គម្រោងធំៗចំនួន៦ត្រៀមផ្លាស់ប្តូរមាត់ខេត្តកំពតឱ្យកាន់តែមានភាពទាក់ទាញ

ដោយ វុត្ថា

ភ្នំពេញៈ ខេត្តកំពតបាននិងកំពុងអនុវត្តនូវគម្រោងធំៗចំនួន៦ ជាមួយទុនវិនិយោគរាប់រយលានដុល្លារ ដែលនឹងធ្វើឱ្យខេត្តជាប់មាត់សមុទ្រមួយនេះ កាន់តែមានភាពទាក់ទាញទេសចរណ៍បន្ថែមទៀតត ក្រោយគម្រោងទាំងនេះត្រូវបានបញ្ចប់នាពេលខាងមុខ។

ប្រធានមន្ទីរទេសចរណ៍ខេត្តកំពត លោកសយ ស៊ីណុលបានប្រាប់គេហទំព័រ propertyarea.asia នៅថ្ងៃទី៣០ ខែធ្នូ ឆ្នាំ ២០១៩ នេះឱ្យដឹងថា ខេត្តកំពតបាននឹងកំពុងអនុវត្តគម្រោង ដែលកំពុងដំណើរសាងសង់នាពេលបច្ចុប្បន្ននេះ មាន៦គម្រោងធំៗដែលរួមមានគម្រោងរម្មណីដ្ឋានដូងទេ និងគម្រោង River Park និងម្រោងធំៗ៤ផ្សេងទៀតដែលកំពុងដំណើរការសាងសង់ នៅក្នុងក្រុងកំពត រួមមាន គម្រោងអគារសណ្ឋាគារ និងអាផាតអាមិន ចំនួន៣ និងគម្រោងរម្មណីយដ្ឋានដ៏ធំផ្សងទៀត។

លោកបន្តថា ដោយឡែកក៏មានគម្រោង ដែលកំពុងអនុវត្តនៅខាងលិចក្រុងកំពតមួយទៀត ដែលរដ្ឋបាលខេត្តកំពុងជំរុញឱ្យមានការសាងសង់នៅឆ្នេរខ្សាច់ ក្នុងនោះក៏មានគម្រោងលើហេដ្ឋារចនាសម្ព័ន្ធដ៏ធំ គឺកំពង់ផែទឹកជ្រៅដែលទាក់ទាញភ្ញៀវទេសចរណ៍បានកាន់តែច្រើនថែមទៀត។

លោកបន្ថែមទៀតថា គម្រោងទាំងនេះ បាននិងកំពុងសាងសង់យ៉ាងសកម្ម ដើម្បីឆ្លើយកំណើនភ្ញៀវទេសចរណ៍ និងតម្រូវការនៃសេវាកម្ម ក៏មានកើនឡើងសម្រាប់ភ្ញៀវទេសចរណ៍ស្របទៅកម្រិតមធ្យម លើមធ្យម និងកម្រិតខ្ពស់ ។ បន្ថែមពីនេះ គម្រោងទាំងនេះ ក៏នឹងចូលរួមជួយជំរុញលើកកម្ពស់សេវាកម្មទេសចរណ៍ ក្នុងការប្រកួតប្រជែងនៅក្នុងកម្រិតជាតិ និងតំបន់។

លោកបន្ថែមទៀតថា តាមផែនការសម្រាប់គម្រោងកំពង់ផែទឹកជ្រៅ ដែលបាននឹងកំពុងសាងសង់នេះ មិនត្រឹមតែជួយសម្រួលលំហូភ្ញៀវទេសចរណ៍ នៅក្នុងប្រទេសដឹកទៅកាន់កោះនានានោះទេ ថែមទាំងតភ្ជាប់ទៅកាន់ប្រទេសជិតខាងផងដែរ ដែលអាចជួយឱ្យមានការប្រកួតប្រជែងកាន់តែខ្លាំងថែមទៀតសម្រាប់ខេត្តកំពត។

លោកធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក បានឱ្យដឹងដែរថា នៅពេលដែលមានគម្រោងវិនិយោគធំៗ បែបទេសចរណ៍ច្រើនបែបនេះ នៅក្នុងខេត្តកំពត ឬនៅខេត្តកែប វាគឺជាចំណុចល្អដល់វិស័យទេសចរណ៍ និងបង្កើនដល់ការសាងសង់ហេដ្ឋារចនាសម្ព័ន្ធ និងផ្នែកសេវាកម្មផ្សេងៗទៀត។

លោកបន្តថា ប៉ុន្តែរដ្ឋាភិបាលក៏គួតែរៀនសូត្រពីខេត្តសៀមរាបផងដែរ ជុំវិញការសាងសង់សណ្ឋាគារ និងផ្ទះសំណាក់លើសពីតម្រូវការ ។ លោកបន្តថា “ឱ្យតែមានអ្នកវិនិយោគមកវិនិយោគ ហើយចេះតែអូខេៗនោះទេ យើងត្រូវពិនិត្យតើពួកគាត់ធ្វើក្នុងទ្រង់ទ្រាយបែបណា? តើមានការសិក្សាជាក់លាក់ហើយឬនៅ? កុំឱ្យមានការសាងសង់លើសពីតម្រូវការ” ។

លោកធួន ស៊ីណាន បញ្ជាក់ទៀតថា ក្រោយពីបញ្ចប់គម្រោងសណ្ឋាគារ និងរមណីយដ្ឋានទាំងនេះ ខេត្តកំពតនឹងប្រែមុខប្រែមាត់កាន់ខ្លាំងក្លា មិនត្រឹមត្រូវប៉ុណ្ណោះ វាជួយជំរុញសេដ្ឋកិច្ចទូទៅនៅក្នុងខេត្ត ជាមួយនឹងប្រែមុខមាត់ថ្មី តាមរយៈការផ្តល់សេវាកម្មសំខាន់ផ្សេងៗ ដល់ភ្ញៀវទេសចរណ៍ដែលមកលេងកម្សាន្ត។

បើតាមប្រធានមន្ទីរទេសចរណ៍ខេត្តកំពត លោក សយ ស៊ីណុល បញ្ជាក់ទៀតថា ក្រៅពីគម្រោងធំៗទាំង ៦ នៅក្នុងក្រុងកំពត ក៏មានគម្រោងតូចៗ ធម្យមៗ ផ្សេងៗជាច្រើនទៀតបាននឹងកំពុងអនុវត្តនៅតាមតំបន់ទេសចរណ៍ នៅក្នុងខេត្តកំពតនេះផងដែរ ដើម្បីឆ្លើយតបនឹងតម្រូវការទីផ្សារទេសចរណ៍៕

ឆ្នាំចាស់ត្រៀមខ្លួនទៅកាន់អតីតកាល ឆ្នាំថ្មីត្រៀមក្លាយជាអនាគតដែលនាំមកនូវជោគជ័យ និងការចងចាំមួយ

ភ្នំពេញៈ ឆ្នាំចាស់ចាប់ផ្តើមរាប់ថយក្រោយហើយ រយៈពេល៣៦៤ថ្ងៃបានមកដល់ យើងកំពុងរង់ចាំដោយក្តីអន្ទះសារ ជាមួយនឹងអំណរឆ្នាំថ្មី (ឆ្នាំសាកល) ដែលបច្ចុប្បន្នប្រជាជាតិដែលមានអរិយធ៌មទាំងឡាយ បានប្រារពពិធីអបអរសាទរនៅគ្រប់ទូទាំងទីក្រុងនានានៅលើសាកលលោក។

គេហទំព័រ Propertyarea.asia បានធ្វើដំណើរយ៉ាងស្វាហាប់ ឆ្លងកាត់ពេលវេលាដ៏លំបាក និងរីករាយជាមួយនឹងគុណតម្លៃ មនសិកាវិជ្ជាជីវៈ ដែលផ្តល់នូវគុណតម្លៃដល់សង្គម តាមរយៈការផ្តល់ព៌តមានប្រកបដោយវិជ្ជាជីវៈ ក្រមសីលធ៌ម និងពិតឥតលំអៀង ហើយបដិសេធនូវការផ្សព្វផ្សាយព៌តមាន ដែលមានលក្ខណៈអុចអាល បំភ្លៃ បំភ្លើស និងបំពុលដល់សង្គម។

