ដោយៈ គង់ ហ្វីអូណា

        ភ្នំពេញៈ លោក ចាស្ទីន ខេវិន វ៉ាយអេត ឯកអគ្គរដ្ឋទូតអូស្ត្រាលីប្រចាំកម្ពុជា បានបង្ហាញការចាប់​អារម្មណ៍​ខ្ពស់ចំពោះគម្រោង “ព្រែកជីកហ្វូណន-តេជោ” ដែលជាគម្រោងតភ្ជាប់ការដឹកជញ្ជូនផ្លូវទឹក ​រវាង​ទន្លេ និងសមុទ្រ ដ៏មានគុណប្រយោជន៍របស់កម្ពុជា។

ចំណាប់អារម្មណ៍របស់លោកឯកអគ្គរដ្ឋទូតអូស្ត្រាលី លើគម្រោ​ងព្រែកជីករបស់កម្ពុជានេះ បានស្តែង​ឡើង​ក្នុង​ពេលរូបលោកអញ្ជើញចូលជួបពិភាក្សាការងារ ជាមួយលោកឧបនាយករដ្ឋមន្ត្រី ស៊ុន ចាន់ថុល អនុ​ប្រធាន​ទី១ ក្រុមប្រឹក្សាអភិវឌ្ឍន៍កម្ពុជា នាព្រឹកថ្ងៃទី១៤ ខែកុម្ភៈ ឆ្នាំ២០២៤។

លោកឧបនាយករដ្ឋមន្ត្រីស៊ុន ចាន់ថុល បានមានប្រសាសន៍ឲ្យដឹងថា លោកឯកអគ្គរដ្ឋទូត បានសាក​សួរ​ព័ត៌មានមួយចំនួនលើគម្រោងព្រែកជីកនេះ ដូចជាការសិក្សាពីបរិស្ថាន និងបញ្ហាផ្លូវច្បាប់។

ឆ្លើយតបនឹងសំណួរនេះ លោកឧបនាយករដ្ឋមន្ត្រី ស៊ុន ចាន់ថុល ក៏បានបញ្ជាក់ច្បាស់ ពីការសិក្សាលំអិតលើផលប៉ះពាល់នានា ព្រមទាំងលើកបង្ហាញទិដ្ឋភាពច្បាប់ផងដែរ។

ក្នុងជំនួបនេះក្រៅពីបង្ហាញការចាប់អារម្មណ៍ លើគម្រោងព្រែកជីកដ៏ធំដំបូងនៅកម្ពុជាហើយនោះ លោកឯកអគ្គរដ្ឋទូត ក៏បានកោតសរសើរអំពីបេសកកម្មរបស់កម្ពុជា ក្នុងការទាក់ទាញវិនិយោគិន​ពីបណ្ដា​ប្រទេស​នានា និងការយកចិត្តទុកដាក់អភិវឌ្ឍន៍ហេដ្ឋារចនាសម្ព័ន្ធបានកាន់តែប្រសើរ។

ក្នុងឱកាសនៃជំនួបនោះ លោកឧបនាយករដ្ឋមន្ត្រី ស៊ុន ចាន់ថុល បានជម្រាបលោកឯកអគ្គរដ្ឋទូត​អូស្ត្រា​លី អំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការទាក់ទាញវិនិយោគិន។ ក្នុងនោះ កាលពីឆ្នាំ​២០២៣​កន្លងទៅ កម្ពុជាទទួលគម្រោងវិនិយោគចំនួន២៦៨ ដែលមានទុនវិនិយោគជិត៥ពាន់លាន​ដុល្លារ​អាមេរិក មានការកើនឡើងខ្ពស់ បើធៀបទៅនឹងឆ្នាំ២០២២ ដែលទទួលបានប្រមាណជិត៤ពាន់លានដុល្លារអាមេរិក។

សម្រាប់ខែមករា ឆ្នាំ២០២៤ កម្ពុជាទទួលបានគម្រោងវិនិយោគ ៣២គម្រោង។ បើធៀបនឹងខែមករា ឆ្នាំ២០២៣ មានចំនួនច្រើនជាង២ដង។ លោកឧបនាយករដ្ឋមន្ត្រី បានបង្ហាញការរំពឹងថា គម្រោងវិនិយោគ នឹងមានការកើនឡើងបន្ថែមទៀត ទោះបីជាស្ថានភាពពិភពលោកបច្ចុប្បន្នកំពុងជួបបញ្ហាប្រឈមក្ដី។

ឧបនាយករដ្ឋមន្ត្រី ស៊ុន ចាន់ថុល បានគូសបញ្ជាក់ដែរថា ដើម្បីកាត់បន្ថយតម្លៃដឹកជញ្ជូន រាជរដ្ឋាភិបាល​ បានដាក់ចេញផែនការមេគ្រប់ជ្រុងជ្រោយស្តីពី ប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣។

បន្ថែមពីនេះ ដើម្បីបង្កើនភាពប្រកួតប្រជែង កម្ពុជាមានគោលបំណង ក្នុងការប្រើ​ប្រាស់​ថាមពលស្អាតឱ្យបាន៧០ភាគរយ នៃថាម​ព​លសរុបត្រឹមឆ្នាំ២០៣០៕

ដោយ: គង់ លាងហួរ

អន្តរជាតិ: ទីផ្សារគ្រឿងអលង្ការ ដែលធ្វើអំពីមាសរបស់ប្រទេសចិនកំពុងលេចត្រដែតឡើង ខណៈដែលការរចនាឌីហ្សាញ ដែលមានលក្ខណៈបែបវប្បធម៌ បានទាក់ទាញចំណាប់អារម្មណ៍ ពីអតិថិជនវ័យក្មេងមួយចំនួនធំ។

