ដោយៈ គង់ សូរិយា

        ភ្នំពេញៈ ការសាងសង់ និងលក់បុរីវិមានសំណាង បាននិងកំពុងឆ្ពោះទៅមុខក្នុងសញ្ញាវិជ្ជមាន។ នេះបើតាមការអះអាងរបស់លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាង។

លោកឧកញ៉ាបណ្ឌិតបានមានប្រសាសន៍ឲ្យដឹង តាមបណ្តាញតេឡេក្រាមកាលពីចុងសប្តាហ៍មុនថា ជាមួយនឹងល្បឿននៃការសាងសង់ និងការលក់ចេះតែបន្តទៅមុខ ក្នុងសញ្ញាវិជ្ជមាន បុរីវិមានសំណា​ង ដែលសាងសង់វីឡាសម្រាប់អភិជន បាននិងកំពុងសម្រេចបានវឌ្ឍនភាពយ៉ាងប្រសើរ។បុរីវិមានសំណាង មានទីតាំងពិសេសមួយ ដែលមានព្រែកធម្មជាតិហូរកាត់ប្រវែង១០០០ម៉ែត្រ និងសាងសង់ឡើងតាមរចនាបទបែ​បសហសម័យ ជាមួយបរិស្ថានរស់នៅជាមួយធម្មជាតិ។ ផ្ទះនិមួយៗ​សាងសង់ឡើងដោយប្រើឥដ្ឋ២០ និងរៀបចំចាក់បេតុងលើជាន់ដំបូ​ល ដើម្បីការពារជម្រាបទឹក និងផ្តល់សេវាកម្មជាច្រើនទៀតសម្រា​ប់អតិថិជន។

លោកឧកញ៉ាបណ្ឌិតគីម ហ៊ាងបានបន្តថា ហេដ្ឋារចនាសម្ព័ន្ឋ ផ្ទះគំរូ​ និងផ្ទះសម្រាប់អតិថិជន ដែលបានទិញនៅក្នុងបុរីនេះ បាននិងកំពុងធ្វើឡើង ដែលចំណាយពេលត្រឹម១៨ ទៅ២៤ និងរយៈពេល៣២ខែ។លោកបន្តថា រហូតមកទល់ពេលនេះ ផ្ទៃដីទំហំ២៥ហិកតាក្នុងគំរោងនេះ បាននិងកំពុងរៀបចំឡើង និងសាងសង់ផ្ទះតាមតម្រូវ​ការរបស់អតិថិជន។ លោកឧកញ៉ាបានបន្តថា ការរីកចម្រើនសេដ្ឋកិច្ច សង្គមបានធ្វើឲ្យចំនួនអ្នកមានជីវភាពធូរធារកើនឡើង ស្របពេលនិន្នាការរស់នៅ​របស់ក្រុមអភិជន បានងាកមកកាន់ភាគខាងជើងរាជធានីភ្នំពេញ ដោ​យសារតំបន់នេះ មានមជ្ឈមណ្ឌលពាណិជ្ជកម្មធំៗច្រើន ដូចជា ផ្សារទំនើបAEON Mallសែនសុខ ផ្សារទំនើបMAKRO, The Global House និងមជ្ឈមណ្ឌលពាណិជ្ជកម្មជាច្រើនទៀត។

ពិសេសបច្ចុប្បន្នមានក្រសួង មន្ទីរនានារបស់រដ្ឋាភិបាលបានផ្លាស់ប្តូរមកកាន់តំបន់នេះ ដូចជា ក្រសួងសាធារណៈការ និងដឹកជញ្ជូន ក្រសួងរៀបចំដែនដី នគរូបនីយកម្ម និងសំណង់ ផ្សារដើមគរថ្មីជាដើម៕

ដោយៈ គង់ សូរិយា

        ភ្នំពេញៈ  សម្តេចធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជាបានថ្លែងថា ៗយុទ្ធសាស្ត្រជាតិស្តីពីការអភិវឌ្ឍន៍សេដ្ឋកិច្ចក្រៅ​ប្រព័ន្ធ​ឆ្នាំ២០២៣-២០២៨” ជាយុទ្ធសាស្ត្រព្រួញមួយបាញ់បានសត្វបី។

