តែម សុខុម
ហាណូយ: ក្រុមអ្នកវិភាគបានព្យាករថា អ្នកវិនិយោគបរទេសនឹងសម្រុកទិញយកភាគហ៊ុន និងច្របាច់បញ្ចូលគ្នាក្នុងវិស័យអចលនទ្រព្យដែលចាប់ផ្តើមនៅចុងឆ្នាំនេះ។

តួយ៉ាងក្រុមហ៊ុនសិង្ហបុរី Keppel Land បានប្រកាសកាលពីខែកក្កដា ថា ខ្លួននឹងទិញយកភាគហ៊ុន៦៥%ក្នុងតម្លៃ៤១,៧លានដុល្លារអាមេរិក នៅក្នុងក្រុមហ៊ុនក្នុងស្រុកមួយដែលគេរំពឹងថានឹងបើកដំណើរការផ្សារទំនើបនៅទីក្រុងហាណូយ ប្រទេសវៀតណាម ក្នុងឆ្នាំ២០២៥។

២ខែមុននេះ ក្រុមហ៊ុន Keppel Land បានទិញយកគម្រោងលំនៅឋានចំនួន២ពីក្រុមហ៊ុនអចលនទ្រព្យ Khang Dien ស្ថិតក្នុងសង្កាត់ Thu Duc City នៃក្រុងហូជីមិញ ក្នុងតម្លៃប្រមាណ១២៣លានដុល្លារអាមេរិក។

ទន្ទឹមនេះក្រុមហ៊ុនម៉ាឡេស៊ី Gamuda បានវិនិយោគប្រមាណ៣០០លានដុល្លារអាមេរិក ដើម្បីទិញយកគម្រោងមួយស្ថិតនៅលើផ្ទៃដី៣,៧ហិកតាពីក្រុមហ៊ុនហ៊ុនអចលនទ្រព្យ Tam Luc Real Estate Joint Stock Company។គម្រោងក្នុងសង្កាត់ Thu Duc City ដែលនឹងមានអគារខ្ពស់ចំនួន៦ជាមួយនឹងផ្ទះជិត២.០០០យូនីតបានជម្នះលើបញ្ហាផ្លូវច្បាប់ដែលខ្លួនកំពុងជួបប្រទះក្នុងឆ្នាំនេះ។

វិស័យទេសចរណ៍ និងអចលនទ្រព្យប្រភេទរីហ្សតក៏ទទួលបានកិច្ចព្រមព្រៀង M&A (ច្របាច់បញ្ចូលគ្នា និងទិញយក) មួយចំនួនផងដែរ។ គម្រោងរីហ្សត Nam Hoi An (Hoiana) ដែលកំពុងស្ថិតក្រោមការសាងសង់ក្នុងខេត្ត Quang Nam ភាគកណ្តាលត្រូវបានទិញយកដោយមហាសេដ្ឋីហុងកុង លោក Henry Cheng ។ ការវិនិយោគសរុបនៃគម្រោងនេះបានឈានដល់៤ពាន់លានដុល្លារអាមេរិក។

នៅពាក់កណ្តាលឆ្នាំ២០២៣ សណ្ឋាគារចំនួន២ក្នុងសង្កាត់លេខ៧ នៃទីក្រុងហូជីមិញ ពោលគឺសណ្ឋាគារផ្កាយ៣ Ibis Saigon South និងសណ្ឋាគារផ្កាយ៤ Capri ក៏ត្រូវបានលក់ចេញដែរ។

ក្រុមហ៊ុនប្រឹក្សាអចលនទ្រព្យអង់គ្លេស JLL និយាយថា “កិច្ចព្រមព្រៀងច្របាញ់បញ្ចូលគ្នា និងទិញយក (M&A) ធំៗកាលពីពេលថ្មីៗនេះបានឆ្លុះបញ្ចាំងពីទំនុកចិត្តរបស់បណ្ដាអ្នកវិនិយោគលើសេដ្ឋកិច្ចរបស់ប្រទេសវៀតណាម ជាទូទៅ ប៉ុន្តែទុកចិត្តជាពិសេសលើទីផ្សារអចលនទ្រព្យ”៕ VN Express៕

