ទំហំហិរញ្ញប្បទានពីដៃគូអភិវឌ្ឈន៍ដល់កម្ពុជាកើនឡើងដល់ទំហំទឹកប្រាក់ ១៨០០លានដុល្លារ

ដោយៈ រ៉ាណេត

សៀមរាបៈ ទំហំហិរប្បទានសហប្រតិបត្តិការ ដែលផ្តល់ដោយដៃគូអភិវឌ្ឍន៍ទាំងអស់សម្រាប់កម្ពុជានៅត្រឹមឆ្នាំ២០១៩នេះ អាចនឹងឈានដល់ប្រមាណ១៨០០លានដុល្លារ ខណៈដែលគិតត្រឹមឆ្នាំ២០១៨កន្លងទៅ មានត្រឹម១៤០០លានដុល្លារតែប៉ុណ្ណោះ។

ទំហំហិរប្បទានសហប្រតិបត្តិការ ដែលផ្តល់ដោយដៃគូអភិវឌ្ឍន៍ទាំងអស់ ក្នុងរយៈពេល ៥ឆ្នាំចុងក្រោយ២០១៤ – ២០១៨ មានទំហំប្រមាណ១ ៤០០លានដុល្លារ ក្នុងមួយឆ្នាំ ហើយទំហំហិរញ្ញប្បទាននេះ នឹងមានការកើនឡើងដល់ប្រមាណ១៨០០ លានដុល្លារ ក្នុងឆ្នាំ២០១៩ ដើម្បីគាំទ្រដល់វិស័យអាទិភាពរបស់រាជរដ្ឋាភិបាល ដូចមានចែងក្នុងយុទ្ធសាស្រ្តចតុកោណតំណាក់កាលទី៣ និងទី៤ ផែនការយុទ្ធសាស្រ្តអភិវឌ្ឍន៍របស់ជាតិ។

នៅក្នុងសន្ទុរកថាបិទអង្គវិប្សសនា កាលពីថ្ងៃ១៨ខែធ្នូ ឆ្នាំ២០១៩ រៀបចំឡើងដោយគណកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា រដ្ឋមន្ត្រីប្រតិភូអមនាយករដ្ឋមន្ត្រី លោកឈៀង យ៉ាណារ៉ា បានកោតសរសើរចំពោះវឌ្ឍនភាពសម្រេចបានរបស់នាយកដ្ឋាននីមួយៗនៅក្នុងឆ្នាំ២០១៩ ប្រកបដោយប្រសិទ្ធភាពខ្ពស់ ក្រោមការរួមចំណែករបស់មន្ត្រីទាំងអស់ ក្នុងការអនុវត្តផែនការសកម្មភាពឆ្នាំ២០១៩។

ជាមួយគ្នានេះ លោកក៏បានថ្លែងអំណរគុណ ចំពោះដៃគូអភិវឌ្ឍន៍ទាំងអស់ដែលរួមមានដូចជា ទីភ្នាក់ងារ JICA និង KOICA ដែលតែងតែសហការយ៉ាងជិតស្និទ្ធជាមួយរាជរ ដ្ឋាភិបាលកម្ពុជា។

នៅក្នុងឱកាសនេះ តំណាងទីភ្នាក់ងារ JICA និង KOICA ក៏បានធ្វើបទបង្ហាញសង្ខេបស្តីពីកិច្ចសហប្រតិបត្តិការអភិវឌ្ឍន៍នៅកម្ពុជា ក៏ដូចជា ផែនការយុទ្ធសាស្ត្រស្តីពីកិច្ចសហប្រតិបត្តិអភិវឌ្ឍន៍របស់ខ្លួននាពេលអនាគត ដល់អង្គវិប្បសនា ដើម្បីជាចំណេះដឹង និងធាតុចូលបន្ថែមសម្រាប់មន្ត្រីពាក់ព័ន្ធផងដែរ៕

ចំណេះដឹង! តើអ្វីជាសហគ្រិន?

ដោយ វុត្ថា

ភ្នំពេញៈ សហគ្រិន គឺជាបុគ្គលម្នាក់ ដែលមិនធ្វើការងារឲ្យក្រុមហ៊ុនផ្សេងហើយបង្កើតនិងធ្វើអាជីវកម្មតូចមួយ តាមរយៈរកប្រាក់វិនិយោគ និងទទួលយករាល់ហានិភ័យនិងរង្វាន់នៃការរកស៊ី។

សហគ្រិនត្រូវបានគេមើលឃើញជាទូទៅថា ជាអ្នកច្នៃប្រឌិត ជាមនុស្សមានប្រភពនៃគំនិតថ្មី ផលិតផលថ្មី និងសេវាកម្ម ឬដំណើរការថ្មី។

សហគ្រិន ដើរតួនាទីយ៉ាងសំខាន់នៅក្នុងសេដ្ឋកិច្ច។ ទាំងនេះគឺជាមនុស្សដែលមានជំនាញនិងគំនិតផ្តួចផ្តើមដែលចាំបាច់ដើម្បីប្រមើលមើលពីតម្រូវការនាពេលបច្ចុប្បន្ននិងអនាគតនឹងនាំយកគំនិតថ្មីៗល្អៗ ទៅទីផ្សារ។

សហគ្រិនដែលទទួលបានជោគជ័យ ក្នុងការចាប់ផ្ដើមអាជីវកម្មត្រូវបានទទួលរង្វាន់ដោយមានប្រាក់ចំណេញកិត្តិនាម។ អ្នកទាំងឡាយដែលបរាជ័យគឺទទួលរងការបាត់បង់ផងដែរ។

សហគ្រិនមានតួនាទីត្រូវធ្វើជាបន្តបន្ទាប់តាមលំដាប់ ដូចជា ៖១-ជាដំបូងសហគ្រិនត្រូវចូលរួមវាយតំលៃសក្តានុពលសំរាប់អាជីវកម្ម និងបន្ទាប់មកត្រូវដោះស្រាយបញ្ហានានាក្នុងពេលចាប់ផ្តើម។ ២-ចាប់ផ្តើមដំណើរការធ្វើផែនការអាជីវកម្មថ្មី។៣-ត្រូវក្រឡេកមើលពីការចាត់ចែងអាជីវកម្ម។ ៤-ចាប់ផ្តើមដំណើរការអាជីវកម្ម។

៥-គ្រប់គ្រងអាជីវកម្មអោយដំណើរការប្រកបដោយជោគជ័យ។ ដំណាក់កាលនេះទាក់ទិនទៅនឹងការធ្វើការសំរេច ការធ្វើផែនការសកម្មភាព ការវិភាគពីបរិស្ថាននានាដែលជាឱកាស និងការគំរាមកំហែង ព្រមទាំង ធ្វើការវាស់វែង និង វាយតម្លៃពីលទ្ធផលនានា ។ និង ៦-ដំណាក់កាលចុងក្រោយ សហគ្រិន ចូលរួមក្នុងសកម្មភាពនានាដែលទាក់ទងនឹងការគ្រប់គ្រងការលូតលាស់នៃអាជីវកម្ម។

