ដោយ ប៊ី
ភ្នំពេញ៖ ធនាគារអភិវឌ្ឍន៍អាស៊ី (ADB) បានឱ្យថា ប្រទេសកម្ពុជានឹងខាតបង់ទឹកប្រាក់ចំនួនជាង ៣៩០ លានដុល្លារ ដោយសារតែផលប៉ះពាល់ផ្នែកសេដ្ឋកិច្ចពីការផ្ទុះឡើងនៃ Covid-19 នៅឆ្នាំនេះ ខណៈរដ្ឋាភិបាលកម្ពុជាកំពុងត្រៀមថវិការាប់សិបដុល្លារដើម្បីប្រយុទ្ធប្រឆាំងនឹងជំងឺនេះ។
ប្រទេសកម្ពុជាត្រូវបានកំណត់ថានឹងរងផលប៉ះពាល់ខាងសេដ្ឋកិច្ច ដែលបណ្តាលមកពីការផ្ទុះឡើងនៃមេរោគថ្មីនេះក្នុងចំនោមរដ្ឋជាសមាជិកអាស៊ាន។
រដ្ឋាភិបាលបានបន្ទាបការព្យាករកំណើនសេដ្ឋកិច្ចរបស់ខ្លួនរួចហើយសម្រាប់ឆ្នាំនេះពី ៦,៥ ភាគរយ មកត្រឹម ៦,១ ភាគរយ ដោយសារតែ Covid-19 ការប្រែប្រួលអាកាសធាតុ និងភូមិសាស្ត្រនយោបាយ។
ធនាគារអភិវឌ្ឍន៍អាស៊ីក៏បានព្យាករណ៍ពីការខាតបង់សេដ្ឋកិច្ចនៅទូទាំងតំបន់អាស៊ី – ប្រទេសថៃត្រូវបានគេព្យាករណ៍ថានឹងខាតបង់ចំនួន ៥,៦០១ លានដុល្លារអាមេរិកឬ -១,១១ ភាគរយនៃផលិតផលសរុបក្នុងស្រុករបស់ខ្លួន សឹង្ហបូរីមានចំនួន ១,០៤៧ លានដុល្លារ (-០.៥៧ ភាគរយ) និងប្រទេសវៀតណាមចំនួន ១,០១២ លានដុល្លារ (-០,៤១ ភាគរយ)។
ប្រទេសឡាវក៏ត្រូវបានគេព្យាករណ៍ថានឹងខាតបង់ ៣៩,២៧ លានដុល្លារ ឬ -០.២២ ភាគរយនៃផលិតផលសរុបក្នុងស្រុករបស់ខ្លួន ម៉ាឡេស៊ី ៨៣០ លានដុល្លារ (-២,២៣ ភាគរយ) ហ្វីលីពីន ៩៨៩ លានដុល្លារ (-០,៣ ភាគរយ) ឥណ្ឌូណេស៊ី ២,២៦៣ លានដុល្លារ (-២០២២ ភាគរយ) និងព្រុយណេ ២៨ លានដុល្លារ (-២០,២១ ភាគរយ) ។
ធនាគារអភិវឌ្ឍន៍អាស៊ីបានឱ្យដឹងថា ផលប៉ះពាល់ជាសកលនៃវីរុសនេះមានចន្លោះពី ៧៧ ពាន់លានដុល្លារទៅ ៣៤៧ ពាន់លានដុល្លារដោយចិនមានចំនួន ២ ភាគ ៣ នៃចំនួនសរុប។
ធនាគារ បានឱ្យដឹងថា ស្ថានភាព Covid-19 ដែលកំពុងបន្តកំពុងធ្វើឱ្យប៉ះពាល់ដល់ប្រទេសចិន និងសេដ្ឋកិច្ចកំពុងអភិវឌ្ឍន៍នៅអាស៊ីតាមរយៈបណ្តាញជាច្រើនរួមមានការធ្លាក់ចុះយ៉ាងខ្លាំងនូវតម្រូវការក្នុងស្រុកការថយចុះ ទេសចរណ៍ និងការធ្វើដំណើរអាជីវកម្មការកាត់បន្ថយពាណិជ្ជកម្ម និងផលិតកម្មការបង្អាក់ការផ្គត់ផ្គង់និ ងផលប៉ះពាល់ដល់សុខភាព។
សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានឱ្យដឹងថា កម្ពុជាបាននឹងត្រៀមថវិកាចន្លោះ ៨០០ ទៅ ១០០០ លានដុល្លារអាមេរិក ដើម្បីជួយសង្គ្រោះសេដ្ឋកិច្ចកម្ពុជាឱ្យមានស្ថេរភាព និងលំនឹង បើជំងឺផ្លូវដង្ហើមកូវីដ ១៩ អូសន្លាយរហូតដល់ ១ ឆ្នាំ ។
សម្តេចតេជោ ហ៊ុន សែន នៅក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានវ៉ាន់ដានៅថ្ងៃទី១០ ខែមីនា ឆ្នាំ ២០២០នេះ ថ្លែងឱ្យដឹងថា កម្ពុជាបានត្រៀមថាវិកាប្រមាណ ៨០០ លាដុល្លារអាមេរិកក្នុងរយៈពេល ៦ខែ ហើយបើជំងឺកូវីដ ១៩ អូសបន្លាយរយៈពេល ១ ឆ្នាំ នឹងអាចត្រៀមថវិកាជាតិប្រមាណចន្លោះ ៨០០ ទៅ ២០០០ លានដុល្លារអាមេរិកក្នុងការសង្គ្រោះសេដ្ឋកិច្ច។
សម្តេចតជោថ្លែងថា “យើងត្រៀមថវិកាប្រមាណ ៨០០ លានដុល្លារក្នុងរយៈពេល ៦ ខែ ដើម្បីសង្គ្រោះសេដ្ឋកិច្ច ហើយបើវាអូសបន្លាយដល់១ ឆ្នាំ យើងក៏ប៉ានស្មានថាវាធ្លាក់កំណើនប៉ុណ្ណា ផលប៉ះពាល់វាធំប៉ុណ្ណា ហើយបាត់បង់ចំណូលប៉ុណ្ណា បើវាដល់មួយឆ្នាំ សេដ្ឋកិច្ចរបស់យើងធ្លាក់ប៉ុណ្ណា ត្រូវប៉ះប៉ូវទំហំទឹកប្រាក់ប៉ុណ្ណា អញ្ចឹងវាស្ថិតនៅក្នុងចន្លោះ ពី ៨០០ ទៅ ២០០០ លានដុល្លារអាមេរិកដើម្បីបំរ៉ុង”៕