លោក Hazel Wu ដែលជានិស្សិតអាយុ២៣ឆ្នាំ សិក្សានៅទីក្រុងសៀងហៃ ថ្មីៗនេះបានទិញចិញ្ចៀនមាសមួយវង់ ដើម្បីពាក់ស្វែងរកលាភសំណាងល្អ នៅក្នុងឆ្នាំ២០២៤នេះ ដែលត្រូវជាឆ្នាំនាគ។

ជនជាតិចិនជាច្រើនជឿជាក់ថា ពួកគេអាចប្រឈមមុខនឹងបញ្ហា ឬជួបសំណាងអាក្រក់ក្នុងកំឡុងឆ្នាំ ដែលត្រូវនឹងសញ្ញារាសីចក្រដែលពួកគេកើត ឬនិយាយឱ្យងាយយល់គឺជាន់ឆ្នាំ។

ដូច្នេះ អ្នកដែលកើតក្នុងឆ្នាំនាគ ដូចជា លោក Wu ជឿថា ខ្លួនអាចប្រឈម នឹងហានិភ័យនៃវិបត្តិហិរញ្ញវត្ថុ ឬបញ្ហាសុខភាព។  ទោះយ៉ាងណាក្តីជនជាតិចិនមានជំនឿថា គេអាចទប់ស្កាត់សំណាងអាក្រ ក់ទាំងនេះ តាមរយៈការពាក់ ឬកាន់វត្ថុស័ក្តិសិទ្ធិ។

ប៉ុន្តែជំនឿពុំមែនជាហេតុផលតែមួយមុខ ដែលនាំឱ្យលោក Wu សម្រេចចិត្តទិញចិញ្ចៀនមាសមកពាក់នោះទេ។

លោកបញ្ជាក់ថា “ខ្ញុំក៏ទិញចិញ្ចៀននេះទុក ក្នុងគោលបំណងវិនិយោគផងដែរ”។លោកបន្ថែមថា “បច្ចុប្បន្ននេះ ការ​រចនា​គ្រឿងអលង្កា​រ មាន​ភាព​ស្រស់​ស្អាត​កាន់​តែ​ខ្លាំង​ ដូចជាការឆ្លាក់រូបនាគ អក្សរ ឬរូបភាពផ្សេងៗនៅលើគ្រឿងអលង្ការ ដែលតំណាងឱ្យវប្បធម៌របស់ជនជាតិចិន ឬហៅថា guochao”។កំណើននិន្នាការ guochao ឬ “China chic” ដែលតំណាងឱ្យអត្តសញ្ញាណវប្បធម៌ចិន គួបផ្សំនឹងការកើនឡើងនៃតម្លៃមាស បានបង្កើតឱកាសទីផ្សារដ៏ធំ នៅក្នុងទីផ្សារគ្រឿងអលង្ការមាសរបស់ប្រទេសចិន ដែលមានតម្លៃ៥៧ពាន់លានដុល្លារនៅឆ្នាំ២០២២។ នេះបើយោងតាមសមាគមពាណិជ្ជកម្មត្បូង និងគ្រឿងអលង្ការនៃប្រទេសចិន។

ទីផ្សារគ្រឿងអលង្ការធ្វើពីមាស នៅប្រទេសចិន បានកើនឡើងប្រហែល១២ភាគរយ បើធៀបនឹងកម្រិតមុនជំងឺរាតត្បាត នៅឆ្នាំ២០១៩ និងកើនឡើង៦៦ភាគរយ បើធៀបនឹងឆ្នាំ២០១២។លោក Kent Wong នាយកគ្រប់គ្រងរបស់ក្រុមហ៊ុនគ្រឿងអលង្ការ Chow Tai Fook បានលើកឡើងថា “យុវជនមានចំណាប់អារម្មណ៍កាន់តែខ្លាំង ទៅនឹងវប្បធម៌ចិន ហើយយុវជនកំពុងស្វែងរកបទពិសោធន៍ ពីទិដ្ឋភាពវប្បធម៌ផ្សេងៗគ្នា ដោយសារពួកគេកាន់តែមានទំនុកចិត្តលើវប្បធម៌ចិន” ។

លោកបន្ថែមថា “ដូច្នេះគ្រឿងអលង្ការមាស ជាពិសេសគ្រឿងអលង្ការ ដែលមានការច្នៃប្រឌិតផ្នែកវប្បធម៌ មានការពេញនិយមជាពិសេសក្នុងចំណោមអ្នកប្រើប្រាស់វ័យក្មេង ក្នុងរយៈពេលប៉ុន្មានឆ្នាំចុងក្រោយនេះ”៕ប្រភព៖SCMP៕

ដោយ: គង់ លាងហួរ

សម្តេចធិបតី ហ៊ុន ម៉ាណែត បានថ្លែងថា ប្រទេសកម្ពុជាជាប្រទេសដែលធ្លាប់ឆ្លងកាត់សង្រ្គាម ខណៈប្រទេសអាស៊ានផ្សេងទៀត មិនឆ្លងកាត់សង្រ្គាមដូចយើងទេ ប៉ុន្តែកម្ពុជានៅតែមានឱកាស ព្រោះដោយសារសុខសន្តិភាព ស្ថិរភាព ហើយកម្ពុជាក៏អាចដើរលឿនផងដែរ។

