ដោយ វុត្ថា

ភ្នំពេញ៖ ជាថ្មីម្តងទៀតទីផ្សារខុនដូប្រទេសវៀតណាម បានចាប់ផ្តើមធ្លាក់ចុះជាថ្មី។នេះបើយោងតាមរបាយការណ៍របស់ CBRE VIETNAM។

យោងតាមរបាយការណ៍ ដែលបានចេញផ្សាយដោយក្រុមហ៊ុន CBRE Vietnam បានបង្ហាញកាលពីចុងសប្តាហ៍កន្លងទៅនេះបានឲ្យដឹងថា ប្រទេសវៀតណាមបានសម្ភោធដាក់អោយដំណើរខុនដូ៦,៥៣៤ យូនីត នៃគម្រោង១៩ ក្នុងត្រីមាសទី២ ឆ្នាំ ២០១៨ នេះ មានការធ្លាក់ចុះប៉ុន្មានជា២០ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន ។របាយការណ៍ដដែលបានឲ្យដឹងបន្តថា ដូចគ្នានេះដែរមានតែខុនដូ៥,៩០០យូនីតប៉ុ​  ណ្ណោះ ត្រូវបានលក់ចេញក្នុងត្រីមាសទី២ ឆ្នាំ២០១៨នេះ ដោយបានធ្លាក់ចុះ២២ភាគរយធៀបនឹងរយៈពេលដូចគ្នាកាលពីឆ្នាំមុន។

របាយការណ៍ CBRE បានពន្យល់ថា ក្រុមហ៊ុនអភិវឌ្ឍន៍មួយចំនួនមានបំណងផ្អាក ការសម្ពោធអោយដំណើរនៅត្រីមាសទី២នេះ ដើម្បីពិនិត្យមើលឡើងវិញនូវផលិតផលបច្ចុប្បន្ន និងកំណត់កាលបរិច្ឆេទថ្មីសម្រាប់ចុងឆ្នាំនេះ។ ការពន្យារពេលនៃការបើកដំណើ​រការ ក៏នឹងអនុញ្ញាតឱ្យមានពេលវេលា សម្រាប់ការស្រូបយកនូវខុនដូ ដែលមិនលក់ចេញផងដែរ។

លោកស្រី Dang Phoung Hang អគ្គនាយក CBRE ប្រចាំនៅប្រទេសវៀតណាមបានអោយដឹងថា នៅត្រីមាសទី២ឆ្នាំនេះ ត្រូវបានគេចាត់ទុកថា ជារយៈពេលនៃការកែតម្រូវលើទីផ្សារអចលនទ្រព្យ ក្នុងទីក្រុងហាន់ណូយ មុននឹងឈានដល់ដំណាក់កាលអភិវឌ្ឍន៍ថ្មី។

ទោះជាយ៉ាងណាសមាមាត្រនៃចំនួនខុនដូនៅនៅត្រីមាសទី២ បានកើនឡើង៣៧ភាគរយដែលកើនឡើងពី១៥ភាគរយ នៅក្នុងត្រីមាសដំបូងនៃឆ្នាំនេះ។ ក្នុងន័យនេះ CBRE សំដៅលើខុនដូដែលមានតម្លៃថ្លៃបំផុត ដែលមានតម្លៃចាប់ពី១,៥០១ ដុល្លារដល់ ៣.៥០០ ដុល្លារក្នុងមួយម៉ែត្រការ៉េ។

តម្លៃលក់ជាមធ្យមសម្រាប់ខុនដូ នៅក្នុងទីក្រុងហាណូយក្នុងត្រីមាសទី១ មានតម្លៃចំនួន១,៣៣២ដុល្លារក្នុងមួយម៉ែត្រការ៉េ។ បើទោះបីជាតួលេខនេះបានធ្លាក់ចុះ០,៤ ភាគរយនៅត្រីមាសនេះ ក៏ដោយក៏វាកើនឡើង០,៤ភាគរយធៀបនឹងឆ្នាំមុនផងដែរ។

