ដោយៈ គង់ ហ្វីអូណា

        ភ្នំពេញៈ អ្នកជំនាញផ្នែកដីធ្លី នៅតែមើលឃើញឱកាសវិនិយោគដីធ្លី នៅតែមានផលចំណេញសម្រាប់អនាគត។

ប្រធានសមាគមអចលនទ្រព្យសកល លោកឧកញ៉ាសំ សុខនឿនបានមានប្រសាសន៍នៅវេទិកាមួយ ដែលរៀបចំដោយក្រុមហ៊ុនKW Cambodiaកាលពីចុងសប្តាហ៍មុនថា ការវិនិយោគដីធ្លីនីតែមានឱកា​សចំណេញ ប៉ុន្តែអ្នកវិនិយោគត្រូវប្រាកដ និងដឹងខ្លួនថា ការវិនិយោគដីធ្លីត្រូវការរយៈពេលវែង មិនមែនដូចការទិញ លក់ត្រី ឬមាន់នៅទីផ្សារនោះទេ។

លោកបន្តថា “ហេតុនេះ ក្នុងស្ថានភាពបច្ចុប្បន្ន ប្រសិនជាអ្នកមានលុយច្រើននៅធនាគារ ឬមានលុយច្រើនមិនមានបញ្ហាដល់លំហូរសាច់ប្រាក់សម្រាប់គ្រួសារ ឬអាជីវកម្មរបស់ខ្លួនទេ សូមបន្តវិនិយោគ”។លោកបន្តថា “ផ្ទុយទៅវិញ ប្រសិនជាមានលំហូរសាច់ប្រាក់មិននឹងន ឬប្រផុតប្រផើយ មិ​នគួរវិនិយោគនោះទេ ព្រោះការទិញអចលនទ្រព្យនៅពេលនេះ ទោះបីបានតម្លៃល្អ ប៉ុន្តែវាត្រូវការពេលវេលា ដើម្បីទទួលបានឱកាសចំណេញ”។លោកឧកញ៉ាសំ សុខនឿនបានបន្តទៀតថា ការទិញដីនៅជាយក្រុងភ្នំពេញ “ជាជម្រើសល្អ” សម្រាប់ការវិនិយោគនាពេលនេះ ព្រោះស្ថានភាពសេដ្ឋកិច្ច នៅតំបន់ជាយក្រុងភ្នំពេញ នៅតែមានភាពល្អប្រសើរ ដោយសារមានមនុស្សរស់នៅច្រើន មានរោងចក្រ សហគ្រាសច្រើន និងការរៀបចំហេដ្ឋារចនាសម្ព័ន្ឋរបស់រដ្ឋាភិបាល មានភាពល្អប្រសើរ។ លោកឧកញ៉ាបន្តទៀតថា ស្ថានភាពទីផ្សារនៅក្រោយការបោះឆ្នោត គឺមានភាពកាន់តែប្រសើរ ដោយអ្នកវិនិយោគជាតិ អន្តរជាតិបានចាប់ផ្តើមវិនិយោគ មិនរង់ចាំមើលទៀតនោះទេ ប៉ុន្តែពួកគេទិញអចលនទ្រព្យក្នុងគោលដៅច្បាស់លាស់ជាងមុន៕

ភ្នំពេញ: យោង​តាម​​សេចក្តីថ្លែង​ការណ៍​របស់​ធនាគារ​ជាតិ​នៃកម្ពុជា​ (NBC) ​​ការស្រាវជ្រាវ​ដំបូង​របស់​អង្គ​ការ​ស្រាវជ្រាវ​សេដ្ឋកិច្ច​ ​និង​ហិរញ្ញវត្ថុ​អន្តរជាតិ​បង្ហាញ​ថា​ ​សេដ្ឋកិច្ច​កម្ពុជា​បាន​បន្ត​ងើបឡើង​វិញ​យ៉ាង​ខ្លាំង​​ដោយ​មាន​អត្រា​កំណើន​ខ្ពស់​ ​ដែល​គាំទ្រ​ដោយ​សកម្មភាព​សេដ្ឋកិច្ច​ក្នុងស្រុក​កាន់​តែ​សកម្ម​ ​និង​កំណើន​ក្នុង​វិ​ស័យ​សេវាកម្ម​របស់​ខ្លួន​។​