សម្តេចធិបតី ហ៊ុន ម៉ាណែត បានថ្លែងបន្តថា បើសន្តិភាពផ្តល់ឱកាសហើយដាក់ទិសដៅត្រូវ គោលនយោបាយត្រូវ យើងនឹងមានសមត្ថភាពប្រកួតប្រជែង និងបង្កើនភាពម្ចាស់ការឯករាជ្យរបស់កម្ពុជា។

នៅក្នុងឱកាសដែលសម្តេចអញ្ជើញជាអធិបតី «សម្ពោធទីតាំងសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញបត្រជូននិស្សិតជ័យលាភីនៃសាកលវិទ្យាល័យជាតិគ្រប់គ្រង» នៅព្រឹកថ្ងៃទី១៥ ខែកុម្ភៈ ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា សមត្ថភាពយើង មិនទាន់បានធ្វើគ្រប់ជ្រុងជ្រោយនោះទេ ប៉ុន្តែទៅថ្ងៃមុខកិច្ចការសំខាន់ជាច្រើនយើងត្រូវម្ចាស់ការធ្វើខ្លួនឯង ហើយក្នុងនោះយើងត្រូវកសាងធនធានមនុស្សរបស់យើងដែលអាចអោយយើងមានភាពម្ចាស់ការ៕

ដោយ: គង់ លាងហួរ

អន្តរជាតិ: រដ្ឋបាលក្រុងសេអ៊ូល បានបង្ហាញផែនការមួយ ដើម្បីប្រែក្លាយឃ្លាំងថែរទាំរថភ្លើង ដែលគេបោះបង់ចោលនៅកណ្តាលទីក្រុង Yongsan ទៅជាតំបន់ពាណិជ្ជកម្មអន្តរជាតិ ដោយមានការសាងសង់អគារខ្ពស់កប់ពពកកម្ពស់រហូតដល់១០០ជាន់។

នៅក្នុងសន្និសីទសារព័ត៌មានកាលពីថ្ងៃច័ន្ទ ទី៥ ខែកុម្ភៈ អភិបា​លក្រុងសេអ៊ូល លោក Oh Se-hoon បានថ្លែងថា រដ្ឋបាលនឹងប្រែក្លាយតំបន់ដី ដែលមិនបានប្រើប្រាស់នៅជិតស្ថានីយ៍ Yongsan ទៅជា “សង្កាត់ពាណិជ្ជកម្មអន្តរជាតិ ជាមជ្ឈមណ្ឌលថ្មីសម្រាប់ការប្រកួតប្រជែងទីក្រុងសកល និងការច្នៃប្រឌិតបច្ចេកវិទ្យា”។

នៅក្រោមផែនការនេះ រដ្ឋបាលទីក្រុងសេអ៊ូល គ្រោងនឹងអភិវឌ្ឍផ្ទៃដីប្រហែល៥០០.០០០ម៉ែត្រការ៉េ ទៅជាទីក្រុង “បញ្ឈរ” ដ៏ធំបំផុតរបស់ពិភពលោក និងមានទីធ្លាបៃតងដ៏ធំទូលាយ។

លោក Oh បានសង្កត់ធ្ងន់ថា “ក្នុងចំណោមទីក្រុងធំៗរបស់ពិភពលោក ពុំមានផែនការអភិវឌ្ឍណាដែលមានទំហំធំបែបនេះទេ ។  សង្កា​​ត់អន្តរជាតិថ្មីនេះ នឹងមានទំហំប្រហែល៤,៤ដងនៃសង្កាត់ពាណិជ្ជកម្ម Hudson Yards របស់ទីក្រុងញូវយ៉ក”។

គម្រោងខ្នាតធំនេះ គ្រោងនឹងសាងសង់ឡើង នៅឆ្នាំ២០៣០ ដូច្នេះអាជីវកម្មនានា នឹងអាចចាប់ផ្តើមផ្លាស់ទៅក្នុងសង្កាត់ពាណិជ្ជកម្មអន្តរជាតិថ្មីនេះ នៅដើមទសវត្សរ៍ឆ្នាំ២០៣០ខាងមុខ។

សង្កាត់នេះនឹងរួមមាន ការសាងសង់អគារកំពស់១០០ជាន់ ដោយមានកន្លែងកម្សាន្តនៅជាន់ខាងលើ ដើម្បីទាក់ទាញភ្ញៀវទេសចរ ដូចជា កន្លែងសង្កេតមើលផ្កាយ និងកន្លែងជិះកម្សាន្តជាដើម។ នៅជាន់ក្រោមដីនៃសង្កាត់នេះ នឹងរៀបចំសាលប្រគុំតន្ត្រី បណ្ណាល័យ និងសារមន្ទីរសិល្បៈ។

យោងតាមលោកOh Se-hoon បានឱ្យដឹងទៀតថា ផ្ទៃដីសរុបចំនួន៥០០.០០០ម៉ែត្រការ៉េនេះ នឹងត្រូវបានគ្របដណ្តប់ដោយទីធ្លាបៃតង ខណៈដែលផ្លូវថ្នល់ត្រូវបានផ្លាស់ប្តូរទៅផ្លូវក្រោមដី៕

        ដោយៈ ស៊ីវ ម៉េង

        ភ្នំពេញៈ ការពន្យាពេលគំរោងសាងសង់ អាគារកប់ពពកនៅរាជធានីភ្នំពេញ ឆ្លុះបញ្ចាំងពីវិបត្តិសេដ្ឋកិច្ច ដែលធ្វើឲ្យទីផ្សារមានសភាពរង្គោះរង្គើរ ស្របពេលនិន្នាការទិញលក់បានធ្លាក់ចុះ។

