ដោយ គង់ សូរិយា

ភ្នំពេញ៖ របាយការណ៍របស់ក្រសួងរៀបចំដែនដី នគរូបនីយកម្មនិងសំណង់បានបង្ហាញថា ទុនវិនិយោគក្នុងវិស័យសំណង់ឆ្នាំនេះបានដាំក្បាលចុះខ្លាំង ក្នុងរយៈពេលពីរខែ ដើមឆ្នាំនេះធៀបរយៈពេលដូចគ្នាកាលពីឆ្នាំមុន។

នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបាន   ឲ្យដឹងតាមទូរស័ព្ទនាព្រឹកថ្ងៃទី១៩ មេសានេះថា បើមើលនិន្នន័យរបស់ក្រសួងរៀបចំដែនដី បានបង្ហាញថា ក្នុងរយៈពេលពីរខែដើមឆ្នាំនេះ ក្រសួងបានអនុម័តគំរោងដែលមានទឹក​ប្រាក់ត្រឹមតែ៣៦៥លានដុល្លារប៉ុណ្ណោះ ខណៈរយៈពេលដូចគ្នាកាលពីឆ្នាំមុន មានទុនវិនិយោគមានទំហំរហូតដល់១២៨០លានដុល្លារអាមេរិក។អ្នកនាងបន្តថា និន្នាការនេះមានការធ្លាក់ចុះខ្លាំង ដោយសារយើងសង្កេតឃើញថា គំរោងដែលបានប្រកាសសម្ភោធថ្មីៗបានថយចុះច្រើន។

អ្នកនាងបន្តថា “ការថយចុះនៃការវិនិយោគនេះ មិនមែនដោយសារស្ថានភាពន​​យោ​បាយទេ តែដោយសារកត្តាទីផ្សារខ្លួនឯង ព្រោះការអភិវឌ្ឍន៍នៅកម្ពុជា៨០ភាគរយ  ផ្តោតលើលំនៅដ្ឋាន ហេតុនេះទីផ្សារនៅត្រូវការពេលវេលា ដើម្បីឲ្យតម្រូវការឆ្លើយតប​នឹង​ការផ្គត់ផ្គង់”។

ប្រធានក្រុមប្រឹក្សាភិបាលនៃក្រុមហ៊ុន Hutton CPL លោកឧកញ៉ាចេង ខេងបានថ្លែងឲ្យដឹងផងដែរថា ក្នុងដើមឆ្នាំនេះសកម្មភាពនៃការទិញលក់ដីធ្លី និងសកម្មភាពសាងសង់នៅតែមាន​ភាពសម្ម និងរ៉ឹងមាំ មិនមានសញ្ញាហានិភ័យឬគួរឲ្យបារម្ភណាមួយកើតមាននោះទេ ហេតុនេះការថយចុះនូវការចុះបញ្ជីរទំហំទុនវិនិយោគ មិនមែនជាអ្វីដែលគួរឲ្យកត់សំគាល់នោះទេ ព្រោះគំរោងនិមួយៗពេលស្នើសុំសាងសង់ មិនមែនសាងសង់ចប់ក្នុងរយៈពេលមួយឆ្នាំនោះទេ គឺត្រូវការពេលវេលា៣ទៅ៤ឆ្នាំទើបបញ្ចប់ការសាងសង់។

លោកបន្តថា “យើងមិនមានអ្វីគួរឲ្យបារម្ភទេ ព្រោះសកម្មភាពនៃការទីញលក់ និងកំនើនវិនិយោគនៅតែបន្តកើនឡើង”។

អគ្គនាយកក្រុមហ៊ុន Century21 Mekong លោកច្រឹក សុននីមបានថ្លែងឲ្យដឹងផងដែរថា សកម្មភាពវិនិយោគក្នុងស្រុក និងលំហូរទុនវិនិយោគផ្ទាល់ពីបរទេស មានការថម​ថយល្បឿនពិតមែន ដោយសារជាឆ្នាំនៃការបោះឆ្នោត ដែលធ្វើឲ្យប្រជាជនមួយចំនួន​មានការបារម្ភ ទោះបីជាស្ថានភាពនយោបាយ មិនមានអ្វីប្រែប្រួលគួរឲ្យបារម្ភក៏ដោយ។