សត្វទាំងបី ដែលសម្តេចសំដៅដល់នោះ គឺកាត់បន្ថយភាពក្រីក្រ និងវិសមភាពសង្គម ពង្រឹងភាពធន់នៃសេដ្ឋកិច្ច និងកំណើនសេដ្ឋកិច្ច។

សម្តេចធិបតី ហ៊ុន ម៉ាណែត បានថ្លែងបែបនេះ បានអញ្ជើញជាអធិបតីប្រកាសដាក់ឱ្យដំណើរការ ជាផ្លូវការនៃយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨នាព្រឹកថ្ងៃទី១០ តុលានេះ។

សម្តេចបញ្ជាក់ទៀតថា “ទ្រឹស្តីយុទ្ធសាស្ត្រល្អហើយ តែការធ្វើឱ្យចេញជាលទ្ធផលជាក់ស្តែង ទើបជារឿងសំខាន់”។សម្តេចបន្តថា “យុទ្ធសាស្ត្រជាតិស្តីពី ការអភិវឌ្ឍន៍សេដ្ឋកិច្ចក្រៅ​ប្រព័ន្ធ​ឆ្នាំ២០២៣-២០២៨» មិនមានចរិតបង្ខំឱ្យប្រជាពលរដ្ឋ ចូលរួមចុះបញ្ជីនោះឡើយ តែលើកទឹកចិត្តឱ្យចូលរួម ដើម្បីរាជរដ្ឋាភិបាលអាចគ្រប់គ្រងទិន្នន័យបានច្បាស់លាស់ ហើយអាចដាក់កិច្ចអន្តរាគមន៍នានាបានរហ័ស និងមានប្រសិទ្ធភាព”។

សម្តេចធិបតី ហ៊ុន ម៉ាណែត បានថ្លែងថា ការចុះបញ្ជីអាជីវកម្មរបស់សហគ្រាសធុនតូច និងមធ្យម គឺយុទ្ធសាស្ត្រឈ្នះ-ឈ្នះ ពោលឈ្នះទាំងរដ្ឋ ឈ្នះទាំងម្ចាស់សហគ្រាស ហើយជាតិក៏ឈ្នះ។

សម្តេចធិបតី ហ៊ុន ម៉ាណែត ណែនាំក្រសួងស្ថាប័នពាក់ព័ន្ធប្រឹងប្រែងអនុវត្តន៍ឱ្យជោគជ័យនូវ “យុទ្ធសាស្ត្រជាតិស្តីពីការអភិវឌ្ឍន៍សេដ្ឋកិច្ចក្រៅ​ប្រព័ន្ធ​ឆ្នាំ២០២៣-២០២៨”៕

តែម សុខុម
ហ្សាការតា: ប្រទេសឥណ្ឌូនេស៊ី រំពឹងចុះហត្ថលេខាទទួលប្រាក់កម្ចីចំនួន៥៦០លានដុល្លារអាមេរិក ដែលត្រូវបានពន្យារពេលយូរមកហើយជាមួយប្រទេសចិន អំឡុងវេទិកាខ្សែក្រវាត់ និងផ្លូវ (BRF) នៅទីក្រុងប៉េកាំង សប្តាហ៍ក្រោយ។

មន្ត្រីឥណ្ឌូនេស៊ី មួយរូបបានទម្លាយឱ្យដឹងកាលពីថ្ងៃច័ន្ទ ទី៩ ខែតុលា ថា ចំនួនប្រាក់កម្ចីនេះគឺសម្រាប់រ៉ាប់រងលើការកើនឡើង នៃការចំណាយសម្រាប់គម្រោងផ្លូវដែកល្បឿនលឿនដំបូងបង្អស់របស់ប្រទេសឥណ្ឌូនេស៊ី។

