សណ្ឋាគារលំដាប់ផ្កាយ៥ ចំនួន២ បន្ថែមទៀត ត្រៀមសាងសង់ក្នុងក្រុងព្រះសីហនុ

August 30, 2019

ដោយៈ រ៉ាណេត

ភ្នំពេញៈ ជាមួយនឹងភាពល្អប្រសើរនៃវិស័យទេសចរណ៍ និងពាណិជ្ជកម្ម ក្រុងព្រះសីហនុ បានកែប្រែមុខមាត់យ៉ាងឆាប់រហ័ស ទៅលើហេដ្ឋារចនាសម្ព័ន្ធនានា ជាពិសេសសំណង់អគារខ្ពស់ៗយ៉ាងស្អេកស្កះ។ បន្ថែមពីនេះ វិស័យបដិសណ្ឋារកិច្ចក៏មានភាពរីកចម្រើនផងដែរ ជាមួយនឹងវត្តមានសណ្ឋាគារទំនើបៗលំដាប់ផ្កាយ ដើម្បីឆ្លើយតបទៅនឹងតម្រូវការរបស់ភ្ញៀវទេសចរ។

នៅត្រឹមរយៈពេល៧ខែដើមឆ្នាំ២០១៩កន្លងនេះ កំណើនភ្ញៀវទេសចរអន្តរជាតិដែលចូលមកកម្សាន្ត នៅតាមតំបន់លំហែរកាយនានានៅក្នុងក្រុងព្រះសីហនុ ជាពិសេស ទេសចរចិននៅតែបន្តកើនឡើង ខណៈដែលភ្ញៀវទេសចរក្នុងស្រុកមានការធ្លាក់ចុះបន្តិចបើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

ជាមួយនឹងភាពល្អប្រសើរនេះ វិស័យសណ្ឋាគារក៏មានការកើនឡើងផងដែរ ដែលរហូតមកដល់ពេលនេះមានប្រមាណជិត១០០កន្លែងសម្រាប់ផ្គត់ផ្គង់ទៅនឹងតម្រូវការស្នាក់នៅ។ ជាក់ស្ដែងនៅត្រឹមចុងខែសីហា ឆ្នាំ២០១៩នេះ សណ្ឋាគារដ៏ទំនើបលំដាប់ផ្កាយ៥ ចំនួន២បន្ថែមទៀត នឹងចូលបង្ហាញរូបរាងនៅក្នុងវិស័យមួយនេះ។

គម្រោងសណ្ឋាគារលំដាប់ផ្កាយ៥ចំនួន២ ដែលនឹងត្រៀមខ្លួនមកបំពេញតម្រូវការស្នាក់នៅរបស់បណ្តាភ្ញៀវទេសចរមានដូចជា គម្រោងទី១ត្រូវបានអភិវឌ្ឍដោយក្រុមហ៊ុន HAI GANG GRAND HOTEL CO., LTD ដែលមានចំនួន៥០០បន្ទប់ ក្នុងទំហំទឹកប្រាក់វិនិយោគចំនួន១៥៣លានដុល្លារ និងផ្តល់ការងារចំនួន៩៨១កន្លែង ស្ថិតនៅភូមិ៦ សង្កាត់លេខ៤ ក្រុងព្រះសីហនុ។ ទី២ គំរោងអភិវឌ្ឍន៍ដោយក្រុមហ៊ុន XIGANG V-CONTINENT INTERNATIONAL INVESTMENT CO., LTDមានបន្ទប់ចំនួន ១១១១ ក្នុងទំហំទឹកប្រាក់វិនិយោគ ចំនួន២២៦លានដុល្លារ ផ្តល់ការងារចំនួន ១៦៦៨ កន្លែង មានទីតាំងស្ថិននៅភូមិ១ សង្កាត់លេខ៣ ក្រុងព្រះសីហនុ។

ប្រធានមន្ទីរទេសចរខេត្តព្រះសីហនុ លោក តាំង សុចិត្រគ្រឹះស្នា បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣០ ខែសីហានេះថា បច្ចុប្បន្ននេះ សណ្ឋាគារគ្រប់កម្រិតនៅក្នុងខេត្តព្រះសីហនុមានចំនួន៩៣ ស្មើនឹងប្រមាណ៧០០០បន្ទប់ ដែលកំពុងតែបម្រើសេវាកម្ម។ លោកបានបន្តទៀតថា សព្វថ្ងៃនេះចំនួនផ្ទះសំណាក់ជាច្រើន ត្រូវបានបាត់បង់ ប៉ុន្តែមានកំណើនផ្នែកសណ្ឋាគារ ដែលភាគច្រើនវិនិយោគដោយជនជាតិចិន”។

លោកបានបន្តទៀតថា “តាមជាក់ស្តែងសម្រាប់ភ្ញៀវទេសចរក្នុងស្រុក ដែលចូលមកកម្សាន្តនៅតាមតំបន់លំហែរនានា ក្នុងខេត្តព្រះសីហនុគឺមានការធ្លាក់ចុះ ប៉ុន្តែចំពោះភ្ញៀវបរទេសគឺមានការកើនឡើងប្រមាណ៣៥ភាគរយ”។

ជាមួយគ្នានេះ លោក តាំង សុចិត្រគ្រឹះស្នា ក៏បានបង្ហាញពីក្ដីសាទរចំពោះវត្តមានសណ្ឋាគារលំដាប់ផ្កាយ៥ទាំង២ខាងលើនេះ ដែលកាន់តែជួយបង្ហាញពីភាពវិជ្ជមាននៃវិស័យទេសចរណ៍នៅក្នុងខេត្តព្រះសីហនុទាំងមូល៕

រដ្ឋាភិបាលកំពុងដាក់ចេញផែនការភស្តុភារកម្មដើម្បីរក្សាកំណើនសេដ្ឋកិច្ចជាតិ

August 30, 2019

0

ដោយ វុត្ថា

ភ្នំពេញៈ រដ្ឋាភបាលតាមរយៈក្រសួងសាធារណៈការ និងដឹកជញ្ជូន បាននឹងកំពុងរៀបចំផែនការមេជាតិភស្តុភារកម្ម ដើម្បីរួមចំណែកយ៉ាងសកម្មក្នុងការអភិវឌ្ឍ និងរក្សាកំណើនសេដ្ឋកិច្ចជាតិប្រចាំឆ្នាំប្រកបដោយស្ថិរភាព និងមានទំនុកចិត្តខ្ពស់។

