តែម សុខុម

នៅទីបំផុតព្រះវិហារហិណ្ឌូ ដ៏ធំបំផុតនៅសហរដ្ឋអាមេរិក ត្រូវបានសាងសង់បញ្ចប់ជាស្ថាពរហើយ។ នេះបើយោងតាមសារព័ត៌មាន CNN ចុះផ្សាយកាលពីពេលថ្មីៗនេះ។

ព្រះវិហារ BAPS SWAMINARAYAN AKSHARDHAM ដ៏ធំស្កឹមស្កៃអស្ចារ្យមានកម្ពស់៥៨,២ម៉ែត្រ និងលាតសន្ធឹងលើផ្ទៃដីប្រមាណ៧៣ហិកតា។ ការសាងសង់ព្រះវិហារនេះប្រើប្រាស់ថ្មដែលឆ្លាក់នៅប្រទេសឥណ្ឌា ចំនួន៥៦.៦៣៣ម៉ែត្រគូប។

ព្រះវិហារនេះមានរូបបដិមាចំនួន១០.០០០អង្គ កន្លែងសក្ការៈបូជាចំនួន១៣ និងដំបូលរាងពងក្រពើដ៏ធំបំផុតដែលគេមិនធ្លាប់សាងសង់ពីថ្ម។ព្រះវិហារ BAPS SWAMINARAYAN AKSHARDHAM ត្រូវបានសាងសង់ឡើងនៅ Robbinsville រដ្ឋ New Jersey សហរដ្ឋអាមេរិក ហើយការសាងសង់បានចំណាយពេល១២ឆ្នាំទម្រាំបញ្ចប់ជាស្ថាពរ។ ទោះជាយ៉ាណា ការសាងសង់ព្រះវិហារនេះបានជួបភាពចម្រូងចម្រាស។

នៅឆ្នាំ២០២១ កម្មករឥណ្ឌា ជាច្រើននាក់បានដាក់ពាក្យបណ្ដឹងដោយចោទប្រកាន់និកាយសាសនាហិណ្ឌូ ថាបានចាប់បង្ខំមនុស្សឱ្យធ្វើការក្រោមលក្ខខណ្ឌដ៏គ្រោះថ្នាក់។

យោងតាមគេហទំព័រ thehindubusinessline.com ឱ្យដឹងថា គម្រោងសាងសង់ព្រះវិហារហិណ្ឌូ នេះបានចំណាយអស់ចំនួន១០០លានដុល្លារ៕ CNN៕

ដោយ: គង់ លាងហួរ
អន្តរជាតិ: មូលនិធិរូបិយវត្ថុអន្តរជាតិ (IMF) បានព្យាករថាសេដ្ឋកិច្ចរបស់កម្ពុជា នឹងកើនឡើង៥,៦ភាគរយ នៅឆ្នាំនេះ និង៦,១ភាគរយ នៅឆ្នាំ២០២៤ពោលគឺកើនឡើងពី៥,២ភាគរយកាលពីឆ្នាំមុន ។

ការព្យាករដែលបានបង្ហាញនៅក្នុងទស្សនវិស័យសេដ្ឋកិច្ចពិភពលោកចុងក្រោយរបស់មូលនិធិIMF មានន័យថាកម្ពុជាទំនងជា ប្រទេសដែលមានកំណើនសេដ្ឋកិច្ចលឿនបំផុតរបស់តំបន់អាស៊ានក្នុងរយៈពេលពីរឆ្នាំជាប់ៗគ្នា ។

ប្រទេសហ្វីលីពីនឈរនៅចំណាត់ថ្នាក់លេខ២ ជាមួយនឹងការព្យាករកំណើនសេដ្ឋកិច្ច៥,៣ភាគរយនៅឆ្នាំនេះ និង៥,៩ភាគរយនៅឆ្នាំក្រោយ ។

ចំណែកសេដ្ឋកិច្ចរបស់ប្រទេសឥណ្ឌូនេស៊ីត្រូវបានគេព្យាករថានឹងកើនឡើង៥,០ភាគរយទាំងនៅឆ្នាំនេះ និងឆ្នាក្រោយហើយកំណើនសេដ្ឋកិច្ចវៀតណាម ត្រូវបានព្យាករថានឹងកើនឡើង៤ ,៧ភាគរយនៅឆ្នាំនេះនិង៥,៨ភាគរយនៅឆ្នាំក្រោយ ។

