ដោយ គង់ សូរិយា

       ភ្នំពេញ ក្រុមហ៊ុនជីព ម៉ុងនឹងសាងសង់អាគារពាណិជ្ជកម្មកប់ពពកមួយ នៅទីតាំងមជ្ឈមណ្ឌលពាណិជ្ជកម្មតំបូងគេ នៅរាជធានីភ្នំពេញគឺអាគារParkwayបច្ចុប្បន្ននេះ។

អ្នកនាងGrace Rachny Fongនាយិកាប្រតិបត្តិនៃក្រុមហ៊ុនCentury21 Cambodia បានថ្លែងឲ្យដឹងតាមទូរស័ព្ទកាលពីពេលថ្មីៗនេះថា ក្រុមហ៊ុនជីព ម៉ុង គ្រុប នឹងសាងសង់អាគារពាណិជ្ជកម្មនៅទីតាំងនេះ នាចុងឆ្នាំនេះឬដើមឆ្នាំ​២០១៩​ខាងមុខ ព្រោះទីតាំងនេះត្រូវបានក្រុមហ៊ុនជីព ម៉ុងទិញយករួចហើយ។

អ្នកនាងបន្តថា “ទីតាំងនេះជាទីតាំងដ៏ល្អ និងមានតំបន់ពាណិជ្ជកម្មរសរវើកសម្រាប់ការធ្វើពាណិជ្ជកម្ម និងអំណោយផលសម្រាប់ការសាងសង់អាគារពាណិ​ជ្ជកម្មបែបនេះ”។អ្នកនាងបន្តថា “ក្រុមហ៊ុនជីព ម៉ុងនឹងឲ្យអ្នកជួលអាគារParkway ចាកចេញនៅចុងឆ្នាំនេះ ដើម្បីត្រៀមរៀបចំសាងសង់អាគារកប់ពពកមួយនៅលើទីតាំងនេះ”។

ថ្នាក់ដឹកនាំក្រុមហ៊ុនវាយតម្លៃអចលនទ្រព្យមួយ ដែលបាននិយាយក្នុងលក្ខ​​ខ័ណ្ឌមិនបញ្ចេញឈ្មោះបានឲ្យដឹងថា ទីតាំងអាគាររួមនឹងចំណ​តរថយន្តនៃមជ្ឈមណ្ឌលពាណិជ្ជកម្មParkway មានទំហំជាង១ហិកតា ហើយដីនៅទីនេះមានតម្លៃចន្លោះពី៣៥០០ ទៅ៤២០០ដុល្លារអាមេរិកក្នុងមួយម៉ែត្រការ៉េ ដូច្នេះតម្លៃអចលនទ្រព្យនេះ មិនតិចជាង៤០លានដុល្លារអាមេរិកនោះទេ។

ថ្នាក់ដឹកនាំក្រុមហ៊ុនជីព ម៉ុងមិនអាចទាក់ទងសុំការអត្ថាធិប្បាយបានទេទាក់ទងនឹងការវិនិយោគ កំពស់អាគារដែលក្រុមហ៊ុននេះនឹងសាងសង់ និងទំហំ ទុនវិនិយោគលើគំរោងថ្មីនេះទេ។

អាគារParkway ជាអាគារការិយាល័យនិងមជ្ឈមណ្ឌលពាណិជ្ជកម្មធំជាងគេនៅរាជធានីភ្នំពេញកាលពីប្រមាណជាង១ទសវត្សរ៍មុន។ គំរោងនេះស្ថិតនៅលើមហាវិថីម៉ៅ សេទុង ក្រុងភ្នំពេញ៕

ដោយ វុត្ថា

ភ្នំពេញ៖ រដ្ឋាភិបាលនៃប្រទេសហ្វីលីពីន បានតម្រូវអោយសាងសង់អគារបៃតនៅតាមរដ្ឋធានី និងខេត្តក្រុងនានានៅទូទាំងប្រទេស បន្ទាប់ប្រទេសមួយនេះបានកត់សម្គាល់ឃើញថា មានតម្រូវការប្រើប្រាសថាមពលយ៉ាងច្រើន ក្នុងរយៈពេលប៉ុន្មានឆ្នាំចុងក្រោយនេះ ។