ជាមួយនឹងការរក្សាបាននូវគុណតម្លៃ ក្នុងវិស័យសារគមនាគមន៍ គេហទំព័រទទួលបានការគាំទ្រពីមិត្តអ្នកអានជាតិ អន្តរជាតិ ដោយចំនួនអ្នកអាចរបស់យើងបានឈរលំដាប់លេខ១ ក្នុងចំណោមគេហទំព័រផ្សព្វផ្សាយព៌តមាន ទាក់ទងវិស័យសេដ្ឋកិច្ច អចលនទ្រព្យ បទវិភាគស៊ីជម្រៅ ចំណេះដឹង និងទេសចរណ៍ជាដើម។ ការគាំទ្រពីម្ចាស់ក្រុមហ៊ុននានា បានធ្វើឲ្យយើងមានកំលាំងចិត្តកាន់តែខ្លាំង ដើម្បីឆ្ពោះទៅមុខ ដោយឈរលើស្មារតីជាតិនិយមមួយ ព្រោះប្រសិនជាយើងបំភ្លេចជាតិរបស់យើង តើយើងមានគុណតម្លៃឯណា មកបង្ហាញពីមោទនភាពជាតិរបស់យើង។ ហេតុនេះការថ្លែងអំណរគុណមិនគ្រប់គ្រាន់ទេ ប៉ុន្តែយើងចង់តបស្នងនូវតម្លៃមួយ ដែលមិនអាចកាត់ថ្លៃបាន តាមរយៈការបន្តផ្សព្វផ្សាយនូវដំណឹង ប្រកបដោយវិជ្ជាជីវៈ ដោយយកតម្លៃសីលធ៌មជាស្នូល ពិសេសផ្សព្វផ្សាយចំណេះដឹងនានា ដើម្បីជួយជំរុញឲ្យសង្គមនេះកាន់តែមានភាពសុខដុម។

គេហទំព័រ Propertyarea.asia បាន និងកំពុងដើរតួនាទីជាវេទិកាមួយរបស់រដ្ឋាភិបាល ដើម្បីផ្តល់មូលដ្ឋានចំណេះដឹង ដល់មិត្តអ្នកអានយកមកវិភាគពិចារណា មុនសម្រេចចិត្តវិនិយោគ និងជួយលើកកំពស់ និងជំរុញការរីកចម្រើនវិស័យសំណង់ និងអចលនទ្រព្យកាន់តែរីកចម្រើនថែមទៀត។

ជាមួយនេះ ក្នុងនាមថ្នាក់ដឹកនាំគេហទំព័រ Propertyarea.asia និងក្រុមការងារ សូមគោរពថ្លែងអំណរគុណ ដល់ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដែលមានគាំទ្រជាគោលនយោបាយ និងជាគោលការណ៍ដោយអនុញ្ញាត្តឲ្យគេហទំព័រយើងខ្ញុំបានចូលរួមចំណែកផ្សព្វផ្សាយឯកសារប្រកាស អនុក្រិត ច្បាប់បទដ្ឋានគតិយុត្តិនានា ដើម្បីផ្តល់ចំណេះដឹងដល់លោក លោកស្រីមិត្តអ្នកអានអាចទាញយកទៅប្រើប្រាស់តាមតម្រូវការរបស់ខ្លួន។ សូមថ្លែងអំណរគុណដល់ឯកឧត្តមខៀវ កាញារិទ្ឋ រដ្ឋមន្ត្រីក្រសួងព៌តមានដែលបានគាំទ្រជាគោលការណ៍ដល់ការផ្សព្វផ្សាយរបស់យើង។ ឆ្នាំចាស់ត្រៀមបញ្ចប់ទៅជាមួយអតីតកាលដ៏រីករាយ និងការចងចាំមួយ ហើយឆ្នាំថ្មី ឆ្នាំសាកល២០២០ ត្រៀមខ្លួនចូលមកជាមួយនឹងពេលវេលាថ្មី ឳកាសថ្មី គុណតម្លៃថ្មីនិងតំណាងឲ្យភាពជោគជ័យថ្មី។ សូមគោរពជូនពរដល់ថ្នាក់ដឹកនាំក្រសួងទាំងពីរ ដៃគូពាណិជ្ជកម្ម និងមិត្តអ្នកអានទាំងអស់ជួបប្រទះនូវសុខភាពល្អ ជោគជ័យលើបេសកកម្មថ្មីៗ និងជោគជ័យគ្រប់មុខជំនួញ ឬអាជីវកម្មទាំងអស់ ដែលជាការរួមចំណែកដល់សង្គមកម្ពុជា ឲ្យកាន់តែមានភាពស៊ីវិល័យថែមទៀត។ សូមគោរពជូនពីលោកយិន លាងគង់ ស្ថាបនិកនិងអគ្គនាយកគេហទំព័រនិងថ្នាក់ដឹកនាំ ព្រមទាំងក្រុមការងារនៃគេហទំព័រPropertyarea.asia៕

ក្រុងកំពង់ចាមត្រៀមរំលេចទិដ្ឋភាពដ៏ស្រស់ស្អាតនាថ្ងៃឆ្លងឆ្នាំសាកលឆ្នាំ២០២០

ដោយៈ រ៉ាណេត

កំពង់ចាមៈ ជាការត្រៀមខ្លួននៅក្នុងឱកាសអបអរសាទរ នៃពិធីបុណ្យឆ្លងឆ្នាំសកល២០១៩-២០២០ ដែលនឹងឈានចូលមកដល់នៅក្នុងពេលដ៏ខ្លីខាងមុខនេះ ក្រុងកំពង់ចាម នៅឆ្នេរខ្សាចតំបន់កោះប៉ែន បានរៀបចំយ៉ាងអស្ចារ្យ ពោរពេញដោយភាពទាក់ទាញ ជាពិសេសពន្លឺភ្លើងពណ៌នៅពេលរាត្រី ដែលក្លាយជាផលិតផលទេសចរណ៍ថ្មីមួយទៀតសម្រាប់ក្រុងកំពង់ចាម។

តំបន់ឆ្នេរកោះប៉ែន ត្រូវបានសាយភាយកេរ្តិ៍ឈ្មោះល្បាញរួចទៅហើយ តាមរយៈស្ពានឫស្សីដ៏អស្ចារ្យ ដែលខេត្តដទៃទៀតមិនអាចធ្វើបាន។ ដោយឡែកនៅក្នុងឱកាសនៃការចូលរួមអបអរសាទរនៃបុណ្យឆ្លងឆ្នាំសកល ២០១៩-២០២០ នេះ តំបន់ឆ្នេរកោះប៉ែនបានបង្កើនភាពទាក់ទាញកាន់តែខ្លាំង ជាមួយនឹងការរៀបចំតុបតែងលម្អរ ដោយពន្លឺភ្លើងពណ៌ចំរុះព្រោងព្រាតពេញតំបន់ឆ្នេរ។

ប្រធានមន្ទីរទេសចរណ៍ខេត្តកំពង់ចាម លោកស៊ាន សុគុនបានមានប្រសាសន៍ឲ្យដឹងតាមទូរស័ព្ទកាលពីរសៀលថ្ងៃទី៣០ ខែធ្នូ ឆ្នាំ២០១៩ នេះថា ស្ទើរតែទូទាំងក្រុងកំពង់ចាម សុទ្ធតែត្រូវបានរៀបចំតុបតែងលម្អរ យ៉ាងយកចិត្តទុកដាក់ឱ្យស័ក្ដិសម ទៅនឹងទីក្រុងទេសចរណ៍ដែលមានភាពស្រស់ស្អាត និងគួរជាទីទាក់ទាញ ជាពិសេសនៅតាមតំបន់កម្សាន្ត សួនសាធារណៈ ជាមួយនឹងការបំពាក់នូវពន្លឺភ្លើងពណ៌ ព្រោងព្រាតគួរឲ្យចង់ទស្សនា។

