជាទេសភាពដ៏កម្រមួយ ដែលអាចទាក់ទាញភ្ញៀវទេសចរ បានយ៉ាងច្រើនសន្ធឹកសន្ធាប់ ឱ្យទៅលម្ហែកាយនៅទីនោះ។ មិនខុសពីកោះរ៉ុងនោះទេ កោះរ៉ុងសន្លឹម គឺជាតំបន់ដែលកំពុងមានសក្តានុពលមួយ សម្រាប់គម្រោងវិនិយោគភោជនីយដ្ឋាន សណ្ឋាគារ ឬផ្ទះលម្ហែកាយជាដើម។

៣. កោះពស់

មិនខុសពីកោះខាងលើនោះឡើយ កោះពស់ក៏ជាកោះដែលមានសក្តានុពល ក្នុងការអភិវឌ្ឍ ពាក់ព័ន្ធនឹងវិស័យទេសចរណ៍ និងសំណង់ដែរ។ ប៉ុន្តែវាពិសេសជាងកោះដទៃត្រង់ថា វានៅជិតបង្កើយទៅនឹងដីគោក ពោលគឺមិនដល់១គីឡូម៉ែត្រផង ឆ្លងទៅកោះនេះ។

លើសពីនេះទៅទៀត កោះនេះមានហេដ្ឋារចនាសម្ព័ន្ធដូចជា៖ ស្ពាន ផ្លូវថ្នល់ និងគម្រោងផ្ទះលម្ហែកាយមួយចំនួន អភិវឌ្ឍន៍រួចរាល់យ៉ាងស្អាតហើយ។ ប៉ុន្តែដោយសារតែមានបញ្ហាមួយចំនួន ធ្វើឱ្យកោះនេះអាក់ខាន មិនមានការអភិវឌ្ឍអ្វីបន្ថែមទៀត ហើយសូម្បីតែអ្នកទេសចរក៏មិនអាចចូលទៅបាន។ នាពេលអនាគត ប្រសិនជាមានអ្នកដែលអាចយកតំបន់នេះ មកដំណើរការអភិវឌ្ឍន៍បន្ថែម វាពិតជាក្លាយជាទីទាក់ទាញមួយ ដ៏ល្បីជាក់ជាមិនខាន។

ស្របជាមួយនឹងកំណើនប្រាក់ចំណូលរបស់ប្រជាជនខ្មែរ ក៏ដូចជាការរីកចម្រើននៃច្ចេកវិទ្យា ដូចជាបណ្តាញសង្គមជាដើម គម្រោងអភិវឌ្ឍន៍កោះទាំងនេះអាចនឹងទាក់ទាញការចាប់អារម្មណ៍ពីអ្នកភ្ញៀវទេសចរយ៉ាងច្រើន ប្រសិនជាមានការវិនិយោគ ដែលគួរឱ្យចាប់អារម្មណ៍ ណាមួយកើតមាន។ កត្តានេះ ក៏នឹងរួមចំណែក ធ្វើឱ្យសេដ្ឋកិច្ចកម្ពុជា កាន់តែមានការលូតលាស់ឡើង មួយកម្រិតទៀត៕

រយៈពេល ៥ ឆ្នាំកម្ពុជាទាក់ទាញលំហូរទុនវិនិយោគជិត ៣៣ ពាន់លានដុល្លារលើវិស័យសំណង់

ដោយ ប៊ី

ភ្នំពេញ៖ វិស័យអចលនទ្រព្យនៅកម្ពុជាបានបង្ហាញពីសក្តានុពលក្នុងរយៈប៉ុន្មានឆ្នាំចុងក្រោយនេះ ខណៈទំហំទុនវិនិយោគវិស័យសំណង់ទូទាំងប្រទេសមានតម្លៃសរុបជិត ៣៣ ពាន់លានដុល្លារអាមេរិករយៈពេល ៥ ចុងក្រោយនេះ។

ទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់បង្ហាញថា ទំហំទុនវិនិយោគវិស័យសំណង់ទូទាំងប្រទេសនៅក្នុងរយៈពេល ៥ ចុងក្រោយនេះ មានតម្លៃសរុបប្រមាណជាង ៣២.៩ ពាន់លានដុល្លារអាមេរិក គិតចាប់ឆ្នាំ ២០១៥ រហូតដល់ឆ្នាំ ២០១៩។