ប្រធានាធិបតីឥណ្ឌូនេស៊ី លោក Joko Widodo កាលពីដើមខែនេះបានដាក់ឱ្យដំណើរការផ្លូវដែកល្បឿនលឿនតម្លៃ៧,៣ពាន់លានដុល្លារអាមេរិក ខាងលើនេះដែលតភ្ជាប់រដ្ឋធានីហ្សាកាតា ទៅកាន់ទីក្រុង Bandung ទោះបីជាមិនទទួលបានហិរញ្ញប្បទានគ្រប់ចំនួនដោយសារការចរចាលើលក្ខខណ្ឌផ្ដល់ប្រាក់កម្ចីត្រូវបានអូសបន្លាយពេលយ៉ាងណាក្ដី។

យោងតាមរដ្ឋាភិបាលឥណ្ឌូនេស៊ី ឱ្យដឹងថា គម្រោងផ្លូវដែកនេះដែលទទួលសាងសង់ដោយសម្ព័ន្ធក្រុមហ៊ុនឥណ្ឌូនេស៊ី និងចិន នេះបានចំណាយលើសកញ្ចប់ថវិកាព្រាងទុកចំនួន១,២ពាន់លានដុល្លារអាមេរិក។

ប្រាក់កម្ចីថ្មីនេះគឺបន្ថែមពីលើប្រាក់កម្ចី៤,៥៥ពាន់លានដុល្លារអាមេរិក ក្នុងឆ្នាំ២០១៧ ដែលធនាគារអភិវឌ្ឍន៍ចិន (China Development Bank) បានអនុម័តផ្ដល់ឱ្យសម្ព័ន្ធក្រុមហ៊ុនខាងលើ។ ប្រាក់កម្ចីនោះមានរយៈពេលសងត្រលប់៤០ឆ្នាំជាមួយនឹងរយៈពេលអនុគ្រោះ (Grace Period) ១០ឆ្នាំ និងអត្រាការប្រាក់២%ក្នុងមួយឆ្នាំ។

ក្រុមមន្ត្រីឥណ្ឌូណេស៊ី ធ្លាប់បានលើកឡើងថា រដ្ឋាភិបាលក្រុងហ្សាការតា កំពុងស្វះស្វែងចង់បានលក្ខខណ្ឌស្រដៀងគ្នាសម្រាប់កម្ចីបន្ថែមនេះ ប៉ុន្តែប្រទេសចិន បានគិតអត្រាការប្រាក់ខ្ពស់ជាងមុនចន្លោះពី៣,៤%ទៅ៤%៕ Reuters៕

តែម សុខុម

បាងកក: វាជាដំណឹងដ៏គួរឱ្យសាទរដែលក្រុមហ៊ុនដឹកជញ្ជូនឆ្លងដែនកំពូលរបស់ថៃ Euroasia Total Logistics (ELT) គ្រោងពង្រីកមកកាន់ទីផ្សារកម្ពុជា តាមរយៈការបង្កើតការវិនិយោគរួមគ្នា។ នេះបើយោងតាមកាសែត The Nation ចុះផ្សាយកាលពីថ្ងៃច័ន្ទ ទី៩ ខែតុលា។

ទន្ទឹមនេះក្រុមហ៊ុននេះក៏បានប្រកាសដែរថា ខ្លួននឹងកំណត់ការបោះផ្សាយមូលបត្រជាសាធារណៈលើកដំបូង (IPO) របស់ខ្លួនក្នុងតម្លៃ១,៦៨បាត (១៨៧រៀល) ក្នុងមួយភាគហ៊ុន។

ការបោះផ្សាយ IPO នេះត្រូវបានកំណត់ត្រឹម១៧១.៨៦៥.៤៤០ភាគហ៊ុនជាមួយនឹងតម្លៃសរុប៧,៨លានដុល្លារអាមេរិក។ ភាគហ៊ុនរបស់ក្រុមហ៊ុន ELT នឹងត្រូវចុះបញ្ជីក្នុងប្រភេទអាជីវកម្មដឹកជញ្ជូន និងភ័ស្តុភារកម្ម។លោកស្រី Krishavan Chuecharoenchai នាយិកាគ្រប់គ្រងក្រុមហ៊ុន ELT ថ្លែងថា គោលដៅនៃការបោះផ្សាយ IPO នេះគឺដើម្បីទទួលបានហិរញ្ញប្បទានសម្រាប់បង្កើនប្រសិទ្ធភាពប្រតិបត្តិការ និងពង្រីកសេវាកម្មរបស់ខ្លួនទៅក្នុងទីផ្សារថ្មីៗ។