​សេចក្តីថ្លែង​ការណ៍​បាន​ចង្អុលបង្ហាញ​ថា​ ​លទ្ធផល​វាយ​តម្លៃ​ដំបូង​ស្តីពី​ស្ថានភាព​សេដ្ឋកិច្ច​របស់​កម្ពុជា​ត្រូវ​បាន​បង្ហាញ​កាលពី​ថ្ងៃ​ព្រហស្បតិ៍​ក្នុង​កិច្ចប្រជុំ​ពិគ្រោះ​យោបល់​រវាង​លោក​ ​ស៊ុំ​ ​ស​ន្និ​សិទ្ធ​ ​ទេសាភិបាល​រង​នៃ​ធនាគារ​ជាតិ​ ​និង​គណៈប្រតិភូ​ដឹកនាំ​ដោយ​លោក​ Kouq​in​g​ ​L​i​ ​ប្រធាន​ការិយាល័យ​ស្រាវជ្រាវ​ម៉ា​ក្រូ​សេដ្ឋកិច្ច​អា​ស៊ាន​+​៣​ (​AM​RO) ​នៅ​ទីស្នាក់ការ​កណ្តាល​នៃ​ធនាគារ​ជាតិ​នៅ​ទី​ក្រុងភ្នំពេញ​។​​សេចក្តី​ថ្លែង​ការណ៍​បាន​ចង្អុល​បង្ហាញ​ថា​៖​ ​«​គណៈប្រតិភូ​ក៏​បាន​ផ្តល់​នូវ​អនុសាសន៍​មួយ​ចំនួន​ ​ដើម្បី​ទប់ទល់​​​នឹង​ហា​និ​ភ័យ​ ​ភាព​ងាយ​រងគ្រោះ​ ​និង​បញ្ហា​ប្រឈម​ដែល​បាន​ជួបប្រទះ​»​​វា​បាន​បន្ថែម​ថា​ ​ប្រតិភូ​របស់​ ​AM​RO ​បាន​បង្ហាញ​ពី​វឌ្ឍនភាព​របស់​ ​AM​RO ​លើ​វិ​ស័​យ​សេដ្ឋកិច្ច​ ​និង​ហិរញ្ញវត្ថុ​របស់​កម្ពុជា​ ​ដោយមាន​ការ​គាំទ្រ​យ៉ាង​ខ្លាំង​ពី​ ​ធនាគារ ​ជាតិនៃ​កម្ពុជា​ ​គឺជា​ធនាគារ​កណ្តាល​ ​និង​អាជ្ញាធរ​រូបិយវត្ថុ​កម្ពុជា​។​ ​សេចក្តីថ្លែង​ការណ៍​បាន​និយាយ​ថា​៖​ ​«​ធនាគារ​កណ្តាល​បាន​ផ្តល់​កិច្ច​សហប្រតិបត្តិការ​ ​និង​កិច្ច​សហប្រតិបត្តិការ​ដ៏​អស្ចារ្យ​ជាមួយ​អង្គការ​ក្នុង​ការ​អនុវត្ត​ការងារ​របស់​ខ្លួន​»​។​​លោក​ ​ស៊ុំ​ ​ស​ន្និ​សិទ្ធ​ ​បាន​សម្តែង​ការ​កោត​សរសើរ​ចំពោះ​ការ​គាំទ្រ​របស់​ ​AM​RO ​ដល់​ NBC ​ក្នុង​តួនាទី​ជា​ប្រធាន​របស់​ខ្លួន​នៅ​ក្នុង​កិច្ចប្រជុំ​អា​ស៊ាន​បូក​បី​ ​កាលពីឆ្នាំមុន​ ​និង​ការ​ផ្តល់​កម្មសិក្សា​នៅ​ ​ការិយាល័យ​ ​AM​RO ​ដល់​មន្ត្រី​របស់​ NBC ​ជា​រៀងរាល់​ឆ្នាំ​៕

ដោយ: គង់ លាងហួរ

សេអ៊ូល: ក្រុមសេដ្ឋវិទូ និងមន្ត្រីឧស្សាហកម្មបានអំពាវនាវឱ្យរដ្ឋាភិបាលកូរ៉េខាងត្បូង ផ្តល់នូវការលើកទឹកចិត្តផ្នែកពន្ធសាជីវកម្ម ដើម្បីទាក់ទាញខ្សែសង្វាក់ផលិតកម្ម នៅក្រៅប្រទេសរបស់ក្រុមហ៊ុនក្នុងស្រុកត្រឡប់មកវិញ។

ទោះជាយ៉ាងនេះ ក្រុមហ៊ុននានាហាក់ដូចជាមិនពេញចិត្ត ចំពោះកញ្ចប់លើកទឹកចិត្តពន្ធ នាពេលថ្មីៗនេះរបស់រដ្ឋាភិបាលនោះទេ ដោយសារកញ្ចប់ទាំងនេះ នៅតែមិនបំពេញតាមស្តង់ដារសកល ហើយវាក្លាយជាបន្ទុកមួយ ជាពិសេសចំពោះក្រុមហ៊ុនធំៗ ដែលត្រូវវិនិយោគច្រើន ដើម្បីផ្ទេរមូលដ្ឋានផលិតកម្មរបស់ពួកគេ ចូលមកក្នុងប្រទេសវិញ។ប៉ុន្តែក្រុមមន្ត្រីបានអះអាងថា រដ្ឋាភិបាលមិនគួរស្ទាក់ស្ទើរចិត្ត ក្នុងការផ្តល់ជូននូវកញ្ចប់លើកទឹកចិត្ត ផ្នែកពន្ធបន្ថែមទៀតនោះទេ ជាពិសេសដល់តួអង្គឧស្សាហកម្មសំខាន់ៗ ជាយុទ្ធសាស្ត្រជាតិមួយចំនួន ដូចជាបន្ទះឈីប និងថ្មអាគុយ ស្របពេលមានការព្រួយបារម្ភកាន់តែខ្លាំងឡើង លើការរំខាននៃខ្សែសង្វាក់ផ្គត់ផ្គង់សកល។

លោក Kim Moon-tae ប្រធានផ្នែកគោលនយោបាយឧស្សាហកម្មនៅសភាពាណិជ្ជកម្ម និងឧស្សាហកម្មកូរ៉េ បានលើកឡើងថា “ខ្សែសង្វាក់ផ្គត់ផ្គង់សកល កំពុងត្រូវបានរៀបចំឡើងវិញ ក្នុងល្បឿនយ៉ាងលឿន ដូចដែលបានបង្ហាញពីការចាកចេញ នាពេលថ្មីៗនេះរបស់ក្រុមហ៊ុនអន្តរជាតិពីប្រទេសចិន” ។អ្នក​ជំនាញ​រូប​នេះ​បាន​ចង្អុល​បង្ហាញ​ថា គោល​នយោបាយ​ទាក់ទាញក្រុមហ៊ុន ក្នុងស្រុកត្រឡប់មកវិញរបស់កូរ៉េខាងត្បូង នៅ​តែ​មាន​កម្រិត​ទាប​ជាង​ បើធៀបនឹងដៃគូពិភពលោក​ផ្សេងៗរបស់​ខ្លួន។