       តើគម្រោងណាខ្លះបានពន្យាពេលសាងសង់ គិតចាប់តាំងពីវិបត្តិជំងឺកូវីដ១៩ ដែលបានចាប់ផ្តើមកាលពីឆ្នាំ២០២០ រហូតមកទល់ពេលនេះ។

1 Gold Tower42ជាន់
វាជាLand Markដំបូងគេសម្រាប់រាជធានីភ្នំពេញ ប៉ុន្តែជាអកុ​សលគំរោងនេះ បានជាប់គាំងអស់រយៈពេលជាង១ទសវត្សរ៍ បើទោះ​បីជាមានក្រុមហ៊ុនចិនថ្មីមួយបានចូលរួមសហការ និងសាងសង់ក្តី ប៉ុន្តែការពន្យាពេលម្តងហើយម្តងទៀត បានធ្វើឲ្យអ្នកគ្រប់គ្នាអស់សង្ឃឹម។
គំរោងនេះត្រូវបានវិនិយោគដោយក្រុមហ៊ុនយក្សកូរ៉េខាងត្បូងឈ្មោះYUNWOO ដែលគ្រោងចំណាយទុនវិនិយោគប្រមាណ៣០០លានដុល្លារអាមេរិក។

2 គំរោងThai Boon Rong Twin Tower

វានឹងជាមោទកភាពសម្រាប់កម្ពុជា ប្រសិនជាគម្រោងអាគារភ្លោះខ្ពស់ជាងគេ លើពិភពលោកនេះលេចឡើង (បើគិតតែអាគារភ្លោះ)​ប៉ុន្តែជាងមួយទសវត្ស​រ៍ហើយ ដែលគំរោងនេះមិនបានសាងសង់ ក្រៅតែពីការបញ្ចប់ការធ្វើតេស្តដី និងការសាងសង់ជញ្ជាំងទប់ដី និងការព័ទ្ឋតរបងទុក។អាគារពាណិជ្ជកម្មភ្លោះ លំដាប់ពិភពលោកនេះ គ្រោងចំណាយទុនសាងសង់ប្រមាណ៣០០០លានដុល្លារអាមេរិក ដែលមានកំពស់១៣៣ជាន់ ស្មើនឹងកំពស់៥៦៨ម៉ែត្រ។

ទោះជាយ៉ាងណា លោកសាស្រ្តាចារ្យទួស សាភឿនប្រធានក្រុមស្ថាបត្យកម្មគូសប្លង់អាគារនេះ បានមានប្រសាសន៍ឲ្យដឹងនាពេលថ្មីៗនេះថា ការសាងសង់អាគារនេះ នឹងចាប់ផ្តើមនៅពេលខាងមុខ ដោយក្រុមហ៊ុនមិនបោះបង់ចោលគំរោងនេះទេ ព្រោះបច្ចុប្បន្នដែករាប់រយតោន ដែលអាចធន់នឹងច្រេះ ដែលមានរ៉េស៊ីស្តង់ខ្ពស់ បានដឹកមកទុកស្តុកនៅឃ្លាំងរបស់ក្រុមហ៊ុនរួចហើយ។

3 អាគារNaga Worldទី៣
គំរោងសាងសង់អាគារកប់ពពក ដែលស្ថិតនៅតំបន់បូឌីញចាស់ ដែលក្រុមហ៊ុនNaga Corpអះអាងថា នឹងជាអាគារខ្ពស់ជាងគេនៅរាជធានីភ្នំពេញ បាននិងកំពុងសាងសង់ ប៉ុន្តែការបញ្ចប់អាគារនេះទាំងមូល នឹងពន្យាពេលរហូតដល់ឆ្នាំ២០២៩ខាងមុខ។ម្ចាស់ក្រុមហ៊ុនNaga Corp បានក្លាយជាមហាសេដ្ឋីលំដាប់កំពូ​លម្នាក់ ដោយសារមួយផ្នែកទទួលបានអាជ្ញាប័ណ្ណ កាស៊ីណូផ្តាច់មុខតែមួយនៅរាជធានីភ្នំពេញ។

តាមផែនការក្រុមហ៊ុនNaga Corpគ្រោងបោះទុនវិនិយោគប្រមាណ៣០០០លានដុល្លារ ដើម្បីសាងសង់មជ្ឈមណ្ឌលពាណិជ្ជ លំនៅដ្ឋានចម្រុះ ដែលរួមមានសណ្ឋាគារប្រណីត កាស៊ីណូលំដាប់ផ្កាយ៥ ខុនដូ អាផាតម៉ិន និងមជ្ឈមណ្ឌលកំសាន្តលំដាប់ពិភពលោកដំបូងគេនៅរាជធានីភ្នំពេញ។

4 The Mesong
គំរោងខុនដូប្រណីតខ្ពស់ជាងគេ ដែលមានទីតាំងនៅទីក្រុងកោះពេជ្រ ដែលគ្រោងសាងសង់កំពស់៧១ជាន់ ក៏បានផ្អាកការសាងសង់ផងដែរ បន្ទាប់ពីក្រុមហ៊ុនបានមានជម្លោះ ជាមួយក្រុមហ៊ុនសាងសង់គ្រឹះរបស់អាគារនេះ។គំរោងនេះ ត្រូវបានវិនិយោគដោយក្រុមហ៊ុនWonder Capital ដែលមានមូលដ្ឋាននៅទីក្រុងហុងកុង។នៅពេលសាងសង់បញ្ចប់ Mesong Tower គឺជាគម្រោងសាងសង់អគារខ្ពស់ ក្នុងចំណោមអាគារខ្ពស់ៗនៅកម្ពុជា ដែលមានកម្ពស់២៥២ម៉ែត្រ ដោយស្មើនឹង៧១ជាន់។