សេដ្ឋកិច្ចឡាវ និងម៉ាឡេស៊ី ត្រូវបានគេរំពឹងថា នឹងកើនឡើង៤,០ភាគរយដូចគ្នានៅឆ្នាំនេះ ខណៈកំណើនសេដ្ឋកិច្ចឡាវនៅឆ្នាំ២០២៤ នឹងស្ថិតក្នុងរង្វង់៤,០%ដដែល ចំណែកសេដ្ឋកិច្ចម៉ាឡេសុីនឹងកើនដល់៤,៣%នៅឆ្នាំក្រោយនេះ។

សេដ្ឋកិច្ចថៃត្រូវបានគេព្យាករថា នឹងកើនឡើង២,៧ភាគរយនៅឆ្នាំនេះ និង៣,២ភាគរយនៅឆ្នាំក្រោយ ខណៈសេដ្ឋកិច្ចក្នុងប្រទេសមីយ៉ាន់ម៉ាត្រូវបានគេរំពឹងថានឹងកើនឡើង២,៦ភាគរយទាំងនៅឆ្នាំនេះនិងឆ្នាំក្រោយ។

សេដ្ឋកិច្ចនៅប្រទេសសិង្ហបុរីត្រូវបានព្យាករថានឹងកើនឡើង១,០ភាគរយនៅឆ្នាំនេះ និង២,១ភាគរយនៅឆ្នាំ២០២៤។ ផ្ទុយទៅវិញ សេដ្ឋកិច្ចរបស់ប្រទេសប្រ៊ុយណេត្រូវបានព្យាករថា នឹងធ្លាក់ចុះ០,៨ភាគរយនៅឆ្នាំនេះ មុនពេលស្ទុះងើបឡើងវិញ៣,៥ភាគរយនៅឆ្នាំ២០២៤៕

ដោយ: គង់ លាងហួរ
សេអ៊ូល: យោងតាមការចុះផ្សាយដោយសារព័ត៌មាន Reuters បានឱ្យដឹងថា ប្រាក់ចំណេញប្រចាំត្រីមាសទី៣ របស់ក្រុមហ៊ុនកូរ៉េខ្នាតយក្ស Samsung Electronics ត្រូវបានគេរំពឹងថា នឹងដាំក្បាលចុះ៨០% បើធៀបនឹងរយ:ពេលដូចគ្នាកាលពីឆ្នាំមុន ដោយសារក្រុមហ៊ុននេះរងផលប៉ះពាល់ពីការធ្លាក់ចុះជាបន្តបន្ទាប់នៃតម្រូវបន្ទះឈីបនៅលើពិភពលោក។

Samsung ដែលជាក្រុមហ៊ុនផលិតស្មាតហ្វូន និងបន្ទះឈីបអង្គចងចាំដ៏ធំបំផុតរបស់ពិភពលោក បានបញ្ជាក់ថា ខ្លួននឹងប្រកាសអំពីលទ្ធផលនៃប្រាក់ចំណូលបឋមប្រចាំត្រីមាសទីបីរបស់ក្រុមហ៊ុន នៅថ្ងៃពុធខាងមុខនេះ។

ប្រាក់ចំណេញប្រតិបត្តិការរបស់ក្រុមហ៊ុន Samsung ទំនងជាអាចធ្លាក់ចុះដល់ ២,១ទី្រលានវ៉ុន (ប្រហែល១,៥៦ ពាន់លានដុល្លារ) នៅក្នុងត្រីមាស ដែលគិតចាប់ពីខែកក្កដា ដល់ខែកញ្ញា បើធៀបនឹងប្រាក់ចំណេញ ដែលក្រុមហ៊ុនធ្លាប់ទទួលបាន១០,៨៥ទ្រីលានវ៉ុន ក្នុងត្រីមាសដូចគ្នា កាលពីឆ្នាំមុន។ នេះបើយោងតាមរបាយការណ៍ពីក្រុមហ៊ុនស្រាវជ្រាវ LSEG SmartEstimate ។

