ដោយ: សហសេវិក
អន្តរជាតិ: ការផ្គត់ផ្គង់ការិយាល័យនៅតំបន់ Klang Valley ក្នុងប្រទេសម៉ាឡេសុីនៅតែមានស្ថិរភាពប្រហែល១២០,៦លានហ្វីតការ៉េ ដោយពុំមានអគារការិយាល័យថ្មីណាមួយត្រូវបានបញ្ចប់ការសាងសង់នៅក្នុងឆមាសទីមួយនៃឆ្នាំ២០២៦ នោះទេ។

ស្ថិរភាពកើតឡើង ​បន្ទាប់ពី​ការផ្គត់ផ្គង់​ថ្មី​បានកើនឡើងយ៉ាងខ្លាំងអស់ជាច្រើន​ឆ្នាំ ខណៈ​ទំហំ​ការិយាល័យ​ថ្មី​ប្រហែល២,៧លាន​ហ្វីតការ៉េ​ត្រូវបានគេរំពឹងថានឹងបញ្ចប់ការសាងសង់នៅ​ក្នុងឆមាសទីពីរ​នៃឆ្នាំនេះ។

ទីផ្សារការិយាល័យមានភាពប្រសើរឡើងបន្តិចម្តងៗ ដោយអត្រាគ្របដណ្តប់ការជួលការិយាល័យបានកើនឡើងដល់៧៧ភាគរយ និងមានតម្លៃជួលជាមធ្យមចំនួន៥,៩៤រីងហ្គីតក្នុងមួយហ្វីតការ៉េ (ប្រមាណ១៥,៦ដុល្លារអាមេរិកក្នុងមួយម៉ែត្រការ៉េ។

តម្រូវការជួលការិយាល័យនៅតំបន់Klang Valley ត្រូវបានជំរុញដោយក្រុមហ៊ុនបច្ចេកវិទ្យា សេវាកម្មអាជីវកម្ម ស្ថាប័នហិរញ្ញវត្ថុ និងក្រុមហ៊ុនសេវាកម្មអាជីវកម្មសកល (GBS)។

អ្នកជួលមានការពេញចិត្តចំពោះអគារការិយាល័យដែលមានគុណភាពខ្ពស់ និងមានការតភ្ជាប់ប្រព័ន្ធដឹកជញ្ជូនសាធារណៈល្អ។ ការណ៍នេះបង្កើនគម្លាតរវាងតម្រូវការការិយាល័យលំដាប់ខ្ពស់ និងការិយាល័យចាស់ៗ។

ក្រុមហ៊ុននានាក៏ចំណាយពេលយូរជាងមុនដើម្បីសម្រេចចិត្តលើការជួលការិយាល័យ ដោយផ្តោតការយកចិត្តទុកដាក់កាន់តែខ្លាំងលើទីតាំង គុណភាពអគារ និងតម្រូវការអាជីវកម្មរយៈពេលវែង៕

ដោយៈ ម៉ាណា

    កូរ៉េខាងត្បូងៈ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈជាមួយលោក Nayef Al-Fayez អគ្គនាយករង អង្គការយូណេស្កូ ដោយបង្ហាញពីបំណងសំខាន់មួយ។

លោកជំទាវបណ្ឌិតសភាចារ្យ រដ្ឋមន្រ្តីក្រសួងវប្បធម៌ និងវិចិត្រសិល្បៈ បានដឹកនាំប្រតិភូកម្ពុជា ជួបពិភាក្សាការងារជាមួយលោក Nayef Al-Fayez អគ្គនាយករង ទទួលបន្ទុកវប្បធម៌នៃអង្គការយូណេស្កូ នៅក្នុងអំឡុងសម័យប្រជុំគណៈកម្មការ បេតិកភណ្ឌពិភពលោកលើកទី៤៨ នៅទីក្រុងប៊ូសាន សាធារណរដ្ឋកូរ៉េ។

ក្នុងឱកាសនោះ លោកជំទាវបណ្ឌិតសភាចារ្យរដ្ឋមន្រ្តី បានសម្តែងនូវការអបអរសាទរចំពោះ លោកដែលត្រូវបានជ្រើសរើស និងផ្តល់សេចក្តីទុកចិត្ត ឱ្យបំពេញការងារយ៉ាងសំខាន់ជា អគ្គនាយករង ទទួលបន្ទុកវប្បធម៌នៃអង្គការយូណេស្កូ និងថ្លែងអំណរគុណដល់លោក ដែលបានបញ្ជូនរបាយការណ៍ នៃបេសកកម្មរបស់អ្នកជំនាញគណៈកម្មការបេតិកភណ្ឌពិភពលោក និងអ្នកជំនាញការ ICOMOS ដែលបានបំពេញបេសកកម្មការងារ នៅប្រាសាទព្រះវិហារកាលពីថ្ងៃទី១-៦ ខែមីនា ឆ្នាំ២០២៦កន្លងទៅ តបតាមការអញ្ជើញរបស់កម្ពុជា។

