ដោយៈ គង់ សូរិយា

ភ្នំពេញៈ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា បានដឹកនាំកិច្ចប្រជុំពិនិត្យពិភាក្សា ​លើ​សេចក្ដីព្រាងកិច្ចព្រមព្រៀងក្របខណ្ឌ (Framework Agreement) នៃគម្រោងផ្លូវ​នាវា​ចរណ៍ និងប្រព័ន្ធភស្ដុភារកម្មទន្លេបាសាក់ “ព្រែកជីកហ្វូណនតេជោ” ជាមួយក្រុមហ៊ុន​សា​ជីវកម្មស្ពាន និងថ្នល់ចិន(CRBC) ដឹកនាំដោយលោក Zhou Yong។

ក្នុងពិធីនោះ ក៏មានការអញ្ជើញចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងថ្នាក់ដឹកនាំស្ថាប័ន នៃគណៈកម្មការអន្តរក្រសួង និងមន្ត្រីបច្ចេកទេស​ពី​ក្រុមហ៊ុនសាជីវកម្មស្ពាន និងថ្នល់ចិន មួយចំនួនផងដែរ។

សេចក្ដីព្រាងកិច្ចព្រមព្រៀងក្របខណ្ឌ (FA) ដែលកំពុងស្ថិតក្នុងការពិនិត្យកែសម្រួលនេះ បន្ទាប់​ពី​បញ្ចប់ការពិនិត្យ និងចុះហត្ថលេខារួចរាល់ នឹងកំណត់បានកាន់តែច្បាស់​ពីសក្ដា​នុពល​ នៃគម្រោងព្រែកជីកហ្វូណនតេជោ តាមរយៈការសិក្សាឱ្យកាន់តែស៊ីជម្រៅ​លើគ្រប់​ផ្នែក​ពាក់ព័ន្ធទាំងអស់ ទាំងផលចំណេញផ្នែកសេដ្ឋកិច្ច និងសង្គម។គម្រោងផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់​ ត្រូវបាន​ប្រសិទ្ធ​នាម​ថាគម្រោង  “ព្រែកជីកហ្វូណនតេជោ” នាសម័យប្រជុំ​ពេញ​អង្គ​គណៈ​រដ្ឋមន្ត្រីនីតិ​កាល​ទី៦ នៃរដ្ឋសភា កាលពីថ្ងៃទី១៩ ខែឧសភា ឆ្នាំ២០២៣ កន្លងទៅ និងបន្តមកនៅថ្ងៃទី៧ ខែមិថុនា ឆ្នាំ២០២៣ រដ្ឋាភិបាលបានសម្រេចបង្កើត គណៈកម្មការអន្តរក្រសួង ដើម្បីដំណើរ​ការ​អនុវត្តគម្រោងនេះផងដែរ។

គម្រោងព្រែកជីកហ្វូណន-តេជោ ធ្វើឡើងដើម្បីពង្រីកវិសាលភាព​នៃការ​ប្រើប្រាស់​សក្តានុពល លើការដឹកជញ្ជូនតាមផ្លូវទឹក សំដៅចូលរួមលើកកម្ពស់​សកម្ម​ភាព​សេដ្ឋកិច្ច -សង្គមឱ្យកាន់តែមានការរីកចម្រើនឈានទៅមុខមួយកម្រិតថែមទៀត និងផ្តល់ជាដំណោះស្រាយសមស្របលើបញ្ហាប្រឈម និងឧបសគ្គនានា នៃវិស័យដឹកជញ្ជូនតាមផ្លូវទឹកដែលយើងបាន និងកំពុងជួបប្រទះនាពេលបច្ចុប្បន្ន។តាមការ​សិក្សា បានបង្ហាញថា ផ្លូវទឹកព្រែកជីកហ្វូណន-តេជោ មានប្រវែង១៨០​គីឡូម៉ែត្រ ចាប់ពីព្រែកតាកែវនៃ​ទន្លេមេគង្គ ឆ្លងកាត់តាមព្រែកតាឯកនៃទន្លេ​បាសាក់ រួចចូលតាមព្រែកតាហ៊ីង នៃទន្លេ​បាសាក់ ស្រុកកោះធំ និងបន្តរហូត​ដល់សមុទ្រខេត្តកែប ដោយឆ្លងកាត់​ខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ១.៦លាននាក់ រស់នៅអមសងខាងផ្លូវទឹក។