លោកបានមានប្រសាសន៍បន្តទៀតថា “ក្រោមការចង្អុលបង្ហាញពីរដ្ឋមន្ត្រីក្រសួងទេសចរណ៍ និងរដ្ឋបាលខេត្ត មន្ទីរទេសចរណ៍បានយកចិត្តទុកដាករៀបចំធ្វើយ៉ាងណាឱ្យក្រុងកំពង់ចាមក្លាយជាទីក្រុងទេសចរណ៍ដ៏ទាក់ទាញ និងពេញនិយមបំផុត”។ លោកបន្តថា “សម្រាប់តំបន់ឆ្នេរខ្សាច់កោះប៉ែន គឺខេត្តបានសម្រេចវិនិយោគឱ្យទៅវិស័យឯកជនក្នុងការរៀបចំបន្ត ដែលធ្វើយ៉ាងណាបង្កភាពងាយស្រួល និងមានសោភ័ណភាព ប្រកបដោយភាពទាក់ទាញ”។

ចាប់តាំងពីថ្ងៃទី៤-៧ ខែមករា ឆ្នាំ២០២០ខាងមុខនេះ រដ្ឋបាលខេត្តកំពង់ចាម តាមរយៈមន្ទីរទេសចរណ៍ខេត្ត នឹងមានការរៀបចំពិព័រណ៍ពីសមិទ្ធផល និងផលិតផលនានាក្នុងខេត្តចំនួនជាង២០០ស្តង់ ដើម្បីបង្ហាញពីផលិតភាពនៅទូទាំងខេត្ត រួមជាមួយនឹងគម្រោងប្រែក្លាយតំបន់ឆ្នេរខ្សាច់កោះប៉ែន ឱ្យទៅជាសហគមន៍ទេសចរណ៍ ដោយសិក្សាយកចំណុចល្អៗពីតំបន់កោះទ្រង់ខេត្តក្រចេះ។

ប្រធានសមាគមទីភ្នាក់ងារទេសចរណ៍កម្ពុជា លោកស្រីឆាយ ស៊ីវលីន បានបង្ហាញពីការគាំទ្រទៅលើការរៀបចំ ដែលប្រែក្លាយតំបន់ឆ្នេរខ្សាច់កោះប៉ែន ឱ្យទៅជាផលិតផលទេសចរណ៍ថ្មីប្រកបដោយភាពទាកទាញ។

លោកស្រីបានបន្តថា “វិស័យទេសចរណ៍អាចរីកចម្រើនទៅបាន ទាល់តែមានការចូលរួមពីវិស័យឯកជនជាចាំបាច់ ដែលរាល់សកម្មភាពនានាស្របទៅនឹងគោលដៅដែលបានកំណត់ដោយក្រសួង”។

លោកស្រីបានលើកឡើងថា “នៅពេលដែលយើងអាចបង្កើត នូវផលិតផលទេសចរណ៍ថ្មីប្រកបដោយភាពទាក់ទាញ នឹងជួយទប់ស្កាត់ទេសចរក្នុងស្រុកចាកចេញទៅក្រៅប្រទេស ហើយរឹតតែប្រសើរបំផុតនោះ គឺប្រតិបត្តិករអាចចាត់បញ្ចូលទៅក្នុងកញ្ចប់ ដើម្បីលក់ចេញទៅក្រៅប្រទេស ដើម្បីទាក់ទាញទេសចរអន្តរជាតិនានា មកកាន់កម្ពុជាបន្ថែមទៀត ដែលអាចជួយបង្កើនចំណូលដល់សេដ្ឋកិច្ចជាតិ ក៏ដូចជាប្រជាពលរដ្ឋក្នុងតំបន់ផងដែរ”៕

ទីក្រុងប៉េកាំងកំពុងធ្វើការយ៉ាងសកម្មក្នុងការដោះស្រាយភាពតានតឹងពាណិជ្ជកម្មជាមួយអាមេរិក

ដោយ ប៊ី

ភ្នំពេញៈ ក្រសួងពាណិជ្ជកម្មចិនបាននិយាយកាលពីថ្ងៃអាទិត្យថា រដ្ឋាភិបាលចិនបានដោះស្រាយយ៉ាងសកម្ម នូវភាពតានតឹងពាណិជ្ជកម្មជាមួយអាមេរិកក្នុងឆ្នាំនេះ ខណៈប្រទេសទាំងពីរ បានព្រមព្រៀងលើកិច្ចព្រមព្រៀងពាណិជ្ជកម្មមួយដំណាក់កាល។

ក្រសួងបានថ្លែងនៅលើគេហទំព័ររបស់ខ្លួនថា ខ្លួនបានការពារផលប្រយោជន៍របស់ប្រទេស និងប្រជាជន។

កិច្ចព្រមព្រៀងដំណាក់កាលទី១ នឹងតម្រូវឱ្យអាមេរិកដកពន្ធលើទំនិញចិនវិញ ហើយជាថ្នូរ ទីក្រុងប៉េកាំងទិញផលិតផលកសិកម្មអាមេរិកបន្ថែមទៀត។ កិច្ចព្រមព្រៀងនេះនឹងមានបទប្បញ្ញត្តិផ្សេងទៀត ដូចជាចិនបើកចំហរវិស័យហិរញ្ញវត្ថុរបស់ខ្លួន សម្រាប់ក្រុមហ៊ុនអាមេរិក។

លោក Cui Tiankai ឯកអគ្គរដ្ឋទូតចិនប្រចាំសហរដ្ឋអាមេរិក បាននិយាយកាលពីថ្ងៃ សៅរ៍ថា ទីក្រុងប៉េកាំងនឹងអនុវត្តតាមការសន្យាពាណិជ្ជកម្មរបស់ខ្លួន ជាមួយទីក្រុងវ៉ាស៊ីនតោន។ កិច្ចព្រមព្រៀងដំណាក់កាលទី១បច្ចុប្បន្ន កំពុងស្ថិតក្រោមការត្រួតពិនិត្យផ្នែកច្បាប់នៅក្នុងចិន និងអាមេរិកដោយប្រធានាធិបតីTrump បាននិយាយថា លោកនឹងចុះហត្ថលេខាលើកិច្ចព្រមព្រៀងនេះ នៅក្នុងពិធីមួយជាមួយមេដឹកនាំចិនលោកស៊ី ជិនពីងនៅខែ មករាខាងមុខ។

កិច្ចព្រមព្រៀងតំណាក់កាលទី១ នឹងផ្តល់ផលប្រយោជន៍ ដល់វិស័យកសិកម្មរបស់អាមេរិក ដោយសារពួកគេបានរងគ្រោះ ដោយសារសង្គ្រាមពាណិជ្ជកម្មអាមេរិក និងចិន។

រដ្ឋបាលរបស់លោក Trump បានអនុវត្តថវិកាសង្គ្រោះចំនួន១៦ពាន់ លានដុល្លារសម្រាប់វិស័យកសិកម្ម ដែលត្រូវបានរងការរិះគន់ពីគណបក្សប្រជាធិបតេយ្យ ដែលបានផ្តល់ផលប្រយោជន៍ដល់កសិករ ដែលរងផលប៉ះពាល់អាក្រក់បំផុត ដោយសារភាពតានតឹងពាណិជ្ជកម្ម។

អាមេរិក និងចិន នឹងនៅតែត្រូវការឈានដល់កិច្ចព្រមព្រៀង ដ៏ទូលំទូលាយមួយដើម្បីបញ្ចប់សង្គ្រាមពាណិជ្ជកម្មរវាងប្រទេសទាំងពីរ។ អាមេរិកបានដាក់ពន្ធលើទំនិញចិន ពីព្រោះរដ្ឋបាល Trump ជឿជាក់ថា យុទ្ធសាស្ត្រនេះនឹងការពារចិន ពីការគ្របដណ្ដប់លើទីផ្សារពិភពលោក ជាមួយនឹងផលិតផលដែលមានតំលៃទាប ដែលនឹងធ្វើឱ្យផលិតកម្មអាមេរិកងើបឡើងវិញ។ រដ្ឋបាល Trump ក៏ចាត់ទុកចិនថាជាអ្នករៀបចំរូបិយប័ណ្ណ៕

