ចិនផ្តល់ជំនួយ២លានដុល្លារដល់ក្រសួងសាធារណការដើម្បីកសាងអគារវិទ្យាស្ថានបណ្ដុះបណ្ដាលមួយ

ដោយ វុត្ថា

ភ្នំពេញ: រដ្ឋមន្ត្រីក្រសួងសាធារណ និងដឹកជញ្ជូនបានអះអាងថាភាគីចិន បានឯកភាពផ្ដល់ថវិកាចំនួន២លានដុល្លារសហរដ្ឋអាមេរិក តាមសំណើរបស់ក្រសួង ដើម្បីកសាងអគារវិទ្យាស្ថាន បណ្ដុះបណ្ដាលមួយ ដែលមានទីតាំងឋិតនៅទីស្ដីការក្រសួងថ្មីដែលកំពុងដំណើរការរសាងសង់។

លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនមានប្រសាសន៍បែបនេះ នៅក្នុងពិធីបិទវគ្គបណ្ដុះបណ្ដាលដំបូង ដល់មន្ត្រីក្របខណ្ឌថ្មីឆ្នាំ២០១៩ ចំនួន១២១នាក់ នាថ្ងៃទី២៥ ខែធ្នូឆ្នាំ២០១៩ម្សិលមិញនេះ ដោយមានការចូលរួមពីមន្ត្រីជាន់ខ្ពស់ជាច្រើននាក់របស់ក្រសួងផងដែរ។

លោកបន្តថា “អគារនេះគ្រោងបើក ការដ្ឋានសាងសង់ក្នុងពេលឆាប់ៗនេះ ដើម្បីជួយបណ្ដុះបណ្ដាលឲ្យមន្ត្រីរបស់ក្រសួងមានសមត្ថភាព បំពេញការងារកាន់តែប្រសើរឡើងថែមទៀត”។

លោកទេសរដ្ឋមន្ត្រី បានជំរុញលើកទឹកចិត្តដល់មន្ត្រី ដែលទើបប្រឡងជាប់ក្របខណ្ឌថ្មី បង្ហាញនូវបទពិសោធន៍ ក៏ដូចជាគំនិតថ្មីៗរបស់ខ្លួន ដើម្បីចូលរួមចំណែកដល់ការអភិវឌ្ឍវិស័យសាធារណការ និងដឹកជញ្ជូនឲ្យកាន់តែមានការរីកចម្រើនថែម មួយកម្រិតទៀត។

លោទេសរដ្ឋមន្ត្រី បានណែនាំឱ្យមន្ត្រីក្របខណ្ឌថ្មីទាំងអស់ ត្រូវចេះសហការគ្នាល្អ មានសាមគ្គីភាព មិត្តភាព រូបរួមគ្នាក្រោមដំបូលតែមួយ នៃមហាគ្រួសារក្រសួងសាធារណការ និងដឹកជញ្ជូន ជួយគ្នាទៅវិញទៅមក តាមដានការបំពេញការងារ និងរៀបចំគោលដៅរបស់ខ្លួនដើម្បីផ្តល់សេវាសាធារណៈ សេវាចាំបាច់ ជូនប្រជាពលរដ្ឋប្រកបដោយប្រសិទ្ធភាព តម្លាភាព និងឆាប់រហ័ស ក្នុងនាមជាអ្នកបម្រើរាស្ត្រ៕

ក្រុមហ៊ុនចិនដ៏ធំមួយកំពុងសិក្សាពីលទ្ធភាពប្រើប្រព័ន្ធថាមពលសូឡាបូមទឹកក្រោមដីសម្រាប់ស្រោចស្រពដំណាំកសិកម្ម

ដោយៈ រ៉ាណេត

ភ្នំពេញៈ ក្រុមហ៊ុនចិនដ៏ធំដែលមានជំនាញផ្នែក រៀបចំប្រព័ន្ធថាមពលសូឡា បាន និងកំពុងសិក្សាពីលទ្ធភាពជាមួយក្រសួងកសិកម្ម ដើម្បីរៀបចំបច្ចេកទេសបូមទឹកក្រោមដី សម្រាប់វិស័យកសិកម្មនៅកម្ពុជា។

ក្រុមហ៊ុនចិនដែលមានឈ្មោះថា Gansu Academy for Water Conservancy (GAWC) មកពីខេត្តGan Su ប្រទេសចិន បានបង្ហាញពីគោលបំណងក្នុងការរៀបចំគម្រោងសិក្សា និងរៀបចំប្រព័ន្ធគ្រប់គ្រង និងបូមទឹកក្រោមដីសម្រាប់ប្រើប្រាស់លើវិស័យកសិកម្ម ដោយថាមពលសូឡា ក្រោមកិច្ចសហការជាមួយក្រសួងកសិកម្ម។

នៅក្នុងឱកាសចូលជួបសម្ដែងការគួរសម ជាមួយរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកវេង សាខុន កាលពីល្ងាចថ្ងៃទី២៥ ខែធ្នូ ឆ្នាំ២០១៩ម្សិលមិញនេះ លោក Chengxiang MA នាយករងនៃក្រុមហ៊ុន Gansu Academy for Water Conservancy (GAWC) និងសហការីមកពីខេត្ត Gansu ប្រទេសចិន បានមានប្រសាសន៍ថា ក្រុមហ៊ុនបាននិងកំពុងតែកៀងគររកជំនួយ ពីគ្រប់ដៃគូវិនិយោគនៅប្រទេសចិន សម្រាប់កិច្ចសហប្រតិបត្តិការក្នុងវិស័យកសិកម្ម និងតាមរយៈគម្រោងអភិវឌ្ឍផ្សេងៗទៀតក្នុងវិស័យនេះ។

នៅក្នុងកិច្ចពិភាក្សានេះ លោកបានស្នើសុំបង្កើតមជ្ឈមណ្ឌលស្រាវជ្រាវ ការគ្រប់គ្រងទឹកក្រោមដី តាមកន្លែងមួយចំនួន ដូចជា អគ្គនាយកដ្ឋានកសិកម្ម សាកលវិទ្យាល័យភូមិន្ទកសិកម្ម និងវិទ្យាស្ថានបច្ចេកទេសកម្ពុជា និងនៅតាមមន្ទីរពិសោធន៍នា នាដើម្បីធ្វើការស្រាវជ្រាវ បង្ហាញពីរបកគំហើញបច្ចេកវិទ្យាប្រើប្រាស់ទឹកក្រោមដី សម្រាប់ដំណាំ និងកសិកម្មនៅកម្ពុជា។

