ដោយៈ ម៉ាលីនណា

    ភ្នំពេញៈ ក្រុមមន្រ្តីជាន់ខ្ពស់រដ្ឋាភិបាល បានជួបគ្នាទទួលទានអាហារពេលព្រឹកធុរកិច្ចលើកទី២ រវាងស្ថាប័នរដ្ឋនិងវិស័យឯកជន រៀ​ប​ចំដោយសភាពាណិជ្ជកម្មអាម៉េរិក ប្រចាំនៅកម្ពុជា(AmCham​)។

លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអញ្ជើញជាអធិបតី និងផ្តល់មតិបូកសរុបកម្មវិធី ក្នុងពិធីទទួលទានអាហារពេលព្រឹកធុរកិច្ច លើកទី២ រវាងស្ថាប័នរដ្ឋនិងវិស័យឯកជន ដែលបានរៀបចំទទួលស្វាគមន៍ដោយសភាពាណិជ្ជកម្មអាម៉េរិក ប្រចាំនៅកម្ពុជា (AmCham) ក្រោមការដឹកនាំរបស់ក.អ.ក.។

កម្មវិធីជំនួបអាហារពេលព្រឹកធុរកិច្ច លើកទី២នេះ មានការអញ្ជើញចូលរួមពី ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ រដ្ឋមន្ត្រីក្រសួងរ៉ែ និងថាមពល អនុប្រធានទី៣ ក.អ.ក. រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ រួមជាមួយវត្តមានអង្គទូតនានា ប្រចាំព្រះរាជាណាចក្រកម្ពុជា។

កម្មវិធីនេះក៏មានការចូលរួមពី ថ្នាក់ដឹកនាំសភាពាណិជ្ជកម្ម និងសមាគមធុរកិច្ចអន្តរជាតិឈានមុខ ដែលជាតួអង្គសេដ្ឋកិច្ចដ៏សំខាន់ រួមមាន៖ សភាពាណិជ្ជកម្មអាម៉េរិក (AmCham) អឺរ៉ុប (EuroCham) ចិន (CCCC) កូរ៉េ (KOCHAM) និងសមាគមធុរកិច្ចជប៉ុន (JBAC) ព្រមទាំងសមាជិក សមាជិកា នៃស្ថាប័នពាក់ព័ន្ធជាច្រើនរូបទៀត។

កម្មវីធីបានប្រព្រឹត្តទៅដោយរលូន តាមរបៀបវារៈដែលបានគ្រោងទុក ដោយមានការធ្វើបទបង្ហាញ អំពីប្រធានបទពាក់ព័ន្ធមួយចំនួន និងបានបើកទូលាយសម្រាប់ការពិភាក្សា ដែលជាឱកាសដ៏មានតម្លៃសម្រាប់ការផ្លាស់ប្តូរមតិយោបល់ ដោយអនុញ្ញាតឱ្យតំណាងសមាគមធុរកិច្ច វិនិយោគិនអន្តរជាតិ និងដៃគូអភិវឌ្ឍន៍ទាំងអស់ បានលើកឡើងនូវសំណូមពរ ធាតុចូលនានាដោយផ្ទាល់ និងប្រកបដោយភាពស្និទ្ធស្នាលបំផុត។ បន្ទាប់ពីការពិភាក្សាយ៉ាងផុសផុល កម្មវិធីបានបន្តដល់របៀបវារៈស្តីពី កាកំណត់ទិសដៅជំហានបន្ទាប់ និងការតាមដានប្រតិបត្តិការការងារ ដើម្បីធានាថារាល់ធាតុចូល និងលទ្ធផលនៃការពិភាក្សាទាំងអស់ នឹងត្រូវយកទៅអនុវត្ត និងតាមដានយ៉ាងមានប្រសិទ្ធភាព។

