ក្រុមហ៊ុនលំដាប់ពិភពលោកមួយបោះទុនជិត១២០០លានដុល្លារ សាងសង់មជ្ឈមណ្ឌលពាណិជ្ជកម្មនៅលើទីក្រុងកោះពេជ្រ

ដោយគង់ សូរិយា

ភ្នំពេញៈ ក្រុមហ៊ុន BOCC DEVELOPMENT CO.,LTD. ដែលជាក្រុមហ៊ុនលំដាប់ពិភពលោក គ្រោងចំណាយទុន ១១៨១លានដុល្លារអាមេរិក ដើម្បីសាងសង់មជ្ឈមណ្ឌលពាណិជ្ជកម្ម និងលំនៅដ្ឋានប្រណីតនៅលើទីក្រុងកោះពេជ្រ។

យោងតាមសេចក្តីប្រកាសព៌តមាន របស់ក្រុមប្រឹក្សាអភិវឌ្ឍន៍កម្ពុជា (CDC) បានឲ្យដឹងកាលពីព្រលប់ថ្ងៃទី២៥ ធ្នូកន្លងមកថា ក្រុមហ៊ុនខាងលើនេះមានគម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៥០០បន្ទប់, Service Hotel Apartment ថ្នាក់ផ្កាយ៤ ចំនួន១.៦០០units និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ “លើកោះពេជ្រ”។

ក្រុមហ៊ុននេះគ្រោងដាក់ទុនវិនិយោគ ប្រមាណ ១,១៨១ពាន់លានដុល្លារអាមេរិក និងអាចបង្កើតការងារបានចំនួន ៦.៣៧០កន្លែង។

លោកទូច សំណាង អគ្គនាយករងក្រុមហ៊ុន OCIC ដែលកំពុងគ្រប់គ្រងអភិវឌ្ឍន៍ទីក្រុងកោះពេជ្រ បានមានប្រសាសន៍ឲ្យដឹងកាលពីសប្តាហ៍មុនថា ពិតជាមានគំរោងដ៏ធំបាននិងកំពុងត្រៀមសាងសង់នៅលើទីក្រុងកោះពេជ្រ ប៉ុន្តែលោកមិន ទាន់បញ្ជាក់ពីឈ្មោះក្រុមហ៊ុន និងឈ្មោះគំរោងនេះនៅឡើយទេ ប៉ុន្តែពេលនេះគំរោងនេះពិតជាត្រូវបានអនុម័តដោយ CDC។

លោកបន្តថា “គំរោងនេះមានទីតាំងនៅតំបន់ផ្សារាត្រី និងកន្លែងលេងកំសាន្តរបស់កុមារ ដែលបច្ចុប្បន្នតំបន់លេងកំសាន្តនេះបានរើចាកចេញហើយ”។ លោកបន្តថា “ផ្ទៃដីកោះពេជ្រ ទើបអភិវឌ្ឍន៍បាន៥០ភាគរយ ហើយបើគិតពីផ្ទៃក្រឡាសំណង់នៅលើទីក្រុងកោះពេជ្រ ទើបសម្រេចបាន២៥ភាគរយប៉ុណ្ណោះ”៕

CDC អនុម័តគំរោងវិនិយោគមានទឹកប្រាក់ជិត ២០០០លានដុល្លារអាមេរិកក្នុងសប្តាហ៍នេះ

ដោយ ម៉ាណេត

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគំរោងវិនិយោគចំនួន៩ ដែលមានទំហំទឹកប្រាក់ជាង១៩២៨ លានដុល្លារអាមេរិក នៅក្នុងសប្តាហ៍នេះ។

យោហងតាមសេចក្តីប្រកាសរបស់ CDC ដែលទើបទទួលបានកាលពីព្រលប់ថ្ងៃទី២៥ ធ្នូកន្លងមកនេះបានឲ្យដឹងថា តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

ទី១-ក្រុមហ៊ុន “SCHNEITEC POWER CO., LTD” គម្រោងសាងសង់ខ្សែបណ្តាញបញ្ជូន និងអនុស្ថានីយអគ្គិសនី ដែលមានទីតាំងវិនិយោគស្ថិតនៅសង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៧១លានដុល្លារអាមេរិក និងអាចបង្កើតការងារបានចំនួន៧០កន្លែង។

ទី២- ក្រុមហ៊ុន“SCHNEITEC INFINITE CO., LTD” គម្រោងសាងសង់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ កម្លាំង៣០មេហ្គាវ៉ាត់ ដែលមានទីតាំងវិនិយោគស្ថិតនៅភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ មានទុនវិនិយោគប្រមាណ ២៩លានដុល្លារអាមេរិក និងអាចបង្កើតការងារបានចំនួន ៣៥កន្លែង។

ទី៣-ក្រុមហ៊ុន “DE HEUS TMH CO., LTD” គម្រោងបង្កើតរោងចក្រផលិតចំណីសត្វ ដែលមានទីតាំងវិនិយោគស្ថិតនៅផ្លូវជាតិលេខ៥១ ភូមិក្បាលអូរ ឃុំព្រះស្រែ ស្រុកឧដ្តុង្គ ខេត្តកំពង់ស្ពឺ មានទុនវិនិយោគប្រមាណ ១១,២លានដុល្លារអាមេរិក និងអាចបង្កើតការងារបានចំនួន ១៥៥កន្លែង។

ទី៤ក្រុមហ៊ុន-“MILLPLAN INDUSTRIES (CAMBODIA) CO.,LTD.” គម្រោងបង្កើតរោងចក្រផ្គុំដំឡើងសម្ភារៈ អេឡិចត្រូនិក ដែលមានទីតាំងវិនិយោគស្ថិតនៅប្លុក I-J ផ្លូវជាតិលេខ៤១ ភូមិវាលវង់ ឃុំសែនដី ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ៧លានដុល្លារអាមេរិក និងអាចបង្កើតការងារបានចំនួន៧៣០កន្លែង។