តំបន់ភាគខាងលិច និងខាងជើងនៃទីក្រុងហាណូយមានចំនួន៥៣ភាគរយ និង ២៥ ភាគរយនៃការសម្ពោធគម្រោងថ្មីនៃអគារខុនដូរ៕

ដោយ គង់ សូរិយា

ភ្នំពេញ៖ រដ្ឋាភិបាលបានកំណត់ពេលវេលាជាក់លាក់ហើយ ដើម្បីចាប់ផ្តើមបើកការដ្ឋានសាងសង់ផ្លូវល្បឿនលឿនពីភ្នំពេញ ទៅកាន់ខេត្តព្រះសីហនុ ដោយកំណត់យកខែវិច្ឆិកា ចុងឆ្នាំនេះជាពេលបើកដំណើរការសាងសង់ផ្លូវនេះ។

អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានមានប្រ​សាសនឲ្យដឹងតាមទូរស័ព្ទនាព្រឹកថ្ងៃទី១០ កក្កដានេះថា ការសាងសង់ផ្លូវល្បឿនលឿនឬ Express Way ត្រូវបានឯកឧត្តមទេសរដ្ឋមន្រ្តីស៊ុន ចាន់ថុលប្រកាសកំណត់កាលបរិច្ចេទជាក់លាក់ គឺយកខែវិច្ឆិកា ដើម្បីបើកការដ្ឋានសាងសង់ផ្លូវល្បឿនលឿនលើកទី១ នៅកម្ពុជានេះ។លោកបន្តថា កន្លងមកខាងក្រុមហ៊ុនចិន មានការបារម្ភពីការជាប់គាំងគំរោងកណ្តាលទី ហេតុនេះទើបពួកគេជំរុញឲ្យរដ្ឋាភិបាល ដោះស្រាយផលប៉ះពាល់ជាមួយប្រជាពលរដ្ឋលើគំរោងផ្លូវនេះបញ្ចប់សិន។

លោកបន្តថា “ការដោះស្រាយផលប៉ះពាល់បាននិងកំពុងដំណើរការ និងអាចបញ្ច​ប់នៅពេលណាមួយ ហើយបើចប់មុនផែនការ កសារសាងសង់ផ្លូវនេះនឹងធ្វើមុបខែវិច្ឆិកា”។​លោកបន្តថា“ផ្លូវប្រវែងជាង១៩០គីឡូម៉ែត្រនេះ នឹងចំណាយថវិកាប្រមាណ១៨០០លានដុល្លារអាមេរិក និងគ្រោងចំណាយពេល៤ឆ្នាំ ដើម្បីបញ្ចប់គំរោងនេះ”។

លោកវ៉ាស៊ីម សូរិយាបានបន្តថា ផ្លូវនេះនឹងសាងសង់មានកំពស់ខ្ពស់ ប្រៀបដូចជាស្ពាន ហើយនឹងមានការសាងសង់របងព័ទ្ឋជុំវិញ ដើម្បីកុំឲ្យមានសត្វឬចំណុចឆ្លងកាត់ច្រើន ព្រោះវាជាផ្លូវល្បឿនលឿន ព្រោះផ្លូវវល្បឿនលឿននេះនឹងមិនមានចំណុចឆ្លងកាត់ច្រើននោះទេ។

លោកបន្តថា “ផ្លូវនេះនឹងជួយជម្រុញការដឹកជញ្ជូនកាន់តែលឿន កាត់បន្ថយពេល​វេលា កាត់បន្ថយការចំណាយ និងជួយជម្រុញកំនើនសេដ្ឋកិច្ចជាតិ”៕