លោកឧបនាយករដ្ឋមន្ត្រី បានអញ្ជើញឡើងផ្តល់នូវមតិបូកសរុបយ៉ាងស៊ីជម្រៅ ដោយបានគូសបញ្ជាក់ជាថ្មី នូវការប្តេជ្ញាចិត្តយ៉ាងមុតមាំរបស់រាជរដ្ឋាភិបាល និង ក.អ.ក. ក្នុងការបន្តកែទម្រង់បរិយាកាសធុរកិច្ច សម្របសម្រួលកិច្ចគាំពារវិនិយោគ និងការដោះស្រាយរាល់បញ្ហាប្រឈមនានារបស់វិស័យឯកជន ឱ្យបានទាន់ពេលវេលា និងប្រកប​ដោយតម្លាភាពខ្ពស់ ជាពិសេស ឯកឧត្តមបានរំលេចយ៉ាងច្បាស់អំពីផែនការកំណែទម្រង់ផ្ទៃក្នុង ដ៏មុតស្រួចរបស់ ក.អ.ក. ដែលសំដៅលើកកម្ពស់គុណភាព ប្រសិទ្ធភាព និងស័ក្តិសិទ្ធភាពការអនុវត្តការងារស្នូលរបស់ស្ថាប័ន។

ឧបនាយករដ្ឋមន្ត្រី បានបង្ហាញពីការប្តេជ្ញាចិត្តខ្ពស់ ក្នុងការនាំយកនូវរាល់មតិយោបល់ និងធាតុចូលសំខាន់ៗ ដែលបានលើកឡើងនៅក្នុងអង្គពិធីនាព្រឹកនេះ ទៅពិភាក្សាពិគ្រោះយោបល់ជាមួយភាគីពាក់ព័ន្ធទាំងអស់ សំដៅស្វែងរកដំណោះស្រាយសមស្រប និងឈ្នះ-ឈ្នះ សម្រាប់គ្រប់ភាគី។

លោកឧបនាយករដ្ឋមន្ត្រី ក៏បានសម្ដែងនូវសេចក្តីសោមនស្សរីករាយ ប្រកបដោយសុទិដ្ឋិនិយម និងការរំពឹងទុកខ្ពស់ចំពោះសមិទ្ធផលផ្លែផ្កាថ្មីៗបន្ថែមទៀត ដែលនឹងត្រូវលើកយកមកជជែកដេញដោល នៅក្នុងជំនួបទទួលទាន អាហារពេលព្រឹកធុរកិច្ច លើកទី៣ នាពេលខាងមុខនេះផងដែរ។

បរិយាកាសនៃពិធីទទួលទានអាហារ ពេលព្រឹកធុរកិច្ចលើកទី២ រវាងស្ថាប័នរដ្ឋនិងវិស័យឯកជន បានប្រព្រឹត្តទៅក្នុងស្មារតីស្និទ្ធស្នាល យោគយល់ បើកចំហ និងប្រកបដោយផ្លែផ្កា ដែលជាគ្រឹះយ៉ាងសំខាន់ក្នុងការទទួលបានសូចនាករពិតប្រាកដ ជាមូលដ្ឋានសម្រាប់ការរៀបចំគោលនយោបាយ និងការអភិវឌ្ឍបរិយាកាសវិនិយោគជាតិ ឱ្យកាន់តែមានភាពរីកចម្រើនរុងរឿង និងមានភាពប្រកួតប្រជែងខ្ពស់នៅក្នុងតំបន់៕

ដោយៈ ចំណាន

    ភ្នំពេញៈ ក្រុមមន្រ្តីបានបើកកិច្ចប្រជុំអន្តរក្រសួងចង្អៀត ដើម្បីពិនិត្យ និងពិភាក្សាលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់។

កិច្ចប្រជុំនេះដឹកនាំដោយលោកប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារ បានដឹកនាំគណៈប្រតិភូ និងមន្ត្រីជំនាញនៃក្រសួងសាធារណការ និងដឹកជញ្ជូន ក្រោមអធិបតីភាពសហប្រធាន លោកអ៊ឹង សេរីវិសុទ្ធ អនុប្រធាន និងជាប្រធានក្រុមការងារទី១ នៃក្រុមប្រឹក្សាអ្នកច្បាប់និងមន្រ្តីពាក់ព័ន្ធ។