សណ្ឋាគារផ្កាយ៥ដំបូងគេ ខ្ពស់ជាងគេនៅរាជធានីភ្នំពេញបានប្រកាសបិទទ្វារ

ដោយគង់ សូរិយា

ភ្នំពេញៈ សណ្ឋាគារកម្រិតផ្កាយ៥ ដែលមានកំពស់ខ្ពស់ជាងគេលើកដំបូងនៅក្រុងភ្នំពេញ The Great Duke Phnom Penh បានប្រកាសបិទទ្វារចាប់ពីថ្ងៃទី៣១ ធ្នូស្អែកនេះ។

ជាអតីតសណ្ឋាគារ Inter-Continental Hotel ក្រោយមកប្តូរឈ្មោះទៅជា The Great Duke Phnom Penh នៅដើមឆ្នាំ២០១៨ នៅពេលនេះបានប្រកាសបិទទ្វារសោកស្តាយ ខណៈព៌តមានលំអិតពីការបិទទ្វារនេះ មិនត្រូវបានបញ្ជាក់ឲ្យដឹងលំអិតនោះទេ។

គឺសណ្ឋាគារនេះបានដើរតួនាទីយ៉ាងសំខាន់ ក្នុងការជួយឲ្យកម្ពុជាធ្វើជាម្ចាស់ផ្ទះនៃកិច្ចប្រជុំអាស៊ានលើកដំបូងកាលពីឆ្នាំ២០០២ ដែលទទួលបដិសណ្ឋារកិច្ចមេដឹកនាំធំៗមួយចំនួន។

យោងតាមសេចក្តីជូនដំណឹងផ្លូវការរបស់ The Great Duke Phnom Penh បានបញ្ជាក់ថា មូលហេតុដែលនាំឲ្យសណ្ឋាគារផ្កាយ៥ ដែលមានអាយុជាង២ទសវត្សរ៍នេះបិទទ្វារ គឺដោយសារបញ្ហាសេដ្ឋកិច្ច។

សេចក្តីជូនដំណឹងបានលើកឡើងថា ជូនចំពោះបុគ្គលិកទាំងអស់។ អាស្រ័យដោយមូលហេតុសេដ្ឋកិច្ច យើងមានការសោកស្តាយ សូមជម្រាបជូនដំណឹងថា សណ្ឋាគារនឹង ត្រូវបិទដំណើរការនៅថ្ងៃទី៣១ ខែធ្នូ ឆ្នាំ២០១៩។ ចាប់ពីថ្ងៃជូនដំណឹងនេះ តទៅបុគ្គលិកទាំងអស់ ត្រូវបានស្នើឲ្យសម្រាកមិនបាច់មកធ្វើការទេ។ ម្យ៉ាងវិញទៀត សណ្ឋាគារបានចាត់តាំងការិយាល័យមេធាវី អេចប៊ីអេស (HBS) ឲ្យទទួលដោះស្រាយនូវដំណើរការនៃការ បិទសណ្ឋាគារនេះ រួមទាំងការគិតគូរដោះស្រាយ ពីអត្ថប្រយោជន៍របស់បុគ្គលិកទាំងអស់ ទៅតាមផ្លូវច្បាប់ជាធរមាន។

ប្រធានសមាគមទេសចរណ៍អាស៊ីប៉ាស៊ីហ្វិកប្រចាំកម្ពុជា លោកធួន ស៊ីណានបានសម្តែងការសោកស្កាយ និងបានមានប្រសាសន៍ថា ការបិទទ្វារសណ្ឋាគារនេះសុខៗ នឹងធ្វើឲ្យប៉ះពាល់ផងដែរដល់មុខមាត់ទីក្រុងភ្នំពេញ ប៉ុន្តែលោកមិនបញ្ជាក់លំអិតនោះទេ៕

អ្នកជំនាញនិយាយពីចំណុចវិជ្ជមាន និងបញ្ហាប្រឈមក្នុងវិស័យអចលនទ្រព្យឆ្នាំ២០២០

ដោយ ៖ រ៉ាណេត

ភ្នំពេញ ៖ នៅក្នុងឆ្នាំ២០២០ ដែលនឹងឈានចូលមកដល់ក្នុងបន្តិចទៀតខាងមុខនេះត្រូវបានអ្នកជំនាញក្នុងវិស័យអចលនទ្រព្យបង្ហាញពីស្ថានភាពប្រែប្រួលទៅលើផ្នែកមួយចំនួនដែលនឹងបន្តភាពល្អប្រសើរ ហើយផ្នែកមួយចំនួនទៀតអាចជួបឱនភាព និងអាស្រ័យទៅតាមតំបន់។

សម្រាប់ការសម្លឹងមើលពីស្ថានភាពទីផ្សារអចលនទ្រព្យនៅក្នុងឆ្នាំ២០២០ខាងមុខនេះ អ្នកជំនាញបានធ្វើការព្យាករណ៍ផ្សេងៗពីគ្នាទៅលើស្ថានភាពនៃការកើនឡើងនៃតម្រូវការ រួមជាមួយនឹងការធ្លាក់លើផ្នែកមួយចំនួន។

ប្រធានសមាគមន៍អ្នកវាយតម្លៃ និងភ្នាក់ងារអចលនវត្ថុកម្ពុជា បានមានប្រសាសន៍តាមទូរស័ព្ទកាលពីចុងសប្ដាហ៍កន្លងទៅនេះថា ឆ្នាំ២០២០ វិស័យអចលនទ្រព្យនឹងនៅតែបន្តរក្សាភាពល្អប្រសើរដដែល ហើយវាមិនទាន់មានសញ្ញាណាមួយដែលបង្ហាញថាជាចំណុចអវិជ្ជមាននៅឡើយនោះទេ។

លោកបានបញ្ជាក់ថា “ចំពោះគម្រោងសាងសង់សំណង់អគារនឹងនៅតែបន្តសកម្មភាព ខណៈដែលផ្នែកមួយនេះនៅមានជាច្រើនដែលបន្សល់ពីឆ្នាំចាស់ ដែលក្នុងនោះរាប់ទាំងសំណង់ពាណិជ្ជកម្ម សំណង់លំនៅដ្ឋានសហកម្មសិទ្ធិ ក៏ដូចជាគម្រោងលំនៅដ្ឋានលក្ខណៈបែបបុរី និងគម្រោងបុរី”។ ដោយឡែកពាក់ព័ន្ធទៅនឹងតម្រូវការដីធ្លីវិញ ត្រូវបានលោកអះអាងថា បើជាទោះមិនមានភាពពុះកញ្ជ្រោលដូចចុងឆ្នាំ២០១៨ និងដើមឆ្នាំ២០១៩ ប៉ុន្តែតម្លៃមិនមានការធ្លាក់ចុះនោះទេ ។

នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានបង្ហាញពីការព្យាករណ៍របស់ខ្លួនថា នៅក្នុងឆ្នាំ២០២០ សម្រាប់វិស័យអចលនទ្រព្យ នឹងមានផ្នែកមួយចំនួនជួបសភាពទ្រឹង ឬអាចឱនភាព ដែលវាអាស្រ័យទៅតាមតំបន់ផ្សេងគ្នា។ លោកស្រីបានមានប្រសាសន៍ប្រាប់តាមទូរស័ព្ទថា “ផ្អែកតាមស្ថានភាព និងការមើលឃើញជាក់ស្ដែងនៅក្នុងឆ្នាំ២០១៩ បានធ្វើឱ្យអ្នកវិនិយោគមួយចំនួនមានការប្រុងប្រយ័ត្នមុនពេលបណ្តាក់ទុន ដោយសារតែកត្តាសំខាន់ៗមួយចំនួនដូចជាបញ្ហានៃសង្គ្រាមពាណិជ្ជកម្មរវាងប្រទេសមហាអំណាចដែលនៅមិនទាន់មានដំណោះស្រាយល្អ និងស្ថានភាពសេដ្ឋកិច្ច នយោបាយនៅក្នុងតំបន់”។

