ការវិនិយោគលើគំរោងលំនៅដ្ឋានបែបលំហែរកាយកើនឡើងនៅកម្ពុជា

ដោយ ស៊ីវ ម៉េង

ភ្នំពេញ៖ ការវិនិយោគលើគំរោងអចលនទ្រព្យ បែបលំហែរកាយកំពុងកើនឡើងនៅកម្ពុជា ខណៈដែលការស្វែងរកកន្លែងលំហែរ និងសម្រាកកំសាន្តពីប្រជាជនក្នុងស្រុក និងភ្ញៀវទេសចរណ៍កើនឡើង។

ជាក់ស្តែងគំរោងជាច្រើនបានលេចឡើង ដូចជា គំរោងអភិវឌ្ឍន៍រមណីយដ្ឋានធម្មជាតិស្រះខ្វាវ និងដីឡូត៍ សម្រាប់សាងសង់ផ្ទះលំហែរកាយ ភូមិឋានសំណាង គំរោងវិនិយោកគ Relax Resort វិនិយោគរបស់ក្រុមហ៊ុន Macau Legend Development Limited ដែលមានចុះបញ្ជីនៅផ្សារហ៊ុនក្រុងហុងកុង ដែលក្រុមហ៊ុននេះបានទិញភាគហ៊ុនទាំងអស់របស់ក្រុមហ៊ុន Howing Enterprises នៅកម្ពុជាក្នុងតម្លៃ៩០លានដុល្លារ ក្នុងគោលបំណងអភិវឌ្ឍរមណីយដ្ឋានសមាហរណកម្ម (IR) នៅខេត្តសៀមរាប។

ប្រធាននាយកប្រតិបត្តិ Macau Legend Development លោក Chow Kam Fai បានឲ្យដឹងកាលពីពេលថ្មីៗនេះថា ការទិញដីនេះមានបំណងសាងសង់ និងអភិវឌ្ឍរមណីយដ្ឋានសមាហរណកម្មនៅខេត្តសៀមរាប ដែលអាចឲ្យក្រុមហ៊ុនចូលរួម និងទទួលនូវអត្ថប្រយោជន៍ពីឧស្សាហកម្មទេសចរណ៍ដែលកំពុងរីក ចម្រើនរបស់កម្ពុជា។

លោកឲ្យដឹងបន្តថា “ក្រុមប្រឹក្សាភិបាលចាត់ទុកថា លក្ខខណ្ឌនៃការទិញលក់នេះត្រឹមត្រូវ និងសមហេតុផល ហើយការទិញនេះស្ថិតក្នុងផលប្រយោជន៍របស់ក្រុមហ៊ុន និងភាគទុនិកទាំងអស់របស់ខ្លួន”។ មកពីទីក្រុងម៉ាកាវ ដែលគ្រោងវិនិយោគរមណីយដ្ឋាន សមាហរណកម្មបែបវិស្សមកាលលើផ្ទៃដី១២០០ហិកតា នៅខេត្តសៀមរាប និងគំរោងជាច្រើនទៀតនៅជាយក្រុងភ្នំពេញ។

ទោះជាយ៉ាងណាគំរោងនេះ បានពន្យាពេលរហូតមកទល់ពេលនេះ ដោយសារបញ្ហាការិយាធិបតេយ្យ ដែលបាននិងកំពុងចាក់ស្រេះនៅតាមស្ថាប័នថ្នាក់ជាតិ និងថ្នាក់ក្រោមជាតិមួយចំនួន។

ជាមួយគ្នានេះ លោកម៉ោង ម៉ាតាំងសហស្ថាបនិក និងក្រុមភាគហ៊ុនិកនៃគំរោងអភិវឌ្ឍន៍រមណីយដ្ឋានធម្មជាតិស្រះខ្វាវ និងដីឡូត៍ សម្រាប់សាងសង់ផ្ទះលំហែរកាយ បានមានប្រសាសន៍ឲ្យដឹងផងដែរថា គំរោងនេះស្ថិតនៅលើផ្ទៃដីជាង២៣ហិកតា ក្នុងនោះផ្ទៃដីជាង៤ហិកតា នឹងត្រូវរៀបចំជារំណីយដ្ឋានធម្មជាតិ ដោយមានអាងហែលទឹក ផ្ទះលំហែរ កន្លែងបោះតង់ សួនច្បារ ស្ពានសម្រាប់ទស្សនាព្រៃសហគមន៍ជាដើម។

លោកបន្តថា “ដោយសារយើងមើលឃើញប្រជាពលរដ្ឋ កាន់តែច្រើនបានចាកចេញពីទីក្រុងនៅចុងសប្តាហ៍ ដើម្បីស្វែងរកកន្លែងសំរាកកាយ និងលំហែរចុងសប្តាហ៍ ទើបយើងវិនិយោគគម្រោងនេះឡើង”។ លោកបន្តថា “គំរោងនេះមានទីតាំងជាប់ផ្ទះសំណាក់បៃតង និងគំរោងរមណីយដ្ឋានធម្មជាតិស្រះដូនរីក ដែលអភិវឌ្ឍន៍ដោយទីភ្នាក់ងារអភិវឌ្ឍន៍របស់អង្គការសហប្រជាជាតិ (UNDP)”។

ជាមួយគ្នានេះ ក្រុមហ៊ុន A2A Town Cambodia ក៏បានវិនិយោគរមណីយដ្ឋាននិងផ្ទះលំហែរកាយចុងសប្តាហ៍នៅរមណីយដ្ឋានគិរីរម្យផងដែរ ដែលគម្រោងនេះរួមមានផ្ទះស្នាក់នៅច្រើនប្រភេទ ទីលានបោះតង់ដែលអាចផ្ទុកមនុស្សបាន២០០០នាក់ និងគំរោងទីលានវាយកូនហ្គោលជាដើម។

នាយកផ្នែកអភិវឌ្ឍន៍អាជីវកម្មនៃក្រុមហ៊ុន A2A Town Cambodia លោកហ៊ិន សុជាតិ បានមានប្រសាសន៍ថា វាត្រូវការពេលវេលាបន្ថែមទៀត ដើម្បីឲ្យគំរោងនេះដំណើរការ ខណៈការសាងសង់ផ្ទះសម្រាប់លំហែរកាយលក់ ទទួលបានអតិថិជនភាគច្រើនជាជនជាតិជប៉ុន ច្រើនជាងអ្នកវិនិយោគក្នុងស្រុក។លោកបន្តថា ក្នុងចំណោមផ្ទះលំហែរកាយ ដែលសាងសង់សម្រាប់លក់ប្រមាណ៨០ផ្ទះ រហូតមកទល់ពេលនេះលក់អស់បានប្រមាណ៦០ទៅ៧០ភាគរយហើយ។

ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ថា ការវិនិយោគលើគំរោងអចលនទ្រព្យបែបរមណីយដ្ឋាន ពិតជាបាននិងកំពុងកើនឡើង ដោយសារប្រជាជនចាប់ផ្តើមស្វែងរកពេលវេលាលំហែរ ព្រោះប្រាក់ចំណូលពួកគេកើនឡើង។លោកបន្តថា យើងអាចចាត់ទុកជាផលិតផលថ្មីក្នុងវិស័យនេះនៅកម្ពុជា តែមិនមែនជារឿងថ្មីនៅបណ្តាប្រទេសនានានោះទេ។