ផ្លូវទឹកនេះ មានទទឹងមុខកាត់ផ្នែកខាងលើ ប្រវែង១០០ម៉ែត្រ និងមុខកាត់ផ្នែកខាង​ក្រោម​ប្រមាណ៨០ម៉ែត្រ និងជម្រៅទឹកប្រមា​ណ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ចំនួន២គន្លង អាច​ចេញ-ចូល និងជៀសគ្នាបានដោយសុវត្ថិភាព។

គម្រោងនេះ នឹងសាងសង់សន្ទះ ផ្លូវនាវាចរណ៍ចំនួន៣កន្លែង, សាងសង់ស្ពាន​ចំនួន១១កន្លែង សាងសង់ផ្លូវអមសាងខាងប្រវែង ២០៨គីឡូម៉ែត្រ និងមាន​បំពាក់​សញ្ញាជំនួយនាវាចរណ៍ និងហេដ្ឋារចនាសម្ព័ន្ធឆ្លងកាត់​ទន្លេផ្សេងៗ​ទៀតផង​ដែរ។ ការសាងសង់គម្រោងផ្លូវទឹកថ្មីនេះ ត្រូវបានប៉ាន់ស្មានថា នឹងចំណាយ​ទុន​វិនិ​យោគ១,៧០០លានដុល្លារអាម៉េរិក និងរយៈពេលសាងសង់ប្រមាណ៤ឆ្នាំ។

គម្រោងផ្លូវនាវាចរណ៍ និងប្រព័ន្ធភស្តុភារកម្មទន្លេបាសាក់ នឹងផ្តល់អត្ថប្រយោជន៍​ជាច្រើនរួមមានដូចជា ទី១ ការកាត់បន្ថយរយៈពេល ចម្ងាយ និងតម្លៃនៃការដឹកជញ្ជូន​នាពេលបច្ចុប្បន្ន ទី២ ការបង្កើតតំបន់ពាណិជ្ជកម្ម និងមជ្ឈមណ្ឌលភស្តុភារកម្ម ទី៣ ការអភិវឌ្ឍផែរណបថ្មីៗជាច្រើន ទី៤ ការពង្រីកតំបន់អភិវឌ្ឍន៍កសិកម្ម ធារាសាស្រ្ត វារីវប្បកម្ម និងចិញ្ចឹមសត្វ ទី៥ ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤របស់កម្ពុជា និងទី៦ ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផេ្សងទៀត ការជំរុញការអភិវឌ្ឍទីក្រុង និងនគរូបនីយកម្ម និងការជំរុញការរីកចម្រើនផ្នែកអចលនទ្រព្យ៕

ដោយ: គង់ លាងហួរ
អន្តរជាតិ: បណ្តាប្រទេសដែលមានសេដ្ឋកិច្ចកំពុងរីកចម្រើន ប្រឈមភាពច្របូកច្របល់ពីគ្រប់ទិសទី ដូចជាការលក់ចេញប័ណ្ណរតនាគារអាមេរិកនាពេលថ្មីៗនេះ និងបញ្ហាសេដ្ឋកិច្ចចិនដែលកំពុងធ្លាក់ចុះ ខណៈធនាគារ Fed ប្រហែលជាមិនទាន់ឈានដល់ទីបញ្ចប់នៃការដំឡើងអត្រាការប្រាក់របស់ខ្លួននៅឡើយ។