លោកស្រី អាន សុធីតា បានមានប្រសាសន៍បន្តទៀតថា “ឆ្នាំ២០២០ មានផ្នែកមួយចំនួននៅតែរក្សាភាពល្អប្រសើរ ដូចជា វិស័យលំនៅដ្ឋាន វិស័យសំណង់ (បន្សល់ពីឆ្នាំចាស់) និងតម្រូវការទីតាំងជួលសម្រាប់ការិយាល័យដែលនឹងមានតម្រូវការខ្ពស់។ ផ្ទុយទៅវិញ ដូចជាផ្នែកផ្សារទំនើប អាចនឹងជួបឱនភាព ដោយសារតែការផ្គត់ផ្គង់មានចំនួនច្រើន និងមានភាពប្រកួតប្រជែងខ្លាំង ធ្វើឱ្យតម្លៃជួលធ្លាក់ចុះ។ ដោយឡែកសម្រាប់ វិស័យដីធ្លីនៅតំបន់មួយចំនួនជួបសភាពទ្រឹង ឬធ្លាក់ចុះតម្លៃបន្តិចបន្តួច ដែលអាស្រ័យទៅតាមតំបន់”៕

រយៈពេល ៣ឆ្នាំ ខេត្តព្រះសីហនុទាក់ទាញលំហូទុនវិយោគក្នុងវិស័យសំណង់ជិត ៦ពាន់លានដុល្លារ

ដោយ វុត្ថា

ខេត្តព្រះសីហនុ៖ ក្នុងរយៈពេល៣ឆ្នាំចុងក្រោយនេះ ខេត្តព្រះសីហនុ ទទួលបាននូវការចាប់អារម្មណ៍ និងការបណ្តាក់ទុនយ៉ាងច្រើនសន្ធឹកសន្ធាប់ ពីអ្នកវិនិយោគបរទេស ជាពិសេសអ្នកវិនិយោគជនជាតិចិនស្ថិតក្នុងលំដាប់លេខ១ ជាហេតុធ្វើឱ្យខេត្តព្រះសីហនុ មានសន្ទុះអភិវឌ្ឍរីកចំរើនយ៉ាងឆាប់រហ័សលើវិស័យសំខាន់ៗដូចជា ឧស្សាហកម្ម ពាណិជ្ជកម្ម ដឹកជញ្ជូន សំណង់ ទេសចរណ៍ និងកាស៊ីណូ។

ក្នុងចំណោមនេះវិស័យសំណង់មានការអភិវឌ្ឍរីកចម្រើនយ៉ាងគំហុកគួរឱ្យកត់សំគាល់ គិតចាប់ពីឆ្នាំ២០១៧ដល់ខែធ្នូឆ្នាំ២០១៩ មានចំនួន១,១៣៧គម្រោង មានផ្ទៃក្រឡាសរុប ១០,៧៧១,៧២០.៩២ម៉ែត្រក្រឡាស្មើនិងទុនវិនិយោគសរុប ៥,៨៧១,៩៧៦,៩៨៥.៥០ ដុល្លារ ។

លោក គួចចរើន អភិបាលខេត្តព្រះសីហនុ នៅក្នុងពិធីជួបជុំអ្នកវិនិយោគិនចិន ដើម្បីអភិវឌ្ឍន៍កោះរ៉ុង កាលពីចុងសប្តាហ៍កន្លងមកនេះ ឱ្យដឹងថា អ្នកវិនិយោគជាតិ-អន្តរជាតិ ដែលមកធ្វើការបណ្តាក់ទុនវិនិយោគ ឬបានកំពុងសិក្សាអំពីផែន ការវិនិយោគនានានៅខេត្តព្រះសីហនុ ដែលជាខេត្តប្រកបដោយ សក្តានុពល គឺជាការសំរេចចិត្តដ៏ត្រឹមត្រូវ។

លោកបន្តថា ខេត្តព្រះសីហុត្រូវបានរាជរដ្ឋាភិបាលកម្ពុជា កំណត់ជាប៉ូលអភិវឌ្ឍ ជាតិប្រកបដោយ ចីរភាព នៅតំបន់ឆ្នេរសមុទ្រកម្ពុជា តាមរយៈ ការអភិវឌ្ឍទីក្រុងទំនើប រមណីយដ្ឋានឆ្នេរសមុទ្រដែលស្អាតបំផុតលើសកលលោក និងជា តំបន់ សេដ្ឋកិច្ចពិសេសគំរូពហុបំណង ច្រកចេញចូលអន្តរជាតិ មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងទីផ្សារសកលលោក និងជាមជ្ឈមណ្ឌល ឧស្សាហកម្ម ផលិតកម្មបែបបច្ចេកវិទ្យាទំនើប ដែលមានសុខដុមនីយកម្មជាមួយនឹងបរិស្ថាន រស់នៅល្អប្រសើរ ដោយផ្អែកលើសក្តានុពលសេដ្ឋកិច្ច ទីតាំងភូមិ សាស្រ្តនៃតំបន់ឆ្នេរសមុទ្រកម្ពុជា និងក្របខណ្ឌជាតិ តំបន់ និងអន្តរជាតិ ព្រមទាំងយុទ្ធសាស្រ្តចតុកោណតំណាក់កាលទី៤ គោលនយោបាយជាតិស្តីពីការរៀបចំដែនដីនៃព្រះរាជាណាចក្រកម្ពុជា គោលនយោបាយអភិវឌ្ឍវិស័យឧស្សាហកម្មកម្ពុជា និង គោលនយោបាយតាមវិស័យសំខាន់ៗជាច្រើនទៀតរបស់រាជរដ្ឋាភិបាល ។

លោកបន្ថែមថា ផ្អែកលើកត្តាវិជ្ជមានខាងលើ ខេត្តព្រះសីហនុត្រូវបានប្រសិទ្ធនាមថាជា តារារៈនាទិសនិរតី ជាមួយនឹងសន្ទុះនៃការអភិវឌ្ឍដ៏ខ្លាំងក្លា និងប្រកបដោយចីរភាព ជាពិសេសការវិនិយោគលើវិស័យអចលនទ្រព្យ រួមមានមជ្ឈមណ្ឌលពាណិជ្ជកម្ម អគារស្នាក់នៅរួម សណ្ឋាគារ មណ្ឌលកំសាន្ត ។ ល។

ការសាងសង់ផ្លូវល្បឿនលឿន ផ្លូវដែក ការកែលម្អ និងពង្រីកកំពង់ផែស្វយ័តក្រុងព្រះសីហនុដែលជាកំពង់ផែសមុទ្រទឹកជ្រៅតែមួយគត់របស់ប្រទេសកម្ពុជាដែលបច្ចុប្បន្នបានកំពុងដើរតួនាទីយ៉ាងសំខាន់ក្នុងការស្តុក ផ្ទេរ និងដឹកជញ្ជូនទំនិញជាកុងតេន័រចេញចូលទូទាំងប្រទេសប្រមាណ ៧៣%និង ការពង្រីក អាកាសយានដ្ឋានអន្តរជាតិខេត្តព្រះសីហនុឱ្យក្លាយទៅជាច្រកចេញចូលអន្តរជាតិដ៏ទំនើប និងមានប្រសិទ្ធភាពសម្រាប់ ផ្សារភ្ជាប់សកម្មភាពសេដ្ឋកិច្ច ពាណិជ្ជកម្ម ទេសចរណ៍ និងវប្បធម៌ ក្នុងបរិបថនៃយុគ្គសម័យសកលភាវូបនីយកម្ម សមាហរណកម្មសេដ្ឋកិច្ចអាស៊ាន និងទំនាក់ទំនងជាមួយនឹងពិភពលោក ៕

