កិច្ចព្រមព្រៀងពាណិជ្ជកម្មដំណាក់កាលទី១ រវាងអាមេរិកនិងចិន ផ្តល់ប្រយោជន៍ច្រើនដល់សេដ្ឋកិច្ចពិភពលោក

ដោយ ប៊ី

ភ្នំពេញៈ អ្នកជំនាញមកពីក្រុមហ៊ុន Standard Chartered ដែលមូលដ្ឋាននៅប្រទេសចិនបានថ្លែងថា កិច្ចព្រមព្រៀងសេដ្ឋកិច្ច និងពាណិជ្ជកម្មដំណាក់កាលទី១ រវាងអាមេរិក និងចិនផ្តល់អត្ថប្រយោជន៍ដល់សេដ្ឋកិច្ចពិភពលោក។

លោក Ding Shuang ប្រធានសេដ្ឋវិទូនៃធនាគារ Greater China and North Asia បានមានប្រសាសន៍ នៅក្នុងបទសម្ភាសន៍ថ្មីៗនេះជាមួយកាសែតស៊ីនហួរថា “ជាមួយនឹងកិច្ចព្រមព្រៀងមួយដំណាក់កាលនេះ នឹងកាត់បន្ថយហានិភ័យដែលប្រឈមមុខនឹងសេដ្ឋកិច្ចពិភពលោក”។ លោកបន្តថា “យើងគិតថាឆ្នាំ២០២០ គឺជាឆ្នាំដែលមានកំណើនទន់ខ្សោយ ប៉ុន្តែមានស្ថេរភាពសម្រាប់សេដ្ឋកិច្ចពិភពលោក”។

លោកបន្ថែមថា ការព្យាករណ៍របស់ធនាគារ សម្រាប់កំណើនសកលនៅឆ្នាំក្រោយមានចំនួន៣,៣ភាគរយ ខ្ពស់ជាងការព្យាករណ៍ត្រឹមកំនើន៣,១ភាគរយ របស់ធនាគារសម្រាប់ឆ្នាំ២០១៩។

ចិន និងអាមេរិកបានឯកភាពលើលក្ខខណ្ឌ នៃកិច្ចព្រមព្រៀងសេដ្ឋកិច្ច និងពាណិជ្ជកម្មដំណាក់កាលទី១ ដោយផ្អែកលើគោលការណ៍សមភាព និងការគោរពគ្នាទៅវិញទៅមកកាលពីដើមខែនេះ ដែលជាវឌ្ឍនភាពចុងក្រោយ សម្រាប់ភាគីទាំងពីរក្នុងការដោះស្រាយជម្លោះពាណិជ្ជកម្មរយៈពេលពីរឆ្នាំរបស់ពួកគេ។

ដោយចង្អុលបង្ហាញ ពីការអូសទាញទម្លាក់រយៈពេលវែងចំនួន៣ សម្រាប់សេដ្ឋកិច្ចពិភពលោក ដូចជា បំណុល ប្រជាសាស្ត្រ និងសេដ្ឋកិច្ចពិភពលោក លោក Ding បាននិយាយថា “កិច្ចព្រមព្រៀងសេដ្ឋកិច្ចនិងពាណិជ្ជកម្មដំណាក់កាលទី១ នឹងជួយជំរុញវិនិយោគិននៅក្នុងទីផ្សារហិរញ្ញវត្ថុពិភពលោក”។

តម្លៃប្រេងបានហក់ឡើងដល់កម្រិតខ្ពស់រយៈពេលបីខែ គិតត្រឹមសប្តាហ៍មុន គឺជាផ្នែកមួយនៃការរំពឹងទុកប្រសើរ ចំពោះការបញ្ឈប់ពាណិជ្ជកម្មរវាងអាមេរិកនិងចិន។

ភាគហ៊ុនអាមេរិក បានកើនឡើងគួរឱ្យកត់សម្គាល់ កាលពីសប្តាហ៍មុនចំពេលបង្ហាញភាពវិជ្ជមានពីក្រុមហ៊ុនផ្សារអាមេរិក ដោយភាគហ៊ុនក្រុមហ៊ុន Dow បានបន្ថែម១,១៣ ភាគរយ ក្រុមហ៊ុន S&P 500 កើន១,៦៥ភាគរយ និងក្រុមហ៊ុនNasdaq កើនឡើង២,១៨ ភាគរយ។

លោក Ding បានមានប្រសាសន៍ថា “ប្រតិកម្មទីផ្សារវិជ្ជមានបង្ហាញថា វា (កិច្ចព្រមព្រៀង) មានប្រយោជន៍ក្នុងការពង្រឹងទំនុកចិត្តអាជីវកម្ម”។

អ្នកជំនាញការរូបនេះបាននិយាយថា កិច្ចព្រមព្រៀងនេះ ក៏ផ្តល់អត្ថប្រយោជន៍ដល់ទាំងអាមេរិក និងចិនផងដែរ៕

ការសិក្សា៖ ឆ្នាំ២០១៩ ផ្ទះតម្លៃក្រោម ៥ម៉ឺនដុល្លារមានតម្រូវការខ្ពស់

ដោយ វុត្ថា

ភ្នំពេញៈ តម្រូវការលំនៅឋានរបស់ពលរដ្ឋកម្ពុជា នៅតែបន្តមានការកើនឡើងពីមួយឆ្នាំទៅមួយឆ្នាំ ដោយសារតែមានការកើនឡើងនៃមនុស្សវ័យក្មេង និងសេដ្ឋកិច្ចរបស់កម្ពុជា មានការរីកលូតលាស់ខ្លាំងក្នុងរយៈពេលប៉ុន្មានឆ្នាំចុងក្រោយនេះ។

យោងតាមការសិក្សារបស់គេហទំព័រក្នុងស្រុក១ ដែលបានផ្សព្វផ្សាយរបាយការណ៍របស់ខ្លួនកាលពីកន្លងមកនេះឱ្យដឹងថា ផ្ទះតម្លៃសមរម្យ (ក្រោម ៥ ម៉ឺនដុល្លារ) នៅតែមានតម្រូវការច្រើនជាងគេ នៅក្នុងឆ្នាំ២០១៩នេះ បើទោះបីជាភាគរយបានថយចុះប្រមាណ១០ភាគរយ។ អ្វីដែលគួរឲ្យចាប់អារម្មណ៍ គឺគម្រោងចំណាយចាប់ពី៥ម៉ឺនដុល្លារទៅ ៧.៥ ម៉ឺនដុល្លារ មានការកើនឡើងពី២១% (ឆ្នាំ ២០១៨) ទៅ ២៦% (ឆ្នាំ២០១៩)។