ផែនការមេជាតិភស្តុរកម្មនេះ ក៏បានឆ្លើយតបទៅនឹងចក្ខុវិស័យរបស់រាជរដ្ឋាភិបាលក្នុងការអភិវឌ្ឍប្រទេស ឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងមានចំណូលខ្ពស់នៅឆ្នាំ២០៥០ តាមរយៈការអភិវឌ្ឍនិងធ្វើទំនើបកម្ម ហេដ្ឋារចនាសម្ព័ន្ធ ផ្លូវថ្នល់ ផ្លូវដែក ផ្លូវទឹក ស្ពាន និងកំពង់ផែ ជាដើម ឱ្យមានលក្ខណៈប្រទាក់ក្រឡាគ្នា នៅគ្រប់ច្រកល្ហក សំដៅឱ្យសង្វាក់នៃការដឹកជញ្ជូនប្រព្រឹត្តទៅដោយរលូន។

យោងតាមកិច្ចប្រជុំរបស់គណៈកម្មាធិការជាតិភស្តុភារកម្ម (គ.ជ.ភ) កាលពីថ្ងៃទី ២៩ ម្សិលមិញនេះ បានពិភាក្សាផ្តោតជាសំខាន់លើការប្រមូលធាតុចូលបន្ថែម ក៏ដូចជាកែសម្រួលពាក្យពេចន៍ ឃ្លាឃ្លោង ខ្លឹមសារនូវរាល់ចំណុចខ្វះខាត ដើម្បីធានាឱ្យផែនការមេជាតិភស្តុភារកម្មមានលក្ខណៈគ្រប់ជ្រុងជ្រោយ ស្របតាមគោលនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល មុននឹងដាក់ជូនទៅប្រធានក្រុមប្រឹក្សាជាតិភស្ដុភារកម្មពិនិត្យនៅមុនដំណាច់ឆ្នាំ២០១៩នេះ។

លោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនបានមានប្រសាសន៍ អរគុណដល់ភាគីពាក់ព័ន្ធទាំងអស់ ដែលរួមចំណែកយ៉ាងផុលផុសក្នុងការផ្ដល់ធាតុចូលដ៏មានសារសំខាន់ ដើម្បីធានាឱ្យផែនការមេជាតិភស្តុភារកម្មមានលក្ខណៈគ្រប់ជ្រុងជ្រោយ និងអាចប្រកួតប្រជែងជាមួយបណ្តាប្រទេសក្នុងតំបន់ លើថ្លៃសេវានៃការដឹកជញ្ជូនប្រកបដោយ ប្រសិទ្ធភាព និងសុវត្ថិភាព។

យោងតាមរបាយការណ៍ការសិក្សាផែនការមេស្តីពី ការកែលម្អប្រព័ន្ធភស្តុភារកម្ម នៅកម្ពុជាបានបង្ហាញថា កម្ពុជាបានធ្វើឲ្យមានការរីកចម្រើនដ៏ល្អ ក្នុងការកែលម្អវិស័យភាស្តុភារកម្ម ប៉ុន្តែលទ្ធផលអនុវត្តន៍ភស្តុភារកម្មរបស់កម្ពុជាស្ថិតក្នុងកម្រិតទាប ជាងមធ្យមនៅឡើយ។ នេះបើតាមរបាយការណ៍អនុវត្តភស្តុភារកម្មអន្តរជាតិ និង/ឬសូចនាករទាំងឡាយដូចជា របាយការណ៍ប្រកួតប្រជែងក្នុងទីផ្សារសាកល នៃវេទិកាសេដ្ឋកិច្ចពិភពលោក សន្ទស្សន៍ប្រកួតប្រជែងពិភពលោករបស់វិទ្យាស្ថានគ្រប់គ្រងអន្តរជាតិ និងសន្ទស្សន៍លទ្ធផល អនុវត្តភស្តុភារកម្ម របស់ធនាគារពិភពលោក។

តាមទស្សនវិស័យហេដ្ឋារចនាសម្ព័ន្ធ ពិន្ទុមធ្យមរបស់កម្ពុជា គឺនៅទាបជាងបន្តិច ពីចំណុចមធ្យមនីមួយៗ ដូច្នេះមានន័យថាហេដ្ឋារចនាសម្ព័ន្ធត្រូវបានចាត់ទុកថា ទាបជាងពិន្ទុកំណត់បន្តិច ហើយត្រូវមានការកែលម្អបន្ថែម ដើម្បីឆ្លើយតបទៅនឹងតម្រូវការបច្ចុប្បន្ន និងអនាគត។ តាមទស្សនស្ថាប័ន និងគោលនយោបាយកម្ពុជា ត្រូវបានវាយតម្លៃថា បានអនុវត្តក្នុងកម្រិតខ្សោយចំពោះបញ្ហាធ្ងន់ធ្ងរនានា ដែលទាក់ទងទៅនឹងអភិបាលកិច្ច និងតម្លាភាព។

ទោះបីជានីតិវិធីអេឡិចត្រូនិក ត្រូបានដាក់ឱ្យអនុវត្តក៏ដោយ ក៏ពាណិជ្ជកម្មករ និងអ្នកផ្តល់សេវា នៅតែមានការតវ៉ាអំពីលក្ខណខណ្ឌតម្រូវខាងឯកសារ និងអធិការកិច្ចលើការនាំចេញ-ចូលដដែល។ លទ្ធផលអនុវត្តរបស់អ្នកផ្តល់សេវាភស្តុភារកម្ម និងពាណិជ្ជករវិស័យឧស្សាហកម្ម ដូចជាក្រុមហ៊ុនដឹកជញ្ជូន និងក្រុមហ៊ុនបញ្ជូនទំនិញបានកែលម្អ ; ដោយអនុលោមទៅតាមសន្ទស្សន៍អនវត្តន៍ ភស្តុភារកម្ម ប៉ុន្តែត្រូវមានការកែលម្អបន្ថែមជាចាំបាច់ ដើម្បីឱ្យសម្រេចបានបរិយាកាស ពាណិជ្ជកម្ម និងភស្តុភារកម្ម ដែលដូចគ្នាទៅនឹងបរិយាកាសពាណិជ្ជកម្ម និងភស្តុភារកម្មរបស់ថៃ និងវៀតណាម។

កម្ពុជារងគ្រោះពីការចំណាយខ្ពស់ លើភស្តុភារកម្មក្នុងថ្លៃលក់ បើធៀបនឹងប្រទេសថៃ និងវៀតណាម។ ថ្លៃចំណាយលើការដឹកជញ្ជូននៅកម្ពុជា មានអត្រាខ្ពស់ជាងគេបំផុត បន្ទាប់ពីថ្លៃចំណាយលើការអនុវត្តសារពើភណ្ឌ ហើយថ្លៃចំណាយលើសេវាឃ្លាំងស្តុកក៏ខ្ពស់ផងដែរ។ ថ្លៃចំណាយខ្ពស់លើសារពើភណ្ឌ គឺជាផលវិបាក ដែលកើតចេញពីភាពមិនទុកចិត្តបាននៃប្រព័ន្ធភស្តុភារកម្មនៅក្នុងប្រទេស៕