លោកជំទាវ រដ្ឋមន្រ្តីបានសម្តែងនូវការកោតសរសើរ ចំពោះគុណភាពរបស់របាយការណ៍ ដែលមានលក្ខណៈបច្ចេកទេស គ្រប់ជ្រុងជ្រោយ សុក្រឹត្យ និងឆ្លុះបញ្ចាំងអំពីស្ថានភាពជាក់ស្តែង ដែលបាននិងកំពុងកើតឡើងនៅប្រាសាទព្រះវិហារ។

លោកជំទាវរដ្ឋមន្រ្តី ក៏បានជម្រាបជូនអគ្គនាយករង អំពីបំណងរបស់កម្ពុជា ក្នុងការធ្វើជាម្ចាស់ផ្ទះរៀបចំ កិច្ចប្រជុំគណៈកម្មាធិការអន្តររដ្ឋាភិបាលបេតិកភណ្ឌអរូបី នៅឆ្នាំណាមួយក្នុងអំឡុងពេលដែលកម្ពុជា ជាសមាជិកគណៈកម្មាធិការ ចាប់ពីឆ្នាំ២០២៦ រហូតដល់២០៣០ ខាងមុខនេះ។

លោក Nayef Al-Fayez  បានសន្យានឹងគាំទ្រសំណើធ្វើជាម្ចាស់ផ្ទះរៀបចំកិច្ចប្រជុំនេះ ហើយក៏បានបញ្ជាក់អំពីកិច្ចគាំទ្ររបស់យូណេស្កូ និងក្នុងនាមរបស់លោកផ្ទាល់ ក្នុងការតាមដានយកចិត្តទុកដាក់ចំពោះករណីប្រាសាទព្រះវិហារ ដោយនឹងចូលរួមចំណែកយ៉ាងសកម្មក្នុងការសម្របសម្រួល ដើម្បីបន្ធូរបន្ថយភាពតានតឹង រវាងប្រទេសទាំងពីរតាមរយៈវប្បធម៌៕

ដោយ: សហសេវិក
អន្តរជាតិ: យោងតាមការសិក្សាថ្មីមួយរបស់ធនាគារ Deutsche បានបង្ហាញថា ទីក្រុងហុងកុងនៅតែបន្តជាប់ចំណាត់ថ្នាក់ជាទីផ្សារលំនៅឋានថ្លៃបំផុតរបស់ពិភពលោក ខណៈប្រទេសសិង្ហបុរីបានធ្លាក់ចុះពីចំណាត់ថ្នាក់ទីបីមកចំណាត់ថ្នាក់ទីបួន។

តម្លៃអាផាតមុិនជាមធ្យមនៅកណ្តាលទីក្រុងហុងកុងមានទំហំទឹកប្រាក់ចំនួន ២៧.៧៥៣ ដុល្លារអាមេរិកក្នុងមួយម៉ែត្រការ៉េនៅឆ្នាំ ២០២៦ កើនឡើងពី ២៦.៧៤៩ ដុល្លារកាលពីមួយឆ្នាំមុន។

ប៉ុន្តែរបាយការណ៍ប្រចាំឆ្នាំ ដែលបានវាយតម្លៃតម្លៃ និងសូចនាករជាច្រើនទៀតនៅទូទាំងទីក្រុងចំនួន៦៩ ទូទាំងពិភពលោក បានបន្ទាបចំណាត់ថ្នាក់គុណភាពជីវិតរបស់ទីក្រុងហុងកុងមកត្រឹមចំណាត់ថ្នាក់លេខ៥៥ នៅឆ្នាំ២០២៦នេះ ពីចំណាត់ថ្នាក់លេខ៤៨កាលពីឆ្នាំមុន។

ដូច​ទីក្រុង​ញូវយ៉ក ទីក្រុង​ឡុងដ៍ និង​ទីក្រុង​ប៉ារីស​ដែរ ទីក្រុង​ហុងកុង​នៅ​តែ​ជា​គោលដៅ​ទាក់ទាញ​សម្រាប់បណ្តា​វិនិយោគិន​អន្តរជាតិ និង​ក្រុមអ្នកជំនាញ​វិជ្ជាជីវៈដែល​មាន​ប្រាក់​ចំណូល​ខ្ពស់។

ទន្ទឹមនឹងនេះ តម្លៃអាផាតមិនជាមធ្យមនៅកណ្តាលទីក្រុងរបស់ប្រទេសសិង្ហបុរីមានតម្លៃ ២២,៩៣៣ ដុល្លារក្នុងមួយម៉ែត្រការ៉េ ធ្លាក់ចុះពី ២៣,៥៩៥ ដុល្លារក្នុងឆ្នាំ ២០២៥។

