តើខេត្តរតនគិរីមានសក្តានុពលវិនិយោគលើវិស័យអ្វីខ្លះ?

August 31, 2019

ដោយ វុត្ថា

ភ្នំពេញ៖ ខេត្តរតនគិរី ស្ថិតនៅភាគឦសាន្ត នៃព្រះរាជាណាចក្រកម្ពុជា មានចម្ងាយពីរាជធានីភ្នំពេញ ៥៨៨គីឡូម៉ែត្រ ធ្វើដំណើរតាមផ្លូវជាតិលេខ៦A ផ្លូវជាតិលេខ៧ និងផ្លូវជាតិ៧៨ ដែលមានព្រំប្រទល់ខាងលិចទល់នឹងខេត្តស្ទឹងត្រែង ខាងកើតទល់នឹងខេត្តយ៉ាឡាយ និងខេត្តកន្ទូម នៃសាធារណរដ្ឋសង្គមនិយមវៀតណាម ខាងជើងទល់នឹងខេត្តអត្តពឺ នៃសាធារណរដ្ឋប្រជាធិបតេយ្យប្រជាមានិតឡាវ និងខាងត្បូងទល់នឹងខេត្តមណ្ឌលគិរី។

យោងតាមការចុះផ្សាយរបស់គេហទំព័រ រដ្ឋបាលខេត្តរតនគិរីបានឱ្យដឹងកន្លងមកនេះថា ភូមិសាស្ត្រ នៃខេត្តរតនគិរី ជាតំបន់ខ្ពង់រាបសម្បូរ ភ្នំ ជ្រោះជ្រលង ដងអូរ និងព្រៃឈើគ្រប់ប្រភេទ ហើយមានទន្លេឆ្លងកាត់ចំនួន ២ គឺទន្លេសេសាន និងទន្លេស្រែពក។

ជនជាតិដើមភាគតិចមានប្រមាណជាង ៦០% នៃប្រជាពលរដ្ឋទូទាំងខេត្ដមានជនជាតិដើមភាគតិច ចំនួន ៨អម្បូរ គឺ ទំពួន គ្រឹង ចារាយ ព្រៅ កាវែត ព្នង កាចក់ និងលន់។បច្ចុប្បន្នក្រុមហ៊ុនវិនិយោគដីសម្បទានសេដ្ឋកិច្ច នៅក្នុងខេត្តរតនគិរី សរុបចំនួន ២៦ក្រុមហ៊ុន (ក្រុមហ៊ុន ដែល បានចុះបញ្ជីដីរួច ចំនួន ១៦ក្រុមហ៊ុន មានផ្ទៃដីអាជីវកម្ម សរុប ១៤៨.៧៧៥,២៧ហ.ត និងកំពុងដំណើរការ ចុះបញ្ជីដី ចំនួន ១០ក្រុមហ៊ុន) លើផ្ទៃដីវិនិយោគ សរុប ១៥៥.២២២,២៧ហ.ត ដែលបានធ្វើការឈូសឆាយ រួចរាល់ ៥៨.២៤៨ហ.ត។

ជាមួយគ្នានេះ បានអនុវត្តការដាំដុះ សរុប ៤៩.៩៧១ហ.ត ក្នុងនោះរួមមាន៖ កៅស៊ូ ២៦.៦៧០ហ.ត ដូងប្រេង ១៧.៨៧៦ហ.ត ដំឡូងមី ១០០ហ.ត ស្វាយចន្ទី ១.៤០៦ហ.ត ឈើហូបផ្លែ ៨.០៥១ហ.ត និងដំណាំផ្សេងៗ ចំនួន ៤០០ហ.ត។

នៅក្នុងខេត្តរតនគិរី មានផ្ទៃដីដំាកៅស៊ូសរុបចំនួន ៦៧.៣០៣,៦៦ហ.ត(កំពុងធ្វើអាជីវកម្មចៀរជ័រ ចំនួន ៣០.៥៥១,៨៧ហ.ត) ក្នុងនោះមានកៅស៊ូកសិ-ឧស្សាហកម្ម និងគ្រួសារ ៣៧.៨០៨,៥៤ហ.ត និងក្រុមហ៊ុន ដីសម្បទានសេដ្ឋកិច្ច ២៩.៤៩៥,១២ហ.ត។

បរិមាណផលក្រែបជាមធ្យម ២២.៦១៨តោន/ឆ្នាំ។ រោងចក្រ កែច្នៃកៅស៊ូក្រែប ចំនួន ៧ទីតំាង(សមត្ថភាពផលិត ១តោន-២តោន/ម៉ោង) សិប្បកម្ម មានចំនួន ៩ទីតំាង (៤០តោន-១៥០តោន/ឆ្នាំ) និងឡសម្ងួត ១កន្លែង។

• ចម្ការចន្ទីសរុបចំនួន ៣៤.៧៣៨ហ.ត ដំាឆ្នំានេះកើនបានចំនួន ២.១៣០ហ.ត ផ្ទៃដីប្រមូលផលចន្ទី សរុប ២០.៩៨៦ហ.ត បរិមាណផល សរុប ១១.៣០៥,៥៤តោន ទិន្នផលមធ្យម ០,៥៣៩តោន/ហ.ត គឺទិន្នផល មានការកើនឡើងជាងឆ្នំា២០១៧ ប្រមាណ ២៩៧គីឡូក្រាម/ហ.ត។

• ដំណំាម្រេចសរុប ៩៩៦ហ.ត ផ្ទៃដីប្រមូលផល ៦១១ហ.ត ទិន្នផលមធ្យម ២,១១តោន/ហ.ត គិតជាបរិមាណផល ១.៨២៤,៨១តោន។ ការប្រមូលទិញតម្លៃមធ្យម ៩.០០០រៀល-១១.០០០រៀល/គ.ក្រ៕

កម្ពុជារំពឹងថា ទេសចរវៀតណាមបានមកទស្សនាកម្ពុជានឹងកើនជិតដល់ ១លាននាក់នៅឆ្នាំ២០១៩ នេះ

August 31, 2019

0

ដោយ វុត្ថា

ភ្នំពេញ៖ រដ្ឋមន្ត្រីក្រសួងទេសចរណ៍ លោក ថោង ខុន បានឱ្យដឹងថា នៅក្នុងរយៈពេល ៦ខែដើមឆ្នាំ២០១៩ នេះ ទេសចរវៀតណាមបានមកទស្សនាកម្ពុជាមានប្រមាណជាង ៤០ម៉ឺននាក់ និងរំពឹងថាទទួលបានប្រមាណ ៩០ម៉ឺននាក់នៅឆ្នាំ២០១៩ ទាំងមូល។