លោក Donald Trump មិនមានឆន្ទៈលះបង់សង្គ្រាមពាណិជ្ជកម្ម ខណៈចិនបង្ហាញផ្លូវឆ្ពោះទៅរកសន្តិភាព

August 30, 2019

0

ដោយ Donald Lee

ភ្នំពេញ៖ ប្រធានាធិបតីអាមេរិកលោក Donald Trump បាននិយាយនៅថ្ងៃព្រហស្បតិ៍នេះថា លោករំពឹងថានឹងទាក់ទងជាមួយចិន លើបញ្ហាពាណិជ្ជកម្មអាមេរិក-ចិន ខណៈចិនបានផ្តល់ដំណោះស្រាយដើម្បីដោះស្រាយដោយសន្តិវិធី។

លោក Trump និយាយតាមវិទ្យុសហរដ្ឋអាមេរិកនៅថ្ងៃព្រហស្បតិ៍នេះថា “មានការពិភាក្សាមួយ ដែលគ្រោងធ្វើនៅថ្ងៃនេះក្នុងកម្រិតខុសគ្នា”។ លោក Trump បានបន្ថែមទៀតថា “មើលអ្វីដែលជាផលិតផលចុងក្រោយ នោះគឺជាអ្វីដែលអ្នកត្រូវវិនិច្ឆ័យវា”។

លោក Trump ហាក់ដូចជាបើកទូលាយចំពោះការចរចារ បន្ទាប់ពីការលើកឡើងប្រកបដោយសុទិដ្ឋិនិយមរបស់ក្រសួងពាណិជ្ជកម្មចិនកាលពីថ្ងៃព្រហស្បតិ៍។

អ្នកនាំពាក្យក្រសួងបាននិយាយថា ចិនមានឆន្ទៈក្នុងការចរចា និងធ្វើការរួមគ្នាជាមួយអាមេរិក ដើម្បីដោះស្រាយបញ្ហាដែលផ្តើមចេញ ពីសង្គ្រាមពាណិជ្ជកម្មរវាងអាមេរិក និងចិន។

អាមេរិក និងចិនបានជាប់គាំងនៅក្នុងសង្គ្រាមពន្ធគយ ដែលបានកើតឡើង និងបានធ្វើឱ្យផ្ទុះការគិតពន្ធរាប់ពាន់លានដុល្លារ លើទំនិញទាំងអាមេរិក និងចិន។

លោក Trump បានបញ្ជាក់ម្តងហើយម្តងទៀតថា លោកមិនមានឆន្ទៈបញ្ឈប់សង្គ្រាមពាណិជ្ជកម្មទេ ប្រសិនបើរដ្ឋាភិបាលអាមេរិក មិនទទួលបានសម្បទានចាំបាច់លើពាណិជ្ជកម្មពីរដ្ឋាភិបាលចិន។

នៅក្នុងបទសម្ភាសន៍តាមវិទ្យុ អ្នកសម្របសម្រួលបានសួរលោក Trump អំពីការរិះគន់ក្នុងស្រុក ដូចជា សមាជិកព្រឹទ្ធសភាអាមេរិកលោក Pat Toomey ដែលបាននិយាយថា គ្មានសំនួរត្រូវសួរទេ សង្គ្រាមពាណិជ្ជកម្មកំពុងតែធ្វើឱ្យប៉ះពាល់ដល់សេដ្ឋកិច្ចអាមេរិក។

លោក Trump បាននិយាយនៅក្នុងបទសម្ភាសន៍ថា “ដូច្នេះតើលោក Pat Toomey ចង់អោយខ្ញុំធ្វើអ្វី? តើគាត់ចង់អោយខ្ញុំនិយាយថាអោយខ្ញុំលើកដៃ ហើយអោយចិនបន្តហែកហួរយើងឬ?។

លោក Trump បានបន្ថែមថា “ខ្ញុំគិតថាពួកគេចង់ធ្វើកិច្ចព្រមព្រៀង។ ខ្ញុំគិតថាពួកគេត្រូវធ្វើកិច្ចព្រមព្រៀងមួយ”៕

ក្រុមហ៊ុន IT ថៃល្បីឈ្មោះមួយគ្រោងនឹងឈានចូលកម្ពុជានៅឆ្នាំក្រោយ

August 30, 2019

0

ដោយ ប៊ី

ភ្នំពេញៈ ក្រុមហ៊ុន Advice IT Infinite ដែលជាក្រុមហ៊ុនលក់រាយផលិតផល និងគ្រឿងបន្លាស់អាយធី គ្រោងនឹងចុះបញ្ជីនៅផ្សារភាគហ៊ុនថៃនៅត្រីមាសទី៣ឆ្នាំក្រោយ ខណៈក្រុមហ៊ុនកំពុងសម្លឹងមើល ការពង្រីកការលក់ទៅកាន់ទីផ្សារក្រៅប្រទេសបន្ថែមទៀតរួមទាំងកម្ពុជា និងមីយ៉ាន់ម៉ានៅឆ្នាំ២០២០។

លោក Chukkrit Watcharasaksilp ប្រធានផ្នែកលក់និងទីផ្សារ បានប្រាប់កាសែត The Nation ថា ក្រុមហ៊ុននឹងជំរុញការលក់ តាមរយៈហាងលក់ដុំ និងលក់រាយដល់ប្រមាណ១៣ពាន់លានបាតនៅចុងឆ្នាំនេះ ដោយទីកន្លែងលក់ពីរបានរួមចំណែក៥០ភាគរយ។ ក្រុមហ៊ុនទទួលបានប្រាក់ចំណូលចំនួន១២,៧ ពាន់លានបាតកាលពីឆ្នាំមុន។

ក្រុមហ៊ុននឹងពង្រីកអាជីវកម្មរបស់ខ្លួនទៅកាន់កម្ពុជា និងមីយ៉ាន់ម៉ានៅឆ្នាំក្រោយ បន្ទាប់ពីទទួលបានសិទ្ធិអាជីវកម្មចំនួន២០នៅក្នុងប្រទេសឡាវកាលពីឆ្នាំមុន។

ក្រុមហ៊ុននឹងវិនិយោគទឹកប្រាក់ចំនួន ៧០លានបាត ក្នុងសកម្មភាពទីផ្សារ និងការជួសជុលសាខាក្រុមហ៊ុនដើម្បីជំរុញទីផ្សារ និងកំណើនប្រាក់ចំណូលឱ្យបាន៥ភាគរយរៀងរាល់ឆ្នាំ។

បច្ចុប្បន្ននេះមានសាខា១១២សាខា និងមានហាង Franchise ២៣០ នៅទូទាំងប្រទេស។ សាខាចំនួន២០ទៀត នឹងត្រូវបានបង្កើតឡើងនៅឆ្នាំនេះ ដែលផ្គត់ផ្គង់នូវផលិតផលអាយធី និងគ្រឿងបន្លាស់ជាង១០,០០០ មុខក្នុងទីផ្សារ។