បុគ្គលិកលក្ខណៈដែលសហគ្រិន មានភាពខុសពីអ្នកមិនមែនជាសហគ្រិនរួមមាន ៖

• កំរិតនៃការលើកទឹកចិត្តខ្ពស់

• មានជំនឿលើខ្លួនឯង

• សមត្ថភាពដែលពាក់ព័ន្ធមានរយៈពេលវែង

• កំរិតថាមពលខ្ពស់

• អ្នកដោះស្រាយបញ្ហាអចិន្ត្រៃយ៍

• កំរិតនៃគំនិតផ្តួចផ្តើមខ្ពស់

• សមត្ថភាពដាក់ចេញគោលដៅ

• ឆន្ទៈ និងសមត្ថភាពធ្វើការដឹកនាំខ្លួនឯង

• មានភាពស្វិតស្វាញនឹងការងារបានល្អ

• ភាពប៉ិនប្រសព្វក្នុងការកែច្នៃ ៕

ការឡើងថ្លៃប្រាក់បាតនៅតែបន្តជះឥទិ្ធពលអវិជ្ជមានដល់វិស័យអចលនទ្រព្យនិងទេសចរណ៍ថៃ

ដោយ Donald Lee

ភ្នំពេញៈ ធនាគារថៃបានទាមទារឱ្យមានការរក្សា អត្រាការប្រាក់គោលរបស់ខ្លួន បន្ទាប់ពីកាត់បន្ថយអត្រាការប្រាក់ជាលើកទី២ក្នុងឆ្នាំនេះ ដោយសារការធ្លាក់ចុះនៃសេដ្ឋកិច្ចដែលបណ្តាលមកពីប្រាក់បាតឡើងថ្លៃ។

ធនាគារថៃបានបញ្ជាក់ក្នុងរបាយការណ៍ស្តីពី ការសម្រេចចិត្តគោលនយោបាយថា “នៅក្នុងការពិភាក្សាអំពីការសម្រេចចិត្ត លើគោលនយោបាយរបស់ពួកគេ គណៈកម្មាធិការបានវាយតម្លៃថា សេដ្ឋកិច្ចថៃនឹងមានកំណើន ក្នុងអត្រាទាបជាងការព្យាករណ៍ពីមុន និងទាបជាងសក្តានុពលរបស់ខ្លួន ដោយសារការធ្លាក់ចុះនៃការនាំចេញ ដែលប៉ះពាល់ដល់ការងារ និងតម្រូវការក្នុងស្រុក”។

ធនាគារកណ្តាលថៃ ក៏បានទម្លាក់ការព្យាករកំណើនផលិតផលសរុប ក្នុងស្រុករបស់ខ្លួនមកនៅត្រឹម២,៥ភាគរយ ដែលជាការធ្លាក់ចុះគួរឱ្យកត់សម្គាល់ ពីអត្រាកំណើន ៤,១ភាគរយកាលពីឆ្នាំមុន។

រូបិយប័ណ្ណរបស់ប្រទេសដែលមានសេដ្ឋកិច្ចធំជាងគេទី២ នៅអាស៊ានបានស្ថិតក្នុងចំណោមប្រទេស ដែលមានរូបិយប័ណ្ណកើនឡើងថ្លៃបំផុតបំផុត នៅលើពិភពលោកក្នុងរយៈពេលមួយឆ្នាំកន្លងមកនេះ។ ប្រាក់បាតឡើងថ្លៃជាង៥ភាគរយ ធៀបនឹងប្រាក់ដុល្លារអាមេរិកនៅឆមាសទីមួយនៃឆ្នាំនេះ។ ជាក់ស្តែងប្រាក់បាតឡើងថ្លៃជាងរូបិយប័ណ្ណផ្សេងៗទៀតនៅអាស៊ី។

សេដ្ឋកិច្ចថៃបានឈានទៅរកការធ្លាក់ចុះជាបន្តបន្ទាប់ ចាប់តាំងពីដើមឆ្នាំនេះ ដោយសារប្រាក់បាតឡើងថ្លៃ និងភាពតានតឹងនៃសង្គ្រាមពាណិជ្ជកម្មអាមេរិក និងចិន។

ធនាគារកណ្តាលបានទម្លាក់អត្រាការប្រាក់ជាលើកទី២ នៅឆ្នាំនេះមកនៅត្រឹម ១,២៥ភាគរយកាលពីខែមុន ដែលជាអត្រាមួយដែលមិនបានមើលឃើញ ចាប់តាំងពីមានវិបត្តិហិរញ្ញវត្ថុពិភពលោកកាលពីឆ្នាំ២០០៩។

វិស័យសេដ្ឋកិច្ចសំខាន់ៗ ចាប់ពីវិស័យទេសចរណ៍រហូត ដល់វិស័យអចលនទ្រព្យត្រូវបានប៉ះពាល់យ៉ាងខ្លាំង ដោយសារការឡើងថ្លៃប្រាក់បាត។ វិស័យទេសចរណ៍គឺជាសមាសធាតុដ៏សំខាន់មួយនៃសេដ្ឋកិច្ចថៃ ដែលមានចំនួនស្មើនឹង១ ភាគ៥ ភាគរយនៃផលិតផលសរុបក្នុងស្រុករបស់ប្រទេសនេះ។

អតីតប្រធានក្រុមហ៊ុន Thai Airways លោក Ekniti Nitithanprapas បាននិយាយថា មូលហេតុចម្បងនៃការធ្លាក់ចុះចំណូលដ៏សំខាន់ របស់ក្រុមហ៊ុនអាកាសចរណ៍គឺបណ្តាលមកពីភ្ញៀវទេសចរមិនមកថៃ ដោយសារតែការកើនឡើងនៃប្រាក់បាតថៃ។

ប្រធានក្រុមហ៊ុនអាកាសចរណ៍ជាតិថៃនេះ បានលាឈប់ពីតំណែងកាលពីសប្តាហ៍មុនបន្ទាប់ពីក្រុមហ៊ុនបានចេញផ្សាយ លទ្ធផលនៅត្រីមាសទី២របស់ខ្លួន ដែលបង្ហាញពីការខាតបង់សុទ្ធចំនួន២២០លានដុល្លារ។

នៅក្នុងវិស័យអចលនទ្រព្យ វិនិយោគិនថៃ និងបរទេសកំពុងព្រងើយកន្តើយចំពោះគម្រោងខុនដូដែលទើបនឹងបើកដំណើរការ ខណៈដែលជាង៨០ភាគរយ នៃយូនីតខុនដូលក់នៅឆមាសទីមួយនៃឆ្នាំនេះបាននៅសល់ក្នុងទីផ្សារ។

