ដោយ៖ សហការី

ភ្នំពេញ៖ ទីស្តីការក្រុមប្រឹក្សាអភិវឌ្ឍន៍កម្ពុជា៖ កាលពីព្រឹកថ្ងៃពុធ ១១រោច ខែបុស្ស ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៤ ខែមករា ឆ្នាំ២០២៦ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៩គម្រោង ក្រោមអធិបតីភាព លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលរាជធានី ខេត្តពាក់ព័ន្ធ។

គម្រោងវិនិយោគទាំងនេះ មានទុនវិនិយោគសរុបប្រមាណ ៦៧លានដុល្លារអាម៉េរិក ដែលអាចបង្កើតការងារបានប្រមាណ ៣ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មទាំង៩គម្រោង (ខារអំបោះនិងជ្រលក់ពណ៌, ផលិតម្សៅកាល់ស្យូមធុនធ្ងន់ ម្សៅកាល់ស្យូមអ៊ីដ្រុកស៊ីតនិងម្សៅបៀកជញ្ជាំង, ផលិតត្រីខកំប៉ុងនិងទឹកត្រី, ផលិតវ៉ែនតានិងសម្ភារៈបន្ទាប់បន្សំវ៉ែនតាគ្រប់ប្រភេទ, ផលិតគ្រឿងតុបតែងសក់, ផលិតអំពូលភ្លើង បរិក្ខារអគ្គិសនី និងម៉ាស៊ីនបូមធូលី, ផលិតសំបកកំប៉ុង និងគម្របកំប៉ុង, ផលិតដើមណូអែល គ្រឿងលម្អដើមណូអែល និងគ្រឿងបន្លាស់ដើមណូអែល, ផលិតអំពូលភ្លើង អំពូលភ្លើងលម្អគ្រប់ប្រភេទនិងសម្ភារៈបន្ទាប់បន្សំអំពូលភ្លើង)។

គម្រោងវិនិយោគទាំង៩ដូចបានរៀបរាប់ខាងលើនេះ បានបោះទីតាំងនៅរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង កែប និងបាត់ដំបង។

ដោយៈ ម៉ាលីនណា

    ភ្នំពេញៈ លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានផ្តល់កិច្ចសម្ភាសន៍ពិសេសមួយជូនភ្នាក់ងារសារព័ត៌មានNikkei Asia ដែលជាស្ថាប័នព័ត៌មានសេដ្ឋកិច្ច និងនយោបាយឈានមុខគេមួយនៅអាស៊ី និងជាសំឡេងដ៏មានឥទ្ធិពលក្នុងចំណោមវិនិយោគិន និងអ្នកកំណត់គោលនយោបាយជុំវិញពិភពលោក។

ការជ្រើសរើសផ្តល់កិច្ចសម្ភាសន៍ជូន Nikkei Asia ដែលជាស្ថាប័នល្បីល្បាញខាងការវិភាគ ស៊ីជម្រៅលើចង្វាក់ផ្គត់ផ្គង់សកល និងភូមិសាស្ត្រនយោបាយ គឺជាយុទ្ធសាស្ត្រដ៏សំខាន់ ក្នុងការបញ្ជូនសារស្តីពី ការបង្កើនភាពជឿជាក់ កាលានុវត្តភាព និងឧត្តមភាពរបស់កម្ពុជាទៅកាន់មជ្ឈដ្ឋានធុរកិច្ចអន្តរជាតិ។

ក្នុងជំនួបសម្ភាសន៍នេះ ឯកឧត្តមឧបនាយករដ្ឋមន្ត្រី បានលើកឡើងនូវចំណុចគន្លឹះមួយចំនួន រួមមានដូចជា ទី១ បច្ចុប្បន្នភាពនៃបរិ​យាកាសវិនិយោគ៖ ការបង្ហាញពីភាពរឹងមាំនៃស្ថិរភាពនយោបាយ និងច្បាប់វិនិយោគដែលមានភាពបត់បែន និងផ្តល់នូវកញ្ចប់លើកទឹកចិត្តប្រកបដោយភាពទាក់ទាញបំផុត សម្រាប់ការវិនិយោគដោយផ្ទាល់ពីបរទេស។