កិច្ចខិតខំប្រឹងប្រែងរៀបចំរចនាសម្ព័ន្ធឡើងវិញសម្រាប់បណ្តាប្រទេសដែលខកខានទូទាត់សងបំណុល អាចឈានដល់របកគំហើញដ៏សំខាន់មួយ មុនដំណាច់ឆ្នាំនេះ ស្របពេលដែលកិច្ចពិភាក្សាបន្ត។ទន្ទឹមគ្នានេះ អ្នកបង្កើតគោលនយោបាយ និងអ្នកគ្រប់គ្រងទ្រព្យសម្បត្តិគ្រោងនឹងជួបប្រមូលផ្តុំគ្នាក្នុងកិច្ចប្រជុំប្រចាំឆ្នាំរបស់ធនាគារពិភពលោក និងមូលនិធិរូបិយវត្ថុអន្តរជាតិនៅទីក្រុង Marrakech ប្រទេសម៉ារ៉ុក នៅសប្តាហ៍នេះ។ខាងក្រោមនេះគឺជាបញ្ហាសំខាន់ៗ ដែលនឹងត្រូវលើកមកពិភាក្សានៅក្នុងកិច្ចប្រជុំប្រចាំឆ្នាំរបស់ធនាគារពិភពលោក និងមូលនិធិរូបិយវត្ថុអន្តរជាតិ:

ទី១/ បញ្ហានៅប្រទេសចិន
ការវិនិយោគ ដែលជាប់ផុងបំណុលរបស់ប្រទេសចិន ក្នុងវិស័យហេដ្ឋារចនាសម្ព័ន្ធ និងអចលនទ្រព្យបានកើនឡើងដល់កម្រិតខ្ពស់បំផុតហើយការនាំចេញក៏កំពុងធ្លាក់ចុះស្របតាមសេដ្ឋកិច្ចពិភពលោក។ តើការធ្លាក់ចុះនៃសេដ្ឋកិច្ចចិននឹងជះផលប៉ះពាល់ដល់ទីផ្សារដែលកំពុងរីកចម្រើនផ្សេងទៀតយ៉ាងណា នៅតែជាសំណួរដែលមិនទាន់មានចម្លើយសម្រាប់អ្នកវិនិយោគ។

ទី២/ ការផ្តល់ហិរញ្ញប្បទានដល់អ៊ុយក្រែន
អ៊ុយក្រែន ត្រូវសម្រេចចិត្តថាត្រូវធ្វើអ្វីជាមួយនឹងមូលបត្របំណុលអន្តរជាតិ ដែលមានតម្លៃ២០ពាន់លានដុល្លាររបស់ខ្លួន ដោយសារការបង្កកលើការទូទាត់មូលបត្រទាំងនេះបានផុតណត់ក្នុងខែសីហា។

ទន្ទឹមនឹងនេះ ទំហំ និងរូបរាងនៃជំនួយអន្តរជាតិសម្រាប់អ៊ុយក្រែនក្នុងឆ្នាំ២០២៤ ស្ថិតក្នុងភាពមិនច្បាស់លាស់ ហើយច្បាប់ចំណាយរបស់សភាអាមេរិក ដែលមិនរួមបញ្ចូលជំនួយសម្រាប់ទីក្រុងគៀវបានផ្តល់នូវភាពមិនច្បាស់លាស់បន្ថែមទៀត។

ទី៣/ បញ្ហាបំណុល
កិច្ចព្រមព្រៀងបំណុលសម្រាប់បណ្តាប្រទេសដែលខកខានទូទាត់សងត្រូវបានរំពឹងថា នឹងសម្រេចបានវឌ្ឍនភាពនៅក្នុងកិច្ចប្រជុំ នៅទីក្រុង Marrakech ព្រោះថាការប្រជុំដោយផ្ទាល់រវាងម្ចាស់បំណុល និងមន្ត្រីរដ្ឋាភិបាលអាចផ្តល់លទ្ធផលជោគជ័យ។

ទី៤/ ការ អភិវឌ្ឍ កំណែទម្រង់
ធនាគារពិភពលោក IMF និងធនាគារអភិវឌ្ឍន៍ពហុភាគីផ្សេងទៀតកំពុងស្ថិតក្រោមសម្ពាធក្នុងការជំរុញការផ្តល់ប្រាក់កម្ចីដល់ប្រទេសក្រីក្រ ដើម្បីផ្តល់មូលនិធិដល់ការអភិវឌ្ឍន៍ និងដោះស្រាយការប្រែប្រួលអាកាសធាតុ៕

