ម្ចាស់ពានស្ថាបនិកឆ្នើម ២០១៩ បង្ហើបគន្លឹះគ្រប់គ្រងធនធានមនុស្សយ៉ាងមានប្រសិទ្ធភាព

រាជធានីភ្នំពេញ៖ ថ្លែងក្នុងកម្មវិធីបង្វឹកម្ចាស់អាជីវកម្មរបស់ CEO Master Club ស្តីអំពីជំនាញគ្រប់គ្រងធនធានមនុស្សសម្រាប់ម្ចាស់អាជីវកម្ម នៅថ្ងៃទី០២-០៣ ខែវិច្ឆិកានេះ ដែលមានអ្នកចូលរួមប្រមាណ១៥០នាក់ លោកគ្រូអោម សេង បូរ៉ា បានបង្ហើបគន្លឹះគ្រប់គ្រងធនធានមនុស្សដើម្បីដោះស្រាយបញ្ហាគ្រប់គ្រង ដឹកនាំ ចាត់ចែងបុគ្គលិកនៅក្នុងស្ថាប័នប្រកបដោយប្រសិទ្ធភាពនិងប្រសិទ្ធផលខ្ពស់។

គន្លឹះសំខាន់ក្នុងការរៀបចំក្បួនគ្រប់គ្រងធនធានមនុស្សនេះ គឺការធ្វើសកម្មភាព២៤ម៉ោង/១ថ្ងៃ ថាតើមេដឹកនាំ និងកូនចៅមានបញ្ហាក្នុងការធ្វើសកម្មភាពអ្វីខ្លះទើបស្ថាប័នមិនរីកចម្រើន?

នៅក្នុងនោះលោកគ្រូ អោម សេងបូរ៉ា បានបង្ហាញយុទ្ទសាស្ត្រ៣ក្នុងការដោះស្រាយរួមមាន៖

១. បញ្ហាអត្តចរិក និងផ្នត់គំនិតរបស់បុគ្គលិក ថាតើមានបែងចែកបក្សពួក អវិជ្ជមាន ខ្ជិល លេសច្រើនឬទេ?
២. បញ្ហាចំណេះដឹង តើបុគ្គលិកដឹងពីរបៀបធ្វើការ និងសារៈសំខាន់នូវអ្វីដែលត្រូវធ្វើឬទេ?
៣. បញ្ហាភាពស្ទាត់ជំនាញ ថាតើបុគ្គិលធ្វើសកម្មភាពត្រូវ បានផលត្រូវ និងមានគុណភាពហើយឬនៅ?

សម្រាប់ក្បួនលម្អិតនឹងមានជម្រាបជូននៅក្នុងកម្មវិធីបង្វឹករបស់ CEO Master Club ស្តីអំពីជំនាញគ្រប់គ្រងធនធានមនុស្សសម្រាប់ម្ចាស់អាជីវកម្ម។

សូមបញ្ជាក់ថា CEO Master Club គឺជាស្ថាប័នប្រមូលផ្ដុំ និងបង្វឹកម្ចាស់អាជីវកម្មខ្នាតតូច និងមធ្យមនៅកម្ពុជា ដោយក្នុងរយៈពេល១០ឆ្នាំកន្លងទៅនេះ CEO Master Club បានបណ្ដុះបណ្ដាលសហគ្រិនកម្ពុជាបានចំនួនរាប់ម៉ឺននាក់ និងមានសមាជិកម្ចាស់អាជីវកម្មពេញមួយជីវិតប្រមាណជាង ១,០០០នាក់ដែលគ្រប់គ្រងអាជីវកម្មប្រមាណ ២,០០០ក្រុមហ៊ុន ដែលបង្កើតប្រតិបត្តិការអាជីវកម្មជាទឹកប្រាក់ប្រមាណជាង ១,០០០លានដុល្លារ/ឆ្នាំ និងបានជួយបង្កើតការងារជូនប្រជាពលរដ្ឋបានប្រមាណ ១០ម៉ឺននាក់៕

ទីផ្សារអចលនទ្រព្យនៅក្រុងឌូបៃកំពុងជួបប្រទះវិបត្តិដោយសារការផ្គត់ផ្គង់លើស

ដោយ Donald Lee

ភ្នំពេញៈ យោងតាមក្រុមហ៊ុនគ្រប់គ្រងទ្រព្យសម្បត្តិពិភពលោក UBS បានឱ្យដឹងថា ទីផ្សារអចលនទ្រព្យនៅឌូបៃកំពុងជួបវិបត្តិ ដោយសារចំនួនផ្គត់ផ្គង់លើសតម្រូវការបន្ថែមទៀត។

បើទោះបីជាអាជ្ញាធរទីក្រុងឌូបៃ ព្យាយាមទប់ស្កាត់កំណើនពពុះផុយស្រួយ និងការផ្គត់ផ្គង់លើសតម្រូវការ ក្នុងទីផ្សារអចលនទ្រព្យខ្លួនក៏ដោយ ក៏ទីផ្សារនៅតែស្ថិតក្នុងស្ថានភាពការផ្គត់ផ្គង់លើសកម្រិត។ នេះបើយោងតាមសន្ទស្សន៍ UBSក្នុងឆ្នាំ ២០១៩។

របាយការណ៍បាននិយាយថា “ទីផ្សារអចលនទ្រព្យនៅឌូបៃ បានរីកដុះដាលនៅចន្លោះឆ្នាំ២០១០ និង២០១៤ ដែលគាំទ្រដោយកំណើនសេដ្ឋកិច្ចខ្លាំង ជំរុញដោយតម្លៃប្រេងឡើងខ្ពស់”។