នៅក្នុងសិក្ខាសាលាស្តីពី Green Cities in Making  ក្នុងទីក្រុងមានីល ប្រទេសហ្វីលីពីនកាលពីចុងសប្តាហ៍កន្លងទៅនេះ អ្នកជំនាញបានកត់សម្គាល់ថា វិធានការនានាលើការអនុវត្តការកសាងនិរន្តរភាព កំពុងត្រូវបានបង្កើតឡើងដោយរដ្ឋាភិបាល នៃប្រទេសហ្វីលីពីនទាំងនៅថ្នាក់ជាតិ និងថ្នាក់ខេត្តទោះបីជាមានតំបន់មួយចំនួន មិនទាន់ច្បាស់លាស់សម្រាប់ការកែលម្អក៏ដោយ។

លោក Eduardo A. Manahan ប្រធានសមាគមអចលនទ្រព្យ និងអ្នគ្រប់គ្រងអគារហ្វីលីពីនបានឱ្យដឹងថា ប្រទេសហ្វីលីពីនកំពុងស្ថិតនៅលើផ្លូវត្រូវ ដើម្បីក្លាយជាទីក្រុងបៃតង និងទីក្រុងឆ្លាត (Green and Smart City) ។ យើងមានច្បាប់ស្តីពការអគារបៃតង ហើយយើងក៏កំពុងស្ថិតក្នុងដំណើរការអនុម័តច្បាប់ស្តីពី ការពិនិត្យឡើងវិញនូវក្រមសំណង់ជាតិ (National Building Code) ផងដែរ។

យោងតាមសាជីវកម្មហិរញ្ញវត្ថុអន្ដរជាតិ (IFC) បានបង្ហាញថា ប្រមាណជា៣៦ភាគរយ នៃការប្រើប្រាស់ថាមពលរបស់ប្រទេសហ្វីលីពីន បានផ្តត់ផ្តង់ដល់ប្រើប្រាស់ក្នុងអាគារ។ ការប្រើប្រាស់អគ្គីសនីនៅតាមអាគារនានា ឆ្លងកាត់ប្រជុំកោះមាន២៥ភាគរយ នៃការបញ្ចេញឧស្ម័នផ្ទះកញ្ចក់។

លោក Liza Morales-Crespo នាយកផ្នែករចនានៅ ក្រុមហ៊ុន Liza Crespo Ecotecture បានអោយដឹងផងដែរថា ប្រទេសហ្វីលីពីនមានអត្រាខ្ពស់បំផុតក្នុងការប្រើប្រាស់អគ្គីសនីយ៍ច្រើន ក្នុងចំណោមប្រទេសក្នុងតំបន់អាស៊ីទាំងមូល។ លោកបន្ថែមថា ការធ្វើអោយមានអគារបៃតង មិនមែនគ្រាន់តែចេះតែថានោះទេ ប៉ុន្តែត្រូវមានការចូលរួមជាចាំបាច់ ជាពិសេសវាជាកាតព្វកិច្ចដ៏ចំាបាច់ របស់រដ្ឋាភិបាលត្រូវតែអនុវត្តដោយផ្ទាល់។

លោកបន្តថា “រដ្ឋាភិបាលក៏មានភាពលំបាកខ្លះដែរ ដើម្បីធ្វើឲ្យមានប្រសិទ្ធិភាពទៅការសាងសង់អគារបៃតង។ ទោះយ៉ាងនេះក្តី ខ្ញុំនៅតែមានសុទិដ្ឋិនិយមខ្ពស់ចំពោះរដ្ឋាភិបាលនឹងជម្រុញ អោយមានការអនុវត្តប្រកបដោយប្រសិទ្ធិភាពខ្ពស់”។