លោកបន្តថា “ការវិនិយោគបែបនេះក៏ជាផ្នែកមួយ ជួយជំរុញការអភិវឌ្ឍសេដ្ឋកិច្ចសង្គមរបស់កម្ពុជាផងដែរ ហើយជាការជួយរដ្ឋាភិបាលក្នុងការអភិវឌ្ឍសេដ្ឋកិច្ចជាតិ”៕

រដ្ឋាភិបាលម៉ាឡេស៊ីនឹងចេញអាជ្ញាប័ណ្ណបង្កើតធនាគារឌីជីថលដល់ក្រុមហ៊ុនចំនួន៥

ដោយ វុត្ថា

ម៉ាឡេស៊ីៈ ធនាគារកណ្តាលម៉ាឡេស៊ី នឹងចេញអាជ្ញាប័ណ្ណរហូតទៅដល់ចំនួន៥ ដល់ក្រុមហ៊ុនវិយោគ ដែលមានលក្ខណៈសម្បត្តិគ្រប់គ្រាន់ ដើម្បីបង្កើតធនាគារឌីជីថលដើម្បីធ្វើជំនួញធនាគាធម្មតា រឺក៏ជាធនាគារអ៊ិស្លាមនៅក្នុងប្រទេសម៉ាឡេស៊ី។

ធនាគារNegara Malaysia បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីចុងសប្តាហ៍កន្លមកនេះថា ខ្លួនបានចេញសេចក្តីព្រាងច្បាប់ស្តីពី ការផ្តល់អាជ្ញាប័ណ្ណសម្រាប់ធនាគារឌីជីថល ដែលអនុញ្ញាតឱ្យធនាគារឌីជីថលផ្តល់ជូននូវផលិតផល និងសេវាកម្មធនាគារ ដើម្បីដោះស្រាយគម្លាតទីផ្សារនៅក្នុងផ្នែក ដែលមិនមានការគាំទ្រ និងមិនមានការអភិរក្ស។

ធនាគារកណ្តាលបាននិយាយថា “ធនាគារឌីជីថលបែបនេះ ត្រូវបានគេរំពឹងថានឹងផ្តល់ជូននូវការចូលដំណើរការប្រកបដោយអត្ថន័យ និងលើកកម្ពស់ការទទួលខុសត្រូវនៃដំណោះស្រាយហិរញ្ញវត្ថុ ដែលសមរម្យ និងមានតំលៃសមរម្យ សម្រាប់អ្នកប្រើប្រាស់ហិរញ្ញវត្ថុ” ។

យោងតាមសេចក្តីថ្លែងការណ៍បានឱ្យដឹងថា ក្របខ័ណ្ឌនេះបានបង្កើតឡើងជាផ្នែកនៃវិធានការណ៍ជាបន្តបន្ទាប់ ដែលបានអនុម័តដោយធនាគារកណ្តាល ដើម្បីឱ្យមានការប្រើប្រាស់បច្ចេកវិទ្យា ប្រកបដោយភាពច្នៃប្រឌិតនៅក្នុងវិស័យហិរញ្ញវត្ថុ។

ធនាគារកណ្តាលក៏បានគូសបញ្ជាក់ផងដែរថា ខ្លួនបានប្រកាន់យកនូវវិធីសាស្រ្តប្រកបដោយតុល្យភាព ដើម្បីធ្វើឱ្យធនាគារឌីជីថល ទទួលបានការស្នើសុំមានតម្លៃខ្ពស់ស្របពេលដែលការការពារភាពសុចរិត និងស្ថេរភាពនៃប្រព័ន្ធហិរញ្ញវត្ថុ ក៏ដូចជាផលប្រយោជន៍របស់អ្នកដាក់ប្រាក់បញ្ញើ។

ដើម្បីសម្រេចបាននូវលទ្ធផលទាំងនេះ គឺត្រូវប្រើប្រាស់ថវិកាប្រមាណ២ពាន់លានរីងហ្គីដ (ប្រហែល៤៨៤.៥៦ លានដុល្លារអាមេរិក) នៅក្នុងប្រតិបត្តិការរយៈពេល៣ទៅ ៥ ឆ្នាំដំបូង៕

ទុនវិនិយោគលើវិស័យសណ្ឋាគារមានទំហំទឹកប្រាក់ជាង៥៨៦លានដុល្លារអាមេរិក

ដោយគង់ សូរិយា

ភ្នំពេញៈ ដោយសារការរីកចម្រើនផ្នែកបដិសណ្ឋារកិច្ច កម្ពុជាបានទទួលលំហូរទុនវិនិយោគផ្នែកសណ្ឋាគាររហូតដល់ទឹកប្រាក់ជាង៥៨៦លានដុល្លារអាមេរិក ស្មើនឹងគំរោងសរុបចំនួន៦៦នៅទូទាំងប្រទេស។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់់ដែលបានបង្ហាញក្នុងសន្និបាតរបស់ខ្លួន កាលពីសប្តាហ៍មុនបានឲ្យដឹងថា សំណង់សណ្ឋាគារនៅទូទាំងប្រទេសមានចំនួន៦៦គម្រោង ស្មើនឹង៩៧៧,៨៦៧ ម៉ែត្រការ៉េ ដែលមានតម្លៃប៉ាន់ស្មានទុនវិនិយោគ៥៨៦,៣៩១,៦៧៦ដុល្លារ។ សំណង់អគារ ពាណិជ្ជកម្មនៅទូទាំងប្រទេសមានចំនួន៣១២គម្រោង ស្មើនឹងជិត៦លានម៉ែត្រការ៉េ ដែលមានតម្លៃប៉ាន់ស្មានទុនវិនិយោគប្រមាណ៣,៥១៨,០៥៣,០៤៣ដុល្លារ។

របាយការណ៍ដដែលបានបន្តទៀតថា គិតចាប់ពីឆ្នាំ២០០០ ដល់ឆ្នាំ២០១៩ បានចេញលិខិតអនុញ្ញាតិ សាងសង់នៅទូទាំងប្រទេសចំនួន៤៨,០០៤គម្រោង ផ្ទៃក្រឡា កម្រាលសំណង់សរុបចំនួន១៣១លានម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ៥១,០៣៥,១២៤,៤៥១ដុល្លារ។

គម្រោងអគារខ្ពស់ៗចាប់ពី៥ជាន់ ឡើងនៅទូទាំងប្រទេសមានចំនួន១,៦២៤អគារ (ក្នុងនោះអគារខ្ពស់ៗចាប់ពី៥ជាន់ ទៅ៩ជាន់មានចំនួន៨៧២អគារ អគារចាប់ពី១០ជាន់ទៅ១៩ជាន់ មានចំនួន៤៦១អគារ អគារចាប់ពី ២០ជាន់ ទៅ២៩ជាន់ មានចំនួន១៥៦អគារ អគារចាប់ពី៣០ជាន់ទៅ៣៩ជាន់ មានចំនួន៩៥អគារ។ អគារចាប់ពី៤០ជាន់ឡើងមានចំនួន៤០អគារ។