លោកបានជម្រាបជូនថា នឹងធ្វើការសហការគ្នាជាមួយសាកលវិទ្យាល័យជាច្រើនក្នុងការសន្យា ផ្តល់នូវអាហារូបករណ៍ជូនដល់និស្សិតកម្ពុជា ឲ្យបានកាន់តែច្រើនលើផ្នែក វិទ្យាសាស្រ្តកសិកម្ម និងបច្ចេកវិទ្យា។ ជាជំហ៊ានដំបូងក្នុងការអនុវត្ត នឹងត្រូវធ្វើឡើងនៅក្នុងខេត្តចំនួន២ គឺខេត្តត្បូងឃ្មុំ និងខេត្តព្រៃវែង។

ជាការឆ្លើយតបទៅនឹងសំណើនេះ លោករដ្ឋមន្រ្តីក្រសួងកសិកម្ម លោកវេង សាខុន បានគាំទ្រ ឱ្យមានការចុះហត្ថលេខាលើអនុស្សារណៈ ដើម្បីជាមូលដ្ឋានសម្រាប់សម្របសម្រួលដំណើរ ការនៃការនាំចូលសម្ភារកសិកម្មពីប្រទេសចិន សម្រាប់ការអនុវត្តគម្រោងសាកល្បងនៅខេត្តទាំងពីរ និងឈានទៅរកការអនុវត្តគម្រោង ក្នុងខេត្តគោលដៅមួយចំនួនទៀត ដូចជា ខេត្តតាកែវ ខេត្តកំពង់ចាម និងស្វាយរៀងជាដើម។

លើសពីនេះទៀត ដើម្បីសម្រេចបានកិច្ចការខាងលើ លោករដ្ឋមន្រ្តីកសិកម្មបានស្នើឱ្យក្រុមហ៊ុនធ្វើការសហការជិតស្និទ្ឋ ជាមួយអគ្គនាយកដ្ឋានកសិកម្ម ក្នុងការជ្រើសរើសទីតាំងធ្វើមន្ទីរពិសោធន៍ និងមជ្ឈមណ្ឌលស្រាវជ្រាវនេះ និងថែមទាំងសហការជាមួយនាយកដ្ឋាន សហប្រតិបត្តិការអន្តរជាតិក្នុងការជម្រុញ ឱ្យមានការចុះ MoU នេះ ក្នុងពេលឆាប់ៗខាងមុខ៕

សម្តេចតេជោ៖ជំនួបរវាងមេដឹកនាំចិន ជប៉ុន និងកូរ៉េខាងត្បូងនឹងជះឥទ្ធិពលល្អសម្រាប់សេដ្ឋកិច្ចនៅក្នុងតំបន់

ដោយ ប៊ី

ភ្នំពេញៈ សម្តេចតេជោហ៊ុន សែននាយករដ្ឋមន្រ្តីកម្ពុជាបានថ្លែងថា ជំនួបប្រជុំនៅក្នុងរយៈពេលចុងក្រោយរវាងចិន ជប៉ុន និងកូរ៉េខាងត្បូងនឹងជះឥទ្ធិពលល្អ សម្រាប់សេដ្ឋកិច្ចនៅក្នុងតំបន់អាស៊ាន ខណៈចិនបាននិងកំពុងដើរតួនាទី ជាអ្នកសម្រុះសម្រួលក្នុងជំនួបពហុភាគី។

សម្តេចតេជោហ៊ុន សែន បានថ្លែងក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សានៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចនៅវិទ្យាស្ថានជាតិអប់រំនាព្រឹកថ្ងៃទី២៦ ធ្នូនេះថា ប៉ុន្មានថ្ងៃមុននេះ វាជារឿងល្អណាស់ដែលមិត្តកម្ពុជា និងជាដៃសន្ទនាអាស៊ានទាំងបីជួបប្រជុំគ្នានៅប្រទេសចិន។

សម្តេចតេជោបានថ្លែងថា “ចិន ជប៉ុន កូរ៉េខាងត្បូង…ត្រូវរូវគ្នា ដែលអនុវត្តន៍នូវពហុភាគីនិយមបន្ត។ ក៏បានកាត់បន្ថយនូវការលំបាក នៃសង្គ្រាមពាណិជ្ជកម្មរវាងសហរដ្ឋអាមេរិក និងចិន និងអាមេរិកជាមួយនឹងប្រទេសផ្សេងទៀត ហើយធ្វើឱ្យពួកអាស៊ានមានការងារស្រួល ដោយសារតែមានការប្រជុំម្តងៗ គឺយើងតែងមានជំនួបប្រជុំអាស៊ាន និងបូកបី ដែលរួមមានចិន ជប៉ុន កូរ៉េខាងត្បូង”។

សម្តេចតេជោមានប្រសាសន៍ថា កាលពីឆ្នាំមុនមេដឹកនាំអាស៊ានបូកបី បានជួបគ្នាមុនពេលមកជួបអាស៊ាន។ ឥឡូវនេះ បូកបីមានការប្រជុំជាមួយគ្នានៅក្នុងប្រទេសចិន គឺរឿងល្អណាស់ដែលគិតថា វាមានឥទ្ធិពលល្អ ឥទ្ធិពលវិជ្ជមានសម្រាប់សេដ្ឋកិច្ចតំបន់របស់យើង ព្រោះសេដ្ឋកិច្ចរបស់ជប៉ុន សេដ្ឋកិច្ចរបស់ចិន គឺសុទ្ធតែសេដ្ឋកិច្ចលេខពី បី (ចិនលេខពីរ ជប៉ុនលេខបី)… ទំហំសេដ្ឋកិច្ចគឺធំណាស់។

សម្តេចតេជោ បានបន្តថា“មុនដាច់ឆ្នាំនេះ យើងឃើញថាមានព័ត៌មានល្អកើតចេញមកដែរ”។

ប្រធានាធិបតីកូរ៉េខាងត្បូងលោកមូន ជេអ៊ីន និងនាយករដ្ឋមន្រ្តីជប៉ុនលោកស៊ីន ហ្សូ អាបេ បានជួបគ្នាជាលើកដំបូងនៅឆ្នាំនេះ ចាប់តាំងពីការកើតឡើងនូវសង្រ្គាមពាណិជ្ជកម្មក្នុងតំបន់របស់ពួកគេបានផ្ទុះឡើងនៅឆ្នាំ២០១៩។

