ដោយ: គង់ លាងហួរ
អន្តរជាតិ: យោងតាមរបាយការណ៍ថ្មីរបស់ក្រុមហ៊ុនប្រឹក្សាអចលនទ្រព្យ Knight Frank បានឱ្យដឹងថា ទីផ្សារមជ្ឈមណ្ឌលទិន្នន័យរបស់កម្ពុជាកំពុងស្ថិតក្នុងដំណាក់កាលមួយដ៏សំខាន់។

ការរីកចម្រើនយ៉ាងឆាប់រហ័សរបស់ទីផ្សារនេះត្រូវបានជំរុញ ដោយការធ្វើឌីជីថលូនីយកម្មរបស់ប្រទេសកម្ពុជា រួមទាំងការជឿនលឿនផ្នែកពាណិជ្ជកម្មអេឡិចត្រូនិក ធនាគារអេឡិចត្រូនិក និងគំនិតផ្តួចផ្តើមឌីជីថលរបស់រដ្ឋាភិបាល។

ស្របពេលមានការកើនឡើងនៃបណ្តាក្រុមហ៊ុនប្រតិបត្តិករធំៗ និងការកែសម្រួលច្បាប់របស់រដ្ឋាភិបាល ទីផ្សារមជ្ឈមណ្ឌលទិន្នន័យរបស់ប្រទេសកម្ពុជាត្រូវបានព្យាករណ៍ថា នឹងកើនឡើងយ៉ាងឆាប់រហ័សនៅក្នុងទសវត្សរ៍ក្រោយ។

ចាប់ពីឆ្នាំ១៩៩៥ ដល់ឆ្នាំ២០១៩ កម្ពុជាសម្រេចបានកំណើនសេដ្ឋកិច្ចក្នុងរង្វង់ជាមធ្យម៧%ជារៀងរាល់ឆ្នាំ ដោយសារការជំរុញការអភិវឌ្ឍន៍វិស័យសំខាន់ៗដូចជា ពាណិជ្ជកម្មអេឡិចត្រូនិក និងធនាគារអេឡិចត្រូនិក។

ភាពជឿនលឿនទាំងនេះ គួបផ្សំនឹងគំនិតផ្តួចផ្តើមរបស់រដ្ឋាភិបាលកម្ពុជា ដែលផ្តោតលើវេទិកាឌីជីថល បានជំរុញការកើនឡើងនៃប្រតិបត្តិករមជ្ឈមណ្ឌលទិន្នន័យដូចជា ByteDC មជ្ឈមណ្ឌលទិន្នន័យចតុមុខ (CDC) និងមជ្ឈមណ្ឌលទិន្នន័យដូនពេញ (DPDC)។

តម្រូវការនៅក្នុងការរក្សាទុកទិន្នន័យឱ្យមានសុវត្ថិភាព បានជំរុញឱ្យមានការផ្លាស់ប្តូរ ជាពិសេសក្នុងវិស័យធនាគារ និងហិរញ្ញវត្ថុរបស់កម្ពុជា។ ឧស្សាហកម្មទាំងនេះផ្តល់អាទិភាពដល់សុវត្ថិភាពទិន្នន័យ និងការការពារអតិថិជន ដែលជំរុញតម្រូវការមជ្ឈមណ្ឌលទិន្នន័យដែលមានគុណភាពខ្ពស់ និងគួរឱ្យទុកចិត្តបាន។

របាយការណ៍របស់ក្រុមហ៊ុន Knight Frank បានព្យាករណ៍ថា សមត្ថភាពមជ្ឈមណ្ឌលទិន្នន័យរបស់កម្ពុជានឹងកើនឡើងយ៉ាងឆាប់រហ័ស ខណៈគម្រោងថ្មីមួយក្រោមទំហំទុនវិនិយោគចំនួន៣០លានដុល្លារដែលដឹកនាំដោយក្រសួងប្រៃសណីយ៍ និងទូរគមនាគមន៍ (MPTC) គ្រោងនឹងដាក់ឱ្យប្រើប្រាស់នៅឆ្នាំ២០២៥។