យោងតាមលោកKim Moon-tae បានឱ្យដឹងទៀតថា នៅក្រោមស្ថានភាពបច្ចុប្បន្ននេះ ក្រុមហ៊ុននានានឹងជ្រើសរើស សាងសង់រោងចក្រផ្ទាល់ខ្លួនរបស់ពួកគេ នៅក្នុងប្រទេសណា ដែលផ្តល់ការលើកទឹកចិត្តផ្នែកពន្ធល្អប្រសើរជាងយើង។

ផ្ទុយទៅវិញ បណ្តាប្រទេសដែលមានសេដ្ឋកិច្ចជឿនលឿន ដូចជាសហរដ្ឋអាមេរិក និងជប៉ុនកំពុងគាំទ្រយ៉ាងចាស់ដៃ និងទាក់ទាញក្រុមហ៊ុនក្នុងស្រុក ដែលបានផ្លាស់ទៅបរទេស ឱ្យត្រឡប់ចូលមកប្រទេសកំណើតវិញ តាមរយៈការដាក់ចេញ គោលនយោបាយលើកទឹកចិត្តនានា ដោយសហរដ្ឋអាមេរិក បានដាក់ចេញច្បាប់កាត់បន្ថយអតិផរណា៕

ភ្នំពេញ:តបតាមការញ្ជើញរបស់ ឯកឧត្តម សារ៉ាន់ ចារើនសុវណ្ណ លេខាធិការអចិន្ត្រៃយ៍ នៃក្រសួងការបរទេសថៃ លោកជំទាវបណ្ឌិត សឿង រដ្ឋចាវី រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ បានអញ្ជើញដឹកនាំគណៈប្រតិភូទៅបំពេញទស្សនកិច្ចការងារ នៅទីក្រុងបាងកក ពីថ្ងៃទី១៤-១៥ ខែកញ្ញា ឆ្នាំ២០២៣។

នៅក្នុងឱកាសទស្សនកិច្ចការងារនេះ លោកជំទាវបណ្ឌិត រដ្ឋលេខាធិការ និងឯកឧត្តម លេខាធិការអចិន្ត្រៃយ៍ បានពិភាក្សាយ៉ាងផុសផុលអំពីទំនាក់ទំនង និងកិច្ចសហប្រតិបត្តិការទ្វេភាគីរវាងព្រះរាជាណាចក្រកម្ពុជា និងព្រះរាជាណាចក្រថៃ លើគ្រប់វិស័យ ដូចជា នយោបាយ សន្តិសុខ សេដ្ឋកិច្ច ពាណិជ្ជកម្ម វិនិយោគ អប់រំ ទេសចរណ៍ ការងារ ការដោះមីន និងកិច្ចសហប្រតិបត្តិការផ្នែកបច្ចេកទេស។ទន្ទឹមនឹងនេះដែរ ភាគីទាំងពីរបានផ្តោតការពិភាក្សាអំពីការត្រៀមរៀបចំដំណើរទស្សនកិច្ចផ្លូវការរបស់ ឯកឧត្តម សេដ្ឋា ថាវីស៊ីន នាយករដ្ឋមន្ត្រី នៃព្រះរាជាណាចក្រថៃ មកកាន់ព្រះរាជាណាចក្រកម្ពុជា នៅចុងខែកញ្ញា ឆ្នាំ២០២៣ ខាងមុខនេះ។លោកជំទាវបណ្ឌិត រដ្ឋលេខាធិការ និងឯកឧត្តម លេខាធិការអចិន្ត្រៃយ៍ មានជំនឿយ៉ាងមុតមាំថា ក្រោមការដឹកនាំប្រកបដោយគតិបណ្ឌិត និងចក្ខុវិសយ័របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម សេដ្ឋា ថាវីស៊ីន នាយករដ្ឋមន្ត្រី នៃព្រះរាជាណាចក្រថៃ ទំនាក់ទំនងមិត្តភាព និង កិច្ចសហប្រតិបត្តិការទ្វេភាគីដ៏ល្អប្រសើររវាងព្រះរាជាណាចក្រទាំងពីរនឹងកាន់តែត្រូវបានបន្តពង្រឹង និងពង្រីកបន្ថែមទៀត ដើម្បីផលប្រយោជន៍របស់ប្រជាជនទាំងពីរ។

ដោយ: គង់ លាងហួរ

អន្តរជាតិ: យោងតាមការចុះផ្សាយដោយសារពត៌មាន The Nationបានបង្ហាញថា គេហទំព័រដ៏ល្បីល្បាញខាងម្ហូបអាហារTasteAtlas.com បានប្រកាសបញ្ជីឈ្មោះម្ហូបអាហារ “ប្រភេទឆា” ល្អបំផុតទាំង៥០ នៅលើពិភពលោកប្រចាំឆ្នាំ២០២៣នេះ (Best Stir-Fries in the World 2023)។

ក្នុងនោះ ម្ហូបឆាឡុកឡាក់(Lok Lak) របស់កម្ពុជា បានជាប់ចំណាត់ថ្នាក់ទី២៤ ក្នុងបញ្ជីម្ហូបអាហារឆាល្អបំផុតទាំង៥០ នៅលើពិភពលោកប្រចាំឆ្នាំ២០២៣នេះ។