ទិន្នន័យនេះត្រូវបានដកស្រង់ចេញពីទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់គិតចាប់ឆ្នាំ ២០១៥ រហូតដល់ឆ្នាំ ២០១៩។

ប្រទេសកម្ពុជាក្នុងចំណោមប្រទេសចំនួន៣ ផ្សេងទៀតរួមមានប្រទេសហ្វីលីពីន វៀតណាម និងឥណ្ឌូនេស៊ី គឺជាប្រទេសដែលល្អបំផុត សម្រាប់វិនិយោគិនក្នុងចាប់យកឪកាសវិនិយោគ លើវិស័យអចលនទ្រព្យក្នុងឆ្នាំ២០២០នេះ។ នេះបើយោងតាមការចុះផ្សព្វផ្សាយរបស់គេហទំព័រ inviestasian.com កាលពីពេលថ្មីៗនេះ។

គេហទំព័រនេះបានអះអាងថា វឌ្ឍនភាពរបស់ប្រទេសកម្ពុជា ចាប់តាំងពីទសវត្សរ៍ឆ្នាំ១៩៨០ មិនមានអ្វីគួរឱ្យភ្ញាក់ផ្អើលទេ។ នាពេលបច្ចុប្បន្ននេះ ប្រទេសកម្ពុជាជាប្រទេសមួយដែលមានសេដ្ឋកិច្ចរីកចម្រើន លឿនបំផុតនៅតំបន់អាស៊ី និងជាទីផ្សារមួយដែលមានភាពងាយស្រួល សម្រាប់ធ្វើអាជីវកម្មផ្សេងៗ ជាពិសេសការវិនិយោគលើវិស័យអចលនទ្រព្យ។

រដ្ឋាភិបាលប្រទេសកម្ពុជា បានផ្តល់ឱ្យជនបរទេសធ្វើអាជីវកម្ម ដោយកាន់កាប់ភាគហ៊ុន១០០%។ ការទិញអចលនទ្រព្យនៅប្រទេសកម្ពុជា គឺជាជំរើសវិនិយោគដ៏រឹងមាំមួយផងដែរ ជាពិសេសជាមួយនឹងតម្លៃអចលនទ្រព្យនៅទីក្រុងភ្នំពេញ ដែលទិញអាចទិញអចលនទ្រព្យបាន ក្នុងតម្លៃប្រហែល១០០០ដុល្លារក្នុងមួយម៉ែត្រការ៉េ។ នោះជាការអនុវត្តជាក់ស្តែងដែលមិនធ្លាប់ មាននៅក្នុងទីក្រុង ដែលមានអត្រានគរូបនីយកម្ម ខ្ពស់ដូចប្រទេសកម្ពុជា។

កំណើននៃការនាំចេញ និងសកម្មភាពសំណង់រឹងមាំបាននិងកំពុងជំរុញកំណើនសេដ្ឋកិច្ចរបស់កម្ពុជានៅតែរឹងមាំនៅឆ្នាំ ២០១៩ កន្លងមកនេះ ជាមួយនឹងកំណើនផលិតផលក្នុងស្រុកសរុប (GDP) ដែលរំពឹងថានឹងមានជុំវិញ ៧ ភាគរយ។ នេះបើយោងតាមរបាយការណ៍ចុងក្រោយរបស់មូលនិធិរូបិយវត្ថុអន្តរជាតិចុះកាលពេលថ្មីៗនេះ៕

ក្រុមប្រឹក្សាជាតិភស្តុភារកម្មផ្តោតលើការតភ្ជាប់ហេដ្ឋារចនាសម្ព័ន្ឋសំខាន់ៗដើម្បីជម្រុញកំនើនសេដ្ឋកិច្ច

ដោយៈ រ៉ាណេត 
ភ្នំពេញៈ ក្រុមប្រឹក្សាជាតិ និងភស្តុភារកម្ម បានចាប់ផ្តើមបើកកិច្ចប្រជុំលើកទីមួយ ដើម្បីពិនិត្យ និងអនុម័តសេចក្តីព្រាងផែនការមេអន្តរកាលស្ដីពី ការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភាកម្មឱ្យកាន់តែប្រសើរ។