ដើម្បីការពារការកើនឡើងកំហុគនេះ អាជ្ញាធរបានដាក់ចេញនូវតម្លៃជួញដូរអចលនទ្រព្យខ្ពស់ជាងមុន និងស្តង់ដារប្រាក់កម្ចីតឹងរឹង។ ហេតុដូច្នេះ តម្លៃពិតប្រាកដបានធ្លាក់ចុះជិត៣៥ភាគរយ ចាប់តាំងពីពាក់កណ្តាលឆ្នាំ២០១៤ ស្របពេលដែលតម្លៃប្រេងចុះខ្សោយ។

បើទោះបីជាតម្លៃអចលនទ្រព្យ ដែលផ្គត់ផ្គង់លើសតម្រូវការ ក៏តម្លៃអចលនទ្រព្យនៅតែស្ថិតនៅក្នុងស្ថានភាពសមរម្យ។ នេះបើយោងតាម UBS ។

របាយការណ៍នេះបានបង្ហាញថា “លទ្ធភាពទទួលបានអចលនទ្រព្យ ដែលមានតម្លៃសមរម្យមានភាពល្អប្រសើរ ទោះបីជាប្រាក់ចំណូលបានធ្លាក់ចុះ ចំពេលមានកំណើនសេដ្ឋកិច្ចទាបក៏ដោយ”។

អ្នកអភិវឌ្ឍន៍អចលនទ្រព្យធំជាងគេនៅខែនេះ បានជំរុញឱ្យក្រុមហ៊ុនអចលនទ្រព្យបញ្ឈប់គម្រោងថ្មីទាំងអស់ ដើម្បីឱ្យទីផ្សារអាចងើបឡើងវិញ និងមករកភាពដើមឡើងវិញ។

ប្រធានក្រុមហ៊ុន DAMAC លោក Hussain Sajwani បាននិយាយថា ការផ្គត់ផ្គង់លើសតម្រូវការ បានធ្វើឱ្យតម្លៃអចលនទ្រព្យធ្លាក់ចុះជិត២៥ភាគរយ ចាប់តាំងពីឆ្នាំ ២០១៤។

ការផ្គត់ផ្គង់លើសតម្រូវការ បានប៉ះពាល់យ៉ាងខ្លាំងចំពោះក្រុមហ៊ុន DAMAC ខណៈក្រុមហ៊ុនបានបង្ហាញថា ផលចំណេញរបស់ខ្លួនបានធ្លាក់ចុះ៨៧ភាគរយ ក្នុងត្រីមាសទី ២ ហើយតម្លៃភាគហ៊ុនបានបាត់បង់៤០ភាគរយ នៃតម្លៃរបស់វានៅក្នុងឆ្នាំ ២០១៩។

ប្រធានក្រុមហ៊ុន DAMAC បានស្តីបន្ទោសក្រុមហ៊ុនអភិវឌ្ឍន៍អចលនទ្រព្យគូប្រជែងដែលមានឈ្មោះថា Emaar ដែលបណ្តាលឱ្យមានការផ្គត់ផ្គង់លើសលុប ដោយការចាក់បញ្ចូលអចលនទ្រព្យយ៉ាងលើសលុប ក្នុងទីផ្សារក្នុងរយៈពេលប៉ុន្មានឆ្នាំកន្លងមក។ នេះបើយោងតាមបទសម្ភាសន៍ជាមួយ Bloomberg។

ប្រធានក្រុមហ៊ុន Emaar លោក Mohamed Alabbar បានប្រាប់ទស្សនាវដ្តីពាណិជ្ជកម្មអារ៉ាប់កាលពីសប្តាហ៍មុនថា“ប្រហែលជា! ប្រសិនបើប្រាក់ចំណេញត្រីមាសទី២របស់អ្នកធ្លាក់ចុះជិត៩០ភាគរយ វាពិតជានឹកស្មានមិនដល់”។

លោកបន្តថា “ខ្ញុំដឹងអ្វីដែលខ្ញុំកំពុងធ្វើ ដែលនឹងបង្ហាញលទ្ធផលម្ចាស់ភាគហ៊ុន និងអតិថិជនរំពឹងទុកថានឹងទទួលបាន”៕

លោក Donald Trump ណែនាំឱ្យមានការចុះហត្ថលេខាព្រមព្រៀងពាណិជ្ជកម្មជាមួយចិននៅអាមេរិក

ដោយ Donald Lee

ភ្នំពេញៈ ប្រធានាធិបតីអាមេរិក Donald Trump និងក្រសួងពាណិជ្ជកម្មចិនបានឲ្យដឹងថា ភាគីទាំងពីរបានឯកភាពគ្នាលើបញ្ហាភាគច្រើន ទាក់ទងនឹងកិច្ចព្រមព្រៀងពាណិជ្ជកម្មរវាងអាមេរិក និងចិននៅសប្តាហ៍នេះ។

អ្នកនាំពាក្យក្រសួងពាណិជ្ជកម្មចិនបាននិយាយថា អ្នកចរចាពាណិជ្ជកម្មទាំងសងខាងបានទំនាក់ទំនងគ្នាកាលពីថ្ងៃសុក្រ និងបានពិភាក្សាពីទីតាំងកិច្ចប្រជុំបន្ទាប់សម្រាប់ការចរចាពាណិជ្ជកម្ម។

លោក Donald Trump បាននិយាយថា “៦០ភាគរយនៃកិច្ចព្រមព្រៀងពាណិជ្ជកម្មចុងក្រោយរវាងអាមេរិក និងចិនបានបញ្ចប់ ហើយត្រៀមខ្លួនជាស្រេចក្នុងការចុះកិច្ចព្រមព្រៀងគ្នា”។

