(ភ្នំពេញ)៖ នៅក្នុងជំនួបជាមួយប្រតិភូកសិកម្មចិន ដឹកនាំដោយលោក ហ៊ឺ ជៀនយ៉ាង (HE Jianxiang) អគ្គនាយករង ទទួលបន្ទុកការិយាល័យកែច្នៃផលិតផលកសិកម្ម នៃក្រសួងកសិកម្មប្រទេសចិន ឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា បានស្នើភាគីចិនធ្វើការអភិវឌ្ឍចង្វាក់តម្លៃបន្ថែម សម្រាប់ដំណាំដំឡូងមី និងមៀនប៉ៃលិន ដើម្បីពង្រីកការនាំចេញផលិតផលទាំងពីរនេះឲ្យបានអតិបរិមា។

ឯកឧត្តមរដ្ឋមន្ត្រី បានជម្រាបប្រតិភូចិន អំពីអត្ថប្រយោជន៍នៃដំឡូងមី ដែលជាដំណាំអទិភាពទី២ និងមានសក្តានុពលនាំចេញខ្ពស់របស់កម្ពុជា បន្ទាប់ពីដំណាំស្រូវ ព្រមទាំងផ្លែមៀនប៉ៃលិន ដែលជាឈើហូបផ្លែមានតម្រូវការខ្ពស់នៅលើទីផ្សារ។ ឯកឧត្តមបានគូសបញ្ជាក់ថា កម្ពុជាកំពុងចងក្រងគោលនយោបាយដំឡូងមី និងដំណាំផ្សេងៗរួមទាំងមៀនប៉ៃលិន ដើម្បីជំរុញការអភិវឌ្ឍចង្វាក់តម្លៃ និងការនាំចេញ សំដៅធ្វើពិពិធកម្មវិស័យការងារជូនប្រជាជន និងកាត់បន្ថយភាពក្រីក្រ។

«កម្ពុជាមានដីអំណោយផលសម្រាប់វិស័យកសិកម្ម ជាពិសេសដំឡូងមី និងមៀនប៉ៃលិន ហើយយើងចង់សហការជាមួយវិនិយោគិនចិន ដើម្បីកែច្នៃផលិតផលទាំងពីរនេះ សំដៅនាំចេញទៅកាន់ប្រទេសចិនផ្ទាល់ ដោយពុំចាំបាច់ឆ្លងកាត់ប្រទេសទីបី ដូចបច្ចុប្បន្ន» ឯកឧត្តម ប៉ាន សូរស័ក្តិ បានគូសបញ្ជាក់។

ជាការឆ្លើយតប លោក ហ៊ឺ ជៀនយ៉ាង បានថ្លែងអំណរគុណចំពោះ ឯកឧត្តមរដ្ឋមន្ត្រីដែលបានផ្តល់ព័ត៌មានអំពីដំណាំសក្តានុពលរបស់កម្ពុជា ហើយលោកបានសន្យានឹងយកសំណើនេះ ទៅពិភាក្សាឲ្យបានស៊ីជម្រៅ និងសិក្សាបន្ថែម អំពីលទ្ធភាពសហការវិនិយោគលើការអភិវឌ្ឍចង្វាក់តម្លៃនៃផលិតផលទាំងពីរ និងដំណាំសក្តានុពលផ្សេងៗទៀតរបស់កម្ពុជា ដូចជា ពោត ស្រូវ និងស្វាយជាដើម។

ទន្ទឹមគ្នានេះដែរ លោក ហ៊ឺ ជៀនយ៉ាង ក៏បានជូនអនុសាសន៍ដល់ ឯកឧត្តមរដ្ឋមន្ត្រី លើកយកសំណើនេះ ទៅពិភាក្សាជាមួយរដ្ឋមន្ត្រីកសិកម្មចិន ដែលនឹងអញ្ជើញអមដំណើរ ឯកឧត្តម លី គឺឈាំង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិន ដើម្បីបំពេញទស្សនកិច្ចផ្លូវការនៅកម្ពុជា នាដើមសប្តាហ៍ក្រោយ។