លើសពីនេះ រដ្ឋាភិបាលកម្ពុជាត្រូវបានគេរំពឹងថា នឹងដាក់ចេញច្បាប់តម្រូវឱ្យបណ្តាក្រុមហ៊ុននានាត្រូវរក្សាទុកទិន្នន័យនៅក្នុងស្រុក។ ការណ៍នេះអាចនឹងពន្លឿនកំណើននៃទីផ្សារមជ្ឈមណ្ឌលទិន្នន័យនៅកម្ពុជាក្នុងរយៈពេលមធ្យម និងរយៈពេលវែង៕ប្រភព: Knight Frank៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃនៅព្រឹកថ្ងៃសុក្រនេះ ខណៈក្រុមអ្នកវិនិយោគកំពុងរង់ចាំអ៊ុតមើលទិន្នន័យសន្ទស្សន៍ថ្លៃចំណាយលើការប្រើប្រាស់ផ្ទាល់ខ្លួន(PCE)របស់សហរដ្ឋអាមេរិក។ ទិន្នន័យនេះជាសូចនាករអតិផរណា ដែលអាចផ្តល់តម្រុយបន្ថែមទៀតលើទស្សនវិស័យសេដ្ឋកិច្ចអាមេរិក។

តួយ៉ាង តម្លៃមាស Spot Gold បានងើបឡើង០,២ភាគរយដល់២៥៩៨,៩៤ដុល្លារក្នុងមួយអោន ខណៈតម្លៃហាងឆេងមាសរបស់អាមេរិក U.S. gold futures បានងើបឡើង០,១៣ភាគរយដល់២៦១១,៥០ដុល្លារក្នុងមួយអោន គិតត្រឹមម៉ោង១០:៣៦នាទីព្រឹក។

គិតត្រឹមពេលបិទការជួញដូរកាលពីថ្ងៃព្រហស្បតិ៍ម្សិលមិញ តម្លៃមាស Spot Gold បានបិទនៅត្រឹម២៥៩៣,៨៥ដុល្លារក្នុងមួយអោន ខណៈតម្លៃមាស U.S. gold futures បានបិទនៅត្រឹម២៦០៨,១០ដុល្លារក្នុងមួយអោន។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៨៩,៣ភាគរយ ដែលធនាគារកណ្តាលអាមេរិក (Fed) នឹងអាចរក្សាទុកអត្រាការប្រាក់ឱ្យនៅថេរក្នុងកិច្ចប្រជុំគោលនយោបាយរបស់ខ្លួននៅថ្ងៃទី២៩ ខែមករា ឆ្នាំ២០២៥ខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃដល់១០៨,៤៤ពិន្ទុនៅព្រឹកថ្ងៃសុក្រនេះ បន្ទាប់ពីបានបិទការជួញដូរក្នុងរង្វង់១០៨,៤១ពិន្ទុកាលពីថ្ងៃព្រហស្បតិ៍ម្សិលមិញ។

តម្លៃលោហៈធាតុប្រាក់ Spot silver បានធ្លាក់ចុះ០,១១%ដល់២៩,៣៨ដុល្លារ ក្នុងមួយអោន ខណៈតម្លៃផ្លាទីនបានងើបឡើង០,០៩%ដល់៩២៤,៣ដុល្លារក្នុងមួយអោន ហើយតម្លៃ palladium បានធ្លាក់ចុះ០,៤៦%ដល់៩០៣ដុល្លារក្នុងមួយអោនគិតត្រឹមម៉ោង១០:៣៨នាទីព្រឹក៕

ដោយៈ គង់ សូរិយា

ភ្នំពេញៈ រាជរដ្ឋាភិបាលកម្ពុជា បន្តយកចិត្តទុកដាក់យ៉ាងខ្លាំងលើការជំរុញទាក់ទាញវិនិយោគក្នុងវិស័យអាទិភាព ដើម្បីជំរុញការធ្វើពិពិធកម្មមូលដ្ឋាន ឧស្សាហកម្មនិងសេដ្ឋកិច្ចកម្ពុជា ព្រមទាំងបង្កើនឱកាសការងារជូនប្រជាពលរដ្ឋខ្មែរ។

លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានថ្លែងបែបនេះ ក្នុងពេលអញ្ជើញជាអធិបតីដ៏ខ្ពង់ខ្ពស់ដឹកនាំ “កិច្ចប្រជុំការរៀបចំយុទ្ធសាស្ត្រជំរុញវិនិយោគរយៈពេល ៣ឆ្នាំ និងផែនការសកម្មភាព”។

