ភ្នំពេញ ៖ គម្រោងអគារខុនដូប្រណិត Toulkork Lane ស្ថិតនៅជិតអង់តែនទួលគោកដែលជាតំបន់មានសក្ដានុពលខ្លាំងបានបើកលក់យូនីតថ្មីជាប្រភេទ Penthouse ដែលមានតែមួយគត់នៅក្នុងតំបន់ទួលគោក។

នៅរសៀលថ្ងៃទី១៥ ខែកញ្ញា ឆ្នាំ២០២៣ ក្រុមហ៊ុនអភិវឌ្ឍន៍អគារខុនដូប្រណិត ToulKork lane បានរៀបចំពិធីប្រកាសបើកលក់ជាផ្លូវការនូវយូនីតប្រភេទ Penthouse ក្នុងអគាររបស់ខ្លួនផ្ទាល់តែម្តង ដោយមានការចូលរួមជាកិត្តិយសពីសំណាក់អតិថិជនចាស់ និងថ្មី ព្រមទាំងថ្នាក់ដឹកនាំក្រុមហ៊ុនភ្នាក់ងារលក់ជាដៃគូ បុគ្គលិក និងនិយោជិកគ្រប់ជាន់ថ្នាក់របស់ទួលគោកលេន ដែលជាការបង្ហាញពីភាពជោគជ័យរបស់ខ្លួនក្នុងការអភិវឌ្ឍអគារខុនដូនៅក្នុងប្រទេសកម្ពុជា ។
លោក Andy នាយកគ្រប់គ្រងផ្នែកទីផ្សារ និងការលក់នៃគម្រោង Toulkork Lane បានឱ្យដឹងថា បន្ទាប់ពីបានបើកលក់យូនីតប្រភេទ Loft ដែលជាប្រភេទខុនដូមាន២ជាន់កាលពីខែកក្កដាកន្លងទៅនេះ សម្រេចរហូតដល់ទៅជិត ៥០% នៃយូនីត Loft ទាំងអស់។

ដោយឡែក នៅក្នុងថ្ងៃទី១៥ ខែកញ្ញា ក្រុមហ៊ុនបានសម្រេចបើកលក់យូនីតប្រភេទ Penthouse ដែលអតិថិជនរង់ចាំអស់រយៈពេលជាយូរមកហើយ។ ដោយសារតែវាជាប្រភេទខុនដូដែលមានតែ១គត់នៅក្នុងតំបន់ ហើយមានតែ៤យូនីតប៉ុណ្ណោះជាមួយនឹងក្ដីរំពឹងថានឹងលក់អស់ត្រឹមមុនបំណាច់ឆ្នាំ២០២៣ខាងមុខនេះ។
លោកបានបន្តទៀតថា បច្ចុប្បន្ននេះទួលគោកលេន នៅតែជាគម្រោងមួយដែលបានទទួលការគាំទ្រពីសំណាក់អតិថិជនគ្រប់ជាន់ថ្នាក់ ជាមួយនឹងប្រណិតភាពរបស់ខ្លួន ហើយតម្លៃគឺជាកត្តាមួយដ៏សំខាន់ដែលធ្វើឲ្យអតិថិជនសម្រេចចិត្តក្នុងការទិញយកភ្លាមៗដោយមិនគិតគូរយូរ។ ជាក់ស្តែងក្នុងការលក់រយៈពេលជិតមួយឆ្នាំកន្លងមកនេះគម្រោងរបស់យើងបានលក់ដាច់អស់ជិត៦០%ទៅហើយ។
ដើម្បីជាការតបស្នង ក៏ដូចជាការលើកទឹកចិត្តទៅដល់អតិថិជនទាំងចាស់និងថ្មី ទួលគោកលេននឹងមានការចាប់រង្វាន់យ៉ាងធំសម្បើមគឺរថយន្ត Toyota Wigo 2024 ដ៏ថ្មីស្រឡាងចំនួន១គ្រឿង។ រាល់អតិថិជនដែលបានបញ្ជាទិញខុនដូទួលគោកលេនមួយយូនីត នឹងទទួលបានសន្លឹកឆ្នោតមួយសន្លឹកដើម្បីផ្សងសំណាង ហើយមិនត្រឹមតែបានទៅលើអតិថិជនប៉ុណ្ណោះទេ សម្រាប់ភ្នាក់ងារជាដៃគូលក់របស់ទួលគោកលេនក៏នឹងមានឱកាសឈ្នះរង្វាន់រថយន្ត១គ្រឿងដូចគ្នាផងដែរ។