ម្ហូបឆាឡុកឡាក់ទទួលបានពិន្ទុចំនួន៤,២ ខណៈម្ហូបឆាត្រកួនរបស់វៀតណាម(Morning glory stir fry)ទទួលបានចំណាត់ថ្នាក់លេខ២៥។ ចំណែកម្ហូបឆាមី(Chow mien)របស់ប្រទេសចិន ជាប់ចំណាត់ថ្នាក់ទី២៦។

ចំណែកឯ ចំណាត់ថ្នាក់កំពូលតារាងលេខ១ បានទៅលើម្ហូប Phat kaphrao របស់ប្រទេសថៃ។ ចំណាត់ថ្នាក់លេខ២ បានទៅលើម្ហូប Dak galbi របស់កូរ៉េខាងត្បូង ហើយចំណាត់ថ្នាក់លេខ៣បានទៅលើម្ហូបTibs នៃប្រទេសអេត្យូពី។

ចំណាត់ថ្នាក់លេខ៤បានលើម្ហូប Lomo Saltado របស់ប្រទេសប៉េរូ ចំណាត់ថ្នាក់លេខ៥ បានទៅលើម្ហូបឆាមីកាតាំង។ ចំណាត់ថ្នាក់លេខ៦បានទៅលើម្ហូបឆាបង្គា(Stir fry shrimps)របស់ប្រទេសចិន។

ចំណាត់ថ្នាក់លេខ៧ បានទៅលើម្ហូបមឹកឆាអំបិលម្រេចរបស់ប្រទេសចិន ចំណាត់ថ្នាក់លេខ៨ បានទៅលើម្ហូបផាត់ថៃរបស់ប្រទេសថៃ។ ចំណាត់ថ្នាក់លេខ៩ បានទៅលើឆាមីជប៉ុន (Yaki-udon) ហើយចំណាត់ថ្នាក់លេខ១០ បានទៅលើម្ហូបឆាសាច់ជ្រូកពីរត្រលប់ (Twice-cooked pork)របស់ប្រទេសចិន៕

ដោយៈ គង់ សូរិយា

        ភ្នំពេញៈ អ្នកជំនាញបានលើកឡើងថា ទីផ្សារអចលនទ្រព្យនៅខេត្តសៀមរាប ពិសេសតំបន់ព្រលានយន្តហោះសៀមរាប អង្គរ នឹងងើបឡើងក្រោ​យព្រលានយន្តហោះនេះបើកដំណើរការ។

ព្រលានយន្តហោះអន្តរជាតិថ្មី សៀមរាប អង្គរបានចំណាយប្រាក់វិនិយោគអស់១១០០លានដុល្លារ កើនឡើងលើសផែនការដំបូង ដែលគ្រោងចំណាយត្រឹម៨៨០លានដុល្លារប៉ុណ្ណោះ។ ព្រលានយន្តហោះលំដាប់4Fនេះ នឹងបើកដំណើរការនៅថ្ងៃទី១៦ តុលាឆ្នាំ២០២៣ខាងមុខនេះ។

លោកកែវ សុធារ៉ាប្រធានក្រុមហ៊ុនKW Cambodia ប្រចាំខេត្តសៀមរាបបានមានប្រសាសន៍ឲ្យដឹង កាលពីចុងសប្តាហ៍មុនថា ទីផ្សា​រអចលនទ្រព្យ នៅក្រុងសៀមរាប នៅតែមានសកម្មភាពទិញ លក់ ប៉ុន្តែមិនទាន់មានភាពសកម្មដូចមុនវិបត្តិកូវីដ១៩នោះទេ ប៉ុន្តែសម្រា​ប់អចលនទ្រព្យតម្លៃក្រោមទីផ្សារនៅតែលក់បាន។

លោកបន្តថា “ក្រុងសៀមរាបមានតែ៤សង្កាត់ប៉ុណ្ណោះ ហើយសង្កាត់ស្វាយដង្គុំ ជាសង្កាត់កណ្តាលក្រុង ដែលតម្លៃដីធ្លីនៅតែមានការទិញ លក់តិចតួច”។ លោកបន្តថា “ខ្ញុំរំពឹងថា នៅពេលព្រលានយន្តហោះសៀមរាប អង្គរបើកដំណើរការ ខ្ញុំជឿថាសកម្មភាពសេដ្ឋកិច្ច និងភ្ញៀវទេសចរណ៍បរទេសនឹងកើនឡើង”។

លោកកែវ សុធារ៉ាបានបន្តថា ធម្មតាក្រុមហ៊ុនវិនិយោគព្រលានយន្តហោះ ដែលចំណាយប្រាក់ជាង១០០០លានដុល្លារ ពិតជាចំនួនច្រើនណាស់ ហេតុនេះពួកគាត់នឹងស្វែងរកដៃគូវិនិយោគ ក៏ដូចជាទាក់ទាញក្រុមហ៊ុន អាកាសចរណ៍ចុះចតកាន់តែច្រើនមិនខាន ខណៈបច្ចុប្បន្ននេះ មានក្រុមហ៊ុនអាកាសចរណ៍ចំនួន៨ប៉ុណ្ណោះ បានភ្ជាប់ជើងហោះហើរមកកាន់ក្រុងសៀមរាប។