ដោយឡែកនៅខេត្តព្រះសីហនុ មានអគារចាប់ពី៥ជាន់ឡើងទៅ មានចំនួន២៣៨អគារ គម្រោងបុរីលំនៅឋាន និងបណ្ដុំលំនៅឋានមានលក្ខណៈបុរី មានចំនួន២៩៨គម្រោង និងលំនៅឋាន មានលក្ខណៈជាអគារសហកម្មសិទ្ធិ ក្នុងរាជធានីភ្នំពេញ គិតចាប់ពីឆ្នាំ២០១១ រហូតដល់ឆ្នាំ២០១៩ មានចំនួន២២,២៦៩ចំណែកឯកជន៕

ការតាំងបង្ហាញពីសក្ដានុពលនៃគម្រោង “ក្រុងថ្មីដីមាសសំរោងលើ” របស់ក្រុមហ៊ុន KH Land ទទួលបានជោគជ័យខ្លាំង

ដោយៈ រ៉ាណេត

ភ្នំពេញៈ ជាមួយនឹងការរៀបចំព្រឹត្តិការណ៍ដ៏អស្ចារ្យ នៃការតាំងបង្ហាញពីសក្ដានុពលនៃគម្រោង “ក្រុងថ្មីដីមាសសំរោងលើ” ស្ថិតនៅលើទីតាំងគម្រោងផ្ទាល់ដែលមានផ្ទៃដីសរុប៥០ហិកតា រយៈពេល២ថ្ងៃជាប់គ្នាកាលពីចុងសប្ដាហ៍កន្លងទៅនោះ ទទួលបានភាពជោគជ័យជាខ្លាំង ក្រោមការគាំទ្រយ៉ាងច្រើនពីសំណាក់បណ្តាក្រុមហ៊ុនជាដៃគូ អតិថិជនគាំទ្រគម្រោង ក៏ដូចជាប្រជាពលរដ្ឋនៅក្នុងតំបន់ផងដែរ។

អគ្គនាយកក្រុមហ៊ុន ខេអេច លេន ឯ.ក លោក ថុន បូរ៉ា បានមានប្រសាសន៍ឲ្យដឹង ក្នុងពិធីបើកកម្មវិធីតាំងបង្ហាញកាលពីចុងសប្តាហ៍មុនថា ក្រុមហ៊ុន ខេអេច លេន តែងតែយកចិត្តទុកដាក់លើគុណភាព ការអភិវឌ្ឍ ដើម្បីឱ្យអតិថិជនជោគជ័យ ដៃគូវិនិយោគជោគជ័យ និងខេអេចលែនជោគជ័យ ម្លោះហើយទើបបានជាក្រុមហ៊ុនធ្វើការអភិវឌ្ឍក្រងថ្មីដ៏មាសសំរោងលើនេះឡើង។

លោកបានបន្តថា “គម្រោងក្រុងថ្មីដ៏អស្ចារ្យនេះ មានការបែងចែកជា តំបន់លំនៅដ្ឋានតំបន់លំហែកាយ និងតំបន់អាជីវកម្ម រួមមាន ផ្ទះល្វែងបែបទំនើប រីសតទំហំ៣ហិកតា ហាងកាហ្វេ ជាប់ ភោជនីយដ្ឋាន ម៉ាត ឱសថដ្ឋាន សាឡន ហាងលក់ទំនិញ ហាងលក់សម្លៀកបំពាក់ និងសួនច្បារសាធារណៈ រួមទាំងហេដ្ឋារចសម្ព័ន្ធជាច្រើនទៀតប្រកបដោយគុណភាពនិងស្តង់ដាខ្ពស់”។

គម្រោងក្រុងថ្មីដែលកំពុងលេចរូបរាងឡើងនេះ ហ៊ុព័ទ្ធទៅដោយឧស្សាហកម្មធំៗ ជាតំបន់ត្រីកោណសេដ្ឋកិច្ចពិសេសដែលមាន មុំសេដ្ឋកិច្ច ៣ធំៗ ៖ មុំសេដ្ឋកិច្ចទីមួយ គឺផ្លូវជាតិលេខ៤ មុំសេដ្ឋកិច្ចទីពីរ ផ្លូវជាតិលេខ៥១ និងម៉ុំសេដ្ឋកិច្ចទី៣ គឺផ្លូវល្បឿនលឿន៦០ម៉ែត្រ និងគម្រោងផ្លូវរដ្ឋផ្សេងទៀត ដែលមានទំហំ២០ម៉ែត្រ៣០ម៉ែត្រ និង៤៥ម៉ែត្រ។ បច្ចុប្បន្ន ទីតាំងនេះ មានប្រជាជនកំពុងរស់នៅច្រើនកុះករ មានមន្ទីរពេទ្យ សាលារៀន វត្តអារាម ព្រមទាំងស្ថិតនៅក្នុងគម្រោងអភិវឌ្ឍរបស់រដ្ឋ ដែលនឹងត្រូវកាត់ចូលក្រុងក្នុងពេលឆាប់ៗខាងមុខនេះទៀតផង។

លោក ថុន បូរ៉ា បានបញ្ជាក់ថា “ក្រុមហ៊ុនខេអេច លែន មានចក្ខុវិស័យច្បាស់លាស់ ក្នុងការអភិវឌ្ឍតំបន់នេះ ឱ្យក្លាយជាក្រុងថ្មីមួយ ដែលមានប្រជាជនរស់នៅកាន់តែច្រើនកុះករបន្ថែមទៀត។ ប្រជាជនមានកន្លែងរស់នៅស្អាត សមរម្យ មានផាសុកភាព ប្រកបដោយសុភមង្គល និងសេចក្តីថ្លៃថ្នូរ អតិថិជនមានឱកាសវិនិយោគ មានអាជីវកម្មផ្ទាល់ខ្លួន និងមានឱកាសចំណេញខ្ពស់ ដែលជាការចូលរួមចំណែកលើកស្ទួយជីវភាព ប្រជាពលរដ្ឋ និងជំរុញសេដ្ឋកិច្ចក្នុងតំបន់នេះ ឱ្យកាន់តែរីកចំរើនជាបន្តបន្ទាប់ ស្របតាមផែនការយុទ្ធសាស្រ្តអភិវឌ្ឍន៍របស់រាជរដ្ឋាភិបាល”។

លោក ម៉ឹក ចិន្តា ស្ថាបនិកគេហទំព័រ Realestate.com.kh ដែលបានចូលរួមនៅក្នុងកម្មវិធីខាងលើនេះ ក៏បានបង្ហាញពីកាតយល់ឃើញផ្ទាល់ខ្លួនផងដែរថា “គម្រោងក្រុងថ្មីដីមាសសំរោងលើនេះ ពិតជាមានភាពល្អប្រសើរ និងអំណោយផលដល់វិស័យលំនៅដ្ឋានកម្រិតមធ្យម និងក្រោមមធ្យម ដែលវាមិនអាចរងឥទ្ធិពលអាក្រក់ ឬឱនភាពដូចជាគម្រោងអភិវឌ្ឍដែលមានទំហំធំៗនោះទេ។