ទី៥-ក្រុមហ៊ុន “FHL INDUSTRIES CO., LTD” គម្រោងបង្កើតរោងចក្រផ្គុំដំឡើងគ្រឿងបរិក្ខាអគ្គិសនី និងគ្រឿងអេឡិចត្រូនិកគ្រប់ប្រភេទ ដែលមានទីតាំងវិនិយោគស្ថិតនៅភូមិចំបក់ ឃុំវល្លិសរ ស្រុកសំរោងទង ខេត្តកំពង៉ស្ពឺ មានទុនវិនិយោគប្រមាណ២,៤លានដុល្លារអាមេរិក និងអាចបង្កើតការងារបានចំនួន៧៣៤កន្លែង។

ទី៦-ក្រុមហ៊ុន“CXD INDUSTRY CO.,LTD.” គម្រោងបង្កើតរោងចក្រផ្គុំដំឡើងរថយន្តគ្រប់ប្រភេទ និងគ្រឿងម៉ាស៊ីន សម្ភារៈបរិក្ខាផ្សេងៗ ដែលមានទីតាំងវិនិយោគស្ថិតនៅភូមិគ្រួស សង្កាត់សំរោង ខណ្ឌព្រែកភ្នៅ រាជធានីភ្នំពេញ មានទុនវិនិយោគប្រមាណ៦លានដុល្លារអាមេរិក និងអាចបង្កើតការងារបានចំនួន៧៣០កន្លែង។

ទី៧-ក្រុមហ៊ុន“AEON MALL (CAMBODIA) CO.,LTD.” គម្រោងសាងសង់ផ្សារទំនើប ដែលមានទីតាំងវិនិយោគស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ២៨៩,៦លានដុល្លារអាមេរិក និងអាចបង្កើតការងារបានចំនួនរាប់រយកន្លែង។

ទី៨-ក្រុមហ៊ុន“XIN DA SHI JIE INTERNATIONAL HOTEL CO.,LTD.” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន១.៥០០បន្ទប់ និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ៣៣១,៥លានដុល្លារអាមេរិក និងអាចបង្កើតការងារបានចំនួន២.៥០៩កន្លែង។

ទី៩-ក្រុមហ៊ុន“BOCC DEVELOPMENT CO.,LTD.” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៥០០បន្ទប់, Service Hotel Apartment ថ្នាក់ផ្កាយ៤ ចំនួន១.៦០០units និងមជ្ឈមណ្ឌលពាណិជ្ជកម្ម ដែលមានទីតាំងវិនិយោគស្ថិតនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ “លើកោះពេជ្រ” មានទុនវិនិយោគប្រមាណ ១,១៨១ពាន់លានដុល្លារអាមេរិក និងអាចបង្កើតការងារបានចំនួន៦.៣៧០កន្លែង៕

កំណើនចំនួនមហាសេដ្ឋីចិនវ៉ាដាច់អាមេរិកជាលើកដំបូងក្នុងប្រវត្តិសាស្រ្ត

ដោយ Donald Lee

ភ្នំពេញៈ នេះជាលើកទីមួយហើយ ដែលប្រទេសចិនបានវ៉ាដាច់អាមេរិកនៅឆ្នាំនេះដោយក្លាយជាប្រទេសលេខមួយ ដែលមានល្បឿននៃចំនួនប្រជាជនមានទ្រព្យសម្បត្តិខ្ពស់ជាងគេបំផុតនៅលើពិភពលោក ដែលមានរហូតដល់ចំនួន១០ភាគរយ។ នេះបើយោងតាមធនាគារវិនិយោគស្វីសឈ្មោះ Credit Suisse Group ។

របាយការណ៍ទ្រព្យសម្បត្តិសកលឆ្នាំ២០១៩ របស់ធនាគារបានរកឃើញថា ចិន និងអាមេរិកនៅតែឈរនៅលំដាប់កំពូល នៃការបង្កើតទ្រព្យសម្បត្តិពិភពលោក ដែលជានិន្នាការមួយមានរយៈពេល១០ឆ្នាំកន្លងមក។

របាយការណ៍បាននិយាយថា“ក្នុងទសវត្សកន្លងមក ការបង្កើតទ្រព្យសម្បត្តិសកលបានផ្តោតលើប្រទេសចិន និងអាមេរិក។ នៅឆ្នាំនេះ អាមេរិកបានពង្រីកកំណើនទ្រព្យសម្បត្តិរបស់ខ្លួន បន្ទាប់ពីវិបត្តិហិរញ្ញវត្ថុពិភពលោកក្នុងឆ្នាំ២០០៨”។

របាយការណ៍ក៏បានរកឃើញថា ពលរដ្ឋអាមេរិកមានចំនួន៤០ភាគរយ នៃមហាសេដ្ឋីនៅជុំវិញពិភពលោក។

ទោះយ៉ាងណា ចិនគឺជាប្រទេស ដែលមានកំណើនសេដ្ឋកិច្ចលឿនបំផុត ហើយបានជំនួសកន្លែងសហភាពអឺរ៉ុប ដែលជាប្រភពនៃការបង្កើតទ្រព្យសម្បត្តិ និងបានវ៉ាដាច់ជប៉ុនដើម្បីឈរនៅលំដាប់ទី២នៃចំនួនមហាសេដ្ឋី។

របាយការណ៍បានពន្យល់ថា “ទ្រព្យសម្បត្តិនៅក្នុងប្រទេសចិន បានចាប់ផ្តើមវិវត្តន៍ ពីមូលដ្ឋានទាប ប៉ុន្តែបានកើនឡើងក្នុងល្បឿនលឿនជាងអំឡុងឆ្នាំមុនៗ។ វាគឺជាប្រទេសមួយ ក្នុងចំណោមប្រទេសមួយចំនួន ដែលត្រូវចៀសវាងផលប៉ះពាល់នៃវិបត្តិហិរញ្ញវត្ថុពិភពលោក”។

របាយការណ៍បានបន្ថែមថា “ការរីកចម្រើនរបស់ចិន បានធ្វើឱ្យប្រទេសនេះអាចជំនួសកន្លែងអឺរ៉ុប ជាប្រភពដ៏សំខាន់នៃកំណើនសេដ្ឋកិច្ចពិភពលោក និងជំនួសកន្លែងប្រទេសជប៉ុន ក្នុងនាមជាប្រទេសដែលមានចំនួនមហាសេដ្ឋីលំដាប់ទី២”។