កិច្ចប្រជុំរៀបចំឡើងក្នុងគោលបំណង ដើម្បីបន្តពិនិត្យ ពិភាក្សា និងកែសម្រួល លើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវ នៅតាមបណ្ដាញផ្លូវថ្នល់ សំដៅធ្វើឱ្យសេចក្តីព្រាងអនុក្រឹត្យនេះមានខ្លឹមសារគ្រប់ជ្រុងជ្រោយ និងមានសង្គតិភាពទៅនឹងច្បាប់ និងលិខិតបទដ្ឋានគតិយុត្តពាក់ព័ន្ធ ដើម្បីកំណត់យន្តការ និងវិធានការលើការប្រើប្រាស់ដីចំណីផ្លូវ និងរក្សាបាននូវសុវត្ថិភាពចរា​ចរណ៍ សណ្តាប់ធ្នាប់សាធារណៈ ព្រមទាំងកាត់បន្ថយឧបសគ្គដែលរាំងស្ទះដល់ការអភិវឌ្ឍ និងការថែទាំងផ្លូវ។

អង្គប្រជុំបានសម្រេចលទ្ធផលរួមមាន៖ (១). ឯកភាពកែសម្រួលលើទម្រង់ ខ្លឹមសារ ពាក្យពេចន៍ និងអក្ខរាវិរុទ្ធមួយចំនួននៃសេចក្តីព្រាងអនុក្រឹត្យ និង (២). ឯកភាពបន្តកិច្ចប្រជុំអន្តរក្រសួងចង្អៀតនាពេលក្រោយ តាមការជូនដំណឹងរបស់ទីស្តីគណៈរដ្ឋមន្ត្រី៕

ដោយៈ ម៉ាលីន

ភ្នំពេញៈ លោកបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និង ហិរញ្ញវត្ថុ និង ជាប្រធានក្រុមការងារអភិវឌ្ឍវិស័យឯកជន បានដឹកនាំកិច្ចប្រជុំពិភាក្សា លើវិធានការគាំទ្រឧស្សាហកម្មផលិតស៊ីម៉ងត៍ក្នុងស្រុក។

កិច្ចប្រជុំនេះ មានការអញ្ជើញចូលរួមពីតំណាង ក្រសួងបរិស្ថាន ក្រសួងរ៉ែ និង ថាមពល, ព្រមទាំងតំណាង អគ្គនាយកដ្ឋានពន្ធដារ, អគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានគោលនយោ​បាយ និងអគ្គនាយកដ្ឋានទ្រព្យសម្បត្តិរដ្ឋ និង ចំណូលមិនមែនសារពើរពន្ធ នៃក្រសួងសេដ្ឋកិច្ច និង ហិរញ្ញវត្ថុ ។

អង្គប្រជុំ បានពិនិត្យលើសាវតារ នៃការដាក់ឱ្យអនុវត្តវិធានការរបស់រាជរដ្ឋាភិបាល ស្ថានភាពឧស្សាហកម្មផលិតស៊ីម៉ងត៍ ក្នុងស្រុក និង ការវិវត្តថ្មីៗនៃស្ថានភាពសេដ្ឋកិច្ចសកល ព្រមទាំងលក្ខខណ្ឌតម្រូវនានា របស់រាជរដ្ឋាភិបាល ទៅលើក្រុមហ៊ុនផលិតស៊ីម៉ងត៍ ដូចជា ការបង់មូលនិធិបរិស្ថាន ការបង់សួយសាររ៉ែ ការផ្ទេរជំនាញ និងការបណ្តុះបណ្តាលនិយោជិត និងការប្រើប្រាស់ធាតុផ្សំក្នុងស្រុកជាដើម។

ជាមួយនេះ អង្គប្រជុំបានផ្តល់ធាតុចូលសំខាន់ៗ សម្រាប់ការពិចារណា និង វាយតម្លៃលើការអនុវត្តវិធានការ និង លទ្ធភាពនៃការដាក់ចេញវិធានការ និង/ឬលក្ខខណ្ឌនានា ទៅលើក្រុមហ៊ុនស៊ីម៉ងត៍ក្នុងស្រុក ។

លោកបណ្ឌិតសភាចារ្យ បានផ្តល់អនុសាសន៍ណែនាំឱ្យលេខាធិ​ការដ្ឋានក្រុមការងារ ធ្វើការសម្របសម្រួល និងសហការជាមួយក្រសួ​ង-ស្ថាប័នពាក់ព័ន្ធ ដើម្បីសិក្សាស៊ីជម្រៅ ប្រមូលធាតុចូល និង រៀបចំជារបាយការណ៍ជូនរាជរដ្ឋាភិបាល ឱ្យបានច្បាស់លាស់ និង គ្រប់ជ្រុងជ្រោយ៕