សាខាថ្មីភាគច្រើននឹងមានទីតាំងនៅទីក្រុងបាងកក និងតំបន់ជុំវិញរបស់ខ្លួននៅតាមហាងលក់ទំនិញទំនើបៗដូចជា ផ្សារទំនើប Central និងផ្សារទំនើប Big C៕

តំបន់សេដ្ឋកិច្ចពិសេសថ្មីមួយទៀត នឹងបង្ហាញខ្លួននៅក្នុងក្រុងបាវិតទំហំដីជាង ១លានម៉ែត្រការ៉េ

August 30, 2019

0

ដោយ វុត្ថា

ភ្នំពេញ៖ តំបន់សេដ្ឋកិច្ចពិសេសតាយសេង បាវិត នឹងបង្ហាញខ្លួននៅលើផ្ទៃដីទំហំ ១,២៧០,២០០ ម៉ែត្រការ៉េ ដែលមានទីតាំងស្ថិតនៅក្នុងសង្កាត់ចក្រម្ទេស និងសង្កាត់បាវិត ក្រុងបាវិត ខេត្តស្វាយរៀង ខណៈក្រុងមួយនេះ មានសក្តានុពលសេដ្ឋកិច្ចខ្ពស់។

យោងតាមកិច្ចប្រជុំអន្តរក្រសួង កាលពីថ្ងៃទី ២៩ ខែសីហា ម្សិលមិញនេះ បានពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញ (ESIA) លើគម្រោងវិនិយោគបង្កើតតំបន់សេដ្ឋកិច្ចពិសេសតាយសេង បាវិត បានបញ្ជាក់ថា ជារបស់ក្រុមហ៊ុន តាយសេង បាវិត អេសអ៊ីហេ្សត ខូអិលធីឌី (ម្ចាស់គម្រោង) ដែលបានសិក្សា និងរៀបចំរបាយការណ៍វាយតម្លៃហេតុប៉ះពាល់បរិស្ថាន ដោយក្រុមហ៊ុនទីប្រឹក្សា អ ស៊ី ប៊ី ស៊ីស៊ី (RCBCC CO.,LTD.)។

ជាលទ្ធផល អង្គប្រជុំ បានសម្រេច ដូចខាងក្រោម៖

១-សូមគាំទ្រគម្រោងវិនិយោគបង្កើតតំបន់សេដ្ឋកិច្ចពិសេស តាយសេង បាវិតទាំងតំបន់ទី១ និងតំបន់ទី២ ព្រោះថាគម្រោងនេះនឹងបង្កើតការងារដល់ប្រជាពលរដ្ឋ កំណើនសេដ្ឋកិច្ចជាតិ និងទាក់ទាញអ្នកវិនិយោគទាំងក្នុងស្រុក និងក្រៅស្រុក។

២-ទន្ទឹមនេះ ស្នើសុំឱ្យម្ចាស់គម្រោងវិនិយោគនេះ គោរពច្បាប់ជាធរមាន ជាពិសេសគោរពតាមអនុក្រឹត្យស្តីពីការបង្កើត និងគ្រប់គ្រងតំបន់សេដ្ឋកិច្ចពិសេស និងរៀបចំផែនការក្នុងតំបន់ឱ្យបានច្បាស់លាស់ ដោយកំណត់ប្រភេទគម្រោងឱ្យបានច្បាស់លាស់ ដើម្បីងាយស្រួលក្នុងការគ្រប់គ្រង និងកាត់បន្ថយហានិភ័យ។

៣-ក្រុមហ៊ុនមា្ចស់គម្រោង ត្រូវធ្វើអាងប្រព្រឹត្តកម្មបែបជីវៈសាស្រ្ត និងអាងប្រព្រឹត្តកម្មបែបគីមីសាស្រ្ត។

៤-ក្រុមហ៊ុនម្ចាស់គម្រោង ត្រូវសហការជាមួយអាជ្ញាធរពាក់ព័ន្ធធ្វើការផ្សព្វផ្សាយដល់ម្ចាស់រោងចក្រនៅក្នុងតំបន់សេដ្ឋកិច្ចពិសេសនេះ ស្នើសុំឱ្យធ្វើរបាយការណ៍វាយតម្លៃហេតុប៉ះពាល់បរិស្ថាន និងជំរុញឱ្យរោងចក្រនីមួយៗត្រូវមានអាងប្រព្រឹត្តកម្មសំណល់រាវបឋមរបស់ខ្លួនមុនបង្ហូរចូលអាងប្រព្រឹត្តកម្មសំណល់រាវរួមរបស់តំបន់។

៥-ក្រុមហ៊ុនម្ចាស់គម្រោង ត្រូវញែកប្រព័ន្ធលូទឹកកខ្វក់ និងលូទឹកភ្លៀងឱ្យដាច់ដោយឡែកពីគ្នា។ ម្ចាស់គម្រោងត្រូវមានកន្លែងសម្រាប់សំរាករបស់កម្មករ និងរោងបាយ ស្របតាមច្បាប់ស្តីពីការងារ។ លើសពីនេះ ម្ចាស់គម្រោងត្រូវមានផែនការគ្រប់គ្រងសំណល់រឹង សំណល់គ្រោះថ្នាក់ និងសំណល់ថង់ប្លាស្ទិកឱ្យបានត្រឹមត្រូវ ព្រមទាំងសហការជាមួយអ្នកដឹកជញ្ជូនឱ្យបានច្បាស់លាស់។ លើសពីនេះ ម្ចាស់គម្រោងអាចរៀបចំទីលានចាក់សំរាម និងបង្កើតឡដុតសំរាមរបស់ខ្លួនឯងផ្ទាល់តែម្តង។ ក្នុងនេះដែរ ម្ចាស់គម្រោងត្រូវសហការជាមួយមន្ទីរបរិស្ថានអជ្ញាធរមូលដ្ឋាន ដើម្បីលើប៉ាន់ណូអប់រំបរិស្ថាន ពាក់ព័ន្ធអំពីការវេចខ្ចប់ ការគ្រប់គ្រងសំណល់ថង់ប្លាស្ទិក ធ្វើយ៉ាងណាសហការជាមួយមន្ទីរបរិស្ថានខេត្ត ចុះណែនាំអប់រំអំពីផលប៉ះពាល់សំណល់ថងប្លាស្ទិកនេះ។

៦-ម្ចាស់គម្រោង ត្រូវរៀបចំឱ្យមានចំណតសម្រាប់រថយន្តដឹកកម្មករនៅខាងក្នុងតំបន់ ផ្ទៃបៃតង និងទីតាំងលក់ដូរក្នុងតំបន់។

