ដោយៈ​ តែម សុខុម

ញូវយ៉ក: ក្រុមហ៊ុនកម្សាន្តខ្នាតយក្ស Walt Disney ដែលមានមូលដ្ឋាននៅក្នុងសហរដ្ឋអាមេរិក បានទម្លាយឱ្យដឹងកាលពីថ្ងៃអង្គារ ដើមសប្ដាហ៍នេះថា ខ្លួនគ្រោងបង្កើនការវិនិយោគ យ៉ាងសម្បើមទៅលើសួនកម្សាន្ត។

យោងតាមឯកសារដាក់ជូន គណៈកម្មការមូលបត្រអាមេរិក បង្ហាញថា ក្នុងរយៈពេល១០ឆ្នាំខាងមុខ ក្រុមហ៊ុនកម្សាន្តដ៏ល្បីល្បាញនេះ នឹងចាក់បញ្ចូលទុនវិនិយោគ៦០ពាន់លានដុល្លារ ទៅលើសួនកម្សាន្ត Disney Parks របស់ខ្លួន។តួលេខវិនិយោគនេះ គឺស្មើប្រមាណ២ដង នៃទុនដែលក្រុមហ៊ុននេះបានវិនិយោគ ក្នុងរយៈពេល១០ឆ្នាំចុងក្រោយនេះ។

ការវិនិយោគយ៉ាងសម្បើមនេះ បានកើតមានឡើង នៅពេលក្រុមហ៊ុននេះ កំពុងប្រឈមនឹងបញ្ហាប្រាក់ចំណូល ផ្នែកសេវាកម្ម Streaming ភាពយន្ត និងទូរទស្សន៍ គឺបញ្ហាស្ទើរតែគ្រប់ទីកន្លែង លើកលែងតែសួនកម្សាន្តអន្តរជាតិរបស់ខ្លួន ដែលមិនប្រឈមបញ្ហាប្រាក់ចំណូល។

សួនកម្សាន្ត គឺជាកម្លាំងចលកររុញកំណើនដ៏ខ្លាំងក្លា សម្រាប់ក្រុមហ៊ុននេះដែលនិយាយថា ការពង្រីកសួនកម្សន្តបន្ថែម នឹងជួយឱ្យខ្លូន ចូលទៅដល់អ្នកគាំទ្ររបស់ Walt Disney បានច្រើនដែលមិនទាន់បានចូលទស្សនា ប៉ុន្តែការប្រកួតប្រជែងគឺស្វិតស្វាញណាស់៕ CNN៕

ដោយៈ តែម សុខុម

បាងកក: ក្រសួងដឹកជញ្ជូនថៃ គ្រោងរៀបចំកម្មវិធី Roadshow នៅប្រទេសចិន អឺរ៉ុប និងសហរដ្ឋអាមេរិក ដើម្បីទាក់ទាញអ្នកវិនិយោគក្នុងគម្រោងស្ពាន (Land Bridge) ដ៏ធំសម្បើមមួយដែលតភ្ជាប់ខេត្តជុំផុន (Chumphon) លើឆ្នេរសមុទ្រភាគខាងកើត តាមបណ្តោ​យឈូងសមុទ្រថៃ (Gulf of Thailand) ឆ្ពោះទៅកាន់ខេត្តរ៉ាក់ណង (Ranong) តាមបណ្ដោយសមុទ្រអាន់ដាម៉ាន់ (Andaman Sea)។

រដ្ឋមន្ត្រីដឹកជញ្ជូនថៃ លោក Suriya Jungrungreangkit កាលពីថ្ងៃព្រហស្បតិ៍ ទី២១ ខែកញ្ញា បានផ្តល់ព័ត៌មានបច្ចុប្បន្នភាព អំពីវឌ្ឍនភាពនៃគម្រោងនេះ បន្ទាប់ពីលោក Wichai Sudsawat តំណាងរាស្ត្រខេត្ត Chumphon មកពីគណបក្សជាតិថៃរួបរួម (United Thai Nation (UTN)) បានបង្ហាញការព្រួយបារម្ភរបស់លោក ទាក់ទងនឹងផលប៉ះពាល់អវិជ្ជមាន នៃគម្រោងនេះទៅលើជីវភាពរស់នៅរបស់ប្រជាជន ក្នុងមណ្ឌលរបស់លោក អំឡុងកិច្ចប្រជុំសភាមួយកាលពីថ្ងៃពុធ ដើមសប្ដាហ៍នេះ។

សមាជិកសភាមកពីគណបក្សជាតិថៃរួបរួម (UTN) រូបនេះបានលើកឡើងពីការព្រួយបារម្ភបែបនេះ បន្ទាប់ពីរដ្ឋមន្ត្រីដឹកជញ្ជូនថៃ លោក Suriya Jungrungreangkit បាននិយាយកាលពីសប្តាហ៍មុនថា គម្រោងនេះត្រូវការទុនវិនិយោគ យ៉ាងច្រើនសន្ធឹកសន្ធាប់ និងការព្រួយបារម្ភផ្សេងទៀត រួមទាំងពាក់ព័ន្ធនឹងបរិស្ថានផងដែរ។