លោកបន្តថា “ទោះជាយ៉ាងណា ខ្ញុំមើលឃើញថាសកម្មភាពនៃការទិញលក់លំនៅដ្ឋាននៅតែមានសញ្ញាល្អប្រសើរ និងមានភាពរ៉ឹងមាំនៅឡើយ”៕

ដោយ គង់ សូរិយា

ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុបានព្យាករណ៍ថា វិស័យអចលនទ្រព្យនឹងបន្តមានកំនើនដោយរ៉ឹងមាំក្នុងឆ្នាំនេះ និងឆ្នាំ២០១៩ខាងមុខ បើទោះបីទីផ្សារបានងាកទៅកាន់ប្រជាពលរដ្ឋមានប្រាក់ចំណូលមធម្យមក្តី។

យោងតាមឯកសារសមិទ្ធកម្ម និងទស្សនវិស័យរបស់អគ្គនាយកដ្ឋានគោលនយោ​បាយនៃក្រសួងសេដ្ឋកិច្ច និងហិរញ្ញវត្ថុបានបង្ហាញឲ្យដឹងកាលពីពេលថ្មីៗនេះថា វិស័យ​អចលនទ្រព្យ នឹងនៅបន្តមានកំណើនរឹងមាំក្នុងរង្វង់៨,៥ភាគរយ ក្នុងឆ្នាំ២០១៨ និងឆ្នាំ២០១៩ ប៉ុន្តែមានការធ្លាក់ចុះបន្តិចបន្តួចបើប្រៀបធៀបទៅឆ្នាំ២០១៧។

វិស័យអចលនទ្រព្យបានរួមចំណែកអភិវឌ្ឍន៍សេដ្ឋកិច្ចកម្ពុជា ដោយបានក្លាយជា ​កំលាំងចលករធំទី២ ក្នុងការទ្រទ្រង់សេដ្ឋកិច្ចជាតិ បន្ទាប់ពីវិស័យវាយណភ័ណ្ឌកាត់ដេរ និងស្បែកជើង ដែលជាវិស័យនាំចេញធំជាងគេទី១របស់កម្ពុជា។

ទោះជាយ៉ាងណានៅក្នុងទីផ្សារនេះ អ្នកជំនាញបានលើកឡើងថា ស្ថានភាពនៅកម្ពុជា កំពុងតែមានភាពផ្លាស់ប្តូរនិន្នាការមួយចំនួនក្នុងវិស័យនេះ។

អគ្គនាយកក្រុមហ៊ុន Century21 Mekong លោកច្រឹក សុខនីមបានថ្លែងថា ក្នុងឆ្នាំនេះសកម្មភាពទិញលក់អចលនទ្រព្យ នៅតែមានភាពរ៉ឹងមាំ ប៉ុន្តែដោយសារវាជាឆ្នាំនៃការបោះឆ្នោត មានអ្នកវិនិយោគមួយចំនួនមានការប្រុងប្រយ័ត្ន បើទោះជាស្ថានភាពនយោបា​យមិនមានអ្វីប្រែប្រួលក្តី ប៉ុន្តែអារម្មណ៍របស់ប្រជាជននៅតែគិត។លោកបន្តថា ផ្ទុយទៅវិញ ប្រសិនជាយើងមើលនិន្នាការនៃការវិនិយោគផ្ទាល់ពីបរទេស ជាទូទៅគឺមាននិន្នាការ​ថយចុះ ប៉ុន្តែជាចក្ខវិស័យសម្រាប់រយៈពេលវែង វិស័យនេះនៅតែមានភាពល្អប្រសើរនិង​រីកចម្រើនបន្តទៀត។