អ្នកចរចាពាណិជ្ជកម្មអាមេរិក និងចិនមានបំណងចុះហត្ថលេខាលើកិច្ចព្រមព្រៀងពាណិជ្ជកម្ម ដំណាក់កាលមួយបណ្តោះអាសន្ន ក្នុងអំឡុងកិច្ចប្រជុំកំពូល APEC នៅប្រទេសឈីលីនៅថ្ងៃទី១៦ ខែវិច្ឆិកា ប៉ុន្តែប្រធានាធិបតីឈីលី បានលុបចោលព្រឹត្តិការណ៍នេះ ដោយសារតែការតវ៉ាប្រឆាំងនឹងរដ្ឋាភិបាល កំពុងធ្វើឱ្យប្រទេសនេះមានភាពវឹកវរ។

លោក Trump បាននិយាយកាលពីថ្ងៃសុក្រថា ទីតាំងដែលអាចធ្វើទៅបានសម្រាប់ការប្រជុំបន្ទាប់ អាចត្រូវបានធ្វើឡើងនៅអាមេរិក ក្នុងរដ្ឋIowa ដោយសារតែកិច្ចព្រមព្រៀងដ៏ធំធេងសម្រាប់ចិន ក្នុងការទិញទំនិញកសិកម្ម ដែលមានតម្លៃដល់ទៅ៥០ពាន់លានដុល្លារអាមេរិក។

ទីក្រុងប៉េកាំងមិនបានបញ្ជាក់ថា ការទិញនេះ នឹងមិនក្លាយជាផ្នែកមួយនៃកិច្ចព្រមព្រៀងពាណិជ្ជកម្មនោះទេ។

លោក Trump បានប្រាប់អ្នកសារព័ត៌មានកាលពីថ្ងៃសុក្រថា “ចិនចង់បានកិច្ចព្រមព្រៀងនេះខ្លាំងណាស់។យើងមានទំនាក់ទំនងល្អ ហើយយើងនឹងឃើញមានអ្វីកើតឡើង”។

លោក Trump បានបន្ថែមថា “យើងកំពុងពិនិត្យមើលទីតាំងផ្សេងៗគ្នា [សម្រាប់ការចុះហត្ថលេខាលើកិច្ចព្រមព្រៀងពាណិជ្ជកម្ម]។ យើងកំពុងគិតអំពីរដ្ឋ Iowa ។ អ្នកដឹងហេតុអ្វី? ពីព្រោះវានឹងក្លាយជាលំដាប់ធំបំផុត នៅក្នុងប្រវត្តិសាស្ត្រសម្រាប់កសិករ។ ដូច្នេះរដ្ឋIowa សមហេតុផល។ ខ្ញុំស្រឡាញ់រដ្ឋ Iowa”៕

កម្ពុជារកចំណូលបានជាង៨០លានដុល្លារពីការលក់សំបុត្រចូលទស្សនារមណីយដ្ឋានអង្គរ

ដោយ វុត្ថា

ភ្នំពេញៈ ក្នុងរយៈពេល១០ខែគិតចាប់ពីខែមករា ដល់ខែតុលា ឆ្នាំ២០១៩ ចំណូលពីការលក់បណ្ណចូលទស្សនារមណីយដ្ឋានអង្គរ ក្នុងខេត្តសៀមរាបទទួលបានេះជាង៨០លានដុល្លារអាមេរិក។ ចំនួននេះបានថយចុះជាង១៤ភាគរយ បើធៀបនឹងរយៈពេល១០ខែ ក្នុងឆ្នាំ២០១៨។

យោងរបាយការណ៍របស់គ្រឹះ ស្ថានអង្គរត្រូវបានផ្សព្វផ្សាយនៅថ្ងៃទី ២ ខែវិច្ឆិកា ឆ្នាំ ២០១៩នេះបានឱ្យដឹងថា រីឯ អ្នក ទេសចរបរទេស ដែលបានទិញបណ្ណចូលទស្សនារមណីយដ្ឋានអង្គរ រយៈពេល១០ខែនេះ មានចំនួន១,៨០៤,០០៧ នាក់ ថយចុះ១៣,៦៩% ធៀបនឹង១០ខែ ក្នុងឆ្នាំ២០១៨។

របាយការណ៍ដដែលបន្តថា សម្រាប់នៅខែតុលា ឆ្នាំ២០១៩ ចំនួនអ្នកទេសចរទិញបណ្ណ ចូលទស្សនារមណីយដ្ឋានអង្គរ មានចំនួន១៤១,៤៩៤នាក់ ថយចុះ២៤,៩៣% ធៀបនឹងខែតុលា ឆ្នាំ២០១៨។ រីឯចំណូលក្នុងខែតុលាទទួលបាន៦,៣៦១,១០៣ ដុល្លារ ថយចុះ២៣,៨០% ធៀបនឹងខែតុលា ឆ្នាំ២០១៨។

លោកថោង ខុន រដ្ឋមន្ត្រីក្រសួងទេសចរណ៍បានពន្យល់ កាលពីកន្លងទៅថ្មីៗនេះថា ការធ្លាក់ភ្ញៀវទេសចរណ៍នៅតំបន់សៀមរាប – អង្គរដោយសារក្រុមហ៊ុន ដែលលក់កញ្ចប់ Zero Cost Tour ព្រោះថា បណ្ដាក្រុមហ៊ុនទាំងនោះយកភ្ញៀវមកក្នុងតម្លៃទាប ឬមិនចំណេញតែម្ដង តែពួកគេរកស៊ីនៅតាមហាងវត្ថុអនុស្សាវរីយ៍ អាហារដ្ឋាន ឬសណ្ឋា គារជាដើមដែលលក់ក្នុងតម្លៃខ្ពស់។