គម្រោងស្ពាន (Land Bridge) ដែលមានប្រវែងប្រមាណ១០០គីឡូម៉ែត្រនេះ ត្រូវបានផ្តួចផ្តើមឡើង ដោយរដ្ឋាភិបាលរបស់លោក ប្រាយុទ្ធ ចាន់អូចា ក្នុងឆ្នាំ២០២១ ដើម្បីជំរុញសេដ្ឋកិច្ចរបស់ប្រទេសថៃ ក្រៅពីគម្រោងច្រករបៀងសេដ្ឋកិច្ចភាគបូព៌ា (Eastern Economic Corridor)។

គម្រោងស្ពានដីនេះ ទទួលបានការកោតសរសើរថា ស្របតាមយុទ្ធសាស្ត្រជាតិរយៈពេល២០ឆ្នាំ។តាមរយៈគម្រោងស្ពាននេះ រដ្ឋាភិបាលមានគោលបំណងលើកកម្ពស់ការតភ្ជាប់ ក្នុងតំបន់សមុទ្អាន់ដាម៉ាន់ (Andaman Sea) ភាគខាងត្បូង តាមរយៈការអភិវឌ្ឍប្រព័ន្ធដឹកជញ្ជូនសាធារណៈ (Mass Transit System)។

រដ្ឋមន្ត្រីដឹកជញ្ជូនថៃ លោក Suriya Jungrungreangkit និយាយថា គម្រោងនេះកំពុងស្ថិត ក្នុងដំណើរការសិក្សា ដែលត្រូវអនុវត្តន៍ ដោយការិយាល័យគោលនយោបាយ និងផែនការដឹកជញ្ជូន និងចរាចរណ៍ (OTP)។

លោកបានបន្តថា គម្រោងនេះ ត្រូវការទុនវិនិយោគប្រមាណ២៧,៧៥ពាន់លានដុល្លារអាមេរិក ហើយទុនវិនិយោគទាំងមូលនឹងបានពីវិស័យឯកជន ដោយរដ្ឋាភិបាលនឹងដោះស្រាយ តែបញ្ហាដីធ្លីជូនប៉ុណ្ណោះ៕ Bangkok Post៕

ដោយ:ហ្វី អូណា
ភ្នំពេញ: ព្រឹកថ្ងៃទី២០ ខែកញ្ញា ឆ្នាំ២០២៣ នៅសាលប្រជុំអគ្គលេខាធិការដ្ឋាន គណៈកម្មាធិការជាតិរៀបចំបុណ្យជាតិ-អន្ដរជាតិ មានកិច្ចប្រជុំក្រោមអធិបតីភាពឯកឧត្តម ឈិន កេតនា ទីប្រឹក្សារាជរដ្ឋាភិបាល អនុប្រធានអចិន្ត្រៃយ៍ និងជាអគ្គលេខាធិការ គណៈកម្មាធិការជាតិរៀបចំបុណ្យជាតិ-អន្តរជាតិ ដោយមាន ការអញ្ជើញចូលរួមពី ឯកឧត្តម លោកជំទាវ តំណាងក្រសួង រដ្ឋលខាធិការដ្ឋាន ស្ថាប័ន និងរដ្ឋបាលរាជធានីភ្នំពេញ ដើម្បីពិភាក្សាការត្រៀមលក្ខណៈរៀបចំពិធីបដិសណ្ឋារកិច្ចទទួល និងជូនដំណើរគណៈប្រតិភូជាន់ខ្ពស់ ដឹកនាំដោយ ឯកឧត្តម សេដ្ឋា ថាវីស៊ីន (Srettha THAVISIN) នាយករដ្ឋមន្ត្រីនៃព្រះរាជាណាចក្រថៃ ដែលនឹងអញ្ជើញមកបំពេញទស្សនកិច្ចផ្លូវការ នៅព្រះរាជាណាចក្រកម្ពុជា នាពេលខាងមុខនេះ។

ជាកិច្ចចាប់ផ្តើម ឯកឧត្តម ឈិន កេតនា ប្រធានអង្គប្រជុំ បានសម្រេចកំណត់រូបភាពចាត់តាំង និងបែងចែកភារកិច្ចជូនក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានីភ្នំពេញ ។
ឯកឧត្តមប្រធាន បានជម្រាបជូនថា តាមកាលបរិច្ឆេទនៃដំណើរបំពេញទស្សនកិច្ចរបស់គណៈប្រតិភូជាន់ខ្ពស់គឺនៅថ្ងៃទី២៨ ខែកញ្ញា ឆ្នាំ២០២៣ គណៈប្រតិភូជាន់ខ្ពស់ដឹកនាំដោយឯកឧត្តម សេដ្ឋា ថាវីស៊ីន (Srettha THAVISIN) នាយករដ្ឋមន្ត្រីនៃព្រះរាជាណាចក្រថៃ នឹងអញ្ជើញមកដល់អាកាសយានដ្ឋានអន្តរជាតិភ្នំពេញ។