ទី២ ការធ្វើពិពិធកម្មរចនាសម្ព័ន្ធឧស្សាហកម្ម៖ របត់នៃការវិនិយោគដែលកំពុងផ្លាស់ប្តូរពីឧស្សាហកម្មកាត់ដេរ ឆ្ពោះទៅកាន់ឧស្សាហកម្មដែលមានតម្លៃបន្ថែមខ្ពស់ ជាអាទិ៍ ឧស្សហកម្មបង្គុំគ្រឿងអេឡិកត្រូនិចឧស្សាហកម្មកែច្នៃចំណីអាហារ និងឧស្សាហកម្មយានយន្ត ជាដើម។

ទី៣ ភាពធន់ក្នុងបរិការណ៍ប្រែប្រួលនៃពិភពលោក៖ ការត្រៀមលក្ខណៈរបស់កម្ពុជា តាមរយៈការកសាងហេដ្ឋារចនាសម្ព័ន្ធនានា ការបណ្តុះបណ្តាលកម្លាំងពលកម្មជំនាញ និងការបង្កើនការចាប់យកឌីជីថលូបនីយកម្មលើកំណែទម្រង់សេវាសាធារណៈ ដើម្បីឆ្លើយតបនឹងការប្រែប្រួលឥតឈប់ឈរនៃសេដ្ឋកិច្ចសកល។

ទី៤ យុទ្ធសាស្ត្រព្រំដែន និងស្ថិរភាពតំបន់៖ ការបញ្ជាក់ពីជំហរការទូត និងយុទ្ធសាស្ត្រឆ្លើយតបនឹងបញ្ហាព្រំដែនកម្ពុជា-ថៃ ដោយផ្តោតលើការកសាងតំបន់ព្រំដែនសន្តិភាព និងកិច្ចសហប្រតិបត្តិការសេដ្ឋកិច្ចដែលផ្តល់ផលប្រយោជន៍ឱ្យគ្នាទៅវិញទៅមក។

កិច្ចសម្ភាសន៍នេះ គឺជាសក្ខីភាពនៃការបើកចំហ និងការត្រៀមខ្លួនជាស្រេចរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យមុតស្រួចរបស់ សម្តេចធិបតីនាយករដ្ឋមន្ត្រី ក្នុងការធ្វើការងារយ៉ាងជិតស្និទ្ធជាមួយដៃគូអន្តរជាតិ ជាពិសេសតាមរយៈបណ្តាញព័ត៌មានដែលមានវិជ្ជាជីវៈខ្ពស់ ដូចជាNikkei Asia ដើម្បីបង្កើនទំនុកចិត្ត សំដៅទាក់ទាញទុនវិនិយោគប្រកបដោយគុណភាព សម្រាប់ជំរុញកំណើនសេដ្ឋកិច្ចជាតិ ប្រកបដោយចីរភាព និងសម្រេចឱ្យបាននូវ ចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់៕

ដោយៈ ម៉ាណា

    ភ្នំពេញៈ ក្រុមហ៊ុនជប៉ុនធំៗចំនួន១៦បានមកសិក្សាស្វែងយល់ពីឱកាសវិនិយោគ លើវិស័យហេដ្ឋារចនាសម្ព័ន្ធ ពិសេសបញ្ហាទឹកកខ្វក់នៅកម្ពុជា។

ព័ត៌មាននេះ ត្រូវបានលើកឡើងនៅពេលលោកជំទាវកុយ សុដានី បានជួបពិភាក្សាការងារជាមួយគណៈប្រតិភូនៃទីក្រុង Kitakyushu ប្រទេសជប៉ុន។

លោកជំទាវ កុយ សុដានី រដ្ឋលេខាធិការប្រចាំការ អញ្ជើញដឹកនាំគណៈប្រតិភូក្រសួង ទទួលជួបសម្តែងការគួរសម និងពិភាក្សាការងារ ជាមួយគណៈប្រតិភូទីក្រុងKitakyushu ដែលដឹកនាំដោយលោកEGUCHI TETSURO អភិបាលរងក្រុង Kitakyushu ប្រទេសជប៉ុន ដោយមានការអញ្ជើញចូលរួមពីមន្រ្តីពាក់ព័ន្ធ។

ជំនួបនេះ មានគោលបំណងសម្តែងការគួរសម និងណែនាំក្រុមហ៊ុនជប៉ុនចំនួន១៦ក្រុមហ៊ុន ដែលមានបំណងស្វែងរកឱកាសវិនិយោគក្នុងវិស័យសាធារណការ និងដឹកជញ្ជូន ជាពិសេសវិស័យទឹកកខ្វក់នៅកម្ពុជា៕