របាយការណ៍បន្ថែមថា “យើងអាចសន្មត់បានថាការប្រែប្រួលនេះ ដោយសារតែការកើនឡើងនៃថវិកា និងគម្រោងដ៏ច្រើន ដែលទាក់ទាញឲ្យអ្នកទិញហ៊ានបោះទុនប្រកបដោយជំនឿជឿជាក់”។

លោកឧបនាយករដ្ឋមន្រ្តីជា សុផារ៉ា រដ្ឋមន្រ្តីក្រសួងដែនដី នគរូបនីយកម្ម និងសំណង់បានគាំទ្រ ចំពោះការបង្កើតលំនៅដ្ឋាន ដែលមានតំលៃសមរម្យ ដើម្បីដោះស្រាយការកើនឡើងចំនួនប្រជាជននៅកម្ពុជា។ លោកបន្តថា ក្រសួងរៀបចំដែនដី នគរូបនីយកម្ម និងសំណង់ កំពុងយកចិត្តទុកដាក់ បន្ថែមទៀតដើម្បីស្វែងរកមធ្យោបាយសម្រាប់ផ្តល់លំនៅដ្ឋាន ដែលមានតំលៃសមរម្យ សម្រាប់ប្រជាជនចំណូលក្រោមមធ្យម នៅទូទាំងប្រទេស ដើម្បីទទួលបានលំនៅដ្ឋានប្រកបដោយភាពកក់ក្តៅ សេចក្តីថ្លៃថ្នូរ និងសុវត្ថិភាព “។

លោករដ្ឋមន្ត្រីបន្តថា “ក្រសួងដែនដី កំពុងធ្វើការជាមួយក្រសួងសេដ្ឋកិច្ច និងហិរញ្ញវត្ថុ ដើម្បីកំណត់តម្លៃផ្ទះដែលមានតំលៃសមរម្យ និងលើកទឹកចិត្តចំពោះពន្ធដារ និងនិយ័តកម្មនានា ដើម្បីលើកទឹកចិត្តឱ្យវិស័យឯកជនអនុវត្តភារកិច្ចនេះ”។

ជារួមតម្រូវការលំនៅឋាន ដែលមានតំលៃសមរម្យនៅក្នុងរាជធានីភ្នំពេញ គឺជានិន្នាការមួយ ដែលនឹងបន្តកើនឡើងពេញមួយឆ្នាំ២០១៨ និងឆ្នាំបន្តបន្ទាប់។ ជាមួយនឹងការរំពឹងទុកថា ចំនួនប្រជាពលរដ្ឋនឹងកើនឡើង នៅប៉ុន្មានឆ្នាំទៀតខាងមុខ ការគាំទ្រពីក្រសួងពាក់ព័ន្ធ និងអ្នកអភិវឌ្ឍន៍ដែលបានសម្របទៅនឹងទីផ្សារក្នុងស្រុក គ្រួសារជាច្រើននៅកម្ពុជានឹងមាន ឱកាសទទួលបានលំនៅដ្ឋានសមរម្យ ក្នុងរយៈពេលប៉ុន្មានឆ្នាំទៀតមុខនេះ៕

ចំណេះដឹង! តើអ្វីជាយុទ្ធសាស្រ្តចតុកោណដំណាក់កាលទី៤?

ដោយ វុត្ថា

ភ្នំពេញៈ រាជរដ្ឋាភិបាលកម្ពុជាអាណត្តិថ្មីទី៦នេះ ដែលបន្តដឹកនាំដោយគណបក្សប្រជាជនកម្ពុជា មានសម្តេចតេជោហ៊ុន សែន ជានាយករដ្ឋមន្ត្រី គឺមានយុទ្ធសាស្រ្តខ្ពស់បំផុត ក្នុងការអនុវត្តប្រកដោយជោគជ័យនូវ “យុទ្ធសាស្ត្រចតុកោណ” ដើម្បីកំណើនការងារ សមធម៌ និងប្រសិទ្ធភាព ក្នុងការកសាងមូលដ្ឋាន ឆ្ពោះទៅសម្រេចចក្ខុវិស័យកម្ពុជាឆ្នាំ២០៥០។

សម្រាប់ការដឹកនាំកសាងប្រទេសជាតិ ឲ្យកាន់តែមានភាពរីកចម្រើន អភិវឌ្ឍប្រទេសជាតិឆ្ពោះទៅមុខបន្តទៀត រាជរដ្ឋាភិបាលកម្ពុជា បានអនុវត្តន៍ប្រកបដោយភាពជោគជ័យនូវយុទ្ធសាស្រ្តចតុកាណ ដើម្បី កំណើន ការងារ សមធម៌ និងប្រសិទ្ធភាព នៅកម្ពុជា។ ៣ដំណាក់កាលកន្លងមកហើយ ដែលបានឲ្យប្រទេសកម្ពុជា សម្រេចបាននូវការផ្លាស់ប្តូរមុខមាត់ថ្មីគួរជាទីមោទនៈបំផុត។

បើយើងប្រៀបធៀបកាលពីជាង២០ឆ្នាំមុន ប្រទេសកម្ពុជា បានប្រែក្លាយពីប្រទេសទទួលយកទាហ៊ានមួកខៀវរបស់អង្គការសហប្រជាតិ ដើម្បីមកធ្វើប្រតិបត្តិការរក្សាសន្តិភាព មកជាប្រទេសដែលបញ្ជូនកងកម្លាំងរបស់ខ្លួន ឲ្យពាក់មួកខៀវទៅចូលរួមប្រតិបត្តិការរក្សាសន្តិភាពរបស់អង្គការសហប្រជាតិ ក្នុងប្រទេសមួយចំនួន ដែលជាចំណុចក្តៅនៅលើពិភពលោក។

កាលពីអតីកាលប្រទេសកម្ពុជា ល្បីល្បាញជាវាលពិឃាត តំបន់អសន្តិសុខ ជាចំការមីន ដែលគេភ័យខ្លាចគ្រប់គ្នា ប៉ុន្តែពេលនេះបានក្លាយទៅជាប្រទេសមានសុខសន្តិភាពពេញលេញ និងជាតំបន់ទេសចរណ៍ប្រកបដោយភាពទាក់ទាញ នៅក្នុងតំបន់អាស៊ីអាគ្នេយ៍ និងលើពិភពលោកទទួលបានភ្ញៀវទេសចររាប់លាននាក់ក្នុងមួយឆ្នាំៗ។