មេដឹកនាំទាំងពីរបានជួបគ្នានៅទីក្រុង Chengdu ប្រទេសចិន ក្នុងកិច្ចប្រជុំកំពូលបីដែលមានការចូលរួមពីមន្ត្រីជាន់ខ្ពស់ មកពីប្រទេសចិន ជប៉ុន និងកូរ៉េខាងត្បូង។ កិច្ចប្រជុំនេះត្រូវបានសន្មត់ថា ជាជំហានដំបូងក្នុងការផ្សះផ្សាសង្រ្គាមពាណិជ្ជកម្ម ដែលប្រជាជនកូរ៉េភាគច្រើនធ្វើពហិការទំនិញ និងសេវាកម្មរបស់ជប៉ុនទាំងអស់ ហើយជប៉ុនរឹតបន្តឹងសំភារៈសំខាន់ៗ សម្រាប់ឧស្សាហកម្មផលិតកម្មរបស់ពួកគេ។

មិនមានសេចក្តីប្រកាសអំពីការបន្ធូរបន្ថយ ក្នុងទំនាក់ទំនងត្រូវបានធ្វើឡើង បន្ទាប់ពីកិច្ចប្រជុំនោះទេ។

រដ្ឋមន្រ្តីក្រសួងពាណិជ្ជកម្មចិនលោក Zhong Shan បាននិយាយថា ទីក្រុងប៉េកាំងមានឆន្ទៈសម្រុះសម្រួល សង្គ្រាមពាណិជ្ជកម្មដែលបាន និងកំពុងទាញទម្លាក់សេដ្ឋកិច្ចអាស៊ីនៅឆ្នាំនេះ។

លោក Zhong បាននិយាយថា “ទីក្រុងប៉េកាំងនឹងធ្វើការជាមួយប្រទេសជប៉ុន និងកូរ៉េខាងត្បូង ដើម្បីប្រឆាំងនឹងឯកតោភាគីនិយម និងការគាំពារនិយម និងរួមគ្នាថែរក្សាសន្តិភាព និងស្ថេរភាពក្នុងតំបន់ និងលើកកម្ពស់សេដ្ឋកិច្ចពិភពលោក”៕

រដ្ឋាភិបាលអនុម័តគំរោងសាងសង់ជាង៤ពាន់គម្រោងកើនជាង ៧៨ភាគរយ

ដោយនៅ ស៊ីវុត្ថា

ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់និងសមត្ថកិច្ចថ្នាក់ក្រោមជាតិបានអនុម័តគំរោងសាងសង់បានចំនួនជាង ៤០០០គំរោង កើនឡើង ៧៨ភាគរយធៀបរយៈពេលដូចគ្នាកាលពីឆ្នាំមុន។

យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់បានបង្ហាញក្នុងសន្និបាតបូកសរុបការងារក្រសួងឆ្នមាំ២០១៩ និងលើកទិសដៅឆ្នាំ២០២០ខាងមុខកាលពីព្រឹកថ្ងៃទី២៥ ធ្នូកន្លងមកថា ក្នុងឆ្នាំ២០១៩នេះ ទិន្នន័យសំណង់ ទូទាំងប្រទេសមានចំនួន៤,៤៤៦គម្រោង ដោយមានទំហំទុនវិនិយោគជាង៩៣០០លានដុល្លារ ដែលកើនឡើងប្រមាណ៧៨,៨៨ភាគរយ បើធៀបនឹងឆ្នាំ២០១៨។

របាយការណ៍បានបង្ហាញថា ទិន្នន័យសំណង់ទូទាំងប្រទេសចំនួន ៤,៤៤៦គម្រោង មានផ្ទៃក្រឡាកម្រាលសំណង់ សរុបចំនួន១៨,៥៤០,៨៧៩ម៉ែត្រការ៉េ តម្លៃប៉ាន់ស្មានទុន វិនិយោគប្រមាណ៩,៣៥៣,៦៩៧,៤៧៥ដុល្លារ បើធៀបនឹងរយៈពេលដូចគ្នា ក្នុងឆ្នាំ២០១៨ មានចំនួន២,៨៦៧គម្រោង មានផ្ទៃក្រឡាកម្រាលសំណង់១១,៤២៧,១៩០ម៉ែត្រការ៉េ តម្លៃប៉ាន់ស្មានទុន វិនិយោគប្រមាណ៥,២២៨,៩៩២,៥២២ដុល្លារ។

របាយការណ៍ដដែលបានបង្ហាញថា ក្នុងឆ្នាំ២០១៩នេះ គម្រោងអគារខ្ពស់ៗនៅកម្ពុជាចាប់ពី៥ជាន់ឡើង មានចំនួន១៤៣២គម្រោង ស្មើនឹង៤៣៦អគារ (ខេត្តព្រះសីហនុ មានគម្រោងអគារខ្ពស់ៗចាប់ពី៥ជាន់ឡើងចំនួន២០៣អគារ) ក្នុងនោះពី៥ជាន់ទៅ៩ជាន់ មានចំនួន២០៨អគារ ពី១០ជាន់ ទៅ១៩ជាន់ មានចំនួន១៣៥អគារ ពី២០ជាន់ ទៅ២៩ជាន់ មានចំនួន៥៧អគារពី៣០ជាន់ ទៅ៣៩ជាន់មានចំនួន២៣អគារពី៤០ជាន់ ឡើងទៅមានចំនួន១៣អគារ។

របាយការណ៍ដដែលបានបន្តទៀតថា គិតចាប់ពីឆ្នាំ២០០០ ដល់ឆ្នាំ២០១៩ បានចេញលិខិតអនុញ្ញាតិ សាងសង់នៅទូទាំងប្រទេសចំនួន៤៨,០០៤គម្រោង ផ្ទៃក្រឡា កម្រាលសំណង់សរុបចំនួន១៣១លានម៉ែត្រការ៉េ និងតម្លៃប៉ាន់ស្មានទុនវិនិយោគសរុបប្រមាណ៥១,០៣៥,១២៤,៤៥១ដុល្លារ។ គម្រោងអគារខ្ពស់ៗចាប់ពី៥ជាន់ ឡើងនៅទូទាំងប្រទេសមានចំនួន១,៦២៤អគារ (ក្នុងនោះអគារខ្ពស់ៗចាប់ពី៥ជាន់ ទៅ៩ជាន់មានចំនួន៨៧២អគារ អគារចាប់ពី១០ជាន់ទៅ១៩ជាន់ មានចំនួន៤៦១អគារ អគារចាប់ពី ២០ជាន់ ទៅ២៩ជាន់ មានចំនួន១៥៦អគារ អគារចាប់ពី៣០ជាន់ទៅ ៣៩ជាន់ មានចំនួន៩៥អគារ អគារចាប់ពី៤០ជាន់ ឡើងមានចំនួន៤០អគារ។