ក្រោយមានការធ្លាក់ចុះភ្ញៀវទេសចរនៅគោលដៅសៀមរាប-អង្គរ គណៈកម្មការអន្តរក្រសួង បានប្រកាសដាក់ចេញផែនការយុទ្ធសាស្ត្រ អភិវឌ្ឍន៍វិស័យទេសចរណ៍ចំនួន៤ ជាចម្បង ដើម្បីរួមគ្នាដោះស្រាយបញ្ហាពាក់ព័ន្ធនានា ដើម្បីស្រោចស្រង់កំណើនភ្ញៀវទេសចរឡើងវិញ ខណៈតំបន់ដែលមានសក្ដានុពលសំខាន់ៗចំនួន៤ ក៏ត្រូវបានកំណត់ថាត្រូវតែអភិវឌ្ឍន៍ទៅគោលដៅ ទេសចរណ៍ទាក់ទាញជាចាំបាច់ផងដែរ។

ការប្រកាសដាក់ចេញផែនការយុទ្ធសាស្ត្រជាចាំបាច់នេះ ត្រូវបានធ្វើឡើងនាឱកាសកិច្ចប្រជុំលើកទី៣ របស់គណៈកម្មការអន្តរក្រសួង ដើម្បីរៀបចំផែនការមេអភិវឌ្ឍន៍ទេសចរណ៍នៅខេត្តសៀមរាប។

អង្គរប្រជុំបានប្រកាសដាក់ចេញគម្រោងផែនការមេ សម្រាប់អភិវឌ្ឍន៍វិស័យទេស ចរណ៍ខេត្តសៀមរាប និងផែនការសកម្មភាពការងារអនុវត្តន៍ ចំពោះមុខរយៈពេលខ្លីឆ្នាំ២០១៩-២០២០ ក្រោមទិសស្លោក «ប្រែក្លាយបញ្ហាប្រឈមទៅជាឱកាស»៕

សម្តេចតេជោៈ កិច្ចប្រជុំកំពូលអាស៊ានជាឱកាសរបស់កម្ពុជាក្នុងការចូលរួមដោះស្រាយបញ្ហាដែលជាកង្វល់រួមរបស់អាស៊ាន

ដោយគង់ សូរិយា

ភ្នំពេញៈ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានាព្រឹកថ្ងៃទី២ តុលានេះ បានដឹកនាំគណៈប្រតិភូជាន់ខ្ពស់ទៅចូលរួមកិច្ចប្រជុំ កំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធមួយចំនួន នៅទីក្រុងបាងកក ប្រទេសថៃ ក្រោមមូលបទ «ជំរុញភាពជាដៃគូសម្រាប់ចីរភាព»។

យោងតាមទំព័រហ្វេសប៊ុកផ្លូវការ នៅមុនចាកចេញពីព្រលានយន្តហោះអន្តរជាតិភ្នំពេញ សម្ដេចតេជោនាយករដ្ឋមន្ត្រីបានសរសេរថា “កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធមួយចំនួនទៀត គឺមានសារសំខាន់ខ្លាំងណាស់សម្រាប់កម្ពុជា ក៏ដូចជាប្រទេសក្នុងតំបន់អាស៊ីអាគ្នេយ៍ ឬហៅថាអាស៊ាន។ នេះជាឱកាសរបស់កម្ពុជា ក្នុងការចូលរួមពិភាក្សាដោះស្រាយបញ្ហា ដែលជាកង្វល់រួមរបស់អាស៊ាន និងពិភពលោក”។

សម្តេចបញ្ជាក់ថា “ស្របពេលនៃការចូលរួមកិច្ចប្រជុំកំពូលអាស៊ានលើកទី៣៥នេះ ខ្ញុំនឹងមានជំនួបទ្វេភាគីជាមួយថ្នាក់ដឹកនាំ និងឥស្សរជនសំខាន់ៗមកពីប្រទេសជាសមាជិកអាស៊ាន និងប្រទេសដៃគូសន្ទនាអាស៊ានមួយចំនួនទៀតផង”។

ស្របគ្នានេះដែរ សម្តេចតេជោហ៊ុនសែន បានអញ្ជើញបងប្អូនជនរួមជាតិ និងភ្ញៀវទេសចរអន្តរជាតិ មកចូលរួមកំសាន្តសប្បាយ នៅក្នុងថ្ងៃបុណ្យឯករាជ្យជាតិ៩ វិច្ឆិកា និង ក្នុងថ្ងៃបុណ្យអុំទូក អកអំបុក សំពះព្រះខែ ចាប់ពីថ្ងៃទី ១០ -១២ វិច្ឆិកា ២០១៩ ខាងមុខនេះ និងបានជូនពរបងប្អូនជនរួមជាតិ ជួបតែសេចក្តីសុខ សេចក្តីចម្រើន និងសំណាងល្អគ្រប់ៗគ្នា។

តបតាមការអញ្ជើញរបស់ លោកប្រាយុទ្ធ ចាន់អូចា (Prayut Chan–o-cha) នាយករដ្ឋមន្រ្តីនៃព្រះរាជាណាចក្រថៃ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានដឹកនាំគណៈប្រតិភូជាន់ខ្ពស់អញ្ជើញទៅចូលរួមកិច្ចប្រជុំកំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធ ដែលនឹងប្រព្រឹត្តទៅក្រោម មូលបទ «ជំរុញភាពជាដៃគូសម្រាប់ចីរភាព» នៅទីក្រុងបាងកក ពីថ្ងៃទី២ ដល់ថ្ងៃទី៥ ខែវិច្ឆិកា ឆ្នាំ២០១៩។