ក្នុងការអនុវត្តប្រកបដោយភាពជោគជ័យ នូវយុទ្ធសាស្រ្តចតុកោណទាំង៣ដំណាក់កាលកន្លងមក បានបំពេញតួនាទីយ៉ាងល្អប្រសើរ ជារបៀបវារៈអភិវឌ្ឍសង្គម-សេដ្ឋកិច្ចកម្ពុជា។ ដោយឆ្លងកាត់យុទ្ធសាស្រ្តចតុកោណទាំង៣ ដំណាក់កាលជាបន្តបន្ទាប់ បានធ្វើឲ្យកម្ពុជាប្រែមុខមាត់ថ្មី បានផ្លាស់ប្តូរយ៉ាងស៊ីជម្រៅនូវរចនាសម្ព័ន្ធសេដ្ឋកិច្ច និងលើកម្ពស់ជីវភាពប្រជាពលរដ្ឋឲ្យកាន់តែប្រសើរឡើង ទាំងខាងសម្ភារ និងស្មារតី តាមរយៈកំណើនសេដ្ឋកិច្ចប្រកដោយចីរភាព ការបង្កើតការងារជូនប្រជាពលរដ្ឋ ការអធានាសមធម៌សង្គម និងការពង្រឹងប្រសិទ្ធភាពនៃអភិបាលកិច្ចរបស់ស្ថាប័នរដ្ឋ។

កម្មវិធីនយោបាយរបស់រាជរដ្ឋាភិបាលនីតិកាលទី៦ នៃរដ្ឋសភាជាតិ និង“យុទ្ធសាស្រ្តចតុកោណ–ដំណាក់កាលទី៤” នឹងរួមគ្នាបំពេញតួនាទីជាឯកសារក្រមខណ្ឌគោលនយោបាយគ្រប់ជ្រុងជ្រោយ សម្រាប់រៀបចំ “ផែនការយុទ្ធសាស្រ្តអភិវឌ្ឍជាតិឆ្នាំ២០១៩–២០២៣” ដែលបានកំណត់សូចនាករលទ្ធផល និងពេលវេលាច្បាស់លាស់សម្រាប់ការអនុវត្ត និងត្រូវមានសង្គតិភាព ជាមួយនឹងឯកសារគោលនយោបាយ តាមវិស័យដទៃទៀត របស់រាជរដ្ឋាភិបាល។

ដោយឡែក “យុទ្ធសាស្រ្តចតុកោណ-ដំណាក់កាលពី៤” នឹងក្លាយជាមគ្គទេសដ៏ច្បាស់លាស់ សម្រាប់តម្រង់ទិសសកម្មភាព គ្រប់តូរអង្គអភិវឌ្ឍទាំងអស់ឲ្យស្ថិតនៅក្នុង “ជីវភាពនៃប្រព័ន្ធតួអង្គតែមួយ”៕

មជ្ឈមណ្ឌលពាណិជ្ជកម្មកម្ពុជាទី៦បើកសម្ពោធជាផ្លូវការនៅទីក្រុងគុនមិញ

ដោយ វុត្ថា

ប្រទេសចិនៈ មជ្ឈមណ្ឌលពាណិជ្ជកម្មកម្ពុជាទី៦ នៅទីក្រុងគុនមិញ ខេត្តយូណាន នៃសាធារណរដ្ឋប្រជាមានិតចិន ត្រូវបានសម្ពោធដាក់ឱ្យប្រើប្រាស់ជាផ្លូវ នៅថ្ងៃទី២៧ ខែធ្នូ ឆ្នាំ២០១៩ ក្រោមអធិបតីភាពលោកយឹម ឆៃលី ឧបនាយករដ្ឋមន្ត្រី ជាប្រធានក្រុមប្រឹក្សាស្តារអភិវឌ្ឍន៍វិស័យ កសិកម្ម និងជនបទ។

ចូលរួមជាអធិបតីក្នុងពិធីនោះ លោក យឹម ឆៃលីឧបនាយករដ្ឋមន្ត្រីបានមានប្រសាសន៍ថា មជ្ឈមណ្ឌលពាណិជ្ជកម្មកម្ពុជា គឺជាកន្លែងសម្រាប់ផ្សព្វផ្សាយ និងទាក់ទាញការវិនិយោគ និងធុរកិច្ច ពីបរទេសមកកាន់ប្រទេសកម្ពុជា តាមរយៈការដាក់តាំងបង្ហាញគំរូផលិតផលសក្ដានុពលកម្ពុជា និងឯកសារនានា ដែលទាក់ទងនឹងវិស័យពាណិជ្ជកម្ម វិនិយោគ វប្បធម៌ និងទេសចរណ៍នៃប្រទេសកម្ពុជា ជូនដល់វិនិយោគិន ធុរជន និងប្រជាជនចិន ដើម្បីស្វែងយល់ពីឱកាសធុរកិច្ច វិនិយោគ និងមកទស្សនាប្រទេសកម្ពុជា។

លោកបន្តថា “ការបើកមជ្ឈមណ្ឌលពាណិជ្ជកម្មកម្ពុជា ប្រចាំនៅទីក្រុងធំៗនៃប្រទេសចិន ជាយុទ្ធសាស្ត្រមួយសម្រាប់ជំរុញពាណិជ្ជកម្ម វិនិយោគ ទេសចរណ៍ និងវប្បធម៌”។លោកបន្តថា វានឹងក្លាយជាមជ្ឈមណ្ឌល ដែលជាចំណុចប្រសព្វនៃព័ត៌មាន ដែលវិនិយោគិន ធុរជន និងប្រជាជនចិនអាចទទួលបានដោយផ្ទាល់ និងនៅជិតដៃ ដើម្បីស្វែងយល់ឲ្យបានស៊ីជម្រៅ ពីផលិតផលនាំចេញសក្ដានុពល បរិយាកាសធុរកិច្ច និងវិនិយោគ ក៏ដូចជាវប្បធម៌ និងទិសដៅទេសចរណ៍នៃប្រទេសកម្ពុជា ក្នុងគោលបំណងទាក់ទាញទាំងពាណិជ្ជករ វិនិយោគិន និងទេសចរណ៍មកកាន់ប្រទេសកម្ពុជា។