លោកបន្តថា “គម្រោងមួយនេះ មានភាពល្អប្រសើរច្រើន ដែលស្របទៅនឹងតម្រូវការជាក់ស្ដែងរបស់ប្រជាពលរដ្ឋ ដែលមានចំណូលមធ្យម និងក្រោមមធ្យម ចង់បានដីសម្រាប់សាងសង់លំនៅដ្ឋានផ្ទាល់ខ្លួន ប៉ុន្តែមិនមានលទ្ធភាពគ្រប់គ្រាន់”។

កម្មវិធី “ការតាំងបង្ហាញពីសក្ដានុពលនៃគម្រោង “ក្រុងថ្មីដីមាសសំរោងលើ” ធ្វើឡើងដើម្បីឱ្យអតិថិជនចាស់ អតិថិជនថ្មី និងដៃគូរសហការណ៍ទាំងអស់បានយល់កាន់តែច្បាស់ពីផែនការអភិវឌ្ឍន៍គម្រោង ព្រមទាំងសិក្សាស្វែងយល់ពីការរីកចំរើននៅក្នុងតំបន់នេះនាពេលអនាគតដ៏ខ្លី។

នៅក្នុងកម្មវិធីមួយនេះ ក៏មានការចាប់ឆ្នោតផ្សងសំណាងយកចិញ្ចៀនពេជ្រ ខ្សែកមាស នឹងខ្សែដៃមាស សំរាប់អតិថិជនដែលបានទិញដី ផ្ទះ រឺគម្រោងអាជីវកម្មនៅលើគម្រោងក្រុងថ្មីដីមាសសំរោងលើផងដែរ។ ដោយឡែកនៅពេលរាត្រី ក៏មានការប្រគំតន្ត្រីសម័យយ៉ាងកក្រើក ក្រោមវត្តមានរបស់តារាចម្រៀងប្រុស ស្រី ល្បីឈ្មោះជាច្រើននាក់ប្រចាំផលិតកម្មហង្សមាស ដូចជា លោក ហ្សូណូ លោក វង្ស តារារតនា លោក ប៉ាវី កញ្ញា សុវត្ថិឌី ធីរិកា កញ្ញា សីហា កញ្ញា ជេរី រួមនឹងតារាល្បីៗផ្សេងជាច្រើនរូបទៀត៕

ចំណេះដឹង! តើអ្វីជា «យុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រងការវិនិយោគសាធារណៈ ២០១៩-២០២៥»?

ដោយ វុត្ថា

ភ្នំពេញៈ រាជរដ្ឋាភិបាលបានអនុម័ត «យុទ្ធសាស្ត្រស្តីពីការកែទម្រង់ប្រព័ន្ធគ្រប់គ្រងការវិនិយោគសាធារណៈ២០១៩-២០២៥» កាលពីថ្ងៃទី២២ខែតុលា ឆ្នាំ២០១៩ និងប្រកាសដាក់ឱ្យអនុវត្តជាផ្លូវការ នៅក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី២៥ ខែតុលា ឆ្នាំ២០១៩។

យុទ្ធសាស្ត្រស្តីពីការកែទម្រង់ ប្រព័ន្ធគ្រប់គ្រងការវិនិយោគសាធារណៈ២០១៩-២០២៥ គឺជាសមាសភាគដ៏សំខាន់មួយនៃ យុទ្ធសាស្រ្តនៃការកែទម្រង់ប្រព័ន្ធថវិកាឆ្នាំ២០១៨-២០២៥ ក្រោមក្របខ័ណ្ឌកម្មវិធីកែទម្រង់ ការគ្រប់គ្រងហិរញ្ញវត្ថុសាធារណៈ។

ឯកសារយុទ្ធសាស្រ្តនេះ បានកំណត់ក្របខ័ណ្ឌរួមមួយ ក្នុងការបង្កើតប្រព័ន្ធគ្រប់គ្រងការវិនិយោគសាធារណៈ ពីគ្រប់ប្រភពហិរញ្ញប្បទាន (ទាំងពីថវិកាជាតិ, ថវិកាហិរញ្ញប្បទានដោយដៃគូអភិវឌ្ឍន៍ និងទុនវិនិយោគឯកជន តាមយន្តការភាពជាដៃគូរវាងរដ្ឋនិងឯកជន) និងនៅគ្រប់កម្រិតរដ្ឋបាល (ទាំងថ្នាក់ជាតិ ទាំងរដ្ឋបាលថ្នាក់ក្រោមជាតិ គ្រឹះស្ថានសាធារណៈរដ្ឋបាល សហគ្រាសសាធារណៈ និងអង្គភាពសាធារណៈប្រហាក់ប្រហែល)។

ការអនុវត្តនូវយុទ្ធសាស្រ្តនេះ ចែកចែកជា២ដំណាក់កាល តាមរយៈការដាក់ចេញនូវវិធានការគោលនយោបាយសំខាន់ៗមួយចំនួន ទាំងនៅក្នុងរយៈពេលខ្លីបន្ទាន់ចំពោះមុខ និងរយៈពេលមធ្យម ដោយក្នុងនោះ ក៏មានទាំងការរៀបចំសេចក្តីព្រាង «អនុក្រឹត្យស្តីពីការគ្រប់គ្រងការវិនិយោគសាធារណៈ» ផងដែរ។

សេចក្តីព្រាងអនុក្រឹត្យនេះ គោលបំណងធានាប្រសិទ្ធភាព ស័ក្តិសិទ្ធភាព តម្លាភាព គណនេយ្យភាព និងចីរភាពនៃការ គ្រប់គ្រង គម្រោងវិនិយោគសាធារណៈ នៅតាមដំណាក់កាល នៃវដ្ដគម្រោង និងមានវិសាលភាពគ្របដណ្តប់លើការ គ្រប់គ្រងគម្រោង វិនិយោគសាធារណៈ ដែលហិរញ្ញប្បទានដោយថវិកាជាតិ ហិរញ្ញប្បទានដោយដៃគូរអភិវឌ្ឍន៍ហិរញ្ញប្បទានដោយវិស័យឯកជន តាមយន្តការPPP និងយន្តការផ្សេងទៀត ហិរញ្ញប្បទាន ដោយការធ្វើឯកជនភាវូបនីយកម្មទ្រព្យសម្បត្តិរដ្ឋ ដោយប្រភពហិរញ្ញប្បទានចម្រុះ ព្រមទាំងដោយសហគ្រាសសាធារណៈ គ្រឹះស្ថានសាធារណៈ និងអង្គភាពសាធារណៈប្រហាក់ប្រហែលដទៃទៀត។

សេចក្តីព្រាងអនុក្រឹត្យនេះ មានគោលបំណងដោះស្រាយបញ្ហានៅក្នុងប្រព័ន្ធ នៃការវិនិយោគសាធារណៈរបស់យើងបច្ចុប្បន្ន ពិសេសការប្រើប្រាស់ ធនធានវិនិយោគ របស់ប្រទេសទាំងមូល ដែលមានលក្ខណៈរាយប៉ាយ ឱ្យក្លាយទៅលក្ខណៈជាប្រព័ន្ធ ស្របទៅតាមបទដ្ឋាន និងនីតិវិធីច្បាប់ ដោយមានភ្ជាប់នូវការទទួលខុសត្រូវច្បាស់លាស់ ទាំងសម្រាប់ក្រសួងសេដ្ឋកិច្ចនិងហិរញ្ញវត្ថុ ដែលនឹងបំពេញមុខងារជាទ្វារបាលនៃការគ្រប់គ្រងគម្រោងវិនិយោគសាធារណៈ និងទាំងសម្រាប់ក្រសួង-ស្ថាប័ននានា ដែលជាប្រតិបត្តិករអនុវត្តផ្ទាល់៕