លោក រដ្ឋមន្ត្រីថោង ខុន បានថ្លែងនៅក្នុងពិធីខួបលើកទី៧៤ នៃទិវាឯករាជ្យជាតិនៃសាធារណរដ្ឋសង្គមនិយមវៀតណាម កាលថ្ងៃទី២៩ ខែសីហា ឆ្នាំ២០១៩ កន្លងមកនេះថា នៅឆ្នាំ២០១៨កន្លងទៅបានឱ្យដឹង វៀតណាមជាទីផ្សារទេសចរណ៍ធំទីពីររបស់កម្ពុជា ដោយក្នុងនោះ ទេសចរជនជាតិវៀតណាមបានមកទស្សនាកម្ពុជាមានចំនួនជាង ៨០ម៉ឺននាក់ ក្នុង ចំណោមទេសចរ ៦,២លាននាក់។

លោករដ្ឋមន្ត្រីបន្តថា វិស័យទេសចរណ៍កម្ពុជាបានបង្កើតប្រាក់ចំណូលចូលសេដ្ឋកិច្ចជាតិប្រមាណ ៤៣៧៥លានដុល្លារ ស្មើនឹង ១២,៧% នៃផលិតផលក្នុងស្រុកសរុប (GDP) និងបានបង្កើតការងារផ្ទាល់ជាង ៦២ម៉ឺននាក់ ស្មើនឹង ១៣% នៃការងារសរុប។

លោករដ្ឋមន្ត្រីបានគូសបញ្ជាក់អំពីការបន្តពង្រឹងកិច្ចសហប្រតិបត្តិការក្នុងក្របខណ្ឌទ្វេភាគី និងពហុភាគីដើម្បីប្រយោជន៍ប្រជាជននៃប្រទេសទាំងពីរ ក៏ដូចជា សន្តិភាព ស្ថិរភាព និងភាពរីកចម្រើនរបស់ពិភពលោក ហើយកម្ពុជានឹងធ្វើការសហការជាមួយប្រទេសអាស៊ានផ្សេងៗទៀត ដើម្បីសហការគាំទ្រកិច្ចប្រជុំអាស៊ាននានា ដឹកនាំដោយប្រទេសវៀតណាមនៅឆ្នាំ២០២០ ឲ្យទទួលបានជោគជ័យ។

លោក ហូ វណ្ឌី ទីប្រឹក្សាសមាគមទីភ្នាក់ទេសចរណ៍កម្ពុជា បានឱ្យដឹងដែរថា ក្នុងមួយរយៈចុងក្រោយនេះ ទេសចរណ៍មកលេងកម្ពុជាមានការធ្លាក់ចុះ ដោយសារកត្តាមួយចំនួន មិនថាទេសចរណ៍វៀតណាមនោះទេ តែបើរដ្ឋាភិបាលទាំងពីរមានចំណាត់ការការទូត និងពាណិជ្ជកម្មល្អប្រសើរ នឹងមានសន្ទុះឡើងដូចអ្វីដែលលោករដ្ឋមន្ត្រីបានរំពឹងទុកចំពោះទេសចរណ៍វៀតណាមទស្សនានៅម្ពុជា។

លោកបន្តថា បច្ចុប្បន្ននេះ កម្ពុជា វៀតណាម ឡាវ និងថៃ បានបង្កើតតំបន់មរកតមួយក្នុងការជម្រុញសេដ្ឋកិច្ចនៃប្រទេសទាំង៤ ក្នុងតំបន់នេះ និងការតភ្ជាប់ទេសចរណ៍ពីប្រទេសមួយទៅប្រទេសមួយទៀតដូចជាពីកម្ពុជាទៅវៀតណាម ពីវៀតណាមមកកម្ពុជាជាដើមដោយតភ្ជាប់ទាំងផ្លូវទឹក ផ្លូវគោក និងផ្លូវអាកាស តែយ៉ាងណាក៏ដោយលុះត្រាតែប្រទេសទាំងនេះ មានទាំងទំនាក់ការទូតល្អ ទើបជំរុញឱ្យមានកំណើនទេសចរណ៍មកពីប្រទសផ្សេងទៀតកើនឡើង ក្រៅតែទេសចរណ៍នៅក្នុងប្រទេសទាំងនេះ។

លោកបញ្ជាក់ទៀតថា ទេសចរណ៍ជាអ្នកនាំលាភ នាំនូវសំណាងដល់ប្រទេសដែលខ្លួនទៅទស្សនា ដោយក្នុងនោះពួកគេត្រូវការរបស់ ៣ ជាសំខាន់ គឺទី ១ ការធ្វើដំណើរដោយសុវត្ថិភាព ទី ២ ការទទួលអាហារមានអនាម័យ និង ទី ៣ ការស្នាក់នៅប្រកបដោយផាសុកភាព ដូច្នេះ អជ្ញាធរជំរុញកត្តាទាំង ៣ទៅមុខដោយរលូន ទើបវិស័យទេសចរណ៍ និងពាណិជ្ជកម្មមានការកើនឡើងព្រមគ្នា។

ទំហំពាណិជ្ជកម្ម រវាងប្រទេសទាំងពីរកម្ពុជា-វៀតណាមបានកើនឡើងរហូតដល់ ៤,៧ ប៊ីលានដុល្លារអាមេរិក នៅឆ្នាំ២០១៨ កន្លងទៅ និង ៦ខែដើមឆ្នាំ២០១៩ នេះ កើនឡើងរហូតដល់ ២,៧ ប៊ីលានដុល្លារអាមេរិក ហើយប្រទេសទាំងពីរមានសុទិដ្ឋិនិយមក្នុងការសម្រេចបានគោលដៅនៃទំហំពាណិជ្ជកម្មរបស់ប្រទេសទាំងពីរចំនួន ៥ប៊ីលានដុល្លារអាមេរិក នៅឆ្នាំ២០២០៕