លោកបន្តទៀតថា ទីផ្សារអចលនទ្រព្យ នៅខេត្តសៀមរាបនៅតែមានឱកាសសម្រាប់វិនិយោគយកផលចំណេញ ស្របពេលរដ្ឋាភិបាលបាន និងកំពុងដាក់ចេញផែនការសាងសង់ ផ្លូវល្បឿនលឿនភ្នំពេញ សៀមរាប និងផ្លូវរថភ្លើងតភ្ជាប់ពីរាជធានីភ្នំពេញ ទៅកាន់ខេត្តនេះ និងតភ្ជាប់ទៅកាន់ក្រុងប៉ោយប៉ែតនាពេលអនាគតផងដែរ៕

ដោយៈ តែម សុខុម

ហាណូយ: នាយករដ្ឋមន្ត្រីវៀតណាម Pham Minh Chinh បានជួបជាមួយថ្នាក់ដឹកនាំ ក្រុមហ៊ុនចិនធំៗមួយចំនួន នៅទីក្រុងណាននីង (Nanning) ខេត្តគ័ងស៊ី (Guangxi) ប្រទេសចិន កាលពីថ្ងៃសៅរ៍ ទី១៦ ខែកញ្ញា ក្នុងឱកាសដែលលោកអញ្ជើញ ចូលរួមក្នុងពិព័រណ៍ចិន-អាស៊ាន លើកទី២០ (CAEXPO) និងកិច្ចប្រជុំកំពូលធុរកិច្ច និងវិនិយោគចិន-អាស៊ាន (CABIS) នៅទីនោះ។

ដោយទទួលឱ្យលោក Chen Yun ប្រធានក្រុមប្រឹក្សាប្រតិបត្តិនៃក្រុមហ៊ុន China Railway Group ចូលជួបសម្ដែងការគួរសម នាយករដ្ឋមន្ត្រីវៀតណាម Pham Minh Chinh បានសរសើរការឈានជើងទូទាំងពិភពលោក និរន្តរភាពរបស់ក្រុមហ៊ុននេះ ជាមួយនឹងការពង្រីកខ្លួនបាន៣៨១សាខាក្នុង១០៥ប្រទេស។

លោក Chen Yun លើកឡើងថា ពេលនេះក្រុមហ៊ុនរបស់លោកគឺជាអ្នកម៉ៅការធំនៅវៀតណាម ដូចជា គម្រោងផ្លូវដែកមួយចំនួននៅទីក្រុងហាណូយ និងគម្រោងស្ថានីយអគ្គិសនី ដើរដោយថាមពលខ្យល់នៅក្នុងខេត្តខ្ពង់រាប ភាគកណ្ដាល Dak Nong និងរោងចក្រផលិតសម្បកកង់រថយន្ត នៅខេត្តភាគខាងត្បូង Tien Giang។

លោកបានបង្ហាញចំណាប់អារម្មណ៍ ចង់ចូលរួមក្នុងការសាងសង់គម្រោងដឹកជញ្ជូននានា នៅក្នុងប្រទេសវៀតណាម ដូចជាផ្លូវដែកល្បឿនលឿន North-South Express Railway និងផ្លូវដែកល្បឿនលឿន Lao Cai-Ha Noi-Hai Phong Express Railway និងខ្សែរថភ្លើងក្រោមដីក្នុងទីក្រុងហាណូយ ជាដើម។ដើម្បីអភិវឌ្ឍហេដ្ឋារចនាសម្ព័ន្ធ នាយករដ្ឋមន្ត្រីវៀតណាម Pham Minh Chinh ថ្លែងថា ប្រទេសវៀតណាម កំពុងបង្កើនការចាប់ដៃគូជាមួយវិស័យរដ្ឋ និងឯកជន ដើម្បីសម្រេចបាននូវផ្លូវល្បឿនលឿនប្រវែង៥.០០០គីឡូម៉ែត្រ បញ្ចប់ដំណាក់កាលដំបូងនៃអាកាសយានដ្ឋានអន្តរជាតិឡុងថាញ់ (Long Thanh international airport) និងផ្លូវឆ្នេរសមុទ្រប្រវែង១.៧០០គីឡូម៉ែត្រពី Quang Ninh ទៅ Ca Mau នៅឆ្នាំ២០៣០។

លោក Pham Minh Chinh បានឱ្យដឹងថា ប្រទេសវៀតណាម គ្រោងនឹងសាងសង់ផ្លូវដែក ដូចជា ផ្លូវដែក Lao Cai-Ha Noi-Hai Phong Railway ដើមដែលមានប្រវែងសរុបប្រមាណ៣៨៨គីឡូម៉ែត្រ និងចំណាយថវិកាអស់១១ពាន់លានដុល្លារអាមេរិក ផ្លូវដែក Vung Ang-Laos Railway ដែលផ្នែកនៅខាងវៀតណាម លាតសន្ធឹង១០៣គីឡូម៉ែត្រ និងចំណាយថវិកាអស់១,៦ពាន់លានដុល្លារអាមេរិក ហើយខ្សែរថភ្លើងHa Noi-HCM City Line មានប្រវែង១.៥៤៥គីឡូម៉ែត្រ ជាមួយនឹងការវិនិយោគរួមគ្នា ប្រមាណ៦២ពាន់លានដុល្លារអាមេរិក៕ VN News៕

        ដោយៈ ហ្វីអូណា

        ភ្នំពេញៈ មន្រ្តីជាន់ខ្ពស់កូរ៉េបានលើកឡើងថា គោលបំណងដែលលោកធ្វើទស្សនកិច្ច មកកាន់ទីក្រុងភ្នំពេញ គឺដើម្បីវាយតម្លៃគម្រោងកិច្ចសហប្រតិបត្តិការ អភិវឌ្ឍន៍រវាងប្រទេសទាំងពីរ ដើម្បីស្វែងរកមធ្យោបាយ ដែលគួរឱ្យចង់បានក្នុងកិច្ចសហប្រតិបត្តិការនាពេលខាងមុខ ព្រមទាំងស្តាប់នូវជំហរ និងយោបល់របស់ភាគីកម្ពុជា។