លោកឧបនាយករដ្ឋមន្ត្រី បានសម្តែងសុទិដ្ឋិនិយមថា មជ្ឈមណ្ឌលពាណិជ្ជកម្មកម្ពុជានៅទីក្រុងគុនមិញ ក៏ដូចជាមជ្ឈមណ្ឌលពាណិជ្ជកម្មកម្ពុជាដទៃទៀត នឹងជួយលើកកម្ពស់កិច្ចសហប្រតិបត្តិការគ្រប់ជ្រុងជ្រោយ រវាងកម្ពុជា និងចិន ក៏ដូចជាជំរុញទំហំពាណិជ្ជកម្មទ្វេភាគីឲ្យកើនឡើងជាលំដាប់។ ជាក់ស្ដែងនៅឆ្នាំ២០១៨ យើងសម្រេចបានទំហំពាណិជ្ជកម្មសរុបចំនួន៦,៥ ពាន់លានដុល្លារ កើនឡើង១៥% បើធៀបនឹងឆ្នាំ២០១៧ ដែលមានតម្លៃត្រឹមតែ៥,៦ពាន់លានដុល្លារ។

ក្នុងឆ្នាំ២០១៩នេះដែរ ទំហំពាណិជ្ជកម្មសរុបរវាងប្រទេសទាំងពីរ នឹងកើនឡើងដល់ចំនួន៨,២ ពាន់លានដុល្លារ ស្មើនឹងកំណើនចំនួន២៧%ធៀបនឹងឆ្នាំ២០១៨។

លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មឱ្យដឹងដែរថា មជ្ឈមណ្ឌលពាណិជ្ជកម្មកម្ពុជា នៅទីក្រុងគុនមិញ ដែលជាមជ្ឈមណ្ឌលពាណិជ្ជកម្មកម្ពុជាទី៦ ដោយកម្ពុជាបានបើកមជ្ឈមណ្ឌលបែបនេះ ចំនួនប្រាំរួចមកហើយនៅទីក្រុងក្វាងចូវ ហាយនីង ស៊ីអាន ហុងកុង និងយានថាយ។

លោកបន្តថា ជាមួយនឹងមជ្ឈមណ្ឌលពាណិជ្ជកម្មទាំងប្រាំមួយ ក៏ដូចជាកិច្ចព្រមព្រៀង ដែលកម្ពុជាមានរួចមកហើយជាមួយនឹងចិន កម្ពុជា និងចិន ក៏នឹងពិនិត្យលទ្ធភាពដើម្បីឈានទៅដល់ការចរចាកិច្ចព្រមព្រៀងពាណិជ្ជកម្ម សេរីទ្វេភាគីក្នុងឆ្នាំ២០២០ ខាងមុខ ដោយទាំងអស់នេះ នឹងពង្រឹងកិច្ចសហប្រតិបត្តិការពាណិជ្ជកម្មឲ្យកាន់តែរឹងមាំ ក៏ដូចជាបង្កើតនូវផលប្រយោជន៍ទៅវិញទៅមក ជូនប្រជាជននៃប្រទេសទាំងពីរ៕

ឆ្នាំ២០២០ ជិតចូលមកដល់ អ្នកជំនាញនៅតែមានសុទិដ្ឋិនិយមលើភាពរីកចម្រើនក្នុងវិស័យអចលនទ្រព្យ

ដោយ ៖ រ៉ាណេត

ភ្នំពេញ ៖ ខណៈដែលឆ្នាំ២០១៩ជិតកន្លងផុត ត្រៀមស្វាគមន៍ឆ្នាំ២០២០ឈានចូលមកដល់ បណ្តាអ្នកជំនាញក្នុងវិស័យអចលនទ្រព្យកម្ពុជា នៅតែមានបង្ហាញពីភាពសុទិដ្ឋិនិយមចំពោះវិស័យមួយនេះដដែល ជាមួយនឹងការលើកយកហេតុផលផ្សេងៗពីគ្នាមកធ្វើជាសំអាង។

នៅក្នុងឆ្នាំ២០១៩កន្លងទៅនេះ ផ្អែកតាមទិន្នន័យដែលបង្ហាញដោយក្រសួងរៀបចំដែនដីនគរូបនីយកម្ម និងសំណង បានបញ្ជាក់ថា វិស័យសំណង់ដែលជាផ្នែកមួយយ៉ាងសំខាន់ក្នុងចំណោមផ្នែកដទៃទៀតនៃវិស័យអចលនទ្រព្យមានការកើនឡើងប្រមាណ ៧៨,៨៨ ភាគរយ ជាមួយនឹងទុនវិនិយោគសរុបចំនួន ៩ ៣៥៣ ៦៩៧ ៤៧៥ លានដុល្លារសហរដ្ឋអាមេរិក ខណៈដែលឆ្នាំ២០១៨ ទុនវិនិយោគមានត្រឹមតែ ៥ ២២៨ ៩៩២ ៥២២ ដុល្លារប៉ុណ្ណោះ ។ ទាំងនេះគឺជាការបញ្ជាក់ថា វិស័យមួយនេះមានភាពរីកចម្រើន និងអភិវឌ្ឍន៍យ៉ាងឆាប់រហ័ស។

ដោយឡែកសម្រាប់ការព្យាករណ៍នៅក្នុងឆ្នាំ២០២០ ដែលនឹងឈានមកដល់ឆាប់នេះបណ្តាអ្នកជំនាញនៅក្នុងវិស័យអចលនទ្រព្យបានបង្ហាញភាពសុទិដ្ឋិនិយមដដែល ដោយសំអាងទៅលើហេតុផលមួយចំនួនដែលបន្សល់ទុកពីឆ្នាំចាស់ រួមជាមួយនឹងគម្រោងថ្មីៗមួយចំនួនគ្រោងនឹងបង្ហាញវត្តមាននៅកម្ពុជា។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍ប្រាប់តាមទូរស័ព្ទកាលពីថ្ងៃទី២៧ ខែធ្នូ ឆ្នាំ២០១៩នេះថា នៅឆ្នាំ២០២០ខាងមុខនេះ វិស័យអចលនទ្រព្យកម្ពុជានៅតែមានភាពល្អប្រសើរ ដែលវាមិនមានសញ្ញាណាមួយបង្ហាញពីឱនភាពនោះទេ។

លោកបានបន្តថា “ខ្ញុំដូចជាមិនមើលឃើញសញ្ញាណាមួយដែលអូសទាញវិស័យអចលនទ្រព្យនៅកម្ពុជាឱ្យធ្លាក់ចុះជាងឆ្នាំចាស់នោះទេ ផ្ទុយទៅវិញ គឺអាចមានភាពល្អប្រសើរជាងឆ្នាំ២០១៩”។ លោក ច្រឹក សុខនីម បានបញ្ជាក់ថា “បច្ចុប្បន្ន ក៏ដូចជានៅឆ្នាំបន្ទាប់ គម្រោងអភិវឌ្ឍជាច្រើនកំពុងតែមានសកម្មភាពយ៉ាងសកម្ម បើទោះជានៅបណ្តាប្រទេសជិតខាងមួយចំនួន ដូចជាប្រទេសថៃជាដើមជួបបញ្ហាក៏ដោយ។