នៅចុងបញ្ចប់នៃកិច្ចព្រមព្រៀងពាណិជ្ជកម្មរវាងអាមេរិក និងចិនបានបញ្ឈប់សង្គ្រាមពាណិជ្ជកម្មដ៏ថ្លៃបំផុតមួយ នៅក្នុងប្រវត្តិសាស្រ្ត និងបាននាំមកនូវសញ្ញាដំបូងនៃការថយចុះនៃសង្រ្គាមពាណិជ្ជកម្មរយៈពេល១៧ ខែរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ភាពមិនត្រឹមត្រូវ នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះដូចកម្រិតវិបត្តិហិរញ្ញវត្ថុដ៏ធំកាលពី១០ឆ្នាំមុន៕

CDC អនុម័តគំរោងវិនិយោគផ្សារទំនើប AEON MALL3 ជាផ្លូវការហើយ

ដោយ ម៉ាណេត

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តជាផ្លូវការនូវគំរោងវិនិយោគផ្សារទំនើបលំដាប់អន្តរជាតិ AEON MALL3 ជាផ្លូវការហើយ ដែលគម្រោងនេះត្រូវបានប្រភពស្និទ្ឋនឹងអ្នកវិនិយោគថា ការសាងសង់នឹងចាប់ផ្តើមនៅកំឡុងត្រីមាសទគី៣ឆ្នាំ២០២០។

យោងតាមសេចក្តីប្រកាសរបស់គណកម្មការវិនិយោគ នៃក្រុមប្រឹក្សាភិវឌ្ឍន៍កម្ពុជា ដែល Propertyarea.asia ទទួលបាននាល្ងាចថ្ងៃទី២៥ ធ្នូនេះបានឲ្យដឹងថា -“AEON MALL (CAMBODIA) CO.,LTD.” គម្រោងសាងសង់ផ្សារទំនើប ដែលមានទីតាំងវិនិយោគស្ថិតនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានទុនវិនិយោគប្រមាណ ២៨៩,៦លានដុល្លារអាមេរិក និងអាចបង្កើតការងារបានចំនួនរាប់រយកន្លែង។

ផ្សារទំនើប AEON MALL3 មានទីតាំងស្ថិតនៅតាមបណ្តោយមហាវិថីសម្តេចតេជោហ៊ុន សែន ស្ថិតនៅភាគខាងត្បូងរាជធានីភ្នំពេញ ដែលផ្សារទំនើបទី៣នេះមានទំហំធំជាងផ្សារទំនើប AEON MALL1, EAON MALL2។ ផ្សារទំនើបថ្មីនេះនឹងសាងសង់លើផ្តៃដី១៨ហិកតា ហើយវានឹងជាផ្សារទំនើបដ៏ធំជាងគេនៅរាជធានីភ្នំពេញ៕

រដ្ឋាភិបាលចែកសាលាកបត្រព័ត៌មានជូនប្រជាពលរដ្ឋដែលអាស្រ័យផលដីនៅតំបន់៣

ដោយ វុត្ថា

គោកត្របែក៖ រដ្ឋាភិបាលតាមរយ:អជ្ញាធរខេត្តកំពង់ធំបានចែកសាលាកប័ត្រព័ត៌មានជូនប្រជាពលរដ្ឋដែលអាស្រ័យផលដីនៅតំបន់៣ មានចំនួន ១២៤គ្រួសារស្ថិតនៅភូមិគោកត្របែក ឃុំស្រឡៅ ស្រុកតាំងគោក ខេត្តកពង់ធំ។

លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពង់ធំនៅក្នុងពិធីចែកសាលាកបត្រពត៌មានជូនប្រជាពលរដ្ឋនាព្រឹកថ្ងៃទី ២៥ ខែធ្នូ ឆ្នាំ២០១៩ ឱ្យដឹងថាចំពោះដីអាស្រ័យផលនៅតំបន់៣នេះ ក្រុមការងារជំនាញបានចុះបំពេញសាលាកបត្របានចំនួន ១២៤គ្រួសារ ដែលមានផ្ទៃដីសរុប ជាង ១៣១ ហិកតា គិតជាក្បាលដីចំនួន ១៣៣ក្បាលដី ក្នុងនោះប្រជាពលរដ្ឋដែលមានក្បាលដី ០២ប្លង់ មានចំនួន ០៧គ្រួសារ និងមានក្បាលដី ០៤ប្លង់ មានចំនួន ០១គ្រួសារ។

លោកបន្តថា ការចុះធ្វើសាលាកបត្រនេះ គឺក្រុមការងារចុះធ្វើតែលើទីតាំងដែលប្រជាពលរដ្ឋអាស្រ័យផលជាក់ស្តែងតែប៉ុណ្ណោះ ហើយក្នុង ០១គ្រួសារ មិនលើសពី ០៥ហិកតា។

លោក ថោង ខុន បានផ្តាំផ្ញើដល់ប្រជាពលរដ្ឋដែលទទួលបានសាលាកបត្រព័ត៌មាននេះ និងប្រជាពលរដ្ឋទូទៅ៖

