(ព្រះវិហារ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានចោទសួរទៅកាន់ភាគីថៃ ដែលចោទកម្ពុជាថារំលោភពនោះថា ហេតុអ្វីបានជាមិនព្រមប្តឹងទៅតុលាការ? ហើយសម្តេចបានលើកឡើងថា «មានតែអ្នកខ្វះសុច្ចរិតភាពទេ ដែលខ្លាចដំណើរការតាមផ្លូវច្បាប់»។

ការលើកឡើងរបស់សម្តេចតេជោ ហ៊ុន សែន បែបនេះ បានធ្វើឡើងនៅក្នុងពិធីសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ក្នុងខេត្តព្រះវិហារ នៅព្រឹកថ្ងៃទី២៧ ខែមិថុនា ឆ្នាំ២០២៥នេះ។

សម្តេចបានបញ្ជាក់ដូច្នេះថា៖ «ខ្ញុំចេះតែឆ្ងល់ថា ថៃបានចោទកម្ពុជាថារំលោភដីថៃ ហេតុអ្វីក៏ថៃខ្វះសេចក្តីក្លាហានប្តឹងកម្ពុជាទៅតុលាការ ខ្ញុំសូមចោទសួរទៅទីក្រុងបាងកក អ្នកបានចោទកម្ពុជាថារំលោភលើអធិបតេយ្យថៃ ប៉ុន្តែហេតុអ្វីអ្នកមិនប្តឹងកម្ពុជាទៅតុលាការអន្តរជាតិ ហើយហេតុអ្វីបានជាអ្នកមិនព្រមឡើងតុលាការជាមួយកម្ពុជា សូមប្រជាជនថៃ សូមប្រជាជនកម្ពុជា ក៏ដូចជាមិត្តភក្តិអន្តរជាតិ ពិចារណាអំពីបញ្ហានេះ ពិចារណាចំណុចនេះឱ្យបានដិតដល់»។

សម្តេចបានបន្តចោទសួរថា ហេតុអ្វីបានត្រូវខ្លាចតុលាការ? ហើយមកថាកម្ពុជាជាអ្នករំលោភ ហេតុអ្វីមិនប្តឹងទៅតុលាការ? នៅក្នុងប្រទេសមួយ បើភាគីណាមួយមិនសុខចិត្ត គឺត្រូវប្តឹងទៅតុលាការ ហើយនៅលើភពលោកមានតុលាការយុត្តិធម៌អន្តរជាតិដូចគ្នា។

សម្តេចបានថ្លែងថា មេដឹកនាំថៃមិនគួរណាខ្លាចនូវអ្វីដែលជាផ្លូវច្បាប់នោះទេ ហើយបើតុលាការកាត់ក្តី នឹងងាយស្រួលដល់រដ្ឋាភិបាលប្រទេសនីមួយៗ ធ្វើការពន្យល់ប្រជាពលរដ្ឋរបស់ខ្លួន។

សម្តេចបានចោទជាសំណួរថា «តើហេតុអ្វីបានជាថៃទាត់ចោលនូវដំណើរការផ្លូវច្បាប់? បើនិយាយមួយបែបទៅមានតែអ្នកខ្វះសុចរិតភាពទេ ដែលខ្លាចដំណើរការតាមផ្លូវច្បាប់នោះ»៕

(ព្រះវិហារ)៖ ថ្លែងដោយសេចក្តីរីករាយ ចេញពីខេត្តព្រះវិហារ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានបង្ហាញនូវការពេញចិត្ត ចំពោះការដឹកនាំរបស់រាជរដ្ឋាភិបាលបន្តវេន ដែលរយៈពេលជិត២ឆ្នាំនេះ កំពុងបន្តដំណើរយ៉ាងល្អប្រសើរ ដោយជម្នះនូវការលំបាកជាច្រើន។