ឥណ្ឌានឹងទម្លាក់អាល្លឺម៉ង់ដើម្បីកា្លយជាប្រទេសមានសេដ្ឋកិច្ចធំទី ៤ លើពិភពលោក

ដោយ ប៊ី

ភ្នំពេញៈ ឥណ្ឌាត្រូវបានរំពឹងថានឹងវ៉ាដាច់អាល្លឺម៉ង់ក្លាយជាប្រទេសមានសេដ្ឋកិច្ចធំទីបួនលើពិភពលោកក្នុងឆ្នាំ ២០២៦ និងជប៉ុនក្លាយជាប្រទេសធំលំដាប់ទី ៣ ក្នុងឆ្នាំ ២០៣៤។ នេះបើយោងតាមរបាយការណ៍របស់មជ្ឈមណ្ឌលស្រាវជា្រវធុរកិច្ច និងសេដ្ឋកិច្ច (CEBR) ដែលមានមូលដ្ឋាននៅប្រទេសអង់គ្លេស។

របាយការណ៍ បានបន្ថែមទៀតថា ឥណ្ឌាក៏ត្រូវបានកំណត់ដើម្បីសម្រេចបាននូវផលិតផលក្នុងស្រុកសរុប (GDP) ចំនួន ៥ ទ្រីលានដុល្លារនៅឆ្នាំ ២០២៦ ពោលគឺ ២ ឆ្នាំក្រោយជាងគោលដៅរបស់រដ្ឋាភិបាល។

របាយការណ៍ដែលមានចំណងជើងថា តារាងសម្ព័ន្ធសេដ្ឋកិច្ចពិភពលោកឆ្នាំ ២០២០ បានឱ្យដឹងថា “ឥណ្ឌាបានវ៉ាដាច់ប្រទេសបារាំង និងអង់គ្លេសក្លាយជាប្រទេសមានសេដ្ឋកិច្ចធំទី ៥ លើពិភពលោកក្នុងឆ្នាំ ២០១៩ហើយរំពឹងថានឹងវ៉ាដាច់អាល្លឺម៉ង់ក្លាយជាប្រទេសធំទី ៤ ក្នុងឆ្នាំ ២០២៦ និងជប៉ុនក្លាយជាប្រទេសធំទី ៣ ក្នុងឆ្នាំ ២០៣៤”។

យោងតាម CEBR ជប៉ុន អាល្លឺម៉ង់ និងឥណ្ឌានឹងប្រជែងដណ្តើមតំណែងទី ៣ ក្នុងរយៈពេល ១៥ ឆ្នាំខាងមុខ។យោងតាមគោលដៅរបស់លោកនាយករដ្ឋមន្រ្តី Narendra Modi ដែលដឹកនាំរដ្ឋាភិបាលក្នុងការដណ្តើមចំណែកសេដ្ឋកិច្ចដែលមានតម្លៃដល់ ៥ ទ្រីលានដុល្លារនៅឆ្នាំ ២០២៤ បាននិយាយថា “ឥណ្ឌាក៏ត្រូវបានកំណត់ថានឹងសម្រេចបាននូវផលិតផលក្នុងស្រុកសរុបចំនួន ៥ ពាន់ពាន់លានដុល្លារនៅឆ្នាំ ២០២៦ – ២ ឆ្នាំក្រោយជាងគោលដៅរបស់រដ្ឋាភិបាលបច្ចុប្បន្ន”។

ប៉ុន្តែបញ្ហាប្រឈមជាច្រើនដែលប្រមូលផ្តុំពាសពេញសេដ្ឋកិច្ចកំពុងនាំឱ្យមានមនុស្សជាច្រើនចោទសួរពីការដែលអាចរក្សាបាននៃគោលដៅនេះ។

ថ្មីៗនេះ អតីតទេសាភិបាលធនាគារកណ្តាលលោក C Rangarajan បាននិយាយថា នៅក្នុងអត្រាកំណើនបច្ចុប្បន្នការឈានដល់គោលដៅផលិតផលសរុបក្នុងស្រុកដែលមានតម្លៃ ៥ ទ្រីលានដុល្លារអាមេរិកនៅឆ្នាំ ២០២៤-២៥ គឺមិនមានបញ្ហាទេ។

ការកែប្រែទិន្នន័យរបស់ឥណ្ឌាមានន័យថាឆ្នាំ ២០១៩ គឺជាឆ្នាំដែលសេដ្ឋកិច្ចរបស់ប្រទេសនេះឈានដល់ទំហំសេដ្ឋកិច្ចអង់គ្លេស និងបារាំង៕

ក្រុមហ៊ុនខ្នាតយក្សរបស់ប្រទេសថៃគ្រោងបើកផ្សារទំនើបជាច្រើនកន្លែងនៅភ្នំពេញ និងសៀមរាប

ដោយ ម៉ាណេត

ភ្នំពេញ៖ ក្រុមហ៊ុន Big C Supercenter គ្រោងនឹងបើកផ្សារទំនើប Big C ៥ ឬ ៦ កន្លែងនៅភ្នំពេញ និងសៀមរាបក្នុងរយៈពេល ២ ឆ្នាំខាងមុខ ខណៈខ្លួននឹងចំណាយថវិកាចំនួន ៦,៥ ពាន់លានបាត (២១៥.៦ លានដុល្លារ) នៅឆ្នាំក្រោយសម្រាប់ការពង្រីកទាំងក្នុងស្រុក និងក្រៅស្រុក។

លោក Gary Hardy ប្រធានផ្នែកប្រតិបត្តិការរបស់ក្រុមហ៊ុនសម្រាប់ប្រតិបត្តិការអន្តរជាតិបានបានថ្លែងក្នុងសេចក្តីរាយការណ៍ក្នុងកាសែតបាងកកប៉ុស្តិ៍កាលពីថ្មីៗនេះថា ក្រុមហ៊ុនរំពឹងថានឹងពង្រីកអាជីវកម្មជាច្រើននៅកម្ពុជា និងបង្កើតការងារចំនួន ១,២០០ កន្លែងក្នុងរយៈពេល ៥ ឆ្នាំខាងមុខ។

លោក បានបន្តថា “ក្រុមហ៊ុនគ្រោងនឹងបើកផ្សារទំនើប Big C ៥ ឬ ៦ នៅភ្នំពេញ និងសៀមរាបក្នុងរយៈពេល ២ ឆ្នាំខាងមុខ”។ លោក បានមានប្រសាសន៍ថា “ចាប់ពីឆ្នាំក្រោយយើងនឹងយកចិត្តទុកដាក់បន្ថែមទៀតដើម្បីពង្រីកអាជីវកម្មលក់រាយរបស់យើងនៅក្រៅប្រទេសដោយផ្តោតលើកម្ពុជា ឡាវ មីយ៉ាន់ម៉ា និងវៀតណាមដែលមានសេដ្ឋកិច្ចរឹងមាំ”។

ផលិតផលក្នុងស្រុកសរុបរបស់កម្ពុជាមានការកើនឡើងយ៉ាងខ្លាំង ៧ ភាគរយក្នុងមួយឆ្នាំជាមធ្យមក្នុងរយៈពេល ៥ ឆ្នាំកន្លងមក ហើយអំណាចនៃការទិញក្នុងចំណោមប្រជាជនក្នុងស្រុកកំពុងតែកើនឡើង។ ផ្សារទំនើប Big C ប៉ោយប៉ែតគឺជាផ្សារដំបូងគេរបស់យើងនៅកម្ពុជា។

លោកបន្តថា ក្រុមហ៊ុនបានវិនិយោគ ៣០០ លានបាតដើម្បីសាងសង់ Big C Poipet លើផ្ទៃដីទំហំ ២០ រ៉ៃ។ ផ្សារទំនើបមានទំហំ ៨,០០០ ម៉ែត្រការ៉េដែលមានផ្ទៃដីលក់ ៣,០០០ ម៉ែត្រការ៉េ និងមានទំហំជួល ៥,០០០ ម៉ែត្រការ៉េ។រាល់ទីធ្លាទាំងអស់ត្រូវបានជួលដោយសហគ្រិនថៃ និងក្នុងស្រុកមកពីវិស័យជាច្រើនរួមមានរោងភាពយន្ត Major Cineplex ដែលជាប្រតិបត្តិកររោងកុនធំបំផុតរបស់ថៃ។