សម្រាប់កម្មវិធីបំពេញទស្សនកិច្ចផ្លូវការរបស់គណៈប្រតិភូ÷
-គណៈប្រតិភូអញ្ជើញចូលរួមពិធីដាក់កម្រងផ្កាគោរពវិញ្ញាណក្ខន្ធនៅវិមានឯករាជ្យ និងពិធីថ្វាយកម្រងផ្កាគោរពព្រះវិញ្ញាណក្ខន្ធ ព្រះករុណា “ព្រះបរមរតនកោដ្ឋ” ។
-គណៈប្រតិភូនឹងអញ្ជើញក្នុងជំនួបទ្វេភាគីជាមួយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
-ពិធីជប់លៀងផ្លូវការ រៀបចំដោយ សម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
-គណៈប្រតិភូនឹងមានជំនួបសម្ដែងការគួរសម សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា។
-គណៈប្រតិភូនឹងអញ្ជើញក្នុងជំនួបសម្ដែងការគួរសម សម្ដេចវិបុលសេនាភក្តី សាយ ឈុំ ប្រមុខរដ្ឋស្ដីទី នៃព្រះរាជាណាចក្រកម្ពុជា។
-គណៈប្រតិភូនឹងអញ្ជើញក្នុងជំនួបសម្ដែងការគួរសម សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា។
-គណៈប្រតិភូនិងអញ្ជើញក្នុងពិធីអាហារស្វាគមន៍រៀបចំដោយ សម្ដេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា។
-នៅថ្ងៃខែឆ្នាំដដែលគណៈប្រតិភូជាន់ខ្ពស់និងអញ្ជើញនិវត្តន៍ទៅកាន់មាតុប្រទេសវិញ។ សម្រាប់អគ្គនាយកដ្ឋានទូរទស្សន៍ជាតិកម្ពុជា មានភារកិច្ចផ្សព្វផ្សាយខ្លឹមសារជីវប្រវត្តិរបស់ ឯកឧត្តម សេដ្ឋា ថាវីស៊ីន (Srettha THAVISIN) នាយករដ្ឋមន្ត្រីនៃព្រះរាជាណាចក្រថៃ។ មានភារកិច្ចថតយកព័ត៌មាន និងផ្សព្វផ្សាយខ្លឹមសារនៃដំណើរទស្សនកិច្ចរបស់គណៈប្រតិភូអញ្ជើញដល់ អុំឡុងបំពេញទស្សនកិច្ច និងធ្វើមាតុភូមិនិវត្តន៍។
ឯកឧត្តម ឈិន កេតនា ប្រធានអង្គប្រជុំក៏បានសំណូមពរឲ្យ ឯកឧត្តម លោកជំទាវ តំណាងក្រសួង រដ្ឋលេខាធិការដ្ឋាន ស្ថាប័ន និងរដ្ឋបាលរាជធានីភ្នំពេញ ធ្វើការរាយការណ៍ជូនថ្នាក់ដឹកនាំឲ្យបានជ្រាប និងអនុវត្តតាមស្មារតីអង្គប្រជុំឲ្យទទួលបានលទ្ធផលល្អប្រសើរបំផុត។

សូមជម្រាបថា ដំណើរទស្សនកិច្ចផ្លូវការរបស់ ឯកឧត្តម នាយករដ្ឋមន្ត្រីនៃព្រះរាជាណាចក្រថៃ ធ្វើឡើងបន្ទាប់ពីឯកឧត្តម បានឡើងកាន់តំណែងជានាយករដ្ឋមន្ត្រីថ្មីនៃព្រះរាជាណាចក្រថៃ ពិសេសក្នុងការលើកកម្ពស់ និងពង្រឹងនូវទំនាក់ទំនងល្អប្រពៃណីដែលមានស្រាប់ និងភាពជាដៃគូយុទ្ធសាស្ត្រព្រមទាំងកិច្ចសហប្រតិបត្តិការរវាងកម្ពុជា និងថៃ ទាំងក្នុងក្របខណ្ឌទ្វេរភាគី និងពហុភាគីសម្រាប់ប្រយោជន៍ទៅវិញទៅមកនៃប្រទេស និងប្រជាជនទាំងពីរ។

        ដោយៈ គង់ ហ្វីអូណា

        ភ្នំពេញៈ កម្ពុជា និងអូស្ត្រាលី នៅថ្ងៃទី២២ ខែកញ្ញា​ ឆ្នាំ២០២៣នេះ បានបើកដំណើរការភាពជាដៃគូថ្មីមួយ លើវិស័យកែច្នៃចំណីអាហារ ដើម្បីគាំទ្រដល់សហគ្រាសធុនតូច និងមធ្យម ក្នុងផ្នែកកសិ-ចំណីអាហាររបស់កម្ពុជា ដើម្បីអភិវឌ្ឍផលិតផលថ្មី ទទួលបានស្តង់ដារសុវត្ថិភាពចំណីអាហារ និងពង្រីកទីផ្សាររបស់ពួកគេ។