ជាការជំរុញដល់ដំណើរការ នៃការតភ្ជាប់ប្រព័ន្ធដឹកជញ្ជូនមធ្យោបាយកាលពីថ្ងៃ៦ ខែមករា ឆ្នាំ២០២០ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានចូលរួមកិច្ចប្រជុំក្រុមប្រឹក្សាជាតិភស្តុភារកម្មលើកទីមួយ ដើម្បីពិនិត្យ និងអនុម័តសេចក្តីព្រាងផែនការមេអន្តរកាល ស្ដីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្មក្រោម។

កិច្ចប្រជុំនេះ មានការចូលរួមពីសំណាក់មន្ត្រីកំពូលៗជាច្រើននាក់ ដូចជាលោកអគ្គបណ្ឌិតសភាចារ្យអូន ព័ន្ធមុនីរ័ត្ន ឧបនាយក រដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិភស្តុភារកម្ម លោកសុក ស៊ីផាន់ណា ទីប្រឹក្សាជាន់ខ្ពស់របស់រាជរដ្ឋាភិបាល លោកឈាង ពេជ្រ អគ្គនាយកនៃអគ្គនាយកដ្ឋានភស្តុភារកម្ម និងជាប្រធានលេខាធិការដ្ឋានក្រុមប្រឹក្សាជាតិភស្តុភារកម្ម និងភាគីពាក់ព័ន្ធផងដែរ។

លោកទេសរដ្ឋមន្ត្រី បានលើកឡើងអំពីសារសំខាន់ នៃការបង្កើតផែនការមេថ្នាក់ជាតិភស្តុភារកម្ម យោងតាមតម្រូវការចាំបាច់ នៃផែនការយុទ្ធសាស្រ្តអភិវឌ្ឍន៍ជាតិឆ្នាំ២០១៩-២០២៣ និងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ក្នុងគោលបំណងបញ្ចុះតម្លៃដឹកជញ្ជូន និងភស្តុភារកម្ម ប្រកបដោយភាពប្រកួតប្រជែង ដែលអាចឱ្យកម្ពុជា មានឱកាសទាក់ទាញវិនិយោគ បង្កើតការងារធ្វើជូនប្រជាពលរដ្ឋ។

លោកស៊ុន ចាន់ថុល ក៏បានជម្រាបជូនអង្គប្រជុំអំពីគម្រោងមួយចំនួន ដែលបាន និងកំពុងអនុវត្តបន្តនៅក្នុងក្របខ័ណ្ឌកម្ពុជា និងក្របខ័ណ្ឌអាស៊ាន រួមមាន គម្រោងអាស៊ានហាយវ៉េលេខ១ គម្រោងបណ្តាញផ្លូវដែលជាច្រកសេដ្ឋកិច្ចសំខាន់ៗ និងការតភ្ជាប់ទៅកាន់តំបន់ប៉ូលសេដ្ឋកិច្ច ដូចជា ប៉ោយប៉ែត និងបាវិតជាដើម។

ក្រុងប៉ោយប៉ែត មានតំបន់សេដ្ឋកិច្ចពិសេសចំនួន២ ដែលកំពុងដំណើរការ និងមួយទៀតស្ថិតក្នុងដំណាក់កាលសាងសង់។ យានយន្តថៃអាចចូល និងធ្វើចរាចរណ៍ក្នុងរវាង២០គីឡូម៉ែត្រ គិតចាប់ពីខ្សែបន្ទាត់ព្រំដែន និងយានយន្ត១៥០គ្រឿង ( ត្រូវបានចុះបញ្ជីការពិសេស) ត្រូវបានអនុញ្ញាតឱ្យធ្វើចរាចរណ៍ហួសពីចំណុច២០គីឡូម៉ែត្រ គិតចាប់ពីខ្សែបន្ទាត់ព្រំដែនក្នុងប្រទេសទាំងពីរ តាមកិច្ចព្រមព្រៀងដឹកជញ្ជូនឆ្លងកាត់ព្រំដែន (CETA) នៃក្របខណ្ឌមហាអនុតំបន់ទន្លេមេគង្គ។