ដោយឡែកនៅខេត្តព្រះសីហនុ មានអគារចាប់ពី៥ជាន់ឡើងទៅ មានចំនួន២៣៨អគារ គម្រោងបុរីលំនៅឋាន និងបណ្ដុំលំនៅឋានមានលក្ខណៈបុរី មានចំនួន២៩៨គម្រោង និងលំនៅឋាន មានលក្ខណៈជាអគារសហកម្មសិទ្ធិ ក្នុងរាជធានីភ្នំពេញ គិតចាប់ពីឆ្នាំ២០១១ រហូតដល់ឆ្នាំ២០១៩ មានចំនួន ២២,២៦៩ ចំណែកឯកជន៕

សម្ដេចតេជោជំរុញឱ្យមានការវិនិយោគលើវិស័យសំខាន់ៗចំនួន២ បន្ថែមទៀត

ដោយ ៖ វុត្ថា

ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ ចង់បានឱ្យមានការវិនិយោគលើវិស័យចំនួន២បន្ថែមទៀត រួមមានវិស័យសហ គ្រាសធុនតូច និងមធ្យម និងបច្ចេកវិទ្យា។

សម្តេចតេជោ ហ៊ុន សែន បានមានប្រសាសន៍បែបនេះនៅក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រ សេដ្ឋកិច្ច កាលពីព្រឹកថ្ងៃទី២៦ ខែធ្នូ ឆ្នាំ២០១៩ នេះ នៅវិទ្យាស្ថានជាតិអប់រំ រាជធានីភ្នំពេញ។

សម្តេចតេជោ បានមានប្រសាសន៍ថា “សូមស្នើដល់ប្រទេសជាមិត្តទាំងអស់ បន្តមកវិនិយោគលើវិស័យឧស្សាហកម្មទាំង២ផ្នែកនេះជាសំខាន់គឺបន្ថែមទៀត រួមមានផ្នែកទី១ ឧស្សាហកម្មកែច្នៃផលិតផលកសិកម្មដែលមានស្រាប់របស់កម្ពុជា ដែលសហគ្រាសធុនតូច និងមធ្យម ត្រូវតែចូលរួមវិនិយោគ ព្រោះវាមិនទាមទាទុនច្រើននោះទេ”។

សម្តេចបន្តថា “ផ្នែកនេះគឺវិនិយោគិនក្នុងស្រុក និងក្រៅស្រុកអាចធ្វើបាន ហើយអាចធ្វើការនាំចេញបានដោយក្នុងនៅកម្ពុជាមានផលិតតផលកាហ្វេ ជ័រកៅស៊ូ និងផលិតជាច្រើនផ្សេទៀត។

ចំណុចទី២ គឺការវិយោគលើឧស្សាហកម្មបច្ចេកវិទ្យា ដែលអាចផ្តល់ឱកាសកាន់តែច្រើនដល់កម្ពុជា បើទោះបីកម្ពុជាមានកម្លាំងពលកម្ម ច្រើនក៏ដោយ ប៉ុន្តែយើងនៅតែទាមទាឱ្យមានបច្ចេកវិទ្យាខ្ពស់ ដើម្បីប្រកួតប្រជែងក្នុងពិភពលោក”។

សម្ដេចបានលើកឡើងថា នៅលើពិភពលោក ត្រូវការរបស់ប្រើប្រាស់ជាច្រើន រួមមានរបស់ក្មេងលេង សម្ភារ:កីឡា និងរបស់ផ្សេងៗទៀត ដែលជាតម្រូវការ ព្រោះមនុស្សនាពេលបច្ចុប្បន្ននេះមានលទ្ធភាពខ្ពស់ក្នុងការទិញសម្ភារ:ដែលផលិតដោយបច្ចេកវិទ្យា៕

រដ្ឋាភិបាលនឹងចុះបញ្ជីក្បាលដីចំនួន ៧លានបណ្ណ ដើម្បីផ្តល់ជូនប្រជាពលរដ្ឋនៅដំណាច់ឆ្នាំ២០២១

ដោយ ៖ រ៉ាណេត

ភ្នំពេញ ៖ ជាការធានាដល់សុវត្ថិភាព និងភាពសុខរបស់ប្រជាពលរដ្ឋក្នុងការកាន់កាប់ដីធ្លីជាកម្មសិទ្ធិស្របច្បាប់ នៅត្រឹមឆ្នាំ២០២១ ខាងមុខនេះ ក្រសួងរៀបចំដែនដី នគរូបនីយកម្ម និងសំណង់ នឹងធ្វើការចុះបញ្ជីចំនួន ៧លានក្បាលដី ជូនដល់ប្រជាពលរដ្ឋ ។

លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជា សុផារ៉ា បានប្រកាសនៅក្នុងឱបិទសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅសម្រាប់អនុវត្តនៅឆ្នាំ២០២០ កាលពីរសៀលថ្ងៃទី២៥ ខែធ្នូ ឆ្នាំ២០១៩ម្សិលមិញថា នៅឆ្នាំ២០២១ ខាងមុខនេះ ក្រសួងរៀបចំដែនដី នឹងចុះបញ្ជីក្បាលដី ៧លានក្បាលដី ជូនដល់ប្រជាពលរដ្ឋឱ្យអស់ ខណៈនៅឆ្នាំ២០១៩នេះ ក្រុមការងារបានចុះបញ្ជីក្បាលដី បាន ៨០.២២ភាគរយរួចទៅហើយ។

លោកឧបនាយករដ្ឋមន្ត្រី ជា សុផារ៉ា បានមានប្រសាសន៍ថា ៖ “សូមឱ្យទាំងអស់គ្នា ទាំងរដ្ឋបាលថ្នាក់ក្រោមជាតិ បន្តពុះពារនៅក្នុងការចុះបញ្ជីដីធ្លី ដែលសព្វថ្ងៃនេះយើងធ្វើការបូកសរុបបាន៨០.២២ភាគរយ នៃការចុះបញ្ជីដីធ្លីនេះ គោលដៅដ៏ចម្បងនេះយើងត្រូវជំរុញ៩៤ភាគរយ នៅឆ្នាំ២០២០ ហើយត្រូវចប់នៅខែធ្នូ ពេលសន្និបាតឆ្នាំ២០២១ គឺត្រូវបញ្ចប់ការចុះបញ្ជីក្បាលដីជូនដល់ប្រជាពលរដ្ឋនៅទូទាំងប្រទេស ដែលប៉ាន់ស្មានមានជាង៧លានក្បាលដី”។