ក្រុមហ៊ុនចិនចំនួន ១៣០ មកស្វែករកឱកាសវិនិយោគបន្ថែមនៅកម្ពុជា

August 31, 2019

0

ដោយ ៖ រ៉ាណេត

ភ្នំពេញ ៖ ទាំងវិស័យការទូតផ្នែកនយោបាយ និងវិស័យពាណិជ្ជកម្មទ្វេភាគីរវាងកម្ពុជា – ចិន កាន់តែមានភាពស្និទ្ធស្នាល និងស៊ីជម្រៅយ៉ាងខ្លាំង ជាក់ស្ដែងបន្ថែមពីលើក្រុមហ៊ុនចិនរាប់រយដែលកំពុងវិនិយោគនៅកម្ពុជាស្រាប់ ពេលនេះមានក្រុមហ៊ុនថ្មីៗចំនួន ១៣០ផ្សេងទៀតមកពីខេត្តក្វាងទុង បានមកធ្វើការសិក្សា និងស្វែករកឱកាសចូលមកបណ្តាក់វិនិយោគនៅកម្ពុជា។

តាមរយៈវេទិកាធុរកិច្ច កម្ពុជា -ចិន ដែលត្រូវបានរៀបចំឡើងកាលពីថ្ងៃទី៣០ ខែសីហា ឆ្នាំ២០១៩ ម្សិលមិញនេះ នៅសណ្ឋាគារ សុខាភ្នំពេញ គណៈប្រតិភូអ្នកវិនិយោគចិនជាង១០០នាក់ តំណាងឱ្យក្រុមហ៊ុនចំនួន១៣០ មកពីខេត្តក្វាងទុង ប្រទេសចិន បានបង្ហាញពីចេតនាចូលមកស្វែងរកក្រុមហ៊ុនក្នុងស្រុកធ្វើជាដៃគូវិនិយោគរួម។

រដ្ឋលេខាធិកាក្រសួងពាណិជ្ជកម្ម លោក សំ សិរីរតន៍ បានលើកឡើងនៅក្នុងពិធីជំនួបខាងលើនេះថា «គេថាស្តាប់ឮ ១០០ដង មិនស្មើនឹងបានឃើញ ១ដងឡើយ! » កម្ពុជា គឺជាកូនក្រមុំស្រស់ជាងគេនៅក្នុងតំបន់ មានសន្តិភាព សន្តិសុខ ស្ថិរភាពនយោបាយ ម៉ាក្រូសេដ្ឋកិច្ចមានការកើនឡើង ក្របខណ្ឌច្បាប់ល្អ និងស្ថាប័នប្រកបដោយប្រសិទ្ធភាព តម្លាភាព និងគណនេយ្យភាព។

នៅក្នុងឱកាសនេះ លោក សំ សិរីរតន៍ បានប្រកាសស្វាគមន៍ និងបានអំពាវនាវឱ្យធុរជន និងវិនិយោគិនចិន នៃខេត្តក្វាងទុង ចូលមកបណ្តាក់ទុនថែមទៀតនៅកម្ពុជា ដើម្បីធ្វើពិពិធកម្មឱកាសការងារជូនប្រជាពលរដ្ឋ និងចូលរួមអភិវឌ្ឍន៍កំណើនសេដ្ឋកិច្ចជាតិ ជាមួយរាជរដ្ឋាភិបាល ដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

បន្ថែមពីនេះ លោកក៏បានពន្យល់ពីលក្ខណៈពិសេស នៃគោលនយោបាយវិនិយោគរបស់កម្ពុជា ការលើកទឹកចិត្តផ្សេងៗរបស់រាជដ្ឋាភិបាលចំពោះវិនិយោគិនបរទេស ព្រមទាំងសភាពការវិវត្តន៍ថ្មីៗ ជាពិសេសការដាក់ចេញនូវកំណែទម្រង់ និងវិធានការមុតស្រួចរបស់ប្រមុខរាជរដ្ឋាភិបាល ដើម្បីលើកស្ទួយបរិយាកាសវិនិយោគ និងកិច្ចសម្រួលពាណិជ្ជកម្ម នៅក្នុងប្រទេសកម្ពុជា។

លោកបានបញ្ជាក់ថា “កម្ពុជា គឺជាប្រទេសបើកចំហរ សម្បូរទៅដោយកម្លាំងពលកម្មវ័យក្មេង និងមានការគាំពារវិនិយោគប្រសើរបំផុត! អ្នកវិនិយោគនឹងទទួលបានប្រាក់ចំណេញខ្ពស់ ជាពិសេសលើផ្នែកកសិកម្ម ឧស្សាហកម្ម បច្ចេកវិទ្យា និងសុខាភិបាល ព្រោះវិស័យទាំងអស់នេះ គឺជាកិច្ចការអាទិភាពរបស់រាជរដ្ឋាភិបាល” ។

វេទិកាធុរកិច្ចកម្ពុជា-ចិន ត្រូវបានរៀបចំឡើង ក្នុងគោលបំណងផ្សព្វផ្សាយអំពីសក្តានុពលវិនិយោគ និងកាលានុវត្តភាពធុរកិច្ច នៅក្នុងប្រទេសកម្ពុជា ដល់តំណាងក្រុមហ៊ុនចំនួន ១៣០ ដែលអញ្ជើញមកពីខេត្តក្វាងទុង នៃសាធារណរដ្ឋប្រជាមានិតចិន។

តាមរយៈវេទិកាដ៏សំខាន់នេះ គេរំពឹងថានឹងជួយជំរុញទំហំពាណិជ្ជកម្ម និងវិនិយោគកម្ពុជា-ចិន កើនឡើងថែមទៀត ខណៈដែលការដោះដូរពាណិជ្ជកម្មរវាងប្រទេសទាំងពីរ សម្រេចបានទឹកប្រាក់ ៦,៤៥៧លានដុល្លារអាមេរិក កាលពីឆ្នាំ២០១៨ គឺបានកើនឡើងជាង ១៥% បើធៀបនឹងឆ្នាំ២០១៧៕

ក្រុមហ៊ុនអាកាសចរណ៍ហុងកុងព្រមានបុគ្គលិកខ្លួនមិនឱ្យចូលរួមការតវ៉ា

August 31, 2019

0

ដោយ Donald Lee

ហុងកុងៈ ក្រុមហ៊ុនអាកាសចរណ៍ Cathay Pacific ដែលមានមូលដ្ឋាននៅហុងកុងបានផ្ញើអ៊ីមែល ទៅនិយោជិករបស់ខ្លួនដែលបានបញ្ជាក់ថា ប្រសិនបើពួកគេអវត្តមានពីការងារ ហើយចូលរួមបាតុកម្មគាំទ្រលទ្ធិប្រជាធិបតេយ្យ ពួកគេនឹងត្រូវបញ្ឈប់ជាបន្ទាន់។