ក្រុមហ៊ុនស្រាវជ្រាវនេះ បានបង្ហាញឱ្យដឹងទៀតថា ការធ្លាក់ចុះនេះ គឺបណ្តាលមកពីបញ្ហាប្រឈមដែលកំពុងបន្ត ដោយសារតែវិបត្តិបន្ទះឈីបជាសកល រួមទាំងបញ្ហាសង្គ្រាមពាណិជ្ជកម្មរវាងសហរដ្ឋអាមេរិក និងចិនផងដែរ។

ទន្ទឹមគ្នានេះ ក្រុមហ៊ុនផលិតស្មាតហ្វូន និងកុំព្យូទ័រយួរដៃជាច្រើន បាននិងកំពុងបដិសេធមិនទិញបន្ទះឈីបអង្គចងចាំថ្មី ដោយបានជ្រើសរើសយកការប្រើប្រាស់សារពើភ័ណ្ឌ ដែលមានស្រាប់របស់ពួកគេ អស់រយ:ពេលជាច្រើនខែកន្លងមកនេះ ដោយសារមានការព្រួយបារម្ភអំពីការធ្លាក់ចុះនៃសេដ្ឋកិច្ច៕

តែម សុខុម

ប៉េកាំង: មហាយក្សចិន និងសហភាពអឺរ៉ុប បានពង្រឹងទំនាក់ទំនងកាន់តែស៊ីជម្រៅជាមួយគ្នាតាមរយៈការបង្កើនពាណិជ្ជកម្មតាមផ្លូវសមុទ្រដែលកំពុងទទួលបានភាពជោគជ័យខ្លាំង។ នេះបើយោងតាមទីភ្នាក់ងារព័ត៌មាន Xinhua ចុះផ្សាយកាលពីថ្ងៃអង្គារ ទី៩ ខែតុលា។

កាលពីចុងខែកញ្ញា កប៉ាល់ដឹកកុងតឺន័រខ្នាតយក្ស COSCO Shipping Virgo បានវិលត្រលប់ទៅកាន់កំពង់ផែក្រុងហែមបឺក (Port of Hamburg) ដែលជាកំពង់ផែធំបំផុតនៅក្នុងប្រទេសអាល្លឺម៉ង់ និងធំបំផុតទី៣ នៅអឺរ៉ុប។

កប៉ាល់ដឹកកុងតឺន័រខ្នាតយក្សដែលមានសមត្ថភាពផ្ទុក 20.000-TEU ឬ ដែលអាចដឹកកុងតឺន័រប្រវែង៦ម៉ែត្រចំនួន២០.០០០ទូកុងតឺន័រនេះបានចេញចាប់ផ្ដើមចេញដំណើរពីកំពង់ផែក្រុងធានជីង (Tianjin Port) ប្រទេសចិន។

មុនពេលទៅដល់ទីក្រុង Hamburg វាបានឈប់សំចតនៅកំពង់ផែជាច្រើនរួមទាំងកំពង់ផែក្រុងសៀងហៃ កំពង់ផែក្រុងនីងប៉ (Ningpo) នៃប្រទេសចិន ព្រមទាំងកំពង់ផែសិង្ហបុរី កំពង់ផែផាយរៀស (Piraeus) នៃប្រទេសក្រិក និងកំពង់ផែរ៉តធើដាម (Rotterdam) នៃប្រទេសហូឡង់ ផងដែរ។ ហើយពេលនេះកប៉ាល់នេះកំពុងធ្វើដំណើរត្រលប់មកកាន់ក្រុងសៀងហៃ វិញហើយ។

បច្ចុប្បន្នកំពង់ផែក្រុង Hamburg ត្រូវបានភ្ជាប់ដោយផ្ទាល់ទៅកាន់កំពង់ផែធំៗជាច្រើនរបស់ប្រទេសចិន។

ប្រមាណ១ភាគ៣នៃកុងតឺន័រដែលបានដំណើរការនៅកំពង់ផែក្រុង Hamburg មានប្រភពមកពីប្រទេសចិន ឬ ឆ្ពោះទៅកាន់ប្រទេសចិន។