លោកស្រីបានសង្កត់ធ្ងន់ថា ចំណាត់ការនេះគឺស្របគ្នាទៅនឹងកំណើននៃឧស្សាហកម្មដឹកជញ្ជូនឆ្លងដែនដែលជំរុញដោយកំណើននៃពាណិជ្ជកម្មអេឡិចត្រូនិក (E-commerce)។ទន្ទឹមនឹងនេះ លោក Darren Lee Yik Chieh នាយកប្រតិបត្តិក្រុមហ៊ុន ELT ក៏លើកឡើងដែរថា ក្រុមហ៊ុន ELT មានផែនការអាជីវកម្មជាយុទ្ធសាស្ត្រសម្រាប់រយៈពេល៣ទៅ៥ឆ្នាំខាងមុខ។

លោកគូសបញ្ជាក់ថា ក្រុមហ៊ុន ELT ក៏មានផែនការបង្កើតគម្រោងបណ្តាក់ទុនរួមគ្នានៅកម្ពុជា និងវៀតណាម ផងដែរដើម្បីពង្រឹងបណ្តាញ និងបង្កើនទ្រព្យសកម្មសកម្មព្រមទាំងចំនួនអតិថិជនរបស់ខ្លួន។ ក្រុមហ៊ុននេះក៏បានប្តេជ្ញាស្វែងរកឱកាសអាជីវកម្មថ្មីៗផងដែរ៕ The Nation៕

ដោយ: គង់ លាងហួរ
បាងកក: អភិបាលក្រុងបាងកក លោក Chadchart Sittipunt បានបង្ហាញផែនការដើម្បីពិភាក្សាអំពីលទ្ធភាពក្នុងការប្រែក្លាយរាជធានីនេះទៅជាមជ្ឈមណ្ឌលសម្រាប់បណ្តាក្រុមហ៊ុនអន្តរជាតិ។ គំនិតផ្តួចផ្តើមប្រកបដោយមហិច្ឆិតានេះ មានគោលបំណងបង្កើតការងារ បង្កើតប្រាក់ចំណូល និងចែកចាយអត្ថប្រយោជន៍ទៅដល់វិស័យផ្សេងៗទៀត។

លោក Chadchart បានបញ្ជាក់ថា លោកនឹងពិភាក្សាអំពីយុទ្ធសាស្ត្រជាមួយរដ្ឋាភិបាល រួមទាំងការប្រែក្លាយទីក្រុងបាងកក ទៅជាមជ្ឈមណ្ឌលសម្រាប់ក្រុមហ៊ុនអន្តរជាតិ ក៏ដូចជាការដោះស្រាយបញ្ហាសំខាន់ៗដូចជា ការគ្រប់គ្រងចរាចរណ៍ ការកកស្ទះ ថ្លៃសំបុត្រធ្វើដំណើរ និងបន្ទុកបំណុលជាដើម។ លោកបន្តថា “គោលនយោបាយដ៏សំខាន់មួយ ដែលទាមទារការយកចិត្តទុកដាក់ និងស្របតាមគោលនយោបាយរបស់រដ្ឋាភិបាល គឺធ្វើឱ្យទីក្រុងបាងកក ក្លាយទៅជាមជ្ឈមណ្ឌលសម្រាប់ក្រុមហ៊ុនអន្តរជាតិ”។អភិបាលក្រុងបាងកករូបនេះបានអះអាងថា អាស្រ័យហេតុនេះ ការទទួលបានវត្តមានក្រុមហ៊ុនអន្តរជាតិមកបង្កើតមូលដ្ឋាននៅទីនេះ នឹងផ្តល់អត្ថប្រយោជន៍សម្រាប់មនុស្សគ្រប់រូប រាប់ចាប់ពីវិស័យបដិសណ្ឋារកិច្ច រហូតដល់អ្នកបើកបរតាក់ស៊ី ភោជនីយដ្ឋាន កសិករ និងអ្វីៗជាច្រើនទៀត។