សម្តេចតេជោនាយករដ្ឋមន្រ្តី នឹងអញ្ជើញចូលរួមក្នុងកិច្ចប្រជុំកំពូល ដូចខាងក្រោម៖- កិច្ចប្រជុំកំពូលអាស៊ាន លើកទី៣៥- កិច្ចប្រជុំកំពូលអាស៊ាន-ចិន លើកទី២២ -កិច្ចប្រជុំកំពូលអាស៊ាន-ឥណ្ឌា លើកទី១៦- កិច្ចប្រជុំកំពូលអាស៊ាន-អង្គការសហប្រជាជាតិ លើកទី១០- កិច្ចប្រជុំកំពូលអាស៊ានបូកបី លើកទី២២- កិច្ចប្រជុំកំពូលអាស៊ាន-សហរដ្ឋអាមេរិក លើកទី៧- កិច្ចប្រជុំកំពូលអាស៊ីបូព៌ា លើកទី១៤- កិច្ចប្រជុំកំពូលអាស៊ាន-ជប៉ុន លើកទី២២ និង- កិច្ចប្រជុំកំពូលភាពជាដៃគូសេដ្ឋកិច្ចទូលំទូលាយក្នុងតំបន់លើកទី៣។

ស្របពេលកិច្ចប្រជុំកំពូលអាស៊ានលើកទី៣៥នេះ សម្តេចតេជោនាយករដ្ឋមន្រ្តីក៏នឹងអញ្ជើញចូលរួម ក្នុងកិច្ចប្រជុំ និងកម្មវិធីមួយចំនួនផ្សេងទៀតដូចខាងក្រោម- ជំនួបរវាងប្រមុខរដ្ឋ/រដ្ឋាភិបាលអាស៊ានបូកបី និងក្រុមប្រឹក្សាពាណិជ្ជកម្មអាស៊ីបូព៌ា – អាហារថ្ងៃត្រង់ពិសេស ស្តីពីការអភិវឌ្ឍប្រកបដោយចីរភាព និង- កិច្ចប្រជុំកំពូលមេគង្គ-ជប៉ុន លើកទី១១ (អាហារការងារពេលល្ងាច)។

ក្នុងអំឡុងពេលស្នាក់នៅទីក្រុងបាងកក ប្រទេសថៃ សម្តេចតេជោនាយករដ្ឋមន្រ្តី គ្រោងនឹងមានជំនួបទ្វេភាគី ជាមួយថ្នាក់ដឹកនាំ និងឥស្សរជនមកពីប្រទេសជាសមាជិកអាស៊ាន និងប្រទេស ដៃគូសន្ទនាអាស៊ានផងដែរ។ សម្តេចតេជោ នឹងអញ្ជើញចូលរួមកម្មវិធីអាហារការងារ ពេលព្រឹក ជាមួយឯកឧត្តម ង្វៀន សួនហ៊ុក នាយករដ្ឋមន្រ្តី វៀតណាម និងឯកឧត្តម ថងលូន ស៊ីស៊ូលីត នាយករដ្ឋមន្រ្តីឡាវ៕

ចំណូលពីការនាំចេញចេកកម្ពុជាទៅកាន់ទីផ្សារចិន រំពឹងថាអាចនឹងខ្ពស់ជាងការនាំចេញអង្ករ

ដោយៈ រ៉ាណេត

ភ្នំពេញៈ ការនាំចេញផ្លែចេកកម្ពុជា នៅត្រឹមរយៈពេល៩ខែ ឆ្នាំ២០១៩កន្លងទៅនេះ មានចំនួនសរុបជាង ១១,០៥ ម៉ឺនតោន ក្នុងនោះទីផ្សារដែលនាំចេញដ៏សំខាន់ជាងគេនោះគឺប្រទេសចិន។

អ្នកទទួលខុសត្រូវក្នុងក្រុមហ៊ុន Longmate ដែលទទួលបានការអនុញ្ញាតលើការនាំផ្លែចេកកម្ពុជា ចេញទៅកាន់ទីផ្សារប្រទេសចិនដំបូងគេបានមានប្រសាសន៍ឲ្យដឹងកាលពីពេលថ្មីៗនេះថា ដោយទទួលបានអត្ថប្រយោជន៍ នៃសក្តានុពលទីផ្សារដ៏ធំរបស់ប្រទេសចិន ការនាំចេញផ្លែចេកកម្ពុជានឹងមានការកើនឡើងកាន់តែខ្ពស់ ហើយសង្ឃឹមថាអាចក្លាយជាផលិតផលដ៏ចាំបាច់ ក្នុងការនាំចេញរបស់ប្រទេសកម្ពុជា ហើយអាចបង្កើនបានប្រាក់ចំណូលខ្ពស់ជាងផលិតផលអង្ករថែមទៀតផង។

ជាមួយនឹងការទទួលបានភាពជោគជ័យទៅលើការនាំចេញនេះ បច្ចុប្បន្ន ក្រុមហ៊ុនកំពុងមានគម្រោង ពង្រីកផ្ទៃដីដាំដុះដំណាំចេកកាន់តែធំ ដើម្បីសម្រេចទទួលបានការនាំចេញផ្លែចេកទៅកាន់ប្រទេសចិន ចំនួន២២ម៉ឺនតោនក្នុងឆ្នាំ២០១៩នេះ និងសម្រេចបាន៣៣ម៉ឺនតោននាឆ្នាំ២០២០ខាងមុខនេះ។ ក្នុងរយៈពេលថ្មីៗកន្លងមកនេះ ចិនបានអនុញ្ញាតសហគ្រាសថ្មីចំនួន៤ ក្នុងការនាំចេញផ្លែចេកទៅកាន់ប្រទេសចិន ហើយបច្ចុប្បន្ននេះសហគ្រាស ដែលនាំចេញផ្លែចេកទៅកាន់ប្រទេសចិនមានចំនួន៩ក្រុមហ៊ុន។