កំណត់ហេតុបុគ្គលិកផ្ទៃក្នុង ត្រូវបានផ្ញើដោយលោក Tom Owen នាយកក្រុមហ៊ុន Cathay ហើយបានបញ្ជាក់ថា ប្រសិនបើនិយោជិកចូលរួមការតវ៉ា ពួកគេនឹងរំលោភកិច្ចសន្យាដែលបានចុះហត្ថលេខា។

លោក Owen បានឲ្យដឹងតាមអ៊ីមែលថា “យើងរំពឹងថានិយោជិករបស់យើងទាំងអស់ នឹងរាយការណ៍អំពីការងារដូចធម្មតា និងក្នុងរយៈពេលនេះ ហើយនឹងត្រូវតាមដានកម្រិតនៃការចូលធ្វើការងារឲ្យបានដិតដល់”។

លោក Owen មានប្រសាសន៍ថា “ក្រុមហ៊ុន Cathay Pacific Group មិនយល់ព្រមលើកូដកម្មនេះទេ ហើយការចូលរួមណាមួយក្នុងម៉ោងធ្វើការ នឹងត្រូវបានហាមឃាត់ ហើយនឹងជាការរំលោភកិច្ចសន្យាការងាររបស់អ្នក ជាមួយក្រុមហ៊ុន Cathay Pacific Group”។

ក្រុមអ្នកតវ៉ាគ្រោងនឹងធ្វើកូដកម្មទូទៅដ៏ធំមួយនៅថ្ងៃទី២ និង៣ ក្នុងខែធ្នូ ។

ការតវ៉ាគាំទ្រលទ្ធិប្រជាធិបតេយ្យ បានចាប់ផ្តើមនៅពេលរដ្ឋបាលហុងកុង ដែលគាំទ្រដោយចិន បានស្នើច្បាប់មួយដែលនឹងអនុញ្ញាត ឱ្យធ្វើបត្យាប័នប្រជាជនហុងកុងទៅកាន់តុលាការចិននៅលើដីគោក។

ប្រព័ន្ធផ្សព្វផ្សាយដែលគ្រប់គ្រងដោយរដ្ឋាភិបាលចិន បានពណ៌នាពីកន្លែងកើតហេតុនៅក្នុងទីក្រុងហុងកុងថាជា “តំបន់សង្គ្រាម” ហើយបាននិយាយសំដៅទៅក្រុមអ្នកតវ៉ាថាជា “ភេរវករ” ដែលធ្វើឱ្យអ្នកវិភាគមួយចំនួនជឿជាក់ថា ចិនកំពុងត្រៀមបញ្ជូនកងទ័ពដែលប្រមូលបាននៅតាមព្រំដែនហុងកុង៕

រដ្ឋាភិបាលគ្រោងនឹងចំណាយ ១៤,៤៨៧លានដុល្លារលើកម្មវិធីវិនិយោគសាធារណៈ ៣ឆ្នាំរំកិល

August 31, 2019

0

ដោយ ប៊ី

ភ្នំពេញៈ កម្ពុជាគ្រោងនឹងចំណាយ ១៤,៤៨៧លានដុល្លារ លើកម្មវិធីវិនិយោគសាធារណៈ៣ឆ្នាំ រំកិលចន្លោះឆ្នាំ២០២០-២០២២ ដើម្បីឲ្យបានស្របតាមស្ថានភាពជាក់ស្តែងនៃការប្រែប្រួលថ្លៃទំនិញ និងអតិផរណាហើយក៏ផ្អែកលើបរិមាណហិរញ្ញប្បទានសហប្រតិបត្តិការដែលដៃគូអភិវឌ្ឍធ្លាប់បានសន្យា។

គម្រោងចំណាយនេះ ត្រូវបានលើកឡើងក្នុងកិច្ចប្រជុំពេញអង្គគណៈរដ្ឋមន្រ្តី ក្រោមអធិបតីភាពដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានបន្តចាប់ផ្តើមពិភាក្សាលើសេចក្តីព្រាង “កម្មវិធីវិនិយោគសាធារណៈ៣ឆ្នាំរំកិល ២០២០-២០២២។ នេះបើយោងតាម លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី បានសរសេរលើបណ្តាញសង្គម Facebook នៅថ្ងៃនេះ។

លោកផៃ ស៊ីផានបានលើកឡើង ជាសរុបបរិមាណទុនតាមឆ្នាំរបស់កម្មវិធីវិនិយោគសាធារណៈ៣ឆ្នាំរំកិល ២០២០-២០២២ រួមមាន៖ ឆ្នាំ២០២០ ចំនួន៤៥៥៦លានដុល្លារអាមេរិក ឆ្នាំ២០២១ ចំនួន៥១០៤ ដុល្លារអាមេរិក និងឆ្នាំ២០២២ ចំនួន៤៨២៧ លានដុល្លារអាមេរិក។

លោក បានបន្តថា បរិមាណទុនសរុប១៤,៤៨៧ លានដុល្លារអាមេរិកនៃកម្មវិធីវិនិយោគសាធារណៈ ៣ឆ្នាំរំកិល ២០២០-២០២២ រួមបញ្ចូលនូវបរិមាទុនដែលបានសន្យាផ្តល់ដោយរាជរដ្ឋាភិបាលកម្ពុជា និងដៃគូអភិវឌ្ឍរួចហើយ មានចំនួន៨៥៩៧ លានដុល្លារអាមេរិក (ក្នុងនោះពីរាជរដ្ឋាភិបាលកម្ពុជា ចំនួន ៥២៩,៨ លានដុល្លារអាមេរិក និងពីដៃគូអភិវឌ្ឍន៍ចំនួន៨០៦៧,៥លានដុល្លារអាមេរិក) ដោយត្រូវការទុនបន្ថែមចំនួន៥ ៨៨៩.៧លានដុលា្លរអាមេរិក។