ភាពជាដៃគូនេះ ត្រូវបានផ្តល់មូលនិធិ ដោយរាជរដ្ឋាភិបាលកម្ពុជា តាមរយៈសហគ្រិនខ្មែរ (KE) និងរដ្ឋាភិបាលអូស្ត្រាលី តាមរយៈកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ច ប្រកបដោយភាពធន់(CAPRED)។ គំនិតផ្តួចផ្តើមនេះ ក៏នឹងសហការជាមួយវិទ្យាស្ថានបច្ចេកវិទ្យាកម្ពុជា សាកលវិទ្យាល័យភូមិន្ទកសិកម្មសាកលវិទ្យាល័យជាតិបាត់ដំបង និងវិទ្យាស្ថានបច្ចេកវិទ្យាកំពង់ស្ពឺ។

កិច្ចការងារធំៗទាំង៣នៃភាពជាដៃគូនេះរួមមាន ទី១ មូលនិធិកែច្នៃចំណីអាហារ ផ្តល់ការគាំទ្រផ្នែកហិរញ្ញវត្ថុ ដល់សហគ្រាសធុនតូច និងមធ្យម ដើម្បីបង្កើតផលិតផលថ្មី ពង្រី​កទីផ្សាររបស់ពួកគេ ឬបំពេ​ញតាមស្តង់ដារសុវត្ថិភាពចំណីអាហារ។ ទី២ វិស័យសេវាកម្មកែច្នៃចំណីអាហារ៖ ជួយដល់សហគ្រាសធុនតូច និងមធ្យមក្នុងការទទួលបានសេវាម្ហូបអាហារ និងបច្ចេកវិទ្យា ដូចជាការកែច្នៃចំណីអាហារ បច្ចេកវិទ្យា ព័ត៌មានទីផ្សារ ម៉ាកយីហោ និងការវេចខ្ចប់។

ទី៣ កម្មវិធីថ្នាក់ជាតិស្តីពីការកែច្នៃកសិ “ចំណីអាហារ ការប្រមូលផ្ដុំសហគ្រាសធុនតូច និងមធ្យម អ្នកស្រាវជ្រាវ និងអ្នកពាក់ព័ន្ធផ្សេងទៀត ដើម្បីចែករំលែកចំណេះដឹង និងគំនិតអំពីការកែច្នៃចំណីអាហារ”។

លោក ចាស្ទីន វ៉ាយអេត ឯកអគ្គរដ្ឋទូតអូស្ត្រាលីប្រចាំនៅកម្ពុជា បានថ្លែងថា អូស្ត្រាលី ប្ដេជ្ញាគាំទ្រដល់ការអភិវឌ្ឍវិស័យកសិ -ចំណីអាហារ ឲ្យមានភាពរស់រវើក ដែលអាចរួមចំណែកទៅដល់ការរីកលូតលាស់នូវសេដ្ឋកិច្ចប្រកបដោយភាពធន់ បរិយាបន្ន និងនិរន្តរភាពនៅប្រទេសកម្ពុជា។

លោកបណ្ឌិត ឈៀង វណ្ណមុនិណ្ឌ នាយកប្រតិបត្តិនៃសហគ្រិនខ្មែរ បានថ្លែងថា​ ស្របតាមចក្ខុវិស័យ និងបេសកកម្មរបស់សហគ្រិនខ្មែរ ក្នុងការពង្រីកសក្តានុពលទីផ្សារ សម្រាប់សហគ្រាសធុន តូច និងមធ្យម ទាំងក្នុងស្រុក និងក្រៅស្រុក មូលនិធិនេះនឹ ងជួយលើកកម្ពស់សហគ្រាសធុនតូច និងមធ្យមនៅកម្ពុជា និងផ្ដល់ឲ្យពួកគេនូវធនធាន ដែលពួកគេត្រូវការដើម្បីទទួលបានជោគជ័យ៕

ដោយ: គង់ លាងហួរ

អន្តរជាតិ: ធនាគារអភិវឌ្ឍអាស៊ី (ADB)បានព្យាករថា កំណើនសេដ្ឋកិច្ចរបស់បណ្តាប្រទេស កំពុងអភិវឌ្ឍនៅតំបន់អាស៊ីនៅឆ្នាំនេះ នឹងទាបជាងការរំពឹងទុកពីមុនបន្តិច ដោយសារវិបត្តិអចលនទ្រព្យនៅប្រទេសចិន និងហានិភ័យគ្រោះរាំងស្ងួត El Niño។

ធនាគារADB បានបន្ទាបការព្យាករណ៍របស់ខ្លួន សម្រាប់កំនើនសេដ្ឋកិច្ចប្រចាំឆ្នាំ២០២៣ នៅតំបន់អាស៊ី ដែលកំពុងអភិវឌ្ឍ មកនៅត្រឹម៤,៧% បើធៀបនឹង៤,៨% ដែលបានព្យាករកាលពីខែកក្កដាកន្លងទៅ។