តាមការសិក្សារបស់ក្រសួងសាធារណៈការ និងផ្លូវល្បឿនលឿន នៃប្រទសហ្វីលីពីនបានប៉ាន់ស្មានជាបឋមបង្ហាញថា គម្រោងនេះនឹងអាចជួយកាត់បន្ថយការបំភាយឧស្ម័នផ្ទះកញ្ចក់នៅក្នុងប្រទេសចំនួន១,៨៧លានតោន និងកាត់បន្ថយការប្រើប្រាស់ថាមពល ៣,៩លានគីឡូវ៉ាត់ម៉ោង៕

ដោយគង់ សូរិយា

ភ្នំពេញ៖ បន្ទាប់ពីខ័ណ្ឌធំៗ ដែលជាតំបន់ពាណិជ្ជកម្មកណ្តាលទីក្រុង ខ័ណ្ឌសែនសុខកំពុង តែមានភាពលេចធ្លោចាប់ពីដើមឆ្នាំ២០១៧កន្លងមកនេះ ដោយ​សារលក្ខខ័ណ្ឌល្អប្រសើរមួយចំនួន។

ខ័ណ្ឌធំៗទាំងបួនកណ្តាលក្រុងភ្នំពេញ រួមមាន ខ័ណ្ឌចំការមន ដូនពេញ មករា និងខ័ណ្ឌទួលគោក ជាតំបន់មួយដែលសម្បូរ ដោយមជ្ឈមណ្ឌលពាណិជ្ជ​កម្ម ប៉ុន្តែបច្ចុប្បន្នខ័ណ្ឌសែនសុខ កំពុងលេចធ្លោមួយបន្ថែមទៀត។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិតគីម ហ៊ាងបានមានប្រសាសន៍ឲ្យដឹងនាព្រឹកថ្ងៃទី២៦ មករានេះថា ខ័ណ្ឌសែនសុខ ពិតជាមានការីកចម្រើនលឿន ដោយសារមជ្ឈមណ្ឌលពាណិជ្ជកម្ម លំនៅដ្ឋានជាច្រើនបានវិនិយោគនៅតំបន់នោះ។ ខ័ណ្ឌនេះមានលក្ខខ័ណ្ឌអំណោយផលល្អ ដូចជា ទី១ ហេដ្ឋារចនាសម្ព័ន្ឋកំពុងអភិវឌ្ឍន៍ និងមានភាពល្អប្រសើរ សណ្ឋានដី ល្អ មិនចាំបាច់ចំណាយលើការចាក់ដី សម្រាប់អភិវឌ្ឍន៍ ទី៣ ជាតំបន់ដែលមិនមានការបំពុល ដោយសារតំបន់នេះមិនមានរោងចក្រ សហគ្រាសនានាឡើយ។

លោកបន្តថា “លក្ខខ័ណ្ឌអំណោយផលទាំងនេះ បានធ្វើឲ្យខ័ណ្ឌសែនសុខ សមស្របសម្រាប់ការអភិវឌ្ឍគំរោងលំនៅដ្ឋាននានា ពិសេសលំនៅដ្ឋានសម្រាប់ អ្នកមានប្រាក់ចំណូលមធ្យម”។

បច្ចុប្បន្នខ័ណ្ឌសែនសុខ មានក្រុមហ៊ុនវិនិយោគបុរី និងគំរោងលំនៅដ្ឋាននា

នានាប្រមាណ២០ ដែលបាននិងកំពុងវិនិយោគនៅតំបន់នោះ។ មជ្ឈមណ្ឌលពា ណិជ្ជកម្មលំដាប់អន្តរជាតិមួយចំនួនទៀត បានបើកដំណើរការដូចជាផ្សារបោះដុំ MAKRO, AEON Mall2 និងផ្សារទំនើបមួយចំនួនទៀតនឹងបើកនៅក្នុងឆ្នាំនេះ។

ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលី ហួរដែល​ទើបបានបើកសម្ភោធគំរោងទី៨ នៃបុរីវិមានភ្នំពេញលើផ្ទៃដីប្រមាណ២០ហិកតា បានមានប្រសាសន៍ថា ខ័ណ្ឌសែនសុខពិតជាមានការរីកចម្រើនលឿន ដោយសា​រមានគំរោងអភិវឌ្ឍន៍ជាច្រើនបាននិងកំពុងវិនិយោគនៅតំបន់នេះ ហេតុនេះទើប​លោកបាន និងកំពុងងវិនិយោគសាងសង់បុរីនៅតំបន់នេះ ខណៈទីផ្សារបុរីនៅតែ​បន្តមានភាពល្អប្រសើរ ដោយអត្រាលក់នៅតែមានកំនើនខ្ពស់។