របាយការណ៍ខាងលើបានគណនាថា ភាគច្រើននៃ២៧,៨៧០យូនីតថ្មី សម្រាប់លក់ក្នុងឆមាសទីមួយនៃឆ្នាំនេះ នៅតែមិនទាន់ត្រូវបានលក់ចេញ។ ក្នុងចំណោមយូនីតថ្មីដែលដាក់លក់នៅឆ្នាំនេះ មានតែត្រឹម៥,២៥៧យូនីតប៉ុណ្ណោះ ដែលត្រូវបានលក់ចេញស្មើនឹងអត្រាត្រឹមតែ១៩ភាគរយប៉ុណ្ណោះ។

របាយការណ៍របស់ Knight Frank បានបញ្ជាក់ថា “អត្រានៃការលក់ខុនដូថ្មីដែលបានបើកដំណើរការនៅទីក្រុងបាងកក ក្នុងឆមាសទី១ នៃឆ្នាំ២០១៩ បានធ្លាក់ចុះដល់កម្រិតទាបជាប្រវត្តិសាស្ត្រ”។

វិនិយោគិនបរទេស ក៏បានមើលកន្លែងវិនិយោគផ្សេងទៀត ឬអង្គុយលើកាបូបរបស់ពួកគេ នៅពេលប្រាក់បាតឡើងថ្លៃពេញមួយឆ្នាំ២០១៩ ដែលបានក្លាយជារូបិយប័ណ្ណមួយក្នុងចំណោមរូបិយប័ណ្ណឡើងថ្លៃបំផុតនៅលើពិភពលោក។

របាយការណ៍របស់ Knight Frank បានឱ្យដឹងថា “ការឡើងថ្លៃប្រាក់បាតធៀបនឹងប្រាក់ដុល្លារអាមេរិក និងប្រាក់យ័ន ក៏បានប៉ះពាល់ដល់តម្រូវការអចលនទ្រព្យ របស់វិនិយោគិនបរទេសផងដែរ ដែលជាហេតុធ្វើឱ្យការកក់ធ្លាក់ចុះ ក្នុងត្រីមាសទី២ឆ្នាំនេះ។ ទីផ្សារអចលនទ្រព្យ កំពុងឆ្លងកាត់រយៈពេលដ៏លំបាកមួយ ដែលតម្រូវការទាំងក្នុងស្រុក និងក្រៅស្រុកបានធ្លាក់ចុះ ដោយសារការដាក់កម្រិតកម្ចីអចលនទ្រព្យ ចូលជាធរមាននិងការឡើងថ្លៃប្រាក់បាត”៕

អបអរសាទរ ក្រុងតាខ្មៅ ជាប់ជ័យលាភីជាទីក្រុងទេសចរណ៍ស្អាតអាស៊ាន លើកទី២

ដោយ ៖ រ៉ាណេត

តាខ្មៅ ៖ ជាមោទនភាពចំពោះក្រុងតាខ្មៅ ក៏ដូចជាប្រជាពលរដ្ឋ រួមជាមួយនឹងអជ្ញាធរ ដែលទីក្រុងមួយនេះត្រូវបានជាប់ជាបេក្ខភាពជាប់ជ័យលាភីជាទីក្រុងទេសចរណ៍ស្អាតអាស៊ាន លើកទី២ ដែលនឹងត្រូវទទួលពាននៅប្រទេសព្រុយណេ នៅខែមករា ឆ្នាំ២០២០ខាងមុខនេះ។

បន្ទាប់ពីបានឆ្លង់កាត់នូវការត្រួតពិនិត្យ ពីគណកម្មាធិការជាតិជំនាញវាតម្លៃទីក្រុងស្អាត កាលពីពេលកន្លងទៅនេះ ក្រុងតាខ្មៅ ខេត្តកណ្តាល បានក្លាយជាបេក្ខភាពជាប់ជ័យលាភីជាទីក្រុងទេសចរណ៍ស្អាតអាស៊ានលើកទី២។ នេះបើយោងតាមសេចក្ដីប្រកាសដែលចេញដោយទីស្ដីការគណរដ្ឋមន្ត្រី ដែលចុះហត្ថលេខាដោយរដ្ឋលេខាធិការទីស្ដីការគណរដ្ឋមន្ត្រី លោក ហែម ក្រាញ់តូនី កាលពីពេលថ្មីៗនេះ។

នៅក្នុងលិខិតដដែលបានបញ្ជាក់ថា រាជរដ្ឋាភិបាលកម្ពុជាបានយល់ព្រមឱ្យបញ្ជូនបេក្ខភាពទីក្រុងឆ្នើមចំនួន៣របស់កម្ពុជា រួមមានខណ្ឌដូនពេញ ក្រុងកំពត និងក្រុងតាខ្មៅ ដើម្បីទទួលជ័យលាភីទីក្រុងទេសចរណ៍ស្អាតអាស៊ាន លើកទី២ ដែលនឹងប្រគល់នៅក្នុងវេទិកាទេសចរណ៍អាស៊ាន ឆ្នាំ២០២០នៅទីក្រុងបានដាស៊េរី បេហ្គាវ៉ាន់ ប្រទេសព្រុយណេ នៅខែមករា ឆ្នាំ២០២០ ខាងមុខនេះ ៕

ក្រុមហ៊ុនចិនគ្រោងបង្កើតរោងចក្រកែច្នៃទឹកដូងដោយគ្រោងវិនិយោគលើផ្ទៃដី១៤ពាន់ហិកតានៅម្ពុជា

ដោយ វុត្ថា

ភ្នំពេញៈ ក្រុមហ៊ុន Coconut Palm Group Co., Ltd ដែលជាក្រុមហ៊ុនដ៏ធំមួយនៅប្រទេសចិន គ្រោបង្កើតរោងចក្រកែច្នៃទឹកដូង ផ្គត់ផ្គង់ឲ្យទីផ្សារក្នុងស្រុក និងនាំចេញទៅកាន់ទីផ្សារអន្តរជាតិ ជាពិសេសទីផ្សារចិន។

លោក Mr. ZHAO Bo នាយកគ្រប់គ្រងទូទៅក្រុមហ៊ុន Coconut Palm Group Co., Ltd នៅក្នុងជំនួបជាមួយលោក វ៉េង សាខុន រដ្ឋមន្ត្រីក្រសួងកសិកម្ម រុក្ខាប្រមាញ្ញ និងនេសាទ កាលពីថ្ងៃទី១៧ ខែធ្នូម្សិលមិញនេះឱ្យដឹងថា ក្រុមហ៊ុនមកសិក្សាស្វែងយល់បន្ថែមអំពីសក្តានុពលពីវិស័យកសិកម្មកម្ពុជា ដើម្បីសម្រេចចិត្តដាក់ទុនវិនិយោគ ចូលរួមអភិវឌ្ឍន៌វិស័យនេះឲ្យមានការរីកចម្រើន សមស្របតាមយុទ្ធសាស្រ្ត “ផ្លូវ និងខ្សែក្រវ៉ាត់” របស់លោកប្រធានាធិបតី ស៊ី ជីងភីង និងជាពិសេសស្របតាមសុឆន្ទ:របស់ថ្នាក់ដឹកនាំកំពូលនៃប្រទេសទាំងពីរ។