ផ្សារទំនើបនឹងកើនដល់ជាង៤០ ក្នុងរយៈពេលត្រឹម២ ទៅ៣ឆ្នាំខាងមុខនេះ

ដោយ វុត្ថា

ភ្នំពេញៈ អ្នកជំនាញបានព្យាករណ៍ថា ផ្សារទំនើបនៅក្នុងប្រទេសកម្ពុជាកើនដល់ជាង ៤០ ក្នុងរយៈត្រឹមតែ២ ទៅ៣ឆ្ នាំខាងមុខនេះ ខណៈផ្សារទំនើបដែលកំពុងដំណើរការនាពេលបច្ចុប្បន្ននេះមានចំនួនជាង២០ផ្សាររួចទៅហើយ។

មន្ត្រីស្រាវជ្រាវផ្នែកអចលនទ្រព្យជាន់ខ្ពស់ ប្រចាំនៅក្រុមហ៊ុនអន្តរជាតិ CBRE Cambodia កញ្ញា គឹម គិនកេសា បានប្រាប់គេហទំព័រ propertyarea.asia នៅថ្ងៃទី ២៨ ខែធ្នូ ឆ្នាំ ២០១៩ នេះឱ្យដឹងថា នេះគឺចំណុចល្អសម្រាប់ប្រទេសកម្ពុជា ដែលមានផ្សារទំនើបច្រើនបែបនេះ យ៉ាងណាក៏ដោយផ្សារទំនើបមួយចំនួន មានលក្ខណៈទ្រង់ទ្រាយតូចៗ ដែលគេហៅថាផ្សារសហគមន៍ (Community Malls) ដែលមានទីតាំងផ្សេងៗពីគ្នា។

កញ្ញាបន្តថា “អ្នកអភិវឌ្ឍន៍ដែលមានការការសងសង់ផ្សារទំនើប ដែលមានទីតាំងផ្សេងៗបែបនេះ វានឹងកាន់តែជួយសម្រួលដល់អ្នកប្រើប្រាស់ និងឆ្លើយតបទៅនឹងតម្រូវការផលិតផលម៉ាកល្បីៗ ចូលមកកាន់ប្រទេសកម្ពុជាមានការកើនឡើងជាបន្តបន្ទាប់”។

កញ្ញាបន្ថែមថា សម្រាប់គម្រោងផ្សារទំនើប ដែលរាជរដ្ឋាភិបាលទើបតែអនុម័តកាលពីពេលថ្មីៗនេះ គឺ គម្រោងអេអនម៉ល៣ និងផ្សារទំនើប Chip Mong គឺជាចំណុចល្អសម្រាប់ប្រទេសកម្ពុជា ដែលអាចទទួលការចាប់អារម្មណ៍ពីក្រុមហ៊ុនម៉ាកល្បីៗ នៅលើពិភពលោកមកធ្វើការវិនិយោគនៅក្នុងប្រទេសកម្ពុជា។

កញ្ញាគឹម គិនកេសាបានបន្ថែមថា កាលណាមានផ្សារទំនើបកាន់តែច្រើន នៅក្នុងប្រទេសកម្ពុជា វានឹងបង្ហាញជំនឿចិត្តទៅកាន់វិនិយោគិនតែខ្លាំងផងដែរ ទាក់ទៅទៅនឹងវិស័យសេដ្ឋកិច្ច និងផ្សាររបស់ប្រទេសកម្ពុជា។

កញ្ញាបញ្ជាក់ទៀតថា ម្យ៉ាងទៀត កាលណាមានផ្សារទំនើបកាន់តែច្រើន នឹងផុ្តល់ឱ្យមានការប្រកួតប្រជែង លើការជួលកាន់តែមានតម្លៃសមរម្យ សម្រាប់អ្នវិនិយោគិនដែលចង់ជួលហាង ឬ តូចសម្រាប់រកស៊ី។

លោក ង៉ែ ជូ អ្នកវិភាគសេដ្ឋកិច្ចកម្ពុជាបានឱ្យដឹងដែរថា ក្នុងយៈពេលប៉ុន្មានកន្លងមកនេះ ផ្សារទំនើបនៅក្នុងប្រទេសក្នុងប្រទេសកម្ពុជា មានការកើនឡើងនឹងបន្តកើនឡើងច្រើនទៅមុខទៀត តែអំណាចនៃការដើរទិញទំនិញ របសប្រជាពលរដ្ឋខ្មែរហាក់នៅមានកម្រិតនៅឡើយ ។

លោកបន្តថា “បើទោះបីអំណាចនៃការទិញរបស់ប្រជាពលរដ្ឋ នៅមានកម្រិតក៏ដោយ ប៉ុន្តែផ្សារទំនើបទាំងនោះអាចបន្តឈរជើងនឹងបាន”។ លោកបន្តថា “យ៉ាងណាចំពោះចក្ខុវិស័យរបស់អ្នកអភិវឌ្ឍន៍ គឺគេសំឡឹងមើលទៅមុខ ពោលគឺមិនសំដៅនាពេលបច្ចុប្បន្ននេះទេ ហើយការវិនិយោគលើផ្សារទំនើបនេះថែទៀត គឺស្ថិតនៅគ្រប់ជាយនៃទីក្រុងភ្នំពេញ”។

លោករំពឹងថា នាពេលអនាគត នៅពេលដែលសេដ្ឋកិច្ចរបស់ប្រទេសកម្ពុជាមានការរីកចម្រើនកាន់តែខ្លាំង និងប្រាក់ ចំណូលរបស់ប្រជាពលរដ្ឋ កាន់តែបានច្រើននោះ នឹងធ្វើឱ្យមានការដើរទំនិញ នៅក្នុងផ្សារទើបកាន់តែមានភាពទាក់ទាញ ហើយការវិយោគកាន់លើផ្សារទំនើបកាន់តែមានច្រើថែមទៀត។

រាជរដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា កាលពីពេលថ្មីៗនេះ បានអនុម័តគម្រោងអភិវឌ្ឍន៍ផ្សារទំនើបអេអន៣ និងផ្សារទំនើបជីបម៉ុងថ្មីបន្ថែមទៀត ក្នុងទឹកប្រាក់រាប់រយលានដុល្លារអាមេរិក ដែលធ្វើឱ្យកម្ពុជាកាន់តែមានការទាក់ទាញ និងជំនឿទុកចិត្តពីសំណាក់វិនិយោគិនជាតិ និងអន្តរជាតិកាន់តែច្រើនថែមទៀត៕