តំបន់ព្រំដែនមានការកកស្ទះ ដោយសាររថយន្តក្រុងទេសចរណ៍រថយន្តធុនធ្ងន់ និងរថយន្តផ្ទាល់ខ្លួន។ ទំហំចរាចរណ៍របស់រថយន្តដឹកទំនិញធុនធ្ងន់ នៅច្រកប៉ោយប៉ែតគឺមានប្រមាណ ២០០គ្រឿង ក្នុងមួយថ្ងៃ។

ដោយឡែកច្រកព្រំដែនបាវិត មានតំបន់សេដ្ឋកិច្ចពិសេសចំនួន៩។ យានយន្តវៀតណាមអាចចូលកម្ពុជានិងធ្វើចរាចរណ៍ក្នុងរវាង២០គ.ម គិតចាប់ពីខ្សែបន្ទាត់ព្រំដែន និងយានយន្ត៥០០គ្រឿង (ត្រូវបានចុះបញ្ជីការពិសេស) ត្រូវបានអនុញ្ញាតឱ្យធ្វើចរាចរណ៍ហួសពីចំណុច ២០គ.ម គិតចាប់ពីខ្សែបន្ទាត់ព្រំដែនក្នុងប្រទេសនេះ តាមកិច្ចព្រមព្រៀងដឹកជញ្ជូនឆ្លងកាត់ព្រំដែន (CBTA) ក្នុងក្របខណ្ឌមហាអនុតំបន់ទន្លេមេគង្គ។

ទំហំចរាចរណ៍រថយន្តដឹកទំនិញធុនធ្ងន់នៅច្រកបាវិត គឺមានយានយន្តប្រមាណ២០០គ្រឿងក្នុងមួយថ្ងៃ ដូចគ្នានឹងច្រកប៉ោយប៉ែតដែរ៕

ធនាគារកូរ៉េធំមួយប្រកាសនៅក្នុងផ្សារហ៊ុនរបស់ខ្លួនពីការទិញមីក្រូហិរញ្ញវត្ថុប្រាសាក់តម្លៃ ៦០៣ លានដុល្លារអាមេរិក

ដោយ ប៊ី
ភ្នំពេញ៖ ធនាគារ LOLC Holdings ដែលមានមូលដ្ឋាននៅប្រទេសស្រីលង្កាកាលពីម្សិលមិញបានប្រកាសនូវការទន្ទឹងរង់ចាំយ៉ាងខ្លាំងរបស់ខ្លួនលើកិច្ចព្រមព្រៀង ៦០៣ លានដុល្លារជាមួយធនាគារផ្តល់កម្ចីរបស់កូរ៉េខាងត្បូងក្នុងអាជីវកម្មមីក្រូហិរញ្ញវត្ថុនៅកម្ពុជា។

នៅក្នុងឯកសារចងក្រងភាគហ៊ុនរបស់ធនាគារ LOLC Holdings រួមជាមួយម្ចាស់ភាគហ៊ុនភាគតិចដទៃទៀតនៃគ្រឹះស្ថានមីក្រូហិរញ្ញវត្ថុប្រាសាក់កម្ពុជា ខ្លួនបានឈានដល់កិច្ចព្រមព្រៀងទិញភាគហ៊ុន និងកិច្ចព្រមព្រៀងភាគទុនិកជាមួយធនាគារ Kookmin Bank សម្រាប់ការលក់ភាគទុនិករបស់ប្រាសាក់ ដោយទទួលបានការយល់ព្រមចុងក្រោយពី ធនាគារជាតិនៃកម្ពុជា និងគណៈកម្មាធិសេវាហិរញ្ញវត្ថុសាធារណៈនៃសាធារណរដ្ឋកូរ៉េ។

ធនាគារ Kookmin គឺជាធនាគារពាណិជ្ជកម្មធំជាងគេនៅកូរ៉េខាងត្បូង ហើយប្រាសាក់ជាក្រុមហ៊ុនមីក្រូហិរញ្ញវត្ថុធំជាងគេនៅកម្ពុជា។

ឯកសារបានឱ្យដឹងថា LOLC International Private Limited នៃប្រទេសសឹង្ហបូរីដែលជាក្រុមហ៊ុនបុត្រសម្ព័ន្ធរបស់ LOLC Holdings ដែលកាន់កាប់ ៧០ ភាគរយនៃប្រាសាក់នឹងទទួលបាន ៦០៣ លានដុល្លារអាមេរិក។