អ្វីដែលពិសេសទៀតនោះ សម្តេចតេជោ ហ៊ុន សែន បានកោតសរសើរដល់រាជរដ្ឋាភិបាលបន្តវេន ចំពោះការគ្រប់គ្រងចំណូលពន្ធគយ និងពន្ធផ្ទៃក្នុង (ពន្ធដារ) ដែលជាប្រភពចំណូលជាតិដ៏សំខាន់របស់ប្រទេស ធ្វើឱ្យសាច់ប្រាក់ក្នុងរតនាគារជាតិ មានចំនួនច្រើនជាង ពេលសម្តេចចាកចេញពីរាជរដ្ឋាភិបាល។

ការគ្រង់គ្រងចំណូលបានយ៉ាងល្អនេះ សម្តេចសង្កត់ធ្ងន់ថា «រាជរដ្ឋាភិបាលអ្នកបន្តវេន មិនមែនជាអ្នកអត់មាយាទនោះទេ ប៉ុន្តែជាអ្នកមានពូជ»។

ការលើកឡើងរបស់សម្តេចតេជោ ហ៊ុន សែន ធ្វើឡើងក្នុងឱកាសជួបសំណេះសំណាលជាមួយ សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ក្នុងខេត្តព្រះវិហារ។

សម្តេចតេជោ ហ៊ុន សែន បានថ្លែងយ៉ាងដូច្នេះថា «យើងមើលចំណូលពន្ធគយ ចំណូលពន្ធផ្ទៃក្នុង និងសាច់ប្រាក់ក្នុងរតនាគារជាតិ ខ្ញុំអាចនិយាយបានថា សាច់ប្រាក់នៅក្នុងរតនាគារ មានចំនួនច្រើនជាងពេលដែលខ្ញុំចាកចេញ។ អីចឹងបានសេចក្តីថា អ្នកជំនាន់ក្រោយនេះ មិនមែនជាក្មេងអត់មាយាទទេ ប៉ុន្តែគឺជាអ្នកមានពូជ ដែលពួកគេបានខិតខំធ្វើការ បង្កើនបៀវត្សឱ្យមន្ត្រីរាជការ បង្កើនការចំណាយទៅលើការគាំពារសង្គម បង្កើនការចំណាយទៅលើការវិនិយោគលើវិស័យអប់រំ សុខាភិបាល និងវិស័យផ្សេងទៀតក៏មានពិត ក៏ប៉ុន្តែពួកគេចេះសន្សំប្រាក់ ឱ្យប្រាក់ក្នុងរតនាគារមានការកើនឡើង»។

សម្តេចបានរំលឹកអំពីការធ្វើជានាយករដ្ឋមន្ត្រីរយៈពេល ៣៨ឆ្នាំ តាំងពីនាយករដ្ឋមន្ត្រីអស់សាច់ប្រាក់ ដែលពេលខ្លះជំពាក់ប្រាក់ខែមន្ត្រីរាជការ ២ឬ ៣ខែក៏មាន ប៉ុន្តែមកដល់ពេលនេះ មានការដំឡើងប្រាក់បៀវត្សជូនមន្ត្រីរាជការជាប្រចាំផង និងបើប្រាក់បៀវត្សជូនមន្ត្រីរាជការ ២ដងក្នុង ១ខែផងដែរ។

សម្តេចបន្តថា នៅមុនពេលកូវីដ១៩ រាជរដ្ឋាភិបាលបានសន្សំសាច់ប្រាក់បានជាង ៤ពាន់លានដុល្លារ ប៉ុន្តែវិបត្តិកូវីដ១៩ តម្រូវឱ្យរាជរដ្ឋាភិបាលត្រូវចំណាយផ្សេងៗ និងវិនិយោគលើវិស័យហេដ្ឋារចនាសម្ព័ន្ធចាំបាច់នានាអស់មួយចំនួន។ សម្តេចសង្កត់ធ្ងន់ថា បើទោះជាត្រូវចំណាយ ក៏រាជរដ្ឋាភិបាលមិនខ្វះសាច់ប្រាក់នោះដែរ៕