លោកបន្តថា អ្វីនៅពីក្រោយភាពរីកចម្រើននេះ ដោយសារកត្តាមួយចំនួនដូចជា ទី១ ប្រទេសកម្ពុជាកំពុងអភិវឌ្ឍន៍ ដែលអ្នកអភិវឌ្ឍន៍អាចចាប់យកឳកាស និងអាចរកបាន​ប្រាក់ចំណេញច្រើន ទី២ ប្រទេសនេះមានប្រាក់ចំណេញខ្ពស់ ពីការវិនិយោគច្រើនជាងប្រទេសអភិវឌ្ឍន៍ហើយ ទី៣ កំនើនសេដ្ឋកិច្ច និងការកើនឡើងប្រាក់ចំណូលរបស់ប្រជាពលរដ្ឋ ជាចលករជួយជម្រុញវិស័យនេះកាន់តែមានភាពរ៉ឹងមាំ ទី៤ ការគាំទ្រពីវិស័យមីក្រូហិរញ្ញវត្ថុ និងធនាគារ និងទី៥ ការវិនិយោគបន្ថែមពីអ្នកវិនិយោគបរទេសលើគំរោងនានា ដើម្បីពង្រីកមូលដ្ឋានអាជីវកម្មរបស់ពួកគេ (Investment Fund)។

នាយិការប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបាន​ថ្លែងថា ក្នុងឆ្នាំនេះយើងសង្កេតឃើញថា គំរោងវិនិយោគថ្មីពីអ្នកវិនិយោគក្នុងស្រុក និងលំហូរទុនវិនិយោគផ្ទាល់ពី​បរទេសបានថយចុះ ដែលមិនមែនដោយសារការបោះឆ្នោតនោះទេ ប៉ុន្តែដោយសារកត្តាទីផ្សារខ្លួនឯង ព្រោះគំរោងអភិវឌ្ឍន៍កន្លងមក៨០ភាគរយ ជាលំនៅដ្ឋាន ហេតុនេះទីផ្សារត្រូវការពេលវេលា ដើម្បីទទួលយកតម្រូវការបន្ថែម។

អ្នកនាងបន្តថា “កត្តានេះហើយ ដែលធ្វើឲ្យអ្នកវិនិយោគបរទេសមួយចំនួននៅរង់ចាំមើលស្ថានភាពទីផ្សារ ប៉ុន្តែមិនមែនពួកគេពន្យាពេលគំរោងរបស់ពួកគេនោះទេ”។អ្នកនា​ងបន្ថែមថា “បើមើលទីផ្សារវាមិនលើសតម្រូវការនោះទេ ប៉ុន្តែវាបានផ្លាស់ប្តូរនិន្នាការពី​បែបប្រពៃណី មកកាន់ស្តង់ដាកាន់តែទំនើបជាងមុន”៕

ដោយ គង់ សូរិយា

ភ្នំពេញ៖ បោះជំហ៊ានចូលក្នុងវិស័យជំនួញក្នុងដើមទសវត្សរ៍ទី៩០ លោកជំទាវឧក​ញ៉ាលឹម ឈីវហូ ត្រូវបានគេស្គាល់ឈ្មោះត្រឹមជាថៅកែស្រី ប៉ុន្តែ​ក្រោយមកលោកស្រី ត្រូវបានមជ្ឈដ្ឋានអ្នកជំនូញជាតិ អន្តរជាតិទទួលស្គាល់ពីជោគជ័យ និងកេរ្ត៍ឈ្មោះលោកស្រីកាន់តែច្រើន។

លោកជំទាវបានផ្តល់កិច្ចសម្ភាសន៍ពិសេសមួយ ជាមួយលោកលាងគង់ យិន ស្ថាបនិកនិងអគ្គនាយកគេហទំព័រ Propertyarea.asia ដើម្បីលើកឡើងពីការចាប់ផ្តើម​ជំនួញ និងភាពជោគជ័យរបស់លោកស្រី។

តើវិស័យអចលនទ្រព្យអ្វីថ្មី ដែលលោកជំទាវគ្រោងចាប់ផ្តើមវិនិយោគលើវិនិ​យោគបន្ថែម?

ក្រៅពីតំបន់សេដ្ឋកិច្ចពិសេស ដែលជួយដល់ប្រទេសជាតិច្រើន យើងក៏បាន និងកំពុងធ្វើការវិនិយោគលើវិស័យអចលនទ្រព្យផងដែរ នៅតាមខេត្ត និងនៅរាជធានីភ្នំពេញនៅពេលខាងមុខ។ គំរោងនេះគ្រោងបោះទុនទំហំ១៣០លានដុល្លារអាមេរិក។ គំរោងថ្មីនេះ រួមមានខុនដូ និងផ្សារទំនើប។ គំរោងនេះធ្វើឡើងដោយសហការជាមួយអ្នកវិនិយោគបរទេស។