លោក Hardy រំពឹងថានឹងលក់បាន ២៥០ លានបាតពីសាខា Big C Poipet ក្នុងឆ្នាំដំបូងនៃប្រតិបត្តិការ ហើយរំពឹងថានឹងមានកំណើនប្រចាំឆ្នាំជាមធ្យម ៥ និង៦ ភាករយនាពេលអនាគត។នៅឆ្នាំ ២០១៩ Big C ប្រតិបត្តិការផ្សារទំនើប ១៥៣ ផ្សារធំ ផ្សារ Big C ៦៣ កន្លែង និងហាង Big Mini C ចំនួន ១,០១៨ ដែលមានផ្ទៃដី ៩០០,០០០ ម៉ែត្រការ៉េ។

ការលក់របស់ Big C មានចំនួនសរុប ១៤០ ពាន់លានបាតក្នុងឆ្នាំ ២០១៨ ហើយរំពឹងថានឹងកើនឡើង ៥ ភាគរយនៅឆ្នាំនេះ។អ្នកជំនាញបានព្យាករណ៍ថា ផ្សារទំនើបនៅក្នុងប្រទេសកម្ពុជាកើនដល់ជាង ៤០ ក្នុងរយៈត្រឹមតែ២ ទៅ៣ ឆ្នាំខាងមុខនេះ ខណៈផ្សារទំនើបដែលកំពុងដំណើរការនាពេលបច្ចុប្បន្ននេះមានចំនួនជាង២០ផ្សាររួចទៅហើយ។

មន្ត្រីស្រាវជ្រាវផ្នែកអចលនទ្រព្យជាន់ខ្ពស់ ប្រចាំនៅក្រុមហ៊ុនអន្តរជាតិ CBRE Cambodia កញ្ញា គឹម គិនកេសា បានប្រាប់គេហទំព័រ propertyarea.asia ថា នេះគឺចំណុចល្អសម្រាប់ប្រទេសកម្ពុជា ដែលមានផ្សារទំនើបច្រើនបែបនេះ យ៉ាងណាក៏ដោយផ្សារទំនើបមួយចំនួន មានលក្ខណៈទ្រង់ទ្រាយតូចៗ ដែលគេហៅថាផ្សារសហគមន៍ (Community Malls) ដែលមានទីតាំងផ្សេងៗពីគ្នា។

លោក ង៉ែ ជូ អ្នកវិភាគសេដ្ឋកិច្ចកម្ពុជាបានឱ្យដឹងដែរថា ក្នុងយៈពេលប៉ុន្មានកន្លងមកនេះ ផ្សារទំនើបនៅក្នុងប្រទេសក្នុងប្រទេសកម្ពុជា មានការកើនឡើងនឹងបន្តកើនឡើងច្រើនទៅមុខទៀត តែអំណាចនៃការដើរទិញទំនិញ របសប្រជាពលរដ្ឋខ្មែរហាក់នៅមានកម្រិតនៅឡើយ ។

លោកបន្តថា “បើទោះបីអំណាចនៃការទិញរបស់ប្រជាពលរដ្ឋ នៅមានកម្រិតក៏ដោយ ប៉ុន្តែផ្សារទំនើបទាំងនោះអាចបន្តឈរជើងនឹងបាន”។ លោកបន្តថា “យ៉ាងណាចំពោះចក្ខុវិស័យរបស់អ្នកអភិវឌ្ឍន៍ គឺគេសំឡឹងមើលទៅមុខ ពោលគឺមិនសំដៅនាពេលបច្ចុប្បន្ននេះទេ ហើយការវិនិយោគលើផ្សារទំនើបនេះថែទៀត គឺស្ថិតនៅគ្រប់ជាយនៃទីក្រុងភ្នំពេញ”៕

អ្នកឧកញ៉ាគិត ម៉េងសហការជាមួយចិនបោះទុនជាង ២ ពាន់លានយ័នអភិវឌ្ឍន៍កោះរ៉ុង

ដោយ វុត្ថា

ខេត្តព្រះសីហនុ៖ ក្រុមហ៊ុនរ៉ូយ៉ាល់គ្រប់របស់អ្នកឧកញ៉ា គិត ម៉េង សហការជាមួយក្រុមហ៊ុនចិនបានបោះទុនប្រមាណ២ ពាល់លានយ័ន ( ជាង ១៨ លានដុល្លារអាមេរិក) ដើម្បីអភិឌ្ឍន៍កោះរ៉ុង ជា «រមណីយដ្ឋានលំហែកាយឆ្នេរខ្សាច់»។

លោក Zhou Shuagngli ប្រធានក្រុមហ៊ុន Royal Galaxy Group បានឱ្យដឹងនៅក្នុងពិធីជួបជុំដៃគូរវិនិយោគចិន ដើម្បីអភិវឌ្ឍន៍កោះរ៉ុងកាលពីចុងសប្តាហ៍កន្លងមកនេះឱ្យដឹងថា កោះរ៉ុង គឺជាកោះដែលមានឆ្នេរខ្សាច់ដែលស្រស់ស្អាតសចែងចាំងនិងទឹកសមុទ្រកែវផ្កាថ្មចម្រុះពណ៌និងមេឃពណ៌ខៀវដែលគួរឱ្យទាក់ទាញ ដែលវាត្រូវបានចាត់ចំណាត់ថ្នាក់ជាឆ្នេរមួយក្នុងចំណោមឆ្នេរស្អាតបំផុតទាំង ១០ នៅលើពិភពលោកដោយទស្សនាវដ្តីភូមិសាស្ត្រអាមេរិកាំង។

លោកបន្តថា កោះរ៉ុង ត្រូវបានចាត់ទុកជាឋានសួគ៌សម្រាប់អ្នកចូលចិត្តធ្វើដំណើរទូទាំងពិភពលោក ដោយនៅពេលនេះ ក្រុមហ៊ុនរ៉ូយ៉ាល់ គ្រុប និង រ៉ូយ៉ាល់ ហ្គាឡាក់ស៊ី គ្រុប បានវិនិយោគទឹកប្រាក់ចំនួន ២ ពាន់លានយ័ន ដើម្បីសាងសង់«រមណីយដ្ឋានលំហែកាយឆ្នេរខ្សាច់» ដែលជាការអភិវឌ្ឍដ៏មានឥទ្ធិពលមួយក្នុងទីផ្សារទេសចរណ៍ប្រចាំតំបន់អាស៊ីអាគ្នេយ៍ តាមរយៈការសាងសង់ សណ្ឋាគារលំដាប់ផ្កាយ ៥ មជ្ឈមណ្ឌលសន្និសីទអន្តរជាតិ កន្លែងកម្សាន្តនិងការកម្សាន្តបែបក្នុងទឹកនិងកម្សាន្តបែបចិននិងលោកខាងលិច ក្លិបកម្សាន្តទូក ក្លិបសមុទ្រ ហាងដែលមិនបង់ពន្ធនិងផ្សារទំនើបធំ ៗ ជាពិសេស ផ្ទះ វីឡាទេសភាពសមុទ្រជាង ៦០០ខ្នង ដែលអាចផ្ទុកមនុស្សបាន ៣.០០០នាក់នៅលើកោះក្នុងពេលតែមួយ។

អ្នកឧកញ៉ា គិតម៉េង ប្រធានក្រុមហ៊ុន រ៉ូយ៉ាលគ្រុប ឱ្យដឹងថា ក្រុមហ៊ុនរ៉ូយ៉ាល់គ្រុប បានទទួលសិទ្ធិសម្បទានពីរាជរដ្ឋាភិបាលកម្ពុជា ក្នុងការអភិវឌ្ឍក្រុងទាំងមូលឱ្យក្លាយទៅជាលំដាប់តំបន់ទេសចរណ៍ពាណិជ្ជកម្មធម្មជាតិលំដាប់ពិភពលោក។ ដោយទទួលបានសិទ្ធិប្រទានពីសម្ដេចតេជោនាយករដ្ឋមន្ត្រីកិច្ចព្រមព្រៀងសម្បទានកោះរ៉ុងត្រូវបានចុះលេខាកាលពីថ្ងៃទី២៨ ខែកុម្ភៈ ឆ្នាំ២០០៨ រវាងក្រុមហ៊ុនរ៉ូយ៉ាល់គ្រុបជាមួយនឹងរាជរដ្ឋាភិបាលកម្ពុជា។