(ភ្នំពេញ)៖ សម្តេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ បានមានប្រសាសន៍ថា កម្ពុជា គ្រាន់តែជាប្រទេសរងគ្រោះ ដោយសារថៃតែប៉ុណ្ណោះ, ព្រោះថៃ ជាប្រទេសមានជើងហោះហើរត្រង់តភ្ជាប់ទៅប្រទេសនានា ហើយនាំជនឆបោកទាំងនោះចូលប្រទេសរបស់ខ្លួន។ អាស្រ័យដូច្នេះ សម្ដេចតេជោ បានអំពាវនាវទៅថៃ វិញថា «សូមឈប់ព្រួសឈាមដាក់គេ លើបញ្ហាឧក្រឹដ្ឋកម្មអនឡាញនេះ ទៅកាន់ប្រទេសជិតខាង ជាពិសេសប្រទេសកម្ពុជានេះតែម្ដង»។

ប្រសាសន៍របស់សម្តេចតេជោ នាយឧត្តមសេនីយ៍ផុតលេខផ្កាយមាស៥ កម្ពុជាបែបនេះ បានធ្វើឡើងនាឱកាសអញ្ជើញជួបសំណេះសំណាលជាមួយ សមាជិកក្រុមប្រឹក្សា ខេត្ត/ក្រុង ស្រុក/ខណ្ឌ ឃុំ/សង្កាត់ ក្នុងខេត្តព្រះវិហារ នាព្រឹកថ្ងៃទី២៧ ខែមិថុនា ឆ្នាំ២០២៥។

សម្ដេចតេជោ ហ៊ុន សែន មានប្រសាសន៍យ៉ាងដូច្នេះថា៖ «កម្ពុជា បានអត់ធ្មត់ដើម្បីពង្រីកកិច្ចសហប្រតិបត្តិការបង្រ្កាបទាំងអស់គ្នា ប៉ុន្តែលោកជំទាវ យករួចខ្លួន ហើយមកដាក់កំហុសឱ្យកម្ពុជា ទទួលយកមិនបានទេលោកជំទាវ, លោកជំទាវធ្វើកំហុសធ្ងន់ធ្ងរណាស់បញ្ហាហ្នឹង។ លោកជំទាវ ស្ដោះ ព្រួសឈាមដាក់គេ ប៉ុន្តែលោកជំទាវ ភ្លេចថា ឈាមនោះ វាចេញពីខ្លួនរបស់លោកជំទាវ»។

សម្ដេចតេជោ បានចោទជាសំណួរថា៖ «អ្នកណាចិញ្ចឹមក្រុមឧក្រឹដ្ឋជននៅតាមព្រំដែន ជាមួយភូមា មីយ៉ាន់ម៉ា? អ្នកណាចិញ្ចឹមឧក្រឹដ្ឋជន នៅតាមព្រំដែនឡាវ? សម្រាប់កម្ពុជា កម្ពុជាចេះធ្វើហើយ! លោកជំទាវថាផ្គត់ផ្គង់អ៊ីនធឺណិត, អ៊ីនធឺណិតកម្ពុជា បានកាត់ផ្ដាច់តាំងពីមុនថ្ងៃទី២៤ លោកជំទាវ! ហើយលោកជំទាវ បានសូមទោសខ្ញុំ! លោកជំទាវថា កម្ពុជា ទទួលបានព័ត៌មានខុស, ប៉ុន្តែនៅពេលមានការពន្យល់លោកជំទាវ បានសូមទោសខ្ញុំមែនទេ? លោកជំទាវ មិនបានដឹងថាក្រសួងការបរទេសលោកជំទាវ បានព្រមានកម្ពុជា ដើម្បីកាត់ភ្លើង កាត់អ៊ីនធឺណិត កម្ពុជា មិនចាំបាច់ឱ្យលោកជំទាវ កាត់ទេ យើងកាត់មុន»។