នៅក្នុងដំណើរការនៃការនៃការរៀបចំ កម្មវិធីវិនិយោគសាធារណៈ៣ឆ្នាំរំកិល ២០២០-២០២២ ក្រសួងផែនការ បានអនុវត្តទៅតាមជំហាននីមួយៗដូចធ្លាប់បានអនុវត្តកន្លងមកហើយ ជាពិសេសឆ្នាំនេះក្រសួងផែនការ បានបង្កលក្ខណៈកាន់តែងាយស្រួលជូនដល់ក្រសួង ស្ថាប័នក្នុងការបំពេញ ឬស្នើសុំគម្រោងតាមប្រព័ន្ធអនឡាញ ហើយសេចក្តីព្រាងនានេះត្រូវបានពិនិត្យពិភាក្សា និងកែសម្រួលតាមរយៈកិច្ចប្រជុំតាមស្ថាប័ន និងក្រសួងពាក់ព័ន្ឋ៕

ស្វែងយល់ពីចំណុចសំខាន់ៗនៃសេចក្តីព្រាង “ច្បាប់ស្តីពីសំណង់” ដែលអនុម័តនាពេលខាងមុខ

August 31, 2019

0

ដោយ វុត្ថា

ភ្នំពេញៈ គណៈរដ្ឋមន្ត្រីបានសម្រេចអនុម័តសម្រេច លើសេចក្តីព្រាង “ច្បាប់ស្តីពីសំណង់” ដោយមានការកែសម្រួលពាក្យពេចន៍មួយចំនួននៅក្នុងមាត្រា៣ ក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

សេចក្ដីព្រាងច្បាប់ស្ដីពីសំណង់នេះ ត្រូវបានតាក់តែងឡើងជាលើកដំបូងនៅឆ្នាំ២០១៧ ដោយមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ និងមានការចូលរួមផ្ដល់មតិយោបល់ និងធាតុចូលពីអ្នកជំនាញនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន។

សេចក្ដីព្រាងច្បាប់នេះ ត្រូវបានបញ្ជូនមកទីស្ដីការគណៈរដ្ឋមន្ត្រីនៅថ្ងៃទី១៦ ខែកក្កដា ឆ្នាំ២០១៩ និងបានដាក់ឆ្លងកិច្ចប្រជុំបច្ចេកទេស ជាមួយក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច និងវប្បធម៌ នៃទីស្ដីការគណៈរដ្ឋមន្ត្រីនៅថ្ងៃទី២៣ ទី២៤ និងទី២៥ ខែកក្កដា ឆ្នាំ២០១៩ និងកិច្ចប្រជុំអន្តរក្រសួងនៅថ្ងៃទី៦ និងទី៧ ខែសីហា ឆ្នាំ២០១៩។

ក្រសួងយុត្តិធម៌បានជួយពិនិត្យកែសម្រួល លើបណ្ដាមាត្រាមួយចំនួន ក្នុងជំពូកពាក់ព័ន្ធនឹងនីតិវិធី និងទោសប្បញ្ញត្តិ ដើម្បីធានាឱ្យមានសង្គតិភាពជាមួយច្បាប់ជាធរមានដទៃទៀតនៃព្រះរាជាណាចក្រកម្ពុជា។ សេចក្ដីព្រាងច្បាប់នេះ ក៏ត្រូវបានដាក់ឆ្លងការពិភាក្សាជាមួយឧត្តមក្រុមប្រឹក្សាពិគ្រោះ និងផ្ដល់យោបល់កាលពីថ្ងៃទី១៣ ខែសីហា ឆ្នាំ២០១៩ ផងដែរ។

សេចក្ដីព្រាងច្បាប់ស្ដីពីសំណង់ មានគោលបំណង និងសារប្រយោជន៍ដូចជា៖

១) ពង្រឹងការគ្រប់គ្រងគ្រប់ភាគីពាក់ព័ន្ធ និងការប្រតិបត្តិការងារទាំងឡាយក្នុងវិស័យសំណង់ ដើម្បីធានាសន្តិសុខ សុវត្ថិភាព និងសណ្ដាប់ធ្នាប់សាធារណៈ ការពារផលប្រយោជន៍ម្ចាស់សំណង់ អ្នកប្រើប្រាស់ និងសាធារណជន។-

២) ចូលរួមពង្រឹងការគ្រប់គ្រងនគរូបនីយកម្ម ដោយអភិវឌ្ឍទីក្រុងឱ្យមានសោភណភាព និងបរិស្ថានល្អសម្រាប់ការរស់នៅប្រកបដោយចីរភាព សំដៅលើកកម្ពស់សុខមាលភាពសាធារណៈ។

៣) បង្កើនគណនេយ្យភាព និងប្រសិទ្ធភាពក្នុងការប្រកបការងារ និងការប្រកបវិជ្ជាជីវៈក្នុងវិស័យសំណង់។

៤) បង្កើនការជឿទុកចិត្តរបស់វិនិយោគិននៅក្នុងវិស័យសំណង់ ជំរុញទីផ្សារអចលនទ្រព្យប្រកបដោយប្រសិទ្ធភាពសេដ្ឋកិច្ចសង្គម៕

របាយការណ៍៖ គម្រោងអគារខ្ពស់ៗជាង ២០០កំពុងដំណើរការសាងសង់នៅទូទាំងប្រទេស

August 31, 2019

0

ដោយៈ រ៉ាណេត

ភ្នំពេញៈ ជាមួយនឹងកំណើនក្នុងវិស័យសំណង់នៅកម្ពុជា ដែលគិតត្រឹមខែកក្កដា ឆ្នាំ២០១៩ មានទំហំទុនវិនិយោគរហូតដល់ជាង១២០០លានដុល្លារនោះ ងាកមកចាប់អារម្មណ៍ជាមួយ នឹងគម្រោងសំណង់អគារខ្ពស់ៗ មានកម្ពស់ចាប់ពី១០ជាន់ឡើងទៅ ដែលកំពុងតែដំណើរការសាងសង់ នាពេលបច្ចុប្បន្ននេះមានរហូតដល់២២០គម្រោង។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រី អាន សុធីតា បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី៣០ ខែសីហាកន្លងមកបានឱ្យដឹងថា គិតមកត្រឹមខែកក្កដា ឆ្នាំ២០១៩ កន្លងទៅនេះ ចំនួនអគារដែលមានកម្ពស់ខ្ពស់ចាប់ពី១០ជាន់ឡើងទៅ និងកំពុងតែមានសកម្មភាពសាងសង់ នៅទូទាំងប្រទេសមានចំនួន២២០គម្រោង អគារជាង៦០ទៀតត្រូវបានបញ្ចប់ការសាងសង់ទាំងស្រុង។