៧-ម្ចាស់កម្រោង ត្រូវមានផែនការប្រើប្រាស់ដីឱ្យបានច្បាស់លាស់ យោងតាមអនុក្រឹត្យស្តីពីការបង្កើត និងគ្រប់គ្រងតំបន់សេដ្ឋកិច្ចពិសេស។

៨-ម្ចាស់គម្រោង ត្រូវសហការជាមួយក្រសួងធនធានទឹក និងឧតុនិយម និងអជ្ញាធរដែនដី ក្នុងការរៀបចំកន្លែងរំដោះទឹកយូរអង្វែង ដោយឡែកដាច់រវាងទឹកភ្លៀង និងទឹកលូរ៕

CDC អនុម័តគម្រោងវិនិយោគលើវិស័យបដិសណ្ឋារកិច្ច និងថាមពលអគ្គិសនីក្នុងទឹកប្រាក់ជិត៥០០លានដុល្លារ

August 30, 2019

0

ដោយ ៖ រ៉ាណេត

ភ្នំពេញ ៖ តបតាមសំណើសុំវិនិយោគរបស់ក្រុមហ៊ុនចំនួន៤ ដែលបានដាក់ស្នើសុំការអនុញ្ញាតកាលពីពេលកន្លងទៅ ពេលនេះក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តចុះបញ្ជី និងផ្តល់អាជ្ញាបណ្ណតាមសំណូមពរ ដើម្បីដំណើរការចាប់ផ្តើមសាងសង់ និងបង្កើតស្ថានីយផលិតថាមពលអគ្គិសនី ដែលស្ថិតនៅក្នុងខេត្ត ក្រុង ផ្សេងៗពីគ្នា រួមមានខេត្តកំពង់ឆ្នាំង ខេត្តពោធិ៍សាត់ និងក្រុងព្រះសីហនុ ។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចខាងក្រោម៖

១- “HAI GANG GRAND HOTEL CO., LTD.” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៩០០បន្ទប់ ដែលមានទីតាំងវិនិយោគស្ថិតនៅភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគចំនួន ១៥៣លានដុល្លារអាមេរិក និងអាចបង្កើតការងារបានចំនួន ៩៨១កន្លែង។

២- “XIGANG V-CONTINENT INTERNATIONAL INVESTMENT CO., LTD” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន១.១១១បន្ទប់ ដែលមានទីតាំងវិនិយោគស្ថិតនៅភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ២២៦លានដុល្លារអាមេរិក និងអាចបង្កើតការងារបានចំនួន ១.៦៦៨កន្លែង។

៣- “SCHNEITEC SUSTAINABLE CO., LTD” គម្រោងសាងសង់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ កម្លាំង៦០ មេហ្គាវ៉ាត់ ដែលមានទីតាំងវិនិយោគស្ថិតនៅភូមិអន្សក្តាម ឃុំស្នាអន្សា ស្រុកក្រគរ ខេត្តពោធិ៍សាត់ មានទុនវិនិយោគប្រមាណ ៥៨លានដុល្លារអាមេរិក និងអាចបង្កើតការងារបានចំនួន ៣៥កន្លែង។

៤- “SCHNEITEC SUSTAINABLE CO., LTD” គម្រោងសាងសង់ស្ថានីយផលិតថាមពលអគ្គិសនីដើរដោយពន្លឺព្រះអាទិត្យ កម្លាំង៦០ មេហ្គាវ៉ាត់ ដែលមានទីតាំងវិនិយោគស្ថិតនៅភូមិរមាស ឃុំតាំងក្រសាំង ស្រុកទឹកផុស ខេត្តកំពង់ឆ្នាំង មានទុនវិនិយោគប្រមាណ ៥៨លានដុល្លារអាមេរិក និងអាចបង្កើតការងារបានចំនួន ៣៥កន្លែង៕

គណៈរដ្ឋមន្ត្រីពិភាក្សាលើសេចក្តីព្រាង “ច្បាប់ស្តីពីសំណង់” នៅថ្ងៃនេះ

August 30, 2019

0

ដោយ វុត្ថា

ភ្នំពេញ៖ គណៈរដ្ឋមន្ត្រីនៅថ្ងៃនេះ បាននិងកំពុងចាប់ផ្តើមពិភាក្សាលើសេចក្តីព្រាង “ច្បាប់ស្តីពីសំណង់” ក្រោមអធិបតីភាពរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។

យោងតាមខ្លឹមសារសេចក្តីព្រាង “ច្បាប់ស្តីពីសំណង់” នៅថ្ងៃទី ៣០ ខែសីហា ឆ្នាំ ២០១៩ នេះ បានឱ្យដឹងវិស័យសំណង់ បានដើរតួនាទីជាសសរស្ដម្ភមួយ ជាមួយសសរស្ដម្ភដែលជំរុញកំណើន ៣ទៀត គឺវិស័យទេសចរណ៍ វិស័យកសិកម្ម និងវិស័យឧស្សាហកម្ម ដោយចូលរួមរៀបចំ និងអភិវឌ្ឍហេដ្ឋារចនាសម្ព័ន្ធទាំងក្នុងវិស័យសាធារណៈ ទាំងក្នុងវិស័យឯកជន ពិសេសរចនាសម្ព័ន្ធផលិតកម្មឧស្សាហកម្ម សិប្បកម្ម ពាណិជ្ជកម្ម កសិកម្ម សេវាកម្ម និងទេសចរណ៍ ព្រមទាំងចូលរួមអភិវឌ្ឍលំនៅឋាន និងសំណង់ផ្សេងទៀត សម្រាប់បម្រើឱ្យការរស់នៅរបស់ប្រជាពលរដ្ឋប្រកបដោយសុវត្ថិភាព និងផាសុខភាព។

រយៈពេលជាងមួយទស្សវត្សរ៍ចុងក្រោយ ទុនវិនិយោគក្នុងវិស័យសំណង់មានកំណើនជាទៀងទាត់ និងនៅតែបបន្តរីកចម្រើនជាលំដាប់ ជាពិសេសការសាងសង់សំណង់ធំៗ ខ្ពស់ៗ ដូចជា អាគារស្នាក់នៅរួម អាគារលក់ទំនិញ ផ្សារទំនើប មជ្ឈមណ្ឌលពាណិជ្ជកម្ម អាគារការិយាល័យ សណ្ឋាគារ អាគារពហុមុខងារ សំណង់ទីក្រុងរណប បុរីលំនៅឋាន ភូមិគ្រឹះ គ្រឹះស្ថានសិក្សា មន្ទីរពេទ្យ ធនាគារ រោងចក្រ ឃ្លាំង ស្ថានីយប្រេងឥន្ធនៈ។ល។

