ដោយ: គង់ លាងហួរ
បាងកក: ក្រុមហ៊ុនប្រឹក្សាអចលនទ្រព្យ Colliers បានអះអាងថា ការលក់ផ្ទះប្រណីតនៅទីក្រុងបាងកករបស់ប្រទេសថៃសម្រេចបានទំហំទឹកប្រាក់សរុបជាង៤៥០ពាន់លានបាតក្នុងរយៈពេល១០ឆ្នាំចុងក្រោយនេះ។ផ្ទះទាំងនោះមានតម្លៃជាង១០០លានបាតក្នុងមួយយូនីត។

ចាប់តាំងពីឆ្នាំ២០១៥មក ផ្ទះប្រណីតថ្មីៗចំនួន៣៩៤យូនីតត្រូវបានផ្គត់ផ្គង់ចូលទៅកាន់ទីផ្សារ។នេះបើយោងតាមការដកស្រង់ចុះផ្សាយដោយទីភ្នាក់ងារសារពត៌មាន The Nation។

លោក Phattarachai Taweewong នាយកស្រាវជ្រាវរបស់ក្រុមហ៊ុន Collier ប្រចាំប្រទេសថៃ អះអាងថា “ស្របពេលដែលទីផ្សារអចលនទ្រព្យផ្សេងទៀតរបស់ប្រទេសថៃកំពុងធ្លាក់ចុះ ដោយសារតែអតិថិជនពិបាកទទួលបានប្រាក់កម្ចីពីស្ថាប័នហិរញ្ញវត្ថុ អ្នកទិញផ្ទះប្រណីតៗភាគច្រើនតែងទិញជាសាច់ប្រាក់។ ដូច្នេះហើយ ពួកគេមិនចាំបាច់ស្នើសុំប្រាក់កម្ចីទេ”។

យោងតាមការស្ទង់មតិរបស់ក្រុមហ៊ុន Colliers បានបង្ហាញថា ផ្ទះប្រហែល៣៥០យូនីតដែលមានតម្លៃជាង១០០លានបាត កំពុងស្ថិតក្នុងដំណើរការលក់គិតត្រឹមចុងខែកញ្ញា។ ក្នុងចំណោមនោះ ផ្ទះចំនួន៤១,១៤%មានទីតាំងនៅទីប្រជុំជនក្នុងតំបន់នានាដូចជាតំបន់ Sukhumvit តំបន់ Aree តំបន់ Bang Na តំបន់ Rama IX និងតំបន់ Phattanakarn។

លោក Phattarachai បានព្យាករណ៍ថា “ផ្ទះទាំងនេះនឹងមានអត្រានៃការលក់ដាច់ក្នុងរង្វង់៥២,២៨% ឬមានន័យថា ក្នុងចំណោមផ្ទះប្រហែល៣៥០យូនីត ក្នុងនោះផ្ទះដែលលក់មិនដាច់នឹងមានចំនួនត្រឹមតែ១៦៨យូនីតប៉ុណ្ណោះ”។

លោកបានគូសបញ្ជាក់ថា “អតិថិជនពិសេសភាគច្រើន រួមមានអ្នកទិញដែលមានមុខតំណែងខ្ពស់ៗ ដូចជា នាយកប្រតិបត្តិ ម្ចាស់អាជីវកម្ម ជនបរទេស និងតារាល្បីៗដែលមានទ្រព្យសម្បត្តិហូរហៀរ”។

នៅទីក្រុងបាងកក តំបន់ក្រវ៉ាត់ក្រុងភាគខាងជើងបានរាយការណ៍ពីអត្រានៃការលក់ផ្ទះប្រណីតដាច់ជាងគេបំផុតក្នុងរង្វង់៦៥,០៨% តាមពីក្រោយដោយតំបន់ក្រវ៉ាត់ក្រុងភាគខាងកើតក្នុងរង្វង់៥៩,០៩%។

ចំណែក តំបន់ក្រវ៉ាត់ក្រុងភាគខាងលិចបានរាយការណ៍ពីអត្រានៃការលក់ផ្ទះប្រណីតដាច់ក្នុងរង្វង់៥២,៥៤ភាគរយ ខណៈតំបន់ក្រវ៉ាត់ក្រុងភាគខាងត្បូងបានរាយការណ៍ពីអត្រានៃការលក់ផ្ទះប្រណីតដាច់ក្នុងរង្វង់៣៣,៣៣%៕ប្រភព: The Nation៕

ដោយ: គង់ លាងហួរ
តូក្យូ: យោងតាមទិន្នន័យថ្មីរបស់ក្រុមហ៊ុនស្រាវជ្រាវទីផ្សារអចលនទ្រព្យ Tokyo Kantei បង្ហាញថា ការទិញខុនដូថ្មីនៅក្នុងប្រទេសជប៉ុននាពេលបច្ចុប្បន្ន ត្រូវចំណាយប្រាក់អស់ចំនួនជាង១០ដងនៃប្រាក់ខែប្រចាំឆ្នាំជាមធ្យមរបស់ប្រជាជនជប៉ុន។