លោក ហាន ឃ្យុងភីល (Hahn Gyeong Phil) អនុរដ្ឋមន្ត្រីទទួលបន្ទុកកិច្ចសហប្រតិបត្តការអន្តរជាតិ នៃការិយាល័យគោលនយោបាយរបស់ខុទ្ទកាល័យ នាយករដ្ឋមន្ត្រីសាធារណរដ្ឋកូរ៉េបានមានប្រសាសន៍បែបនេះ ក្នុងឱកាសអញ្ជើញចូលរួម បើកសិក្ខាសាលារួមគ្នាស្តីពីដៃគូអភិវឌ្ឍន៍សាធារណរដ្ឋកូរ៉េ-កម្ពុជា “ការស្វែងរកយន្តការ ដើម្បីពង្រឹងកិច្ចសហប្រតិបត្តិការនាពេលអនាគត” (Korea-Cambodia Development Partnership Workshop: Navigating the Path for Future Cooperation) កាលពីថ្ងៃទី១៦ ខែកញ្ញា ឆ្នាំ២០២៣។លោក ហាន ឃ្យុងភីល បានឱ្យដឹងថា “អង្គការនានានៃប្រទេសទាំងពីរ កំពុងធ្វើការយ៉ាងជិតស្និទ្ធិជាមួយគ្នា ដើម្បីសម្រេចបានជោគជ័យនូវគម្រោង ODA ផ្សេងៗនៅប្រទេសកម្ពុជា”។

ជាមួយគ្នានេះដែរ លោកហាន ឃ្យុងភីល បានបង្ហាញសុទិ​ដ្ឋិនិយមថា កូរ៉េអាចរួមចំណែកដល់ការអភិវឌ្ឍន៍សេដ្ឋកិច្ច និងសង្គម ប្រកបដោយនិរន្តរភាព តាមរយៈការចែករំលែកបទពិសោធន៍អភិវឌ្ឍន៍របស់ខ្លួននៃការបង្កើត “អព្ភូតហេតុ នៃទន្លេហាន” ជាមួយប្រទេសកម្ពុជា ដែលកំពុងបង្កើតនូវ “អព្ភូតហេតុនៃទន្លេមេគង្គ”។

លោកហាន ឃ្យុងភីល បានរំលឹកថា លោក Yoon Seok-yeol ប្រធានាធិបតីកូរ៉េ និងសម្តេចធិបតីហ៊ុន ម៉ាណែត នាយករដ្ឋមន្រ្តីនៃកម្ពុជា បានចូលរួមកិច្ចប្រជុំកំពូលអាស៊ាន ដែលបានធ្វើឡើងកាលពីថ្ងៃទី៧ ខែកញ្ញា បានអះអាងសារជាថ្មីថា ប្រទេសទាំងពីរពិតជាដៃគូ សហប្រតិបត្តិការដ៏សំខាន់បំផុត ហើយបានព្រមព្រៀងគ្នាជំរុញពាណិ​ជ្ជកម្ម ផលិតផលកសិកម្ម និងបសុសត្វ ការផ្លាស់ប្តូរធនធានមនុស្ស និងកិច្ចសហប្រតិបត្តិការ លើវិស័យការពារជាតិរួមគ្នា។ម្យ៉ាងទៀតគម្រោងសហប្រតិបត្តិការ អភិវឌ្ឍន៍អន្តរជាតិ ដែលនឹងត្រូវសាងសង់នៅកណ្តាល រាជធានីភ្នំពេញនាពេលខាងមុខ (២៣-២៩) គឺស្ពានមិត្តភាពកម្ពុជា និងកូរ៉េ នឹងក្លាយជាព្រឹត្តិការណ៍ដ៏សំខាន់ ក្នុងកិច្ចសហប្រតិបត្តិការរវាងប្រទេសទាំងពីរ។

លោកបានគូសបញ្ជាក់ថា “ភាគីពាក់ព័ន្ធនឹងបង្ហាញយ៉ាងសកម្មនូវមតិដ៏ស្មោះត្រង់ និងផែនការអភិវឌ្ឍន៍នាពេលអនាគត ទាក់ទងនឹងគម្រោង ODA របស់ប្រទេសកូរ៉េផងដែរ”។

លោកបណ្ឌិត សុខ ទូចប្រធានរាជបណ្ឌិតសភាកម្ពុជាបានបង្ហាញការជឿជាក់ថា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ចំណងមិត្តភាព និងកិច្ចសហប្រតិបត្តិការរវាងកម្ពុជា និងសាធារណរដ្ឋកូរ៉េ កាន់តែមានភាពល្អប្រសើរឡើង។ ជាពិសេស ក្រោមគោលនយោបាយគំនិតផ្តួចផ្តើម អាស៊ានកូរ៉េ ឬ ASEAN Korea Solidarity (KASI) របស់ប្រធានាធិបតី យុន ស៊ុគ យូល (Yoon Seok-Yeol) សាធារណរដ្ឋកូរ៉េ នឹងដើរតួយ៉ាងសំខាន់បន្ថែមទៀត នៅក្នុងតំបន់និយាយជារួម និងជាមួយកម្ពុជានិយាយដោយឡែក ទាំងយន្តការសេដ្ឋកិច្ច នយោបាយ វប្បធម៌និងការងារសិក្សាស្រាវជ្រាវជាដើម។