ដោយ: គង់ លាងហួរ
អន្តរជាតិ: យោងតាមការចុះផ្សាយដោយសារពត៌មាន Laotian Times បានឱ្យដឹងថា សេវារថភ្លើងដឹកទំនិញដែលតភ្ជាប់ពីទីក្រុងវៀងច័ន្ទ ប្រទេសឡាវ និងទីក្រុងសៀងហៃ ប្រទេសចិន ត្រូវបានបើកដាក់ឱ្យដំណើរការជាផ្លូវការកាលពីថ្ងៃទី៨ ខែតុលាកន្លងទៅថ្មីៗនេះ។

សេវាកម្មដឹកជញ្ជូននេះ ដែលតភ្ជាប់ផ្លូវដែកឡាវ-ចិន និងផ្លូវដែកសៀងហៃ-គុនមីង នឹងត្រូវបានដំណើរការតាមរយៈផ្លូវទាំងពីរនេះ។ រថភ្លើងតភ្ជាប់ពីទីក្រុងវៀងចន្ទន៍ទៅកាន់ទីក្រុងសៀងហៃនេះ បានដឹកជញ្ជូនទំនិញជាច្រើនប្រភេទ ដូចជាផ្លែឈើ និងកៅស៊ូពីតំបន់អាស៊ីអាគ្នេយ៍។ បន្ទាប់ពីធ្វើដំណើរពីរដ្ឋធានីវៀងចន្ទន៍ទៅដល់ទីក្រុងគុនមីង រថភ្លើងនេះបានបន្តធ្វើដំណើរទៅកាន់ទីក្រុងសៀងហៃពីស្ថានីយ Wangjiaying West ក្នុងក្រុងគុងមីង ដែលជារដ្ឋធានីនៃខេត្តYunnan របស់ប្រទេសចិន។ យោងតាមការិយាល័យព័ត៌មានក្រុមប្រឹក្សារដ្ឋនៃសាធារណៈរដ្ឋប្រជាមានិតចិនបានឱ្យដឹងថា ការធ្វើដំណើរទៅកាន់ទីក្រុងសៀងហៃត្រូវបានគេរំពឹងថានឹងចំណាយរយៈពេលចំនួន៨២ម៉ោង។

គម្រោងផ្លូវដែកឡាវ-ចិន គឺជាផ្នែកមួយនៃគំនិតផ្តួចផ្តើម “ខ្សែក្រវាត់ និងផ្លូវ” របស់ប្រទេសចិន ដែលមានគោលបំណងលើកកម្ពស់សមាហរណកម្មក្នុងតំបន់ ជំរុញពាណិជ្ជកម្ម និងជំរុញកំណើនសេដ្ឋកិច្ច ដោយតភ្ជាប់តំបន់អាស៊ីជាមួយតំបន់អាហ្វ្រិក និងអឺរ៉ុប តាមរយៈបណ្តាញផ្លូវគោក និងផ្លូវសមុទ្រ។

ចាប់តាំងពីបានបើកសម្ពោធដាក់ឱ្យដំណើរការកាលពីខែធ្នូ ឆ្នាំ២០២១ ខ្សែរថភ្លើងនេះបានជួយសម្រួលដល់ការដឹកជញ្ជូនទំនិញប្រមាណ២៧លានតោនទៅកាន់គោលដៅផ្សេងៗគ្នា រួមមានដូចជាប្រទេសឡាវ ថៃ វៀតណាម និងមីយ៉ាន់ម៉ា៕

ដោយៈ ជេស៊ីកា

        ភ្នំពេញៈ  “យុទ្ធសាស្រ្តជាតិលើកស្ទួយសេដ្ឋកិច្ចក្រៅប្រព័ន្ធ ជាគោលនយោបាយឈ្នះឈ្នះ”។ នេះជាប្រសាសន៍របស់សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជា។