ដោយ គង់ សូរិយា

ភ្នំពេញ: មណ្ឌលកំសាន្ត BW Arena តម្លៃ១០លានដុល្លារ ដែលវិនិយោគដោយក្រុមហ៊ុន Worldbridge Group នឹងធ្វើឲ្យតំបន់ចក្រអង្រែក្រោមកាន់តែរសរវើក និងទាក់ទាញ នៅភាគខាងត្បូងរាជធានីភ្នំពេញ។

WB Arena រួមមាន ​ហាង​លក់​ទំនិញ​ហាង​លក់​ចំណី​អាហារ កន្លែង​សម្រាក​លម្ហែ និង​កន្លែង​កម្សាន្ត​ជាច្រើន​ ថែម​ទាំង​មាន​សាល​មហោស្រព ​ដែល​អាច​អង្គុយ​បាន​ដល់​ទៅ​ ៤០០នាក់​សម្រាប់​កម្មវិធី​នាពេល​រាត្រី​ទៀត​ផង​។

នាយក​ប្រតិបត្តិ​របស់​ក្រុមហ៊ុន Worldbridge Land លោកTan Teck Keeបានថ្លែងឲ្យដឹងកាលពីពេលថ្មីៗនេះថា WB ARENA ​នឹង​ក្លាយ​ជាគោលដៅ​កន្លែង​សម្រាប់ ​លម្ហែ​សម្រាប់​ក្រុមគ្រួសារ​នាពេលអនាគត ​នៅពេល​គម្រោង​នេះ ​នឹង​បើក​ដំណើរការ​នៅ​ខែ​វិច្ឆិកា​ខាង​មុខ​ ។ លោក​បន្ត​ថា ​វា​នឹង​ក្លាយ​ជា​គោលដៅ​កម្សាន្ត​នៅ​មាត់​ទន្លេ​សម្រាប់​ប្រជាជន​ក្នុង​ស្រុក ជនបរទេស និង​ភ្ញៀវទេសចរ​ផង​ដែរ​។ យើង​បាន​សាងសង់​នូវ​កន្លែង​សម្រាប់​ប្រកួត​កីឡា ​ដែល​នឹង​មាន​បើក​ស្វាគមន៍​ ទទួល​ការប្រកួត​ និង​ការ​ប្រារព្ធ​កម្មវិធី​ជាច្រើន​ទៀត​។

ជាមួយគ្នានេះ ក្រុមហ៊ុនមានគំរោង​នឹង​ធ្វើ​ព្រឹត្តិការណ៍​នានា ​ដោយផ្តោតលើមនុស្សគ្រប់​វ័យ​ផង​ដែរ​»​។

គម្រោង​នេះ​ត្រូវ​បាន​ឌីសាញ​ឡើង ​ដោយ​ក្រុមហ៊ុន​ស្ថាបត្យកម្ម​នៅ​ប្រទេស​ សិង្ហបុរី Chin Kam and Associates (CK&A) ដែល​ជា​ក្រុមហ៊ុន​ធ្លាប់​ត្រូវ​បាន​ក្រុមហ៊ុន Worldbridge Group និង​ដៃគូ​វិនិយោគ​របស់​ខ្លួន​គឺ Oxley International Holdings ជួល​ឲ្យ​រចនា​ប្លង់​គម្រោង The Bridge និង The Peak​។ WB Arena ត្រូវ​បាន​គេ​រចនា​ស្រដៀង​គ្នា​នឹង Clarke Quay នៅ​សិង្ហបុរី​។ យ៉ាង​ណា​មិញ​ការ​រចនា​ប្លង់​នេះ​ត្រូវ​បាន​រចនា​យ៉ាង​ផិ្ចតផ្ចង់​ដើម្បី​ឱ្យ ​ស៊ី​គ្នា​ទៅ​នឹង​បរិបទ​កន្លែង​កម្សាន្ត​បែប​ខ្មែរ ​នៅ​តាម​បណ្តោយ​មាត់​ទន្លេ​។