កិច្ចប្រជុំនេះមានការអញ្ជើញចូលរួមពី លោកស្រី Bridget Collier ឯកអគ្គរដ្ឋទូតរងអូស្រា្តលីប្រចាំកម្ពុជា និងសហការី តំណាងកម្មវិធីភាពជាដៃគូកម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកប​ដោយភាពធន់ (CAPRED) ព្រមទាំងថ្នាក់ដឹកនាំ និងមន្ត្រីជំនាញសរុបប្រមាណ៤០រូប។

កិច្ចប្រជុំខាងលើនេះត្រូវបានរៀបចំឡើង ក្នុងគោលបំណងដើម្បីពិភាក្សា និងសម្រេចជ្រើសរើសវិស័យអាទិភាពចម្បង សម្រាប់ការរៀបចំយុទ្ធសាស្រ្តជំរុញវិនិយោគ ក្រោមជំនួយបច្ចេកទេសរបស់អូស្រ្តា​លី តាមរយៈកម្មវិធីCAPRED។

យុទ្ធសាស្ត្រជំរុញវិនិយោគ នឹងដាក់ចេញសកម្មភាពជាក់លាក់ដែលអាចអនុវត្តបាន ដោយផ្តោតជាចម្បងលើការកំណត់ វិស័យអាទិភាព ការគាំទ្រនិងកិច្ចសម្រួលដល់វិនិយោគិន ព្រមទាំងការកំណត់គុណតម្លៃច្បាស់លាស់ ក្នុងវិស័យអាទិភាពដែលបានកំណត់ ដើម្បីជំរុញទាក់ទាញវិនិយោគ និងទាញយកជាអតិបរមានូវកាលានុវត្តភាពពីនិន្នាការដែលបាន និងកំពុងលេចឡើងទាំងក្នុងតំបន់ និងសកល។

ជាកិច្ចចាប់ផ្តើម លោកឧបនាយករដ្ឋមន្ត្រីស៊ុន ចាន់ថុលបានស្វាគមន៍យ៉ាងកក់ក្តៅ ចំពោះគណៈប្រតិភូរបស់ស្ថានទូតអូស្រា្តលី ព្រមទាំងបានបង្ហាញពីចំណាប់អារម្មណ៍ លើការសហការរៀបចំយុទ្ធសាស្រ្តនេះជាមួយកម្មវិធី CAPRED ដោយហេតុថាឯកសារយុទ្ធសាស្ត្រនេះ នឹងដើរតួនាទីយ៉ាងសំខាន់ ក្នុងការគាំទ្រដល់បេសកកម្មជំរុញទាក់ទាញវិនិយោគ។

 បន្ថែមពីនេះ លោកឧបនាយករដ្ឋមន្ត្រី បានផ្ដល់នូវអនុសាសន៍ដល់កម្មវិធី CAPRED ឱ្យផ្តល់អាទិភាពស្វែងរកព័ត៌មាន អំពីក្រុមហ៊ុនសក្ដានុពល ដែលមានបំណងចង់ផ្លាស់ប្ដូរមូលដ្ឋាន ផលិតកម្មមកកាន់តំបន់អាស៊ាន, ព្រមទាំងសិក្សាស៊ីជម្រៅ លើយុទ្ធសាស្រ្តគាំទ្រដល់វិស័យកសិ-ឧស្សាហកម្មកម្ពុជា និងសាកល្បងសិក្សាសមិទ្ធិលទ្ធភាពក្នុងការកំណត់យកវិស័យភស្ដុភារកម្ម ជាវិស័យអាទិភាពមួយបន្ថែមទៀតសម្រាប់យុទ្ធសាស្ត្រជំរុញវិនិយោគរយៈពេល៣ឆ្នាំ។

ជាមួយគ្នានេះ លោកស្រីឯកអគ្គរដ្ឋទូតរង បានសម្តែងនូវសេចក្តីសោមនស្ស និងការពេញចិត្តចំពោះកិច្ចសហប្រតិបត្តិការ រវាងរដ្ឋាភិបាលអូស្រ្តាលី និងរាជរដ្ឋាភិបាលកម្ពុជាកន្លងមក ជាពិសេសកិច្ចសហការជាមួយក្រុមប្រឹក្សាអភិវឌ្ឍន៍កម្ពុជា។