លោក Masayuki Takahashi អ្នកស្រាវជ្រាវជាន់ខ្ពស់នៅក្រុមហ៊ុន Tokyo Kantei បានអះអាងថា “គម្លាតរវាងកំណើនប្រាក់ចំណូល និងកំណើនតម្លៃខុនដូបានឃ្លាតពីគ្នាកាន់តែធំ ស្របពេលដែលថ្លៃដើមនៃការសាងសង់លំនៅដ្ឋានបានកើនលើសប្រាក់ឈ្នួល”។

លោកបន្តថា “វាជារឿងធម្មតា ដែលតម្លៃខុនដូនៅតំបន់ទីប្រជុំជន ដូចជាទីក្រុងតូក្យូបានកើនឡើង។ប៉ុន្តែ បច្ចុប្បន្ន និន្នាការនេះកំពុងរីករាលដាលទៅកាន់តំបន់ផ្សេងទៀត ដោយសារតែអ្នកអភិវឌ្ឍន៍ផ្តោតលើក្រុមអ្នកទិញដែលមានទ្រព្យច្រើន”។

គម្លាតនេះជាសូចនាករចុងក្រោយបង្អស់បង្ហាញថា លទ្ធភាពទិញផ្ទះជាបញ្ហាប្រឈមដ៏សំខាន់នៅក្នុងប្រទេសជប៉ុន បន្ទាប់ពីប្រាក់ឈ្នួលបានស្ថិតនៅទ្រឹងអស់ជាច្រើនឆ្នាំ និងការកើនឡើងនៃអត្រាអតិផរណា។

ជាមួយគ្នានេះ ការកើនឡើងនៃតម្រូវការរបស់ជនបរទេសក៏ជាកត្តាមួយ ដែលរួមចំណែកធ្វើឱ្យតម្លៃលក់ខុនដូនៅប្រទេសជប៉ុនហក់ឡើងខ្ពស់កប់ពពកផងដែរ ស្របពេលមានការដាំក្បាលចុះនៃតម្លៃប្រាក់យ៉េនក្នុងស្រុក។

ខុនដូនៅទូទាំងប្រទេសជប៉ុនមានតម្លៃជាមធ្យមចំនួន៤៥,៥លានយ៉េន(ប្រហែល២៩៨.០០០ដុល្លារ) ក្នុងមួយយូនីត ខណៈប្រាក់ចំណូលប្រចាំឆ្នាំជាមធ្យមរបស់ប្រជាជនជប៉ុនមានចំនួន៤,៥១លានយ៉េន។ នេះមានន័យថា ខុនដូមួយយូនីតមានតម្លៃស្មើនឹងចំនួន១០,០៩ដងនៃប្រាក់ចំណូល។

ទីក្រុងតូក្យូមានគម្លាតធំជាងគេបំផុតចំនួន១៧,៧៨ដង ដោយក្នុងនោះ ខុនដូនៅទីក្រុងនេះមានតម្លៃជាមធ្យមចំនួន១០៥លានយ៉េនក្នុងមួយយូនីត។

ខេត្ត Nagano បានឈរនៅលេខរៀងទី២ បន្ទាប់ពីទីក្រុងតូក្យូ ខណៈពេលដែលខុនដូនៅក្នុងខេត្តនេះមានតម្លៃជាមធ្យមប្រមាណ៧២,៧លានយ៉េនក្នុងមួយយូនីត និងមានគម្លាតចំនួន១៥,៨៨ដងនៃប្រាក់ចំណូល។

លោក Takahashi បានអះអាងឱ្យដឹងបន្ថែមទៀតថា ទោះបីជាប្រាក់ចំណូលប្រចាំឆ្នាំជាមធ្យមរបស់ប្រជាជនជប៉ុនកើនឡើងយ៉ាងណាក្តី ក៏តម្លៃខុនដូនឹងមិនអាចធ្លាក់ចុះនោះទេ ដោយសារនិន្នាការទីផ្សារកំពុងផ្លាស់ប្តូរទៅរកអចលនទ្រព្យប្រណីតដែលផ្តោតលើក្រុមអ្នកមាន៕ប្រភព: Japan Times៕

ដោយ: គង់ លាងហួរ
បាងកក: ទីផ្សារ​អចលន​ទ្រព្យ​នៅ​ប្រទេស​ថៃ​កំពុង​រីក​ចម្រើន ហើយ​ក៏​មាន​ការ​ក្លែង​បន្លំ​ឆបោក(Fraud)តាមរូបភាពផ្សេងៗផងដែរ។ ក្នុងករណីនេះ ក្រុមអ្នកជំនាញផ្នែកច្បាប់បានណែនាំឱ្យបណ្តាវិនិយោគិន​បរទេស ជាពិសេសវិនិយោគចិនត្រូវសម្រេចចិត្តដោយ​​ប្រយ័ត្នប្រយែង។