លោកបន្តថា “ហេដ្ឋារចនាសម្ព័​ន្ឋល្អប្រសើរ ការមិនបំពុលពីផ្សែងរោងចក្រ សហគ្រាសនានា និងកត្តាសណ្ឋានដីល្អប្រសើរ ជាកត្តាជំរុញល្បឿនអភិ​វឌ្ឍន៍​នៅ​តំបន់នេះ”។

លោកឧកញ៉ាចេង ខេងប្រធានក្រុមប្រឹក្សាភិបាលនៃក្រុមហ៊ុនអចលនទ្រព្យHutton CPLបានលើកឡើងស្រដៀងគ្នាថា ការអភិវឌ្ឍហេដ្ឋារចនាសម្ព័ន្ឋ ការចូលទៅដល់នៃហាងកាហ្វេ ភោជនីយដ្ឋានទំនើបៗ និងហាងកាហ្វេឆ្ងាញ់ៗ ជាច្រើនបានចូលទៅតំបន់នេះ ដែលបានធ្វើឲ្យតម្លៃដីធ្លីនៅតាមតំបន់លំនៅដ្ឋាន​ពីមុនមានតម្លៃត្រឹមចន្លោះពី៦០ទៅ៩០ដុល្លារ កើនឡើងដល់៣០០ទៅ៤០០ដុល្លារនាពេលបច្ចុប្បន្ននេះ។

ពិសេសដីនៅជុំវិញតំបន់ផ្សារទំនើបAEON MALL2ពីមុនមានតម្លៃត្រឹម៤០០ទៅ៥០០ដុល្លារ បច្ចុប្បន្នបានកើនដល់១០០០ទៅ១២០០ដុល្លារអាមេរិកក្នុងមួយម៉ែត្រការ៉េ។

លោកបន្តថា “តំបន់នេះមានការរីកចម្រើនសមស្រប នឹងស្ថានភាពជាក់ស្តែង និងសក្តានុពលដែលតំបន់នេះមាន ហើយកំនើនប្រជាសាស្រ្តក៏បានកើនឡើងខ្ពស់ផងដែរ”៕

ដោយ វុត្ថា

ភ្នំពេញ៖ កាសែតបរទេសដែលមាននិន្នាការបែបលោកខាងលិច បានលើកឡើងថា អ្នកវិនិយោគជនជាតិចិន កំពុងប្រមូលទិញអចនលទ្រព្យស្ទើតែទាំងអស់នៅទូទាំងប្រទេស ខណៈក្រុមហ៊ុនសំណង់ចិនកំពុងមមា​ញឹកសាងសង់ និងការអភិវឌ្ឍលំនៅដ្ឋានខ្ពស់ៗ ដើម្បីបំពេញតាមតម្រូវការទីផ្សារបច្ចុប្បន្ន។

គេហទំព័រ propertyarea.asia ដែលផ្តោតលើព៌តមានអចលនទ្រព្យ និងសេដ្ឋ​កិច្ចឈានមុខគេនៅកម្ពុជាសូមបកប្រែក្រៅផ្លូវការនូវអ្វី ដែលសារព៌តមាន ASEAN TODAY បានសរសរ។ សារព៌តមាននេះបានលើកឡើងថា មានគម្រោ ងចិនជាច្រើន កំពុងសាងសង់នៅក្នុងរាជធានីភ្នំពេញ ដែលមានដូចជា ក្រុមហ៊ុន Prince Central Plaza បាននិងកំពុងសាងសង់បញ្ចប់ គម្រោងរបស់ខ្លួនដែលមានអគារកំពស់៣៧ជាន់ និងមានលំនៅដ្ឋានជាង១០០០ខ្នង។ គំរោងនេះនឹងបញ្ចប់នៅក្នុងខែឧសភា។