– ហាមទិញ ឬលក់ដូរដីនៅតំបន់៣នេះ ព្រោះជាដីអាស្រ័យផល
- សូមកុំកាប់ទន្ទ្រានដីព្រៃ និងដីនៅតំបន់ហាមឃាត់
- សូមកុំប្រើប្រាស់ឧបករណ៍នេសាទខុសច្បាប់ ពិសេសការឆក់ត្រី
– សូមចូលរួមថែរក្សា និងការពារធនធានធម្មជាតិ ដើម្បីទុកឲ្យកូនចៅជំនាន់ក្រោយ
– សូមអាជ្ញាធរខេត្ត មន្ទីរជំនាញពាក់ព័ន្ធ និងអាជ្ញាធរមូលដ្ឋាន បង្កលក្ខណៈដល់ការបង្កបង្កើនផល និងអាស្រ័យផលរបស់ប្រជាពលរដ្ឋមូលដ្ឋាន
– សូមចូលរួមថែរក្សារាល់សមិទ្ធផលទាំងឡាយនៅភូមិគោកត្របែក ដែលជាអំណោយដ៏ថ្ងៃថ្លារបស់សម្តេចតេជោនាយករដ្ឋមន្ត្រី សម្តេចកិត្តិព្រឹទ្ធបណ្ឌិត និងសប្បុរសជននានា
– សូមបងប្អូនប្រជាពលរដ្ឋមានជំនឿជឿជាក់ កក់ក្តៅ និងទុកចិត្តមកលើរាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្រ្តី ក្នុងការបន្តដឹកនាំ និងកសាងប្រទេសជាតិឆ្ពោះទៅរកសុខសន្តិភាព ស្ថិរភាព និងការអភិវឌ្ឍរីកចម្រើនលើគ្រប់វិស័យ។

ប្រជាពលដ្ឋមានសេចក្តីរីករាយក្រៃលែង និងសូមថ្លែងអំណរគុណដល់រាជរដ្ឋាភិបាល ក្រុមការងារថ្នាក់ជាតិ រដ្ឋបាលខេត្ត ស្រុក ឃុំ និងភូមិ ដែលបានយកចិត្តទុកដាក់គិតគូរដល់ការបង្កបង្កើនផល និងជីវភាពរស់នៅរបស់ប្រជាពលរដ្ឋមូលដ្ឋាន៕

SME ដែលជាវិស័យឆ្អឹងខ្នងសេដ្ឋកិច្ចខេត្តព្រះសីហនុ កើនឡើងដល់ ៣,១១០ មូលដ្ឋាន

ដោយ វុត្ថា

ភ្នំពេញ: គិតត្រឹមត្រីមាសទី៤ ឆ្នាំ២០១៩ សហគ្រាសធុនតូច និងមធ្យម (SME) ក្នុងខេត្តព្រះសីហនុ មានចំនួន ៣,១១០ មូលដ្ឋាន និងប្រើប្រាស់កម្លាំងពលកម្មជាច្រើននាក់។ នេះបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ដែលបានផ្សព្វផ្សាយកាលពីកន្លងទៅថ្មីៗនេះ នៅក្នុងសិក្ខាសាលាផ្សព្វផ្សាយស្តីពីការលើកទឹកចិត្តផ្នែកគយនិងផ្នែកពន្ធដារ សម្រាប់សហគ្រាសធុនតូចនិងមធ្យម នៅក្នុងខេត្តព្រះសីហនុ។

លោក គុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានគយនិងរដ្ឋាករកម្ពុជាបានគូសបញ្ជាក់ថា សហគ្រាសធុនតូចនិងមធ្យម គឺជាឆ្អឹងខ្នងសេដ្ឋកិច្ច និងជាកម្លាំងចលករដ៏ខ្លាំងមួយ ក្នុងការជំរុញកំណើននិងបង្កើតការងារ។

លោកបន្តថា ក្នុងបរិបទនេះ កម្ពុជាដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវវិធានការជាច្រើនដើម្បីគាំទ្រវិស័យ សហគ្រាសធុនតូចនិងមធ្យម ដូចមានចែងក្នុងឯកសារគោលនយោបាយ និងឯកសារយុទ្ធសាស្រ្ត រួមមាន៖

(១). គោល នយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥ (២). យុទ្ធសាស្រ្តចតុកោណដំណាក់កាលទី៤ និង (៣). យុទ្ធសាស្រ្តកៀរគរចំណូល ២០១៩-២០២៣។

លោកបន្ថែមថាកន្លងមក រាជរដ្ឋាភិបាលធ្លាប់បានដាក់ចេញនូវវិធានការជាបន្តបន្ទាប់ ក្នុងការគាំទ្រដល់វិស័យកសិកម្ម និងសហគ្រាសធុនតូចនិងមធ្យម រួមមាន ការបញ្ចុះអត្រាពន្ធគយ អត្រាអាករពិសេស ការដាក់អាករលើតម្លៃបន្ថែមជាបន្ទុករដ្ឋ និងការដាក់អាករនាំចេញជាបន្ទុករដ្ឋលើមុខទំនិញជាជីកសិកម្ម ពូជដំណាំ ពូជសត្វ បសុឱសថ ចំណីសត្វ សម្ភារគ្រឿងចក្រកសិកម្ម និងវត្ថុធាតុដើមផលិតកម្មបម្រើក្នុងវិស័យទាំងនេះ។

លោកបន្ថែមថា ដើម្បីជំរុញការធ្វើពិពិធកម្មសេដ្ឋកិច្ច និងដើម្បីលើកស្ទួយបន្ថែមទៀតដល់សហគ្រាសធុនតូចនិងមធ្យម ថ្មីៗនេះ រាជរដ្ឋាភិបាលបានផ្តល់ការលើកទឹកចិត្តផ្នែកគយ និងផ្នែកពន្ធដារ តាមរយៈអនុក្រឹត្យលេខ ១២៤ អនក្រ.បក ចុះថ្ងៃទី០២ ខែតុលា ឆ្នាំ២០១៨ និងអនុក្រឹត្យលេខ ៥០ អនក្រ.បក ចុះថ្ងៃទី២៥ ខែមីនា ឆ្នាំ២០១៩ ដែលផ្តោតលើវិស័យអាទិភាពចំនួន ៨ រួមមាន៖ (១).សហ-គ្រាសផលិតនិងផ្គត់ផ្គង់ទឹកស្អាត, (២).ផលិតកម្មកសិកម្ម ឬកសិ-ឧស្សាហកម្ម, (៣).ផលិតកម្មផលិត និងកែច្នៃម្ហូបអាហារ, (៤).កម្មន្តសាលផលិតទំនិញបម្រើឱ្យការនាំចេញ, (៥).កម្មន្តសាលផលិតទំនិញប្រើប្រាស់ក្នុងស្រុក កែច្នៃកាកសំណល់ និងផលិតទំនិញសម្រាប់វិស័យទេសចរណ៍, (៦).កម្មន្តសាលផលិតនូវផលិតផលសម្រេច ឬផលិតផលពាក់កណ្តាលសម្រេច ឬផ្នែក ឬគ្រឿងបង្គុំ ដើម្បីផ្គត់ផ្គង់ឱ្យកម្មន្តសាលដទៃទៀត, (៧).ការស្រាវជ្រាវ និងអភិវឌ្ឍបច្ចេកវិទ្យាព័ត៌មានដែលមានលក្ខណៈនវានុវត្តន៍ និង (៨).អ្នកអភិវឌ្ឍន៍តំបន់ប្រមូលផ្តុំសហគ្រាសធុនតូចនិងមធ្យម៕