ដោយៈ ម៉ាណា

    ភ្នំពេញៈ គម្រោងអភិវឌ្ឍន៍ប្រព័ន្ធចម្រោះទឹកកខ្វក់ នៅក្នុងក្រុងតាខ្មៅ កំពុ​ងដំណើរការទៅមុខយ៉ាងរលូន ជាមួយនឹងការពេញចិត្តរបស់បងប្អូនប្រជាពលរដ្ឋនៅមូលដ្ឋាន។

ការងារនេះបាននិងកំពុងគ្រប់គ្រង ដោយក្រុមការងារការដ្ឋាន និងអាជ្ញាធរខេត្តកណ្តាលបានរួមគ្នា ឱ្យលេចចេញលទ្ធផលដោយអន្លើរៗ និងសម្រេចវឌ្ឍនភាព ជារួមប្រមាណ១៥,៥០%ហើយ គិតត្រឹមដំណា​ច់ខែធ្នូ ឆ្នាំ២០២៥។

គម្រោងអភិវឌ្ឍន៍ប្រព័ន្ធចម្រោះទឹកកខ្វក់ នៅក្នុងក្រុងតាខ្មៅ រួមមាន៖ បណ្តាញលូទឹកកខ្វក់ប្រវែងសរុប ១២៥ គ.ម បណ្តាញលូទឹកភ្លៀងប្រវែងសរុប៥,៣គ.ម ស្ថានីយបូមទឹកកខ្វក់ធុនតូច-ធំចំនួន០៧ កន្លែង និងការងារតំណភ្ជាប់តាមផ្ទះចំនួន១០,០០០តំណ ស្ថិតក្នុងសង្កាត់កំពង់សំណាញ់ សង្កាត់តាក្តុល សង្កាត់តាខ្មៅ សង្កាត់ព្រែកហូរ និងសង្កាត់ព្រែកឫស្សី ព្រមទាំងស្ថានីយប្រព្រឹត្តកម្មទឹកកខ្វក់មានសមត្ថភាពចម្រោះ១២,០០០ម៣/ថ្ងៃ ស្ថាបនាលើផ្ទៃដីទំហំ២០ហិកតា មានទីតាំង ស្ថិតនៅក្នុងភូមិសាស្ត្រភូមិព្រែកថី សង្កាត់រកាខ្ពស់ ក្រុងតាខ្មៅ ខេត្តកណ្តាល។

បន្ថែមលើទំហំការងារ គម្រោងបានទទួលគោលការណ៍ សម្រាប់ការសិក្សាបច្ចេកទេសគំនូសប្លង់លម្អិត លើការងារកែលម្អស្ថានីយបូមទឹកភ្លៀង សាងសង់ស្ថានីយបូមថ្មី និងការតម្លើងបណ្តាញបង្ហូរទឹកភ្លៀង។

គម្រោងនេះ បានចាប់ផ្តើមសាងសង់នៅថ្ងៃទី០១ ខែវិច្ឆិកា ឆ្នាំ២០២៤ ដែលមានរយៈពេលសាងសង់៣៦ខែ គ្រោងបញ្ចប់នៅចុងឆ្នាំ២០២៧ ខាងមុខនេះ៕

ដោយៈ ជេស៊ីកា

    ប្រទេសចិនៈ វិស័យស្ថាបត្យកម្មរបស់ចិន បានរីកចម្រើនដល់កម្រិ​តកំពូល ជាមួយនឹងវត្តមានស្ថាបត្យករល្បីៗ និងមានឥទ្ធិពលបំផុតនៅក្នុងប្រទេស និងល្បីល្បាញលើឆាកអន្តរជាតិផងដែរ។

តើបុគ្គលរូបណាជា កំពូលស្ថាបត្យករទាំង៥រូប ដែលមានទំនាក់ទំនងជាមួយប្រទេសចិន ដែលត្រូវបានគេស្គាល់ទាំងនៅក្នុងប្រទេសចិន និងនៅលើឆាកអន្តរជាតិ។

១. I. M. Pei (贝聿铭, Ieoh Ming Pei)

លោកបានកើត នៅឆ្នាំ១៩១៧ ក្រុងទីក្វាងចូវ ប្រទេសចិន (ក្រោយមកបានក្លាយជាជនជាតិចិន-អាមេរិក)។