កាលថ្ងៃទី២៤ ខែកុម្ភៈ ឆ្នាំ២០២១ លោកបណ្ឌិតសភាចារ្យ សុខ ទូច និងលោក Seong Kyoung Ryun រធានក្រុមប្រឹក្សាជាតិសម្រាប់សេដ្ឋកិច្ច មនុស្សសាស្ត្រ និងវិទ្យាសាស្ត្រសង្គម បានឯកភាពរៀបចំគម្រោងស្នើសុំថវិកាកញ្ចប់ជំនួយអភិវឌ្ឍន៍ផ្លូវការ (ODA) សម្រាប់ឆ្នាំ២០២២-២០២៦ ពីរដ្ឋាភិបាលសាធារណរដ្ឋកូរ៉េ ដើម្បីរៀបចំកម្មវិធីអភិវឌ្ឍន៍សមត្ថភាព ស្រាវជ្រាវយុទ្ធសាស្ត្រ និងគោលនយោបាយជាតិ និងពិនិត្យលើគម្រោងសិក្សាស្រាវជ្រាវរួមគ្នា លើវិស័យអាទិភាពចំនួន៣ រួមមានទី១ វិស័យអប់រំ ២ វិស័យសុខភាពសាធារណៈ និងទី៣ វិស័យកសិកម្ម អភិវឌ្ឍន៍ជនបទ និងការគ្រប់គ្រងធនធានទឹក៕

        ដោយៈ ស៊ីវ ម៉េង

        ភ្នំពេញៈ លោកឧកញ៉ាបណ្ឌិតគីម ហ៊ាង ប្រធានស្ថាបនិក KW Cambodia បានលើកឡើងថា បញ្ហាតិចតួចដែលកំពុងកើតមាន មិនគួរណាយកបញ្ហាទាំងនេះ បង្កជាបន្ទុកសម្រាប់សង្គមនោះទេ ផ្ទុយទៅវិញ ត្រូវផ្សព្វផ្សាយនូវព័ត៌មាវិជ្ជមានជាច្រើន ដើម្បីជម្នះបញ្ហាទាំងអស់នោះ ហើយរួមចំណែកស្ដារនូវស្ថានភាពល្អប្រសើរឡើងវិញ។

អ្នកជំនាញ ដែលក្លាយពីភ្នាក់ងារអចលនទ្រព្យសាមញ្ញ មកជាអ្នកអភិវឌ្ឍន៍លេចធ្លោមួយរូប បានមានប្រសាសន៍ក្នុងពិធីបើកវេទិកា “ដំណោះ​ស្រាយបញ្ហាអចលនទ្រព្យកម្ពុជា កាលពីចុងសប្តាហ៍មុនថា រាល់បញ្ហា តែងមានដំណោះស្រាយ តែបើគ្រប់គ្នានិយាយតែបញ្ហា អត់មានដំណោះស្រាយ លោកព្រួយបារម្ភខ្លាចថ្ងៃអនាគតវិស័យអចលនាទ្រព្យ នឹងអាក្រក់ដូចមាត់គេនិយាយ។ហេតុនេះ លោកបានសំណូមពរឲ្យគ្រប់ បណ្ដាញសារព័ត៌មាន និងប្រជាពលរដ្ឋ ធ្វើការផ្សព្វផ្សាយពីអ្វីដែលវិជ្ជមាន អ្វីដែលកម្ពុជាមាន ហើយកំពុងមានការអភិវឌ្ឍ និងរីកចម្រើន។

លោកឧកញ៉ាបណ្ឌិតគីម ហ៊ាងបានបន្តថា “ខ្ញុំសំណូមពរទៅដល់អ្នកសារព័ត៌មាន និងប្រជាពលរដ្ឋ សម្រាប់ការផ្សព្វផ្សាយលើបណ្ដា​ញសង្គមនានា សូមផ្សព្វផ្សាយព័ត៌មានល្អៗឲ្យបានច្រើន”។លោកបន្តថា  “ព័ត៌មានល្អ ទាក់ទងសង្គម ប្រទេសជាតិ សេដ្ឋកិច្ច នយោបាយ កសិកម្ម ទេសចរណ៍។ល។ រីឯព័ត៌មានមិនចាំបាច់លក្ខណៈបុគ្គល ឬគ្រោះថ្នាក់តិចតួច កុំព្យាយាមផ្សព្វផ្សាយច្រើនពេក ព្រោះវាអត់ចំណេ​ញអ្វីសោះសម្រាប់សង្គមជាតិ”។លោកបន្តទៀតថា ការផ្សព្វផ្សាយព័ត៌មានវិជ្ជមាន ទាំងក្របខណ្ឌស្ថាប័នព័ត៌មាន ឬបុគ្គលក្ដី ទោះមិនអាចជួយអ្វីច្រើនដល់សង្គម ក៏មិនបង្កបញ្ហាបន្ថែមដល់សង្គមដែរ។ ហេតុនេះ លោកតែងណែនាំបុគ្គលិក និងសមាជិកទាំងអស់ រាល់ការផ្សព្វផ្សាយ មិនថាពាក់ព័ន្ធវិស័យអចលនទ្រព្យ ឬវិស័យអ្វីនោះទេ ត្រូវតែបង្កប់នូវគំនិតវិជ្ជមានជានិច្ច ព្រោះមានតែបុគ្គលវិជ្ជមានប៉ុណ្ណោះ ដែលនិយាយរឿងវិជ្ជមាន ហើយទទួលបានលទ្ធផលវិជ្ជមាន៕