ក្រុមហ៊ុនអាមេរិកចង់វិនិយោគបង្កើតរោងចក្រយានយន្តនៅកម្ពុជា

ដោយ វុត្ថា

ភ្នំពេញៈ លោក W.Patric Murphy ឯកអគ្គរដ្ឋទូតសហរដ្ឋអាមេរិក ដែលទើបតែងតាំងថ្មីប្រចាំកម្ពុជា បានសិក្សាស្វែងយល់ពីគោលនយោបាយអភិវឌ្ឍន៌ វិស័យឧស្សា ហកម្មរបស់កម្ពុជា វិស័យសហគ្រាសធុនតូចនិងមធ្យម និងនីតិវិធីពាក់ព័ន្ធនិងការធ្វើពាណិជ្ជកម្មយានយន្តរបស់សហរដ្ឋអាមេរិក នៅកម្ពុជា តាមរយៈការទទួលយកស្តង់ដារយានយន្តសហរដ្ឋអាមេរិកលើទីផ្សារកម្ពុជា។

លោក Patric Murphy នៅក្នុងជំនួបសម្តែងការគួរសម និងពិភាក្សាការងារ ជាមួយ លោកចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មកាលពីពេលថ្មីៗនេះ បានសម្តែងនូវទឹកចិត្តរីករាយ ចំពោះការបំពេញបេសកកម្មទូតនៅកម្ពុជា ដើម្បីបន្តសកម្មភាព និងកិច្ចសហប្រតិបត្តិការ ជាមួយដៃគូកម្ពុជា ក្នុងនាមជាប្រទេសធ្លាប់មានទំនា ក់ទំនងកិច្ចសហប្រតិបត្តិការជាមួយគ្នា ជាយូរលង់មកហើយ ។

លោក ទេសរដ្ឋមន្ត្រី ចម ប្រសិទ្ធបានមានប្រសាសន៍ឲ្យដឹងថា ក្នុងបេសកកម្មការទូតរបស់ឯកឧត្តមទំនាក់ទំនង នៃប្រទេសទាំងពីរនឹងត្រូវពង្រឹងបន្ថែមទៀត ក្នុងកំរិតផលប្រយោជន៌រួម និងកិច្ចសហប្រតិបត្តិការទូលំទូលាយ។

ទាក់ទងនិងវិស័យឧស្សាហកម្ម លោកចម ប្រសិទ្ធ បានលើកឡើងពីភាពរីកចម្រើនលើវិស័យនេះ បន្ទាប់ពីកម្ពុជាបានធ្វើសមាហរណកម្មសេដ្ឋកិច្ចរបស់ខ្លួន ក្នុងប្រព័ន្ធពិភពលោក និងមានកិច្ចព្រមព្រៀងទ្វេភាគីរវាងកម្ពុជា និងសហរដ្ឋអាមេរិក ក៏ដូចជាជាមួយប្រទេសនានាជាដៃគូលើពិភពលោក ។

លោកបន្តថា គោលនយោបាយអភិវឌ្ឍន៌វិស័យឧស្សាហកម្មកម្ពុជា ឆ្នាំ២០១៥-២០២៥ បានផ្តោតជាសំខាន់ទៅលើការអភិវឌ្ឍន៌បដិវត្តឧស្សាហកម្ម៤.0 ជាឧស្សាហកម្មបច្ចេកវិទ្យាជាន់ខ្ពស់មួយ ហើយយកខេត្តព្រះសីហនុទាំងមូលជាតំបន់សេដ្ឋកិច្ចពិសេសពហុបំណង ។

មួយវិញទៀត ភាពរីកចម្រើនលើវិស័យឧស្សាហកម្មកាត់ដេរសម្លៀកបំពាក់ និងវាយនភ័ណ្ឌ ក៏ដូចជាស្បែកជើង រហូតដល់បច្ចុប្បន្ននេះ ដោយសារកម្ពុជាអនុវត្តនូវរូបមន្តជាគំរូ ក្នុងចំណោមប្រទេសអភិវឌ្ឍន៌តិចតួចលើពិភពលោក គឺ“ការធ្វើពាណិជ្ជកម្មផ្សារភ្ជាប់ និងស្តង់ដារការងារ” (Link Trade with Labour Standard) ជាមួយនិងកម្មវិធីរោងចក្រកាន់តែប្រសើរនៅកម្ពុជា (BFC) ស្ថិតក្រោមយន្តការត្រួតពិនិត្យរបស់អង្គការអន្តរជាតិផ្នែកការងារ (ILO) ដែលជាលក្ខ័ណ្ឌចាំបាច់មួយ ក្នុងការជម្រុញឲ្យមានការការគោរពសិទ្ធិកម្មករ និងច្បាប់ការងារជាធរមាននៅកម្ពុជា។

ទាក់ទងវិស័យសហគ្រាសធុនតូចនិងមធ្យម (SME) លោកចមប្រ សិទ្ធ ថាវិស័យនេះនៅកម្ពុជា មានចំនួនជាង៥សែនមូលដ្ឋាន សម្រាប់គាំទ្រដល់កំនើនសេដ្ឋកិច្ចជាតិ ។ ប៉ុន្តែការចុះបញ្ជីទទួលស្គាល់តាមផ្លូវច្បាប់បានត្រឹម៥% ប៉ុណ្ណោះ ដែលយើងកំពុងខិតខំជុំរុញបន្ថែមទៀតលើការងារនេះ ។

ដោយឡែកចំពោះ នីតិវិធីពាក់ព័ន្ធនិងការជុំរុញការធ្វើពាណិជ្ជកម្មយានយន្តរបស់សហរដ្ឋអាមេរិកនៅកម្ពុជា លោកចម ប្រសិទ្ធបញ្ជាក់ថា ជារួមភាគីកម្ពុជាបានឯកភាពទទួលស្គាល់ស្តង់ដារសុវត្ថិភាព យានយន្តរបស់សហរដ្ឋអាមេរិក សម្រាប់ទីផ្សារកម្ពុជា ហើយក៏បានឯកភាពគ្នា ឲ្យក្រុមការងារបច្ចេកទេសនៃប្រទេសទាំងពីរ រៀបចំឯកសារគតិយុត្តិ ដើម្បីត្រៀមចុះហត្ថលេខាជាមួយគ្នានាពេលខាងមុខ ៕

គំរោងដីឡូត៍ឋានសួគ៌ត្រពាំងរូងកំពុងទទួលបានការចាប់អារម្មណ៍ ខណៈរមណីយដ្ឋានបណ្តែតទឹកនឹងសាងសង់នៅឆ្នាំក្រោយ

ដោយគង់ សូរិយា

ភ្នំពេញៈ តំបន់ត្រពាំងរូង ស្ថិតក្នុងឃុំត្រពាំងរូង ខេត្តកោះកុង កំពុងទទួលបានការចាប់អារម្មណ៍កាន់តែខ្លាំងពីអ្នកវិនិយោគជាតិ អន្តរជាតិ តាមរយៈគំរោងវិនិយោគរមណីយដ្ឋានថ្មីមួយ ដែលនឹងសាងសង់នៅឆ្នាំ២០២០ខាងមុខនេះ។

ជាមួយនឹងភាពអំណោយផលនៃធនធានធម្មជាតិ ជាមួយនឹងទេសភាពស្រស់ត្រកាល មានព្រែកអមសងខាង ទឹកព្រែក ៦ខែសាប និង៦ខែប្រែជាទឹកប្រៃ បានធ្វើឲ្យតំបន់ត្រពាំងរូង ខេត្តកោះកុង កាន់តែមានការចាប់អារម្មណ៍ពីអ្នកវិនិយោគជាតិ និងអន្តរជាតិ។