សូមបញ្ជាក់ថា ទំហំពាណិជ្ជកម្មទ្វេភាគីសរុបរវាងចិន និងកម្ពុជា បានកើនឡើងយ៉ាងឆាប់រហ័ស ជាមធ្យម ២៦% ក្នុងរយៈពេល ១០ឆ្នាំចុងក្រោយ។ កាលពីឆ្នាំ ២០១៦ ប្រទេសទាំងពីរ សម្រេចបានទំហំពាណិជ្ជកម្ម ដល់ទៅ ៤,៨០០លានដុល្លារអាមេរិក ក្នុងនោះការនាំចេញរបស់កម្ពុជាមានទឹកប្រាក់ ៨៣០លានដុល្លារ និងនាំចូល ៣,៩០០លានដុល្លារ។ ចិន គឺជាប្រទេសវិនិយោគធំជាងគេនៅកម្ពុជា ដែលគិតត្រឹមឆ្នាំ ២០១៦ វិនិយោគរបស់ចិនមានចំនួន ៥,០០០,១០០លានដុល្លារ លើវិស័យមួយចំនួនដូចជា កម្មន្តសាល សំណង់ វាយនភ័ណ និងអគ្គិសនី។ ដោយឡែកភ្ញៀវទេសចរណ៍ចិន ដែលមកកម្ពុជាបានកើនដល់ ៨៣ម៉ឺននាក់នៅក្នុងឆ្នាំ ២០១៦ គឺបានកើនឡើង ២០% បើធៀបនឹងឆ្នាំ២០១៥។ នៅក្នុងឆ្នាំ២០១៨នេះ ចិនក៏បានយល់ព្រមឲ្យកម្ពុជានាំចូលអង្ករ ៣០ម៉ឺនតោនផងដែរ៕

មិនត្រឹមតែផ្តល់ជំនួយនោះទេ ចិនក៏បានធ្វើការវិនិយោគច្រើនជាងគេមកលើប្រទេសកម្ពុជាផងដែរ។ ក្រុមហ៊ុនធំៗជាច្រើននៃអ្នកវិនិយោគិនចិន បានដំណើរការនៅកម្ពុជា ក្រៅពីនោះ សូម្បីអ្នករកស៊ីខ្នាតមធ្យម និងខ្នាតតូចមួយចំនួន ក៏បានជួលផ្ទះរបស់ពលរដ្ឋខ្មែរ ដើម្បីបើកកន្លែងប្រកបមុខរបរផងដែរ។ គេឃើញមាន បណ្តុំនៃកន្លែងបើកហាង ភោជនីយដ្ឋាន ផ្ទះសំណាក់ និងកន្លែងលក់ដូរផ្សេងៗទៀតជាច្រើន សុទ្ធតែមាន យីហោចិន នៅមុខព្រលានយន្តហោះអន្តរជាតិភ្នំពេញ ។

បើគេធ្វើដំណើរចេញពីរាជធានីភ្នំពេញឆ្លងកាត់មុខព្រលានយន្តហោះអន្តរជាតិភ្នំពេញតាមបណ្តោយ ផ្លូវសហព័ន្ធរុស្ស៊ី នៅខាងស្តាំដៃគេនិងមើលឃើញ អាគារនិងផ្ទះជាជូ មានលើកស្លាកយីហោភាគច្រើន សុទ្ធតែយីហោរបស់ចិន។ ថ្វីបើជាយីយោឈ្មោះចិនក៏ពិតមែន ប៉ុន្តែគេមិនភ្លេចដាក់អក្សរខ្មែរឡើយ ។ បណ្តុំនៃអ្នក រកស៊ីជាជនជាតិចិន បើកដំណើរការទាំងនោះ មានហាងទំនិញផ្សេងៗ ផ្ទះសំណាក់ និងសណ្ឋាគារជាដើម។

ជាតំបន់សេដ្ឋកិច្ចតូចមួយ ប៉ុន្តែវាបានជួយឲ្យ ពលរដ្ឋខ្មែរផ្សេងៗទៀតមានការងារធ្វើ និងអាចរកចំណូលប្រចាំថ្ងៃបានផងដែរ។ អ្នករត់ម៉ូតូឌុប និងអ្នករត់ម៉ូតូរ៉ឺម៉ក កង់បីនៅទីនោះ ដែលសុំមិនបញ្ជេញអត្តសញ្ញាណ បានអោយដឹងថា ពួកគាត់រង់ចាំដឹកជញ្ញូនភ្ញៀវជាជនជាតិខ្មែរ និងជនជាតិចិន ទទួលបាន ចំណូលគួសម សម្រប់ផ្គត់ផ្គង់ជីវភាពគ្រួសារប្រចាំថ្ងៃ។ ពួកគាត់ថា នៅថ្ងៃសៅ និងថ្ងៃអាទិត្យ ជាពេលវេលា ល្អដែលអាចរកចំណូលបានច្រើន ព្រោះសំបូរភ្ញៀវជនជាតិចិន ចេញចូលទីនោះ។