ដោយ: គង់ លាងហួរ

អន្តរជាតិ: ប្រតិបត្តិករផ្សារទំនើបដ៏ធំបំផុត របស់ប្រទេសថៃគឺក្រុមហ៊ុន Central Pattana Plc (CPN) គ្រោងបោះទុនវិនិយោគចំនួន៣ពាន់លានបាត (ប្រហែល៨៣លានដុល្លារ) ក្នុងខេត្តភាគឦ​សាន Nakhon Phanom និង Nong Khai ដើម្បីឆ្លើយតបទៅនឹងការកើនឡើងនៃចំនួនភ្ញៀវទេសចរមកពីប្រទេសឡាវ។

កាសែត Bangkok Post បានរាយការណ៍ថា ក្រុមហ៊ុនកំពុងធ្វើការលើការបើកផ្សារទំនើបថ្មីមួយនៅខេត្ត Nong Khai ក្នុងឆ្នាំ២០២៤ ជាមួយនឹងទុនវិនិយោគចំនួន១ពាន់លានបាត (ប្រហែល២៧លានដុល្លារអាមេរិក) ។

លោក Tos Chirathivat នាយកប្រតិបត្តិនៃក្រុមហ៊ុន Central Group អះអាងថា “ខេត្ត Nong Khai មាន​ទំហំពាណិជ្ជកម្ម​តាម​ព្រំដែន​ជាមួយប្រទេសឡាវ​ខ្ពស់​បំផុត​ ពោលគឺមិន​តិច​ជាង៨០ពាន់​លាន​បាត​ក្នុង​មួយ​ឆ្នាំ​នោះទេ។ ខេត្តនេះ បានទាក់ទាញភ្ញៀវទេសចរជាង២លាននាក់ក្នុងមួយឆ្នាំៗ និងរកប្រាក់ចំណូលបានពីទេសចរណ៍ជាង៣,៣៥ពាន់លានបាត”។លោក Tos បានបន្ថែមថា ផ្សារទំនើបមួយទៀតគ្រោងនឹងបើកនៅក្នុងតំបន់សេដ្ឋកិច្ចពិសេស នៃខេត្ត Nakhon Phanom ក្នុងត្រីមាសទី៤ ឆ្នាំ 2024 ជាមួយនឹងទុនចំនួន២ពាន់លានបាត (ប្រហែល៥៥លានដុល្លារអាមេរិក)។

លោក Tos បានបញ្ជាក់នៅក្នុងសេចក្តីថ្លែងការណ៍មួយផ្សេងទៀត ដែលបានចេញផ្សាយនៅលើគេហទំព័ររបស់ក្រុមហ៊ុន Central Group ថា “ការអភិវឌ្ឍផ្សារទំនើបដើរតួយ៉ាងសំខាន់ ក្នុងការបង្កើនសក្តានុពលរបស់ខេត្ត Nakhon Phanom ក្នុងការក្លាយទៅជាទីក្រុងទាន់សម័យនៅតំបន់ Isan ប្រទេសថៃ”។

នាយកប្រតិបត្តិរូបនេះបានបន្ថែមថា ការវិនិយោគរបស់ក្រុមហ៊ុន Central Group នៅខេត្ត Nakhon Phanom និងខេត្ត Nong Khai មានគោលបំណងប្រែក្លាយខេត្តទាំង២នេះ ​ទៅជាគោលដៅទេស​ចរណ៍ និងជំរុញសេដ្ឋកិច្ចនៅក្នុងអនុតំបន់។

ទោះបីជាតម្លៃទំនិញកើនឡើង និងអតិផរណាហក់ឡើងខ្ពស់យ៉ាងណាក្តី ក៏ប្រជាជនឡាវជាច្រើន បានបន្តធ្វើដំណើរទៅកាន់ប្រទេសថៃ៕