អាមេរិក និងចិនពន្លឿនការរៀបចំពិធីការចុះហត្ថលេខាកិច្ចព្រមព្រៀងពាណិជ្ជកម្មដំណាក់ទី១

ដោយ Donald Lee

ភ្នំពេញ៖ អាមេរិក និងចិនកំពុងធ្វើការយ៉ាងសកម្មជាមួយគ្នាដើម្បីរៀបចំពិធីចុះហត្ថលេខារវាងប្រធានាធិបតីអាមេរិក Donald Trump និងមេដឹកនាំចិនលោកស៊ី ជិនពីងសម្រាប់កិច្ចព្រមព្រៀងពាណិជ្ជកម្មដំណាក់កាលទី ១ ដែលបានព្រមព្រៀងគ្នានៅដើមខែ ធ្នូ។

អ្នកតំណាងពាណិជ្ជកម្មសហរដ្ឋអាមេរិកលោក Robert Lighthizer បាននិយាយថា ពិធីកិច្ចព្រមព្រៀងពាណិជ្ជកម្មត្រូវបានរំពឹងថានឹងត្រូវរៀបចំឡើងនៅសប្តាហ៍ដំបូងនៃឆ្នាំថ្មីនេះ។

លោក Trump បាននិយាយជាសាធារណៈថា ការចុះហត្ថលេខាកំពុងត្រូវបានពន្លឿន មុនពេលកំណត់ដើម្បីបញ្ចប់វាឱ្យបានឆាប់តាមដែលអាចធ្វើទៅបាន។

លោក Trump បានប្រាប់អ្នកសារព័ត៌មានកាលពីថ្ងៃ អង្គារ ថា “យើងនឹងមានពិធីចុះហត្ថលេខាមួយ។ ទីបំផុតយើងនឹងធ្វើវា នៅពេលយើងជួបជុំគ្នា។ ហើយយើងនឹងមានការចុះហត្ថលេខាលឿនជាងមុន ពីព្រោះយើងចង់សម្រេចវាឱ្យបាន។ កិច្ចព្រមព្រៀងនេះត្រូវបានធ្វើហើយ ហើយវាកំពុងត្រូវបានបកប្រែឥឡូវនេះ”។

អ្នកនាំពាក្យក្រសួងការបរទេសចិនលោក Geng Shuang បាននិយាយថា មន្ត្រីអាមេរិកកំពុងធ្វើការយ៉ាងជិតស្និទ្ធជាមួយប្រទេសចិនដើម្បីរៀបចំការចុះហត្ថលេខានេះ។ នៅក្នុងសារព័ត៌មានប្រចាំថ្ងៃលោក Geng បាននិយាយថា “ក្រុមសេដ្ឋកិច្ច និងពាណិជ្ជកម្មរបស់ភាគីទាំងពីរកំពុងប្រាស្រ័យទាក់ទងយ៉ាងជិតស្និទ្ធអំពីការរៀបចំលម្អិតសម្រាប់ការចុះហត្ថលេខាលើកិច្ចព្រមព្រៀង និងការងារតាមដានផ្សេងទៀត”។

កិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ បានបញ្ឈប់សង្គ្រាមពាណិជ្ជកម្មដែលមានតម្លៃថ្លៃជាងគេបំផុតមួយនៅក្នុងប្រវត្តិសាស្ត្រ ហើយបាននាំមកនូវសញ្ញាដំបូងនៃការថយចុះនៃសង្រ្គាមពាណិជ្ជកម្មរយៈពេល ១៧ ខែរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។

អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះ ដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន។

ផលប៉ះពាល់នៃសង្រ្គាមពាណិជ្ជកម្មរវាងអាមេរិក និងចិនបណ្តាលឱ្យមានការធ្លាក់ចុះកំណើនសេដ្ឋកិច្ចពិភពលោក និងរៀបចំឡើងវិញនូវខ្សែសង្វាក់តម្លៃពិភពលោកនៅក្នុងតំបន់អាស៊ីប៉ាស៊ីហ្វិក។

សង្គ្រាមពន្ធនេះនាំឱ្យអត្រាកំណើនផលិតផលក្នុងស្រុកសរុបរបស់ចិនធ្លាក់ចុះដល់ ៦ ភាគរយនៅក្នុងត្រីមាសទី ៣។ នេះបើយោងតាមរបាយការណ៍ស្ថិតិជាតិចុងក្រោយបង្អស់របស់ការិយាល័យស្ថិតិជាតិ (NBS) ។ ត្រីមាសទី ៣ នៃឆ្នាំ ២០១៩ គឺជារយៈពេលដំណើរការអាក្រក់បំផុតក្នុងរយៈពេលជិត ៣០ ឆ្នាំនិងជាសញ្ញាបង្ហាញពីការធ្លាក់ចុះសេដ្ឋកិច្ចពីកំណើន ៦,២ ភាគរយនៅក្នុងត្រីមាសទី ២។

លើសពីនេះទៀត អង្គការ UNCTAD ដែលជាស្ថាប័នសំខាន់របស់អង្គការសហប្រជាជាតិទាក់ទងនឹងបញ្ហាពាណិជ្ជកម្ម និងការអភិវឌ្ឍបានចេញរបាយការណ៍មួយដែលរកឃើញថា អ្នកប្រើប្រាស់ និងអាជីវកម្មរបស់អាមេរិកកំពុងរងផលប៉ះពាល់នៅក្នុងសង្គ្រាមពាណិជ្ជកម្ម។