អគារ Prince Modern Plaza  អគារ Diamond 1 និងThe Bridge នឹងផ្តល់ឱកាសវិនិយោគស្រដៀងគ្នា។

ភ្នាក់ងារលក់អចនលទ្រព្យ Prince Central Plaza លោកស្រី Chen Jingjing បាននិយាយថា អ្នកទិញភាកច្រើន គឺជាជនជាតិចិនគឺមកពីទីក្រុងសៀងហៃ  ទីក្រុ​ងShenzhen  ទីក្រុង Fujian និងខេត្ត Zhejiang ។ ដូចគ្នានេះដែរ វិនិយោគនចិនកំពុងតែទិញអចលនទ្រព្យ នៅតាមបណ្តាទីក្រុងនានាក្នុងប្រទេសកម្ពុជា។ នៅខេត្តព្រះសីហនុ មានកាស៊ីណូខុនដូនិងសណ្ឋាគារចំនួន៦៥ភាគរយ ជារបស់ចិន។

ហេតុអ្វីចិនមានការផ្លាស់ប្តូរឥរិយាបទក្នុងការទិញ?

ខុនដូប្រណីតថ្មីៗជាច្រើនប្រមាណជា១២ភាគរយ មានគម្រោងវិនិយោគមកវិញប្រចាំឆ្នាំ ។ ការត្រឡប់មកវិញនេះ បានផ្តល់នូវផលចំណេញដ៏រឹងមាំមួយ។ប៉ុន្តែនេះមិនមែនជាហេតុផលចម្បង ដែលអ្នកវិនិយោគចិន ដែលមានទ្រព្យសម្បត្ដិដ៏ច្រើន កំពុងប្រគល់សាច់ប្រាក់របស់ពួកគេ មកលើការទិញអចលទ្រព្យនៅក្នុងប្រទេសកម្ពុជានោះទេ។

លោកស្រី Chen Jingjing បានពណ៌នាអំពីរបៀប ដែលអ្នកទិញជនជាតិចិនជាងពាក់កណ្តាលបង់ប្រាក់ជាសាច់ប្រាក់។ នេះរួមជាមួយនឹងបទបញ្ញត្តិផ្សេងរបស់ធនាគារមានលក្ខណៈធូរស្រាល ធ្វើឱ្យប្រទេសនេះក្លាយជាប្រទេសមួយដែលល្អបំផុតសម្រាប់ការវិនិយោគ។

មូលហេតុមួយទៀតគឺថារដ្ឋាភិបាលចិន កំពុងវិនិយោគយ៉ាងខ្លាំងនៅកម្ពុជា។ គោលនយោបាយ One Belt One Road បាននាំមកនូវការវិនិយោគជាង៧ ពាន់លានដុល្លារនៅក្នុងប្រទេសកម្ពុជា។ ការស្ថាបនាផ្លូវហាយវ៉េថ្មី រវាងក្រុងព្រះសីហនុ និងរាជធានីភ្នំពេញកំពុងដំណើរការរៀបចំ។

លោកChen Li អ្នកគ្រប់គ្រងផ្នែកលក់នៅ Blue Bay development នៅក្រុងព្រះសីហនុមានជំនឿថា នេះជាមូលហេតុចំបង សម្រាប់ការកើនឡើងនៃការអភិវឌ្ឍលំនៅដ្ឋាននៅក្នុងតំបន់។

តើអ្វីនឹងជះឥទ្ធិពលលើទីផ្សារអចលនទ្រព្យនៅកម្ពុជា?

ការហូរចូលនៃអ្នកទិញជនជាតិចិន នឹងជំរុញកំណើនអចលនទ្រព្យកម្ពុជានៅឆ្នាំ២០១៨នឹងកើនឡើង។ នៅឆ្នាំ ២០១៧ មានលំនៅដ្ឋានចុងក្រោយថ្មីចំនួន ៣៤៨៨បានដាក់លក់ក្នុងទីផ្សារ ក្នុងរាជធានីភ្នំពេញ។ តួលេខនេះអាចនឹងកើនឡើងខ្ពស់រហូតដល់១៥,៦៨៨យូនីតក្នុងឆ្នាំ២០១៨។