​​លោកSimon Griffiths នាយក​គ្រប់គ្រង​របស់​ក្រុមហ៊ុន Urban Asset Solutions ដែល​ជា​ភ្នាក់ងារ​ទទួល​បន្ទុក​ការជួល និង​ជួប​អតិថិជន​របស់​គម្រោង WB Arena បាន​ឲ្យ​ដឹង​ថា គម្រោង​នេះ​មាន​ផ្ទៃ​សរុប​៦០០០ម៉ែត្រការ៉េ ដែលក្រុមហ៊ុននឹងបែងចែក​តំបន់​ផ្សេងៗ​គ្នា​សម្រាប់​ហាង​លក់ទំនិញ ហាង​លក់​ចំណី​អាហារ និង​ភេសជ្ជៈ និង​កន្លែង​កម្សាន្ត​។

លោកSimon Griffiths បាន​និយាយ​ថា ​យើង​ចង់​ធ្វើ​អ្វីៗ​ដែល​ទាក់ទាញ​ភ្ញៀវទេសចរ​ជាតិ អន្តរជាតិមកកំសាន្តនៅតំបន់នេះ​។

គម្រោង​នេះ នឹង​មាន​ស្តង់​ដែល​បម្រី​អាហារ​ព្រម​ទាំង​ភេសជ្ជៈ​ជាច្រើន​ មុខ​សម្រាប់​អ្នក​ទៅ​កម្សាន្ត​ ក៏​ដូចជា ​កន្លែង​ពិសា​អាហារ​មាត់​ឆ្នេរ​ក្រោម ​ម្លប់​ដើមត្នោត​ប្រប​មាត់​ទន្លេ​ផង​ដែរ​។ ភោជនីយដ្ឋាន​ជាច្រើន​ ត្រូវបាន​កក់​ស្តង់​មួយ​ចំនួន​រួច​ទៅ​ហើយ៕

ដោយ វុត្ថា

ភ្នំពេញ: ជាលើកដំបូងហើយ ដែលប្រតិបត្តិការទិញលក់អចលនទ្រព្យនៅទីក្រុងឌូបៃ ប្រទេសអារ៉ាប់រួម ដែលកំពុងមានចំណាប់អារម្មណ៍ពីពិភពលោក បានធ្លាក់ចុះជាលើកតំបូង នៅក្នុងប្រទេសវាលខ្សាច់មួយនេះ។

យោងតាមមន្ត្រីជាន់ខ្ពស់ប្រទេសអារ៉ាប់រួម កាលពីចុងសប្តាហ៍កន្លងមកនេះបានឲ្យ​ ​​ដឹងថា ប្រតិបត្តិការទិញលក់ អចលនទ្រព្យនៅក្នុងទីក្រុងឌុបៃ សម្រេចបានចំនួន៣០,២ពាន់លានដុល្លារក្នុងពាក់កណ្តាលឆ្នាំ២០១៨ ដែលចំនួននេះមានការធ្លាក់ចុះ ធៀបនឹង​ឆ្នាំមុន ដែលប្រតិបត្តិការទិញ លក់ អចលនទ្រព្យក្នុងទីក្រុងរីកចម្រើនដ៏លឿននេះ សម្រេចបានចំនួន៣៥,៩៤ ពាន់លានដុល្លារអាមេរិក។

ទីក្រុងឌុបៃបានចុះបញ្ជីប្រតិបត្តិការ អចលនទ្រព្យចំនួន២៧,៦៤២ ក្នុងឆមាសឆ្នាំ ២០១៨។ចំណែកឆ្នាំ២០១៧ កន្លងទៅនេះ តាមការសិក្សាស្រាវជ្រាវអចលនទ្រព្យដោយ នាយកដ្ឋានដីធ្លីទីក្រុងឌុបៃ បានបង្ហាញថា ប្រតិបត្តិការអលនទ្រព្យ ដែលបានចុះបញ្ជីមានចំនួន៣៥,៥៧១ ក្នុងរយៈពេលដូចគ្នា។