លោកបានសង្កត់ធ្ងន់ថា ការចុះបញ្ជីក្បាលជូនប្រជាពលរដ្ឋឱ្យអស់នៅឆ្នាំ២០២១ ខាងមុខនេះ គឺជាការងារដ៏សំខាន់បំផុត ដើម្បីឱ្យការគ្រប់គ្រងដីមានសុវត្ថិភាព មានបណ្ណសម្គាល់អចលវត្ថុជូនដល់ប្រជាពលរដ្ឋខ្មែរគ្រប់ៗរូប ព្រមទាំងធ្វើឱ្យមានស្ថិរភាព ហើយបណ្ណនេះក្លាយទៅជាទុន ដែលរាជរដ្ឋាភិបាលកម្ពុជា ក្រោមការដឹកនាំដោយសម្តេចតេជោ ហ៊ុន សែន បានខិតខំធ្វើការបែងចែកជូនដល់ប្រជាពលរដ្ឋ មាន៥ដំណាក់កាលកន្លងផុតទៅហើយ។

ចាប់ពីឆ្នាំ១៩៧៩ រហូតមកដល់បច្ចុប្បន្ននេះ រាជរដ្ឋាភិបាលបានផ្តល់បណ្ណកម្មសិទ្ធិ ទទួលស្គាល់សិទ្ធិកាន់កាប់ដីធ្លីជូនប្រជាពលរដ្ឋបាន ៥ដំណាក់កាល ដូច្នេះការផ្តល់បណ្ណកម្មសិទ្ធិទាំង៥ដំណាក់កាល បានក្លាយជាទុនដែលរដ្ឋបានផ្តល់ជូនដល់ប្រជាពលរដ្ឋទាំងអស់។

ការផ្តល់ជូនបណ្ណកម្មសិទ្ធិលើដីធ្លីនេះហើយ បាននាំមកនូវសក្តានុពលលើផ្នែកសេដ្ឋកិច្ចនៅក្នុងក្រុមគ្រួសារ និងអាចស្វែងរកដៃគូរអភិវឌ្ឍនានា មកធ្វើការអភិវឌ្ឍទៅលើដីធ្លីរបស់ពួកគាត់ជាដើម។ និយាយម្យ៉ាងទៀត វាបានក្លាយទៅជាការជំរុញអនុវត្តន៍ការដោះស្រាយវិវាទដីធ្លីផងដែរ។

លោកឧបនាយករដ្ឋមន្ត្រីបានមានប្រសាសន៍ទៀតថា “យើងនៅសល់ ២២០០ ករណីទៀត នៅទូទាំងប្រទេស ដែលមិនទានបានដោះស្រាយបញ្ចប់តាមរយៈយន្តការទាំងអស់ ទាំងថ្នាក់ជាតិ ថ្នាក់ក្រោមជាតិ និងអាជ្ញាធរដោះស្រាយទំនាស់ដីធ្លី នៅពេលដែលសកម្មភាព នៃការចុះបញ្ជីដីធ្លីរបស់យើងដំណើរការបានទៅមុខថែមទៀត រហូតដល់ ៩៤ ភាគរយ បើចុះបញ្ជីបានមានន័យថា ដីទាំងនេះ គឺគ្មានទំនាស់ យើយអាចប្រកាសតំបន់វិនិឆ្ឆ័យបាន ហើយយើងចេញបណ្ណកម្មសិទ្ធិ ជូនដល់ប្រជាពលរដ្ឋ”៕

រដ្ឋាភិបាលនឹងចាប់ផ្តើមអនុវត្តន៍ការប្រមូលចំណូលពីការផ្តល់សេវាព័ត៌មានសុរិយោដីតាមប្រព័ន្ធអេឡិចត្រូនិក

ដោយៈ វុត្ថា

ភ្នំពេញៈ យោងតាមការប្រកាសអន្តរក្រសួងស្តីពី ការផ្តល់សេវាព័ត៌មានសុរិយោដីតាមប្រព័ន្ធអេឡិចត្រូនិក ចុះថ្ងៃទី២៤ ខែធ្នូ ឆ្នាំ២០១៩ លក្ខខណ្ឌ និងនីតិវិធីនៃការប្រមូលចំណូលពីសេវាផ្តល់ព័ត៌មានសុរិយោដី តាមប្រព័ន្ធអេឡិចត្រូនិក នឹងចាប់ផ្តើមអនុវត្ត ក្រោយការប្រកាសរបស់រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់។

ការប្រមូលចំណូលពីកម្រៃសេវាព័ត៌មានសុរិយោដី តាមប្រព័ន្ធអេឡិចត្រូនិក ត្រូវធ្វើឡើងតាមរយៈគ្រឹះស្ថានធានាគារ និងហិរញ្ញវត្ថុដៃគូរបស់ក្រសួងរៀបចំដែនដី នគរូបនីយកម្ម និងសំណង់។ កម្រៃសេវាព័ត៌មានសុរិយោដី តាមប្រព័ន្ធអេឡិចត្រូនិក ត្រូវបានកំណត់តម្លៃ ២០,០០០រៀល ក្នុងមួយប្រតិបតិ្តការ ដោយគិតបញ្ជូលរួមទាំងកម្រៃសេវារបស់គ្រឹះស្ថានធនាគារ និងហិរញ្ញវត្ថុដៃគូ។ នេះបើយោងតាម ប្រកាសអន្តរក្រសួង រវាងក្រសួងសេដ្ឋកិច្ច និងហិរញ្ញវត្ថុ និងក្រសួងរៀបចំដែនដី នគរូបនីយកម្ម និងសំណង។

អតិថិជន ដែលមានបំណងប្រើប្រាស់សេវាព័ត៌មានសុរិយោដី តាមប្រព័ន្ធអេឡិចត្រូនិក អាចទំនាក់ទំនងតាមមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានី ខេត្ត ឬនៅការិយាល័យច្រកចេញចូលតែមួយនៅក្រសួងរៀបចំដែនដី។

“ព័ត៌មានសុរិយោដី” គឺសំដៅដល់ព័ត៌មានអំពីការជាប់បន្ទុក ឬគ្មានជាប់បន្ទុកនៃអចលនវត្ថុណាមួយ ដែលរួមមានព័ត៌មានទាក់ទងនឹងឯកសិទ្ធិ សិទ្ធិលើការបញ្ចាំហ៊ីប៉ូតែក ហ៊ីប៉ូតែកដើម្បីធានាបំណុលអណ្តែត សិទ្ធិជួលអចិន្រ្តៃយ៍ ផលុបភោគ សេវភាព ការរឹបអូស ការរឹបអូសជាបណ្តោះអាសន្ន ការចាត់ចែងជាបណ្តោះអាសន្ន ដែលហាមឃាត់ការចាត់ចែងអចលនវត្ថុ ការហាមមិនឱ្យបែងចែកអចលនវត្ថុអវិភាគ៕

តើការកាត់ប្លង់ដីផ្ទេរកម្មសិទ្ធិពីម្ចាស់ដើមមកអ្នកទិញដោយមិនចំណាយលុយច្រើនត្រូវធ្វើបែបណា?