ប៉ុន្តែកំណើនសេដ្ឋកិច្ចប្រចាំឆ្នាំ២០២៤ សម្រាប់តំបន់អាស៊ី កំពុ​ងអភិវឌ្ឍន៍ដែលរួមបញ្ចូលប្រទេសចំនួន៤៦ នៅតំបន់អាស៊ីប៉ាស៊ីហ្វិក ដោយមិនរាប់បញ្ចូលប្រទេសជប៉ុន អូស្ត្រាលី និងនូវែលសេឡង់ ត្រូវបានដំឡើងបន្តិចទៅដល់៤,៨% បើធៀបនឹងការព្យាករពីមុន៤,៧%។

លោក Albert Park ប្រធានសេដ្ឋវិទូរបស់ធនាគារ ADB បានថ្លែងប្រាប់សន្និសីទសារព័ត៌មានមួយថា “យើងមើលឃើញថា កំនើនសេដ្ឋកិច្ចដ៏ធន់នៅក្នុងតំបន់នេះ ពិតជាផ្អែកលើការប្រើប្រាស់ និងការវិនិយោគក្នុងស្រុកដ៏រឹងមាំ ទោះបីជាមានការថយចុះ នៃតម្រូវការខាងក្រៅយ៉ាងណាក្តី”។

ធនាគារ ADB បានបន្ទាបការព្យាករណ៍ កំណើនសេដ្ឋកិច្ចសម្រាប់តំបន់អាស៊ីបូព៌ា អាស៊ីខាងត្បូង និងអាស៊ីអាគ្នេយ៍នៅឆ្នាំនេះ ដោយសេដ្ឋកិច្ចចិន និងឥណ្ឌារំពឹងថា នឹងកើនឡើងក្នុងរង្វង់៤,៩% និង៦,៣%រៀងៗគ្នានៅឆ្នាំនេះ បើធៀបនឹងការព្យាករពីមុនក្នុងរង្វង់៥% និង៦,៤%រៀងៗគ្នាកាលពីខែកក្កដា។

ធនាគារADB បានបញ្ជាក់នៅក្នុងរបាយការណ៍របស់ខ្លួនថា វិបត្តិ​អចលនទ្រព្យរបស់ប្រទេសចិន បានបង្កឱ្យមានហានិភ័យ ដែលទាញឱ្យសេដ្ឋកិច្ចធ្លាក់ចុះ ហើយវិបត្តិនេះអាចរារាំង ដល់កំណើននៅក្នុងតំបន់៕

តែម សុខុម

ប៉េកាំង: ប្រទេសចិន កំពុងចាត់វិធានការបន្ធូរបន្ថយវិធានការគ្រប់គ្រងមូលធនដ៏តឹងរ៉ឹង ក្នុងក្រុងសំខាន់ៗចំនួនពីររបស់ខ្លួន ក្នុងកិច្ចខិតខំប្រឹងប្រែង ដើម្បីទាក់ទាញក្រុមហ៊ុនបរទេស ឱ្យវិលត្រលប់មកវិញ ខណៈការវិនិយោគក្រៅប្រទេសធ្លាក់ចុះ ហើយសេដ្ឋកិច្ចចិន ក៏ដាំក្បាលចុះ។

នៅក្នុងតំបន់ពាណិជ្ជកម្មសេរីសាកល្បង និងតំបន់ Lingang នៃក្រុសៀងហៃ បណ្ដាវិនិយោគិនបរទេសពេលនេះ ត្រូវបានអនុញ្ញាតឱ្យផ្ទេរដោយសេរី នូវមូលនិធិដែលទាក់ទិន ការវិនិយោគរបស់ពួកគេទាំងក្នុង និងក្រៅប្រទេសចិន ដោយគ្មានការពន្យារពេលណាមួយឡើយ ប្រសិនបើប្រាក់នោះ “មានប្រភពច្បាស់លាស់ និងត្រឹមត្រូវតាមច្បាប់” ដែលអាជ្ញាធរក្រុងសៀងហៃ និយាយថាស្ថិតក្នុងវិធានដែលបានចូលជាធរមាននៅថ្ងៃទី០១ ខែកញ្ញា។

ជនបរទេសដែលបម្រើការ នៅក្រុមហ៊ុនបរទេសមានមូលដ្ឋាននៅក្នុងតំបន់ទាំងនោះ រួមទាំងបុគ្គលិកមកពីហុងកុង ម៉ាកាវ ឬ កោះតៃវ៉ាន់ ផងអាចផ្ទេរប្រាក់ឈ្នួល និងប្រាក់ចំណូលស្របច្បាប់ផ្សេងទៀតចេញពីប្រទេសចិន បានដោយសេរី និងស្របច្បាប់។