ក្នុងឆ្នាំ២០២២ ប្រទេសចិន និងសហភាពអឺរ៉ុប គឺជាដៃគូពាណិជ្ជកម្មធំបំផុតទី២ របស់គ្នាទៅវិញទៅមក ដែលសម្រេចបានរំហូរពាណិជ្ជកម្មទ្វេភាគីចំនួន៨៤៧,៣ពាន់លានដុល្លារអាមេរិក។ នេះបង្ហាញថា ពាណិជ្ជកម្មរវាងប្រទេសចិន និងសហភាពអឺរ៉ុប ជាមធ្យមមានទំហំ១,៦លានដុល្លារអាមេរិក រៀងរាល់មួយនាទី៕ Xinhua៕

ដោយ: គង់ លាងហួរ
អន្តរជាតិ: តំណាងពាណិជ្ជកម្មថៃ លោកស្រី Nalinee Taveesin លើកឡើងថា រដ្ឋាភិបាលថៃគ្រោងនឹងស្តារឡើងវិញនូវកិច្ចព្រមព្រៀងពាណិជ្ជកម្មសេរី (FTA) ជាមួយឥណ្ឌា ក៏ដូចជាធ្វើការរួមគ្នាឆ្ពោះទៅរកការដោះស្រាយឧបសគ្គពាណិជ្ជកម្មរវាងប្រទេសទាំងពីរឱ្យបានឆាប់តាមដែលអាចធ្វើទៅបាន។

លោកស្រី Nalinee ដែលជាទីប្រឹក្សានាយករដ្ឋមន្ត្រីផងដែរនោះ បានអះអាងថា ថ្មីៗនេះ លោកស្រីបានពិភាក្សាអំពីលទ្ធភាពនៃការស្តារកិច្ចព្រមព្រៀងពាណិជ្ជកម្មសេរី FTAឡើងវិញ ជាមួយលោក Nagesh Singh ឯកអគ្គរដ្ឋទូតឥណ្ឌាប្រចាំប្រទេសថៃ។

លោកស្រី Nalinee បានគូសរំលឹកថា កាលពីឆ្នាំ២០០៦ ប្រទេសថៃ និងឥណ្ឌាបានចូលទៅក្នុងកិច្ចព្រមព្រៀង FTA ក្រោមគ្រោងការណ៍ Early Harvest ដែលគ្របដណ្តប់ការលើកលែងពន្ធលើផលិតផលចំនួន៨៣មុខ ដូចជាផ្លែឈើស្រស់ គ្រាប់ធញ្ញជាតិ សាច់កែច្នៃ សារធាតុរ៉ែ សារធាតុគីមី គ្រឿងបន្លាស់រថយន្ត និងឧបករណ៍អគ្គិសនី។លោកស្រីបានបន្ថែមថា កិច្ចព្រមព្រៀង FTA រវាងប្រទេសទាំង២ ត្រូវបានព្យួរនៅឆ្នាំ២០១៦ បន្ទាប់ពីឥណ្ឌាបានផ្លាស់ប្តូរទៅធ្វើការចរចាលើ FTA ជាមួយបណ្តាប្រទេសអាស៊ាន ដើម្បីពង្រីកទីផ្សារនាំចេញរបស់ខ្លួន។

លោកស្រីNalinee បានឱ្យដឹងទៀតថា ឥណ្ឌាបានចាត់ទុកថៃថា ជាប្រទេសមានសក្តានុពលវិនិយោគខ្ពស់ និងជាមជ្ឈមណ្ឌលសេដ្ឋកិច្ចមួយក្នុងចំណោមមជ្ឈមណ្ឌលសេដ្ឋកិច្ចក្នុងតំបន់ឥណ្ឌូប៉ាស៊ីហ្វិក ហើយអនុទ្វីបនេះចាប់អារម្មណ៍ក្នុងការស្តារកិច្ចព្រមព្រៀង FTA ដែលត្រូវបានផ្អាកជាមួយប្រទេសថៃឡើងវិញ។ភាគីទាំងពីរសង្ឃឹមថា FTA នឹងអាចនាំទៅដល់ការពង្រីកប្រតិបត្តិការនៃគណៈកម្មាធិការពាណិជ្ជកម្មរួមថៃ-ឥណ្ឌា និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលក្នុងនោះ ក៏មានប្រទេសថៃជាសមាជិកផងដែរ។