គួរបញ្ជាក់ផងដែរថា អគារខុនដូបែបប្រណីតToulkork lane (ទួលគោកលែន) ត្រូវបានអភិវឌ្ឍឡើងនៅលើផ្ទៃដីទំហំ ១,១០០ម៉ែត្រការ៉េ និងមានផ្ទៃសំណង់សរុបទំហំ ២១,០០០ម៉ែត្រការ៉េ មានកម្ពស់ ២១ជាន់ ស្មើនឹងជាង ៧០ម៉ែត្រ ដោយក្នុង១ជាន់មានចំនួន ២៣យូនីត និងសរុបជាង ៤០០យូនីត។នៅក្នុងគម្រោងមួយនេះមានចំណតរថយន្តធំទូលាយ អាចចតបានរថយន្តរហូតទៅដល់ជាង៨០ចំណត និងបំពាក់ទៅដោយឧបករណ៍សុវត្ថិភាពបែបទំនើប ជាពិសេស អតិថិជនរបស់ទួលគោកលេនអាចនឹងចូលមករស់នៅបានក្នុងខែតុលាឆ្នាំ២០២៣ខាងមុខនេះហើយ៕

តែម សុខុម

ប៉េកាំងៈ ទិន្នន័យពីក្រសួងហិរញ្ញវត្ថុបានបង្ហាញកាលពីថ្ងៃសុក្រ ទី១៥ ខែកញ្ញា ថា ប្រាក់ចំណូលពីការលក់ដីធ្លីរបស់រដ្ឋាភិបាលចិន បានធ្លាក់ចុះ២០ខែជាប់ៗគ្នាក្នុងខែសីហា ហើយនេះសញ្ញាបង្ហាញពីសម្ពាធកាន់តែខ្លាំងឡើងទៅលើរដ្ឋបាលមូលដ្ឋាន ខណៈវិបត្តិបំណុលធ្លាក់កាន់តែជ្រៅ។

យោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី១៥ ខែកញ្ញា ឱ្យដឹងថា ប្រាក់ចំណូលពីការលក់ដីធ្លីរបស់រដ្ឋាភិបាលចិន បានធ្លាក់ចុះ២២,២%ក្នុងខែសីហា បើធៀបនឹងឆ្នាំមុន បន្ទាប់ពីបានធ្លាក់ចុះ១០,១%កាលពីកក្កដា។

សម្រាប់រយៈពេលពីខែមករា ដល់ខែសីហា ឆ្នាំនេះ ការលក់ដីធ្លីបានធ្លាក់ចុះ១៩,៦%បើធៀបនឹងឆ្នាំមុនមកនៅត្រឹម៣៧២,៨២ពាន់លានដុល្លារអាមេរិក។

ការកើនឡើងនូវបំណុលរបស់រដ្ឋបាលមូលដ្ឋានកំពុងបង្កហានិភ័យធំដល់សេដ្ឋកិច្ច និងស្ថិរភាពហិរញ្ញវត្ថុរបស់ប្រទេសចិន បន្ទាប់ពីការវិនិយោគច្រើនពេកលើហេដ្ឋារចនាសម្ព័ន្ធក្នុងពេលជាច្រើនឆ្នាំមកនេះ និងការធ្លាក់ចុះនៃប្រាក់ចំណូលពីការលក់ដីធ្លី។

អ្នកជំនាញ Wenyin Huang ដែលជាអ្នកវិភាគឥណទានមកពីទីភ្នាក់ងារវាយតម្លៃគុណភាពឥណទានអាមេរិក S&P Global Ratings លើកឡើងថា “ការធ្លាក់ចុះជាបន្តបន្ទាប់នៃប្រាក់ចំណូលពីការលក់ដីធ្លី ដែលជាប្រភពចំណូលដ៏សំខាន់សម្រាប់រដ្ឋបាលមូលដ្ឋាន អាចបំផ្លាញកម្លាំងហិរញ្ញវត្ថុរបស់រដ្ឋបាលថ្នាក់នេះ និងកាត់បន្ថយអំណាចនៃការចំណាយតាមចិត្តចង់”។

ក្រុងប៉េកាំង បាននិងកំពុងបង្កើនវិធានការដើម្បីដោះស្រាយហានិភ័យបំណុលតាមមូលដ្ឋាន រួមទាំងការបន្ធូរបន្ថយការរឹតបន្តឹងលើវិស័យអចលនទ្រព្យ និងការត្រួតពិនិត្យកាន់តែងតឹងរ៉ឹងលើស្ថាប័នផ្ដល់ហិរញ្ញប្បទានរបស់រដ្ឋបាលមូលដ្ឋានផងដែរ ដោយទីផ្សារនានារំពឹងថានឹងមានវិធានការសារពើពន្ធ និងរូបិយវត្ថុបន្ថែមទៀតដើម្បីធានាបានថា សេដ្ឋកិច្ចងើបឡើងវិញយ៉ាងពិតប្រាកដ៕ Reuters៕