ទោះជាយ៉ាងណា មានព័ត៌មានល្អពីគំរោងនេះ កាលពីពេលថ្មីៗនេះ ដោយសមាជិកម្នាក់មកពីគ្រួសារមហាសេដ្ឋី នៅប្រទេសថៃកំពុងចាប់ដៃគូ ជាមួយក្រុមហ៊ុនគ្រប់គ្រងទ្រព្យសម្បត្តិ Wonder Capital Group ដែលមានមូលដ្ឋាននៅទីក្រុងហុងកុង ដើម្បីបោះទុនវិនិយោគលើទីផ្សារអចលនទ្រព្យនៅតំបន់អាស៊ីអាគ្នេយ៍។

5 Sunwah Peal
បន្ទាប់ពីពន្យាពេលអស់រយៈពេលជាច្រើនទសវត្សរ៍ ទីបំផុតក្រុមហ៊ុនSUNWAH បានសម្រេចចិត្តសាងសង់អាគារSUNWAH Peal ដែលមានទីតាំង ស្ថិតនៅទល់មុខនឹងNaga World1 ប៉ុន្តែនៅទីបំផុតគំរោងនេះ បានពន្យាពេលសាងសង់ជាថ្មី បន្ទាប់ពីបានចាប់ផ្តើមសកម្មភាពខួងគ្រឹះមួយរយៈខ្លី។
SUNWAH Peal គ្រោងចំណាយទុនវិនិយោគ ប្រមាណ១៥០លាន​ដុល្លារ ដើម្បីសាងសង់មជ្ឈមណ្ឌលពាណិជ្ជកម្ម កំពស់៤៥ជាន់ ស្មើនឹងកំពស់ជាង២០០ម៉ែត្ររបស់ខ្លួន។

6 SINO Plaza

អគារពាណិជ្ជកម្មចម្រុះរួមមាន ការិយាល័យ និងខុនដូ មជ្ឈ​មណ្ឌលកំសាន្តលំដាប់អន្តរជាតិ ទល់មុខផ្សារបឹងត្របែក ដែលមានឈ្មោះថាSino PLaza ត្រូវបានជាប់គាំងមិនមានសកម្មភាពសាងសងបន្តទៀតឡើយ អស់រយៈពេលជាច្រើនឆ្នាំមកនេះ។គម្រោងនេះចាប់ផ្តើមសាងសង់ កាលពីដើមឆ្នាំ២០១៥ ហើយផែនការរបស់ក្រុមហ៊ុន គ្រោងនឹងបញ្ចប់គម្រោងនេះនៅឆ្នាំ២០១៨ ។
គម្រោង Sino Plaza Sino Plaza ដែលមានចំនួន៤អាគារ ស្ថិតនៅភាគខាងត្បូង រាជធានីភ្នំពេញ ជិតផ្សារបឹងត្របែកផ្លាហ្សា ក្នុងភូមិសាស្ត្រ សង្កាត់បឹងត្របែក ខណ្ឌចំការមន រាជធានីភ្នំពេញ។

SINO Plaza មានអគារសរុបចំនួន៤ ក្នុងនោះអគារអាផាតម៉ិន៤២ជាន់ចំនួន២ អគារអាគារ៣៦ជាន់ចំនួន១ សម្រាប់ប្រើប្រាស់ជាសណ្ឋាគារផ្កាយប្រាំ និងរោងភាពយន្ត និងអគារកំពស់៤៣ជាន់១ ដែលនឹងប្រើប្រាស់សម្រាប់ ការិយាល័យ និងខុនដូ៕

 ដោយៈ គង់ សូរិយា

 ភ្នំពេញៈ ការកសាងមូលដ្ឋាន និងរចនាសម្ព័ន្ឋសេដ្ឋកិច្ចរ៉ឹងមាំពីរដ្ឋាភិបាល នឹងជួយលើកស្ទួយវិស័យអចលនទ្រព្យ និងសំណង់នាពេលអនាគត។

អ្នកវិភាគទីផ្សារអចលនទ្រព្យ លោកប៉ូ អ៊ាវគង់ប្រធា​នក្រុមហ៊ុនAdvance Real Estateបានមានប្រសាសន៍ឲ្យដឹងតាមបណ្តាញតេឡេក្រាមកាលពីថ្ងៃទី១៤ កុម្ភៈថា ការយកចិត្តទុកដា​ក់របស់រដ្ឋាភិបាល លើការកសាងភាពធន់ផ្នែកសេដ្ឋកិច្ច ដូចជាការកសា​ងហេដ្ឋារចនាសម្ព័ន្ឋ ការលើកលែងពន្ឋ និងពន្យាការបង់ពន្ឋលើទិដ្ឋ​ភាពមួយចំនួន និងការគៀងគរទុនក្នុងស្រុក នឹងជម្រុញ​សេដ្ឋកិច្ចមានកំណើនប្រកបដោយនិរន្តរភាព។លោកបន្តថា “ការផ្តល់មូលដ្ឋានច្បាប់ បទដ្ឋានគតិយុត្តិនានា ដូចជាការកាត់បន្ថយការិយាធិបតេយ្យ ការបណ្តុះបណ្តាលធនធានមនុស្ស ដល់យុវជន១,៥នាក់ ច្បាប់វិនិយោគថ្មី និងយន្តការលើកទឹកចិត្តជាច្រើន នឹងជួយឲ្យសេដ្ឋកិច្ចមានភាពរ៉ឹងមាំ”។