ខ្ញុំមិនទាន់អាចនិយាយពីគំរោងនេះទេ ព្រោះក្រុមហ៊ុនរបស់ខ្ញុំចូលផ្សារហ៊ុន ហេតុនេះពេលគំរោងនេះចាប់ផ្តើមជាផ្លូវការ ខ្ញុំនឹងប្រកាសឲ្យដឹងហើយ។

នៅក្នុងពេលនេះស្ថានភាពការលក់លំនៅដ្ឋាន ខុនដូ ហាក់មានការថម​ថយ​ល្បឿន ហេតុអ្វីលោកជំទាវចាប់ផ្តើមគំរោងធំក្នុងកំឡុងពេលនេះ?

ខ្ញុំគិតថាទីផ្សារអចលនទ្រព្យមិនថមថយទេ យើងត្រូវសិក្សាទីផ្សារឲ្យបាន​ច្បាស់លាស់ ព្រោះឥឡូវនេះអ្នកវិនិយោគនៅបរទេស កំពុងសម្លឹងមកស្រុកខ្មែរ ដែលកំពុងមានការអភិវឌ្ឍយ៉ាងលឿន។ ហេតុនេះបើយើងជ្រើសរើសដៃគូត្រូវ និងវិនិយោគគំរោងខុនដូ និងលំនៅដ្ឋាន គឺយើងនៅតែអាចលក់បាន។ ខ្ញុំគិតថាតម្រូវការអចលនទ្រព្យនៅតែកើនឡើង តែយើងត្រូវចាប់ដៃគូឲ្យត្រឹមត្រូវ។

បើសិនជាប្រមើលមើលរយៈពេល១០ឆ្នាំខាងមុខ តើលោកជំទាវមើលឃើញវិស័យអចលនទ្រព្យនៅកម្ពុជានឹងបន្តរីកចំរើនឬយ៉ាងណា?

ខ្ញុំគិតថាវិស័យអចលនទ្រព្យនឹងបន្តរីកចំរើនបន្តទៀត ទោះជាមានការព្រួ​យបារម្ភរបស់ឧកញ៉ាមួយចំនួន គ្រោងស្ពាយលុយចេញក្រៅប្រទេស ដោយ​សារបារម្ភ ពីការបោះឆ្នោតជ្រើសរើសតំណាងរាស្រ្តនាពេលខាងមុខក្តី ប៉ុន្តែក្នុងនាមខ្ញុំជាអ្នកវិនិយោគក្នុងស្រុក ខ្ញុំនៅតែជឿជាក់លើសន្តិភាព ស្ថិរភាពរបស់ប្រទេស និងផ្តល់ទំនុកចិត្តដល់អ្នកវិនិយោគបរទេសថា ប្រទេសយើងនឹងបន្តរីកចំរើនបន្តទៀត។

ថ្មីៗនេះខ្ញុំបានជួបក្រុមហ៊ុនចិនធំៗ៧ទៅ៨ក្រុមហ៊ុន ដែលបានមកស្វែងរកឳកាសវិនិយោគនៅកម្ពុជា ហើយមានអ្នកវិនិយោគជាច្រើនទៀតកំពុងចូលមកកម្ពុជា ហេតុនេះខ្ញុំនៅតែជឿជាក់ថាកម្ពុជានឹងបន្តរីកចំរើន។ នៅប្រទេសថៃមាន​ក្រុមហ៊ុនជប៉ុនរាប់ម៉ឺន បើពួកគេមកវិនិយោគនៅកម្ពុជាតែ២ភាគរយ និងចិនជួយ​បន្តក់អ្នកវិនិយោគតែបន្តិចបន្ថែមទៀត យើងអាចធ្វើជាអ្នកមានទាំងអស់គ្នាបាន។

ជារួមវិស័យនេះនឹងបន្តរីកចម្រើនរយៈពេលវែងបន្តទៀត ដោយសារការ​ចូលមកដល់នៃក្រុមហ៊ុនវិនិយោគថ្មីៗ និងលក្ខខ័ណ្ឌនយោបាយ កំនើនសេដ្ឋកិច្ច​និងប្រព័ន្ឋច្បាប់បទដ្ឋានគតិយុត្តិដ៏ទាក់ទាញរបស់ប្រទេសនេះ៕