ដោយ: គង់ លាងហួរ
ប៉េកាំង: ប្រធានាធិបតីចិនលោកស៊ី ជីនពីង បានជួបពិភាក្សាការងារជាមួយ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានៅឯវិមានប្រជាជនចិនកាលពីថ្ងៃសុក្រកន្លងមកនេះ។

លោក ស៊ី ជីនពីង បានគូសបញ្ជាក់ថា សម្តេចធិបតី ហ៊ុន ម៉ាណែត បានជ្រើសរើសប្រទេសចិនជាគោលដៅសម្រាប់ដំណើរទស្សនកិច្ចទ្វេរភាគីលើកដំបូង ដែលនេះបង្ហាញឱ្យឃើញយ៉ាងពេញលេញនូវសារៈសំខាន់ដ៏ធំធេង ដែលរដ្ឋាភិបាលថ្មីរបស់កម្ពុជាយកចិត្តទុកដាក់ក្នុងការពង្រឹង និងអភិវឌ្ឍមិត្តភាពចិន-កម្ពុជា។

លោក ស៊ី បានមានប្រសាសន៍ថា ប្រទេសចិន និងកម្ពុជា គឺជាមិត្តដែកថែប ដោយលោកបានបន្ថែមថា ក្នុងរយៈពេល៦៥ឆ្នាំ ចាប់តាំងពីបង្កើតទំនាក់ទំនងការទូតមក ភាគីទាំងពីរតែងតែរក្សាបាននូវកម្រិតនៃការជឿទុកចិត្តគ្នាខ្ពស់ ចាត់ទុកគ្នាទៅវិញទៅមកដោយស្មើភាពគ្នា ទទួលបានលទ្ធផលឈ្នះ-ឈ្នះ និងគាំទ្រគ្នាទៅវិញទៅមកយ៉ាងម៉ឺងម៉ាត់ក្នុងការការពារអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍន៍។

លោកប្រធានាធិបតីចិនបានសង្កត់ធ្ងន់ថា ប្រទេសចិនគាំទ្រយ៉ាងម៉ឺងម៉ាត់ចំពោះកម្ពុជាក្នុងការស្វែងរកផ្លូវអភិវឌ្ឍន៍ដែលសមស្របនឹងលក្ខខណ្ឌជាតិរបស់ខ្លួន ហើយចិនត្រៀមខ្លួនរួចជាស្រេចដើម្បីរក្សាទំនាក់ទំនងជាយុទ្ធសាស្រ្តជាទៀងទាត់ជាមួយកម្ពុជា និងជំរុញឱ្យការផ្លាស់ប្តូរបទពិសោធន៍អភិបាលកិច្ចកាន់តែស៊ីជម្រៅ។

លោក សុី បានបញ្ជាក់ថា ភាគីទាំងពីរគួរតែប្រើប្រាស់ឱ្យបានល្អនូវយន្តការនៃគណៈកម្មាធិការសម្របសម្រួលអន្តររដ្ឋាភិបាល និងអនុវត្តផែនការសកម្មភាពថ្មីសម្រាប់ការកសាងសហគមន៍ចិន-កម្ពុជាជាមួយនឹងអនាគតរួមគ្នា។

លោក សុី ក៏បានអំពាវនាវឱ្យភាគីទាំងពីរពង្រឹងក្របខ័ណ្ឌកិច្ចសហប្រតិបត្តិការត្បូងពេជ្រចិន-កម្ពុជា “Diamond Hexagon” ព្រមទាំងរួមគ្នាកសាង “ច្រករបៀងអភិវឌ្ឍន៍ឧស្សាហកម្ម” និង“ច្រករបៀងត្រី និងស្រូវ” និងជំរុញការអនុវត្តគម្រោងកិច្ចសហប្រតិបត្តិការសំខាន់ៗដែលពាក់ព័ន្ធឱ្យបានលឿន។

លោក សុី លើកឡើងទៀតថា ភាគីចិនមានឆន្ទៈក្នុងការអនុវត្តច្បាប់ជាប្រចាំនិងកិច្ចសហប្រតិបត្តិការសន្តិសុខ ជាមួយកម្ពុជា និងបន្តបង្រ្កាបបទល្មើសឆ្លងដែន ដូចជាល្បែងស៊ីសងតាមប្រព័ន្ធអុីនធឺណេត និងការក្លែងបន្លំតាមប្រព័ន្ធទូរគមនាគមន៍។

លោក សុី បានមានប្រសាសន៍ថា ភាគីទាំងពីរគួរតែបន្តរៀបចំសកម្មភាពនានាដើម្បីអបអរសាទរ “ឆ្នាំមិត្តភាពចិន-កម្ពុជា” និងពង្រីកកិច្ចសហប្រតិបត្តិការលើវិស័យយុវជន មូលដ្ឋាន អប់រំ ទេសចរណ៍ និងសុខាភិបាល ដើម្បីជំរុញឱ្យមិត្តភាពចិន-កម្ពុជានាំមកនូវផលប្រយោជន៍បន្ថែមទៀតដល់ប្រជាជននៃប្រទេសទាំងពីរ។