លោកបន្តថា លើសពីនេះ រដ្ឋាភិបាលបាននិងកំពុងទាក់ទាញការវិនិយោគពីបរទេស និងការចចារកិច្ចព្រមព្រៀងពាណិជ្ជកម្មសេរី ជាមួយប្រទេសជាច្រើនទៀត ដែលនេះសុទ្ឋតែជាមូលដ្ឋានជួយបង្កើនលំហូរពាណិជ្ជកម្មរបស់កម្ពុជាបន្ថែមទៀត ប៉ុន្តែគោលនយោ​បាយដាក់ចេញថ្មីៗ មិនបានផ្តល់ផលត្រលប់ភ្លាមៗនោះទេ វាត្រូវការពេលវេលាបន្ថែមទៀត។កម្ពុជាបានចុះកិច្ចព្រមព្រៀង ពាណិជ្ជកម្មឋសេរីជាមួយចិន ជា​មួយប្រទេសកូរ៉េ និងបានចូលជាសមាជិកដៃគូពាណិជ្ជកម្មគ្រប់ជ្រុងជ្រោយតំបន់(RCEP) ដែលត្រូវបានអ្នកជំនាញ ​និងអ្នកវិភាគនានាបានមើលឃើញភាពវិជ្ជមាន និងកម្ពុជាអាចក្តោបបាននូវកាលានុវត្តន៍ភាពទាំងនោះ។

លោកប៉ូ អ៊ាវគង់បានបន្តថា វិស័យពាក់ព័ន្ឋជាច្រើន គឺជាសរសរគ្រឹះ ដែលនឹងគាំទ្រវិស័យសំណង់ និងអចលនទ្រព្យឲ្យមានសន្ទុះនៅឆ្នាំបន្តបន្ទាប់នាពេលខាងមុខ ប៉ុន្តែជាមួយគ្នានេះ វាទាមទារឲ្យមានការកែប្រែនូវចំណុចមួយចំនួន សម្រាប់ទស្សនវិស័យរយៈពេលវែង ហើយការដាក់បញ្ចេញលំហូរសាច់ប្រាក់នានា នឹងមិនអាចដោះស្រាយបានប្រកបដោយនិរន្តរភាពផងដែរ។

លោកបន្តថា ជាមួយគ្នានេះ ម្ចាស់អចលនទ្រព្យនានា ត្រូវទទួលស្គាល់ការពិតថា វាមិនមានបញ្ហាតែកម្ពុជាទេ ប៉ុន្តែបញ្ហាទាំងនោះបានកើតមាននៅតាមបណ្តាប្រទេសនានា នៅលើពិភពលោកផងដែរ ដែលទាមទារឲ្យម្ចាស់អចលនទ្រព្យទទួលយកការពិត និងដោះស្រា​យវាតាមស្ថានភាព ព្រោះក្នុងអាជីវកម្មនានា តែងតែមានពេលឡើងនិងចុះ ហើយតម្លៃត្រូវទទួលយកការពិត បើមិនដូច្នេះផលប៉ះពាល់ នឹងបន្តអូសបន្លាយបន្តទៀត។

លោកប៉ូ អ៊ាវគង់បានបញ្ជាក់ថា “ការងារទិញលក់ ត្រូវធ្វើឲ្យស្របតាមឥរិយាបទទីផ្សារ ដែលបើឡើងគឺត្រូវឡើង បើទីផ្សារចុះ ត្រូវលក់ចុះតាមទីផ្សារ បើ​មិនដូច្នេះវានឹងធ្វើឲ្យទីផ្សារ មានសភាពប្រទាញប្រទង់គ្នា”៕

ដោយៈ គង់ សូរិយា

        ភ្នំពេញៈ ការប្រមូលចំណូលថវិការដ្ឋ ទាំងចំណូលសារពើពន្ធ និងចំណូលមិនមែនសារពើពន្ធ បានចាប់​ផ្តើម​មានសន្ទុះឡើងវិញ បន្ទាប់ពីវិបត្តិនៃជំងឺកូវីដ-១៩ ខណៈរំហូរចំណាយមានទិសដៅវិជ្ជមា​នបាន​ឆ្លុះ​បញ្ចាំងអំពីប្រសិទ្ធភាព នៃការដាក់ចេញនូវវិធានការចាំបាច់នានារបស់រាជរដ្ឋាភិបាល។