ភ្នំពេញ៖ ក្រុមហ៊ុនជប៉ុនCREED ASIA (Cambodia)Co, Ltd ដែលជាបុត្រសម្ព័ន្ឋរប​ស់ CREED GROUP បានសម្រេចបោះទុនវិនិយោគ៦០លានដុ​ល្លា​រអាមេរិកលើគំរោងខុនដូ និងលំនៅដ្ឋាននៅទីក្រុងភ្នំពេញ ជាគំរោងដែលកំពុងទទួលបានការគាំទ្រយ៉ាងខ្លាំងពីអ្នកវិនិយោគបរទេស និងប្រជាជនក្នុងស្រុក។

អគ្គនាយកនិងជាស្ថាបនិកនៃគេហទំព័រ Propertyarea.asia លោកលាងគង់ យិន បានជួបសម្ភាសន៍ជាមួយលោក TAKASHI Eguchi អគ្គនាយកក្រុមហ៊ុន CREED Asia (Cambodia) Co, Ltd ដើម្បីលើកឡើងពីទស្សនវិស័យ និងគំរោងវិនិយោគរបស់ក្រុមហ៊ុន ដែលជាបុត្រសម្ព័ន្ឋរបស់ CREED GROUP។

តើលោកចាប់ផ្តើមគំរោងវិនិយោគរបស់លោកយ៉ាងដូចម្តេច?

ក្រុមហ៊ុនរបស់យើងបានសហការចាប់ដៃគូជាមួយ ក្រុមហ៊ុន TRIPLE GEM នៅឆ្នាំ២០១២ និងបានចាប់ផ្តើមវិនិយោគខុនដូ Bodaiju Residences នៅឆ្នាំ២០១៣ ដែលរហូតមកទល់ពេលនេះ យើងបានវិនិយោគលើគំរោងខុនដូ និងលំនៅដ្ឋានមានលក្ខណៈជាបុរី។ គំរោងទី១ ជាគំរោងខុនដូ Bodaiju ដែលរហូតមកទល់ពេលនេះ យើងលក់បានអស់ជាង៩០ភាគរយហើយ និងកំពុងសាងសង់អាគារចំនួនបី ក្នុងចំណោមអាគារចំនួន៦ក្នុងគំរោងនេះ ប៉ុន្តែ​ការសាងសង់អាគារបីផ្សេងទៀត យើងមិនទាន់ចាប់ផ្តើមទេ ដោយកំពុងសិក្សាស្ថានភាពទីផ្សារ។

តើលោកមើលឃើញដូចម្តេចចំពោះគំរោងខុនដូនៅកម្ពុជា

តម្រូវការខុនដូសម្រាប់ផ្គត់ផ្គង់ប្រជាជនក្នុងស្រុក ពិតជាមានកម្រិតមែនទែន ប៉ុន្តែខុនដូរបស់យើងលក់បានច្រើនសម្រាប់ជនបរទេស ដែលភាគច្រើនជាជនជាតិចិន ជប៉ុន កូរ៉េ ចិនហុងកុង តៃវ៉ាន់ជាដើម។ យើងមិននិយាយពីគំរោងខុនដូ​បាន​ផ្គត់ផ្គង់លើសតម្រូវការនោះទេ ព្រោះយើងកំពុងសម្លឹងមើលទីផ្សារ ដែលការផ្គត់ផ្គង់មានភាពលើសតម្រូវការ។

ប៉ុន្តែសម្រាប់រយៈពេល១០ឆ្នាំខាងមុខ ខ្ញុំគិតថាប្រជាជនខ្មែរនឹងផ្លាស់ប្តូររបៀបនៃការគិត។ ពួកគេនឹងសម្រេចចិត្តរស់នៅតាមខុនដូ ឧទាហរណ៍ ជាក់ស្តែងដូចជា នៅទី​ក្រុងបាងកក ប្រទេសថៃ ប្រជាជនចង់រស់នៅលើលំនៅដ្ឋានជាប់ដី ប៉ុន្តែនៅក្នុងមជ្ឈមណ្ឌលពាណិជ្ជកម្មក្នុងទីក្រុង តំលៃដីមានតំលៃយ៉ាងខ្ពស់ ដែល ធ្វើពួកគេសម្រេចចិត្តរស់នៅតាមខុនដូ។