លោក ZHAO Bo បន្តថា គោលបំណងនៃដំណើរទស្សនកិច្ចមកកម្ពុជា នាពេលនេះគឺទី១- ស្វែងយល់បន្ថែមពីសក្តានុពលដំណាំដូង ដើម្បីធ្វើការវិនិយោគ និងទី២- សិក្សាលម្អិតអំពីសេចក្តីត្រូវការ លទ្ធភាពផ្គត់ផ្គង់ផ្លែដូង និងទីផ្សារដើម្បីបង្កើតរោងចក្រកែច្នៃទឹកដូង ផ្គត់ផ្គង់ឲ្យទីផ្សារក្នុងស្រុក និងនាំចេញទៅកាន់ទីផ្សារអន្តរជាតិ ជាពិសេសទីផ្សារចិន។

លោកបានបន្ថែមថាក្រុមហ៊ុន Coconut Palm Group គឹជាក្រុមហ៊ុនធំជាងគេនៅប្រទេសចិន មានទីតាំងនៅខេត្តហាយណាន ក្នុងមួយឆ្នាំអាចរកចំណូលបាន៤០០លានដុល្លារពីផលិតផលដូង ក្នុងមួយថ្ងៃប្រើប្រាស់ដូង៦០ម៉ឺនផ្លែ ប្រើនិយោជិក៦ពាន់នាក់បាននាំចេញផលិតផលដូងទៅកាន់៣៨ប្រទេស។

;បច្ចុប្បន្ន ដោយសារផ្លែដូងបានធ្វើឲ្យកសិករខេត្តហាយណាន មានការកែប្រែមុខមាត់ថ្មី ជីវភាពធូរធារ សេដ្ឋកិច្ចគ្រួសាររឹងមាំល្អ។ ហេតុនេះហើយ បានជាក្រុមហ៊ុនសម្រេចចិត្តមកសិក្សាលម្អិតបន្ថែម ដើម្បីធ្វើការវិនិយោគលើដំណាំនេះនៅកម្ពុជា ដែលទាមទារត្រូវការដីចំនួន១៤ពាន់ហ.ត។

លោកសន្យាថា តាមរយ:បច្ចេកទេស ទុនវិនិយោគ បទពិសោធន៍ និងទីផ្សារ នឹងខិតខំអនុវត្តគម្រោងវិនិយោគនេះ ឲ្យទទួលបានជោគជ័យ ហើយភាពជោគជ័យរបស់ក្រុមហ៊ុន គឺជាសមិទ្ធផលនៃចំណងមិត្តភាព និងកិច្ចសហប្រតិបត្តិការរវាងប្រទេសយើងទាំងពីរ ជាពិសេសរវាងក្រុមហ៊ុន និងក្រសួងកសិកម្ម រុក្ខាប្រមាញ់ និងនេសាទ។

លោកបានបញ្ជាក់ថា “នឹងរៀបចំក្រុម ការងារបច្ចេកទេសមកកម្ពុជាម្តងទៀតក្នុងពេលឆាប់ៗដើម្បីសិក្សាដី ក្សេត្របរិស្ថាន សក្តានុពលនៅតាមតំបន់ ទីផ្សារ និងច្រកនាំចេញ។ល។”។

លោក រដ្ឋមន្រ្តី វ៉េង សាខុន រដ្ឋមន្ត្រីក្រសួងរុក្ខាប្រមាញ និងនេសាទ បានសម្តែងការស្វាគមន៍ រីករាយ និងគាំទ្រចំពោះឆន្ទ:វិនិយោគលើដំណាំដូង និងបង្កើតរោងចក្រកែច្នៃដូងនៅកម្ពុជា ព្រោះថាវាស្របពេលដែលក្រសួង ក៏ដូចជារាជរដ្ឋាភិបាលបានដាក់ចេញនូវគោលនយោបាយយកចិត្តទុកដាក់លើការ លើកកម្ពស់កម្រិតជីវភាពរបស់កសិករ តាមរយ:ការលើកកម្ពស់ផលិតភាពផលិតកម្ម កសិកម្ម អនុវត្តបច្ចេកវិទ្យាកសិកម្មទាន់សម័យ ថ្លៃដើមតិច បរិមាណ គុណភាព តម្លៃបន្ថែម ការកែច្នៃ ប្រកួតប្រជែង និងមានទីផ្សារនាំចេញ ហើយជាពិសេសដំណាំដូង ដែលកសិករនិយមដាំតាមរបងផ្ទះ ហើយបច្ចុប្បន្នមានចំការធំៗទៀតផង។

លោកបន្តថា ប្រសិនបើយើងបញ្ចូលបច្ចេកទេសដាំដុះ សមស្របមួយឲ្យអ្នកផលិត និងរៀបចំក្រុម ឬសហគមន៍ផលិត យើងសង្ឃឹមថាផលិតផលដូងនឹងមានតម្លៃបន្ថែមខ្ពស់ ដោយសារមានតម្រូវការទីផ្សារ។

លោកបានជូនមតិដល់ក្រុមហ៊ុនថាទី១- ក្រុមហ៊ុនគួរសហការជាមួយប្រជាជន ឬម្ចាស់ចំការ ប្រមូលទិញផលិតផលតាមរយ: contract farming ផ្តល់ពូជ បច្ចេកទេស និងជី ហើយបើអនុវត្តតាមរបៀបនេះ អាចចាប់ផ្តើមបានឆាប់ ជាពិសេសកសិករនៅខេត្តកំពត តាកែវ កោះកុង និងខេត្តព្រះសីហនុ ដែលសុទ្ធតែជាតំបន់មានសក្តានុពល។ ទី២- ប្រើប្រាស់ដីសប្បទានដែលមាន ស្រាប់ តែត្រូវសហការជាមួយសប្បទានិក ដែលមិនបានប្រើប្រាស់ឲ្យអស់សក្តានុពល ប៉ុន្តែគួរសិក្សាពីលក្ខណដីផងដែរ ចំណុចនេះទាមទាពេលវេលា សិក្សាស្រាវជ្រាវឲ្យបានស៊ីជម្រៅ។

លោកបានសម្តែងនូវការគាំទ្រលើគម្រោវិនិយោគនេះ ព្រោះចំណូលបានពីផលិតកម្មស្រូវ មិនអាចធានាបាននូវសន្តិសុខស្បៀងក្នុងគ្រួសារ និងលើកកម្ពស់កម្រិតជីវភាពបានឡើង។ ដូច្នេះលោកចង់ឲ្យកសិករគិតគូ ប្តូរពីដំណាំស្រូវមកដាំដំណាំដូងវិញ ជាពិសេសកសិករនៅខេត្តកំពត និងតាកែវ៕