• កម្រិតកិត្តិនាម៖ រឿងព្រេងនិទានពិភពលោក
• ហេតុអ្វីបានជាល្បីល្បាញ?
• ពីរ៉ាមីត Louvre (ប៉ារីស)
• អគារ Bank of China Tower (ហុងកុង)
• រចនាប័ទ្ម៖ ទំនើបនិយមជាមួយនឹងធរណីមាត្ររឹងមាំ

លោកជាស្ថាបត្យករកើតនៅប្រទេសចិន ដ៏ល្បីល្បាញបំផុតក្នុងប្រវត្តិសាស្ត្រ។

២. Wang Shu (王澍)

ស្ថាបត្យកររូបនេះ បានកើតនៅឆ្នាំ១៩៦៣ ក្នុងប្រទេសចិន លោកជាអ្នកឈ្នះរង្វាន់ Pritzker (២០១២)។ លោកក៏័ជាពលរដ្ឋចិនដំបូងគេដែលឈ្នះពានរង្វាន់ខាងលើនេះ។

• ស្នាដៃល្បីៗ៖
• សារមន្ទីរប្រវត្តិសាស្ត្រNingbo
• បរិវេណសាលាXiangshan (បណ្ឌិត្យសភាសិល្បៈចិន)។
• រចនាប័ទ្ម៖ សម្ភារៈចិនបុរាណ + ស្ថាបត្យកម្មទំនើប។

៣. Ma Yansong (马岩松)

ស្ថាបត្យករលំដាប់កំពូលទី៣នេះ បានកើតនៅឆ្នាំ១៩៧៥ ទីក្រុងប៉េកាំង។

លោកជាស្ថាបនិក៖ MAD Architects និងសម្រេចបាននូវស្នាដៃល្បីៗដូចជា

• Absolute Towers (កាណាដា)
• Harbin Opera House
• រចនាបថ៖ អនាគតនិយម រលូន និងបំផុសគំនិតដោយធម្មជាតិ។
• ឋានៈ៖ ស្ថាបត្យករចិនសកម្មបំផុត លើឆាកអន្តរជាតិនាពេលបច្ចុប្បន្ន។

៤. Liu Jiakun (刘家琨)

លោកបានកើតនៅឆ្នាំ១៩៥៦ នាទីក្រុងChengdu លោកមានការទទួលស្គាល់ជាអន្តរជាតិ ដោយគេចាត់ទុកជាស្ថាបត្យករបញ្ញាដ៏គួរឱ្យគោរពយ៉ាងខ្លាំង។

• ស្នាដៃល្បីៗ៖
• សារមន្ទីរសិល្បៈចម្លាក់ថ្ម Luyeyuan
• West Village ទីក្រុងChengdu
• រចនាបថ៖ ការផ្តោតលើមាត្រដ្ឋានមនុស្ស សង្គម និងវប្បធម៌។
• កេរ្តិ៍ឈ្មោះ៖ ស្ថាបត្យករនៃទីក្រុង “ជីវិតពិត” របស់ប្រទេសចិន។

៥. Cui Kai (崔恺)

លោកបានកើតនៅឆ្នាំ១៩៥៧ នាទីក្រុងប៉េកាំង រដ្ឋធានីរបស់មហាយក្សចិន។

• លោកមានតួនាទី៖ ប្រធានស្ថាបត្យករនៃបណ្ឌិត្យសភា ស្រាវជ្រាវសំណង់ចិន។
• ឥទ្ធិពល៖ 🇨🇳 គម្រោង និងគោលនយោបាយជាតិសំខាន់ៗ។
• រចនាបថ៖ ស្ថាបត្យកម្មរដ្ឋចិនសម័យទំនើប។
• សារៈសំខាន់៖ មានឥទ្ធិពលខ្លាំង នៅក្នុងការសាងសង់របស់ប្រទេសចិន ប្រព័ន្ធ។

ក្រៅពីស្ថាបត្យករកំពូលទាំង៥ខាងលើ គេក៏មិនភ្លេចពីស្ថាបត្យករ ដ៏មានកិត្តិយស និងល្បីល្បាញដូចជា លោកHe Jingtang (何镜堂) អ្នករចនានៃ China Pavilion, Shanghai Expo និងលោក Zhang Lei (张雷)ត្រូវបានគេស្គាល់ដោយសារស្ថាបត្យកម្មបែប Minimalist និងកំណាព្យ៕