លោកបន្តថា ផែនការមេអភិវឌ្ឍន៍កោះរ៉ុងបានទទួលការអនុម័តពីក្រុមប្រឹក្សាអភិវឌ្ឍន៍កម្ពុជាក្នុងនាមជាតំណាងឲ្យរាជរដ្ឋាភិបាលកម្ពុជានៅថ្ងៃទី ៩ ខែតុលា ឆ្នាំ២០០៨ ដោយបានប្រគល់ទីតាំងកោះរ៉ុងជាផ្លូវការឱ្យក្រុមហ៊ុនធ្វើការអភិវឌ្ឍនៅថ្ងៃទី៣ ខែតុលា ឆ្នាំ ២០០៨។

អនុលោមតាមអនុក្រឹត្យលេខ ១១៤ អនក្របកចុះថ្ងៃទី ២៩ ខែសីហាឆ្នាំ ២០០៧ របស់រាជរដ្ឋាភិបាលកម្ពុជាក្រុមហ៊ុនបានធ្វើការចុះបញ្ជីដីធ្លីនៅបានទទួលវិញ្ញាបនបត្រជួលរយៈពេលវែងចំនួន៣០ ប័ណ្ណ នៅថ្ងៃទី០២ ខែកក្កដា ឆ្នាំ២០១៩ ពីមន្ទីររៀបចំដែនដីនគរូបនីយកម្មសំណង់និងសុរិយោដីខេត្តព្រះសីហនុជាប័ណ្ណរឹងសម្រាប់ធ្វើការអភិវឌ្ឍអនុលោមតាមផែនការមេដែលបានទទួលការអនុម័តរួចហើយ។

លោកបន្តថាក្រុមហ៊ុនបានសាងសង់សណ្ឋាគារលំដាប់ផ្កាយប្រាំគឺសណ្ឋាគារ The Royal Sand Koh Rong ជាប្រភេទផ្ទះវីឡាមានអាងហែលទឹកចំនួន៦៧ខ្នង មានជាង ១០០បន្ទប់ ត្រូវបានសម្ពោធធដាក់ឱ្យដំណើរការជាផ្លូវការនៅថ្ងៃទី២៣ ខែមេសា ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់បំផុតសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពីសាងសង់អស់រយៈពេលជាង៣ឆ្នាំ បើគិតចាប់តាំងពីការបញ្ចុះបឋមសិលាបើកការដ្ឋានសាងសង់កាលពីថ្ងៃទី១២ ខែធ្នូ ឆ្នាំ២០១៥ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។

អ្នកឧកញ៉ាគិត ម៉េង បន្ថែមថា នៅក្នុងដំណាក់ការអភិវឌ្ឍជាបន្តបន្ទាប់ទៀតនេះ ក្រុមហ៊ុននឹងបន្តសាងសង់សណ្ឋាគារនិងរមណីយដ្ឋានលំដាប់អន្តរជាតិ ព្រមទាំងកាស៊ីណូច្រើនទៀតដើម្បីអភិវឌ្ឍកោះរ៉ុងនេះឱ្យប្រែក្លាយជាកោះប្រវត្តិសាស្ត្រជាគំរូល្អសម្រាប់ប្រជាជនកម្ពុជានិងព្រះរាជាណាចក្រកម្ពុជាក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

អ្នកឧកញ៉ា គិត ម៉េង បានសង្កត់ធ្ងន់ថា ក្នុងនាមជាអ្នកជំនួញមួយរូបសូមគាំទ្រយ៉ាងពេញទំហឹងចំពោះគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលកម្ពុជាដែលត្រូវបានបង្កើតឡើងដើម្បីទាក់ទាញវិនិយោគិននិងភ្ញៀវទេសចរកាន់តែច្រើនបន្ថែមទៀតមកកាន់ប្រទេសកម្ពុជា។

ជាមួយគ្នានេះដែរស្របតាមគោលនយោបាយយុទ្ធសាស្ត្រសារក្រវាត់និងផ្លូវដែលបានផ្ដួចផ្ដើមឡើងដោយនៅប្រធានាធិបតីស៊ីជីងពីងរបស់ប្រទេសចិននិងដោយសារភាពមានទំនាក់ទំនងដ៏ល្អរវាងចិននិងកម្ពុជាកោះរ៉ុងគឺជាកន្លែងដែលមានសក្តានុពលសេដ្ឋកិច្ចដ៏ត្រឹមត្រូវសម្រាប់មកវិនិយោគ។

អ្នកឧកញ៉ា គិត ម៉េង បន្ថែមថា ក្នុងពេលកន្លងមកភ្ញៀវទេសចរបរទេសដែលបានមកលេងទីក្រុងភ្នំពេញនៅខេត្តសៀមរាបសម្រាប់វិស្សមកាលរបស់គេ គឺត្រូវទៅលេងកម្សាន្តឆ្នេរសមុទ្រនៅប្រទេសវៀតណាមឬ ប្រទេសថៃ ប៉ុន្តែនៅពេលនេះ ពួកគេអាចលេងកម្សាន្តឆ្នេរខ្សាច់នៅសណ្ឋាគារផ្កាយ ៥ ដែលមានស្រាប់នៅលើកោះរ៉ុង ក៏ដូចតំបន់វិសម្សកាលប្រណិត មានឈ្មោះថា រមណីយដ្ឋានសណ្ឋាគារនិងកាស៊ីណូ Koh Rong Royal Silver Amusment Resorts and Casino ដែលបច្ចុប្បន្ននេះកំពុងដំណើរការសាងសង់ដោយក្រុមហ៊ុនរ៉ូយ៉ាល់ ហ្គាឡាក់ស៊ី គ្រុប របស់ក្រុមហ៊ុនរ៉ូយ៉ាល់គ្រុបនៅលើកោះរ៉ុង ដោយនាំមកនូវផលចំណេញកាន់តែច្រើនដល់ប្រទេសកម្ពុជា តាមរយៈការបង្កើតការងារដល់ប្រជាពលរដ្ឋ កាត់បន្ថយភាពក្រីក្រ និងចូលរួមអភិវឌ្ឍប្រទេសជាតិ។

លោក ឧ គួច ចំរើន អភិបាលខេត្តព្រះសីហនុបានលើកទឹកចិត្តដល់បណ្តាវិនិយោគិនជាតិ-អន្តរជាតិ ដែលបាន បណ្តាក់ទុនវិនិយោគ នៅខេត្តព្រះសីហនុ និងជឿជាក់លើរាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវប្រកប ដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។»។

លោកបន្តថា កោះរ៉ុង មានផ្ទៃក្រឡាប្រមាណ ៧៨គីឡូម៉ែត្រក្រឡា ជាកោះធម្មជាតិដែលមានទំហំធំជាងគេលំដាប់ទីពីរនៅក្នុងប្រទេសកម្ពុជា មានចម្ងាយប្រហែល២៥គីឡូម៉ែត្រ ពីក្រុងព្រះសីហនុ។នៅឆ្នំា២០១៦ សង្កាត់កោះរ៉ុងត្រូវបានរាជរដ្ឋាភិបាលបំបែកជាពីរសង្កាត់ គឺសង្កាត់កោះរ៉ុង និងសង្កាត់កោះរ៉ុងសន្លឹម ។

នៅឆ្នាំ២០១៩ រាជរដ្ឋាភិបាលកម្ពុជាបានបង្កើតក្រុងកោះរ៉ុង ដោយកាត់យកសង្កាត់ចំនួន ០២ ពីក្រុងព្រះសីហនុ គឺសង្កាត់កោះរ៉ុង និងសង្កាត់កោះរ៉ុងសន្លឹម តាមរយៈអនុក្រឹត្យលេខ ០២ អនក្រ.បក ចុះថ្ងៃទី០៨ ខែមករា ឆ្នាំ២០១៩ ៕