លោក Alessandro Nicita សេដ្ឋវិទូនៅក្នុងរបាយការណ៍របស់អង្គការសហប្រជាជាតិបានថ្លែងថា “អ្នកប្រើប្រាស់អាមេរិកកំពុងបង់ពន្ធនេះជាមួយលើតម្លៃខ្ពស់។ មិនត្រឹមតែអ្នកប្រើប្រាស់ចុងក្រោយដូចជាយើងទែ ប៉ុន្តែអ្នកនាំចូលផលិតផលមធ្យម និងក្រុមហ៊ុនដែលនាំចូលគ្រឿងបន្លាស់ និងគ្រឿងបន្លាស់ពីប្រទេសចិនក៏រងផលប៉ះពាល់ផងដែរ”៕

បុរីប៉េង ហួត ផ្ដល់ជម្រើសរស់នៅប្រកបដោយផាសុកភាពដល់អតិថិជន

ដោយ វល័ក្ខ

ភ្នំពេញ៖ ក្រោយពីពិធីបើកសម្ពោធជាផ្លូវការគម្រោងហ្គ្រេន ស្តាផ្លាទីនីម ដំណាក់កាលទី២ “អេកូ ខលឡិកសិន” ក្នុងមហាព្រឹត្តិការណ៍ “ភាពឥតខ្ចោះនៃជីវិតរស់នៅក្នុងដែនបៃតង” បានបញ្ចប់ដោយជោគជ័យ។ បុរី ប៉េង ហួត សូមថ្លែងអំណរគុណដល់អតិថិជន ដែលបានគាំទ្រយ៉ាងច្រើនកុះករ ពីគម្រោងថ្មីចំនួនពីរដំបូង ក្នុងចំណោមគម្រោងចំនួន៦ គឺគម្រោង ដឹស្តាផ្លាទីនីម អេកូមេឡូឌី និង គម្រោង ដឹស្តាផ្លាទីនីម អេកូឌែលតា។

គម្រោងទាំងពីរខាងលើ ស្ថិតក្នុងតំបន់បឹងស្នោរ ដែលតំបន់នេះបានប្រែក្លាយជាទីក្រុងរណប ដ៏សម្បូរបែបមួយ សម្រាប់ការកម្សាន្ត និងស្នាក់នៅ ដែលរួមមាន សួនកម្សាន្តបែបអឺរ៉ុប សាលារៀនអន្តរជាតិ កីឡដ្ឋាន ស្ថានីយពន្លត់អគ្គីភ័យ ខុនដូ និងផ្សាទំនើប ថែមទៀតផង។ ក្រៅតែពីភាពសម្បូរបែបខាងលើ ក្នុងគម្រោងដ៏ធំនេះ ក៏បានបែបចែកតំបន់សម្រាប់រស់នៅ និងតំបន់ពាណិជ្ជកម្ម ផងដែរ។

សម្រាប់គម្រោងស្តាផ្លាទីនីម អេកូ មេឡូឌី ជាគម្រោងអេកូធម្មជាតិ ត្រូវបានបង្កើតឡើងជាមួយនឹងស្ថាបត្យកម្មប្រកបដោយភាពច្នៃប្រឌិតខ្ពស់ ដែលមានរួមបញ្ចូលនូវក្បូរក្បាច់រចនាដូចទៅនឹងឧបករណ៍តន្ត្រីយ៉ាងផ្ចិតផ្ចង់ ដែលជាគម្រោងអភិវឌ្ឍលំនៅឋានប្រណិត ដ៏ថ្មីសន្លាង របស់ បុរី ប៉េង ហួត ក្នុងគម្រោងធំ ហ្គ្រេនស្តាផ្លាទីនីម ដំណាក់កាលទី២ “អេកូ ខលឡិកសិន” ដែលនឹងផ្តល់ជូននូវប្រភេទវីឡាទំនើបចម្រុះរាប់ពាន់ខ្នង រួមមានឧទ្យានដ៏ធំអស្ចារ្យអមទៅដោយរុក្ខជាតិចម្រុះខៀវស្រងាត់ ទីធ្លាកម្សាន្ត ហ៊ុមព័ទ្ធដោយបឹងធម្មជាតិ ផ្លូវជិះកង់ ផ្លូវរត់ហាត់ប្រាណ និងកន្លែងក្មេងលេង ដែលពោរពេញទៅដោយបរិយាកាសបែបធម្មជាតិ ពិតជាផ្តល់ជូននូវ បទពិសោធន៍ថ្មីប្លែក និង ភាពសម្បូរបែបនៃការរស់នៅបែបថ្មី។

ក្នុងគម្រោងស្តាផ្លាទីនីម អេកូ មេឡូឌី នេះផ្ទាល់ មានដូចជា វីឡាឃីង អេ វីឡាឃ្វីន ម៉ូតថ្មី ព្រីន ប៊ី ម៉ូតថ្មី វីឡាព្រីន និងវីឡាភ្លោះ។ លំនៅដ្ឋានទាំងនេះ ត្រូវបាន សាងសង់ឡើង ដោយយកចិត្តទុកពីវិស្វករជំនាញ ធ្វើអោយលំនៅដ្ឋានមានគុណភាព និង ភាពច្នៃប្រឌិតខ្ពស់ ជាមួយសោភ័ណភាព និងផាសុកភាព ក្នុងការរស់នៅ ដែលទទួលបានការកោតសរសើរមិនដាច់ពីមាត់ពីសំណាក់ អតិថិជន។

សូមបញ្ជាក់ផងដែរថា សម្រាប់អតិថិជន ដែលមានបំណងទិញលំនៅឋាន ក្នុងគម្រោងខាងលើ លោកអ្នកនឹងទទួលបានការបញ្ចុះតម្លៃរហូតដល់ ១១% ដែលការផ្តល់ជូន មានសុពលភាពត្រឹមដំណាច់ខែធ្នូ នេះតែប៉ុណ្ណោះ។

សម្រាប់ព័ត៌មានបន្ថែម សូមទាក់ទងទូរស័ព្ទលេខ ០៩៨/ ០១៦ / ០១៧ ៥៩៦ ៧៨៩ ឬអាចអញ្ជើញមកសាកសួរព័ត៌មាន ពីគ្រប់ការិយាល័យលក់ ដែលមានទីតាំងក្បែរលោកអ្នករៀងរាល់ម៉ោងធ្វើការ!