ដោយៈ តែម សុខុម
បាងកក: លោកHideyuki Tanaka ប្រធានអនុគណៈកម្មាធិការទំនាក់ទំនងសេដ្ឋកិច្ចអាស៊ាន នៃសហព័ន្ធធុរកិច្ចជប៉ុន (Keidanren​) បានឱ្យដឹងថា បណ្ដាពាណិជ្ជករជប៉ុន នៅតែមានទំនុកចិត្តលើការវិនិយោគរបស់ខ្លួនក្នុងប្រទេសថៃ ហើយប្ដេជ្ញាមិនចាកចេញពីប្រទេសនេះឡើយ ជាពិសេសផ្នែកអាជីវកម្មទាក់ទងនឹងការផលិតរថយន្ត។

លោកគូសបញ្ជាក់ថា ប្រទេសថៃ មានធនធានធម្មជាតិដ៏សម្បូរបែប ហើយប្រទេសជប៉ុនយល់ថា ប្រជាជនរបស់ខ្លួនមានវប្បធម៌រួមតែមួយជាមួយនឹងជនជាតិថៃ ហើយអ្វីដែលសំខាន់ជាងនេះទៅទៀតនោះគឺប្រជាជនថៃ មានភាពរួសរាយរាក់ទាក់ជាមួយជនជាតិជប៉ុន។ នេះបើយោងតាមកាសែត Bangkok Post ចុះផ្សាយកាលពីថ្ងៃសៅរ៍ ទី១៤ ខែតុលា។

ដោយសារកត្តាទាំងនេះ ធុរជនជប៉ុន ជាច្រើនជាពិសេសក្នុងឧស្សាហកម្មផលិតរថយន្ត នៅតែមានទំនុកចិត្ត លើការវិនិយោគរបស់ខ្លួនក្នុងប្រទេសថៃ ដោយពួកគេនៅតែបន្តបង្កើតទីតាំងផលិត​កម្មរបស់ខ្លួនក្នុងប្រទេសនេះ។

លោក Hideyuki Tanaka ថ្លែងថា បណ្ដាក្រុមហ៊ុនជប៉ុន ទាំងតូច ទាំងធំ មានសក្ដានុពលពង្រីក ខ្សែសង្វាក់ផលិតកម្មរបស់ពួកគេនៅក្នុងប្រទេសនេះ។ លោកបានបន្តថា លោកជឿថា ក្រុមហ៊ុនជប៉ុន ជាច្រើនទៀតរួមទាំងអាជីវកម្មខ្នាតតូច និងមធ្យម (SMEs) និងអាជីវកម្មទើបបង្កើតថ្មី (Start-up) ផងនឹងរើមកកាន់ប្រទេសថៃ។

លោកលើកឡើងថា “ចំនួនក្រុមហ៊ុនជប៉ុន និងទំហំវិនិយោគសរុបនៅក្នុងប្រទេសថៃ គឺច្រើនជាងគេបំផុត បើធៀបនឹងបណ្ដាវិនិយោគិនមកពីបរទេសផ្សេងៗទៀត”៕ Bangkok Post៕

        ដោយៈ គង់ សូរិយា

        សៀមរាបៈ ព្រលានយន្តហោះសៀមរាប អង្គរតម្លៃ១១០០លាន​ដុល្លារអាមេរិក បានបើកដំណើររការជាផ្លូវការហើយ នៅថ្ងៃទី១៦ តុលានេះ។

រដ្ឋមន្រ្តីប្រតិភូអមនាយករដ្ឋមន្រ្តី ទទួលបន្ទុកជារដ្ឋលេខាធិការអាកាសចរណ៍ស៊ីវិល លោក ម៉ៅ ហាវណ្ណាល់ បានមានប្រសាសន៍ក្នុងពិធីបើកឲ្យដំណើរការព្រលាននេះថា អាកាសយានដ្ឋាន​អន្តរជាតិសៀមរាបអង្គរ នឹងទទួលបានជើងហោះហើរចំនួន១៧ជើង ឬស្មើនឹង៣៤ចលនាជើងហោះហើរ (ចុះចតនិង​ហោះឡើង នៅក្នុងថ្ងៃនេះ ដោយជើងហោះហើររបស់ក្រុមហ៊ុន អាកាសចរណ៍ Bangkok Airways, PG903, ចុះចតនៅព្រឹកនេះ ជាជើងយន្តហោះពាណិជ្ជកម្មដំបូងបំផុត ដែលបានចុះចតនៅអាកាស​យានដ្ឋានដ៏ថ្មី សន្លាងរបស់​កម្ពុជា។