តម្លៃដីធ្លីបានកើនឡើងក្នុងប៉ុន្មានឆ្នាំចុងក្រោយនេះ។ នៅក្រុងព្រះសីហនុតម្លៃក្នុងមួយម៉ែត្រការ៉េ បានកើនឡើងចាប់ពី ៧០០ ដុល្លារទៅដល់១១០០ដុល្លារ​។អ្នកទិញមានឥទ្ធិពលចរចាកាន់តែច្រើន នៅពេលដែលតម្រូវការកើនឡើងខ្ពស់។

ដោយសារតម្លៃដីធ្លីកើនឡើង ប្រជាជនក្នុងតំបន់នេះប្រឈមបញ្ហានឹងទីផ្សារ។ មានសញ្ញានៃតម្លៃឡើងខ្ពស់បំផុត។

ស្លាកសញ្ញាដែលនៅពីមុខរដ្ឋសភា ជាកម្មសិទ្ធិរបស់ Prince’s Real Estate។ ភាសាទាំងពីរគឺភាសាចិន និងភាសាខ្មែរនេះ បានផ្តល់ព័ត៌មានលំអិតអំពីជម្រើ​សដល់មានហិរញ្ញវត្ថុ ក្នុងការទិញខុនដូដែលនៅទំនេ។ ប៉ុន្តែគោលដៅនៃការផ្សា​យពាណិជ្ជកម្ម ដែលចង់បានមិននិយាយភាសាខ្មែរទេ។ ពួកគេនិយាយភាសាចិនកុកងឺ។ នៅពេលពួកគេមើលរូបភាពខុនដូប្រណីត គេឃើញម៉ាស៊ីនបោកគក់ ដែលតាំងបង្ហាញ ដើម្បីផ្តល់កាដូដល់អតិថិជន។

ការឆ្លើយតបពីចេតនាអាក្រក់របស់លោកខាងលិច

កាសែតនេះក៏បានព្យាយាមទាញ និងបន្តុះបង្អាប់កម្ពុជា និងចិនថា អ្នកវិនិយោគចិន មកវិនិយោគនៅកម្ពុជាច្រើន ដោយសារកម្ពុជាងាយស្រួលក្នុងការលាងលុយខ្មៅ។

ជាការឆ្លើយតបអ្នកនាំពាក្យក្រសួងការបរទេសកម្ពុជា លោកជុំ សុន្ទរីបានថ្លែងថា កម្ពុជាមានច្បាប់ បទបញ្ញត្តិគ្រប់គ្រាន់ ក្នុងការទប់ស្កាត់ការលាងលុយកខ្វក់ ហើយការលើកឡើងរបស់សារព៌តមាន និងលោកខាងលិច ជាការច្រណែ​ននឹងការរីកចម្រើននៃទំនាក់ទំនងកម្ពុជា ចិន។

ឯកអគ្គរដ្ឋទូតចិនប្រចាំកម្ពុជា លោកស្យង់ បូបានថ្លែងក្នុងសន្និសីទសារព៌ត​មានដ៏កម្រមួយនៅកម្ពុជាកាលពីពេលថ្មីៗនេះថា ទំនាក់ទំនងកម្ពុជា ចិនបានឈា​នដល់កម្រិតកំពូល ហើយរដ្ឋាភិបាលចិន មិនលើកទឹកចិត្តអ្នកវិនិយោគចិន មកលាងលុយកខ្វក់ និងមកបង្កើតកាស៊ីណូ ឬទីក្រុងចិននៅកម្ពុជាទេ ដោយសារភាពជាមិត្តភាពជាប្រពៃណី បានធ្វើឲ្យប្រជាជននៃប្រទេសទាំងពីរមានភាពយល់ យោគគ្នា និងមានទំនាក់ទំនងល្អប្រសើរជាប្រពៃណីយូរលង់ណាស់មកហើយ។