ក្រៅពីនេះ ក្រុមហ៊ុន Beijing Capital Agribusiness Group (CAG) ក៏បានប្រកាសថានឹងវិនិយោគតម្លៃជាង៣០ លានដុល្លារអាមេរិក ដើម្បីធ្វើការបង្កើតចម្ការដាំដុះដំណាំចេកក្នុងប្រទេសកម្ពុជាលើផ្ទៃដីជាង ១៥០០ហិកតា។

លោកឧកញ៉ាលឹម ហេង អនុប្រធានសភាពាណិជ្ជកម្មកម្ពុជា ដែលវិនិយោគលើចំការចេកអំបូងលឿនប្រមាណ១០០០ហិកតា ដើម្បីនាំចេញផងដែរនោះបានមានប្រសាសន៍ថា ទីផ្សារចេកអំបូងលឿងនៅកម្ពុជាមានភាពទូលំទូលាយ ដោយយើងអាចនាំចេញទៅកាន់បណ្តាប្រទេសធំៗជាច្រើន ដែលនេះជាសក្តានុពលមួយសំរាប់កម្ពុជា ដែលអាចពង្រីកទីផ្សារនាំចេញបានកាន់តែច្រើននាពេលអនាគត៕

ផ្លូវក្រវ៉ាត់ក្រុងទី៣ ស្ថាបនាសម្រេចបានប្រមាណ ៤០ភាគរយហើយ

ដោយ វុត្ថា

ភ្នំពេញ៖ មន្ត្រីជាន់ខ្ពស់នៃក្រសួងសាធារណៈការ និងដឹកជញ្ជូន បានឱ្យដឹងថា មកដល់ពេលនេះ ការស្ថាបនាផ្លូវក្រវ៉ាត់ក្រុងទី ៣ ពីសំណាក់ក្រុមហ៊ុនចិន សម្រេចបានប្រមាណ៣០ ទៅ ៤០ ភាគរយហើយ។

អ្នកនាំពាក្យក្រសួងសាធារណៈការ និងដឹកជញ្ជូន លោក គង់ វិមាន បានឱ្យដឹងតាមទូរស័ព្ទនៅថ្ងៃទី ២ ខែវិច្ឆិកា ឆ្នាំ ២០១៩ នេះ ថា ក្រុមហ៊ុនចិនដែលទទួលបានកសាងផ្លូវក្រវ៉ាត់ក្រុងទី ៣ នេះ មានការសាងសង់លឿនជាការផែនការ ។លោកបន្តថា “យើងកត់សម្គាល់ឃើញថាក្រុមហ៊ុនចិនតែងតែងលឿនជាផែនការ ។

ដូច្នេះសម្រាប់ផ្លូវក្រវ៉ាត់ក្រុងទី ៣ នេះ ត្រូវបានរំពឹងថា នឹងបញ្ចប់មុនផែនការដែលបានគ្រោងទុក ស្របតាមការជំរុញពីសំណាក់របស់រដ្ឋាភិបាល និងពីក្រសួងសាធារណៈការ និងដឹកជញ្ជូន ដោយធ្វើយ៉ាងមិចធ្វើឱ្យបានលឿន តាមផែនការ ឬមុនផែនការ” ។

លោកបន្ថែមទៀតថា “យើងឃើញថា ខាងក្រុមហ៊ុនកំពុងដុតដៃដុតជើងសម្បើមណាស់សម្រាប់កសាងផ្លូវដ៏ខាន់មួយនេះ”។ ផ្លូវក្រវ៉ាត់ក្រុងទី៣នេះ ត្រូវបានបើកការដ្ឋានសាងសង់នៅថ្ងៃទី ១៤ ខែមករា ឆ្នាំ២០១៩ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និង ឯកអគ្គរដ្ឋ ទូតចិន ប្រចាំនៅកម្ពុជា ។

ផ្លូវក្រវ៉ាត់ ក្រុងទី៣ ដែលមានប្រវែងជាង ៥០គីឡូម៉ែត្រនេះ ត្រូវបានសាងសង់ឡើងក្នុងគោលបំណងកាត់បន្ថយការកកស្ទះចរាចរក្នុង ទីក្រុង និងការធ្វើសមាហរណកម្មផ្ទៃក្នុង ។

គម្រោងផ្លូវនេះ ចំណាយថវិកាសរុបប្រមាណ ២៧៣លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន ហើយរាជរដ្ឋាភិបាលកម្ពុជា ចូលរួមថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីននិងយុទ្ធភ័ណ្ឌមិនទាន់ផ្ទុះ ពន្ធ និងសួយសារអាករ ។ ការស្ថាបនា នឹងប្រើរយៈពេល៤២ខែ ដែលគ្រោងបញ្ចប់នៅខែធ្នូ ឆ្នាំ២០២១៕

អ្នកជំនាញអចលនទ្រព្យជាតិ និងអន្តរជាតិ ជាង៦០០នាក់ នឹងមកជួបជុំគ្នានៅក្រុងភ្នំពេញ នាខែធ្នូខាងមុខនេះ