លោកស្រីឯកអគ្គរដ្ឋទូតរង មានសង្ឃឹមយ៉ាងមុតមាំថា យុទ្ធសាស្រ្តវិនិយោគរយៈពេល៣ឆ្នាំ នឹងក្លាយឯកសារផ្ទៃក្នុងយ៉ាងសំខាន់សម្រាប់ក្រុមប្រឹក្សាអភិវឌ្ឍន៍កម្ពុជា អាចតម្រង់ទិសការទាក់ទាញវិនិយោគដែលមានគុណភាព និងតម្លៃបន្ថែមខ្ពស់សម្រាប់កម្ពុជា៕

ដោយៈ គង់ សូរិយា

    ភ្នំពេញៈ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានជំរុញណែនាំលើកទឹកចិត្ដដល់គណៈកម្មាធិការកណ្ដាល មន្ដ្រី បុគ្គលិក អ្នកស្ម័គ្រចិត្ដ និងយុវជនកាកបាទក្រហមកម្ពុជាទាំង២៥ រាជធានី-ខេត្ដ ពិសេសក្រុមមន្ដ្រីប្រតិបត្ដិទាំងអស់ ត្រូវបន្ដខិតខំប្រឹងប្រែងបំពេញ ការងារមនុស្សធម៌ឱ្យកាន់តែក្លៀវ​ក្លាវបន្ថែមទៀត ដើម្បីឆ្លើយតបឱ្យកាន់តែទាន់ពេលវេលា និងចំគោលដៅ ក្នុងការជួយសម្រាលការលំបាក ដល់ប្រជាពលរដ្ឋងាយរងគ្រោះ និងរងគ្រោះបំផុត គ្រប់រូបភាព និងគ្រប់ទីកន្លែង ប្រកបដោយប្រសិទ្ធភាពខ្ពស់។

ការថ្លែងយ៉ាងដូច្នេះ របស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងឱកាសអញ្ជើញបើកកិច្ចប្រជុំ គណៈកម្មាធិការកណ្ដាល ដើម្បីឆ្លងសេចក្ដីព្រាងរបាយការណ៍ បូកសរុបសកម្មភាពការងារ ឆ្នាំ២០២៤ និងដាក់ទិសដៅការងារឆ្នាំ២០២៥ រួមទាំងបញ្ហាផ្សេងៗ នៅថ្ងៃទី១៦ ខែធ្នូ ឆ្នាំ២០២៤ ដែលប្រព្រឹត្ដទៅនៅទីស្នាក់ការកណ្ដាលកាកបាទក្រហមកម្ពុជា។

សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្លែងបន្ដថា “ក្នុងរយៈពេល១ឆ្នាំ ២០២៤នេះ សហការីយើងទាំងអស់បានបំពេញការងារយ៉ាងចិត្ដទុកដាក់ ក្នុងការឆ្លើយតបនឹងតម្រូវការរបស់ប្រជាពល​រដ្ឋងាយរងគ្រោះ និងរងគ្រោះបំផុត បានយ៉ាងល្អ និងទាន់ពេលវេលា ថែមទាំងបានចូលរួមជាមួយរាជរដ្ឋាភិបាល ក្នុងការលើកកម្ពស់សុខុមា​លភាព និងគុណភាពជីវិតជូនប្រជាជនកម្ពុជាយើង”។

សម្តេចបន្តថា សកម្មភាពទាំងនោះ បានធ្វើឡើងតាមរយៈសកម្ម​ភាពផ្សេងៗ ដូចជា ការចុះអប់រំផ្សព្វផ្សាយពីបញ្ហាសុខភាព នៅតាមសាលារៀន រោងចក្រ មន្ទីរពេទ្យ និងសហគមន៍ជាដើម។ ជាពិសេសផែនការការងារ ដែលសមាគមជាតិបានដាក់ចុះមក យើងបានអនុវត្ដន៍ និងទទួលបានលទ្ធផលយ៉ាងល្អ លើសពីការរំពឹងទុករបស់សហព័ន្ធទៅទៀត មិនថាលើការងារមនុស្សធម៌ និងការលើកកម្ពស់ជីវភាព និងសុខភាព តួយ៉ាងលើបញ្ហាមេរោគអេដស៍/ជំងឺអេដស៍ សុខភាពមាតា និងទារក ជំងឺឆ្លង និងមិនឆ្លងនានា ពិសេសការកើនឡើងនូវកម្លាំងយុវជន អ្នកស្ម័គ្រចិត្ដ និងសមាជិកកិត្ដិយសជាដើម។