ក្នុងសន្ទុះនៃការរីកចម្រើនរបស់វិស័យសំណង់ តម្រូវការនៃការពង្រឹងការគ្រប់គ្រងរាល់ដំណើរការ និងប្រតិបត្តិការក្នុងវិស័យសំណង់ និងអ្នកពាក់ព័ន្ធនឹងការងារសំណង់កាន់តែមានភាពចាំបាច់ជាសារវ័ន្ត។ សំណង់កាន់តែធំ កាន់តែខ្ពស់ និងកាន់តែស្មុគ្រស្មាញ កាន់តែទាមទារឱ្យការអនុវត្តបានត្រឹមត្រូវតាមបទដ្ឋានគតិយុត្ត បច្ចេកវិទ្យា ស្ដង់ដារ និងបទប្បញ្ញត្តិបច្ចេកទេស ដើម្បីធានាភាពរឹងមាំ គុណភាព សោភណភាព និងចីរភាពនៃសំណង់ រៀបចំខ្លួនសម្រាប់សេដ្ឋកិច្ចឌីជីថល ដើម្បីឆ្លើយតបនឹងបដិវត្តន៍ឧស្សាហកម្មទី៤ផង និងដើម្បីលើកកម្ពស់អត្តសញ្ញាណជាតិ និងភាពសុខដុមរមនានៅក្នុងសង្គមផង។

ឆ្លើយតបនឹងតម្រូវការនេះ យុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល ដើម្បីកំណើនការងារ សមធម៌ និងប្រសិទ្ធភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ផែនការយុទ្ធសាស្ត្រអភិវឌ្ឍជាតិ២០១៩-២០២៣ និងគោលនយោបាយជាតិស្ដីពីការរៀបចំទឹកដីនៃព្រះរាជាណាចក្រកម្ពុជា ចុះថ្ងៃទី៨ ខែមេសា ឆ្នាំ២០១១ បានកំណត់ឱ្យរៀបចំច្បាប់ស្ដីពីសំណង់។

សេចក្ដីព្រាងច្បាប់ស្ដីពីសំណង់នេះត្រូវបានតាក់តែងឡើងជាលើកដំបូងនៅឆ្នាំ២០១៧ ដោយមន្ត្រីជំនាញនៃក្រសួងរៀបចំដែនដី នគរូបនីយកម្ម និងសំណង់ និងមានការចូលរួមផ្ដល់មតិយោបល់ និងធាតុចូលពីអ្នកជំនាញនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន។

សេចក្ដីព្រាងច្បាប់នេះត្រូវបានបញ្ជូនមកទីស្ដីការគណៈរដ្ឋមន្ត្រីនៅថ្ងៃទី១៦ ខែកក្កដា ឆ្នាំ២០១៩ និងបានដាក់ឆ្លងកិច្ចប្រជុំបច្ចេកទេសជាមួយក្រុមប្រឹក្សាអ្នកច្បាប់ និងក្រុមប្រឹក្សាសេដ្ឋកិច្ច និងវប្បធម៌ នៃទីស្ដីការគណៈរដ្ឋមន្ត្រីនៅថ្ងៃទី២៣ ទី២៤ និងទី២៥ ខែកក្កដា ឆ្នាំ២០១៩ និងកិច្ចប្រជុំអន្តរក្រសួងនៅថ្ងៃទី៦ និងទី៧ ខែសីហា ឆ្នាំ២០១៩។

ក្រសួងយុត្តិធម៌បានជួយពិនិត្យកែសម្រួលលើបណ្ដាមាត្រាមួយចំនួនក្នុងជំពូកពាក់ព័ន្ធនឹងនីតិវិធី និងទោសប្បញ្ញត្តិ ដើម្បីធានាឱ្យមានសង្គតិភាពជាមួយច្បាប់ជាធរមានដទៃទៀតនៃព្រះរាជាណាចក្រកម្ពុជា។

សេចក្ដីព្រាងច្បាប់នេះក៏ត្រូវបានដាក់ឆ្លងការពិភាក្សាជាមួយឧត្តមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី១៣ ខែសីហា ឆ្នាំ២០១៩ ផងដែរ៕

ប្រទេសចិនថ្កោលទោសដល់សង្គ្រាមពាណិជ្ជកម្ម និងជំរុញឱ្យមានដំណោះស្រាយដោយសន្តិវិធី

August 30, 2019

0

ដោយ Donald Lee

ភ្នំពេញៈ រដ្ឋាភិបាលរបស់ចិនបានជំរុញឱ្យមានដំណោះស្រាយស្ងប់ស្ងៀម ចំពោះសង្គ្រាមពាណិជ្ជកម្មអាមេរិក-ចិនដែលមានកំដៅយ៉ាងខ្លាំងកាលពីសប្តាហ៍មុន។

លោក Gao Feng អ្នកនាំពាក្យក្រសួងពាណិជ្ជកម្មចិន បាននិយាយកាលពីថ្ងៃព្រហស្បតិ៍ថា “យើងច្រានចោលយ៉ាងដាច់ខាត នូវការកើតឡើងសង្គ្រាមពាណិជ្ជកម្ម ហើយយើងមានឆន្ទៈក្នុងការចរចា និងសហការគ្នា ដើម្បីដោះស្រាយបញ្ហានេះដោយឥរិយាបថស្ងប់ស្ងាត់”។

អ្នកនាំពាក្យរូបនេះក៏បានបញ្ជាក់ផងដែរថា មន្រ្តីពាណិជ្ជកម្មអាមេរិក និងចិននៅតែមានទំនាក់ទំនង។

អាមេរិក និងចិនបានឆ្លើយតបគ្នាទៅវិញទៅមក នៅក្នុងសេចក្តីប្រកាសជាច្រើនចាប់តាំងពីថ្ងៃសុក្រ ដោយសន្យាថានឹងដាក់ពន្ធគយរាប់ពាន់លានដុល្លារ លើទំនិញរបស់គ្នាទៅវិញទៅមក។

ប្រធានាធិបតីអាមេរិកលោក Donald Trump បានបោះជំហានមួយជំហានមុន ហើយបានបញ្ជាឱ្យក្រុមហ៊ុនផលិតអាមេរិកចាកចេញពីចិន។

អ្នកនាំពាក្យមិនបានបញ្ជាក់ថា តើមានកិច្ចចរចាណាមួយ ដែលបានគ្រោងទុកនៅពេលអនាគតទេ។

សេដ្ឋវិទូអាមេរិក Jefferey Sachs បាននិយាយក្នុងបទវិចារណកថាមួយថា “លទ្ធផលសេដ្ឋកិច្ច នៃអាកប្បកិរិយាមិនចេះរីងស្ងួតរបស់លោក Trump គឺធ្វើឲ្យមានអស្ថិរភាពនៅក្នុងទីផ្សារហិរញ្ញវត្ថុអាមេរិក និងសកលលោក និងការធ្លាក់ចុះសេដ្ឋកិច្ចពិភពលោកដែលនឹងកើតមានឡើង”។