នៅក្នុងទីក្រុងហូជីមីញ ក៏ដូចគ្នា ប្រជាជនប្រាថ្នារស់នៅផ្ទះជាប់ដីដូចគ្នា​ប៉ុន្តែដោយសារដីមានតំលៃថ្លៃ និងទីក្រុងកាន់តែចង្អៀត ពួកគេសម្រេចចិត្តរស់នៅតាមខុនដូ។ នាពេលអនាគតប្រជាជនវ័យក្មេងនៅទីនេះ ពួកគេនឹងរស់នៅតាមខុនដូ ដែលមានទីតាំងនៅក្បែរឬកណ្តាលទីក្រុង។

ក្រៅពីខុនដូក្រុមហ៊ុនCREED GROUPបានសម្រេចចិត្តវិនិយោគលើបុរីមួយចំនួន តើលោកមើលឃើញទីផ្សារបុរីយ៉ាងដូចម្តេច?

យើងវិនិយោគដោយផ្តោតលើ ប្រជាជនមានប្រាក់ចំណូលមធ្យម​តាមរយៈការវិនិយោគលើបុរីមហាសែនសុខ ដែលស្ថិតនៅទល់មុខព្រលានយន្តហោះអ​ន្តរជាតិភ្នំពេញ។ គំរោងនេះដែលមានទំហំជាង១២ហិកតានេះ និងមានផ្ទះជាច្រើនរយខ្នងបានលក់ជិតអស់ហើយ ហើយផ្ទះជាង២០០បានបញ្ចប់ និងម្ចាស់ផ្ទះជាង១០០ល្វែងបានចាប់​ផ្តើមចូលស្នាក់នៅហើយ។

គំរោងនេះមានចំនួន៨ដំណាក់កាល និងគ្រោងបញ្ចប់ទាំងស្រុងនៅចុងឆ្នាំ២០១៨។

កាលពីថ្ងៃអាទិត្យកន្លងមកនេះ ក្រុមហ៊ុនរបស់លោកនិងដៃគូបានចាប់ផ្តើមគំរោងថ្មីមួយទៀត? តើគំរោងនេះមានលក្ខណៈពិសេសដូចម្តេច?

គំរោងនេះ ផ្តោតលើប្រជាជនមានប្រាក់ចំណូលមធ្យមកម្រិតខ្ពស់ ដោយ​សារវាមានតំលៃចាប់ពីជាង៨៧០០០ដុល្លារ រហូតដល់២០ម៉ឺនដុល្លារអាមេរិក។ មូល​ហេតុយើងវិនិយោគលើបុរីបន្ថែមទៀត ដោយសារប្រជាជនកម្ពុជានៅតែមា​នការ​ពេញនិយមរស់នៅផ្ទះជាប់ដី ហើយយើងជឿថាប្រជាជនកម្ពុជានៅតែពេ​ញចិត្តក្នុងការរស់នៅតាមបុរី ទើបយើងផ្តល់នូវផលិតផល សម្រាប់ប្រជាជនកម្ពុជា​អាចមានលទ្ឋភាព និងអាចរស់នៅបាន។

គំរោងបុរីរបស់យើងបានផ្តោតលើភាពបៃតង កន្លែងអង្គុយលេង ផ្លូវថ្មើជើង​អាងហែលទឹកជាដើម។

យើងមានដៃគូមួយទៀតគឺក្រុមហ៊ុន Hoosiers ដែលមានមូលដ្ឋាននៅប្រទេ​សជប៉ុន បានចូលរួមវិនិយោគលើគំរោងថ្មីនេះ ដែលមានឈ្មោះ ARATA ស្ថិតនៅក្បែរផ្សារទំនើប AEON ទី២។

ប្រជាជនកម្ពុជាមានការរអ៊ូរទាំច្រើនពីគុណភាពសំណង់តាមបុរីនានា តើគំរោងរបស់លោកបាននាំយកស្តង់ដាជប៉ុនមកប្រើប្រាស់ឬយ៉ាងណា?