ដោយៈ វុត្ថា

ភ្នំពេញៈ រាល់ការទិញដីធ្លី ភាគច្រើនតែងមានភាពស៊ាំញាំ ទៅលើការរៀបចំឯកសារ ដើម្បីរត់ការកាត់ប្លង់ផ្ទេរឈ្មោះពីម្ចាស់ដើម មកឈ្មោះអ្នកទិញធ្វើជាកម្មសិទ្ធិជាពិសេសចំពោះអ្នក ដែលមានការយល់ដឹងពីការរត់ការមិនច្បាស់លាស់។

ជាជំនួយស្មារតី គេហទំព័រ Property area.asia សូមលើកយកនីតិវិធីមួយចំនួនមកបង្ហាញ ដែលអាចមានប្រសិទ្ធភាព និងចំណាយលុយតិច។

ករណីនេះ អាចប្រព្រឹត្តទៅបានតែចំពោះ ប្តី-ប្រពន្ធ ជាម្ចាស់ដី ដែលមានជីវិតរស់នៅតែប៉ុណ្ណោះ។ ចំពោះដំណើរការវិញ គឺមានដូចតទៅ ទី ១.អ្នកទិញត្រូវនាំម្ចាស់ដីដើមទាំងប្តីប្រពន្ធ និងសាក្សីម្នាក់ ដោយភ្ជាប់ជាមួយ (ប្លង់ដីច្បាប់ដើម អត្តសញ្ញាណប័ណ្ណ ឬសំបុត្រកំណើត និងសៀវភៅគ្រួសារថតចម្លង រួមទាំងអត្តសញ្ញាណប័ណ្ណអ្នកទិញ ទៅទីស្នាក់ការសុរិយោដីស្រុក ដើម្បីបំពេញលិខិតលក់ផ្តាច់ ឯកសារផ្ទេរសិទ្ធិ រួចផ្តិតមេដៃយល់ព្រមទាំងអស់គ្នា។ បុគ្គលិកសុរិយោដីស្រុក ជាអ្នកបំពេញលើឯកសារពាក់ព័ន្ធទាំងអស់នេះ។

ទី២ ក្រោយពីបំពេញលើលិខិតលក់ផ្តាច់ ឯកសារផ្ទេរសិទ្ធិ និងផ្តិតមេដៃ ចំពោះមុខបុក្គលិកសុរិយោដៃរួច។ បន្ទាប់មកម្ចាស់ដី ឬអ្នកទិញត្រូវយកលិខិតលក់ផ្តាច់ ប្លង់ដីច្បាប់ដើម និងឯកសារផ្ទេរសិទ្ធិ ទៅជួបមេភូមិដើម្បីសុំហត្ថលេខាពីគាត់ រួចយកជួបមេឃុំ ដើម្បីសុំហត្ថលេខា បោះត្រា (មេភូមិ និងមេឃុំមានសិទ្ធិហត្ថលេខា និងបោះត្រាតែលើលិខិតផ្ទេរសិទ្ធិប៉ុណ្ណោះ ហើយលោកអ្នកអាចជូនប្រាក់ ដល់ពួកគាត់ខ្លះទៅតាមសន្តានចិត្ត នេះមិនមែនជាអំពើពុករលួយនោះទេ)។

បន្ទាប់មកទៀតត្រូវយកលិខិតលក់ផ្តាច់ ប្លង់ដីច្បាប់ដើម និងឯកសារផ្ទេរសិទ្ធិទៅប្រគល់ជូនប្រធានមន្ទីសុរិយោដីស្រុកវិញ ដើម្បីហត្ថលេខាសម្រេច និងបោះត្រាបញ្ចប់ការផ្ទេរសិទ្ធិត្រឹមស្រុក។ តម្លៃសេវាសុរិយោដីស្រុកគឺចំនួន២០ម៉ឺនរៀល ក្នុងដីមួយប្លង់ទោះបីធំឬតូចប៉ុណ្ណាក៏ដោយ ដែលជាប្រភេទដីកសិកម្ម។

ត្រឹមដំណាក់កាលនេះ អាចជាដំណាក់កាល៥០% នៃដំណើរការផ្ទេរសិទ្ធិ ប៉ុន្តែប្លង់ដីដដែល គឺនៅតែជាប់ឈ្មោះម្ចាស់ដីដើមនៅឡើយ តែគ្រាន់តែមានលិខិតផ្ទេរសិទ្ធិ និងលក់ផ្តាច់អមជាមួយ ដោយស្របច្បាប់មានន័យអំណះអំណាងថា អ្នកបានទិញរួចហើយ។ អ្នកអាចបន្តដំណើរការកាត់ប្លង់ដីមកជាឈ្មោះអ្នក ដោយបន្តដំណាក់កាលតទៅមុខទៀតដូចតទៅ៖

ចំពោះដំណាក់កាលចុងក្រោយ ប្រសិនបើអ្នកចង់បានឈ្មោះនៅលើប្លង់ដី ដែលអ្នកបានទិញពីម្ចាស់ដើម ដោយប្តូរឈ្មោះកម្មសិទ្ធិពីម្ចាស់ដើម មកជាឈ្មោះអ្នកវិញ គឹត្រូវអនុវត្តដូចខាងក្រោម៖ គឺម្ចាស់ដី ឬក៏ជាអ្នកទិញ ត្រូវយកលិខិតលក់ផ្តាច់ ប្លង់ដីច្បាប់ដើម និងឯកសារផ្ទេរសិទ្ធិ ដែលបានធ្វើរួចរាល់ពីមន្ទីសុរិយោដីស្រុក យកទៅកាន់មន្ទីសុរិយោដីខេត្តដើម្បីត្រួតពិនិត្យឡើងវិញ និងបោះត្រាបញ្ជាក់ថាមានឯកសារបញ្ជាក់លិខិតស្នាមគ្រប់គ្រាន់ និងអនុវត្តគ្រប់តាមនីតិវិធី។