កម្ពុជានឹងបើកមជ្ឈមណ្ឌលពាណិជ្ជកម្មទី៦របស់ខ្លួននៅប្រទេសចិនចុងឆ្នាំនេះ

ដោយ ប៊ី

ភ្នំពេញៈ រដ្ឋមន្រ្តីក្រសួងពាណិជ្ជកម្ម លោកប៉ាន សូរស័ក្តិបានមានប្រសាសន៍នៅថ្ងៃពុធនេះថា កម្ពុជានឹងបើកមជ្ឈមណ្ឌលពាណិជ្ជកម្មទី៦របស់ខ្លួននៅប្រទេសចិន នៅថ្ងៃទី ២៨ ខែ ធ្នូ ដើម្បីជំរុញថែមទៀតនូវទំនាក់ទំនងទ្វេភាគី ក្នុងវិស័យពាណិជ្ជកម្ម វិនិយោគ វប្បធម៌ និងទេសចរណ៍។

លោកបានមានប្រសាសន៍ថា មជ្ឈមណ្ឌលពាណិជ្ជកម្មថ្មី នឹងមានទីតាំងនៅទីក្រុងគុនមីងរដ្ឋធានីនៃខេត្តយូណាន នៅភាគនិរតីប្រទេសចិន ហើយលោកឧបនាយករដ្ឋមន្រ្តីកម្ពុជា យឹម ឆៃលី នឹងចូលរួមពិធីបើកសម្ពោធនេះ។

លោកថ្លែងនៅក្នុងសុន្ទរកថា នៅក្នុងសន្និសីទប្រចាំឆ្នាំរបស់ក្រសួងពាណិជ្ជកម្មថា “មជ្ឈមណ្ឌលនេះ នឹងបង្ហាញនូវផលិតផលកម្ពុជា និងឯកសាររបស់កម្ពុជាដែលទាក់ទងទៅនឹងវប្បធម៌ និងតំបន់ទេសចរណ៍ បរិយាកាសអាជីវកម្ម និងសក្តានុពលវិនិយោគនៅក្នុងប្រទេសកម្ពុជា”។

លោករដ្ឋមន្រ្តីក្រសួងពាណិជ្ជកម្មបាននិយាយថា មជ្ឈមណ្ឌលពាណិជ្ជកម្មកម្ពុជាចំនួន៥ ដែលមានស្រាប់នៅក្នុងប្រទេសចិន មានទីលំនៅក្នុងខេត្តក្វាងចូវ នៅភាគខាងត្បូងខេត្តក្វាងទុង ស៊ីអាននៅភាគពាយ័ព្យនៃខេត្តសាស៊ី ខេត្តហៃនីងនៅភាគខាងកើតខេត្តស៊ីជាំង តំបន់រដ្ឋបាលពិសេសហុងកុង និងយ៉ាន់តាយនៅភាគខាងកើតខេត្តសានដុង។

លោកស៊ាង ថៃ អ្នកនាំពាក្យក្រសួងពាណិជ្ជកម្មបានមានប្រសាសន៍ថា កម្ពុជាបានមើលឃើញប្រទេសចិន គឺជាទីផ្សារដ៏ធំមួយសម្រាប់ផលិតផលរបស់ខ្លួន ជាពិសេសសម្រាប់ផលិតផលកសិកម្ម។

លោកបានប្រាប់កាសែតស៊ីនហួរថា “មជ្ឈមណ្ឌលពាណិជ្ជកម្មកម្ពុជា នៅប្រទេសចិនមានប្រយោជន៍ខ្លាំងណាស់ ក្នុងការលើកកម្ពស់ផលិតផលកម្ពុជា សក្តានុពលនៃការវិនិយោគ ច្បាប់ និងបទប្បញ្ញត្តិ ការទាក់ទាញទេសចរណ៍ និងវប្បធម៌សម្រាប់វិនិយោគិន និងភ្ញៀវទេសចរចិន”។

ចិនគឺជាប្រភពធំបំផុត នៃការវិនិយោគផ្ទាល់ពីបរទេស និងភ្ញៀវទេសចរមកកាន់ប្រទេសកម្ពុជា ហើយក៏ជាដៃគូពាណិជ្ជកម្មដ៏សំខាន់របស់កម្ពុជាផងដែរ។

យោងតាមតួលេខរដ្ឋាភិបាលកម្ពុជា បណ្តាប្រទេសអាស៊ីអាគ្នេយ៍បានទាក់ទាញការវិនិយោគសរុបចំនួន២១ពាន់លានដុល្លារអាមេរិ កពីចិនចាប់ពីឆ្នាំ ១៩៩៤ រហូតមកដល់បច្ចុប្បន្ន។

ទាក់ទងវិស័យទេសចរណ៍ កម្ពុជាបានស្វាគមន៍ភ្ញៀវទេសចរចិនចំនួន២លាននាក់ក្នុងរយៈពេល១០ខែដំបូង នៃឆ្នាំ២០១៩ កើនឡើង២៤ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ពាណិជ្ជកម្មទំហំពាណិជ្ជកម្មទ្វេភាគីមានតម្លៃ៦,៦ ពាន់លានដុល្លារអាមេរិកកាលពីឆ្នាំមុន ហើយត្រូវបានព្យាករថានឹងកើនដល់១០ពាន់លានដុល្លារអាមេរិកនៅឆ្នាំ២០២៣៕

លោកឧបនាយករដ្ឋមន្ត្រី ជា សុផារ៉ា ដកដំណែងប្រធានមន្ទីរសុរិយោដីខេត្តកំពត

ដោយ វុត្ថា

ភ្នំពេញ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និង សំណង់ បានសម្រេចសម្រួលភារកិច្ចលោក យិន វុឌ្ឍ ប្រធានមន្ទីររៀបចំដែនដី នគរូបនីយកម្ម និងសំណង់ ខេត្តកំពត ឱ្យមកបម្រើការងារនៅទីស្តីការក្រសួងវិញ។

ជាមួយគ្នានេះ លោកឧបនាយករដ្ឋមន្ត្រី ជា សុផារ៉ា ក៏បានសម្រេចតែងតាំងលោក ដាញ់ សារី ជាប្រធានមន្ទីររៀបចំដែនដី នគរូបនីយកម្ម និងសំណង់ ខេត្តកំពត ជំនួសលោក យិន វិឌ្ឍ ផងដែរ ។

នេះបើតាម ការប្រកាស របស់ក្រសួងដែនដីនគរូបនីយកម្ម និងសំណង់ ដែលចុះហត្ថលេខាដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ ចុះថ្ងៃទី ១៦ ខែធ្នូ ឆ្នាំ ២០១៩។

លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ពុំបានបញ្ជាក់ពីមូលហេតុនៃការដកតំណែងលោក យិន វុឌ្ឍ នោះទេ ។ តែយ៉ាងណាក៏ដោយ ការដកលោក យិន វុឌ្ឍ ប្រធានមន្ទីររៀបចំដែនដី មកបញ្ឈរជើងនៅក្រសួងវិញនេះ គឺបន្ទាប់ពីប្រជាពលរដ្ឋ បានប្ដឹងចូលហ្វេសប៊ុកផេកផ្លូវការណ៍ សម្ដេចតេជោ ហ៊ុន សែន រឿងការយឺតយ៉ាវក្នុងការធ្វើប័ណ្ណកម្មសិទ្ធិជូនប្រជាពលរដ្ឋរាប់សិបឆ្នាំ។

ជាមួយគ្នានេះ កាលពីថ្ងៃម្សិលមិញនេះ រដ្ឋបាលខេត្តកំពត ក៏បានបើកកិច្ចប្រជុំបន្ទាន់ ដើម្បីដោះស្រាយបញ្ហាស្នើសុំប័ណ្ណកម្មសិទ្ធិរបស់ឈ្មោះ ស្វាយ សាត់ ស្ថិតនៅភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ក្រោមវត្តមានលោក ជាវ តាយ អភិបាលខេត្តកំពត និងមានការចូលរួមស្រាយបំភ្លឺពីលោកអភិបាលស្រុកកំពង់ត្រាច ប្រធានរៀបចំដែនដីនគរូបនីកម្ម សំណង់ និងសុរិយោដីខេត្ត អាជ្ញាធរពាក់ព័ន្ធ ព្រមទាំងសាម៉ីជនស្នើប័ណ្ណផងដែរ។

យោងតាមការចេញផ្សាយរបស់រដ្ឋបាលខេត្តកំពត បានបញ្ជាក់ថា ដោយពិនិត្យរបាយការណ៍ជាក់ស្តែង ឃើញថាឈ្មោះស្វាយ សាត់ ពិតជាបានធ្វើការស្នើសុំប័ណ្ណកម្មសិទ្ធិលើផ្ទៃដីទំហំ ២៩៤ម៉ែត្រការ៉េ ជាយូរមកហើយ ដោយដីដែលស្នើសុំនេះ មានទំនាស់កាលពីច្រើនឆ្នាំកន្លងមក ជាមួយភាគីជាប់ព្រំ ជាហេតុធ្វើឱ្យមានការបង្អាក់ដំណើរការចេញប័ណ្ណ។

ក្រោយពីបានទទួលពាក្យស្នើតាមរយៈផេកផ្លូវការរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា លោក ជាវ តាយ បានរៀបចំក្រុមការងារដឹកនាំផ្ទាល់ដើម្បីដោះស្រាយបញ្ហាដ៏រ៉ាំរ៉ៃនេះឱ្យបានទាន់ពេលវេលា និងប្រកបដោយប្រសិទ្ធិភាពខ្ពស់បំផុត ដោយអញ្ជើញភាគីជាប់ព្រំទាំងពីរ ធ្វើការផ្សះផ្សារដោយនីតិវិធីចំពោះមុខអាជ្ញាធរពាក់ព័ន្ធ និងធ្វើការចេញប័ណ្ណកម្មសិទ្ធិ៕

កូរ៉េគ្រោងជួយបង្កើតទីក្រុងវៃឆ្លាត នៅក្រុងព្រះសីហនុ

ដោយ វុត្ថា

ភ្នំពេញ៖ អគ្គរដ្ឋទូតរបស់សាធារណរដ្ឋកូរ៉េ ថ្មីប្រចាំកម្ពុជា បានឱ្យដឹងថា សាធារណរដ្ឋកូរ៉េមានចេតនាជួយកម្ពុជាក្នុងការបង្កើតទីក្រុងវៃ ឆ្លាត (Smart City) នៅក្នុង ក្រុងព្រះសីហនុ និងតំបន់ កាំកូ ស៊ីធី (Camko City) រាជធានីភ្នំពេញ។

លោក Park Heung-kyeong អគ្គរដ្ឋទូតរបស់សាធារណរដ្ឋកូរ៉េ ថ្មីប្រចាំកម្ពុជា មានប្រសាសន៍បែបនេះ នៅក្នុងជំនួបពិភាក្សាការងារ ជាមួយលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី ២៧ ខែធ្នូ ឆ្នាំ ២០១៩ ម្សិលមិញនេះ ។

លោក Park Heung-kyeong បានបង្ហាញពីក្ដីរីករាយដែលបានធ្វើការជាមួយកម្ពុជាដែលជាប្រទេសមួយមានទំនាក់ ទំនងល្អជាមួយសាធារណរដ្ឋកូរ៉េជាយូណាស់ មកហើយ ។ ជាមួយគ្នានេះ លោកក៏បានថ្លែងនូវការគោរពចំពោះ ការខិតខំរបស់រាជរដ្ឋាភិបាល និងប្រជាជនកម្ពុជាក្នុងការស្តារ និងអភិវឌ្ឍន៍ប្រទេសរហូតមកទល់សព្វថ្ងៃ។

លោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចូលរួមអបអរសាទរ ចំពោះ លោក Park Heung-kyeong ដែលត្រូវបានតែងតាំងជាអគ្គរដ្ឋទូតរបស់សាធារណរដ្ឋកូរ៉េ ថ្មីប្រចាំកម្ពុជា ស្របពេលដែលរាជរដ្ឋាភិបាលកម្ពុជា កំពុងអនុវត្តយ៉ាងសកម្មនូវគោលនយោបាយ និងយុទ្ធសាស្ត្រ ចតុកោណដំណាក់កាលទី៤ របស់ខ្លួនជាមួយនឹងស្ថេរ ភាពនយោបាយ និងការអភិវឌ្ឍ ដែលកម្ពុជា មានសព្វថ្ងៃនេះ ក៏មិនអាចកាត់ផ្ដាច់ចេញពីការគាំទ្រពីរដ្ឋាភិបាល និងប្រជាជនកូរ៉េផងដែរ ។

លោកឧបនាយករដ្ឋមន្ត្រី បានជម្រាបជូន អំពីសមិទ្ធផលរបស់ក្រសួងដែលសម្រេចបាន ១) ការចុះបញ្ជីដីធ្លីនៅទូទាំងប្រទេសបានចំនួន៧៧% ហើយសម្រាប់ការចុះបញ្ជីដីធ្លីសមូហភាពជូនជនជាតិដើមភាគតិចសម្រេចបានចំនួន២៦ សហគមន៍ ហើយតាមការគ្រោងទុកនឹងឈានដល់៣០សហគមន៍ នៅថ្ងៃទី២០ ខែធ្នូ ខាងមុខនេះ។