ទោះបីការងារកន្លងមកនេះ កាកបាទក្រហមកម្ពុជា បានឆ្លើយតបបានយ៉ាងទាន់ពេលវេលា ហើយទទួលបានការស្ងើចសរសើរពីសហព័ន្ធអន្ដរជាតិ ឬឆាកអន្ដរជាតិក្ដី ក៏យើងមិនត្រូវភ្លេចខ្លួន គឺត្រូវបន្ដខិតខំប្រឹងប្រែងសហការគ្នា សាមគ្គីភាពគ្នាជាធ្លុកមួយ ក្ដាប់ការងារឱ្យបានគ្រប់ជ្រុងជ្រោយ ដើម្បីបំពេញការងារនៅឆ្នាំក្រោយៗទៀត ឱ្យកាន់តែមានប្រសិទ្ធភាពខ្ពស់ជាបន្ដបន្ទាប់ ដើម្បីធានាថាយើងមិនបានទុកឱ្យពលរដ្ឋយើងណាម្នាក់ដែលខ្វះខាត មិនទទួលបានការជួយសម្រាលការលំបាកនោះទេ។

បច្ចុប្បន្នជំងឺមិនឆ្លង កំពុងតែជាបញ្ហាសុខភាពសាធារណៈដ៏ធំនៅកម្ពុជា ក៏ដូចជា នៅលើសកលោក ដែលបានសម្លាប់មនុស្សរាប់ពាន់នាក់ក្នុងមួយឆ្នាំៗ ។សម្រាប់នៅកម្ពុជា ជំងឺមិនឆ្លងបានសម្លាប់ប្រជាពលរដ្ឋយើង ប្រមាណ៦ពាន់នាក់ជារៀងរាល់ឆ្នាំ ខណៈដែលជំងឺនេះអាចបង្ការ និងការពារបាន ដូច្នេះសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានជំរុញដល់ថ្នាក់ដឹកនាំ ក៏ដូចជាមន្ដ្រីក្រុមប្រតិបត្ដិផ្ទាល់ជាមួយប្រជាពលរដ្ឋ បន្ដអប់រំផ្សព្វផ្សាយឱ្យប្រជាពលរដ្ឋមានការយល់ដឹងបន្ថែម។

សម្រាប់ធនធានមនុស្សវិញ គឺស្នើឱ្យសហការីទាំងអស់ ត្រូវយកចិត្ដទុកដាក់ ពង្រឹង និងពង្រីកសមត្ថភាពយុវជនកាកបាទក្រហមកម្ពុជាទូទាំងប្រទេស ពិសេសសិស្ស ឬនិស្សិតរូបណា ដែលចង់រៀនតែពុំមានលទ្ធភាព ត្រូវតែឧបត្ថម្ភគាំទ្រ ឱ្យបានរៀនសូត្រចប់ចុង ចប់ដើម។ ចំណែកឯកប្រជាពលរដ្ឋងាយរងគ្រោះផ្សេងទៀត ដូចជាគ្រួសាររងគ្រោះដោយសារមីន គ្រួសារយោធិនពិការ គ្រួសារអតីតយុទ្ធជន ស្នើឱ្យយកចិត្ដទុកដាក់បន្ថែមទៀត ក្នុងការជួយសម្រួលលើជីវភាព ដោយត្រូវបន្ដផ្ដល់ប្រាក់កម្ចី ពុំមានការប្រាក់ជូនដល់ពួកគាត់ ដើម្បីយកទៅប្រើប្រាស់តាមតម្រូវការ ដូចជាយកទៅបង្កើត ឬបង្កើនមុខរបរចិញ្ចឹមជីវិតប្រចាំថ្ងៃ មានដូចជា លក់ដូរ ចិញ្ចឹមសត្វ កាត់ដេរ ធ្វើស្រែចំការ និងមុខរបរផ្សេងៗទៀត។

ក្នុងរយៈពេល១ឆ្នាំ២០២៤នេះ កាកបាទក្រហមកម្ពុជា បានឆ្លើយតបបានភ្លាមៗ ទៅនឹងតម្រូវការជាក់ស្ដែង នៅតាមសហគមន៍រងគ្រោះ និងប្រជាពលរដ្ឋបំផុតបាន៣៩,០៤៧គ្រួសារ (ថ្នាក់កណ្ដាល ១៥,៤៧២គ្រួសារ និងសាខា២៣,៥៧៥គ្រួសារ។