លំហូរពាណិជ្ជកម្មរវាងប្រទេសថៃ និងឥណ្ឌាក្នុងឆ្នាំ២០២២ សម្រេចបានទំហំទឹកប្រាក់១៧,៧ពាន់លានដុល្លារអាមេរិក កើនឡើង១៨,០៦% បើធៀបនឹងឆ្នាំ២០២១ និងធ្វើឱ្យប្រទេសឥណ្ឌាក្លាយជាដៃគូពាណិជ្ជកម្មធំបំផុតទី៧ របស់ប្រទេសថៃ៕

ដោយ: គង់ លាងហួរ
រីយ៉ាដ: យោងតាមទិន្នន័យថ្មីៗពីសមាគមដឹកជញ្ជូនផ្លូវអាកាសអន្តរជាតិបង្ហាញថា វិស័យអាកាសចរណ៍ពិភពលោកស្ទុះងើបឡើងវិញយ៉ាងលឿន ខណៈចរាចរណ៍ក្នុងខែកក្កដាបានហក់ឡើងដល់៩៥,៦%នៃកម្រិតមុនជំងឺរាតត្បាត។

សមាគមខាងលើបានបង្ហាញថា ចរាចរណ៍ផ្លូវអាកាសសរុបសម្រាប់ខែកក្កដាឆ្នាំ២០២៣នេះ បានហក់ឡើង២៦,២ភាគរយបើប្រៀបធៀបទៅនឹងខែកក្កដាដូចគ្នាក្នុងឆ្នាំ២០២២។

ចរាចរណ៍ក្នុងស្រុកសម្រាប់ខែកក្កដាក៏បានកើនឡើងគួរឱ្យកត់សម្គាល់ផងដែរ ដោយសម្រេចបាននូវអត្រាកំណើន២១,៥ភាគរយ និងកើនលើសពីកម្រិតក្នុងខែកក្កដា ឆ្នាំ២០១៩ ប្រមាណ៨,៣ភាគរយ។ នៅខែកក្កដាដដែល ចរាចរណ៍អន្តរជាតិបានកើនឡើង២៩,៦ភាគរយបើធៀបនឹងរយៈពេលដូចគ្នា កាលពីឆ្នាំ២០២២ និងឈានដល់អត្រា៨៨,៧ភាគរយនៃកម្រិតក្នុងខែកក្កដា ឆ្នាំ២០១៩។

និន្នាការវិជ្ជមានទាំងអស់នេះអាចត្រូវបានគេមើលឃើញនៅទូទាំងតំបន់ជាច្រើន ដោយបណ្តាក្រុមហ៊ុនអាកាសចរណ៍នៅតំបន់អាស៊ីប៉ាស៊ីហ្វិកបាននាំមុខគេទី១។ ជាក់ស្តែង ក្នុងខែកក្កដា ឆ្នាំនេះ ចរាចរណ៍នៅតំបន់អាស៊ីប៉ាស៊ីហ្វិកបានហក់ឡើង១០៥,៨ភាគរយបើធៀបនឹងខែកក្កដា ឆ្នាំ២០២២។

ក្រុមហ៊ុនអាកាសចរណ៍នៅតំបន់អាហ្រ្វិកបាននាំមុខគេទី២ ដោយចរាចរណ៍នៅតំបន់នេះបានកើនឡើង២៥,៦ភាគរយក្នុងខែកក្កដា ឆ្នាំ២០២៣ បើធៀបនឹងខែកក្កដា ឆ្នាំមុន។ ទន្ទឹមគ្នានេះ ក្រុមហ៊ុនអាកាសចរណ៍នៅតំបន់អាមេរិកឡាទីនបានកត់ត្រាកំណើនចរាចរណ៍២៥,៣ភាគរយនៅក្នុងខែកក្កដា ឆ្នាំនេះ បើធៀបនឹងខែកក្កដា ឆ្នាំ២០២២។