លោក Sachs បានបន្ថែមទៀតថា “ការផ្សះផ្សារបស់លោក Trump នៅថ្ងៃនេះនឹងផ្តល់ឱ្យនូវការវាយប្រហារថ្មីមួយ ជាពិសេសនៅពេលគាត់ជឿជាក់ថា ចិននឹងធ្វើតាមយុទ្ធសាស្ត្រសម្ពាធខ្ពស់របស់គាត់ ប៉ុន្តែចិនបានបញ្ជាក់ម្តងហើយម្តងទៀតថា ខ្លួននឹងមិនជាប់គាំងទេ”៕

រដ្ឋាភិបាលកំពុងប្រែក្លាយទីក្រុងបូកគោថ្មីឲ្យមានមណ្ឌលកំសាន្តលំដាប់អន្តរជាតិ

August 30, 2019

0

ដោយៈ រ៉ាណេត

ភ្នំពេញៈ រដ្ឋាភិបាលបាននិងកំពុងរៀបចំតំបន់នៅក្នុងទីក្រុងបូកគោថ្មី និងតំបន់ជុំវិញជាមជ្ឈមណ្ឌលកំសាន្តតាមស្តង់ដាអន្តរជាតិ ជាមួយកន្រ្តកយោងនៅតាមចង្កេះភ្នំដ៏ខ្ពស់នេះ ដែលអនុញ្ញាត្តឲ្យភ្ញៀវទេសចរណ៍ជាតិ អន្តរជាតិអាចទស្សនាកំសាន្តនូវទិដ្ឋភាពដ៏ស្រស់ស្អាតនៅតំបន់ដែលមានទេសភាពដ៏ស្រស់ត្រកាលនេះ។

គម្រោងបង្កើតតំបន់កម្សាន្ត ត្រូវបានបែងចែកជាច្រើនតំបន់ ដូចជា តំបន់អេកូទេសចរណ៍ តំបន់ទេសចរណ៍ខ្សែកាប ដែលអាចឱ្យភ្ញៀវទេសចរអង្គុយគយគន់ទេសភាពធម្មជាតិពីលើអាកាសយ៉ាងត្រជាក់ភ្នែក ដែលធ្វើជានិមិត្តរូបនៃតំបន់ទេសចរណ៍ប្រចាំខេត្តកំពត។ មានតំបន់ទេសចរណ៍ចម្រុះសម្រាប់អ្នកមានចំណូលតិច និងមធ្យម។

កន្លែងលំហែរកាយពហុបំណង ដែលជាទីក្រុងស្អាត បរិស្ថានល្អ និងគ្មានប្លាស្ទីក។ សារមន្ទីរធម្មជាតិតំបន់ភ្នំលេខ១ និងមានសួនសត្វចម្រុះ។ កន្លែងមើលផ្កាយក្នុងដែនកាឡាក់ស៊ីពីលើកំពូ លភ្នំបូកគោ។

បង្កើតតំបន់ទេសចរណ៍វប្បធម៌ សាសនា ដែលជាបេះដូងនៃការអភិវឌ្ឍនៅលើកំពូលភ្នំនេះ។ បន្ថែមពីនេះ នៅមានការរៀបចំជាតំបន់រមណីយដ្ឋានផ្សេងៗទៀត ដើម្បីកាន់តែបង្កើនភាពទាក់ទាញទេសចរ។

ការប្រកាសពីគំរោងមជ្ឈមណ្ឌលទេសចរណ៍ដ៏សម្បូរបែបនេះ បានធ្វើឡើងក្រោមអធិបតីភាពរបស់លោកឧបនាយករដ្ឋមន្រ្តីជា សុផារ៉ារដ្ឋមន្រ្តីក្រសួងរៀបចំដែនដី នគរូបនីយកម្មនិងសំណង់។

នៅក្នុងប្លង់មេនៃគម្រោងអភិវឌ្ឍទីក្រុងបូកគោ ដែលជាតំបន់ទេសចរណ៍ធម្មជាតិដ៏ស្រស់ស្អាតប្រចាំនៅក្នុងព្រះរាជាណាចក្រកម្ពុជា នឹងមានការបែងចែកនូវតំបន់អភិវឌ្ឍចំនួន៨ ដោយត្រូវធ្វើឡើងទៅតាមដំណាក់កាលនីមួយៗយ៉ាងជាក់លាក់។ ជាមួយនឹងគម្រោងអភិវឌ្ឍទ្រង់ទ្រាយធំមួយនេះ ក៏មានគម្រោងបង្កើតមណ្ឌល និងតំបន់កម្សាន្តបែបធម្មជាតិជាច្រើនទីតាំង ដើម្បីបង្កើនកម្លាំងទាក់ទាញភ្ញៀវទេសចរជាតិ និងអន្តរជាតិឱ្យចូលមកកាន់តំបន់មួយនេះប្រកបដោយប្រសិទ្ធភាព។

នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍ថា គម្រោងបង្កើតតំបន់ទេសចរណ៍កែច្នៃបន្ថែម ពីសម្រស់ធម្មជាតិដែលមានស្រាប់ នឹងត្រូវធ្វើឡើងក្រោមការវិនិយោគ ពីសំណាក់ក្រុមហ៊ុនដែលជាម្ចាស់គម្រោង និងក្រុមហ៊ុនផ្សេងទៀត។

លោកស្រីបន្តថា ចំពោះគម្រោងអភិវឌ្ឍមណ្ឌលកម្សាន្តវិញ នឹងត្រូវធ្វើឡើងបែបតំបន់អេកូរទេសចរណ៍លេខ១ នៅតំបន់ភ្នំប្រចាំព្រះរាជាណាចក្រកម្ពុជា និងនៅប្រទេសអាស៊ាន។

ទីប្រឹក្សាសមាគមទីភ្នាក់ងារទេសចរណ៍កម្ពុជា លោកហូ វណ្ឌី បានបង្ហាញពីក្ដីសាទរជាមួយគម្រោងអភិវឌ្ឍតំបន់ទេសចរណ៍ និងមណ្ឌលកម្សាន្តទាំងអស់ខាងលើ ប៉ុន្តែលោកទទូចឱ្យមានការកំណត់ ពីសេវាកម្មប្រកបដោយគុណភាព និងសុវត្ថិភាពទេសចរណ៍។

លោកបានមានប្រសាសន៍ថា “វាជារឿងល្អសម្រាប់កម្ពុជា ប្រសើនបើគម្រោងទាំងអស់នេះអាចលេចចេញជារូបរាង”។ លោកបន្តថា “គម្រោងទាំងនេះអាចធ្វើទៅបានទាល់តែមានការចូលរួម និងការប្តេជ្ញាពីសំណាក់ក្រុមហ៊ុនឯកជន ក្រោមការជំរុញនិងគាំទ្រពីរដ្ឋាភិបាល ដោយការកំណត់គោលដៅឱ្យប្រាកដ”។