យោងតាមទិន្នន័យបានឱ្យដឹងថា ជនជាតិចិនមានចំណែកជិត៥០ភាគរយនៃការទិញខុនដូសរុបទាំងអស់ដោយជនបរទេសកាលពីឆ្នាំមុននៅក្នុងប្រទេសថៃ ហើយជនជាតិចិនក៏បានស្ថិតក្នុងចំណោមជនរងគ្រោះជាច្រើន ដោយសារការឆបោកផងដែរ។

ក្នុងនោះ លោកស្រី Zoe Yu ជាជនរងគ្រោះម្នាក់មានអាយុ៤៥ឆ្នាំ ប្រកបមុខរបរជាជាងថតរូបមកពីទីក្រុង Ningbo ស្ថិតនៅភាគអាគ្នេយ៍នៃប្រទេសចិន។ លោកស្រីបានជួបប្រទះបញ្ហា ក្នុងអំឡុងពេលវិនិយោគអចលនទ្រព្យនៅទីក្រុងឈៀងម៉ៃ ដែលជាទីក្រុងធំបំផុតទីពីររបស់ប្រទេសថៃ បន្ទាប់ពីទីក្រុងបាងកក។

ដោយមើលឃើញថា ការអប់រំលំដាប់អន្តរជាតិ និងថ្លៃចំណាយលើការរស់នៅក្នុងតំបន់ទេសចរណ៍ភាគខាងជើងមានតម្លៃសមរម្យ លោកស្រីបានសម្រេចចិត្តចុះកិច្ចសន្យាក្នុងខែមករា ឆ្នាំ២០២៣ ដើម្បីទិញផ្ទះវីឡាតម្លៃ១០លានបាត (២៩៣.០០០ដុល្លារអាមេរិក)នៅទីក្រុងឈៀងម៉ៃ។

ក្រោយមក ទើបលោកស្រី Yu បាន​ដឹង​ថា ជន​បរទេស​ត្រូវ​បាន​ហាម​ឃាត់​មិន​ឱ្យ​មាន​ដី ឬ​ផ្ទះ​ផ្ទាល់ខ្លួន​ក្នុង​ប្រទេស​ថៃទេ។ ទោះបីជាកិច្ចសន្យានោះខ្វះការការពារផ្លូវច្បាប់យ៉ាងណាក្តី ក៏លោកស្រីបានធ្វើការតវ៉ា និងទទួលបានការសងប្រាក់ត្រឡប់មកវិញក្នុងខែកក្កដា ឆ្នាំ២០២៤នេះ។

ក្រុមហ៊ុនច្បាប់របស់ប្រទេសថៃ “House Condo” ដែលមានឯកទេសក្នុងការវិនិយោគអចលនទ្រព្យបានលើកឡើងថា “ជាអកុសល ទីផ្សារបានក្លាយជាគោលដៅនៃការក្លែងបន្លំ ដោយសារអ្នកវិនិយោគថ្មីមួយចំនួនមានចំណេះដឹងតិចតួចអំពីបទប្បញ្ញត្តិ”។

ក្រុមហ៊ុន House Condo អះអាងថា ការចេញប័ណ្ណកម្មសិទ្ធិក្លែងបន្លំ និងការលក់ដីខុសច្បាប់អាចបណ្តាលឱ្យមានការខាតបង់យ៉ាងច្រើន ហើយ​ក្រុមហ៊ុន​នេះ​ធ្លាប់ជួបប្រទះករណីមួយ ដែលអ្នក​វិនិយោគ​ម្នាក់​បាន​ខាតបង់​ប្រាក់​អស់ចំនួន៤០០លាន​បាត។

ក្រុមហ៊ុនក៏បានគូសបញ្ជាក់ផងដែរអំពីបញ្ហានៃរចនាសម្ព័ន្ធអ្នកឈរឈ្មោះខុសច្បាប់(Nominee)។

ក្នុងករណីនេះ ជនបរទេសត្រូវបានល្បួងឱ្យជឿថា ពួកគេអាចកាន់កាប់ដីធ្លីបាននៅប្រទេសថៃ ដោយការចុះបញ្ជីក្រោមឈ្មោះរបស់អ្នកឈរឈ្មោះតំណាងជាជនជាតិថៃ។ ក្រុមហ៊ុន House Condo បញ្ជាក់ថា ការធ្វើបែបនេះខុសច្បាប់ ហើយអាចបណ្តាលឱ្យអ្នកវិនិយោគបរទេសខាតបង់ ប្រសិនបើអ្នកឈរឈ្មោះនោះទាមទារកម្មសិទ្ធិ ឬប្រសិនបើអាជ្ញាធរថៃបើកការស៊ើបអង្កេតឃើញ៕ប្រភព: SCMP៕