លោក Chadchart ក៏បានគូសបញ្ជាក់ពីលក្ខណៈវិវឌ្ឍនៃការវិនិយោគផងដែរ ដែលកំពុងផ្លាស់ប្តូរចេញឆ្ងាយពីវិស័យឧស្សាហកម្មបែបប្រពៃណី ឆ្ពោះទៅរកវិស័យសេវាកម្ម វិស័យសេវាកម្មហិរញ្ញវត្ថុ ការចាប់ផ្ដើមអាជីវកម្ម(Startups) និងអាជីវកម្មច្នៃប្រឌិត។

លោកបានមានប្រសាសន៍បន្ថែមថា ដើម្បីទាក់ទាញអ្នកវិនិយោគ ទីក្រុងបាងកក មានបំណងសហការជាមួយរដ្ឋាភិបាល និងក្រុមប្រឹក្សាវិនិយោគ ដោយបច្ចុប្បន្នសាលាក្រុងបាងកកកំពុងពិភាក្សាជាមួយសភាពាណិជ្ជកម្មបរទេស និងវិនិយោគិនបរទេស៕

តែម សុខុម

ហូជីមិញ: កោះត្រល់ (Phu Quoc) បានជាប់ចំណាត់ថ្នាក់លេខ៣ ក្នុងចំណោមបញ្ជីឈ្មោះកោះដែលធូរថ្លៃបំផុតទាំង១៧ ទូទាំងពិភពលោកដែលចុះផ្សាយដោយទស្សនាវដ្ដីកាណាដា The Travel។

ទស្សនាវដ្ដីនេះបានគូសបញ្ជាក់ពីភាពងាយស្រួលក្នុងការចូលទៅកាន់កោះត្រល់ និងសកម្មភាពកម្សាន្តយ៉ាងសម្បូរបែបលើកោះនេះនៅក្នុងការចុះផ្សាយរបស់ខ្លួន។ នេះបើយោងតាមសារព័ត៌មាន VN Express ចុះផ្សាយកាលពីថ្ងៃសុក្រ សប្ដាហ៍មុន។

កោះត្រល់ ដែលជាកោះធំជាងគេបំផុតរបស់វៀតណាម គឺជាឋានសួគ៌សម្រាប់អ្នកចូលចិត្តអាហារតាមចិញ្ចើមផ្លូវ (Street Food) ព្រោះសម្បូរដោយអ្នកលក់ចំណីអាហារតាមចិញ្ចើមផ្លូវដែលមានរសជាតិឆ្ងាញ់ និងមានតម្លៃធូរថ្លៃ។ក្នុងប៉ុន្មានឆ្នាំចុងក្រោយនេះ កោះត្រល់ បានបោះទុនវិនិយោគយ៉ាងច្រើនសន្ធឹកសន្ធាប់លើសួនកម្សាន្តទំនើបៗ ប្រព័ន្ធកន្ត្រកខ្សែកាប និងសួនសត្វដែលបង្កើនភាពទាក់ទាញដល់ភ្ញៀវទេសចរ។ទស្សនាវដ្ដីនេះក៏បានណែនាំផងដែរនូវតំបន់ទេសចរណ៍មួយចំនួននៅលើកោះនេះដូចជាឆ្នេរខ្សាច់ Sao Beach សួនសត្វ Vinpearl Safari Phu Quoc ប្រព័ន្ធកន្ត្រកខ្សែកាប Hon Thom Departure Terminal ទឹកធ្លាក់ Suoi Tranh Waterfall និងសួនកម្សាន្ត Vin Wonders Phu Quoc ជាដើម។