ជាមួយផ្លូវម្ខាងទៀតដែលកំពុងសាងសង់ផងនោះ ទីតាំងមុខព្រលានយន្តហោះ បាននិងកំពុងបង្ក ភាពងាយស្រួលដល់ប្រជាពលរដ្ឋខ្មែរផ្សេងទៀត អាចឆ្លៀតឳកាសធ្វើការលក់ដូរបានមួយចំនួនផងដែរនៅតាមបណ្តោយចិញ្ចើមផ្លូវនោះ។ នៅពេលថ្ងៃគេឃើញមានការដាក់លក់ ភេសជ្ជៈតាមរទេះរុញ ឬរ៉ឺម៉ក កង់បីជាបន្តបន្ទាប់គ្នា រីឯនៅពេលល្ងាច គេឃើញមានការដាក់តាំងលក់ នូវចំណីផ្សេងៗ ដែលមាន មាន់អាំង ត្រីដុត គោដុតជាដើម។

យ៉ាងណាក៏ដោយ សោភណ្ឌភាពនៅទីនេះ ហាក់មិនទាន់បានល្អឡើយ។ គេឃើញមាន ខ្សែភ្លើង និងខ្សែកាប រាយប៉ាយរយោងរយាន ខុសស្តង់ដា ព្រោះខ្សែទាំងនោះ នៅគៀកជាប់និងផ្ទះពេក ។ យ៉ាងនេះក្តី គេសង្ឃឹមថា នៅពេលផ្លូវធ្វើរួចរាល់ហើយ ខ្សែភ្លើងនិងខ្សែកាបទាំងនោះ និងត្រូវរៀបចំមាន សណ្តាប់ធ្នាប់ឡើងវិញជាមិនខាន ។

ដោយ គង់ សូរិយា

ភ្នំពេញ៖ ប្រទេសកម្ពុជានឹងទទួលបានអ្នកវិនិយោគ និងអត្ថប្រយោជន៍ច្រើនថែមទៀត តាមរយៈការធ្វើជាម្ចាស់ផ្ទះ ក្នុងកិច្ចប្រជុំកំពូលប្រមុខថ្នាក់ដឹកនាំបណ្ដាប្រទេសអនុតំបន់ទន្លេមេគង្គ ឡានឆាងនៅកម្ពុជា នាថ្ងៃទី ១០ ដល់ថ្ងៃទី ១២ ខែមករាខាងមុខនេះ។

លោកបណ្ឌិត សុក ស៊ីផាណាទីប្រឹក្សារាជរដ្ឋាភិបាលកម្ពុជា បានលើកឡើងក្នុងវេទិការសាធារណៈ កិច្ចសហប្រតិបត្តិការ មេគង្គ ឡានឆាង  “ការកសាងសន្តិភាព និងភាពរុងរឿងសម្រាប់មហាអនុតំបន់ទន្លេមេគង្គ”   នាព្រឹកថ្ងៃទី ៤ខែមករានេះថា ការធ្វើជាម្ចាស់ផ្ទះក្នុងកិច្ចប្រជុំកំពូលប្រមុខថ្នាក់ដឹកនាំ នៃបណ្ដាប្រទេសអនុតំបន់ទន្លេមេគង្គ ឡានឆាងនាថ្ងៃទី ១០ដល់ថ្ងៃទី ១២ មករាខាងមុខ គឺជាមោទនភាពរបស់កម្ពុជាដែលមានសមត្ថភាពរៀបចំកិច្ចប្រជុំកំពូល ហើយវាក៏ជាការបង្ហាញឲ្យឃើញថាប្រទេសកម្ពុជាជាប្រទេសកំពុងរីកចំរើន ជាពិសេសសម្រាប់ការទទួលយកនូវការវិនិយោគ។