ចំណែកការងារលើកកម្ពស់សុខភាពសាធារណៈ ពិសេសចូលរួមកាត់បន្ថយអត្រាឈឺ និងស្លាប់នៃមាតា ទារក និងកុមារ ការពារ និងលុបបំបាត់ជំងឺឆ្លង -ជំងឺមិនឆ្លង អន្ដរាគមន៍សុខភាពគ្រាអាសន្ន សុខភាពមនុស្សចាស់ សុខភាពផ្លូវចិត្ដ សង្គ្រោះបឋម និងការលើកកម្ពស់សុខភាពសហគមន៍ ក្នុងនោះកាកបាទក្រហមកម្ពុជា នៅតែបន្ដផ្ដល់ថវិកា ១លានដុល្លារ ជូនមូលនិធិគន្ធបុប្ផាកម្ពុជា លើកទី៧ និងជាលើកទី១៣ សម្រាប់មន្ទីរពេទ្យគន្ធបុប្ផា រួមទាំងថវិកា៥ម៉ឺនដុល្លារ ជូនមន្ទីរពេទ្យកុមារអង្គរជាលើកទី៧ និងបានធ្វើសកម្មភាពលើកកម្ពស់សុខភាពតាមរូបភាពផ្សេងៗជាច្រើនទៀត។ ចំណែកគ្រួសាររងគ្រោះដោយសារមីន គ្រួសារយោធិនពិការ គ្រួសារអតីតយុទ្ធជន កាកបាទក្រហមកម្ពុជា បានបន្ដជួយតាមរយៈការផ្ដល់ប្រាក់កម្ចីពុំមានការប្រាក់ ដែលគិតចាប់ពីឆ្នាំ២០០៥ មកដល់បច្ចុប្បន្ន កាកបាទក្រហមកម្ពុជា បានផ្ដល់ប្រាក់កម្ចីពុំមានការប្រាក់ សរុបចំនួន ៩,០៤០គ្រួសារ។

ក្រៅពីកិច្ចការងារខាងលើនេះ កាកបាទក្រហមកម្ពុជា ដែលជាស្ថាប័នឈានមុនគេ ខាងវិស័យមនុស្សធម៌តែមួយគត់នៅកម្ពុជា គឺបានចូលរួមចំណែកជាច្រើនទៀត ក្នុងការជួយលើកកម្ពស់ជីវភាព សុខភាព និងធនធានមនុស្សនៅកម្ពុជា ដែលអនុវត្ដទៅតាមយុទ្ធសាស្ដ្រ ដែលមានកម្រងច្បាប់ រចនាសម្ព័ន្ធត្រឹមត្រូវ មានធនធានមនុស្សទាំងថ្នាក់កណ្ដាល សាខា អនុសាខា និងមានកម្លាំងយុវជនកាកបាទក្រហមកម្ពុជា នៅតាមគ្រឹះស្ថានសិក្សា និងអ្នកស្ម័គ្រចិត្ដ តាមភូមិ អនុវត្ដការងារតាមវិស័យអាទិភាពទាំង៤ ៖ ១) វិស័យអាទិភាព ការគ្រប់គ្រងគ្រោះមហន្ដរាយ វិបត្ដិភ័យ និងការប្រែប្រួលអាកាសធាតុ, ២) វិស័យអាទិភាព សុខភាព និងការថែទាំសុខភាពក្នុងសហគមន៍, ៣)វិស័យអាទិភាព ការលើកកម្ពស់គោលការណ៍គ្រឹះ និងតម្លៃមនុស្សធម៌ និង៤) វិស័យអាទិភាព ការអភិវឌ្ឍស្ថាប័ន។