ឯកសារខាងលើបានឱ្យដឹងថា “ទឹកប្រាក់ចំនួន ៤២២ លានដុល្លារនឹងទទួលបាននៅពេលទទួលបានការយល់ព្រមពីធនាគារជាតិនៃកម្ពុជា និងសមតុល្យ ១៨១ លានដុល្លារនៅឆ្នាំ ២០២២”។

កាលពីខែធ្នូ ឆ្នាំ ២០១៩ ធនាគារផ្តល់ប្រាក់កម្ចីពាណិជ្ជកូរ៉េ KB Kookmin បានឱ្យដឹងកាលពីថ្ងៃ ព្រហស្បតិ៍ ថា ក្រុមប្រឹក្សាភិបាលរបស់ខ្លួនបានយល់ព្រមទិញភាគហ៊ុនចំនួន ៧០ ភាគរយនៅក្នុងស្ថាប័នមីក្រូហិរញ្ញវត្ថុប្រាសាក់ដែលជាអ្នកផ្តល់ប្រាក់កម្ចីនៅកម្ពុជាក្នុងតម្លៃ ៦០៣,៤ លានដុល្លារពីធនាគារ LOLC Holdings ដែលមានមូលដ្ឋាននៅប្រទេសស្រីលង្កា។

គ្រឹះស្ថានមីក្រូហិរញ្ញវត្ថុប្រាសាក់ជាគ្រឹះស្ថានទទួលប្រាក់បញ្ញើមីក្រូហិរញ្ញវត្ថុលេខ ១ ដែលកាន់កាប់ចំណែកទីផ្សារជាង ៤០ ភាគរយនៅក្នុងប្រទេសកម្ពុជាជាមួយនឹង ១៧៧ សាខា។
ធនាគារ KB Kookmin នឹងបញ្ចប់កិច្ចព្រមព្រៀងនេះក្នុងរយៈ ពេល ៣ ខែ បន្ទាប់ពីការយកចិត្តទុកដាក់ និងការយល់ ព្រមពីអាជ្ញាធរហិរញ្ញវត្ថុនៅកូរ៉េ និងកម្ពុជា។ កិច្ចព្រមព្រៀងនេះត្រូវបានរំពឹងថានឹងអនុញ្ញាតឱ្យក្រុមហ៊ុន KB Kookmin ពង្រឹងបណ្តាញធនាគារអតិថិជនរបស់ខ្លួននៅក្នុងប្រទេសអាស៊ីអាគ្នេយ៍មួយនេះ។

ប្រតិបត្តិការសាខាធនាគារចំនួន ៦ ធនាគារ KB Kookmin ទទួលបានការយល់ព្រមជាមុននៅកម្ពុជាសម្រាប់ការទិញយកនៅខែ ឧសភា។
ក្រុមហ៊ុន KB Kookmin បានឱ្យដឹងថា ខ្លួនគ្រោងនឹងទិញភាគហ៊ុនចំនួន ៣០ ភាគរយដែលនៅសល់នៅក្នុងស្ថាប័ននេះយ៉ាងហោចណាស់ពីរឆ្នាំ បន្ទាប់ពីប្រតិបត្តិការ។គ្រឹះស្ថានមីក្រូហិរញ្ញវត្ថុប្រាសាក់រកប្រាក់ចំណេញសុទ្ធ ៩១,៥ ពាន់លានវ៉ុន (៧៨,៧ លានដុល្លារ) ក្នុងឆ្នាំ ២០១៨ កើនឡើង ៣៦,៧ ភាគរយបើធៀបនឹងឆ្នាំទៅ៕

សម្តេចតេជោៈ ប្រាក់ខែកម្មករនឹងឡើងដល់១៩០ដុល្លារចាប់ពីខែមករា២០២០

ដោយ ប៊ី
ភ្នំពេញៈ សម្តេចតេជោហ៊ុន សែននាយករដ្ឋមន្រ្តីកម្ពុជាបានថ្លែងថា ប្រាក់ខែកម្មករនឹងឡើងដល់១៩០ដុល្លារ ដោយមិនគិតពីប្រាក់អត្ថប្រយោជន៍ផ្សេងៗ ចាប់ពីខែមករា ២០២០ កម្ពុជាក៏កំពុងប្រែក្លាយពីប្រទេស ដែលពឹងផ្អែកលើវិស័យកសិកម្មទាំងស្រុងទៅជាប្រទេសដែលពឹងផ្អែកទៅលើវិស័យឧស្សាហកម្ម និងសេវាកម្ម រួមទាំងវិស័យផ្សេងៗទៀត។

សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងនៅព្រឹកថ្ងៃទី៧ ខែមករា ឆ្នាំ២០២០នេះថា “ចាប់ពីខែមករា២០២០ ប្រាក់ខែកម្មករ និងឡើងដល់១៩០ដុល្លារដោយមិនគិតពីប្រាក់អត្ថប្រយោជន៍ផ្សេងៗ”។

សម្តេចតេជោបានបន្តទៀតថា “កម្ពុជាបានរើខ្លួនចេញរួចផុតពីប្រទេសក្រីក្រ ពីប្រទេសគ្មានអ្វីសោះ មកជាប្រទេសមានចំណូលមធ្យមកម្រិតទាប ព្រមទាំងកំពុងប្រឹងប្រែងអភិវឌ្ឍន៍ឲ្យក្លាយជាប្រទេសមានចំណូល មធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០”។

សម្តេចតេជោបានមានប្រសាសន៍ថា “កម្ពុជាក៏កំពុងកសាងកិត្យានុភាពលើឆាកអន្តរជាតិ តាមគោលនយោបាយការបរទេសរបស់ខ្លួនឲ្យល្បីរន្ទឺផងដែរ។ ទន្ទឹមនឹងនេះ កម្ពុជាក៏កំពុងប្រែក្លាយពីប្រទេស ដែលពឹងផ្អែកលើវិស័យកសិកម្មទាំងស្រុង ទៅជាប្រទេសដែលពឹងផ្អែកទៅលើវិស័យឧស្សាហកម្ម និងសេវាកម្ម រួមទាំងវិស័យផ្សេងៗទៀត”។

សម្តេចតេជោបានថ្លែងថា កម្ពុជាបានដាក់ចេញនូវគោលនយោបាយគាំពារសង្គម ក្នុងការផ្តល់សេវាថែទាំសេវាសុខភាព សាធារណៈជូនដល់មន្ត្រីរាជការ កម្មករ កម្មការនី និងផែនការអភិវឌ្ឍជាច្រើនទៀត។ ចាប់ពីខែមករា ២០២០ ប្រាក់ខែកម្មករ និងឡើងដល់១៩០ដុល្លារ ដោយមិនគិតពីប្រាក់អត្ថប្រយោជន៍ផ្សេងៗ”។

សម្តេចតេជោហ៊ុន សែន បានបន្តថា កម្ពុជាត្រូវតែរួមគ្នាការពារ និងថែរក្សាសន្តិភាពអោយបានគង់វង្សជាដាច់ខាត ពីព្រោះសន្តិភាពនាំមកនូវការអភិវឌ្ឍ និងរីកចម្រើន។
ចំនួនប្រាក់ឈ្នួលអប្បបរមា សម្រាប់កម្មករនិយោជិតវិស័យវាយនភណ្ឌកាត់ដេរ និងផលិតស្បែកជើងនៅឆ្នាំក្រោយនេះ បានធ្វើឡើងបន្ទាប់ពីក្រុមប្រឹក្សាជាតិប្រាក់ឈ្នួលអប្បបរមាអាណត្តិទី១ លើកទី៦ ដែលរួមមានរាជរដ្ឋាភិបាល សហជីព និងនិយោជក បើកកិច្ចប្រជុំចុងក្រោយ នាព្រឹកថ្ងៃទី២០ ខែកញ្ញា ឆ្នាំ២០១៩ ដើម្បីបោះឆ្នោតជ្រើសរើសយកតួលេខមួយធ្វើជាគោល ក្នុងនោះសន្លឹកឆ្នោតភាគច្រើន បានបោះឆ្នោតជ្រើសរើសយកតួលេខ១៨៧ដុល្លារ ហើយបន្ទាប់មក សម្តេចតេជោហ៊ុន សែនបានផ្តល់បន្ថែម៣ដុល្លារទៀតជូនកម្មករនិយោជិត ដែលធ្វើឱ្យប្រាក់ឈ្នួលពួកគេកើនឡើង១៩០ដុល្លារ នៅឆ្នាំ២០២០ខាងមុខនេះតែម្តង៕