លោកបន្តថា “នេះជាមោទនភាព និងជាឳកាសពិសេសសម្រាប់កម្ពុជាបង្ហាញពីកិត្យានុភាពរបស់ខ្លួនទៅកាន់អន្តរជាតិ ក្នុងនាមជាប្រទេសដែលមានការរីកចម្រើន និងសក្តានុពលសម្រាប់ការវិនិយោគ”។លោកបន្តថា “បើនិយាយពីទិដ្ឋភាព ច្បាប់ និងក្របខ័ណ្ឌគតិយុត្តិនានាកម្ពុជាមានស្ទើរគ្រប់គ្រាន់ហើយ សម្រាប់ការពារនិងលើកទឹកចិត្តដល់អ្នកវិនិយោគអន្តរជាតិនានា”។

អនុប្រធានក្រុមប្រឹក្សាភិបាល នៃវិទ្យាស្ថានកម្ពុជាសម្រាប់ការសិក្សាយុទ្ធសាស្រ្តលោកបណ្ឌិតឈាង វណ្ណារិទ្ធបានលើកឡើងស្រដៀងគ្នាថា កិច្ចសហប្រតិបត្តិការមេគង្គ ឡានឆាងនេះ ក៏ជាកត្តាសំខាន់ក្នុងការជុំរុញសេដ្ឋកិច្ចកម្ពុជាផងដែរ ជាពិសេសការតភ្ជាប់រវាងប្រទេសក្នុងអនុតំបន់ទន្លេមេគង្គ និងធ្វើឲ្យបណ្ដាញនៃការផលិតមានចរន្តជាមួយគ្នា។

កិច្ចសហប្រតិបត្តិការមេគង្គ ឡានឆាងមានប្រទេសជាសមាជិកចំនួន៦ក្នុងនោះមានប្រទេសដូចជា ចិន ភូមា ឡាវ ថៃ វៀតណាម និងកម្ពុជាដែលបានចាប់ផ្តើមកាលពីឆ្នាំ២០១៥។ ប្រទេសទាំងនេះបានចែករំលែកទឹកទន្លេ ព្រំដែន និងមានវប្បធ័មស្រដៀងគ្នា ហើយកិច្ចសហប្រតិបត្តិការនេះបានអនុម័តជាផ្លូវការនៅដើមឆ្នាំ២០១៦។

គោលបំណងសំខាន់នៃគំនិតផ្ដួចផ្ដើមកិច្ចសហប្រតិបត្តិការមេគង្គ ឡានឆាងនេះ គឺដើម្បីជម្រុញឲ្យមានកិច្ចសហប្រតិបត្តិការសេដ្ឋកិច្ចកាន់តែជិតស្និទ្ធ និងសារៈសំខាន់មួយទៀតគឺការសហការគ្នា ដើម្បីសម្រេចបាននូវការងារស្នូលថ្នាក់តំបន់មួយចំនួន ដូចជា ការគ្រប់គ្រងធនធានទឹកប្រកបដោយនិរន្តរភាព ដោយមិនត្រឹមតែបម្រើផលប្រយោជន៍ដល់ប្រទេ​សជាសមាជិកនោះទេ ប៉ុន្តែវាក៏ជាការបង្ហាញពីការប្ដេជ្ញាចិត្តច្បាស់លាស់ ក្នុងការសម្រេចរបៀបវារៈអភិវឌ្ឍន៍ដោយនិរន្តរភាពសហប្រជាជាតិឆ្នាំ ២០៣០ផងដែរ៕

ដោយ គង់ សូរិយា

ភ្នំពេញ៖ ហាងអាហាររហ័សទាន់ចិត្តMacdonald’s នឹងឈានជើងចូលទីផ្សារកម្ពុជានៅពេលឆាប់ៗនេះ ខណៈបច្ចុប្បន្ន​អ្នកមានបំណងទិញ Franchise ហាងអាហាររហ័សទាន់ចិត្តនេះ កំពុចចារជាមួយក្រុមហ៊ុនមេ។

តាមប្រភពព៌តមានដែលនិយាយ ក្នុងលក្ខខ័ណ្ឌមិនបញ្ចេញឈ្មោះបានឲ្យ​ដឹងថា អ្នកវិនិយោគក្នុងស្រុកមួយរូប កំពុងធ្វើការចចាយ៉ាងស្វិតស្វាញ ដើម្បីនាំ​យកហាងអាហាររហ័សទាន់ចិត្ត Macdonald’s មកកម្ពុជា ហើយគេរំពឹងថា ការនាំ​Franchise នេះមកកម្ពុជានឹងទទួលបានជោគជ័យនៅក្នុងឆ្នាំនេះ។