លោកស្រីបានបន្តទៀតថា “នៅក្នុងចំណោមគម្រោងអគារទាំង២២០ ដែលកំពុងតែបន្តសកម្មភាពសាងសង់នាពេលបច្ចុប្បន្ន មានប្រមាណ៨០ភាគរយជាប្រភេទអគារលំនៅដ្ឋានសហកម្មសិទ្ធិ ហើយក្រៅពីនោះជាប្រភេទអគារពាណិជ្ជកម្មចម្រុះ និងអគារការិយាល័យ”។

លោកស្រីសុធីតាបានបន្តទៀតថា កំនើននៃចំនួនអគារខ្ពស់ទាំងអស់នេះ ដោយសារតែទីក្រុងត្រូវបានពង្រីក ហើយប្រជាពលរដ្ឋមានតម្រូវការខ្ពស់ផ្នែកលំនៅដ្ឋាន ដោយជម្រើសនៃលំនៅដ្ឋានមាន២ប្រភេទ អាចជាការផ្លាស់ប្ដូរទៅកាន់តំបន់ជាយក្រុង ឬរស់នៅក្នុងក្រុងដែលជាអគារទំនើប និងខ្ពស់ៗ ដែលអាស្រ័យទៅតាមលទ្ធភាពជាក់ស្ដែងរបស់ពួកគាត់។

លោកស្រីបានបន្តថា “អ្នកខ្លះដែលបម្រើលការងារក្រុមហ៊ុន ឬអង្គការនានា ក៏ដូចជាអ្នកជំនួញ ដែលមានទីតាំងនៅក្នុងក្រុង បានជ្រើសយកការស្នាក់នៅក្នុងអគារខ្ពស់ៗដូចជាអាផាតមិន ឬខុនដូជាដើមធ្វើជាលំនៅដ្ឋានទី២របស់ខ្លួន (អ្នកមានលំនៅដ្ឋាន និងគ្រួសារនៅជាយក្រុង) ដោយសារតែពិបាកក្នុងការធ្វើដំណើរ កកស្ទះចរាចរណ៍ជាដើម។

នាយិកាប្រចាំប្រទេសរូបនេះបានបន្តទៀតថា “តាមការមើលឃើញរបស់ខ្ញុំ អគារដែលកំពុងតែសាងសង់សព្វថ្ងៃនេះ ភាគច្រើនត្រូវបានបំលែងចេញពីសំណង់អគារចាស់ៗដែលមានទីតាំងសមស្រប នឹងសំណង់អគារស្រាប់ដែលស្ថិតនៅក្នុងក្រុង ហើយមានចំនួនតូចតែប៉ុណ្ណោះ ដែលត្រូវបានសាងសង់នៅលើដីដែលជាទីតាំងអភិវឌ្ឍថ្មី”។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក ច្រឹក សុខនីម បានមានប្រសាសន៍បង្ហាញ ពីភាពសុទិដ្ឋិនិយមនៅក្នុងវិស័យសំណង់នេះថា លោកសាទរទៅនឹងកំណើន និងការអភិវឌ្ឍវិស័យមួយនេះ ហើយវានៅតែបន្តរីកចម្រើនបន្ថែមទៀត ខណៈដែលកម្ពុជា គឺជាចំណុចគោលដៅនៃការវិនិយោគ ពីសំណាក់ក្រុមហ៊ុនអន្តរជាតិលើគ្រប់វិស័យ ជាពិសេសវិស័យអចលនទ្រព្យ។

លោកបន្តថា “ភាពរីកចម្រើនលើវិស័យសំណង់នៅកម្ពុជា ត្រូវបានបណ្តាប្រទេសមួយចំនួនលើកយកទៅធ្វើបទបង្ហាញ និងកោតសរសើរនៅក្នុងកិច្ចប្រជុំរួមស្ដីពីទីផ្សារអចលនទ្រព្យសាកល”។ លោកបានបន្តទៀតថា “ភាពរីកចម្រើនទាំងនេះនឹងនៅតែបន្តទៅមុខទៀត ដោយនៅមិនទាន់ឃើញមានសញ្ញាណាមួយ ដែលបង្ហាញពីឱនភាពនៅឡើយនោះទេ។

លោកសុខនីមបានបន្ថែមថា មិនថាឆ្នាំនេះ ឬឆ្នាំក្រោយបន្តទៀតនោះទេ វិស័យសំណង់នៅកម្ពុជា នៅតែរឹងមាំល្អ ព្រោះមុនពេលចាប់ផ្តើមគម្រោងសាងសង់អ្នកវិនិយោគគេបានសិក្សាយ៉ាងលម្អិត ពីស្ថានការណ៍នៃការវិនិយោគ ទាំងវិស័យសេដ្ឋកិច្ច ទាំងសន្តិសុខសង្គម ទាំងបរិបថនយោបាយក្នុងប្រទេស ដោយពួកគេមិនយកទុនរាប់សិបលានដុល្លារមកធ្វើការវិនិយោគទាំងភាពប្រថុយប្រថាននោះទេ”។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា នៅក្នុងរយៈពេល៧ខែឆ្នាំ២០១៩ កន្លងទៅនេះ វិស័យសំណង់នៅកម្ពុជាមានគម្រោងតូច-ធំសរុបចំនួន៥២៥គម្រោង ដែលគិតជាទឹកប្រាក់មានទុនវិនិយោគចំនួន ជាង១១៧៣លានដុល្លារ កើនឡើង៣៩ភាគរយធៀបរយៈពេលដូចគ្នា កាលពីឆ្នាំមុន ដែលវិស័យសំណង់ មានគម្រោងត្រឹមតែ៣៣០គម្រោងប៉ុណ្ណោះ ដែលមានតម្លៃប៉ាន់ស្មានទុនវិនិយោគសរុបប្រមាណជាង៨៤៣លានដុល្លារ៕

ការវិនិយោគអចលនទ្រព្យចិននៅបរទេសធ្លាក់ចុះនៅឆ្នាំនេះ ដោយសារសង្គ្រាមពាណិជ្ជកម្ម និងការគ្រប់គ្រងមូលធន