២) ច្បាប់ស្តីពីសំណង់ត្រូវបានដាក់ឱ្យប្រើប្រាស់ដោយព្រះរាជក្រឹត្យ កាលពីថ្ងៃទី២ ខែ វិច្ឆិកា ឆ្នាំ២០១៩ កន្លងទៅថ្មីៗ។ ៣) ក្រសួងបានរៀបចំប្លង់គោលប្រើប្រាស់ដីធ្លីនៅរាជធានីភ្នំពេញ ទីក្រុងព្រះសីហនុ និងក្រុងបាតដំបង គ្រោងនឹងដាក់ឱ្យប្រើប្រាស់ប្លង់គោលនៅតាមបណ្តាខេត្ត ក្រុង និងទីប្រជុំជនមួយចំនួនទៀតនាពេលខាងមុខ។

៤) ការដោះស្រាយវិវាទដីធ្លីតាមយន្តការនានា បានយ៉ាងច្រើនធ្វើឱ្យប្រជាពលរដ្ឋមានការសាទរ និងសុខដុមរនាក្នុងសង្គម ។ លោកឧបនាយករដ្ឋមន្ត្រី ក៏បានសំណូមពរ ដល់សាធារណរដ្ឋកូរ៉េ គាំទ្រនូវគោលនយោបាយ និងទិសដៅរបស់រាជរដ្ឋាភិបាលក្នុងការអភិវឌ្ឍ និងពង្រឹងចំណងមិត្តភាព និងសាមគ្គីភាពរវាងប្រទេសទាំងពីរ។

ការចូលរួមចំណែករបស់សាធារណរដ្ឋកូរ៉េ មានលក្ខណៈធំធេងចំពោះការអភិវឌ្ឍប្រទេសកម្ពុជា ដោយមានការវិនិយោក និងផ្តល់ការងារធ្វើជូនប្រជាជនកម្ពុជាទាំងក្នុងប្រទេស និងនៅប្រទេសកូរ៉េ៕

ក្រុមហ៊ុនធំមួយរបស់ម៉ាឡេស៊ីគ្រោងនឹងវិនិយោគលើវិស័យទឹកស្អាតនៅកម្ពុជា

ដោយ ប៊ី

ភ្នំពេញ៖ ក្រុមហ៊ុនធំមួយរបស់ម៉ាឡេស៊ីដែលឈ្មោះ RAFULIN គ្រោងនឹងវិនិយោគលើវិស័យទឹកស្អាតនៅកម្ពុជា ខណៈក្រុមហ៊ុនក៏មានបំណងពិនិត្យលទ្ធភាពវិនិយោគបង្កើតអាងស្តុកទឹកធំមួយសម្រាប់តម្កល់ទឹកទុកផ្គត់ផ្គង់ក្នុងរដូវប្រាំង។

ការគ្រោងវិនិយោគនេះត្រូវបានលើកឡើងក្នុងជំនួបប្រជុំរវាងប្រតិភូក្រុមហ៊ុនវិនិយោគវិស័យទឹកស្អាតមកពីប្រទេសម៉ាឡេស៊ីឈ្មោះ RAFULIN ដែលមានលោក Raffe Chekku ជាប្រធានក្រុមហ៊ុន និងលោក Tan Sri Ali Bin Hamsa ជាទីប្រឹក្សានិងជាអតីតអគ្គលេខារាជរដ្ឋាភិបាលនៃប្រទេសម៉ាឡេស៊ី និងលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្មនៅទីស្តីការក្រសួងកាលពីម្សិលមិញ ។

ក្នុងជំនួបពិភាក្សានេះភាគីក្រុមហ៊ុនម៉ាឡេស៊ី ចង់សិក្សាស្វែងយល់ការវិនិយោគលើវិស័យទឹកស្អាត ដោយចង់ធ្វើជាភាគីអ្នកលក់ដុំ ផលិតឲ្យទៅអ្នកលក់រាយបន្ត ហើយក៏ចង់ពិនិត្យលទ្ធភាពវិនិយោគបង្កើតអាងស្តុកទឹកធំមួយសម្រាប់តម្កល់ទឹកទុកផ្គត់ផ្គង់ក្នុងរដូវប្រាំងផងដែរ ។

លោកទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៌ និងបានលើកឡើងពីគោលនយោបាយវិស័យទឹកស្អាតរបស់ក្រសួងដោយបានកំណត់យកឆ្នាំ២០២៥ តំបន់ទីប្រជុំជនទូទាំងប្រទេសនឹងមានបណ្តាញទឹកស្អាតតទៅដល់ ។ លើសពីនេះទៅទៀត ក្រសួងកំពុងដាក់ចេញនូវគោលនយោបាយថ្មីមួយទៀត គឺមិនត្រឹមតែតំបន់ទីប្រជុជនទេ តែត្រូវគិតគូដល់តំបន់ជនបទ និងតំបន់ដាច់ស្រយ៉ាលផងដែរ ។

ពីព្រោះកាលណាប្រជាជនទទួលបានទឹកស្អាតប្រើប្រាស់គ្រប់គ្នា ពួកគាត់នឹងជៀសផុតពីការឆ្លងជម្ងឺដង្កាត់ផ្សេងៗ ដោយការប្រើប្រាស់ទឹកមិនស្អាត ។ ក្នុងនោះវាក៏បានជួយជម្រុញការអភិវឌ្ឍន៌ទូទៅផងដែរ ។

លោកទេសរដ្ឋមន្ត្រី ចម ប្រសិទ្ធ បានបន្ថែមថា “ទោះបីវិស័យទឹកស្អាតជាភារកិច្ចរបស់រដ្ឋក៏ពិតមែន តែក្នុងដំណាក់កាលនេះ ក្រសួងនៅតែលើកទឹកចិត្តឲ្យវិស័យឯកជនចូលមកវិនិយោគនៅតំបន់ណាដែលរដ្ឋមិនទាន់មានលទ្ធភាព ជាពិសេសអ្នកវិនិយោគធំៗ ដែលផលិតរួចលក់ដំបន្ត ដូចគម្រោងវិនិយោគដែលភាគីម៉ាឡេស៊ីបានលើកខាងលើ”។

លោក បានបន្តថា “រីឯតំបន់ជនបទ រឺតំបន់ដាច់ស្រយ៉ាល គឺយើងរកគ្រប់មធ្យោបាយតាមរយៈបង្កើតអាងចម្រោះខ្នាតតូច ដាក់នៅទីតាំងចំកណ្តាលណាមួយ ដើម្បីឲ្យប្រជាពលរដ្ឋមកទទួលយកសេវាផ្តល់ទឹកស្អាតនេះ”។ ដោយឡែកទាក់ទង និងគម្រោងវិនិយោគចង់បង្កើតអាងស្តុកតម្កល់ទឹក លោកទេសរដ្ឋមន្ត្រី បានមើលឃើញពីសារៈសំខាន់របស់វា ពីព្រោះនៅរដូវវស្សាតំបន់ខ្លះមានភ្លៀងធ្លាក់ជោគជាំ រហូតដល់លេចលំនៅដ្ឋានទៀតផង ។