ក្នុងរាជរដ្ឋាភិបាលអាណត្តិទី៧ សម្តេចធិបតីបានប្រកាសគោលការណ៍លើកលែង និងអនុគ្រោះពន្ធទាំង ៩ ចំណុចរបស់រាជរដ្ឋាភិបាល សម្រាប់បងប្អូនម្ចាស់អាជីវកម្ម នៅក្នុងដំណាក់កាលនៃការអភិវឌ្ឍន៍ដែលមានដូចជា ទី១. ការផ្តល់ការលើកលែង ដល់ការផាកពិន័យ និងបំណុលទាំងអស់ នៅក្នុងឆ្នាំ២០២៣ ដល់ឆ្នាំ ២០២៨ ចំពោះការមិនបានបំពេញអនុលោមភាពកន្លងមក ដើម្បីបើកច្រកឱ្យបងប្អូនបានចូលមក នៅក្នុងការប្រកបអាជីវកម្ម ក្នុងប្រព័ន្ធដោយមិនមានការព្រួយបារម្ភ ។

ទី២. ការផ្តល់ការលើកទឹកចិត្តផ្នែកពន្ធដារ សម្រាប់សហគ្រាសមីក្រូ ចំពោះការចុះបញ្ជីដោយស្ម័គ្រចិត្តនៅក្នុងឆ្នាំ ២០២៣ ដល់ ២០២៨ ដោយលើកលែងកម្រៃសេវាចុះបញ្ជីពន្ធដារ និងកម្រៃសេវាធ្វើបច្ចុប្បន្នភាព ។

ទី៣. ការផ្តល់ការលើកទឹកចិត្តផ្នែកពន្ធដារ សម្រាប់សហគ្រាសធនតូច ចំពោះការចុះបញ្ជីដោយស្ម័គ្រចិត្ត នៅក្នុងឆ្នាំ២០២៣ ដល់ ២០២៨ តាមរយៈការលើកលែងពិន័យទោសទន្ទ និងបំណុលពន្ធ ចំពោះការមិនបំពេញអនុលោមភាព កន្លងមកមុនការចុះបញ្ជី និងលើកលែងកម្រៃសេវាចុះបញ្ជីពន្ធដារ និងកម្រៃសេវាធ្វើបច្ចុប្បន្នភាពនៅពេលចុះបញ្ជី និងលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បរមាសម្រាប់២ឆ្នាំក្រោយការចុះបញ្ជី ។

ទី៤. ផ្តល់ការលើកទឹកចិត្តផ្នែកពន្ធដារ សម្រាប់សហគ្រាសធនមធ្យម ចំពោះការចុះបញ្ជី ដោយស្ម័គ្រចិត្តនៅក្នុងឆ្នាំ២០២៤ និង២០២៥ តាមរយៈការលើកលែងពិន័យទោសទន្ទ និងបំណុលពន្ធចំពោះការមិនបំពេញ អនុលោមភាពកន្លងមកមុនការចុះបញ្ជី និងលើកលែងពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល និងពន្ធអប្បរមាសម្រាប់២ឆ្នាំក្រោយការចុះបញ្ជី ។

ទី៥. ផ្តល់ការលើកទឹកចិត្តផ្នែកពន្ធដារ សម្រាប់សហគ្រាសធនតូច និងមធ្យមចំពោះការចុះបញ្ជី ដោយស្ម័គ្រចិត្តក្នុងឆ្នាំ២០២៤ ឬ ២០២៥ តាមរយៈ ការលើកលែងការបង់ពន្ធប៉ាតង់ សម្រាប់រយៈពេល ២ ឆ្នាំបន្ទាប់ពីទទួលបានការសម្រេចចុះបញ្ជី។