ហាងអាហាររហ័សទាន់ចិត្ត Macdonald’s មានសាខាចំនួន១២០ប្រទេស ក្នុងពិភពលោក និងមានមនុស្សទទួលទានអាហារនេះ ចំនួន៦៨លាននាក់ក្នុងមួយថ្ងៃ មានភោជ​នីយដ្ឋានសរុប៣៦៨៩៩ទីតាំង និងផ្តល់ការងារដល់ប្រជាពលរដ្ឋចំនួន៣៧៥ពាន់នាក់កាលពីដំណាច់ឆ្នាំ២០១៦។

ទស្សនវិទ្យារបស់ MacDonald’s គឺតម្រូវឲ្យអ្នកទិញ Franchise និមួយៗ ត្រូវ​ទៅលាងបន្ទប់ទឹកនៅក្រុមហ៊ុនមេ របស់ក្រុមហ៊ុននេះនៅសហរដ្ឋអាមេរិក៕

​ដោយ វុត្ថា
​ភ្នំពេញ៖ វិស័យហិរញ្ញវត្ថុកម្ពុជា ដែលជាសរសរស្តម្ភយ៉ាងសំខាន់ក្នុងការទ្រទ្រង់សេដ្ឋកិច្ចជាតិ កំពុងមានការរីកចម្រើនគ្រប់ផ្នែកក្នុងឆ្នាំ២០១៧ដែលទើប​បញ្ចប់កាលពីពេលថ្មីៗនេះ។

អគ្គទេសាភិបាលធនាគារជាតិនៃកម្ពុជា លោកជា ចាន់តូបានមានប្រសា​សន៍ឲ្យដឹងនាព្រឹកថ្ងៃទី៤ មករា ឆ្នាំ២០១៨នេះថា គោលនយោបាយរូបិយវត្ថុត្រូវបានអនុវត្តប្រកបដោយភាពប្រុងប្រយ័ត្ន បត់បែន និងមានសង្គតិភាពជាមួយគោលនយោបាយសារពើពន្ធ ហើយបានរួមចំណែករក្សាស្ថិរភាពម៉ាក្រូសេដ្ឋកិច្ចយ៉ាងរឹងមាំ។ អត្រាប្តូរប្រាក់ត្រូវបានរក្សាឱ្យមានស្ថិរភាពក្នុងរង្វង់៤.០៥០រៀល ក្នុងមួយដុល្លារអាមេរិក ហើយអត្រាអតិផរណាជាមធ្យមនៅឆ្នាំ២០១៧ មានកម្រិតទាបអាចគ្រប់គ្រងបាន ប្រមាណ២,៩ភាគរយ។

ក្រៅពីនេះ ប្រព័ន្ធធនាគារនៅកម្ពុជាសម្រេចបានការអភិវឌ្ឍប្រកបដោយបរិយាប័ន្ននិងមានស្ថិរភាព។ ប្រព័ន្ធធនាគារក៏ត្រូវបានពង្រឹងភាពធន់ នឹងហានិភ័យសន្ទនីយភាព ដោយបានបង្កើនគុណភាព និងកម្រិតសន្ទនីយភាពរបស់គ្រឹះស្ថានធនាគារនិងហិរញ្ញវត្ថុ។ គោលការណ៍តម្លាភាព ការប្រកួតប្រជែងដោយសមភាព និងកិច្ចការពារអតិថិជន ក៏ត្រូវបានលើកកម្ពស់ផងដែរ។

ជាមួយគ្នានេះនៅឆ្នាំ២០១៧ វិស័យធនាគារបានបម្រើសេវាហិរញ្ញវត្ថុដល់ប្រជាជនពេញវ័យបន្ថែមប្រមាណ ៦០ ម៉ឺននាក់ ដែលធ្វើឱ្យអត្រាបរិយាប័ន្នហិរញ្ញវត្ថុកើនដល់ ៥៦% ស្មើនឹងចំនួនប្រជាជនពេញវ័យប្រមាណ ៦,២ លាននាក់។ ធនាគារពិភពលោកបានផ្តល់ចំណាត់ថ្នាក់ទី៧ដល់កម្ពុជា ជាប្រទេសដែលមានភាពងាយស្រួលជាងគេលើពិភពលោកក្នុងការទទួលបានហិរញ្ញប្បទាន។