August 30, 2019

0

ដោយ Donald lee

ភ្នំពេញ៖ ការវិនិយោគលើអចលនទ្រព្យនៅបរទេសដោយជនជាតិចិនដីគោកបានធ្លាក់ចុះមិនធ្លាប់មានក្នុងឆមាសទីមួយឆ្នាំ ២០១៩ បើគិតចាប់តាំងពី ៧ឆ្នាំមុន។ នេះបើយោងតាមរបាយការណ៍ថ្មីរបស់ក្រុមហ៊ុនស្រាវជ្រាវ Cushman & Wakefield ។

របាយការណ៍បានរកឃើញថា ការវិនិយោគអចលនទ្រព្យចិននៅបរទេសបានធ្លាក់ចុះ ៦៦ ភាគរយនៅឆមាសទីមួយនៃឆ្នាំនេះ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

ក្រុមអ្នកវិភាគជឿជាក់ថា សង្គ្រាមពាណិជ្ជកម្មរវាងអាមេរិក និងចិនដែលកំពុងកើតឡើង និងចិនផ្តោតលើការគ្រប់គ្រងមូលធន ពិសេសគឺរារាំងអ្នកវិនិយោគពីការវិនិយោគនៅក្រៅប្រទេស។

របាយការណ៍បានបញ្ជាក់ថា “ការធ្លាក់ចុះនេះគឺដោយសារតែគោលនយោបាយវិនិយោគក្រៅប្រទេសដែលកំពុងមានភាពតានតឹង និងរឹតបន្តឹងកម្ចីអចលនទ្រព្យនៅចិន រួមជាមួយភាពមិនប្រាកដប្រជានៃសេដ្ឋកិច្ចសកលដែលបានកើតឡើង”។

របាយការណ៍ថ្មីៗនេះរបស់ Bloomberg បានប៉ាន់ស្មានថា សេដ្ឋកិច្ចពិភពលោកនឹងខាតបង់ទឹកប្រាក់ជិត ៥៨៥ ពាន់លានដុល្លារក្នុងឆ្នាំ ២០២១ ដោយសារបញ្ហាសង្គ្រាមពាណិជ្ជកម្មដែលកំពុងកើតមាន។

ទោះយ៉ាងណារបាយការណ៍បានបង្ហាញពីការកើនឡើងនៃការវិនិយោគក្រៅប្រទេសពីអ្នកវិនិយោគហុងកុងនៅពេលដែលលទ្ធិប្រជាធិបតេយ្យដែលបានគាំទ្រអស់រយៈពេលជាច្រើនខែ និងនៅតែបន្តរញ្ជួយមជ្ឈមណ្ឌលហិរញ្ញវត្ថុនៅអាស៊ីនេះ។

វិនិយោគិនហុងកុងបានបោះលុយចូលក្នុងវិស័យអចលនទ្រព្យរបស់ប្រទេសសឹង្ហបូរី ខណៈប្រទេសនេះកំពុងតែធ្លាក់ចូលក្នុងវិបត្តិនៅឆ្នាំនេះ។

របាយការណ៍បានរកឃើញថា វិនិយោគិនហុងកុងបានដាក់ប្រាក់ចំនួន ១,៤ ពាន់លានដុល្លារដល់អចលនទ្រព្យសឹង្ហបូរីនៅឆមាសទីមួយនៃឆ្នាំ ២០១៩ ។

របាយការណ៍របស់ក្រុមហ៊ុន Cushman បាននិយាយថា “ប្រទេសសឹង្ហបូរីអាចត្រូវបានគេមើលឃើញថាកាន់តែមានសុវត្ថិភាព បើប្រៀបធៀបទៅនឹងបញ្ហាដែលប្រទេសដទៃទៀតកំពុងប្រឈម”៕

កម្ពុជា-ចិនដាក់ចេញយុទ្ធសាស្ត្រថ្មីក្នុងវិស័យពន្ធដើម្បីទាក់ទាញការវិនិយោគពីប្រទេសចិនកាន់តែច្រើន

August 30, 2019

0

ដោយ វុត្ថា

ភ្នំពេញ៖ ប្រទេសកម្ពុជា និងចិនបានបើកវេទិការ ស្តីពីយន្តការនៃកិច្ចសហប្រតិបត្តិការផ្នែកសារពើពន្ធដើម្បីបង្ហាញកិច្ច សហប្រតិបត្តិការល្អ និងផ្តល់ទំនុកចិត្តដល់អ្នកវិនិយោគទុនចិនឲ្យមកវិនិយោគនៅកម្ពុជាកាន់តែច្រើន។

លោក គង់ វិបុល ប្រតិភូរាជរដ្ឋាភិបាល ទទួលបន្ទុក ជាអគ្គនាយក នៃអគ្គនាយកដ្ឋានពន្ធដា ក្រសួងសេដ្ឋកិច្ច និងហិរញ្ញវត្ថុកម្ពុជាថ្លែងក្នុងវេទិការ ស្តីពីយន្តការ នៃកិច្ចសហប្រតិបត្តិការផ្នែកសារពើពន្ធរវាងកម្ពុជា និងចិននៅថ្ងៃទី ៣០ ខែសីហា ឆ្នាំ ២០១៩នេះថា វេទិការនេះមាន សារៈសំខាន់ណាស់ដើម្បីឲ្យអ្នកវិនិយោគទុនចិនស្វែងយល់ពីកិច្ចសហប្រតិបត្តការ នៃប្រទេសទាំងពីរ លើវិស័យ សេដ្ឋកិច្ច និងសារពើពន្ធនេះ។

លោកបន្តថា វេទិកានេះ ក៏បានបង្ហាញពីច្បាប់បទដ្ឋានរបស់កម្ពុជាពាក់ព័ន្ធលើការយកពន្ធត្រួតគ្នា ជាប្រយោជន៍មិន អោយអ្នកវិនិ យោគខាតបង់ច្រើន ជាពិសេសចង់បង្ហាញពី យន្តការថ្មីៗក្នុងសម័យ បច្ចេកវិទ្យាក្នុងការចុះបញ្ជីក្រុមហ៊ុន ចំណេញ ពេលវេលា និងកាត់បន្ថយមិនអោយមានអំពើពុករលួយ។

លោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជាបានស្វាគមន៍ចំពោះវេទិកា ស្តីពីយន្តការនៃកិច្ចសហប្រតិបត្តិការ ផ្នែកសារពើពន្ធរវាងព្រះរាជាណាចក្រកម្ពុជា និង សាធារណរដ្ឋប្រជាមានិតចិននេះ ដោយបានចាត់ទុកថានេះ គឺជាកិច្ចសហប្រតិបត្តិល្អ រវាងប្រទេសកម្ពុជា និងចិនឲ្យកាន់តែល្អប្រសើរលើគ្រប់វិស័យ ជាពិសេសវិស័យសេដ្ឋកិច្ច និងពាណិជ្ជកម្ម ។