កម្ពុជាជាចំណុចគោលដៅវិនិយោគរបស់បណ្តាក្រុមហ៊ុនអន្តរជាតិជាច្រើន ដោយសារតែយើងជាប្រទេសដែលកំពុងអភិវឌ្ឍ នៅមានសក្ដានុពលច្រើនក្នុងការវិនិយោគ ជាពិសេសការព្យាយាមជំរុញ និងអូសទាញពីសំណាក់រាជរដ្ឋាភិបាលក្នុងការទាក់ទាញវិនិយោគិនមកពីប្រទេសផ្សេងៗឱ្យមកកាន់កម្ពុជា ដោយបានជួយសម្រួលធ្វើកំណែទម្រង់ផ្ទៃក្នុងមួយចំនួនទៀតផង។ ដូច្នេះ វាដូចជាមិនមានអ្វីដែលជាសញ្ញាបង្ហាញពីឱនភាពនោះទេ”។

ស្រដៀងគ្នានឹងការលើកឡើងខាងលើនេះ លោកស្រី តាំង ហួរ នាយិការក្រុមហ៊ុនអចលនទ្រព្យ AMATAK Property Service ក៏បានបង្ហាញពីសុទិដ្ឋិនិយមផងដែរថា “វាដូចជាមិនអ្វីប្រែប្រួលនោះទេ។ មនុស្សមួយចំនួនគាត់និយាយថា វិស័យអចលនទ្រព្យនៅឆ្នាំ២០២០ នឹងធ្លាក់ចុះខ្លាំង ដោយសារតែការចាកចេញរបស់ជនជាតិចិនមួយចំនួនក្រោយការបិទ Game Online ។

ហេតុផលនេះគ្រាន់តែជាចំណុចតូចតែប៉ុណ្ណោះ ប៉ុន្តែជាក់ស្ដែងគឺមិនប៉ះពាល់ខ្លាំងនោះទេ ព្រោះការវិនិយោគនៅកម្ពុជា មិនមែនមានតែក្រុមហ៊ុនតែមួយនោះទេ គឺមានក្រុមហ៊ុនអន្តរជាតិដែលមកពីបណ្តាប្រទេសនានាជាច្រើនទៀត រួមមានដូចជា កូរ៉េ ជប៉ុន និងមួយចំនួនទៀតមកពីប៉ែកអឺរ៉ុប”។

លោកស្រីនៅតែមានជំនឿថា ឆ្នាំ២០២០ខាងមុខនេះ វិស័យអចលនទ្រព្យនៅតែរក្សាភាពល្អប្រសើរដដែល ឬអាចល្អជាងឆ្នាំចាស់ជាមួយចំណូលវិនិយោគទុនថ្មីមកចាក់បំពេញបន្ថែមទៀត។

ដោយឡែកសម្រាប់នាយិកាក្រុមហ៊ុនអន្តរជាតិ CBRE Cambodia លោកស្រី អាន សុធីតា ហាក់យល់ឃើញខុសពីអ្នកជំនាញទាំង២រូបខាងលើនេះ ដោយលោកស្រីបានព្យាករណ៍ថា ឆ្នាំ២០២០ វិស័យអចលនទ្រព្យកម្ពុជា អាចមានសភាពស្រដៀងគ្នានឹងឆ្នាំ២០១៩ ឬអាចធ្លាក់ចុះបន្តិចក៏អាចថាបានដោយសារតែកត្តាមួយចំនួនដែលពាក់ព័ន្ធ។

លោកស្រី អាន សុធីតា បានមានប្រសាសន៍ថា “តាមការមើលឃើញរបស់ខ្ញុំ ក្នុងឆ្នាំ២០២០ វិស័យអចលនទ្រព្យនៅកម្ពុជា ទំនងជាមិនលូតលាស់ខ្លាំងនោះទេប្រើធៀបនឹងឆ្នាំ២០១៩ ឬអាចធ្លាក់ចុះបន្តិចក៏បានដែរ។ ភាពរីកចម្រើននៅក្នុងវិស័យមួយមិនមែនសំអាងតែសកម្មភាព និងសេដ្ឋកិច្ចក្នុងស្រុកតែមួយនោះទេ ប៉ុន្តែត្រូវពាក់ព័ន្ធនឹងបរិបទជាច្រើននៅជុំវិញ ទាំងកត្តាសេដ្ឋកិច្ច នយោបាយ កិច្ចទំនាក់ទំនង និងសេដ្ឋកិច្ចពិភពលោកផងដែរ”។

លោកស្រីបានបន្តទៀតថា “បច្ចុប្បន្ននេះបើនិយាយពីសេដ្ឋកិច្ចពិភពលោក គឺស្ថិតនៅក្នុងសញ្ញាមិនល្អនៅឡើយ ហើយសូម្បីតែបណ្តាប្រទេសដែលស្ថិតនៅតំបន់ដូចជាគ្នាក៏កំពុងជួបឱនភាពដែរ ដូចជាប្រទេសចិន និងថៃ ជាដើម ដូច្នេះទាំងអស់នេះហើយដែលជាហេតុផលដែលអាចធ្វើឱ្យមានឥទ្ធិពលដល់វិស័យអចលនទ្រព្យនៅកម្ពុជាដោយប្រយោល” ៕

រដ្ឋាភិបាលនឹងបញ្ចប់រៀបចំផែនទីបណ្ដាញផ្លូវជាតិ ផ្លូវខេត្ត និងផ្លូវថ្នល់នៅដើមឆ្នាំ២០២០

ដោយ វុត្ថា

ភ្នំពេញៈ ក្រសួងសាធារណការ និងដឹកជញ្ជូន នឹងរៀបចំផែនទីបណ្ដាញផ្លូវជាតិ ផ្លូវខេត្ត និងផ្លូវថ្នល់សំដៅផលិតចេញជាផែនទី ឱ្យបានចប់សព្វគ្រប់នៅត្រឹមឆមាសទី១ឆ្នាំ២០២០ ដើម្បីសម្រួលដល់ការងារគ្រប់គ្រង ជួសជុល និងថែទាំផ្លូវថ្នល់ឱ្យមានប្រសិទ្ធភាព។