ធនាគារជាតិនៃកម្ពុជាក៏បានចេញសេចក្តីជូនដំណឹងចំពោះការទប់ស្កាត់ការប្រើប្រាស់ ចរាចរ ទិញ លក់ ទូទាត់ និងផ្សព្វផ្សាយរូបិយវត្ថុ Crypto Currencies ដោយហេតុថាCrypto Currencies ជាឧបករណ៍ថ្មីមិនមានការគ្រប់គ្រ​ង​ច្បាស់លាស់ ដូច្នេះអាចនាំមកនូវហានិភ័យខ្ពស់ចំពោះអ្នកប្រើប្រាស់ និងអាចជាមធ្យោបាយមួយក្នុងការសម្អាតប្រាក់។

ធនាគារជាតិនៃកម្ពុជាបានកសាង និងគ្រោងនឹងសម្ពោធបើកដំណើរការជាផ្លូវការសារមន្ទីរសេដ្ឋកិច្ចនិងរូបិយវត្ថុ នាដើមឆ្នាំ២០១៨នេះ តាមការណែនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី៨ ខែតុលា ឆ្នាំ២០០៩៕

ដោយ រ៉ាវី

ភ្នំពេញ៖ ប្រទេសកម្ពុជាកំពុងស្ថិតនៅលើផ្លូវឆ្ពោះទៅរកការសម្រេចនូវការនាំចេញអង្ករឲ្យបាន១លានតោននៅពេលឆាប់ៗខាងមុខនេះ ខណៈការនាំចេញ​ឆ្នាំនេះសម្រេចបានជាង៦៣ម៉ឺនតោនរួចទៅហើយ។

យោងតាមរបាយការណ៍ ដែលទទួលបានពីក្រសួងកសិកម្ម រុក្ខប្រមាញ់ និងនេសាទ បានបង្ហាញថា នៅក្នុងរយៈពេល12ខែក្នុងឆ្នាំ2017កន្លងទៅនេះ កម្ពុជាធ្វើការនាំចេញអង្ករ ទៅក្រៅប្រទេសសម្រេចបានចំនួន635,679តោន កើនឡើងប្រមាណ17,30% ធៀបទៅនឹងរយៈពេលដូចគ្នាកាលពីឆ្នាំ2016 ដែលមានត្រឹម 542, 144 តោន តែប៉ុណ្ណោះ។

របាយការណ៍ដែលបានបញ្ជាក់ទៀតថា នៅក្នុងឆ្នាំនេះអង្កររបស់កម្ពុជា បាននាំចេញ ទៅកាន់ប្រទេសជាង60នៅលើពិភពលោក ក្នុងនោះនាំទៅកាន់ប្រទេសចិនច្រើនជាងគេ ដែលមានចំនួនជិត20ម៉ឺនតោន ប្រទេសបារាំងជិត8 ម៉ឺនតោន និងប្រទេសប៉ូឡូញបានជាង4ម៉ឺនតោន។ ដោយឡែក សម្រាប់ក្រុមហ៊ុនដែលនាំចេញអង្ករ ទៅកាន់ក្រៅប្រទេសសរុបមានចំនួន​84ក្រុមហ៊ុន ក្នុងនោះក្រុមហ៊ុនដែលនាំចេញបានច្រើនជាងគេ រួមមាន ក្រុមហ៊ុន Cristal Rice នាំចេញបានជាង 7ម៉ឺនតោន ក្រុមហ៊ុនបៃតង បានជាង 6ម៉ឺនតោន និងក្រុមហ៊ុន City Rice បានចំនួនជាង 5ម៉ឺនតោន។

ជាមួយនឹងលទ្ធផលនៃការនាំចេញអង្ករ ទៅកាន់បរទេសខាងលើនេះ លោកវេង សាខុន រដ្ឋមន្ត្រីក្រសួងកសិកម្ម រក្ខប្រមាញ់ និងនេសាទ ក៏បានប្រកាសឱ្យដឹងពីកំណើននៃការទិន្នផលស្រូវ ដែលកម្ពុជាទទួលបាននៅក្នុងឆ្នាំ2017នេះ មានចំនួនកើនឡើងផង ពោលគឺចាប់ពីខែមករា រហូតដល់ខែធ្នូ កម្ពុជាទទួលបានទិន្នផលស្រូវចំនួនជាង 10,27 លានតោន។ ថ្លែងនៅក្នុងពិធីវេទិកាស្ដីពី «កសិកម្ម រុក្ខប្រមាញ់ និងនេសាទ»​ រដ្ឋមន្ត្រីរូបនេះបានបញ្ជាក់ឱ្យដឹងទៀតថា ក្នុងរយៈពេល5ឆ្នាំកន្លងនេះ វិស័យកសិកម្មមានការរីកចម្រើនគួរឱ្យកត់សម្គាល់។ ជាក់ស្ដែង ផ្ទៃដីដាំដុះដំណាំស្រូវបានកើនពី 3លានហិកតា នៅឆ្នាំ2012 ដល់3.09លានហិកតានៅឆ្នាំ2016។