លោកទេសរដ្ឋមន្ត្រី មានប្រសាសន៍ថា “បើយើងមានបច្ចេកទេសស្រូបយកទឹកទាំងនោះ គឺយើងអាចរួមចំណែកដោះស្រាយបានពេលដល់រដូវប្រាំងហើយជួបប្រទះភាពរាំងស្ងួត”។ ភាគីក្រុមហ៊ុនម៉ាឡេស៊ី បង្ហាញនូវចំណាប់អារម្មណ៌ ហើយនឹងធ្វើការសិក្សាស្រាវជ្រាវលើការងារនេះ ហើយនឹងបង្ហាញនូវលទ្ធផលរយៈពេល ០៣ ខែ ក្រោយទៀត៕

ខេត្តកណ្តាល ត្រៀមថវិកាជាង១៣៣លានដុល្លារ ដើម្បីអនុវត្តកម្មវិធីវិនិយោគ

ដោយ ៖ រ៉ាណេត

កណ្តាល ៖ គម្រោងអនុវត្តផែនការនៃកម្មវិធីវិនិយោគ៣ឆ្នាំរំកិលសម្រាប់ជំរុញកិច្ចអភិវឌ្ឍរបស់ខេត្តកណ្តាលឆ្នាំ ២០២០-២០២២ ខាងនេះ គឺមានរហូតដល់ ចំនួន ២៩៥ គម្រោង ត្រូវការថវិកាចំនួន ៥៣១ ៣៧៧ លានរៀល ស្មើនឹង ១៣២ ៨៤៤ ២៥០ដុល្លារ គម្រោងកម្មវិធីវិនិយោគបីឆ្នាំរំកិលក្រុងមានចំនួន ៣៥គម្រោង តម្រូវការថវិកាចំនួន ៤៦៤៣ លានរៀល ស្មើនឹង ១ ១៦០ ៧៥០ដុល្លារ។

កម្មវិធីវិនិយោគបីឆ្នាំរំកិល ( ២០២០- ២០២២) នៅថ្នាក់ខេត្ត គឺជាកម្មវិធីវិនិយោគទីមួយសម្រាប់អាណត្តិទី៣ របស់ក្រុមប្រឹក្សាខេត្តកណ្ដាល ដែលធ្វើឡើងស្របតាមច្បាប់ស្ដីពីការគ្រប់គ្រងរដ្ឋបាលរាជធានីខេត្តក្រុងស្រុកខណ្ឌដែលបានកំណត់ថារដ្ឋបាលថ្នាក់ក្រោមជាតិទាំងអស់ត្រូវរៀបចំកសាងផែនការអភិវឌ្ឍន៍សម្រាប់អាណត្តិរបស់ខ្លួនក្រោយពីបានបោះឆ្នោតរួច។

នៅក្នុងពិធីបើកវេទិកាពិគ្រោះយោបល់កម្មវិធីវិនិយោគ ៣ ឆ្នាំរំកិលខេត្ត ( ២០២០- ២០២២) កាលពីព្រឹកថ្ងៃទី ១៧ ខែធ្នូ ឆ្នាំ២០១៩ នៅសាលាខេត្តកណ្ដាល អភិបាលរងខេត្តកណ្តាល លោក នូវប៉េង ច័ន្ទតារា បានមានប្រសាសន៍ នេះគឺមានបំណងសំខាន់ដើម្បីបង្ហាញអំពីតម្រូវការក្នុងការអភិវឌ្ឍនៅមូលដ្ឋានទូទាំងខេត្ត និងធ្វើការសម្របសម្រួលបន្ស៉ីនូវតម្រូវការទាំងនេះជាមួយគម្រោង និងធនធានរបស់ដៃគូអភិវឌ្ឍ រួមមាន អង្គការសង្គមស៊ីវិលវិស័យឯកជន និងអ្នកពាក់ព័ន្ធនានាជាមួយគម្រោងកម្មវិធីវិនិយោគរបស់រដ្ឋបាលថ្នាក់នីមួយៗក្នុងខេត្ត។

ក្នុងឱកាសនោះដែរ លោកក៏បានធ្វើការក្រើនរំលឹកដល់មន្ត្រីពាក់ព័ន្ធទាំងអស់ ត្រូវខិតខំកៀងគររកប្រភពធនធាននានាពីអង្គការសង្គមស៊ីវិល ដៃគូអភិវឌ្ឍន៍ និងសប្បុរសជននានាក្នុងការជួយគាំទ្រគំរោងអភិវឌ្ឍន៍មូលដ្ឋាន ដើម្បីត្រៀមលក្ខណៈចូលរួមក្នុងសិក្ខាសាលាសមាហរណកម្មកម្មវិធីវិនិយោគ ឃុំ-សង្កាត់នៅថ្នាក់ក្រុង-ស្រុកនាពេលខាងមុខនេះឲ្យទទួលបានការគាំទ្រគម្រោងបានកាន់តែច្រើនឡើង។

លោក នូវប៉េង ច័ន្ទតារា បានមានប្រសាសន៍បញ្ជាក់ថា សម្រាប់គម្រោងកម្មវិធីវិនិយោគបីឆ្នាំរំកិលខេត្តឆ្នាំ ( ២០២០- ២០២២) មានចំនួន ២៩៥គម្រោង ត្រូវការថវិកាចំនួន ៥៣១ ៣៧៧ លានរៀល ស្មើនឹង ១៣២ ៨៤៤ ២៥០ដុល្លារ គម្រោងកម្មវិធីវិនិយោគបីឆ្នាំរំកិលក្រុងមានចំនួន ៣៥គម្រោង តម្រូវការថវិកាចំនួន ៤៦៤៣ លានរៀល ស្មើនឹង ១ ១៦០ ៧៥០ដុល្លារ គម្រោងកម្មវិធីវិនិយោគបីឆ្នាំរំកិលស្រុកមានចំនួន ២៧៧គម្រោង តម្រូវការថវិកាចំនួន ៣០ ២៧០ លានរៀល ស្មើនឹង ៧ ៥៦៧ ៥០០ដុល្លារ គម្រោងកម្មវិធីវិនិយោគសង្កាត់មាន ២៨៩គម្រោង តម្រូវការថវិកាប្រមាណ ៦ ៣៧០ លានរៀល ស្មើនឹង ១ ៥៩២ ៥០០$ និងគម្រោងកម្មវិធីវិនិយោគឃុំមាន ៩៦៤គម្រោង ត្រូវការថវិកាប្រមាណ ៥៧ ៧៩១ លានរៀល ស្មើនឹង ១៤ ៤៤៧ ៧៥០ដុល្លារ។