ទន្ទឹមគ្នានេះ សម្ដេចតេជោ ហ៊ុន សែន ក៏បានផ្ដាំទៅកាន់ប្រជាពលរដ្ឋថៃផងដែរ ឱ្យមើលឱ្យច្បាស់ពីល្បិចរបស់មេដឹកនាំថៃ ថាយ៉ាងមិច? យ៉ាងណាមិញ សម្ដេចបានបញ្ជាក់ថា សម្ដេចមិនបានបន្ទោសបក្សភឿថៃនោះទេ ប៉ុន្តែសម្ដេចបន្ទោទៅលើតួអង្គអ្នកដឹកនាំ ដែលខ្វះការទទួលខុសត្រូវ មិនស្មោះត្រង់ជាមួយប្រជាជនខ្លួនឯង ហើយមិនស្មោះត្រង់ជាមួយដៃគូសន្ទនាទៀត។

សម្ដេចបានដាក់ទម្ងន់ថា៖ «បើពលរដ្ឋខ្លួនឯងមិនស្មោះត្រង់ជាមួយផង តើយើងជឿទុកចិត្តយ៉ាងមិចបាន»?

កម្ពុជា បានត្រៀមខ្លួនរួចរាល់សម្រាប់ធ្វើកិច្ចសហប្រតិបត្តិការ ទៅលើការប្រយុទ្ធប្រឆាំងឧក្រឹដ្ឋកម្មគ្រប់ប្រភេទមិនមែន តែអនឡាញនោះទេ ជួញដូរមនុស្ស លាងលុយកង្វក់ គ្រឿងញៀនជាដើម។ នេះបើតាមការបញ្ជាក់ច្បាស់ៗពីសម្ដេចតេជោ ហ៊ុន សែន នាយឧត្តមសេនីយ៍ផុតលេខផ្កាយមាស៥ នៃប្រទេសកម្ពុជា៕

ដោយៈ គង់ សូរិយា

    ភ្នំពេញៈ គម្រោង “ផ្លូវល្បឿនលឿនភ្នំពេញ-ព្រះសីហនុរបស់កម្ពុជា” ដែលឈ្នះពានរង្វាន់គម្រោងល្អបំផុតរបស់Mino នៅក្នុងប្រភេទ១ (Winning the Mino Best Project Award in Category I) “ផ្លូវដែលមានបរិមាណខ្ពស់” (High Volume Roads)៕

ព័ត៌មានដ៏មានសារៈសំខាន់នេះ ត្រូវបានលើកឡើងក្នុងក្នុងពេល លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន ទទួលជួបពិភាក្សាជាមួយលោកបណ្ឌិត Dennis Ganendra នាយកប្រតិបត្តិក្រុមហ៊ុន Minconsult Sdn Bhd សមាជិកក្រុមប្រឹក្សា និងជាប្រធានគណៈកម្មការអាហារូបករណ៍ សមាគមវិស្វកម្មផ្លូវថ្នល់ប្រចាំអាស៊ី និងអូស្ត្រាលី (REAAA) កាលពីថ្ងៃទី២៦ មិថុនាកន្លងមកនេះ។

ជំនួបនេះធ្វើឡើងដើម្បីអបអរសាទរគម្រោង “ផ្លូវល្បឿនលឿនភ្នំពេញ-ព្រះសីហនុរបស់កម្ពុជា” ដែលឈ្នះពានរង្វាន់គម្រោងល្អបំផុតរបស់Mino នៅក្នុងប្រភេទ១ (Winning the Mino Best Project Award in Category I) “ផ្លូវដែលមានបរិមាណខ្ពស់” (High Volume Roads) និងការអញ្ជើញលោករដ្ឋមន្ត្រី ដើម្បីចូលរួមពិធីសន្និបាតមីណូលើកទី៣ ពានរង្វាន់គម្រោងល្អបំផុត ដែលនឹងត្រូវប្រារព្ធឡើងរួមជាមួយនឹងពិធីបិទកម្មវិធីសន្និសីទ (REAAA) លើកទី១៧ នៅថ្ងៃទី៣១ ខែតុលា ឆ្នាំ២០២៥ នៅទីក្រុងហ៊្គូយ៉ាង ប្រទេសកូរ៉េខាងត្បូង ពីសមាគមវិស្វកម្មផ្លូវថ្នល់នៃអាស៊ី និងអូស្ត្រាលី៕