លោក វេង សាខុន បានលើកឡើងអំពីសន្ទុះនៃកំណើន ផ្ទៃដីដាំដុះដំណាំរួមផ្សំ និងដំណាំឧស្សាហកម្មកើនឡើងជាលំដាប់ ក្នុងរយៈពេលកន្លងមកនេះ ពោលគឺបាន កើនពី0.91លានហិកតា កាលពីឆ្នាំ 2012 ដល់ជាង1លានហិកតា នៅឆ្នាំ2016 ហើយបរិមាណផលបានកើនពី10.85លានតោន កាលពីឆ្នាំ2012 ដល់ 16.77លានតោន នៅឆ្នាំ2016។ ដោយឡែកការនាំចេញផលិតផលកសិកម្មសរុបមានការកើនឡើងជាលំដាប់ ហើយមានសន្ទុះខ្លាំងក្នុងរយៈពេល5ឆ្នាំ​ចុងក្រោយនេះ ដែលនៅឆ្នាំ2012 ការនាំចេញផលិតផលកសិកម្មស​ម្រេចបានចំនួន 680.46 ពាន់តោន កើនដល់ 4.7លានតោន នៅឆ្នាំ2016។

លោកឧកញ៉ាភួ ពុយប្រធានសម្ព័ន្ឋសមាគមរោងម៉ាស៊ីនកិនស្រូវកម្ពុជាបានថ្លែងថា វិស័យអង្ករកម្ពុជាកំពុងមានសញ្ញាវិជ្ជមាន ដោយសារកំនើននៃការ​នាំចេញ និងផលិតកម្មដំណាំស្រូវមានការកើនឡើង ពិសេសស្រូវក្រអូប ដែលជាប្រភេទស្រូវសម្រាប់នាំចេញ។លោកបន្តថា ទោះជាយើងមិនសម្រេចបានតាមគោលដៅរបស់រដ្ឋាភិបាល ក្នុងការនាំអង្ករចេញឲ្យបាន១លានតោននៅឆ្នាំ២០១៥ក្តី ប៉ុន្តែបច្ចុប្បន្នកម្ពុជាកំពុងឆ្ពោះទៅសម្រេចគោលដៅនេះ នៅពេលឆាប់ៗ ខាងមុខ៕

ដោយ គង់ សូរិយា

ភ្នំពេញ៖ ជាមួយនឹងលក្ខខ័ណ្ឌឥណទានល្អប្រសើរ កម្រិតយល់ដឹងរបស់ប្រជាពលរដ្ឋល្អជាងមុន បានធ្វើឲ្យការទិញរថយន្តបង់រំលស់បបានកើនឡើងខ្ពស់ជារៀងរាល់ឆ្នាំ។

អគ្គនាយផ្នែកបច្ចេកទេសយានយន្តនៃក្រុមហ៊ុន RMA Asia លោក សេង វឹង បានថ្លែងឲ្យដឹងតាមទូរស័ព្ទនាថ្ងៃទី៣ មករានេះថា ឆ្នាំ២០១៧ការនាំចូលរថយន្តថ្មីកើនឡើងក្នុងរង្វង់២០ភាគរយ ហើ​យចំនួនរថយន្តថ្មីចរាចរលើដងផ្លូវ បានកើនរហូតដល់ចន្លោះ១៣ ទៅ១៧ភាគរយ​នៃរថយន្តសរុប។ លោកបន្តថា ជាមួយនឹងកំនើនសេដ្ឋកិច្ចកើនឡើង និងជីវភា​ព​ប្រជាពលរដ្ឋមានភាពល្អប្រសើរ ការលក់រថយន្តរបស់ RMA បានកើនឡើងប្រមា​ណ៣០ភាគរយ។