នាយកដ្ឋាននេះបានកត់សម្គាល់ទៀតថា មេដឹកនាំអារាប់រួមកំពុងដាក់ក្តីសង្ឃឹម ចំពោះការលើកទឹកចិត្តលើបរិបទ និងទស្សនទាននៃគោលនយោបាយសសេដ្ឋកិច្ចថ្មីរបស់ខ្លួន និងបានអំពាវនាវអោយអ្នកវិនិយោគិនអន្តរជាតិ ឲ្យចូលមកវិនិយោគក្នុងស្រុកតាមរយៈការប្រកាសវិធានការអនុញ្ញាត ឱ្យជនបរទេសក្លាយជាកម្មសិទ្ឋរហូតដល់១០០ ឆ្នាំ និងផ្តល់ឱ្យអ្នកឯកទេសបរទេស នូវទិដ្ឋាការរយៈពេល១០ឆ្នាំ។

លោកSultan Butti bin Mejren អគ្គនាយកនៃនាយកដ្ឋានដីធ្លីនៃទីក្រុងឌូបៃ បានឲ្យដឹងថា ការផ្តល់ឱ្យវិនិយោគិនទិដ្ឋាការស្នាក់នៅ ក្នុងប្រទេសអារ៉ាប់រួមរហូតដល់១០ឆ្នាំ  រួមទាំងការកាត់បន្ថយថ្លៃសេវារដ្ឋផ្សេងៗ គឺដើម្បីលើកទឹកចិត្តអ្នកវិនិយោគិនបរទេសមកវិនិយោគឲ្យបានច្រើន ក្នុងការជម្រុញសេដ្ឋកិច្ច ប្រទេសឲ្យមានការរីកចម្រើនបន្ថែមទៀត។

ប្រជាជនអារ៉ាប់បានវិនិយោគច្រើនជាងគេ ដោយមានចំនួន២,៩៨៦គំរោងនិងមានតម្លៃទឹកប្រាក់ចំនួន៦,៨ពាន់លានAEDដុល្លារអារ៉ាប់។ បន្ទាប់មកជនជាតិឥណ្ឌា មានចំនួន៣២១៨គំរោង ដែលស្មើរនឹងទឹកប្រាក់៥,៩ ពាន់លានដុល្លារ AED ។ ជនជាតិអារ៉ាប៊ីសាអ៊ូឌីតឈរនៅលំដាប់លេខរៀងទី៣ ដោយមានការវិនិយោគចំនួន១,៤១៥គំរោងនិងមានតម្លៃជិត៣ពាន់លានអឺរ៉ូ។

ប្រជាពលរដ្ឋមកពីចក្រភពអង់គ្លេស ប៉ាគីស្ថាន ចិន អេហ្ស៊ីប ហ្ស៊កដានី និងបារាំងគឺស្ថិតក្នុងចំណោមអ្នកវិនិយោគច្រើនជាងគេ ក្នុងលំដាប់Top Ten នៅទីក្រុងដែលមានអាគារខ្ពស់ជាងគេក្នុងពិភពលោកនេះ៕

ដោយ គង់ សូរិយា

ភ្នំពេញ៖ ក្រុមហ៊ុនអចលនទ្រព្យខ្នាតយក្សចំនួន៧ បាននិងកំពុងចូលមកវិនិយោគនៅទីក្រុងភ្នំពេញ តាមរយៈការសាងសង់គំរោងធំៗដ៏អស្ចារ្យ ដោយប្រែក្លាយទីក្រុងភ្នំពេ​ញទៅជាមជ្ឈមណ្ឌលពាណិជ្ជកម្ម និងហិរញ្ញវត្ថុអន្តរជាតិ។