អគ្គនាយកក្រុមហ៊ុន Easy Property Investment Co, Ltd លោកម៉ម សិរីបញ្ញា បានមានប្រសាសន៍ឲ្យដឹងកាលពីព្រឹកថ្ងៃទី២៨ ធ្នូនេះថា ដោយបានសិក្សាយ៉ាងច្បាស់ ពីសក្តានុពលទីតាំងនៅតំបន់ខាងលើនេះ ទើបក្រុមហ៊ុនលោកបានទទួលយកគំរោងរមណីយដ្ឋាននេះ ពីក្រុមហ៊ុន Golden Pig Investment Co, Ltd មកលក់។

លោកបន្តថា “តំបន់ត្រាំពាំងរូងមានលក្ខណៈពិសេស បើធៀបនឹងតំបន់ដទៃទៀតក្នុងខេត្តកោះកុង ដោយតំបន់នេះមានព្រែកទាំងសងខាង ជាមួយនឹងទឹកថ្លាឆ្វង់ និងអាចអុំទូកកំសាន្តបានយ៉ាងរីករាយ”។ លោកបន្តថា “អ្វីកាន់តែពិសេសតំបន់នេះ ក៏មានរមណីយដ្ឋាន បឹងហ្កាឡូត៍លំហែរកាយ និងគំរោងអភិវឌ្ឍន៍តំបន់អេកូទេសចរណ៍របស់រដ្ឋាភិបាលផងដែរ”។

លោកម៉ម សិរីបញ្ញាបានបន្តទៀតថា ជាមួយលក្ខខ័ណ្ឌបង់ប្រាក់សមរម្យ តម្លៃដីមានភាពសមរម្យ ខេត្តកោះកុងនឹងមានការរីកចម្រើនកាន់តែលឿន ពិសេសក្រោយពេលព្រលានយន្តហោះតារាសាគរបើកដំណើរការនាចុងឆ្នាំនេះ។

សមាជិកសភាពាណិជ្ជកម្មខេត្តកោះកុង លោកជឹង សុខម៉េងបានថ្លែងផងដែរថា ខេត្តកោះកុង ពិសេសតំបន់ត្រពាំងរូងស័ក្តិសមជាទីតាំង ដែលសមស្របសំរាប់អភិវឌ្ឍរមណីយដ្ឋានបានយ៉ាងល្អប្រសើរ ដោយសារធនធានធម្មជាតិដ៏សម្បូរបែបនៅតំបន់នេះ ពិសេសជាតំបន់ដែលស្ថិតនៅមិនឆ្ងាយពីទីរួមខេត្ត និងព្រលានយន្តហោះតារាសាគរនោះឡើយ។

លោកបន្តថា “ការរីកចម្រើននៃសេដ្ឋកិច្ចសង្គម និងគោលនយោបាយរបស់រដ្ឋាភិបាល នឹងទាក់ទាញអ្នកវិនិយោគជាតិ អន្តរជាតិទៅវិនិយោគនៅក្នុងខេត្តកោះកុងកាន់តែច្រើននាពេលអនាគត”។

ជាមួយគ្នានេះប្រធានសមាគមអ្នកជំនាញអចលនទ្រព្យកម្ពុជា លោកឃាង ពុទ្ឋីបានសរសើរ និងគាំទ្រការអភិវឌ្ឍគំរោងបែបនេះ ព្រោះវាមិនត្រឹមតែជួយជំរុញសក្តានុពលអចលនទ្រព្យក្នុងខេត្តកោះកុងនោះទេ ប៉ុន្តែវាក៏ជួយរួមចំណែកលើកកំពស់ជីវភាពប្រជាពលរដ្ឋនៅមូលដ្ឋានផងដែរ។

លោកបន្តថា “ការវិនិយោគដីដែលមានតម្លៃសមរម្យ មិនបង្កហានិភ័យណាមួយដល់អ្នកវិនិយោគជាតិ និងអន្តរជាតិនោះទេ”។ លោកបន្តថា “គំរោងដីឡូត៍រមណីយដ្ឋានឋានសួគ៌ត្រពាំងរូង ជាគំរោងល្អ ព្រោះជាគំរោងដែលមានការរៀបចំនូវMaster Plan បានត្រឹមត្រូវ និងមានចក្ខុវិស័យច្បាស់លាស់”។

លោកឃាង ពុទ្ឋី បានបន្តថា ការទិញដីឬវិនិយោគលើដីធ្លីមានតម្លៃទាបបែបនេះ មិនមានហានិភ័យដល់អ្នកវិនិយោគនោះទេ ព្រោះទោះបីជាមានវិបត្តិអ្វីកើតឡើង ក៏តម្លៃដីស្ថិតក្នុងស្ថានភាពបែបនេះមិនជាប់គាំងនោះទេ ពិសេសគំរោងមានលក្ខណៈបែបរមណីយដ្ឋានបែបនេះ នៅតែល្អសំរាប់វិនិយោ ដោយសារវាជាគំរោងបែបអេកូទេសចរណ៍ ដែលធម្មតាភ្ញៀវទេសចរណ៍ជាតិ អន្តរជាតិនៅតែបន្តដើរកំសាន្ត នៅតាមតំបន់ធម្មជាតិបែបនេះ។

អតិថិជនចាប់អារម្មណ៍ទិញដី រមណីយដ្ឋាននេះ អាចទាក់ទងតាមរយៈលេខទូរស័ព្ទ ០៩៦ ៤៩២ ៨៨៨៨, ០៨៦ ៤៨ ៥៥ ៦៦, ០៧៧ ៧៧ ៥៧ ៧៧៕

ទីផ្សារភាគហ៊ុនអាស៊ានហក់ឡើង បន្ទាប់ពីមានកិច្ចព្រមព្រៀងពាណិជ្ជកម្មរវាងអាមេរិក និងចិន

ដោយ Donald Lee

ភ្នំពេញ៖ ទីផ្សារភាគហ៊ុននៅទូទាំងតំបន់អាស៊ីអាគ្នេយ៍កំពុងតែកើនឡើងខ្ពស់ បន្ទាប់ពីកិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ ត្រូវបានបញ្ចប់ និងបញ្ចប់សង្គ្រាមពន្ធគយអស់រយៈពេលជាងមួយឆ្នាំដែលធ្វើឱ្យសេដ្ឋកិច្ចក្នុងតំបន់ស្ថិតក្នុងភាពគ្រោះថ្នាក់។

ទីផ្សារភាគហ៊ុនអាស៊ាននៅតែមានសន្ទុះកើនឡើងនៅថ្ងៃ សុក្រ នេះ ដោយទីផ្សារឥណ្ឌូនេស៊ី ថៃ និងហ្វីលីពីនកំពុងឡើងដល់កម្រិតខ្ពស់បំផុត។

ទីផ្សារហ្វីលីពីនបានកើនឡើងខ្ពស់បំផុតក្នុងរយៈពេលពីរសប្តាហ៍ចុងក្រោយនេះ ចាប់តាំងពីមានកិច្ចព្រមព្រៀងពាណិជ្ជកម្មរវាងអាមេរិក និងចិន។ ប្រទេសនេះទទួលបានកំណើនខ្ពស់បំផុត ០,៦ ភាគរយក្នុងរយៈពេលពីរសប្តាហ៍ចុងក្រោយនេះ។