សម្រាប់ភាពជោគជ័យ លើការការងារមនុស្សធម៌ជាបន្ដបន្ទាប់មកដល់ថ្ងៃនេះ គឺដោយសារកាកបាទក្រហកម្ពុជា មានព្រះវត្ដមាន សម្ដេ​ច​ព្រះមហាក្សត្រី មុនិនាថ សីហនុ ព្រះវររាជមាតាជាតិខ្មែរ ជាព្រះ​ប្រធានកិត្ដិយស និងការដឹកនាំដ៏ប៉ិនប្រសព្វ និងឈ្លាសវៃ ប្រកប​ដោយមគ្គុទេសដ៏ថ្លៃថ្លារបស់ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជាមួយគណៈកម្មាធិការកណ្ដាលកាកបាទក្រហមកម្ពុជា បានប្រកាន់ខ្ជាប់នូវភាពជាម្ចាស់ និងភាពដឹកនាំឈរលើអភិក្រមបុរេសកម្មចំពោះការងារ ដោយបានសហការយ៉ាងល្អ ជាមួយសមាគមជាតិដៃគូ សប្បុរសជន ក្រសួង ស្ថាប័ន និងអាជ្ញាធរមូលដ្ឋាន ប្រមូលផ្ដុំរួមគ្នានូវសមត្ថភាព បញ្ញាញាណ ធនធានសម្ភារៈ និងថវិកា សម្រេចបាននូវសមិទ្ធផលយ៉ាងច្រើន ជាប្រយោជន៍ជាច្រើនដល់ប្រជាជនរងគ្រោះ និងងាយរងគ្រោះ ទាំងថ្នាក់ជាតិ និងអន្ដរជាតិ ដែលនាំនាវាកាកបាទក្រហមកម្ពុជា មានមុខមាត់ មានការទទួលស្គាល់ពីសក្ដានុពល និងកិត្ដិនាមលើឆាកអន្ដរជាតិ និងមានការគាំទ្រ ផ្ដល់តម្លៃពីប្រជាពលរដ្ឋគ្រប់ស្រទាប់វណ្ណៈ៕

ដោយៈ គង់ សូរិយា

    ព្រះសីហនុៈ មន្រ្តីរដ្ឋបាលខេត្ត និងក្រុមថ្នាក់ដឹកនាំការងារជម្រុញការវិនិយោគនៅខេត្តព្រះសីហនុ បានចុះពិនិត្យថែរទាំគំរោងវិនិយោគចំនូន៣ ដែលមានទុនវិនិយោគជាង១០០០លានដុល្លារអាមេរិក។

ក្នុងយន្តការថែទាំវិនិយោគិន លោក ឡុង ឌីម៉ង់ អភិបាលរងនៃគណៈអភិបាលខេត្ត និងជាសមាជិកនៃក្រុមការងារជំរុញការវិនិយោគក្នុងខេត្តព្រះសីហនុ បានចូលរួមជាមួយ លោកបណ្ឌិតសភាចារ្យហ៊ាន សាហ៊ីប ទីប្រឹក្សាសម្តេចធិបតីនាយករដ្ឋមន្រ្តី និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ អញ្ជើញចុះពិនិត្យគម្រោង ដែលបានទទួលបានការលើកទឹកចិត្ត ការអនុគ្រោះ និង ការសម្រួលនីតិវិធី ក្រោមវិសាលភាព “កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤” នៅទីតាំងចំនួន៣ ដែលមានទុនវិនិយោគប៉ាន់ស្មានសរុប១.០៤០លានដុល្លារអាមេរិក និងអាចបង្កើតការងារបានចំនួន ៥.៧៥៥កន្លែង

គំរោងចំនួនបីនោះ រួមមាន ទី១. គម្រោងសណ្ឋាគារផ្កាយ៥ និង អគារពាណិជ្ជកម្ម (Peninsula Integrated Resort) របស់ក្រុមហ៊ុន Peninsula Bay Investment Co., Ltd ទី២ គម្រោង រោងចក្រផលិតដែករបស់ក្រុមហ៊ុន HUALE STEEL (CAMBODIA) CO., LTD. ទី៣គម្រោងរោងចក្រផលិត និងផ្គុំដំឡើងបន្ទះសូឡា និងគ្រឿងបង្គុំរបស់ ក្រុមហ៊ុន JINGYING PV-TECH (CAMBODIA) CO., LTD។

លោកអភិបាលរង បានលើកឡើងថា ការចុះពិនិត្យគម្រោងដែលទទួលបានការលើកទឹកចិត្តរួចហើយនេះ មានគោលបំណង ដើម្បីតាមដាន និងជំរុញការអនុវត្តគម្រោង និងស្តាប់ពីវឌ្ឍនភាពអនុវត្តគម្រោង សំណូមពរ និងជាពិសេសបញ្ហាប្រឈមនានា ពីវិនិយោគិនដោយផ្ទាល់។