កម្ពុជា-ចិនបានកាលពីកន្លងមកនេះ បានកំណត់ផែនការវិនិយោគថ្មីថា នឹងជំរុញទំហំពាណិជ្ជកម្មទ្វេភាគីរវាងប្រទេសទាំងពីរឲ្យបានដល់១០ពាន់លានដុល្លារអាមេរិក នៅឆ្នាំ២០២៣។ កាលពីឆ្នាំ២០១៨ ទំហំពាណិជ្ជកម្មទ្វេភាគីរវាងកម្ពុជានិងចិនបានឈានដល់កម្រិតមួយលើសពីការរំពឹងទុក ពោលគឺមាន រហូតដល់ជាង៦ពាន់លានដុល្លារអាមេរិក។

ប្រទេសចិនឈរនៅលំដាប់លេខរៀងទី១ នៃការវិនិយោគនៅក្នុងប្រទេសកម្ពុជាលើវិស័យជាច្រើនរាប់ចាប់ពីវិស័យសំណង់ឡើងទៅក្នុងចំណោមប្រទេសជាច្រើនផ្សេងទៀងមកពីតំបន់អាស៊ី និងអឺរ៉ុប៕

រដ្ឋាភិបាលស្នើដល់ប្រតិភូចិនខេត្តស៊ីឈួន បង្កើនការវិនិយោគមកកាន់កម្ពុជា

August 30, 2019

0

ដោយ ៖ រ៉ាណេត

ភ្នំពេញ ៖ តំណាងរដ្ឋាភិបាលកម្ពុជា មន្ត្រីជាន់ខ្ពស់ក្រសួងពាណិជ្ជកម្ម បានជំរុញ និងលើកទឹកចិត្តដល់គណប្រតិភូចិនមកពីខេត្តស៊ីឈួន ដឹកនាំបណ្តាអ្នកវិនិយោគ និងក្រុមហ៊ុនចិន ចូលមកវិនិយោគបន្ថែមនៅកម្ពុជា ជាមួយនឹងការបង្ហាញពីឱកាស និងសក្ដានុពលនៃការវិនិយោគ។

អនុរដ្ឋលេខាធិការក្រសួងពាណិជ្ជកម្ម លោក ពេជ ឬទ្ធី បានមានប្រសាសន៍នៅក្នុងឱកាសជំនួបពិភាក្សាជាមួយគណៈប្រតិភូចិន ដែលដឹកនាំដោយលោក ជាង ស៊ាតុង អភិបាលរងទីក្រុងណៃជាំង ខេត្តស៊ីឈួន កាលពីថ្ងៃទី២៩ ខែសីហា ឆ្នាំ២០១៩ ម្សិលមិញនេះថា កម្ពុជាមានសក្តានុពល និងកាលានុវត្តភាពធុរកិច្ចច្រើន ដែលអាស្រ័យផល និងឱកាសល្អក្នុងការវិនិយោគ ធ្វើពាណិជ្ជកម្មជាដៃគូ។

លោកបានបន្តថា “កម្ពុជាមានវឌ្ឍនភាពនៃកំណើនសេដ្ឋកិច្ច និងស្ថិរភាពនយោបាយ ហើយទំហំពាណិជ្ជកម្មរវាងកម្ពុជា និងអន្តរជាតិកាន់តែមានការអភិវឌ្ឍរីកចម្រើនជាលំដាប់”។

លោកបានបន្តទៀតថា រដ្ឋាភិបាលកម្ពុជា ខិតខំប្រឹងប្រែងក្នុងការអភិវឌ្ឍវិស័យពាណិជ្ជកម្ម និងជំរុញការនាំចេញផលិតផល ទៅកាន់ទីផ្សារក្នុងតំបន់ និងពិភពលោក ឱ្យបានអតិបរិមា សំដៅធ្វើពិពិកម្មកំណើនសេដ្ឋកិច្ចជាតិ និងកាត់បន្ថយភាពក្រីក្រ”។

លោក ពេជ ឫទ្ធី ក៏បានលើកឡើងពីសមិទ្ធផល និងការយកចិត្តទុកដាក់របស់ក្រសួងពាណិជ្ជកម្មទៅលើបណ្តាក្រុមហ៊ុន និងធុរជននានាដែលចូលមកធ្វើវិនិយោគនៅកម្ពុជា ដើម្បីធ្វើយ៉ាងណាបង្កភាពងាយស្រួលដល់វិស័យពាណិជ្ជកម្ម និងប្រកបដោយស្ថិរភាព មានសុវត្ថិភាពខ្ពស់ ។

តំណាងប្រតិភូចិន លោក ជាង ស៊ាតុង បានថ្លែងអំណរគុណ និងរីករាយក្នុងការទទួលបានព័ត៌មានលម្អិតពីការវិនិយោគ ក៏ដូចជាសមិទ្ធផលសំខាន់ៗរបស់រដ្ឋាភិបាលកម្ពុជា។

ជាការឆ្លើយតប លោកក៏បានបង្ហាញពីការគាំទ្រនូវគោលបំណងរបស់រដ្ឋាភិបាលកម្ពុជា ជាពិសេសការលើកកម្ពស់បរិយាសធុរកិច្ច វិនិយោគ និងកិច្ចសម្រួលពាណិជ្ជកម្ម ដើម្បីគាំទ្រដល់កិច្ចសហប្រតិបត្តិការដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន។

ជាមួយគ្នានេះ លោកក៏បានសន្យាជួយផ្សព្វផ្សាយសក្តានុពល និងកាលានុវត្តភាពធុរកិច្ចរបស់កម្ពុជា ទៅកាន់សមាគមធុរជន និងវិនិយោគិន នៅក្នុងខេត្តស៊ីឈួន ដើម្បីទាក់ទាញការបណ្តាក់ទុនថែមទៀតពីប្រទេសចិន មកកាន់ប្រទេសកម្ពុជា ស្របតាមគំនិតផ្តួចផ្តើមយុទ្ធសាស្ត្រផ្លូវមួយ ខ្សែក្រវ៉ាត់មួយ របស់លោកប្រធានាធិបតីចិន ស៊ី ជិនពីង ៕