ភ្នំពេញ ៖ គម្រោងអគារខុនដូប្រណិត Toulkork Lane ស្ថិតនៅជិតអង់តែនទួលគោកដែលជាតំបន់មានសក្ដានុពលខ្លាំងបានបើកលក់យូនីតថ្មីជាប្រភេទ Penthouse ដែលមានតែមួយគត់នៅក្នុងតំបន់ទួលគោក។

នៅរសៀលថ្ងៃទី១៥ ខែកញ្ញា ឆ្នាំ២០២៣ ក្រុមហ៊ុនអភិវឌ្ឍន៍អគារខុនដូប្រណិត ToulKork lane បានរៀបចំពិធីប្រកាសបើកលក់ជាផ្លូវការនូវយូនីតប្រភេទ Penthouse ក្នុងអគាររបស់ខ្លួនផ្ទាល់តែម្តង ដោយមានការចូលរួមជាកិត្តិយសពីសំណាក់អតិថិជនចាស់ និងថ្មី ព្រមទាំងថ្នាក់ដឹកនាំក្រុមហ៊ុនភ្នាក់ងារលក់ជាដៃគូ បុគ្គលិក និងនិយោជិកគ្រប់ជាន់ថ្នាក់របស់ទួលគោកលេន ដែលជាការបង្ហាញពីភាពជោគជ័យរបស់ខ្លួនក្នុងការអភិវឌ្ឍអគារខុនដូនៅក្នុងប្រទេសកម្ពុជា ។
លោក Andy នាយកគ្រប់គ្រងផ្នែកទីផ្សារ និងការលក់នៃគម្រោង Toulkork Lane បានឱ្យដឹងថា បន្ទាប់ពីបានបើកលក់យូនីតប្រភេទ Loft ដែលជាប្រភេទខុនដូមាន២ជាន់កាលពីខែកក្កដាកន្លងទៅនេះ សម្រេចរហូតដល់ទៅជិត ៥០% នៃយូនីត Loft ទាំងអស់។

ដោយឡែក នៅក្នុងថ្ងៃទី១៥ ខែកញ្ញា ក្រុមហ៊ុនបានសម្រេចបើកលក់យូនីតប្រភេទ Penthouse ដែលអតិថិជនរង់ចាំអស់រយៈពេលជាយូរមកហើយ។ ដោយសារតែវាជាប្រភេទខុនដូដែលមានតែ១គត់នៅក្នុងតំបន់ ហើយមានតែ៤យូនីតប៉ុណ្ណោះជាមួយនឹងក្ដីរំពឹងថានឹងលក់អស់ត្រឹមមុនបំណាច់ឆ្នាំ២០២៣ខាងមុខនេះ។
លោកបានបន្តទៀតថា បច្ចុប្បន្ននេះទួលគោកលេន នៅតែជាគម្រោងមួយដែលបានទទួលការគាំទ្រពីសំណាក់អតិថិជនគ្រប់ជាន់ថ្នាក់ ជាមួយនឹងប្រណិតភាពរបស់ខ្លួន ហើយតម្លៃគឺជាកត្តាមួយដ៏សំខាន់ដែលធ្វើឲ្យអតិថិជនសម្រេចចិត្តក្នុងការទិញយកភ្លាមៗដោយមិនគិតគូរយូរ។ ជាក់ស្តែងក្នុងការលក់រយៈពេលជិតមួយឆ្នាំកន្លងមកនេះគម្រោងរបស់យើងបានលក់ដាច់អស់ជិត៦០%ទៅហើយ។
ដើម្បីជាការតបស្នង ក៏ដូចជាការលើកទឹកចិត្តទៅដល់អតិថិជនទាំងចាស់និងថ្មី ទួលគោកលេននឹងមានការចាប់រង្វាន់យ៉ាងធំសម្បើមគឺរថយន្ត Toyota Wigo 2024 ដ៏ថ្មីស្រឡាងចំនួន១គ្រឿង។ រាល់អតិថិជនដែលបានបញ្ជាទិញខុនដូទួលគោកលេនមួយយូនីត នឹងទទួលបានសន្លឹកឆ្នោតមួយសន្លឹកដើម្បីផ្សងសំណាង ហើយមិនត្រឹមតែបានទៅលើអតិថិជនប៉ុណ្ណោះទេ សម្រាប់ភ្នាក់ងារជាដៃគូលក់របស់ទួលគោកលេនក៏នឹងមានឱកាសឈ្នះរង្វាន់រថយន្ត១គ្រឿងដូចគ្នាផងដែរ។

គួរបញ្ជាក់ផងដែរថា អគារខុនដូបែបប្រណីតToulkork lane (ទួលគោកលែន) ត្រូវបានអភិវឌ្ឍឡើងនៅលើផ្ទៃដីទំហំ ១,១០០ម៉ែត្រការ៉េ និងមានផ្ទៃសំណង់សរុបទំហំ ២១,០០០ម៉ែត្រការ៉េ មានកម្ពស់ ២១ជាន់ ស្មើនឹងជាង ៧០ម៉ែត្រ ដោយក្នុង១ជាន់មានចំនួន ២៣យូនីត និងសរុបជាង ៤០០យូនីត។នៅក្នុងគម្រោងមួយនេះមានចំណតរថយន្តធំទូលាយ អាចចតបានរថយន្តរហូតទៅដល់ជាង៨០ចំណត និងបំពាក់ទៅដោយឧបករណ៍សុវត្ថិភាពបែបទំនើប ជាពិសេស អតិថិជនរបស់ទួលគោកលេនអាចនឹងចូលមករស់នៅបានក្នុងខែតុលាឆ្នាំ២០២៣ខាងមុខនេះហើយ៕