រួចត្រូវយកលិខិតលក់ផ្តាច់ ប្លង់ដីច្បាប់ដើម និងឯកសារផ្ទេរសិទ្ធិទៅបង់ពន្ធប្រថាប់ត្រាប្រាក់៤% នៃតម្លៃដីតាមច្បាប់កំណត់នៅឯអគ្គនាយដ្ឋានពន្ធដាខេត្ត ដោយរង់ចាំរយៈពេលមួយខែ ដើម្បីវាយតម្លៃដីក្នុងតំបន់។ បន្ទាប់ពីវាយតំលៃដី និងគណនាពន្ធប្រថាប់ត្រារួច ខាងអគ្គនាយដ្ឋានពន្ធដាខេត្ត នឹងទាក់ទងទៅម្ចាស់ដី ឬអ្នកទិញដើម្បីមកបងពន្ធប្រថាប់ត្រា៤% រួចដកយកលិខិតលក់ផ្តាច់ ប្លង់ដីច្បាប់ដើម និងឯកសារផ្ទេរសិទ្ធិត្រលប់មកវិញ។

បន្ទាប់ពីបានបង់ពន្ធប្រថាប់ត្រារួច ម្ចាស់ដីឬអ្នកទិញត្រូវយកលិខិតលក់ផ្តាច់ ប្លង់ដីច្បាប់ដើម និងលិខិតផ្ទេរសិទ្ធិនោះទៅមន្ទីសុរិយោដីខេត្តវិញ ដើម្បីចុះហត្ថលេខា និងបោះមកត្រាសម្រេចដោយជោគជ័យ ពីប្លង់ដីឈ្មោះម្ចាស់ដើម មកឈ្មោះអ្នកទិញ ដោយបង់ថ្លៃសេវាចំនួន២០ម៉ឺនរៀល ដើម្បីចេញជាប្លង់ដីថ្មី ជាឈ្មោះកម្មសិទ្ធិរបស់អ្នកទិញ។ រយៈពេលទទួលបានប្លង់ថ្មីអាចចន្លោះពីបីខែទៅ៦ខែ៕

រដ្ឋាភិបាលចាប់ផ្តើមការធ្វើកំណែទម្រង់ពន្ធដារដើម្បីទប់ស្កាត់ការចាកចេញរបស់ក្រុមហ៊ុនបរទេស

ដោយ ៖ រ៉ាណេត

ភ្នំពេញៈ រដ្ឋាភិបាលតាមរយៈអគ្គនាយកពន្ធដារកម្ពុជា បានចេញសេចក្ដីថ្លែងការណ៍មួយ ឆ្លើយតបទៅនឹងការចេញផ្សាររបស់បណ្តាញ សារព័ត៌មានក្នុងស្រុកមួយ ដែលលើកឡើងក្រោមប្រធានបទ “ តើអាជីវកម្មនឹងចាកចេញពីកម្ពុជា ដោយសារតែការកែទម្រង់ពន្ធដារ” ។

សេចក្ដីថ្លែងការរបស់អគ្គនាយកដ្ឋានពន្ធដារបានលើកឡើងថា កន្លងទៅថ្មីៗនេះ សារព័ត៌មានក្នុងស្រុកមួយ បានធ្វើការចុះផ្សាយអត្ថបទមួយក្រោមចំណងជើងថា “តើអាជីវកម្មនឹងចាកចេញពីកម្ពុជា ដោយសារតែការកែទម្រង់ពន្ធដារ (will businesses pull out of Cambodia over tax reforms) ? ដោយធ្វើការសម្ភាសជាមួយបុគ្គលដែលសុំមិនបញ្ចេញឈ្មោះ លើបញ្ហាមួយចំនួនពាក់ព័ន្ឋនឹងការធ្វើសវនកម្មពន្ធដារ និងការកែទម្រង់របស់អគ្គនាយកដ្ឋានពន្ធដារ។

អគ្គនាយកដ្ឋានពន្ធដារបញ្ជាក់ថា សវនកម្មពន្ធដារ សំដៅដល់ការពិនិត្យបញ្ជាក់លើបញ្ជីកាគណនេយ្យ របាយការណ៍ហិរញ្ញវត្ថុ និងឯកសារផ្សេងៗ ដែលពាក់ព័ន្ធនឹងអាជីវកម្មរបស់អ្នកជាប់ពន្ធ ដើម្បីបញ្ជាក់ថាការប្រកាសបង់ប្រាក់ពន្ធ បានត្រឹមត្រូវតាមច្បាប់ និងបទប្បញ្ញត្តិស្តីពីពន្ធដារ។ ការធ្វើសវនកម្មពន្ធដារ គឺជាវិធានការដ៏សំខាន់ដែលត្រូវបានប្រើប្រាស់ទូទាំងសកលលោក ដែលជាខ្នាត(ម៉ែត្រ)សម្រាប់វាស់ និងពង្រឹងការគោរពច្បាប់ការប្រមូលពន្ធឱ្យមានតម្លាភាព និងការធានាសមធម៌ក្នុងការបង់ពន្ធ។

ថ្មីៗនេះ ក្រសួងសេដ្ឋកិច្ចនិងហិរញ្ញវត្ថុ បានចេញប្រកាសលេខ២៧០ សហវ.ប្រក ចុះថ្ងៃទី១៣ ខែមីនា ឆ្នាំ២០១៥ស្តីពី សវនកម្មពន្ធរ ក្នុងគោលបំណងធ្វើឱ្យប្រសើរឡើងនូវនីតិវិធីនៃការធ្វើសវនកម្ម ដើម្បីធានានូវតម្លាភាពក្នុងការបង់ប្រាក់ពន្ធ និងបង្កើនបរិយាកាសប្រកួតប្រជែងដោយស្មើភាព ក្នុងការប្រកបអាជីវកម្ម នៅក្នុងព្រះរាជាណាចក្រកម្ពុជា ហើយមានវិសាលភាព អនុវត្តលើអ្នកជាប់ពន្ធតាមរបបស្វ័យប្រកាស ដែលមានហានិភ័យពន្ធដារជាក់លាក់ ដោយមិនបែងចែកជាតិសាសន៍ឬប្រភេទនៃអ្នកជាប់ពន្ធ ឬទៅបើប់អ្នកជាប់ពន្ធទាំងអស់នោះទេ។