លោកបានគូសបញ្ជាក់ថា “ការសាងសង់អាកាសយានដ្ឋានអន្តរជាតិនេះ មិនត្រឹមតែគិតលើតម្រូវ​ការបច្ចុប្បន្ននោះទេ គឺមានចក្ខុវិស័យវែងឆ្ងាយ ដោយបានសាងសង់ហេដ្ឋារចនាសម្ព័ន្ធគ្រប់លក្ខខណ្ឌ តាមស្ដង់ដា​អន្តរជាតិ លំដាប់ប្រភេទ៤ម៉ី (4E និងតម្រូវការ ដើម្បីបម្រើការហោះហើរគ្រប់ប្រភេទ ចាប់តាំងពីអាកាសយាន ប្រភេទតូច ដល់ប្រភេទធំៗ ដូចជា Airbus 350 ឬ Boeing 787 ជាដើម និងសម្រាប់ទទួលជើង​ហោះហើរក្នុង​តំបន់ និងជើងហោះហើរឆ្ងាយៗ  (Long Haul Flights)”។ អាកាសយានដ្ឋាននេះ មានសមត្ថភាពទទួលអាកាសយានចំនួន៣៨ ចំណត ទទួលអ្នកដំណើរតាមផ្លូវអាកាសបាន៧លាននាក់ក្នុងឆ្នាំ២០២៤ និង១២លាននាក់ក្នុងឆ្នាំ២០៤០ខាងមុខ។ អាចផ្ទុកទំនិញតាមផ្លូវអាកាស បានចំនួន១០,០០០តោនក្នុងឆ្នាំ២០២៤ និង២៦,០០០តោន ក្នុងឆ្នាំ២០៤០ខាងមុខ នឹងគ្រោងទទួលជើងហោះហើរបានចំនួន៦៥,០០០ជើង ក្នុងឆ្នាំ២០២៤ និង១១២,០០០ ជើងក្នុងឆ្នាំ២០៤០ តាមការព្យាករណ៍ទុក។អាកាសយានដ្ឋានអន្តរជាតិសៀមរាបអង្គរ បានវិនិយោគទឹកប្រាក់ចំនួន១,១០០លានដុល្លារអាមេរិក ដែលជាការវិនិយោគ BOT ក្នុងរយៈពេល៥៥ឆ្នាំ។ការដឹកជញ្ជូនតាមផ្លូវអាកាស ក្នុងរយៈពេល៩ខែ ចាប់ពីខែមករា ដល់ខែកញ្ញា ឆ្នាំ២០២៣ កម្ពុជា ទទួលបានអ្នកដំណើរតាមផ្លូវអាកាសបានចំនួនជិត៣,៧លាននាក់ កើនឡើង១៦២% ធៀបនឹងរយៈពេលដូចគ្នា ក្នុងឆ្នាំ២០២២ និងទទួលបានចលនាជើង ហោះហើរចំនួន ៣៧,២០០ ជើង កើនឡើង ១០២% ធៀបនឹងរយៈ​ពេលដូចគ្នា ក្នុងឆ្នាំ២០២២។ក្នុងដើមខែតុលា ឆ្នាំ២០២៣ ប្រតិបត្តិការហោះហើរដឹកជញ្ជូនអ្នកដំណើរជាតិ និងអន្តរជាតិ និងទំនិញតាមផ្លូវអាកាស ជាមធ្យមមានចលនា ជើងហោះហើរចំនួន៨៥០ជើងក្នុងមួយសប្តាហ៍ ចេញនិងចូល​អាកាសយានដ្ឋានអន្តរជាតិទាំង៣ និងមានក្រុមហ៊ុនអាកាសចរណ៍ក្នុងស្រុក និងបរទេសចំនួន៣០ក្រុមហ៊ុន ដែលកំពុង​តភ្ជាប់ជើងហោះហើរឡើងវិញ ពីប្រទេសអាស៊ានទាំង៨ ចិន កូរ៉េខាងត្បូង តំបន់រដ្ឋបាលពិសេសហុងកុង កោះតៃវ៉ាន់ និងរដ្ឋកាតាផងដែរ។ នេះបើតាមការបញ្ជាក់របស់លោក ម៉ៅ ហាវណ្ណាល់៕