លោកអគ្គបណ្ឌិសភាចារ្យ អូន ព័ន្ធមុនីរ័ត្ន ឧបនាយករដ្ឋមន្តី រដ្ឋមន្ត្រីក្រសួងសេដ្ឋកិច្ច លើក​ឡើង​នៅ​ក្នុងពិធីបិទកិច្ចប្រជុំត្រួត ពិនិត្យប្រចាំឆ្នាំ ២០២៣ កម្មវិធីកែ​ទម្រង់​ការ​គ្រប់គ្រង​ហិរញ្ញ​វត្ថុ​សាធារណៈ ដំណាក់កាលទី៤ នៅថ្ងៃទី ១៤ ខែ កុម្ភៈ ឆ្នាំ ២០២៤ នេះថា ជុំវិញការ​ពង្រឹង​ថវិកា​កម្មវិធី ក៏ដូចជាការកែលម្អប្រព័ន្ធគណនេយ្យសាធារណៈ និងប្រព័ន្ធសវនកម្ម និង​អធិការកិច្ច​ហិរញ្ញវត្ថុ ជាពិសេសការ ចាប់ផ្តើមដាក់ឲ្យអនុវត្តន៍ជាជំហានៗ នូវប្រព័ន្ធ​បច្ចេក​វិទ្យា​ព័ត៌មាន​ សម្រាប់​ការ​គ្រប់គ្រង់ហិរញ្ញវត្ថុសាធារណៈ។លោកបញ្ជាក់ថា សមិទ្ធផលនៃដំណាក់កាលទី៣ និងរួមបញ្ចូន​នូវ​យុទ្ធសាស្រ្ត​កែទម្រង់សំខាន់ៗ ដែលជាមូល​ដ្ឋាន​គ្រឹះ​នៃ​ការ​កសាង​ប្រព័ន្ធ​ថវិកា​ព័ត៌មាន​សមិទ្ធ​កម្ម​រួមាន​៖ យុទ្ធសាស្រ្ត នៃការកែទម្រង់ប្រព័ន្ធថវិកាជាតិ, យុទ្ធសាស្រ្តនៃ​ការ​កែទម្រង់​ថវិកា ​របស់​រដ្ឋបាល​ថ្នាក់​ក្រោមជាតិ យុទ្ធសាស្រ្តគៀគរចំណូលរយៈពេលមធ្យម យុទ្ធសាស្រ្តកែ​ទម្រង់​ប្រព័ន្ធ​លទ្ធកម្ម​សាធារណៈ យុទ្ធសាស្រ្តស្តីពីការការកែទម្រង់ប្រព័ន្ធគ្រប់គ្រង់វិនិយោគសារធារណៈ និង​យុទ្ធ​សាស្រ្តកែទម្រង់ប្រព័ន្ធគណនេយ្យជាដើម។

ក្រៅពីនេះ ច្បាប់គោលសំខាន់ៗសម្រាប់ប្រើជាមូលដ្ឋាន ក្នុងការធ្វើឱ្យប្រសើរឡើង នៃ​ការគ្រប់គ្រង់​ហិរញ្ញវត្ថុ​សាធារណៈ ក៏ត្រូវបាន អនុម័ត និងដាក់ឲ្យប្រើប្រាស់ដូចជា៖ ច្បាប់ស្តីពីប្រព័ន្ធ​ហិរញ្ញ​វត្ថុ​សាធារណៈ​ថ្មី​ឆ្នាំ ២០២៣, ច្បាប់ស្តីពីសារពើរព័ន្ធឆ្នាំ ២០២៣, ច្បាប់ស្តីពី ការគ្រប់គ្រង​ ចំណូល​មិនមែន​សារ​ពើពន្ធឆ្នាំ២០២២។ ច្បាប់ស្តីពីការគ្រប់គ្រងការប្រើប្រាស់ និងការចាត់ចែង​លើទ្រព្យ​សម្បត្តិ​រដ្ឋ​ឆ្នាំ២០២០ ច្បាប់ស្តីពីលទ្ធកម្មសាធារណៈឆ្នាំ២០២៣ ច្បាប់ស្តីពីមូលបត្រ​រដ្ឋ​ឆ្នាំ​២០២០ និងច្បាប់ស្តីពីភាពដៃគូររវាងរដ្ឋ និងឯកជនឆ្នាំ ២០២១។

លោកឧបនាយករដ្ឋមន្រ្តីអូន ព័ន្ឋមុនីរ័ត្នបានបន្តថា ផ្អែកលើសមិទ្ធផល ក្នុងរយៈពេលជិត២០ឆ្នាំកន្លងមកនេះ រាជ​រដ្ឋាភិបាលមានមូលដ្ឋានគ្រប់​គ្រាន់ ក្នុងការចាប់ផ្តើមអនុវត្តន៍ដំណាក់កាលទី៤ ផ្តោត​លើ​គណនេយ្យ​ភាព​សមិទ្ធកម្ម ដែលសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី បាន​ប្រកាស​ដាក់ឲ្យអនុវត្តក្នុងឆ្នាំ ២០២៣។

លោកបញ្ជាក់ថា ឆ្នាំដំបូងនៃការអនុវត្តដំណាក់កាលទី៤នេះ គឺ​ជា​ឆ្នាំ​ពិសេស ព្រោះថាវាជាឆ្នាំដែលកម្ពុជា ត្រូវរៀបចំការបោះឆ្នោត, ក្នុងបរិការណ៍នេះ ការ​អនុវត្តកា​រងា​រ​កែ​ទម្រង់ ​មានលក្ខណៈបត់បែន និងទន់ភ្លន់ តែម៉ឺងម៉ាត់។ ជាក់ស្តែងការអនុវត្ត​យុទ្ធសាស្ត្រ​កៀរ​គរ​ចំណូល​រយៈ​ពេលមធ្យម បានធ្វើឱ្យចំណូលជាតិ កើនឡើងជាលំដាប់ ជាការពិតវិបត្តិនៃជំងឺកូវីដ-១៩ បានបន្ទុចបង្អាក់មួយចំនួនដល់កិច្ចប្រឹប្រែងនៃការប្រមូលចំណូល ក្នុងរយៈពេល​ប៉ុន្មាន​ឆ្នាំ​ចុងក្រោ​យនេះ តែយ៉ាងណាក៏ដោយការ ប្រមូលចំណូលថវិការដ្ឋ ទាំងចំណូលសារពើពន្ធ និង​ចំណូល​មិន​មែនសារពើពន្ធ បានចាប់ផ្តើមមានសន្ទុះឡើងវិញ បន្ទាប់ពីវិបត្តិនៃជំងឺកូវីដ-១៩។