កោះត្រល់ អនុញ្ញាតឱ្យភ្ញៀវបរទេសស្នាក់នៅដោយគ្មានទិដ្ឋាកាចំនួន៣០ថ្ងៃ ខណៈអាកាសយានដ្ឋានអន្តរជាតិនៅលើកោះនេះមានជើងហោះហើរទៅកាន់គោលដៅជាច្រើនជុំវិញពិភពលោក។ដោយមានភូមិសាស្ត្រស្ថិតនៅភាគខាងត្បូងនៃប្រទេសវៀតណាម ក្នុងឈូងសមុទ្រថៃ កោះត្រល់ បានក្លាយជាទីក្រុងកោះដំបូងគេបង្អស់របស់វៀតណាម។

រដូវទេសចរណ៍កំពូលរបស់កោះត្រល់ (High Season) ពោលគឺពេលដែលមានភ្ញៀវទេសចរច្រើនបំផុតគឺចាប់ពីខែវិច្ឆិកា ដល់ខែមេសា ដែលជារដូវប្រាំង៕ VN Express៕

ដោយៈ តែម សុខុម

គូឡាឡាំពួ: ទីភ្នាក់ងារព័ត៌មាន ប្រទេសម៉ាឡេស៊ី Bernama បានចុះផ្សាយថា កម្ពុជា និងបណ្តាប្រទេសនៅអាស៊ីអាគ្នេយ៍ បានព្រមព្រៀងគ្នាផ្ដល់អាទិភាព លើការជួយគ្នាទៅវិញទៅមក ដើម្បីជួយបំពេញកង្វះខាតនៃការផ្គត់ផ្គង់ស្រូវអង្ករ និងបញ្ហាទាក់ទិនស្បៀងអាហារ។

រដ្ឋមន្ត្រីកសិកម្ម និងសន្តិសុខស្បៀងម៉ាឡេស៊ី លោក Mohamad Sabu បានលើកឡើងកាលពីថ្ងៃសុក្រ ទី៦ ខែតុលា ថា សមាគមប្រជាជាតិអាស៊ីអាគ្នេយ៍ (អាស៊ាន) បានឈានដល់កិច្ចព្រមព្រៀងនេះ នៅក្នុងកិច្ចប្រជុំនៅទីក្រុងគូឡាឡាំពួរ សប្តាហ៍នេះ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសៅរ៍ ទី៧ ខែតុលា។

លោកបានបន្តថា “កិច្ចសហការក្នុងអាស៊ាន មានន័យថា ប្រសិ​នបើយើងប្រឈមនឹងបញ្ហាស្រូវអង្ករ បណ្ដាប្រទេសជាសមាជិកអាស៊ាន នឹងផ្ដល់អាទិភាពលើការផ្គត់ផ្គង់ ដល់បណ្ដាប្រទេសជាសមាជិកអាស៊ាន មុនគេ”។

លោក Mohamad Sabu ថ្លែងថា ប្រទេសកម្ពុជា វៀតណាម និងថៃ បានបញ្ជាក់គោលជំហរថា ពួកគេនឹងពិចារណាលើសំណើថ្មីៗសម្រាប់ការនាំចូលស្រូវអង្ករបន្ថែមទៀត។ ប្រទេសម៉ាឡេស៊ី ដែលនាំចូលអង្ករប្រមាណ៣៨% នៃតម្រូវការអង្កររបស់ខ្លួនស្ថិត ក្នុងចំណោមប្រទេសមួយចំនួន ដែលរងផលប៉ះពាល់ ដោយសារប្រទេសនាំចេញកំពូលៗ ដូចជាឥណ្ឌា ជាដើមបានរឹតបន្តឹងការនាំចេញអង្ករ។រដ្ឋាភិបាលម៉ាឡេស៊ី កាលពីថ្ងៃច័ន្ទ សប្ដាហ៍មុនបានប្រកាសដាក់ចេញឧបត្ថម្ភធន និងវិធានការផ្សេងៗទៀត ដើម្បីទប់ការឡើងថ្លៃទំនិញគ្រាប់ធុញ្ញជាតិ និងធានាការផ្គត់ផ្គង់ទំនិញគ្រាប់ធុញ្ញជាតិឱ្យបានគ្រប់គ្រាន់នៅក្នុងទីផ្សារ។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានព្រមានចាត់វិធានការផ្លូវច្បាប់ ចំពោះជនណាដែលត្រូវបានរកឃើញថា ស្តុកអង្ករទុក ដើម្បីបញ្ចេញលក់ក្នុងតម្លៃខ្ពស់ជាងទីផ្សារ។លោកលើកឡើងថា ការធ្វើបែបនេះ គឺដើម្បីការពារអ្នកប្រើប្រាស់ ពីការស្តុកទុកទំនិញធញ្ញជាតិក្នុងស្រុក៕ Reuters៕