ដោយ ៖ រ៉ាណេត

ភ្នំពេញ ៖ នៅដើមខែធ្នូ ឆ្នាំ២០១៩ ខាងមុខនេះ អ្នកជំនាញអចលនទ្រព្យ ក៏ដូចជាក្រុនហ៊ុនភ្នាក់ងារ និងអភិវឌ្ឍន៍ នឹងមកជួបជុំគ្នាដើម្បីភ្ជាប់ទំនាក់ទំនងមុខជំនួញ និងផ្លាស់ប្ដូរបទពិសោធន៍តាមរយៈកម្មវិធី «2nd Yearly National Convention ដែលរៀបចំឡើងដោយក្រុមហ៊ុនអចលនទ្រព្យអន្តរជាតិ Century21 Cambodia ។

យ៉ាងហោចណាស់មានមនុស្សប្រមាណជាង៦៥០នាក់ ដែលសុទ្ធតែជាអ្នកជំនាញ និងមានបទពិសោធន៍នៅក្នុងវិស័យអចលនទ្រព្យអន្តរជាតិចម្រុះជាតិសាសន៍ និងមកពីច្រើនប្រទេសនៅលើសាកលលោក នឹងមកជួបជុំគ្នា ដើម្បីបង្កើតទំនាក់ទំនងបណ្តាញលើមុខជំនួញអចលនទ្រព្យ ដែលនឹងប្រារព្វឡើងនៅសណ្ឋាគារ សូហ្វីតែល នៅត្រឹមល្ងាចថ្ងៃទី៩ ខែធ្នូ ឆ្នាំ២០១៩ខាងមុខនេះ ។

នាយិកាក្រុមហ៊ុនអចលនទ្រព្យអន្តរជាតិ Century21 Cambodia លោកស្រី Grace Rachny Fong បានមានប្រសាសន៍ប្រាប់ឱ្យដឹងថា តាមរយៈកម្មវិធីប្រចាំឆ្នាំមួយនេះ នឹងផ្តល់ជាប្រយោជន៍យ៉ាងច្រើនដល់អ្នកដែលបានចូលរួម ជាពិសេសបានស្វែងយល់ពីបរិបថនៃវិស័យអចលនទ្រព្យនៅលើទីផ្សារអន្តរជាតិ។

លោកស្រីបានបន្តទៀតថា “នៅក្នុងព្រឹត្តិការណ៍មួយនេះ គឺមានការជួបជុំនូវសមាសភាពក្រុមហ៊ុននានាដែលស្ថិតនៅក្នុងគ្រួសារ Century21 ទូទាំងសាកលលោក ហើយក៏មានបណ្តាក្រុមហ៊ុនដទៃទៀត ដែលមកពីសហរដ្ឋអាមេរិក ជប៉ុន ហុងកុង អូស្ត្រាលី កូរ៉េ វៀតណាម ថៃ សិង្ហបុរី តៃវ៉ាន់ ចិន ជាដើម ក្នុងនាមជាដៃគូសហការផងដែរ”។

លោកស្រីបានបន្តទៀតថា “ព្រឹត្តិការណ៍មួយនេះ គឺពិតជាមានសារសំខាន់សម្រាប់ក្រុមហ៊ុនដែលស្ថិតនៅក្នុងវិស័យអចលនទ្រព្យ ដោយសារក្រុមហ៊ុន Century21 Cambodia នឹងធ្វើការបង្ហាញពីបរិបថទូទៅនៃការអភិវឌ្ឍវិស័យអចលនទ្រព្យ ក៏ដូចជាសក្ដានុពលទីផ្សារនៅកម្ពុជា ដើម្បីទាក់ទាញការវិនិយោគពីបណ្តាក្រុមហ៊ុនអន្តរជាតិនានាបន្ថែមទៀត”។

លោកស្រីបានបន្តទៀតថា “គោលដៅសំខាន់នៃការរៀបចំកម្មវិធីប្រចាំមួយនេះ គឺការប្រមូលផ្តុំបណ្តាក្រុមហ៊ុនដែលស្ថិតនៅក្នុងវិស័យអចលនទ្រព្យអាចបង្កើតកិច្ចទំនាក់ទំនង ធ្វលការជាដៃគូ ជាពិសេសគឺការផ្លាស់ប្ដូរបទពិសោធន៍ពីគ្នាទៅវិញទៅមក”៕

ជប៉ុនសន្យាផ្តល់ហិរញ្ញប្បទានបន្ថែមទៀតដើម្បីរួមចំណែកអភិវឌ្ឍន៍កម្ពុជា

ដោយ វុត្ថា

ភ្នំពេញៈ ឯកអគ្គរាជទូតជប៉ុនប្រចាំនៅកម្ពុជា បានសន្យាបន្តផ្តល់ហិរញ្ញប្បទានសម្រាប់កិច្ចសហប្រតិបត្តិការអភិវឌ្ឍ៍ផ្លូវការ (ODA) ទាំងក្នុងក្របខណ្ឌហិរញ្ញប្បទានឥតសំណង ឥណទានសម្បទាន និងជំនួសបច្ចេកទេស ជាពិសេសជំរុញការអភិវឌ្ឍវិស័យនានាឱ្យកាន់តែរីកចំរើនបន្ថែមទៀត។

លោក Masaharo MIKAMI ឯកអគ្គរាជទូតថ្មីរបស់ជប៉ុនប្រចាំនៅកម្ពុជាបានមានប្រសាសន៍ឲ្យដឹង នៅក្នុងជំនួបជាមួយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុប នៅថ្ងៃទី ១ ខែវិច្ឆិកា ឆ្នាំ ២០១៩ កន្លងមក បានថ្លែងអំណរគុណចំពោះមន្រ្តីកម្ពុជា មកពីគ្រប់ស្ថានប័នពាក់ព័ន្ធ ដែលតែងតែបានផ្តល់នូវកិច្ចសហប្រតិបត្តិកដ៏ល្អប្រសើររវាងកម្ពុជា-ជប៉ុននាពេលកន្លងមកនេះ។