អាជ្ញាធរក្រុងសៀងហៃបានបន្ថែមថា ប្រភេទរូបិយប័ណ្ណ ចំនួននៃការផ្ទេរប្រាក់ ឬ ភាពញឹកញាប់នៃការផ្ទេរប្រាក់ នឹងមិនត្រូវបានដាក់កម្រិតដោយស្ថាប័ន ឬបុគ្គលណាមួយឡើយ។ នេះមានន័យថា ពួកគេអាចផ្ទេរប្រាក់ជារូបិយប័ណ្ណ ប្រភេទណាក៏បាន ផ្ញើរចេញប៉ុន្មានដងក៏បាន ឬផ្ញើញឹកញាប់ប៉ុនណាក៏បានដោយសេរី។

ក្រុងប៉េកាំង ក៏បានស្នើបទប្បញ្ញត្តិស្រដៀងគ្នានេះដែរ សម្រាប់ទីក្រុងនេះទាំងមូល។ នេះបើយោងតាមសេចក្តីព្រាងវិធានចេញផ្សាយកាលពីថ្ងៃពុធ សប្ដាហ៍នេះ ដែលពេលនេះ សុំឱ្យសាធារណជនជួយផ្ដល់មតិកែកម្អ។
ទន្ទឹមនឹងនេះ ក្រុងប៉េកាំង ក៏កំពុងស្វះស្វែងលើកលែង ក្រុមហ៊ុននៅក្រៅប្រទេស ពីការចុះឈ្មោះអត្រាប្តូរប្រាក់បរទេស សម្រាប់ការវិនិយោគឡើងវិញរបស់ពួកគេផងដែរ។

អាជ្ញាធរទីក្រុងប៉េកាំងបាននិយាយថា វិធានដែលត្រូវបានស្នើឡើងទាំងនេះ មានគោលបំណងសម្រួល និងជំរុញការវិនិយោគធុរកិច្ចបរទេស៕ The Edge Markets៕

ដោយ: គង់ លាងហួរ

អន្តរជាតិ: ក្រុមហ៊ុនសារព័ត៌មានអាមេរិក U.S. News & World Report បានធ្វើការចងក្រង និងវាយតម្លៃចំណាត់ថ្នាក់ បណ្តាប្រទេសល្អបំផុតទាំង៨៧ នៅលើពិភពលោក សម្រាប់ជនបរទេសចូលនិវត្តន៍ប្រកបដោយផាសុកភាព ឬដោយសុខស្រួល។

នេះបើយោងតាមសារពត៌មាន វៀតណាម VNexpress ចុះផ្សាយកាលពីថ្ងៃព្រហស្បតិ៍ ទី២១ ខែកញ្ញា ឆ្នាំ២០២៣។ក្នុងចំណោម៨៧ប្រទេសនោះ កម្ពុជាជាប់ចំណាត់ថ្នាក់លេខ៥២ ជាប្រទេសល្អបំផុតរបស់ពិភពលោក សម្រាប់ការចូលនិវត្តន៍ប្រកបដោយផាសុកភាព ឬដោយសុខស្រួល។ចំណែក ប្រទេសកូរ៉េខាងត្បូង ជាប់ចំណាត់ថ្នាក់លេខ៥០ ប្រទេសចិនជាប់ចំណាត់ថ្នាក់លេខ៦២ ខណៈប្រទេសមីយ៉ាន់ម៉ាជាប់ចំណាត់ថ្នាក់លេខ៧៥។

ប្រទេសវៀតណាមជាប់ចំណាត់ថ្នាក់លេខ៤០ ពោលគឺឈរនៅពីក្រោយប្រទេសជិតខាង ដូចជា ថៃជាប់ចំណាត់ថ្នាក់លេខ១៨ ហ្វីលីពីនជាប់ចំណាត់ថ្នាក់លេខ២៧ សិង្ហបុរី ជាប់ចំណាត់ថ្នាក់លេខ២៩ ម៉ាឡេស៊ី ជាប់ចំណាត់ថ្នាក់លេខ៣១ និងឥណ្ឌូណេស៊ីជាប់ចំណាត់ថ្នាក់លេខ៣៩។

នៅឆ្នាំនេះ ប្រទេសស្វីសត្រូវបានបោះឆ្នោត ជ្រើសរើសជាប្រទេ​សល្អបំផុតទី១ នៅលើពិភពលោក សម្រាប់អ្នកចូលនិវត្តន៍ បន្ទាប់មកគឺប្រទេសព័រទុយហ្គាល់ ជាប់ចំណាត់ថ្នាក់លេខ២ និងអូស្ត្រាលីជាប់ចំណាត់ថ្នាក់លេខ៣។

ចំណាត់ថ្នាក់លេខ៤ បានទៅលើប្រទេសនូវែលសេឡង់ ចំណាត់ថ្នាក់លេខ៥ បានទៅលើប្រទេសអេស្ប៉ាញ ចំណាត់ថ្នាក់លេខ៦បានទៅលើប្រទេសកាណាដា។

ចំណាត់ថ្នាក់លេខ៧ បានទៅលើប្រទេសស៊ុយអែត ចំណាត់ថ្នាក់លេខ៨ បានទៅលើប្រទេសអ៊ីតាលី ចំណាត់ថ្នាក់លេខ៩បានទៅលើប្រទេសក្រិក និងចំណាត់ថ្នាក់លេខ១០ បានទៅលើប្រទេសដាណឺម៉ាក។