ដោយ: គង់ លាងហួរ

អន្តរជាតិ: អាកាសយានដ្ឋាន Changi របស់ប្រទេសសិង្ហបុរី ជាប់ចំណាត់ថ្នាក់លេខ១ ជាអាកាសយានដ្ឋានមមាញឹកបំផុតរបស់តំបន់អាស៊ីប៉ាស៊ីហ្វិក គិតចាប់ពីខែមករាដល់ខែសីហា ដែលមានអ្នកដំណើរជិត៣៨លាននាក់។ តួលេខនេះបង្ហាញពីអត្រា នៃការស្ទុះងើបឡើងវិញ៨៥ភាគរយ បើធៀបនឹង៤៥លាននាក់ ក្នុងរយៈពេល៨ខែដំបូង នៃឆ្នាំ២០១៩ ពោលគឺមុនផ្ទុះជំងឺរាតត្បាតសកល។ នេះ​បើ​តាម​ទិន្នន័យ​ចងក្រង​ដោយ​ក្រុមហ៊ុន​ប្រឹក្សា​អាកាសចរណ៍ Sobie Aviation របស់​សិង្ហបុរី។

អាកាសយានដ្ឋាន Incheon របស់ទីក្រុងសេអ៊ូល ស្ថិតនៅលំដាប់ទី២ ដែលមានអ្នកដំណើរចំនួន៣៥លាននាក់ ពោលគឺងើបឡើងវិញដល់៧៣ភាគរយ នៃកម្រិតមុនផ្ទុះកូវីដ។ ចំណែក អាកាសយានដ្ឋាន Bangkok Suvarnabhumi ស្ថិតនៅលំដាប់ទី៣ ដែលមានអ្នកដំណើរ២៥,៥លាននាក់ ពោលគឺងើបឡើងវិញដល់៧២ភាគរយនៃកម្រិតមុនផ្ទុះកូវីដ។អាកាសយានដ្ឋានអន្តរជាតិហុងកុង ជាប់ចំណាត់ថ្នាក់ទី៤ ដែលមានអ្នកដំណើរចំនួន២៤,៣លាននាក់ ក្នុងរយៈពេល៨ខែដំបូងដើមឆ្នាំនេះ ដែលកើនឡើងយ៉ាងខ្លាំងពីចំណាត់ថ្នាក់ទី៣០ កាលពីឆ្នាំមុន ដោយសារវិធានការរឹតបន្តឹងកូវីដ។

ទោះជាយ៉ាងនេះក្តី ស្ថាប័នឧស្សាហកម្មនេះបានព្រមានថា កង្វះបុគ្គលិក និងបញ្ហាខ្សែសង្វាក់ផ្គត់ផ្គង់ នៅតែជាឧបសគ្គចំពោះការស្ទុះងើបឡើងវិញយ៉ាងពេញលេញ និងមិនងាយទទួលបានមកវិញនូវចំណាត់ថ្នាក់លេខ១ ដែលអាកាសយានដ្ឋានអន្តរជាតិ ហុងកុងកាន់កាប់មុនពេលផ្ទុះជំងឺរាតត្បាត។

ចំណែក អាកាសយានដ្ឋាន Taiwan Taoyuan ស្ថិតនៅលំដាប់ទី៥ ដែលមានអ្នកដំណើរ២១,៨លាននាក់ ដែលជាអត្រានៃការស្ទុះងើបឡើងវិញ៦៧ភាគរយ បើធៀបនឹងកម្រិតមុនផ្ទុះកូវីដ៕