ក្រុមហ៊ុនអាកាសចរណ៍នៅតំបន់មជ្ឈិមបូព៌ាក៏បានរាយការណ៍ពីកំណើនយ៉ាងច្រើនផងដែរ ដោយសារចរាចរណ៍ផ្លូវអាកាសនៅតំបន់នេះបានហក់ឡើង២២,៦ភាគរយនៅក្នុងខែកក្កដា ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន។ ចរាចរណ៍របស់ក្រុមហ៊ុនអាកាសចរណ៍នៅអាមេរិកខាងជើងបានកើនឡើង១៧,៧ភាគរយនៅក្នុងខែកក្កដា ឆ្នាំ២០២៣នេះ ធៀបនឹងខែកក្កដា ឆ្នាំ២០២២។ ចំណែក ចរាចរណ៍របស់ក្រុមហ៊ុនអាកាសចរណ៍នៅតំបន់អឺរ៉ុបបានកើនឡើង១៣,៨ភាគរយនៅក្នុងខែកក្កដា ឆ្នាំនេះ បើធៀបនឹងរយៈពេលដូចគ្នាកាលពីឆ្នាំមុន៕

ដោយ: គង់ លាងហួរ
អន្តរជាតិ: គិតចាប់ពីខែមករាដល់ខែកញ្ញាឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងវិនិយោគចំនួន១៩១ ជាមួយនឹងទុនប្រមាណ៣,៧ពាន់លានដុល្លារ ដោយប្រទេសចិនបានរក្សាតំណែងរបស់ខ្លួនជាអ្នកវិនិយោគធំជាងគេបំផុតនៅកម្ពុជា។

នេះបើយោងតាមការចុះផ្សាយដោយសារពត៌មានរបស់ប្រទេសចិន Ecns.cn កាលពីពេលថ្មីៗកន្លងទៅនេះ។យោងតាមទិន្នន័យបង្ហាញថាក្នុងរយៈពេលប្រាំបួនខែដំបូងដើមឆ្នាំ២០២៣នេះ CDC បានអនុម័តគម្រោងវិនិយោគថ្មីចំនួន៤១បន្ថែមទៀតបើធៀបនឹងរយៈពេលដូចគ្នាកាលពីឆ្នាំមុន។

សហគ្រាសចិនបានបោះទុនវិនិយោគជាង២,៨ពាន់លានដុល្លារនៅកម្ពុជា ដែលស្មើនឹងប្រមាណ៧៦ភាគរយនៃតួលេខសរុប ខណៈដែលការវិនិយោគក្នុងស្រុករបស់កម្ពុជាស្ថិតនៅលំដាប់ទី២ ដែលមានចំណែកជាង១២ភាគរយ។

នៅក្នុងខែកញ្ញា CDC បានអនុម័តគម្រោងថ្មីចំនួន២៧ ជាមួយនឹងទុនវិនិយោគសរុបចំនួន១,៦ពាន់លានដុល្លារ ដែលបង្កើតឱកាសការងារជាង៣០.០០០កន្លែងសម្រាប់អ្នករស់នៅក្នុងតំបន់។ គម្រោងទាំងនោះរួមមានការបណ្តាក់ទុនខ្នាតធំក្នុងវិស័យដឹកជញ្ជូនអគ្គិសនីដែកនិងវិស័យផ្សេងទៀត។

លើសពីនេះ កម្ពុជាកំពុងទាក់ទាញបានអ្នកវិនិយោគចិនកាន់តែច្រើនឡើង តាមរយៈការចូលរួមរបស់ខ្លួននៅក្នុងគំនិតផ្តួចផ្តើមខ្សែក្រវ៉ាត់ និងផ្លូវ(BRI)របស់ប្រទេសចិន។

អ្នកធុរកិច្ចក្នុងស្រុកបានបង្ហាញពីក្តីសង្ឃឹមថា ស្របពេលមានភាពប្រសើរឡើងជាបន្តបន្ទាប់នៃបរិយាកាសធុរកិច្ច សហគ្រិនចិនកាន់តែច្រើននឹងជ្រើសរើសប្រទេសកម្ពុជាជាគោលដៅសម្រាប់ការវិនិយោគ និងការអភិវឌ្ឍន៍របស់ពួកគេ៕

ដោយ: គង់ លាងហួរ
អន្តរជាតិ: ក្រុមហ៊ុនលក់រាយ និងអភិវឌ្ឍអចលនទ្រព្យខ្នាតយក្ស Central Pattana Plc (CPN) គ្រោងអភិវឌ្ឍគម្រោងប្រើប្រាស់ចម្រុះធំចំនួន៥ នៅក្នុងតំបន់កណ្តាល និងសង្កាត់ពាណិជ្ជកម្មកណ្តាល (CBD) របស់ទីក្រុងបាងកក ក៏ដូចជាភាគខាងជើងទីក្រុងបាងកកផងដែរ។