ដោយ: គង់ លាងហួរ
អន្តរជាតិ: មូលនិធិរូបិយវត្ថុអន្តរជាតិ (IMF) បានអះអាងថា ការស្ទុះងើបឡើងវិញ ដ៏យឺតរបស់ប្រទេសចិន និងហានិភ័យនៃវិបត្តិអចលនទ្រព្យ ដែលអូសបន្លាយពេលយូរជាងនេះ អាចជះផលប៉ះពាល់ដល់សេដ្ឋកិច្ចរបស់តំបន់អាស៊ីបន្ថែមទៀត។

មូលនិធិ IMF បានលើកឡើងថា ការជំរុញសេដ្ឋកិច្ចក្រោយវិបត្តិជំងឺរាតត្បាតកូវីដ-១៩របស់ប្រទេសចិន បានបាត់បង់សន្ទុះលឿនជាងការរំពឹងទុក។

ទន្ទឹមនឹងនេះដែរ ភាពរឹងមាំនៃសេដ្ឋកិច្ចសហរដ្ឋអាមេរិក បានផ្តល់ការគាំទ្រ តិចជាងកាលពីមុនដល់តំបន់អាស៊ី ដោយសារភាពរឹងមាំនេះ ត្រូវបានផ្តោតលើវិស័យសេវាកម្មជាចម្បង ដែលមិនអាចជំរុញតម្រូវការសម្រាប់ការនាំចេញនោះទេ។ក្នុងរយៈពេលដ៏ខ្លីនេះ វិបត្តិនៅក្នុងវិស័យអចលនទ្រព្យ ដែលកំពុងជាប់ផុងបំណុលយ៉ាងជ្រៅរបស់ប្រទេសចិន និងឥទ្ធិពលពីការធ្លាក់ចុះនៃសកម្មភាពសេដ្ឋកិច្ច អាចនឹងជះផលប៉ះពាល់ដល់តំបន់ ជាពិសេសចំពោះប្រទេសនាំចេញទំនិញ ដែលមានទំនាក់ទំនងពាណិជ្ជកម្មជិតស្និទ្ធជាមួយប្រទេសចិន។

IMF បញ្ជាក់ថា “វិបត្តិអចលនទ្រព្យកាន់តែអូសបន្លាយ និងការឆ្លើយតបគោលនយោបាយ ដែលនៅមានកម្រិតនៅក្នុងប្រទេសចិននឹងបណ្តាលឱ្យការធ្លាក់ចុះ នៃសេដ្ឋកិច្ចតំបន់អាស៊ីកាន់តែអាក្រក់”។

នៅក្នុងរបាយការណ៍ទស្សនវិស័យ សេដ្ឋកិច្ចពិភពលោករបស់ខ្លួន ដែលបានចេញផ្សាយ ក្នុងអំឡុងកិច្ចប្រជុំប្រចាំឆ្នាំរបស់ IMF នៅទីក្រុង Marrakech មូលនិធិ IMF បានបន្ទាបការព្យាករកំណើនសេដ្ឋកិច្ចនៅឆ្នាំ២០២៤ សម្រាប់តំបន់អាស៊ីមកនៅត្រឹម៤,២ភាគរយ ពី៤,៤ភាគរយ ដែលបានព្យាករក្នុងខែមេសា៕