ទី៦. ការកាត់បន្ថយថ្លៃសេវា សម្រាប់ការផ្តល់សេចក្តីប្រកាសជូន​ដំណឹងបើកសហគ្រាស និងការចុះមជ្ឈការសៀវភៅបញ្ជីប្រចាំគ្រឹះស្ថាន និងសៀវភៅបើកប្រាក់ខែ សម្រាប់សហគ្រាសដែលមានចំនួនកម្មករ និយោជិតតិចជាង៨នាក់ ។

ទី៧.ពង្រឹងយន្តការស្វ័យត្រួតពិនិត្យ និងពង្រឹងការអនុវត្តយន្តការក្រុមអធិការកិច្ចអន្តរក្រសួងនៅថ្នាក់ជាតិ ដើម្បីធានាការចុះធ្វើអធិការកិច្ចរួមគ្នា ក្នុងពេលតែមួយ និងមួយលើកក្នុង១ឆ្នាំ។

ទី៨. រៀបចំការត្រួតពិនិត្យ និងធ្វើសេចក្តីរួមគ្នាក្នុងពេលតែមួយ និងតែមួយលើកក្នុង១ឆ្នាំ នៅថ្នាក់ក្រោមជាតិ សម្រាប់គ្រប់សហគ្រាសដែលបាន ឬមិនទាន់បានចុះបញ្ជី ឬស្នើសុំអញ្ញាប័ណ្ណឬលិខិតអនុញ្ញាតផ្សេងៗ ។

ទី៩. រៀបចំបង្កើតបទដ្ឋានគតិយុទ្ធក្របខណ្ឌ និងយន្តការដែលផ្តល់ស្ថានភាពស្របច្បាប់ ជាសហគ្រាសធនមីក្រូ និងតូចដោយភ្ជាប់ជាមួយអត្ថប្រយោជន៍ផ្សេងៗ ដូចជា ការលើកលែងការបង់ថ្លៃសេវារដ្ឋបាលនានា សម្រាប់រយៈពេល៥ឆ្នាំជាដើម៕

ដោយ: គង់ លាងហួរ

ភ្នំពេញ: លោក វ៉ាង ហ្ស៊ី (Wang Shi) ដែលជាមហាសេដ្ឋី និងស្ថាបនិកក្រុមហ៊ុនអចលនទ្រព្យដ៏ធំ នៅក្នុងប្រទេសចិនបានបំពេញដំណើរទស្សនកិច្ចមកកាន់កម្ពុជា កាលពីថ្ងៃទី១០ ខែតុលា ដើម្បីពិនិត្យ និងសិក្សាលទ្ធភាពនៃការវិនិយោគ។

វត្តមានរបស់មហាសេដ្ឋីចិនរូបនេះ អាចជាក្តីសង្ឃឹមថ្មីមួយទៀតសម្រាប់វិស័យអចលនទ្រព្យនៅកម្ពុជា បន្ទាប់ពីវិស័យនេះបានរងផលប៉ះពាល់ ដោយសារវិបត្តិជំងឺកូវីដ-១៩ និងឥទ្ធិពលសង្គ្រាមរវាងរុស្សី និងអ៊ុយក្រែន។

ប្រសិនបើមិនមានអ្វីប្រែប្រួលទេនោះ លោក វ៉ាង ហ្ស៊ីនឹងបំពេញទស្សនកិច្ចនៅកម្ពុជារយៈពេល៣ថ្ងៃ ពោលគឺចាប់ពីថ្ងៃទី១០ ដល់ទី១៣ ខែតុលាខាងមុខនេះ ហើយដំណើរទស្សនកិច្ចរបស់លោក នឹងរៀបចំឡើងនៅរាជធានីភ្នំពេញ និងខេត្តព្រះសីហនុ ដែលជាតំបន់ប៉ូលសេដ្ឋកិច្ចសំខាន់ចំនួន២របស់កម្ពុជា។បើតាមគម្រោង ក្នុងអំឡុងដំណើរទស្សនកិច្ចនេះ មហាសេដ្ឋីចិនរូបនេះ នឹងចូលជួបពិភាក្សាការងារ ជាមួយមន្ត្រីសំខាន់ៗរបស់កម្ពុជា និងអភិបាលខេត្តព្រះសីហនុ ដើម្បីជជែក និងពិភាក្សាអំពីកិច្ចសហប្រតិបត្តិការមួយចំនួន លើការវិនិយោគក្នុងវិស័យអចលនទ្រព្យ ការការពារព្រៃកោងកាងធម្មជាតិ និងការសម្ពោធនូវគម្រោង ដែលជាជំនួយរបស់ក្រុមហ៊ុនរបស់លោក សម្រាប់អង្គការមួយនៅកម្ពុជា។