#Boreypenghuoth
ធ្វើអោយជីវិតលោកអ្នកកាន់តែមានន័យ!

មេដឹកនាំកូរ៉េខាងត្បូង និងជប៉ុន “ទីបំផុត” ជួបគ្នាដើម្បីបញ្ចប់សង្គ្រាមពាណិជ្ជកម្ម

ដោយ Donald Lee

ភ្នំពេញ៖ ប្រធានាធិបតីកូរ៉េខាងត្បូងលោកមូន ជេអ៊ីន និងនាយករដ្ឋមន្រ្តីជប៉ុនលោកស៊ីនហ្សូ អាបេ បានជួបគ្នាជាលើក ដំបូងនៅឆ្នាំនេះ ចាប់តាំងពីការកើតឡើងនូវសង្រ្គាមពាណិជ្ជកម្មក្នុងតំបន់របស់ពួកគេបានផ្ទុះឡើងនៅឆ្នាំ ២០១៩។

មេដឹកនាំទាំងពីរបានជួបគ្នានៅទីក្រុង Chengdu ប្រទេសចិនក្នុងកិច្ចប្រជុំកំពូលបីដែលមានការចូលរួមពីមន្ត្រីជាន់ខ្ពស់មកពីប្រទេសចិន ជប៉ុន និងកូរ៉េខាងត្បូង។ កិច្ចប្រជុំនេះត្រូវបានសន្មត់ថា ជាជំហានដំបូងក្នុងការផ្សះផ្សាសង្រ្គាមពាណិជ្ជកម្មដែលប្រជាជនកូរ៉េភាគច្រើនធ្វើពហិការទំនិញ និងសេវាកម្មរបស់ជប៉ុនទាំងអស់ ហើយជប៉ុនរឹតបន្តឹងសំភារៈសំខាន់ៗ សម្រាប់ឧស្សាហកម្មផលិតកម្មរបស់ពួកគេ។មិនមានសេចក្តីប្រកាសអំពីការបន្ធូរបន្ថយក្នុងទំនាក់ទំនងត្រូវបានធ្វើឡើង បន្ទាប់ពីកិច្ចប្រជុំនោះទេ។

លោកប្រធានាធិបតីកូរ៉េខាងត្បូង មូន បាននិយាយថា ដំណោះស្រាយមួយចាំបាច់ត្រូវដោះស្រាយ ចាប់តាំងពីប្រទេសទាំងពីរមានទំនាក់ទំនងគ្នាដោយមិនចុះសម្រុងគ្នា។

លោកមូន បាននិយាយថា “ជប៉ុន និងកូរ៉េខាងត្បូងជាអ្នកជិតខាងបំផុតជាប្រវត្តិសាស្ត្រ និងវប្បធម៌ ហើយជាដៃគូសំខាន់ក្នុងការផ្លាស់ប្តូរប្រជាជន និងប្រជាជន”។ លោកបានបន្ថែមថា “យើងមិនមានទំនាក់ទំនងដែលអាចបំបែកគ្នាបានទេ សូម្បីតែពេលមានភាពមិនស្រួលខ្លះក៏ដោយ”។

លោក Naoki Okada អនុប្រធានលេខាធិការខុទ្ទកាល័យរបស់ប្រទេសជប៉ុន បានប្រាប់ក្រុមអ្នកសារព័ត៌មានបន្ទាប់ពីកិច្ចប្រជុំនេះថា មានការពិភាក្សាដោយស្មោះត្រង់ ប៉ុន្តែភាពខុសគ្នាធំៗមិនទាន់ត្រូវបានអនុវត្តនៅឡើយទេនៅក្នុងសង្គ្រាមពាណិជ្ជកម្មដែលកំពុងបន្តកើតមាន។

លោក Okada បានថ្លែងថា “នៅលើបញ្ហាមួយចំនួន ទោះបីជាមានបរិយាកាសតានតឹងក៏ដោយ ពួកគេអាចមានការផ្លាស់ប្តូរទស្សនៈគ្នាដោយត្រង់។ បើគ្មានបញ្ហានេះទេ ពួកគេបានព្រមព្រៀង វានឹងមិនមានមធ្យោបាយដើម្បីរកដំណោះស្រាយទេ”។

រដ្ឋមន្រ្តីក្រសួងពាណិជ្ជកម្មចិនលោក Zhong Shan បាននិយាយថា ទីក្រុងប៉េកាំងមានឆន្ទៈសម្រុះសម្រួលសង្គ្រាមពាណិជ្ជកម្មដែលបាននិងកំពុងទាញទម្លាក់សេដ្ឋកិច្ចអាស៊ីនៅឆ្នាំនេះ។

លោក Zhong បាននិយាយថា ទីក្រុងប៉េកាំងនឹងធ្វើការជាមួយប្រទេសជប៉ុន និងកូរ៉េខាងត្បូងដើម្បី ប្រឆាំងនឹងឯកតោភាគីនិយម និងការគាំពារនិយម និងរួមគ្នាថែរក្សាសន្តិភាព និងស្ថេរភាពក្នុងតំបន់ និងលើកកម្ពស់សេដ្ឋកិច្ចពិភពលោក។

កិច្ចចរចាពាណិជ្ជកម្មធ្វើឡើងក្នុងពេលវេលាដ៏សំខាន់មួយ នៅពេលដែលសេដ្ឋកិច្ចក្នុងតំបន់អាស៊ីបូព៌ានៅទ្រឹង ដោយសារជម្លោះពន្ធអូសបន្លាយ។សង្គ្រាមពន្ធនាំឱ្យអត្រាកំណើនផលិតផលក្នុងស្រុកសរុបរបស់ចិនធ្លាក់ចុះដល់ ៦ ភាគរយនៅក្នុងត្រីមាសទី ៣។ នេះបើយោងតាមរបាយការណ៍ស្ថិតិជាតិចុងក្រោយបង្អស់របស់ការិយាល័យស្ថិតិជាតិ (NBS) ។