រដ្ឋលេខាធិការក្រសួងសាធារណៈការ និងដឹកជញ្ជូន លោក លឹម ស៊ីដេនីនបានមានប្រសាសន៍ឲ្យដឹង នៅក្នុងកិច្ចប្រជុំលើការរៀបចំផែនទីបណ្ដាញផ្លូវជាតិ ផ្លូវខេត្ត និងផ្លូវថ្នល់នាល្ងាចថ្ងៃទី២៧ធ្នូនេះថា ការរៀបចំនេះ មានសារសំខាន់ជាអាទិភាពដល់គ្រប់គ្រងដីចំណីផ្លូវ តាមរយៈការ បង្កើតក្រុមការងារគណៈកម្មាធិការជាតិគ្រប់គ្រងដីចំណីផ្លូវ ការរៀបចំសិក្ខាសាលាបណ្ដុះបណ្ដាល និងផ្សព្វផ្សាយនានា និងការចូលរួមសហការពីស្ថាប័នពាក់ព័ន្ធ ដើម្បីឈានទៅគ្រប់គ្រងដីចំណីផ្លូវសម្រាប់ ការអភិវឌ្ឍហេដ្ឋារចនាសម្ព័ន្ធផ្លូវថ្នល់ រក្សាបាននូវសុវត្ថិភាពចរាចរណ៍ជូនប្រជាពលរដ្ឋ និងលើកកម្ពស់ សោភណ្ឌភាពផ្លូវថ្នល់ផងដែរ។

បណ្ដាញផ្លូវជាតិ ផ្លូវខេត្ត និងផ្លូវថ្នល់ ស្ថិតក្រោមសមត្ថកិច្ចគ្រប់គ្រងរបស់ក្រសួង សាធារណការ និងដឹកជញ្ជូន ចាំបាច់ត្រូវធ្វើបច្ចុប្បន្នភាពបញ្ជីសារពើភណ្ឌផ្លូវថ្នល់ ឱ្យបានត្រឹមត្រូវ និងធានាបាននូវប្រសិទ្ធភាពក្នុងការគ្រប់គ្រង តាមរយៈការរៀបចំជាផែនទីបណ្ដាញផ្លូវថ្នល់ឱ្យបានគ្រប់ ជ្រុងជ្រោយ៕

ស្ពានអាកាសថ្មើរជើងសន្ធរម៉ុកនឹងបញ្ចុះបឋមសិលាសាងសង់ស្អែកនេះ

ដោយ វុត្ថា

ភ្នំពេញៈ លោកឃួង ស្រេង អភិបាលរាជធានីភ្នំពេញ នឹងអញ្ជើញចូលរួមបញ្ចុះបឋមសិលាសាងសង់ស្ពានអាកាសថ្មីជើងនៅសន្ធរម៉ុក នៅថ្ងៃស្អែកនេះ ។ នេះបើយោងតាមលិខិតមួយច្បាប់ ដែលគេហទំព័រ propertyarea.asia ទទួលបាន នៅថ្ងៃទី ២៧ ខែធ្នូ ឆ្នាំ ២០១៩នេះ។

លោកក ឃួង ស្រេង អភិបាលរាជធានីភ្នំពេញ ធ្លាប់បានមានប្រសាសន៍ថា គម្រោងស្ថាបនាស្ពានអាកាសថ្មើរជើង នៅត្រង់ចំណុចមុខបឋមសិក្សាសន្ធរមុខវិញ ដើម្បីសម្រួលដល់ការធ្វើដំណើររបស់សិស្សានុសិស្ស និងប្រជាពលរដ្ឋជាពិសេសសម្រួលដល់ការបន្ថយការកកស្ទះចរាចរណ៍។ ជាមួយគ្នានេះ រដ្ឋបាលរាជធានីភ្នំពេញក៏បានសាងសង់ស្ពានអាកាសថ្មើជើងនៅម្តុំផ្សារដើមគរមួយទៀតផងដែរ។

រដ្ឋបាលរាជធានីភ្នំពេញ គ្រោងស្ថាបនាស្ពានអាកាសថ្មើរជើងចំនួន២កន្លែង នៅត្រង់ផ្សារដើមគរ និងមុខសាសាបឋមសិក្សាសន្ធរម៉ុកឱ្យហើយ នៅពាក់កណ្តាលឆ្នាំ២០២០ខាងមុខ ពោលឲ្យទាន់តាមផែនការក្នុងរយៈពេល៦ខែ ដែលជួយសម្រួលដល់ការធ្វើដំណើររបស់ប្រជាពលរដ្ឋ និងសិស្សានុសិស្សបានឆ្លងកាត់ផ្លូវ ប្រកបដោយសុវត្ថិភាពដែលមិនប្រឈម ទៅនឹងបញ្ហាគ្រោះថ្នាក់ចរាចរណ៍ណាមួយកើតឡើង ជាយថាហេតុ។

រហូតមកដល់ពេលបច្ចុប្បន្ន ស្ពានអាកាសថ្មើរជើងមាន៣កន្លែងហើយ គឺនៅតំបន់ជម្ពូវ័ន២កន្លែង និង១កន្លែងទៀត នៅតំបន់ភ្លើងស្តុបនាងគង្ហីង៕

ក្រុមហ៊ុនចិនដែលគ្រោងអភិវឌ្ឍរមណីយដ្ឋានធំមួយនៅខេត្តសៀមរាបពន្យាពេលចាប់ផ្តើមគម្រោងរបស់ខ្លួន

ដោយ ប៊ី

ភ្នំពេញៈ ក្រុមហ៊ុនផសេវាកម្មកាស៊ីណូ ដែលចុះបញ្ជីនៅហុងកុង Macau Legend Development Ltd បានឱ្យដឹងថា ក្រុមហ៊ុនបានយល់ព្រមពន្យាពេលដល់ពេល ក្នុងទិញដីពីក្រុមហ៊ុនកាន់កាប់ដីមួយចំនួននៅប្រទេសកម្ពុជា ដែលក្រុមហ៊ុនបង្កើតជាកន្លែងកម្សាន្តចម្រុះក្រោមយីហោ Macau Legend។

ក្រុមហ៊ុននេះបានបញ្ជាក់ថា ការពន្យាពេលនេះ នឹងមានរយៈពេលដល់ពាក់កណ្តាលឆ្នាំ ២០២០។ នេះបើយោងតាមគេទំព័រ GGRAsia នៅថ្ងៃនេះ។