លោកបន្តថា “ការលើកឡើងពីអ្នកវិនិយោគចិន មកលាងលុយកខ្វក់នៅកម្ពុជា ជាការច្រ​ណែ​​​នពីពួកលោកខាងលិច ដែលឃើញទំនាក់ទំនងចិន និងកម្ពុជាល្អប្រសើរ និងការអភិវឌ្ឍន៍រវាងប្រទេសទាំងពីរមានការរីកចម្រើនលឿន”៕

ដោយគង់ សូរិយា

​ភ្នំពេញ: ប្រទេសកម្ពុជាគ្រោងសាងសង់ខ្សរថភ្លើងធម្មតា និងខ្សែរថភ្លើងល្បឿនលឿនជាច្រើនខ្សែនាពេលខាងមុខនេះ ដែលទីភ្នាក់ងារសហប្រតិបត្តិការអន្តរជាតិនៃប្រ​ទេសកូរ៉េ(KOICA)បានបញ្ចប់ការសិក្សារួចហើយ។

​អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ាស៊ីម សូរិយាបានថ្លែងឲ្យដឹងតាមទូរស័ព្ទនាព្រឹកថ្ងៃទី១១ កក្កដានេះថា ក្នុងផែនការមេដែលបានសិក្សាដោយទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ បានធ្វើលើគំរោងជាច្រើន ប៉ុន្តែមានខ្សែរថភ្លើងមេចំនួន៥ ដូចជា ទី១ ភ្នំពេញ ខេត្តព្រះសីហនុ ទី២ ភ្នំពេញ ប៉ោយប៉ែត ទី៣ ភ្នំពេញ សៀមរាប និងទី៥ ពីទីរួមស្រុកព្រៃឈរ (ស្គន់) ទៅកាន់ឡុកនីញ ប្រទេសវៀតណាម។

​លោកបន្តថា​ ក្នុងចំណោមខ្សែរថភ្លើងមេចំនួន៨នេះ មានខ្សែរថភ្លើងរណបចំនួន៨ទៀត ដែលភ្ជាប់ទៅកាន់ខេត្តរតនគិរី មណ្ឌលគិរី ក្រចេះ ព្រះវិហារ ប៉ៃលិន ព្រៃវែង កំពង់ឆ្នាំង និងវាលរ៉េញ ក្រុងព្រះសីហនុ។លោកបន្តថា ជាមួយនេះKOICA ក៏បានសិក្សាពីគំ​រោងសាងសង់ផ្លូវរថភ្លើងល្បឿនលឿន(expres train)ចំនួន៤ខ្សែទៀតផងដែរ នៅក្នុងប្រទេសកម្ពុជា ដូចជាភ្នំពេញ ប៉ោយប៉ែត ភ្នំពេញ ឡុកនីញ ប្រទេសវៀតណាម ភ្នំពេញសៀមរាប និងភ្នំពេញ​ខេត្តព្រះសីហនុ។

​ទោះជាយ៉ាងណាលោកវ៉ាស៊ីម សូរិយាមិនបញ្ជាក់ឲ្យដឹងថា គំរោងស្ថាបនាផ្លូវរថភ្លើងទាំងនេះ នឹងចាប់ផ្តើមអាទិភាពបន្ទាប់នៅពេលណានោះទេ ព្រោះគំរោងមួយចំនួនបាន​និងកំពុងសិក្សាដោយក្រុមហ៊ុនឯកជន ដូចជា គំរោងសាងសង់ផ្លូវរថភ្លើងល្បឿនលឿនពីភ្នំពេញ ទៅកាន់ខេត្តសៀមរាប បាននិងកំពុងសិក្សាដោយក្រុមហ៊ុនចិន។ លោកបន្តថា​ចំពោះទំហំនៃការចំណាយ យើងមិនបានដឹងជាក់លាក់នោះទេ ប៉ុន្តែវាមានចំនួនច្រើនដែល​ទាមទារឲ្យមានការវិនិយោគពីវិស័យឯកជន។

​ខ្សែរថភ្លើងចំនួន២ខ្សែរួចហើយ ត្រូវបានដាក់ឲ្យដំណើរការឡើងវិញរវាងទីក្រុងភ្នំពេញ ខេត្តព្រះសីហនុ និងទីក្រុងភ្នំពេញប៉ោយប៉ែត៕