ត្រីមាសទី ៣ នៃឆ្នាំ ២០១៩ គឺជារយៈពេលដំណើរការអាក្រក់បំផុតក្នុងរយៈពេលជិត ៣០ ឆ្នាំ និងជាសញ្ញាបង្ហាញពីការធ្លាក់ចុះសេដ្ឋកិច្ចពីកំណើន ៦,២ ភាគរយនៅក្នុងត្រីមាសទី ២ ។

ទន្ទឹមនឹងនេះដែរ ជប៉ុនដែលមានសេដ្ឋកិច្ចធំបំផុតទី ៣ នៅលើពិភពលោកបានចាប់ផ្តើមធ្លាក់ចុះនៅក្នុងត្រីមាសទី ៣ ដោយមានអត្រាកំណើនផលិតផលក្នុងស្រុកសរុប ០,២ ភាគរយ។ នេះបើយោងតាមទិន្នន័យរបស់រដ្ឋាភិបាលជប៉ុន៕

ក្រសួងរៀបចំដែនដី បានដោះស្រាយវិវាទដីធ្លីជួនប្រជាពលរដ្ឋបានចំនួន ២១៦៥ករណី

ដោយ ៖ រ៉ាណេត

ភ្នំពេញ ៖ គិតត្រឹមរយៈពេល១១ខែ ឆ្នាំ២០១៩កន្លងទៅនេះ ក្រសួងរៀបចំដែនដី នគរូបនីយកម្ម និងសំណង់ បានដោះស្រាយបញ្ហាវិវាទដីធ្លីជូនដល់ប្រជាពលរដ្ឋនៅទូទាំងប្រទេសកម្ពុជា ចំនួន ២១៦៥ ករណី ដើម្បីធានាដល់ការកាន់កាប់ដីធ្លីរបស់ប្រជាពលរដ្ឋប្រកបដោយភាពត្រឹមត្រូវ និងស្របច្បាប់។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ដែលបានប្រកាសកាលពីព្រឹកថ្ងៃទី២៥ ខែធ្នូ ឆ្នាំ២០១៩នេះ បានបញ្ជាក់ថា នៅក្នុងឆ្នាំ២០១៩ នេះក្រសួងបានទទួលពាក្យបណ្តឹងពាក់ព័ន្ធនឹងវិវាទដីធ្លីនៅទំាងប្រទេសមានចំនួនរហូតដល់ជាង ៣២០០ ករណី ខណៈការដោះស្រាយចប់រួចរាល់បានចំនួន ២១៦៥ករណី ។

របាយការណ៍ដដែលបានបង្ហាញថា ការដោះស្រាយវិវាទដីធ្លីក្នុងយន្តការគណៈកម្មការសុរិយោដីគឺ ទទួលពាក្យបណ្តឹងចំនួន ២៩០ករណី (ទទួលពីគណៈកម្មការរដ្ឋបាលចំនួន២៣៨ករណី) អនុវត្តបានចំនួន ២៩៤ ករណី ក្នុងនោះដោះស្រាយបញ្ចប់ចំនួន ១៦៩ ករណី មាន ៧២៣ គ្រួសារ ស្មើនឹងផ្ទៃដីទំហំ ជាង១៣០ហិកតា ច្រានចោលពាក្យបណ្តឹងបន្ទាប់ពីស៊ើបអង្កេតឃើញថាខុសសមត្ថកិច្ចចំនួន ៩៥ករណី និងសុំដកពាក្យបណ្តឹងចំនួន ៣០ ករណី។

ការដោះស្រាយវិវាទដីធ្លីដោយក្រុមការងារក្រសួងដែនដីគឺ ទទួលពាក្យបណ្តឹង ចំនួន ៨១៧ ករណី ដោះស្រាយសរុបបានចំនួន ១០៥ ករណី ក្នុងនោះដោះស្រាយបញ្ចប់បានចំនួន ៨១ករណី និងធ្វើលិខិតឆ្លើយតបទៅម្ចាស់បណ្តឹង ឬបង្វែរទៅសមត្ថកិច្ចពាក់ព័ន្ធចំនួន២៤ករណី។

ចំពោះលទ្ធផលការដោះស្រាយរបស់អាជ្ញាធរជាតិ ដោះស្រាយទំនាស់ដីធ្លីវិញគឺទទួលបានចំនួន ១ ៨៩៦ ករណី ដោះស្រាយសរុបបានចំនួន ១ ៧៦៦ ករណី បង្វែរទៅម្ចាស់បណ្តឹងចំនួន ២ ករណី និងកំពុងដោះស្រាយចំនួន ១២៨ ករណី។

របាយការណ៍បន្ថែមថា លទ្ធផលនេះក្រុមដោះស្រាយវិវាទដីធ្លីចល័តក្រុង ស្រុក ខណ្ឌ បានដោះស្រាយបញ្ចប់ចំនួន ១៤១ ករណី ច្រានចោលចំនួន ៨៩ ករណី ដកពាក្យចំនួន ២២ ករណី និងបញ្ជូនទៅគណៈកម្មការសុរិយោដីថ្នាក់ខេត្តចំនួន ៤១ ករណី។

ក្រសួងរៀបចំដែនដី នគរូបនីយកម្ម និងសំណង់ សន្យានឹងពង្រីកយន្តការដោះស្រាយវិវាទដីធ្លីឱ្យបានលឿន និងឱ្យបានច្រើនជាងមុន ដើម្បីធានាឱ្យប្រជាពលរដ្ឋបានកាន់កាប់ដីធ្លីរបស់ខ្លួនប្រកបដោយភាពស្របច្បាប់ និងកាត់បន្ថយជម្លោះបញ្ហាដីធ្លីនៅកម្ពុជា៕