លោកបានមានប្រសាសន៍បញ្ជាក់ថា នៅពេលគម្រោងទេសចរណ៍ទាំងនេះកើតឡើងវាមិនមែនបានចំណូលតែរដ្ឋាភិបាល ឬក្រុមហ៊ុនដែលជាអ្នកអភិវឌ្ឍន៍នោះទេ ប៉ុន្តែវាបានចាកស្រោច ចំណូលទៅដល់ប្រជាពលរដ្ឋក្នុងតំបន់ ដែលអាស្រ័យផលតាមរយៈវិស័យនេះ”។

លោកបានបន្តទៀតថា “អ្វីដែលសំខាន់បំផុត ក្រោយពេលគម្រោងទាំងនេះបានកើតឡើង គឺការកំណត់ និងការប្តេជ្ញាជាថ្មី ដោយត្រូវបង្កើនគុណភាពសេវាកម្ម និងប្រសិទ្ធភាពនៃសុវត្ថិភាព ទើបអាចរក្សាបាននូវនិរន្តភាពបានបាន”។

យ៉ាងណាក៏ដោយ លោកហូ វណ្ឌីបានសង្កត់ធ្ងន់ផងដែរទៅលើកត្តាតម្លៃនៃអចលនទ្រព្យ ក៏ដូចជាវិស័យដីធ្លីផងដែរ ដែលសុទ្ធតែអាចជះឥទ្ធិពល ដល់ការអភិវឌ្ឍវិស័យទេសចរណ៍ ជាពិសេសករណីវិនិយោគទិញដីស្តុក ក្នុងរូបភាពទិញដីទុកជួល ឬលក់បន្តក្នុងតម្លៃថ្លៃ ដែលជាឧបសគ្គយ៉ាងសំខាន់សម្រាប់អភិវឌ្ឍក្នុងវិស័យទេសចរណ៍៕

គម្រោង Naga3 ដែលគ្រោងចំណាយទុនវិនិយោគ ៣,៥ពាន់លានដុល្លារនឹងបញ្ចប់ក្នុងឆ្នាំ ២០២៥

August 30, 2019

0

ដោយ ប៊ី

ភ្នំពេញៈ ក្រុមហ៊ុន NagaCorp មានបំណងធ្វើការពង្រីកការវិនិយោគម្រោង Naga3 របស់ខ្លួនឲ្យមានទំហំធំជាងមុន គម្រោង Naga3 ដែលបានប្រកាសពីផែនការនៅខែ មេសា ជាមួយនឹងទុនវិនិយោគ ៣,៥ពាន់លានដុល្លារ គ្រោងនឹងបញ្ចប់ក្នុងឆ្នាំ២០២៥។ នេះបើយោងតាមគេហទំព័រ CalvinAyre។

ការពង្រីកគម្រោងគម្រោង Naga3 នេះនាំមកនូវភាពថ្មី និងជម្រើសល្បែងជាច្រើនទៀតដើម្បីទាក់ទាញមនុស្សកាន់តែច្រើន ស្របពេលគម្រោងនេះទទួលបានការគាំទ្រពីម្ចាស់ភាគហ៊ុនរបស់ក្រុមហ៊ុន ដែលឥឡូវនេះបានផ្តល់ការយល់ព្រម សម្រាប់ការពង្រីកចាប់ផ្តើម។

ប្រតិបត្តិករសណ្ឋាគារ និងកាស៊ីណូដែលចុះបញ្ជីនៅហុងកុងនេះ បានបើកកិច្ចប្រជុំទូទៅមួយនាពេលថ្មីៗនេះ ដោយអញ្ជើញម្ចាស់ភាគហ៊ុនភាគតិចឱ្យថ្លឹងថ្លែងលើគម្រោងនេះ។ អ្នកចូលរួម៩៨ភាគរយនៃអ្នកដែលបានចូលរួមបាននិយាយថា ណាហ្គាខបគួរតែឈានទៅមុខ។ ម្ចាស់ភាគហ៊ុនធំបំផុតរបស់ក្រុមហ៊ុន និងជានាយកប្រតិបត្តិរបស់ខ្លួនផងដែរមិនអនុញ្ញាតឲ្យចូលរួមបោះឆ្នោតដោយអះអាងថា ការខ្វះការចូលរួមរបស់គាត់គឺសម្រាប់គោលបំណងអភិបាលកិច្ចល្អ។

លោក Chen Lip Keong ម្ចាស់ហ៊ុនធំត្រូវបានគេរាយការណ៍ថា នឹងចំណាយពាក់កណ្តាលលើគម្រោងនេះ។

ការវិនិយោគនេះត្រូវបានគេរំពឹងថា នឹងមានអាគារ៤២ជាន់ចំនួន៤ ដែលនឹងមានសណ្ឋាគារ កន្លែងស្នាក់នៅ កន្លែងសន្និបាត កន្លែងបរិភោគអាហារ ហាងលក់រាយក ន្លែងកម្សាន្ត និងកន្លែងជាច្រើនទៀត ក៏ដូចជាជាន់កាស៊ីណូធំមួយផងដែរ។ ជាបន្ទប់សណ្ឋាគារដែលមានចំនួនសរុប៤.៧២០ នឹងត្រូវបន្ថែមដែលជាការឆ្លើយតបទៅនឹងការរំពឹងទុកថា រាជធានីភ្នំពេញ នឹងមានសណ្ឋាគារ ១០០,០០០ បន្ទប់នៅឆ្នាំ ២០២៥ ។

គម្រោង Naga3 នឹងធំជាងបីដង បើធៀបនឹង Naga1 និង Naga2 ។ ការងារអចិន្រ្តៃយ៍ចំនួន ១៨,០០០ នឹងត្រូវបានបន្ថែម ហើយនៅពេលបញ្ចប់ការសាងសង់គម្រោង គម្រោងនេះផ្តល់ការងារប្រហែល ៥០,០០០កន្លែងក្នុងដំណាក់កាលសាងសង់។ ជាមួយនឹងការដាក់បញ្ចូល Naga3 បរិវេណ NagaWorld នឹងក្លាយជាការវិនិយោគវិស័យឯកជនធំបំផុតនៅកម្ពុជា។

ថ្មីៗនេះកម្ពុជាបានប្រកាសហាមឃាត់ ការលេងល្បែងតាមអ៊ីនធើណេត ដែលនឹងធ្វើឱ្យគម្រោងនេះកាន់តែទាក់ទាញ។ ក្រុមហ៊ុនដែលទទួលបានអាជ្ញាប័ណ្ណ នឹងអាចបន្តប្រតិបត្តិការរបស់ពួកគេ ប៉ុន្តែនឹងត្រូវស្វែងរកអ្វីផ្សេងទៀត ដើម្បីធ្វើនៅពេលអាជ្ញាប័ណ្ណផុតកំណត់៕