អគ្គនាយកដ្ឋានពន្ធដារសូមជម្រាបជួនផងដែរថា ដើម្បីគាំទ្រដល់ការធ្វើអាជីវកម្មរបស់សហគ្រាសធុនតូច និងឆ្លើយតបនឹងគោលនយោបាយរបស់រាជរដ្ឋាភិបាល ដែលតែងតែគិតគូរ និងយកចិត្តទុកដាក់ដល់ប្រជាពលរដ្ឋ ដែលប្រកបអាជីវកម្មជាសហគ្រាសធុនតូច អគ្គនាយកដ្ឋានពន្ធដារ មិនដែលបានដាក់កម្មវិធីសវនកម្មចំពោះសហគ្រាសដែលជាអ្នកជាប់ពន្ធតូចទាំងអស់នៅឡើយទេ។

មកទល់នឹងបច្ចុប្បន្ននេះ ហើយការធ្វើសវនកម្មនេះទៀតសោត មិនមែនគ្រប់អ្នកជាប់ពន្ធដែលទទួលរងសវនកម្មទាំងអស់ សុទ្ធតែប្រព្រឹត្តកំហុសឆ្គង ហើយទទួលរងការកំណត់ពន្ធឡើងវិញទាំងអស់នោះទេ គឺអាស្រ័យលើកម្រិតនៃការអនុលោមតាមច្បាប់និងបទប្បញ្ញត្តិជាធរមានរបស់អ្នកជាប់ពន្ធផងដែរ ដែលកន្លងមកក៏មានអ្នកជាប់ពន្ធជាច្រើន ដែលបានស្នើ សុំធ្វើសវនកម្មមកអគ្គនាយកដ្ឋានពន្ធដារ ត្រូវបានទទួលការកំណត់ពន្ធឡើងវិញ០រៀលផងដែរ។

ពាក់ព័ន្ធនឹងការកំណត់ពន្ធឡើងវិញនេះ អគ្គនាយកដ្ឋានពន្ធដារសូមលើកទីកចិត្តដល់អ្នកជាប់ពន្ធទាំងអស់ ក្នុងការតវ៉ាចំពោះការកំណត់ពន្ធទាំងឡាយណា ដែលអ្នកជាប់ពន្ធយល់ថាមិនត្រឹមត្រូវ ដោយគ្មានការខ្លាចរអារអ្វីទាំងអស់ ដើម្បីចូលរួមក្នុងការអនុវត្តច្បាប់។ ចំពោះការតវ៉ាលើការកំណត់ពន្ធឡើងវិញនេះ អគ្គនាយកដ្ឋានពន្ធដារសូមគូសបញ្ជាក់បន្ថែមថា រយៈពេល៣០ថ្ងៃ ដែលអ្នកជាប់ពន្ធមានសិទ្ធិ ក្នុងការតវ៉ាចំពោះការកំណត់ពន្ធនេះ គ្រាន់តែជារយពេលដែលអ្នកជាប់ពន្ធ ត្រូវដាក់លិខិតតវ៉ាដោយភ្ជាប់ឯកសារមួយចំនួន ទាក់ទិនលើការកំណត់ពន្ធនោះប៉ុណ្ណោះ មិនមែនជារយៈពេលដោះស្រាយបញ្ចប់ការតវ៉ានោះទេ។

សេចក្ដីលម្អិតសូមអាននូវសេចក្ដីប្រកាសដូចខាងក្រោមនេះ ៖

កម្ពុជា និងកូរ៉េខាងត្បូងនឹងជំរុញពាណិជ្ជកម្មទ្វេភាគីដល់១០០០លានដុល្លារនៅឆ្នាំ ២០២០

ដោយ ប៊ី

ភ្នំពេញៈ ប្រទេសកម្ពុជា និងសាធារណរដ្ឋកូរ៉េ មានគោលដៅជំរុញពាណិជ្ជកម្មទ្វេភាគីដល់១ពាន់លានដុល្លារនៅឆ្នាំ ២០២០។

រដ្ឋមន្រ្តីក្រសួងការបរទេសកម្ពុជាលោកប្រាក់ សុខុន និងឯកអគ្គរដ្ឋទូតកូរ៉េដែលទើបតែងតាំងថ្មីនៅកម្ពុជា Park Heung-kengeng នៅថ្ងៃទី ២៣ ខែធ្នូបានពិភាក្សាគ្នាអំពីវិធីដើម្បីពន្លឿនការអនុវត្តកិច្ចព្រមព្រៀង ដើម្បីទាក់ទាញការវិនិយោគបន្ថែមទៀតដែលបានចុះហត្ថលេខា ក្នុងកិច្ចប្រជុំកំពូលនៅទីក្រុងប៊ូសានកាលពីខែមុន។

ភាគីទាំងពីរបានឯកភាពគ្នាក្នុងការបង្កើនពាណិជ្ជកម្ម និងវិនិយោគជាពិសេសលើវិស័យទេសចរណ៍។ ភាគីទាំងពីរជឿជាក់ថា កិច្ចព្រមព្រៀងទាំងនេះ នឹងជំរុញអាជីវកម្មកូរ៉េឱ្យមកវិនិយោគនៅកម្ពុជាកាន់តែច្រើន។

នៅខាងក្រៅកិច្ចប្រជុំកំពូលអាស៊ាន និងសាធារណរដ្ឋកូរ៉េនៅទីក្រុងប៊ូសាននាខែ វិច្ឆិកា ឆ្នាំ២០១៩កន្លងមក រដ្ឋមន្រ្តីក្រសួងការបរទេសកម្ពុជា និងភាគីកូរ៉េ លោក Kang Kyung-wha បានចុះហត្ថលេខាលើកិច្ចព្រមព្រៀងចំនួន៥ រួមទាំងការសិក្សារួមគ្នាស្តីពីលទ្ធភាពនៃកិច្ចព្រមព្រៀងពាណិជ្ជកម្មសេរី។

ភាគីទាំងពីរក៏បានចុះហត្ថលេខាលើអនុស្សរណៈ នៃការយោគយល់គ្នាចំនួនពីរស្តីពីកិច្ចសហប្រតិបត្តិការ ក្នុងវិស័យកសិកម្ម បច្ចេកវិទ្យា ទូរគមនាគមន៍ និងព័ត៌មាន។

ក្នុងរយៈពេល៩ខែឆ្នាំ២០១៩ ពាណិជ្ជកម្មទ្វេភាគីសម្រេចបានជិត៧០០លានដុល្លារ។ក្នុងរយៈពេល២៣ឆ្នាំកន្លងមកនេះសាធារណរដ្ឋកូរ៉េ បានវិនិយោគទឹកប្រាក់ចំនួន ៤,៤៧ពាន់លានដុល្លារអាមេរិកមកក្នុងប្រទេសកម្ពុជា៕