​ចាប់ពីឆ្នាំ ២០១៣ ដល់ឆ្នាំ ២០២៣ រំហូរចំណាយមានទិសដៅវិជ្ជមាន ដែលឆ្លុះបញ្ចាំង​អំពី​ប្រសិទ្ធ​ភាព​ជាបណ្តើរៗ នៃការដាក់ចេញនូវវិធានការចាំបាច់ ក្នុងការកែលម្អការអនុវត្តថវិកា ខណៈផ្នែកចំណា​យ ការរៀបចំថវិកាតាមកម្មវិធីបានផ្ដល់លទ្ធភាព ក្នុង​ការ​បង្កើន​ប្រសិ​ទ្ធ​ភាពនៃ​ការ​វិភាជន៍ថវិកាកាន់តែចំគោលដៅ៕

ដោយៈ គង់ សូរិយា

        ភ្នំពេញៈ រដ្ឋមន្រ្តីពីររូបបានសន្យាធ្វើការរួមគ្នា ក្នុងការកែលំអរសោភ័ណភាពរាជធានីភ្នំពេញ តាមរយៈការរៀបចំហេដ្ឋារចនាសម្ព័ន្ឋនានា។

កាលពីថ្ងៃទី១៣ ខែកុម្ភៈ ឆ្នាំ២០២៤ លោកប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមកិច្ចប្រជុំអន្តរក្រសួងស្តីពី ការរៀបចំហេដ្ឋារចនាសម្ព័ន្ធក្នុងរាជធានីភ្នំពេញ ក្រោមកិច្ចដឹកនាំរបស់លោកសាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

កិច្ចប្រជុំបានរៀបចំនៅទីស្តីការ ក្រសួងរៀបចំដែនដី នគរូបនីយកម្ម និងសំណង់ ដោយមានការអញ្ជើញចូលរួមពីសំណាក់មន្រ្តីពាក់ព័ន្ឋជាច្រើន។ក្នុងកិច្ចប្រជុំនេះ បានធ្វើឡើងតាមរបៀបវារៈដែលបានគ្រោងទុក ដោយមានការធ្វើបទបង្ហាញ អំពីគម្រោងសិក្សាមួយចំនួន លើការងាររៀបចំហេដ្ឋារចនាសម្ព័ន្ធក្នុងរាជធានីភ្នំពេញ។

ថ្លែងក្នុងឱកាសនោះ លោកឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានលើកឡើងថា ការសិក្សាលើការងាររៀបចំហេដ្ឋារចនាសម្ព័ន្ធ ក្នុងរាជធានីភ្នំពេញនេះ គឺធ្វើឡើងក្នុងគោលបំណង ដើម្បីកែប្រែមុខមាត់រាជធានីរបស់យើង ឱ្យកាន់តែមានភាពស្រស់បំព្រង លើកកម្ពស់ផាសុខភាព ក្នុងការរស់នៅ បង្កភាពងាយស្រួល ក្នុងការប្រកបរបរចិញ្ចឹមជីវិត និងទាក់ទាញការវិនិយោគ។

លោកបន្តថា “អ្វីដែលត្រូវផ្តោត គឺធ្វើឱ្យគុណភាពជីវិត និងបែបបទនៃការរស់នៅ របស់ប្រជាពលរដ្ឋក្នុងរាជធានី កាន់តែមានភាពប្រសើរឡើងពីមួយកម្រិតទៅមួយកម្រិត ស្របទៅតាមចក្ខុវិស័យកម្ពុជាឆ្នាំ២០៥០ របស់រាជរដ្ឋាភិបាល ដែលមានបំណងប្រែក្លាយកម្ពុជា ឱ្យទៅជាប្រទេសមានចំណូលខ្ពស់”។

លោកសាយ សំអាល់បានបន្ថែមថា ប្រសិនបើគម្រោងរៀបចំហេដ្ឋារចនាសម្ព័ន្ធទាំងអស់នេះ សម្រេចទៅបានតាមផែនការដែលគ្រោងទុក នោះរំពឹងថានឹងធ្វើឱ្យប្រជាពលរដ្ឋ ក្នុងរាជធានីភ្នំពេញ មានមោទកភាព ប្រាប់ទៅកាន់ពិភពលោកថា “យើងខ្ញុំជាអ្នករស់នៅទីក្រុងភ្នំពេញ រាជធានីដ៏ស្រស់បំព្រង នៃព្រះរាជាណាចក្រកម្ពុជា”។

ទន្ទឹមនឹងនេះ លោកប៉េង ពោធ៍នា ​តាងនាមឱ្យថ្នាក់ដឹកនាំ និងមន្ត្រីជំនាញបច្ចេកទេសពាក់ព័ន្ធ នៃក្រសួងសាធារណការ និងដឹកជញ្ជូ​ន ក៏បានបង្ហាញនូវឆន្ទៈ និងគោលជំហរយ៉ាងមុតមាំ ក្នុងការចូលរួមពួតដៃជាមួយក្រសួងរៀបចំដែនដី នគរូបនីយកម្ម និងសំណង់ ទាំងក្នុងទិដ្ឋភាពបច្ចេកទេស និងស្មារតី ដើម្បីរុញច្រានគម្រោងការងារនេះឱ្យលេចរូបរាងឡើង សំដៅធ្វើឱ្យភ្នំពេញ ក្លាយជារាជធានីដែលមានភាពទាក់ទាញ និងប្រកបដោយមោទកភាពជាតិផងដែរ៕