កាលពីខែធ្នូឆ្នាំ ២០១៨ ក្រុមហ៊ុន Macau Legend បានប្រកាសថា ខ្លួនបានយល់ព្រមបង់ប្រាក់ឱ្យអ្នកលក់ដីឈ្មោះWang Jieman alias Wang Kitman ក្នុងតម្លៃ ៩០,០១លានដុល្លារអាមេរិក សម្រាប់ភាគហ៊ុនទាំងមូលនៃក្រុមហ៊ុនកម្ពុជាមួយ ឈ្មោះថា Howing Enterprises Co Ltd។ នៃដីនៅខេត្តសៀមរាបនៃប្រទេសកម្ពុជា។ អ្នកទិញបាននិយាយថា ក្រុមហ៊ុន Howing កាន់កាប់ដីប្រហែល១២០០ហិកតា នៅក្នុងខេត្តសៀមរាប។

យោងតាមកិច្ចព្រមព្រៀង ដែលបានប្រកាសកាលពីឆ្នាំមុន ការផ្ទេរដី និងការចុះឈ្មោះនៅក្រោមកម្មសិទ្ធិថ្មីគឺ “មានលក្ខខណ្ឌ និងការពេញចិត្តនៃលក្ខខណ្ឌជាក់លាក់” នៅ ឬមុនកាលបរិច្ឆេទដែលបានព្រមព្រៀងគ្នាមួយ ពោលគឺថ្ងៃត្រឹមទី២៨ ខែធ្នូ ឆ្នាំ ២០១៩ ។

នៅក្នុងឯកសារកាលពីថ្ងៃព្រហស្បតិ៍ ក្រុមហ៊ុន Macau Legend បានឱ្យដឹងថា អ្នកលក់ត្រូវការពេលវេលាបន្ថែមទៀត សម្រាប់ការបំពេញលក្ខខណ្ឌមួយចំនួន ដូច្នេះភាគីទាំងពីរបានព្រមព្រៀងគ្នានៅថ្ងៃទី២៦ ខែ ធ្នូ ដើម្បី“ បន្តពន្យាកាលបរិច្ឆេទដ៏វែងដល់ថ្ងៃទី ២៦ ខែមិថុនាឆ្នាំ ២០២០ (ឬកាលបរិច្ឆេទក្រោយៗទៀត នៅពេលដែលភាគីអាចយល់ព្រម ជាលាយលក្ខណ៍អក្សរ)។

ក្រុមហ៊ុនបានបន្ថែមទៀតថា “រាល់ល័ក្ខខ័ណ្ឌនៃការលក់ និងការទិញនឹងមិនផ្លាស់ប្តូរទេ”។

នៅពេលកិច្ចព្រមព្រៀងនេះត្រូវបានប្រកាស ក្រុមហ៊ុន Macau Legend ដែលត្រូវបានស្គាល់ថាជាប្រតិបត្តិករកន្លែងកាស៊ីណូមួយ នៅទីក្រុងម៉ាកាវ និងឡាវ បានថ្លែងថា ក្រុមហ៊ុនមានគោលបំណង អភិវឌ្ឍន៍រមណីយដ្ឋានចម្រុះមួយនៅខេត្តសៀមរាប។ ឯកសាររបស់ក្រុមហ៊ុន មិនបាននិយាយអំពីល្បែង ទាក់ទងនឹងរមណីយដ្ឋានសៀមរាបទេ។

សៀមរាបគឺជាគោលដៅទេសចរណ៍ ដ៏ពេញនិយមមួយ ដែលស្ថិតនៅជិតប្រាសាទបុរាណអង្គរវត្ត ដែលជាតំបន់បេតិកភណ្ឌពិភពលោករបស់យូណេស្កូ។

ក្រុមហ៊ុន Macau Legend មិនបានផ្តល់ព័ត៌មានលម្អិតបន្ថែមអំពីទីតាំង ដែលបានគ្រោងទុកសម្រាប់គម្រោងខេត្តសៀមរាបទេ៕

ធនាគារកូរ៉េធំមួយទិញភាគហ៊ុន ៧០ ភាគរយពីស្ថាប័នមីក្រូហិរញ្ញវត្ថុប្រាសាក់ក្នុងតម្លៃ ៦០៣,៤ លានដុល្លារ

ដោយ ប៊ី

ភ្នំពេញ៖ ធនាគារផ្តល់ប្រាក់កម្ចីពាណិជ្ជកូរ៉េ KB Kookmin បានឱ្យដឹងកាលពីថ្ងៃ ព្រហស្បតិ៍ ថា ក្រុមប្រឹក្សាភិបាលរបស់ខ្លួនបានយល់ព្រមទិញភាគហ៊ុនចំនួន ៧០ ភាគរយនៅក្នុងស្ថាប័នមីក្រូហិរញ្ញវត្ថុប្រាសាក់ដែលជាអ្នកផ្តល់ប្រាក់កម្ចីនៅកម្ពុជាក្នុងតម្លៃ ៦០៣,៤ លានដុល្លារពីធនាគារ LOLC Holdings ដែលមានមូលដ្ឋាននៅប្រទេសស្រីលង្កា។

គ្រឹះស្ថានមីក្រូហិរញ្ញវត្ថុប្រាសាក់ជាគ្រឹះស្ថានទទួលប្រាក់បញ្ញើមីក្រូហិរញ្ញវត្ថុលេខ ១ ដែលកាន់កាប់ចំណែកទីផ្សារជាង ៤០ ភាគរយនៅក្នុងប្រទេសកម្ពុជាជាមួយនឹង ១៧៧ សាខា។

ធនាគារ KB Kookmin នឹងបញ្ចប់កិច្ចព្រមព្រៀងនេះក្នុងរយៈ ពេល ៣ ខែ បន្ទាប់ពីការយកចិត្តទុកដាក់ និងការយល់ ព្រមពីអាជ្ញាធរហិរញ្ញវត្ថុនៅកូរ៉េ និងកម្ពុជា។ កិច្ចព្រមព្រៀងនេះត្រូវបានរំពឹងថានឹងអនុញ្ញាតឱ្យក្រុមហ៊ុន KB Kookmin ពង្រឹងបណ្តាញធនាគារអតិថិជនរបស់ខ្លួននៅក្នុងប្រទេសអាស៊ីអាគ្នេយ៍មួយនេះ។

ប្រតិបត្តិការសាខាធនាគារចំនួន ៦ ធនាគារ KB Kookmin ទទួលបានការយល់ព្រមជាមុននៅកម្ពុជាសម្រាប់ការទិញយកនៅខែ ឧសភា។