គុណភាពនៅតាមលំនៅដ្ឋានរបស់យើង ត្រូវបានយកចិត្តទុកដាក់ជាពិសេ ស ហើយជាលទ្ឋផលអ្នកទិញលំនៅដ្ឋាន ក្នុងគំរោងយើងជាច្រើនបាននិយាយល្អពីគំរោងរបស់យើង។ ប្រសិនជាយើងធ្វើមិនល្អ ហើយឧទាហរណ៍យើងបង់រំលោះជាមួយពួកគេ ពួកគេអាចឈប់បង់ប្រាក់ ប៉ុន្តែអ្នកទិញលំនៅដ្ឋាននៅក្នុងបុរីមហាសែនសុខ ពួកគេរីករាយក្នុងការចូលស្នាក់នៅលំនៅដ្ឋាន ដែលពួកគេបានទិញ។

យើងបានផ្តល់សេវាជួសជុលរយៈពេល១ឆ្នាំ សម្រាប់ប្រជាជនដែលបានទិញលំនៅដ្ឋានរបស់យើង។

តើលោកសម្លឹងទៅអនាគតតយ៉ាងដូចម្តេច និងគ្រោងចាប់ផ្តើមវិនិយោគបន្ថែមដូចម្តេច?

​យើងជឿជាក់ចំពោះកម្ពុជានឹងមានសុវត្ថិភាព និងបន្តរីកចំរើន ដូច្នេះយើងអាចនឹងមានគំ​រោងដទៃទៀត ពិសេសវិនិយោគលើដីធ្លី។ ប្រទេសនេះ កំពុងក្លាយជាប្រទេសមានប្រាក់ចំណូល​មធ្យម ដែលស្តង់ដារស់នៅរបស់ប្រជាជនកាន់តែប្រសើរឡើង។

យើងមានគំរោងវិនិយោគលំនៅដ្ឋាន ដោយផ្តោតលើប្រជាជនមានប្រាក់ចំណូលមធ្យម ឬលើមធ្យម សម្រាប់គំរោងលំនៅដ្ឋានតំលៃចាប់ពី៤ទៅ៥ម៉ឺនដុល្លារ នាពេលអនាគតឆាប់ៗនេះ។

តើលោកមានគំរោងវិនិយោគនៅតាមបណ្តាខេត្តឬទេ ពិសេសខេត្តព្រះសី​ហនុ?

យើងមានឳកាសនិងកំពុងសម្លឹង រកការវិនិយោគនៅតាមបណ្តាខេត្តផងដែរ ពិសេសនៅខេត្តព្រះសីហនុ វាជាទីផ្សារកំពុងក្តៅគគុក សម្រាប់ការវិនិយោគ​របស់ចិន។ យើងអាចប្រកួតប្រជែងជាមួយពួកគេ ប៉ុន្តែវាមិនមែនជាទីផ្សារពិតប្រា​កដ តែអ្វីដែលយើងសម្លឹងមើល គឺសំដៅលើទីផ្សារដែលមានតម្រូវការពីប្រជាជនក្នុងស្រុកពិតប្រាកដ។

តើរដ្ឋាភិបាលផ្តល់ការលើកទឹកចិត្តយ៉ាងដូចម្តេច ចំពោះគំរោងវិនិយោគលើ​ហេដ្ឋារចនាសម្ព័ន្ឋនានាជាមួយគំរោងរបស់លោក?

ខ្ញុំមិនមានអ្វីនិយាយច្រើនទេ តែអ្វីជាជាការយល់ឃើញរបស់ខ្ញុំ គឺរដ្ឋាភិបាលកម្ពុជាមានគោលនយោបាយ បើកចំហយ៉ាងខ្លាំងសម្រាប់អ្នកវិនិយោគបរទេ​ស ដែលផ្តល់ភាពងាយស្រូល​យ៉ាងខ្លាំងដល់អ្នកវិនិយោគ និងជារឿងដែលល្អសម្រា​ប់អ្វីដែលយើងមានអារម្មណ៍កក់ក្តៅក្នុងការរស់នៅទីនេះ។