ទីក្រុងសេអ៊ូលបានឡើងមួយចំណាត់ថ្នាក់ដល់លេខបី ដោយវ៉ាដាច់ប្រទេសសិង្ហបុរី ដោយមានតម្លៃជាមធ្យម ២៣,៥៤៥ ដុល្លារក្នុងមួយម៉ែត្រការ៉េ។ ទីក្រុង Zurich របស់ប្រទេសស្វីស ឈរនៅលេខរៀងទី២ និងទីក្រុងហ្សឺណែវ ឈរនៅលេខ ៥៕

ដោយៈ ម៉ាណា

    ភ្នំពេញៈ ដំណើរទស្សនកិច្ចរបស់គណៈប្រតិភូ ក្រុមប្រឹក្សាភិបាលកំពង់ផែស្វយ័តក្រុងព្រះសីហនុ ទៅកាន់កំពង់ផែឡុងបិច សហរដ្ឋអាមេរិក។

ដំណើរទស្សនកិច្ច និងចុះកិច្ចព្រមព្រៀងសហប្រតិបត្តិការនេះដឹកនាំដោយលោកលូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក កំពង់ផែស្វយ័តក្រុងព្រះសីហនុ និងថ្នាក់ដឹកនាំ កសស បានចូលជួបពិភាក្សាការងារ និងចុះហត្ថលេខាលើ “លិខិតថ្លៃងពីគោលបំណង ដើម្បីបង្កើតនូវទំនាក់ទំនងកំពង់ផែជាដៃគូរ រវាងកំពង់ផែឡុងបិច និងកំពង់ផែស្វយ័តក្រុងព្រះសីហនុ” ជាមួយ បណ្ឌិត Noel Hacegaba នាយកប្រតិបត្តិកំពង់ផែឡុងបិច។

នេះជាជំហានថ្មីមួយទៀតរបស់កម្ពុជា ក្នុងការពង្រីកវិស័យពាណិ​ជ្ជកម្ម និងលការដឹកជញ្ជូនកាន់តែទូលំទូលាយទៅកាន់ពិភពលោក៕

ដោយ: សហសេវិក
អន្តរជាតិ: យោងតាមភ្នាក់ងារអចលនទ្រព្យ បានឱ្យដឹងថា ភាពទាក់ទាញខាងទេសចរណ៍របស់ប្រទេសអូស្ត្រាលី និងការថយចុះនៃតម្លៃអចលនទ្រព្យកំពុងទាក់ទាញអ្នកទិញផ្ទះកាន់តែច្រើនមកពីចិនដីគោក និងកោះហុងកុង។

ខណៈការអប់រំគឺជាហេតុផលចម្បងសម្រាប់ការទិញផ្ទះនៅក្នុងប្រទេសអូស្ត្រាលី គោលដៅទាក់ទាញភ្ញៀវទេសចរ របៀបរស់នៅបែបសម្រាកលំហែ នៅក្នុងទីក្រុងនានាដូចជាទីក្រុងស៊ីដនី និងទីក្រុងមែលប៊ន កំពុងធ្វើឱ្យអូស្ត្រាលីក្លាយជាគោលដៅវិនិយោគដ៏ទាក់ទាញជាងមុន។

លោក Kashif Ansari សហស្ថាបនិក និងជានាយកប្រតិបត្តិក្រុមហ៊ុន Juwai IQI បានអះអាងថា ប្រទេសអូស្ត្រាលីផ្តល់ជូននូវគុណភាពជីវិតខ្ពស់ និងងាយស្រួលសម្រាប់ជនជាតិអាស៊ី។

លោកបានបន្តថា ការធ្វើដំណើររវាងប្រទេសអូស្ត្រាលី និងប្រទេសចិនចំណាយពេលត្រឹមតែពីរទៅបីម៉ោងប៉ុណ្ណោះ មិនដូចតំបន៊អាមេរិកខាងជើង ឬតំបន់អឺរ៉ុបទេ។

នៅឆ្នាំ២០២៥ ភ្ញៀវទេសចរចិនដីគោកចំនួនជាង ១ លាននាក់បានទៅទស្សនាប្រទេសអូស្ត្រាលី ដែលជាការកើនឡើង ១៧ភាគរយបើធៀបនឹងឆ្នាំ ២០២៤។

ចាប់ពីខែកក្កដា ឆ្នាំ២០២៥ ដល់ខែមីនា ឆ្នាំ២០២៦ អ្នកទិញជនជាតិចិនដីគោក គឺជាក្រុមវិនិយោគិនបរទេសធំជាងគេនៅក្នុងទីផ្សារលំនៅឋានរបស់ប្រទេសអូស្ត្រាលី ដោយបានទិញផ្ទះចំនួន ៦៣៨ ខ្នង ដែលមានតម្លៃសរុប ៨០០ លានដុល្លារអូស្ត្រាលី (៥៥៩ លានដុល្លារអាមេរិក)៕