ក្រុមហ៊ុន KB Kookmin បានឱ្យដឹងថា ខ្លួនគ្រោងនឹងទិញភាគហ៊ុនចំនួន ៣០ ភាគរយដែលនៅសល់នៅក្នុងស្ថាប័ននេះយ៉ាងហោចណាស់ពីរឆ្នាំ បន្ទាប់ពីប្រតិបត្តិការ។គ្រឹះស្ថានមីក្រូហិរញ្ញវត្ថុប្រាសាក់រកប្រាក់ចំណេញសុទ្ធ ៩១,៥ ពាន់លានវ៉ុន (៧៨,៧ លានដុល្លារ) ក្នុងឆ្នាំ ២០១៨ កើនឡើង ៣៦,៧ ភាគរយបើធៀបនឹងឆ្នាំទៅ៕

ស្ពានអាកាសលើកដំបូងនៅក្នុងខេត្តកំពង់ស្ពឺ នឹងត្រូវសម្ពោធដាក់ឱ្យប្រើប្រាស់ជាផ្លូវការនាថ្ងៃទី ២៩ ខែធ្នូ ខាងមុខនេះ

ដោយ ៖ វុត្ថា
ភ្នំពេញ៖ រដ្ឋបាលខេត្តកំពង់ស្ពឺ នឹងរៀបចំពិធីសម្ពោធដាក់ឱ្យប្រើប្រាស់ជាផ្លូវការនូវស្ពានអាកាសអ្នកដំណើរថ្មើរជើងដែលមានឈ្មោះថា «ស្ពានតេជោសន្តិភាពកំពង់ស្ពឺ» នៅថ្ងៃអាទិត្យ ទី២៩ ខែធ្នូ ឆ្នាំ២០១៩ នេះ ស្ថិតក្នុងភូមិក្រាំងពលទេព និងភូមិពាណិជ្ជកម្ម សង្កាត់រកាធំ ក្រុងច្បារមន ខេត្តកំពង់ស្ពឺ។

យោងតាមសេចក្តីជូនដំណឹងរបស់រដ្ឋបាលខេត្តកំពង់ស្ពឺ ដែលបានផ្សេព្វផ្សាយនៅក្នុងថ្ងៃទី ២៧ ខែធ្នូ ឆ្នាំ ២០១៩ នេះឱ្យដឹងថា ដើម្បីរក្សាបាននូវសុវត្ថិភាព និងសណ្តាប់ធ្នាប់សាធារណៈ ពិសេសបញ្ចៀសបាននូវការកកស្ទះចរាចរណ៍ នៅក្នុងបរិវេណប្រារព្វពិធីនេះ រដ្ឋបាលខេត្តកំពង់ស្ពឺ បានជម្រាបជូនដល់បងប្អូនប្រជាពលរដ្ឋ និងសាធារណៈជនដែលជាម្ចាស់រថយន្តដឹកទំនិញគ្រប់ប្រភេទ និងម្ចាស់រថយន្តដឹកអ្នកដំណើរដែលធ្វើចរាចរចេញ-ចូលឆ្លងកាត់ត្រង់ចំណុចខាងលើ សូមបញ្ចៀសចរាចរណ៍តាមផ្លូវដូចខាងក្រោមចាប់ពីម៉ោង ០៦:០០នាទីព្រឹក ដល់ម៉ោង ១០:០០នាទីព្រឹក។

១-ចំពោះរថយន្តដឹកទំនិញគ្រប់ប្រភេទដែលធ្វើដំណើរពីរាជធានីភ្នំពេញ និងខេត្តព្រះសីហនុតាមបណ្តោយផ្លូវជាតិលេខ៤ សូមបញ្ចៀសទៅកាន់ផ្លូវជាតិលេខ៣

២-ចំពោះរថយន្តទេសចរណ៍គ្រប់ប្រភេទ សូមបញ្ចៀសទៅតាមច្រកកណ្តោលដុំ (ផ្លូវលេខ១០៤និង១០៥) និង តាមផ្លូវបំបែកត្រង់ចំណុចចភ្លើងស្តុបមន្ទីរសាធារណៈការ និងដឹកជញ្ជូនខេត្ត និងត្រង់ចំណុចចភ្លើងស្តុបផ្លូវបំបែកច្បារមន។

លោក វុី សំណាង អភិបាលខេត្តកំពង់ស្ពឺ បានបញ្ជាក់ថា “ខ្ញុំបាទ សូមគោរពជំរាបជូនដំណឹងដល់សាធារណជនទាំងអស់មេត្តាជ្រាបថា នៅព្រឹកថ្ងៃទី២៩ ខែធ្នូ ឆ្នាំ២០១៩ វេលាម៉ោង៧និង៣០នាទី ដែលជាខួប២០ឆ្នាំ នៃនយោបាយ«ឈ្នះ ឈ្នះ» ដែលបានដាក់ចេញដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលធ្វើឱ្យប្រទេសមួយនេះទទួលបាននូវសន្តិភាពយ៉ាងពេញលេញ ហើយផ្តល់ឱកាសអភិវឌ្ឍន៍លើគ្រប់វិស័យ”។

លោកបន្តថា “ជាក់ស្តែងនៅថ្ងៃខាងមុខនេះ រដ្ឋបាលខេត្តកំពង់ស្ពឺ នឹងធ្វើការសម្ពោធដាក់ឱ្យប្រើប្រាស់ជាផ្លូវការនូវស្ពានអាកាសដែលមានឈ្មោះ «ស្ពានតេជោសន្តិភាពកំពង់ស្ពឺ » ស្ថិតនៅត្រង់ចំណុចចំណតរថយន្តផ្សារកំពង់ស្ពឺ។ អាស្រ័យហេតុនេះ សូមសាធារណជន មេត្តាយោគយល់អធ្យាស្រ័យឱ្យរដ្ឋបាលយើងខ្ញុំបិទចរាចរណ៍មួយរយៈ (មួយព្រឹក)”។

ស្ពានអាកាសថ្មើរជើងឆ្លងកាត់ផ្លូវ ជាតិលេខ៤ ដែលមានប្រវែង ៣០ម៉ែត្រ កម្ពស់ ៥,២ម៉ែត្រ ទទឹង៣ម៉ែត្រ ធ្វើពីបេតុងអាមេ ត្រូវបានបើកការដ្ឋានសាងសង់កាលពីថ្ងៃទី២០ ខែឧសភា ឆ្នាំ២០១៩ ក្រោមជំនួយឧបត្ថម្ភ ពីលោកស្រី សៀង ចាន់ហេង អគ្គនាយកក្រុមហ៊ុន ហេង អភិវឌ្ឍន៍ ក្នុងតម្លៃសាងសង់ ៣៤ម៉ឺនដុល្លារអាមេរិក ៕