ការវាយតម្លៃចំណាត់ថ្នាក់ធ្វើឡើង ដោយផ្អែកលើការស្ទង់មតិជាសកលលើមនុស្សជាង១៧.០០០នាក់ ដែលកត់ត្រាការយល់ឃើ​ញរបស់ពួកគេលើកត្តាជាច្រើនដូចជា តម្លៃសមរម្យ(affordability) បរិយាកាសពន្ធដ៏អំណោយផល ភាពរួសរាយរាក់ទាក់ អាកាសធាតុល្អ ការគោរពសិទ្ធិអចលនទ្រព្យ និងប្រព័ន្ធសុខភាពសាធារណៈ ដែលមានការអភិវឌ្ឍល្អ៕

ដោយៈ គង់ ហ្វីអូណា

        ភ្នំពេញៈ បន្ទាប់ពីមានការលើកឡើង និងបង្ហោះលើបណ្ដាញសង្គមពី មហាជន រួមទាំងផលិតករភាពយន្តមួយចំនួន ពីករណីពិបាក ថតរូប ឬថតវីដេអូ នៅរមណីយដ្ឋាន និងប្រាសាទអង្គរ នោះ មន្ត្រីជាន់ខ្ពស់ របស់ “អាជ្ញាធរជាតិអប្សរា” បានឆ្លើយបំភ្លឺពីបញ្ហានេះ។

លោកឡុង កុសលអគ្គនាយករង និងជាអ្នកនាំពាក្យអាជ្ញាធរជា​តិ​អប្សរា បានមានប្រ​សាសន៍កាលពីថ្ងៃទី២២ កញ្ញា បន្ទាប់ពីមកដល់កម្ពុជា ក្រោយបញ្ចប់បេសកកម្មចូលរួមសម័​យប្រជុំលើកទី៤៥ នៃគណៈកម្មាធិការបេតិក​ភណ្ឌពិ​ភពលោក អង្គការយូណេស្កូ នាទីក្រុងរីយ៉ាដ ប្រទេស​សាអូឌីអារាប៊ីត។
លោកបានប្រាប់សារព័ត៌មានក្នុងស្រុកមួយថា អាជ្ញាធរជាតិអប្ស​រា អត់មានដាក់កំហិត អំពីការផ្សព្វផ្សាយរមណីយដ្ឋានអង្គរទេ ខណៈមានបងប្អូនប្រជាពល​រដ្ឋយើងច្រើន ព្រមទាំងបណ្ដាញផ្សព្វផ្សាយជាតិ និងបណ្ដាស្ថានីយទូរទស្សន៍ជាច្រើន នៅទូទាំងពិភពលោក បានទាក់ទងផ្សព្វផ្សាយជាបន្តបន្ទាប់។

លោកឡុង កុសល មានប្រសាសន៍បញ្ជាក់ថា “រាល់ការថតរូបជាអនុស្សាវរីយ៍ សម្រាប់គ្រួសារ សម្រាប់បង្ហោះតាមFacebook, TikTok ដែលនិយាយពីវប្បធម៌ ប្រពៃណី ភាពអស្ចារ្យទៅលើស្នាដៃសិល្បៈ វិស្វកម្មសំណង់របស់ប្រាសាទ របស់បុព្វបុរសខ្មែរយើង [អាជ្ញារជាតិអប្សរា] អត់មានអ្វីជាបញ្ហាទេ យើងមិនដែលតម្រូវឱ្យគាត់ធ្វើការស្នើសុំទេ”។អគ្គនាយរងអាជ្ញាធរជាតិអប្សរា ខាងលើមានប្រសាសន៍បន្តថា អាជ្ញាធរជាតិអប្សរា តម្រូវឱ្យការស្នើសុំជាមុន សម្រាប់អ្នកថតផ្សាយតាម​Youtube ផលិតភាពយន្ត ឬអ្នកយកផលិតផលទៅផ្សាយពាណិ​ជ្ជកម្ម ដោយប្រើរូបភាពរបស់អង្គរ ឬផ្នែកណាមួយរបស់រមណីយដ្ឋានអង្គរ ដែលអាជ្ញាធរចាំបាច់ត្រូវឃាត់ និងឱ្យស្នើសុំជាមុន។