លោកបណ្ឌិតអូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានឱ្យដឹងដែរថា កិច្ចខិតខំប្រឹងប្រែងរបស់រដ្ឋាភិបាលជប៉ុន ដែលបានជួយកម្ពុជារហូតមក បានឆ្លុះបញ្ចាំងយ៉ាងច្បាស់ថា ប្រទេសជប៉ុនគឺជាដៃគូយុទ្ធសាស្ត្រអភិវឌ្ឍន៍ដ៏សំខាន់ ក្នុងការចូលរួមចំណែកជួយគាំទ្រដល់ម្ពុជា។

លោកឧបនាយករដ្ឋមន្ត្រី បានកោតសរសើរចំពោះលំហូរទុន និងទំហំវិនិយោគឯកជនពីប្រទេសជប៉ុន ដែលមានចំនួនកើតឡើងជាបន្តបន្ទាប់ ដែលបានជួយជំរុញអភិវឌ្ឍន៍សង្គមសេដ្ឋកិច្ចកម្ពុជា។

លោកបន្ថែមថា ជាមួយគ្នានេះ ដើម្បីលើកកម្ពស់ការវិនិយោគពីវិស័យឯកជន ទាក់ទាញអ្នកវិនិយោគិន ភាពប្រកួតប្រជែងដើម្បីជំរុញពិពិធកម្មសេដ្ឋកិច្ច រាជរដ្ឋាភិបាលកម្ពុជា បន្តពង្រឹងច្បាប់ កំណែទម្រង់អភិបាលកិច្ច រួមមាន ការកែលម្អប្រព័ន្ធឡូជីស្ទិក និងការលើកកម្ពស់ការតភ្ជាប់ផ្នែកដឹកជញ្ជូន ប្រពន្ធគ្រប់គ្រង់ និងមធ្យោបាយដឹកជញ្ជូន សម្រួលដល់បរិយាកាសអំណោយផលសម្រាប់ធុរកិច្ច និងការវិនិយោគឱ្យស្របទៅនឹងការរីកចម្រើននូវវិទ្យាសាស្ត្រ និងបច្ចេកវិទ្យានាពេលបច្ចុប្បន្ន។

លោកឧបនាយករដ្ឋមន្ត្រី ក៏បានស្នើរដល់ឯកអគ្គរាជទូតជប៉ុន ជួយសម្របសម្រួលដើម្បីទាក់ទាញអ្នកវិនិយោគជប៉ុនមកកាន់កម្ពុជាឱ្យបានកាន់តែច្រើន។

ហិរញ្ញប្បទានកិច្ចសហប្រតិបត្តិការអភិវឌ្ឍន៍ផ្លូវការ (Japan ODA) ពីប្រទេសជប៉ុន និងប្រជាជនជប៉ុនផ្តល់ដល់កម្ពុជា ចាប់ពីដំណើរការកសាងសន្តិភាព និងការបង្រួបបង្រួមជាតិនៅកម្ពុជារហូតមកដល់បច្ចុប្បន្ន មានចំនួនសរុបប្រមាណជាង៥០០០លានដុល្លារអាមេរិក ក្នុងនោះហិរញ្ញប្បទានឥតសំណងប្រមាណ៣៥០០ លានដុល្លារអាមេរិក៕

អត្រាអត់ការងារធ្វើនៅជប៉ុនកើនឡើង ប៉ុន្តែនៅតែប្រឈមនឹងកង្វះកម្លាំងពលកម្ម

ដោយ Donald Lee

ប្រទេសជប៉ុនៈ ក្រសួងកិច្ចការផ្ទៃកិច្ចការក្នុង និងគមនាគមន៍ជប៉ុនបានចេញផ្សាយទិន្នន័យថ្មី ដែលបង្ហាញពីការកើនឡើងនៃភាពអត់ការងារធ្វើ ខណៈប្រទេសនេះនៅតែប្រឈមនឹងកង្វះកម្លាំងពលកម្មធ្ងន់ធ្ងរ។

ចំនួនអ្នកអត់ការងារធ្វើបានកើនឡើងដល់១,៦៧លាននាក់ ក្នុងខែកញ្ញា កើនឡើង ៨,៤ ភាគរយ បើប្រៀបធៀបទៅនឹងខែសីហា។

អត្រាគ្មានការងារធ្វើបានឈានដល់២,៤ភាគរយ ដែលជាអត្រាទាបមើលមិនឃើញចាប់តាំងពីទសវត្សឆ្នាំ១៩៩០។

លើសពីនេះទៀត ប្រទេសនេះប្រឈមនឹងកង្វះកម្លាំងពលកម្មធ្ងន់ធ្ងរ ខណៈប្រជាជនជប៉ុនកាន់តែចាស់។

លោក Yusuke Shimoda សេដ្ឋវិទូជាន់ខ្ពស់ប្រចាំវិទ្យាស្ថានស្រាវជ្រាវជប៉ុន បានប្រាប់ទីភ្នាក់ងារព័ត៌មានរ៉យទ័រថា “បរិយាកាសការងារនៅតែល្អ ដោយសារតម្រូវការក្នុងស្រុករឹងមាំ ហើយក៏មានកង្វះកម្លាំងពលកម្មផងដែរ។

លោកបានបន្តថា “ប៉ុន្តែមានការព្រួយបារម្ភអំពីប្រាក់ចំណេញសាជីវកម្ម ដោយសារតែភាពតានតឹងផ្នែកពាណិជ្ជកម្មរវាងអាមេរិក និងចិន។ ដូច្នេះល្បឿននៃការធ្វើឱ្យប្រសើរឡើងនៅក្នុងទីផ្សារការងារអាចនឹងថយចុះ”៕