លោក វ៉ាង ហ្ស៊ី ជាបុគ្គលដ៏លេចធ្លោមួយរូប នៅក្នុងសហគ្រិនជំនាន់ដំបូងនៃមហាអំណាចចិន បន្ទាប់ពីប្រទេសចិនបានប្រកាសអនុវត្តនូវគោលនយោបាយ កំណែទម្រង់សេដ្ឋកិច្ចបើកចំហ។លោក វ៉ាង គឺជាស្ថាបនិកក្រុមហ៊ុនអចលនទ្រព្យដ៏ធំ នៅក្នុងប្រទេសចិន ដែលមានឈ្មោះថាChina Vanke Co., Ltd, និងជាអ្នកវិនិយោគគិតគូរពីវិស័យបរិស្ថានបែបធម្មជាតិ និងវិស័យបច្ចេកវិទ្យា៕

ដោយៈ គង់ សូរិយា

        ភ្នំពេញៈ គិតចាប់ពីថ្ងៃទី១១ ដល់២០ ខែតុលា ឆ្នាំ២០២៣នេះ ការកំណត់ថ្លៃលក់រាយ ប្រេងឥន្ធនៈនៅតាមស្ថានីយធំៗមើលឃើញថា បានបន្តទម្លាក់ថ្លៃថែមទៀត។ ក្នុងនោះប្រេងសាំងធម្មតា ឃើញថាធ្លាក់ថ្លៃចំនួន២៥០រៀល។   រីឯប្រេងម៉ាស៊ូតធ្លាក់ថ្លៃ ២០០រៀល ក្នុង១លីត្រដូចគ្នា។

យោងតាមសេចក្តីជូនដំណឹងស្តីពី ថ្លៃលក់រាយប្រេងឥន្ធនៈនៅតាមស្ថានីយ ចេញផ្សាយនៅថ្ងៃទី១១ ខែតុលានេះ ក្រសួងពាណិជ្ជកម្ម បានសសេរថា សម្រាប់ប្រេងសាំងធម្មតាបានធ្លាក់ថ្លៃពី ៤ ៥៥០រៀល មកត្រឹម៤៣០០រៀល និងប្រេងម៉ាស៊ូតបានធ្លាក់ពី៤៨៥០រៀល មកត្រឹម៤៦៥០រៀល ក្នុង១លីត្រ។

គិតមកដល់បច្ចុប្បន្ននេះ ប្រមុខរាជរដ្ឋាភិបាលនៅតែបន្ត និងសម្រេចបញ្ចុះតម្លៃលក់រាយ ប្រេងឥន្ធនៈនៅកម្ពុជាដដែល គឺចំនួន ៦,៥សេនដុល្លារក្នុង១លីត្រ ដើម្បីជួយសម្រួលដល់ជីវភាពរបស់ប្រជាជន និងដោយមានការរួមចំណែក ពីក្រុមហ៊ុនចែកចាយប្រេងឥន្ធនៈនៅកម្ពុជា។

ពាក់ព័ន្ធការកំណត់ថ្លៃ លក់រាយប្រេងឥន្ធនៈនៅកម្ពុជា ក្រសួងពាណិជ្ជកម្ម បានអះអាងថា គ្រាន់តែស្រង់តម្លៃឡើង-ចុះ នៃប្រេងតាមទីផ្សារអន្តរជាតិ មកគណនាតាមប្រកាស ដូចមានក្នុងភ្ជាប់ក្នុងឯកសារប៉ុណ្ណោះ៕