រដ្ឋលេខាធិការផែនការសេដ្ឋកិច្ចសង្គមបាននិយាយកាលពីថ្ងៃពុធថា សេដ្ឋកិច្ចហ្វីលីពីនត្រូវបានគេរំពឹងថានឹងកើនឡើងដល់ ៧,៥ ភាគរយរហូតដល់ឆ្នាំ ២០២២ ទោះបីមានការធ្លាក់ចុះនៃកំណើនសេដ្ឋកិច្ចពិភពលោកក៏ដោយ។

ភាគហ៊ុនថៃបានឈានដល់កម្រិខ្ពស់បំផុតក្នុងរយៈពេលមួយខែ ហើយទីផ្សារឥណ្ឌូនេស៊ីបានកើនឡើងជាលំដាប់កន្លងមក ដោយសារសង្គ្រាមពាណិជ្ជកម្មបញ្ចប់។

កិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ បានបញ្ឈប់សង្គ្រាមពាណិជ្ជកម្មដែលមានតម្លៃថ្លៃជាងគេបំផុតមួយនៅក្នុងប្រវត្តិសាស្ត្រ ហើយបាននាំមកនូវសញ្ញាដំបូងនៃការថយចុះនៃសង្រ្គាមពាណិជ្ជកម្មរយៈពេល ១៧ ខែរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះ ដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន។

ផលប៉ះពាល់នៃសង្រ្គាមពាណិជ្ជកម្មរវាងអាមេរិក និងចិនបណ្តាលឱ្យមានការធ្លាក់ចុះកំណើនសេដ្ឋកិច្ចពិភពលោក និងការតម្រៀបឡើងវិញនូវខ្សែសង្វាក់តម្លៃពិភពលោកនៅក្នុងតំបន់អាស៊ីប៉ាស៊ីហ្វិក។

យោងតាមអ្នកតំណាងពាណិជ្ជកម្មសហរដ្ឋអាមេរិកលោក Robert Lighthizer ពិធីកិច្ចព្រមព្រៀងពាណិជ្ជកម្មត្រូវបានរំពឹងថានឹងត្រូវរៀបចំឡើងនៅសប្តាហ៍ដំបូងនៃឆ្នាំថ្មីនេះ៕

រដ្ឋាភិបាលគ្រោងអនុវត្តពន្ធលើប្រាក់ចំណូល និងពន្ធអាកទាក់ទិននឹងវិស័យវាយនភណ្ឌ

ដោយ វុត្ថា

ភ្នំពេញ៖ រដ្ឋាភិបាលគ្រោងអនុវត្តពន្ធលើប្រាក់ចំណូលនិងពន្ធអាកនានា ទាក់ទិននឹងសកម្មភាព កាត់ដេរ និងតម្រឹម” របស់គម្រោងវិនិយោគមាន លក្ខណសម្បត្តិគ្រប់គ្រាន់។

លោក ឆាយ ជាហេងអនុប្រធាននាយកដ្ឋានគ្រប់គ្រងអ្នកជាប់ពន្ធធំនៃអគ្គនាយកដ្ឋានពន្ធដារ បានឱ្យដឹងនៅក្នុង វេទិកាពន្ធដារកាលពីថ្ងៃទី ២៧ ខែធ្នូ ឆ្នាំ ២០១៩ ម្សិលមិញនេះ ថា ការរៀបចំវេទិកាពន្ធដារនៅពេលនេះ ធ្វើឡើងក្នុងគោលបំណងដើម្បីជំរុញ និងពង្រឹងកាតព្វកិច្ចសារពើពន្ធ សម្រាប់សហគ្រាសគម្រោងវិនិយោគមានលក្ខណសម្បត្តិគ្រប់គ្រាន់ ឱ្យបំពេញកាតព្វកិច្ច សារពើពន្ធរបស់ខ្លួនបានត្រឹមត្រូវស្របតាមច្បាប់ និង បទប្បញ្ញត្តិស្តីពីពន្ធដារ ចៀសវាងនូវកំហុសឆ្គងដោយប្រការ ណាមួយ ដែលអាចរងនូវការផាកពិន័យឬទោសទណ្ឌនានា។

លោកបន្តថា វេទិកានាព្រឹកនេះ ត្រូវបានរៀបចំឡើងនៅក្នុងបរិបទនៃការកែទម្រង់ស៊ីជម្រៅ លើគ្រប់វិស័យរបស់រាជរដ្ឋាភិបាលកម្ពុជា និងជាពិសេសឆ្លើយតបទៅនឹងយុទ្ធសាស្ត្រកៀរគរចំណូល ២០១៥២០២៣ ដែលរាជរដ្ឋាភិបាលមានគោលនយោបាយមិនបង្កើនអត្រាពន្ធ ឬបង្កើតពន្ធថ្មីដោយត្រូវពង្រឹងច្បាប់និងបទប្បញ្ញត្តិស្តីពីពន្ធដារមានស្រាប់ និងពង្រឹងការគ្រប់គ្រងប្រមូលចំណូលពន្ធឱ្យអស់សក្តានុពល។

លោកអនុប្រធានបានបញ្ជាក់បន្ថែមថា អគ្គនាយកដ្ឋានពន្ធដារ បានធ្វើទំនើបកម្មប្រព័ន្ធពន្ធដារជាច្រើនដែលមានដូចជា ប្រព័ន្ធគ្រប់គ្រងការបង្វិលសងអាករលើតម្លៃបន្ថែមតាមអនឡាញ (E-VAT System) ដែលទើបដាក់ឱ្យប្រើប្រាស់ជាផ្លូវការនៅពាក់កណ្តាលឆ្នាំ២០១៩ និងនាពេលដ៏ខ្លីខាងមុខនេះ អគ្គនាយកដ្ឋានពន្ធដារនឹងដាក់ឱ្យដំណើរការប្រព័ន្ធដាក់លិខិតប្រកាសពន្ធ តាមអនឡាញ (E-Filing) នៅឆ្នាំ២០២០ ក្នុងគោលបំណងសម្រួលដល់អ្នកជាប់ពន្ធក្នុងការដាក់លិខិតប្រកាសពន្ធឱ្យកាន់តែមានភាពងាយស្រួល កាត់បន្ថយពេលវេលា និងស្របតាមរបត់នៃបច្ចេកវិទ្យាសម័យទំនើបនាពេលបច្ចុប្បន្ននេះ។

លោកបន្ថែមថា ជាក់ស្តែង នាយកដ្ឋានគ្រប់គ្រងអ្នកជាប់ពន្ធធំបានសហការរៀបចំវេទិកានេះឡើងក្នុងគោលបំណងផ្តល់ភាពងាយស្រួលដល់ក្រុមហ៊ុន-សហគ្រាសដែលជាសមាជិកសមាគមស្បែកជើងកម្ពុជា (CFA) ឱ្យអនុវត្តមានតម្លាភាពប្រសិទ្ធភាព និងស័ក្ដិសិទ្ធិភាព ស្របតាមច្បាប់និងបទប្បញ្ញត្តិស្ដីពីពន្ធដារ ក្នុងគោលដៅប្រមូលចំណូលពន្ធឱ្យបានគ្រប់ និងលើសផែនការដែលកំណត់ដោយច្បាប់៕