ក្រុមហ៊ុនទាំងនោះរួមមាន ទី១ ក្រុមហ៊ុន Prince Real Estate Group ដែលបាននិងកំពុងវិនិយោគសាងសង់ខុនដូ Diamond One នៅទីក្រុងកោះពេជ្រ គំរោងខុនដូ Prince Plaza, Prince Modern Plaza នៅតាមហាវិថីព្រះនរោត្តម និងគំរោងជាច្រើនទៀតនៅ​ខេត្តព្រះសីហនុ ដោយគ្រោងបោះទុនវិនិយោគ៥០០០លានដុល្លារនៅកម្ពុជា។

ទី២ ក្រុមហ៊ុន R&F Properties បាននិងកំពុងសាងសង់អាគារកំពស់៤០អាគានិហមានកំពស់៣៦ជាន់ និង៤៨ជាន់ ស្ថិតនៅតាមបណ្តោយមហាវិថីសម្តេចតេជោហ៊ុន សែន ដែលគ្រោងបោះទុនវិនិយោគជាង៣០០០លានដុល្លារ និងគំរោងមួយទៀតស្ថិតនៅអតីតរងចក្រស័ង្កសី ស្ថិតនៅតាមបណ្តោយមហាវិថីព្រះមុនីវង្ស។

ទី៣ ក្រុមហ៊ុន SINO Plaza ដែលបាននិងកំពុងសាងសង់ គំរោងមជ្ឈមណ្ឌលមណ្ឌលពាណិជ្ជកម្មកំពស់៤៥ជាន់ នៅអតីតទីតាំងផ្សារបឹងត្របែក ដែលប្រកាសបោះទុនវិនិយោគ២៥០លានដុល្លារ និងគ្រោងវិនិយោគគំរោងជាច្រើនទៀត។

ទី៤ ក្រុមហ៊ុន Green Land Group​ ជាក្រុមហ៊ុនយក្ស ដែលបានប្រកាសបោះទុនវិនិយោគ៧០០០លានដុល្លារនៅកម្ពុជាបន្ថែមនាពេលខាងមុខ ហើយក្រុមហ៊ុននេះបានប្រកាសទិញអាគារកំពស់៣៨ជាន់ចំនួន៣ នៃគម្រោង D.I RIVIERA។

ទី៥ ក្រុមហ៊ុន Yuetai Group ដែល​ជា​ក្រុមហ៊ុន​អភិវឌ្ឍន៍​របស់​ចិន​កំពុង​មាន​ប្រតិបត្តិការ​លើ​គម្រោង​ ជាច្រើន​នៅ​កម្ពុជា​ដូចជា East One និង East View និងគំរោងដ៏ធំមួយទៀតស្ថិតនៅផ្លូវវេងស្រេង (តំបន់លូ៥)។ ក្រុមហ៊ុននេះបានបោះទុនវិនិយោគរាប់ពាន់លានដុល្លារនៅកម្ពុជាផងដែរ។

ថ្មីៗនេះក្រុមហ៊ុននេះក៏ប្រកាសគំរោងមជ្ឈមណ្ឌលពាណិជ្ជកម្ម និងលំនៅដ្ឋានលំដាប់ពិភពលោក នៅទីតាំងកំពង់ផែស្វ័យត្នក្រុងភ្នំពេញ តាមបណ្តោយដងទន្លេសាប ។ គំរោងនេះនឹងសាងសង់អាគារកប់ពពកចំនួន២២អាគារ ដែលជាគំរោងដ៏អស្ចារ្យមួយ។

ទី៦ ក្រុមហ៊ុន 4seasons ជាក្រុមហ៊ុនអចលនទ្រព្យយក្សមួយទៀត ដែលបាននិងកំពុងត្រៀងសាងសង់មជ្ឈមណ្ឌលពាណិជ្ជកម្ម និងលំនៅដ្ឋានលំដាប់អន្តរជាតិនៅតំបន់​បឹងកេងកង១ និងគំរោងជាច្រើនទៀត ដែលក្រុមហ៊ុននេះកំពុងរៀបចំឡើង និងចាប់ផ្តើម​សាងសង់នៅពេលឆាប់ៗនេះ៕