លោកឡុង កុសល មានប្រសាសន៍បន្ថែមថា ព្រោះរូបភាពទាំងអស់នោះ ដែលគាត់រកពាណិជ្ជកម្ម ឬរកប្រាក់ចំណូល គឺអាចប៉ះពាល់ទៅដល់ខ្លឹមសារជាប្រវត្តិសាស្ត្រ ហើយថាតើសមរម្យ ឬអត់ក្នុងការយករូបភាពរបស់អង្គរ ទៅបម្រើពាណិជ្ជកម្មផលិតផលរបស់គាត់ នេះហើយជាចំណុចដែលយើងត្រូវគិតគូរ។ អ៊ីចឹងទើបយើងឱ្យគាត់ស្នើសុំមកយើងជាមុន ដើម្បីយើងជួយពិនិត្យលក្ខណៈ ទាំងបច្ចេកទេស រួមទាំងខ្លឹមសារ ថាតើខ្លឹមសារនោះត្រឹមត្រូវ ឬអត់ ល្អ ឬអត់ ពេលប្រើប្រាស់ (ផ្សាយ) ទៅ អាចចៀសផុតពីផលប៉ះពាល់ ទៅលើអត្ថន័យខ្លឹមសារជាអវិជ្ជមានណាមួយ មកដល់ទាំងប្រវត្តិសាស្ត្រ ទាំងរូបភាពជាក់ស្ដែងរបស់អង្គរ។លោកបន្ថែមថា ព្រោះការដែលយើងប្រើប្រាស់ មិនសមស្រប គឺធ្វើឱ្យប៉ះពាល់ផ្លូវអារម្មណ៍ របស់បងប្អូនប្រជាពលរដ្ឋខ្មែរ។ ដូចនេះ គប្បីក្នុងការប្រើប្រាស់រូបភាពនោះ គួរមានការទទួលខុសត្រូវ។គណៈកម្មការបេតិកភណ្ឌពិភពលោក នៃអង្គការយូណេស្កូ ក្នុងសម័យប្រជុំ លើកទី៤៥ ប្រព្រឹត្តទីក្រុងរីយ៉ាដ ប្រទេសអារ៉ាប៊ីសាអូឌីត បានសម្តែង នៃការអបអរសាទរចំពោះប្រទេសកម្ពុជា ជាពិសេសចំពោះ អាជ្ញាធរជាតិអប្សរាស្តីអំ ពីការអភិរក្សតំបន់អង្គរ តាមរយៈសេចក្តីសម្រេច លេខ 45 COM 7B.152 និង អាជ្ញាធរជាតិសំបូរព្រៃគុក ស្តីអំពី តំបន់អភិរក្សសំបូរព្រៃគុក តាមរយៈសេចក្តីសម្រេច លេខ 45 COM 7B.151 ខណៈប្រទេសមួយចំនួន សូម្បីប្រទេសអភិវឌ្ឍ ទាំងនៅអាស៊ី និងនៅអឺរ៉ុបក្ដី បានទទួលការបន្ទោស និងណែនាំឱ្យកែតម្រូវ ដោយសារតែគ្រប់គ្រង តំបន់បេតិកភណ្ឌពិភពលោកមិនបានល្អ ឬឈានដល់ប្រឈមនឹងគ្រោះថ្នាក់។អាជ្ញាធរជាតិអប្សរាបានឃាត់ និងស្វែងរកជនបរទេសមួយចំនួនមកផ្ដន្ទាទោស ខណៈពួកគេបានថតរូបអាសអាភាស ក្នុងរមណីយដ្នានអង្គរ។

ជាក់ស្ដែង កាលពីដើមឆ្នាំ២០១៥ ក្រោយពីចាប់បានជនរទេសសចំនួន៥នាក់ជាបន្តបន្ទាប់ ដែលបានលួចថតរូបអាសអាភាស នៅតាមប្រាសាទព្រះខ័ន និងប្រាសាទបន្ទាយក្ដី អាជ្ញាធរជាតិអប្សរា បានបន្ថែមកម្លាំងសន្ដិសុខ ប្រមាណ១ពាន់នាក់ តាមប្រាសាទបុរាណគ្រប់ទីកន្លែង ដើម្បីយាមកាមតាមឃ្លាំមើល ពីសកម្មភាពមិនប្រក្រតីរបស់ភ្ញៀវទេសចរ មួយចំនួន និងការពារមិនឱ្យពួកគាត់ប៉ះពាល់ ដល់វត្ថុបុរាណ និងចូលតំបន់ហាម ឃាត់ដែលនាំឲ្យគ្រោះថ្នាក់ ដល់ពួកគាត់។

កាលពីសប្តាហ៍មុន ប្រធានសមាគមទេសចរណ៍អាស៊ីប៉ាស៊ីហ្វិក លោកធួន ស៊ីណានបានមានប្រសាសន៍លើកឡើងថា អាជ្ញាធរជាតិអប្សរា តែអនុញ្ញាត្តឲ្យថតរូបភាព​ ឬវីដេអូលើរមណីយដ្ឋានអង្គរ ព្រោះបើមនុស្សម្នាក់ថត និងផ្សព្វផ្សាយបានត្រឹមមនុស្ស៣នាក់ បើ១០០លាននាក់បានផ្សព្វផ្សាយ វានឹងបានឃើញដល់មនុស្ស៣០០លាននាក់នៅទូទាំងពិភពលោក។លោកបញ្ជាក់ថា “ប្រសិនជាអាជ្ញាធរអប្សរា រកលុយបាន១ឆ្នាំ១០០០លានដុល្លារ ពីការហាមឃាត់នោះ គួរតែហាមឃាត់ តែបើរកមិនបាន មិនគួរហាមឃាត់ការថតរូប និងវីដេអូនោះទេ៕