លោកបញ្ជាក់ថា “ការចុះពិនិត្យនេះ គឺជាភារកិច្ចសំខាន់ដែលរដ្ឋបាលខេត្តក្នុងនាមជាអាជ្ញាធរមូលដ្ឋាន និងក្រុមការងារត្រូវបំពេញនិងកំពុងបន្តអនុវត្តជាប់ជាប្រចាំ”។ លោកបន្តថា “បន្ថែមពីលើការទាក់ទាញការវិនិយោគ ភារកិច្ចសំខាន់មួយទៀតរបស់យើងគឺ ស្វែងយល់អំពីបញ្ហាប្រឈមរបស់វិនិយោគិន ដើម្បីមានលទ្ធភាពផ្តល់ដំណោះស្រាយ និងការសម្របសម្រួលផ្សេងៗ រួមទាំងការពន្យល់នានា ដើម្បីជំរុញការអនុវត្តគម្រោងដោយរលូន និងបង្កើតបរិយាកាសវិនិយោគកាន់តែល្អប្រសើរ”៕

ដោយៈ គង់ សូរិយា

    ភ្នំពេញៈ

ក្រុមមន្រ្តីក្រសួងសាធារណៈការ និងដឹកជញ្ជូន និងមន្រ្តីជំនាញកូរ៉េ បានចុះពិនិត្យ ការប្រើប្រាស់ម៉ាស៊ីន FWD (Falling Weight Deflectometer) ពិសោធន៍ វិភាគលើកកម្រិតគុណភាពស្រទាប់កម្រាលផ្លូវថ្នល់ នៅលើគម្រោងពង្រីក និងលើកកម្រិតកំណាត់ផ្លូវជាតិលេខ៧។

ការចុះពិនិត្យនេះ ដឹកនាំដោយលោកឃុន សុខា អនុរដ្ឋលេខា​ធិការ បានដឹកនាំមន្ត្រីជំនាញបច្ចេកទេស មកពីក្រសួង មន្ទីរសាធារណការខេត្តកំពង់ចាម ព្រៃវែង ត្បូងឃ្មុំ ក្រចេះ និងខេត្តស្ទឹងត្រែង ចុះពិនិត្យសកម្មភាពអនុវត្តន៍សាកល្បង លើគម្រោងពង្រីក និងលើកកម្រិតកំណាត់ផ្លូវជាតិលេខ៧ ដោយក្រាល Geogrid ដោយប្រើប្រាស់ឧបករណ៍ FWD (Falling Weight Deflectometer) លើស្រទាប់ផ្លូវចាស់ និងចាក់ស្រទាប់បេតុងកៅស៊ូAsphalt Concrete (AC) កម្រា​ស់៥សង់ទីម៉ែត្រ នៅចំណុចគីឡូម៉ែត្រ១៥៣+៦៧៥ ទៅគីឡូម៉ែត្រ ១៥៣+៧៧៥ ក្នុងភូមិដំណាក់ចារ ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ។

ការចុះពិនិត្យនាពេលនោះ មានការចូលរួមសហការ ដឹកនាំអនុវត្តដោយលោកបណ្ឌិត Byungsik Ohm និង លោកបណ្ឌិត Carlo Elipse មកពី វិទ្យាស្ថានវិស្វកម្មសំណង់ និងបច្ចេកវិទ្យាកូរ៉េ Korea Institute of Civil Engineering and Building Technology (KICT) មកពីប្រទេសកូរ៉េ  និងមានការចូលរួមពីអង្គភាពពាក់ព័ន្ធ ផងដែរ។

ក្នុងដំណើរបេសកកម្មនេះ គឺមានគោលបំណង ប្រៀបធៀប ការអ៊ុតសាកល្បងនូវស្រទាប់ផ្លូវ ដែលប្រើប្រាស់ប្រភេទកៅស៊ូធម្មតា Asphalt Concrete (AC) និងក្រាលកៅស៊ូ Geogrid ដើម្បីវាយតម្លៃលើគុណភាពផ្លូវ តាមរយៈលទ្ធផលទិន្នន័យផ្លូវដែលបានធ្វើតេស្តរួច ដោយបានប្រើប្រាស់ឧបករណ៍ FWD(Falling Weight Deflectometer) និងយកលទ្ធផលទិន្នន័យ ដែលទទួលបានពីការធ្វើតេស្តសាកល្បងនេះ មកចែករំលែកជាបទពិសោធន៍ជាមួយក្រសួងសាធារណការ និងដឹកជញ្ជូន និងខាងវិទ្យាស្ថានកូរ៉េ នៅថ្ងៃសិក្ខាសាលា នៅទីស្តីការក្រសួង នាថ្ងៃទី១៩ ធ្នូ ២០២៤ផងដែរ៕