ការសាងសង់គម្រោងទាំងនេះគ្រោងនឹងចាប់ផ្តើមចន្លោះពីឆ្នាំ២០២៣នេះ និងឆ្នាំ២០២៧ ក្នុងតម្លៃទុនវិនិយោគជាង១០០ពាន់លានបាត(ប្រហែល២,៧ពាន់លានដុល្លារអាមេរិក)។
គម្រោងទាំងប្រាំនោះរួមមានគម្រោង Central Park ដែលមានទីតាំងនៅ Dusit Central Park ដែលគ្រោងនឹងបង្ហាញរូបរាងឡើងនៅក្នុងត្រីមាសទី៣ ឆ្នាំ២០២៥។គម្រោងមួយផ្សេងទៀតនៅជាប់នឹងផ្សារទំនើប Central Embassy ត្រង់ចំណុចប្រសព្វនៃផ្លូវ Wireless ចំណែក គម្រោងមួយទៀតស្ថិតនៅខាងក្រោយ Central Shopping Complex នៅផ្លូវ Rama 9 ខណៈគម្រោងនៅសល់ពីរទៀតនឹងលាតសន្ធឹងលើដីទំហំ១១២ហិកតា នៅតំបន់ Rangsit។

គម្រោងប្រើប្រាស់ចម្រុះនីមួយៗទាមទារទុនវិនិយោគអប្បបរមាចំនួន២០ពាន់លានបាត(ប្រហែល៥៤២លានដុល្លារ) និងមានទីតាំងធំទូលាយដែលលាតសន្ធឹងលើផ្ទៃដី៣៥០.០០០ម៉ែត្រការ៉េ។

គម្រោង Central Park ដែលជាធាតុផ្សំដ៏សំខាន់នៃយុទ្ធសាស្រ្តអាជីវកម្មរយៈពេល៥ឆ្នាំនេះ នឹងកំណត់ឡើងវិញនូវទេសភាពទីក្រុងបាងកក ដូចជា Central Park ក្នុងទីក្រុង New York ឬឧទ្យាន Hyde Park ក្នុងទីក្រុងឡុងដ៍។

លោក Nattakit Tangpoonsinthana ប្រធានផ្នែកទីផ្សាររបស់ក្រុមហ៊ុន CPN បានមានប្រសាសន៍ថា ជម្លោះរវាងអុីស្រាអែល និងក្រុមហាម៉ាស់នឹងជះឥទ្ធិពលក្នុងរយៈពេលខ្លីដល់អាជីវកម្មលក់រាយ ហើយក្រុមហ៊ុននឹងតាមដានពីទំហំដែលជម្លោះនេះប៉ះពាល់ដល់តំបន់ផ្សេងទៀត។លោកស្រី Wallaya Chirathivat ប្រធាន និងជានាយកប្រតិបត្តិរបស់ CPN លើកឡើងថា យើងបានចាក់ឫសនៅក្នុងឧស្សាហកម្មលក់រាយអស់រយៈពេល៤២ឆ្នាំមកហើយ ដោយបានយកឈ្នះលើបញ្ហាប្រឈមជាច្រើន។

លោកស្រីបន្ថែមថា ជាមួយនឹងគោលនយោបាយរបស់រដ្ឋាភិបាល និងយុទ្ធសាស្ត្រផ្សព្វផ្សាយរបស់យើង យើងមានទំនុកចិត្តថា លំហូរនៃភ្ញៀវទេសចរបរទេសទៅកាន់ប្រទេសថៃនឹងកើនឡើងដល់២៥ទៅ៣០លាននាក់នៅឆ្នាំនេះ និងកើនឡើងដល់៤០លាននាក់នៅឆ្នាំ២០២៤ និងលើសពី៤០លាននាក់នៅឆ្នាំ២០២៥ អមដោយអត្រាកំណើនផលិតផលក្នុងស្រុកសរុបប្រចាំឆ្នាំថេរចន្លោះពី៣ទៅ៤%៕