ប៉ុន្តែបើនិយាយពីហេដ្ឋារចនាសម្ព័ន្ឋវិញ រដ្ឋាភិបាលកម្ពុជាហាក់មិនមានគំរោងវិនិយោគសាងសង់ផ្លូវនៅក្នុងទីក្រុងជាក់លាក់ទេ ដែលយើងត្រូវវិនិយោគលើផ្លូវ ដែលជាការងាររបស់រដ្ឋាភិបាលខ្លួនឯងត្រូវធ្វើ តែយើងសម្រេចចិត្តធ្វើវា ដើម្បីភ្ជាប់ទៅកាន់គំរោងរបស់យើង ប៉ុន្តែយើងរីករាយនូវការចូលរួមចំណែកអភិវឌ្ឍន៍លើហេដ្ឋារចនាសម្ព័ន្ឋទាំងនោះ៕

ដោយ វុត្ថា

ភ្នំពេញ៖ យោងតាមការស្ថិតិការិយាធិបតេយ្យជាតិ (NBS) របស់ប្រទេសចិនដែលបានចេញផ្សាយនៅថ្ងៃពុធនេះបានអោយដឹងថា ការវិនិយោគអចលនទ្រព្យរបស់ប្រទេសចិនបានកើនឡើង១០,៤ភាគរយក្នុងខែមិនា និងមេសានេះ បើធៀបនឹងរយៈពេលដូចគ្នាកាលពីឆ្នាំមុន។

នេះ គឺជាការវិនិយោគអចលនទ្រព្យដែលលឿនបំផុត ក្នុងប្រទេសចាប់តាំពីខែមករាដល់ខែកុម្ភៈ ដែលគិតត្រឹមកំឡុងឆ្នាំ២០១៥កន្លងទៅនេះ ហើយការវិនិយោគអចលនទ្រព្យជារួមមានការកើនឡើង៩,៩%ផងដែរ ក្នុងរយៈពេលពីរខែដំបូងនៃឆ្នាំនេះ។

ក្រុមអ្នកវិភាគបានលើកឡើងថា កំណើននៃការវិនិយោគលើអចលនទ្រព្យនេះ គឺអាស្រ័យលើតំលៃដីធ្លី កំពុងមានការកើនឡើង ស្របពេលដែលរដ្ឋាភិបាលបានប្រញាប់ប្រញាល់ បង្កើនការវិនិយោគទៅគម្រោងសាងសង់ផ្ទះសាធារណៈ។

លោក Yang Yewei អ្នកវិភាគប្រចាំក្រុមហ៊ុន Southwest Securities ដែលមានមូលដ្ឋាននៅទីក្រុងប៉េកាំងបានអោយដឹងថា តម្លៃដីធ្លីបានកើនឡើងយ៉ាងខ្លាំង ចាប់តាំងពីឆ្នាំមុន ដោយបូករួមតម្លៃវិនិយោគសរុបផងដែរ។លោកបន្តថា កិច្ចខិតខំប្រឹងប្រែងរបស់ចិន ដើម្បីរុះរើតំបន់ឆ្នេរ និងផ្តល់ការតាំងទីលំនៅថ្មីដែលមានតម្លៃថោក នៅពេលដែលទីក្រុងធំ ៗ ដូចជាទីក្រុង ស៊ឹនជិនប្រឈមនឹងកង្វះខាតដី។

ខណៈពេលដែលមានការទិញដីសរុប បានកើនឡើងត្រឹមតែ០,៥ភាគរយ ក្នុងរយៈពេលបីខែដំបូងនៃឆ្នាំ២០១៨ បើប្រៀបធៀបទៅនឹងឆ្នាំមុន តម្លៃនៃការដោះដូរដីធ្លីសរុបបានកើនឡើង២០,៣ ភាគរយក្នុងរយៈពេលដូចគ្នា។

របាយការណ៍ដដែលបានបន្តឲ្យដឹងទៀតថា លំហូរនៃការវិភាគនៃការវិនិយោគលើដីធ្លី ជាមួយទិន្នន័យផ្លូវការបានបង្ហាញ ពីទីផ្សាររឹងមាំនៅក្នុងទីក្រុងតូចៗរបស់ប្រទេសចិន ខណៈចំនួនលំនៅដ្ឋាន ដែលមិនទាន់បានលក់ចេញ នៅក្នុងប្រទេសចិនបានធ្លាក់ចុះ១៦,៧ភាគរយនៅក្នុងឆ្នាំនេះរហូតដល់ចុងខែមីនា៕