លោកបន្តថា “ការកើនឡើងនៃការលក់ ដោយសាររថយន្តរបស់យើងទំនើ​ប ប្រាក់ចំណូលប្រជាពលរដ្ឋកើនឡើង និងប្រជាពលរដ្ឋកាន់តែច្រើននិយម​ទិញរថយន្តដោយបង់រំលស់”។ លោកបន្តថា “បច្ចុប្បន្នប្រជាជនមិនចង់ចំណា​យលុយទាំងដុលទិញរថយន្តទេ ដោយពួកគេទុកលុយពង្រីកមុខរបរដទៃទៀត ហើយបានសម្រេចចិត្តទិញរថយន្តបង់រំលស់”។

លោក សេង វឹង បានបន្តថា ប្រសិនជាគិតពីឆ្នាំ២០១៨នេះ លោកនៅតែមាន​សុទិដ្ឋិនិយម សម្រាប់ទីផ្សារថយន្តនៅកម្ពុជា ប៉ុន្តែនេះជាការប្រមើលមើលពីឥឡូវប៉ុណ្ណោះ ប៉ុន្តែលោកគិតថាស្ថានភាពនយោបាយនឹងនៅតែមានលំនឹង មិន​មានអ្វីគួរឲ្យបារម្ភនោះទេ។

នាយកផ្នែកទីផ្សារនិងលក់នៃក្រុមហ៊ុនតូយ៉ូតា ខេមបូឌាលោក លី ប៊ុនហៃ បានមានប្រសាសន៍ស្រដៀងគ្នាថា ការលក់រថយន្តកាលពីឆ្នាំមុនមានសញ្ញាល្អ​ប្រសើរ ធៀបនឹងឆ្នាំ២០១៦ ដោយក្រុមហ៊ុនសម្រេចបានកំនើនលក់ចន្លោះពី២០ទៅ៣០ភាគរយ។ លោកបន្តថា សម្រាប់ឆ្នាំ២០១៨នេះ លោកនៅតែមានសុទិដ្ឋិ​និយម ដោយសារសេដ្ឋកិច្ច និងប្រាក់ចំណូលរបស់ប្រជាពលរដ្ឋនៅតែរក្សាបាន​កំនើនល្អប្រសើរ និងស្ថានភាពនយោបាយមិនមានអ្វីគួរឲ្យចាប់អារម្មណ៍ទេ។

លោកបន្តថា “ឆ្នាំ២០១៨ ខ្ញុំគិតថាអ្វីៗនឹងប្រសើរឡើង ព្រោះយើងអ្នករកស៊ី មិនសូវគិតពីបញ្ហានយោបាយទេ យើងគិតពីសេដ្ឋកិច្ច បើសេដ្ឋកិច្ចល្អ យើងនៅតែបន្តរីកចម្រើន”។ លោកបន្តថា “ការលក់រថយន្តកើនឡើងមួយផ្នែក ដោយសារ​ប្រជាពលរដ្ឋ បានទិញរថយន្តបង់រំលោះកាន់តែច្រើន ព្រោះពួកគេគិតពីការដាំលុយ ដូច្នេះពួកគេមិនយកលុយទាំងដុំទៅទិញរថយន្តទេ ពួកគេទុកលុយរកស៊ី វាជាការដាំលុយ ឬធ្វើឲ្យលុយកើតកូន”។

ប្រធាននាយកប្រតិបត្តិធនាគារអេស៊ីលីដាភីអ៊ិលស៊ី លោកអ៊ិន ចាន់នីបាន​ថ្លែងថា ឥណទានសម្រាប់ទិញវត្ថុ ឬរបស់របរប្រើប្រាស់កំពុងកើនឡើង ប៉ុន្តែវាមិន​​ទាន់ឈានដល់ចំណុចគ្រោះថ្នាក់នោះទេ។ លោកបន្តថា ឥណទានប្រើប្រាស់ជា​ប្រភេទឥណទាន មិនជួយដល់សេដ្ឋកិច្ចទេ ព្រោះឥណទានបែបនេះមិនបង្កើតឲ្យមានសកម្មភាពសេដ្ឋកិច្ចឡើយ ផ្ទុយទៅវិញវាជាឥណទានបំណុល ជាការទិញបំណុល។

លោកបន្តថា “ឥណទានបែបនេះបើកើនឡើងខ្លាំងពេក វាផ្តល់គ្រោះថ្នាក់​ដល់សេដ្ឋកិច្ចជាតិ ប៉ុន្តែនៅកម្ពុជាមិនទាន់ឈានដល់កំនើនខ្ពស់នោះទេ”៕