លោក ស៊ី បានគូសបញ្ជាក់ថា មិនថាស្ថានភាពអន្តរជាតិ និងតំបន់អាចប្រែប្រួលយ៉ាងណានោះទេ ប្រទេសចិនតែងតែជាមិត្តដ៏គួរឱ្យទុកចិត្តបំផុត និងជាអ្នកគាំទ្រដ៏រឹងមាំរបស់កម្ពុជាហើយចិនត្រៀមខ្លួនជាស្រេចក្នុងការរួមដៃជាមួយកម្ពុជាដើម្បីលើកតម្កើងភាពត្រឹមត្រូវ និងយុត្តិធម៌អន្តរជាតិការពារសិទ្ធិ និងផលប្រយោជន៍ស្របច្បាប់របស់ប្រទេសកំពុងអភិវឌ្ឍន៍។

ជាការឆ្លើយតប សម្តេចធិបតី ហ៊ុន ម៉ាណែត បានមានប្រសាសន៍ថា សម្តេចបានជ្រើសរើសប្រទេសចិនជាគោលដៅសម្រាប់ដំណើរទស្សនកិច្ចផ្លូវការលើកដំបូង ដើម្បីបង្ហាញថា រដ្ឋាភិបាលថ្មីរបស់កម្ពុជានឹងបន្តអនុវត្តយ៉ាងម៉ឺងម៉ាត់នូវគោលនយោបាយមិត្តភាពចំពោះប្រទេសចិន និងបន្តពង្រឹងទំនាក់ទំនង
មិត្តភាពរវាងកម្ពុជា និងចិនបន្ថែមទៀត។

សម្តេចបានបន្តថា កម្ពុជានឹងគោរពតាមគោលការណ៍ចិនតែមួយ គាំទ្រយ៉ាងមុតមាំចំពោះប្រទេសចិនក្នុងការការពារផលប្រយោជន៍ស្នូល និងគាំទ្រគំនិតផ្តួចផ្តើមអភិវឌ្ឍន៍សកល គំនិតផ្តួចផ្តើមសន្តិសុខសកល និងគំនិតផ្តួចផ្តើមអរិយធម៌សកល ដែលស្នើឡើងដោយប្រធានាធិបតីចិនលោកស៊ី ជីនពីង។

សម្តេចបញ្ជាក់ថា កម្ពុជាមានឆន្ទៈក្នុងការធ្វើការជាមួយប្រទេសចិន ដើម្បីអនុវត្តការឯកភាពដ៏សំខាន់ ដែលមេដឹកនាំនៃប្រទេសទាំងពីរសម្រេចបាន ព្រមទាំងធ្វើឱ្យស៊ីជម្រៅនូវកិច្ចសហប្រតិបត្តិការខ្សែក្រវ៉ាត់ និងផ្លូវនិងជំរុញឱ្យមានការអភិវឌ្ឍបន្ថែមទៀតនៃកិច្ចសហប្រតិបត្តិការទ្វេរភាគីក្នុងវិស័យឧស្សាហកម្ម កសិកម្ម ការវិនិយោគ វប្បធម៌ និងវិស័យផ្សេងទៀតក្រោមក្របខ័ណ្ឌត្បូងពេជ្រ។សម្តេចបានធ្វើការកត់សម្គាល់ថា ភាគីកម្ពុជាមានឆន្ទៈសហការយ៉ាងជិតស្និទ្ធជាមួយប្រទេសចិនក្នុងកិច្ចការតំបន់ និងអន្តរជាតិ ដើម្បីជំរុញទំនាក់ទំនងទ្វេរភាគីឱ្យឡើងដល់កំពស់ថ្មីមួយ៕

តែម សុខុម

បាងកក: ដោយសារមានប្រទេសរាប់រយទូទាំងពិភពលោក វាគ្មានអ្វីគួរឱ្យភ្ញាក់ផ្អើលនោះទេដែលទង់ជាតិមួយចំនួនអាចមានប្រពណ៌ និងការរចនាជាន់គ្នា។ ប៉ុន្តែតើអ្នកធ្វើដំណើរអាចសម្គាល់ទង់ជាតិខុសៗគ្នាបានដោយវិធីណា?

ទង់ជាតិគឺជានិមិត្តសញ្ញាដ៏សំខាន់នៃអត្តសញ្ញាណជាតិមួយ ដែលធ្វើឱ្យប្រជាជននៃជាតិនោះមានមោទកភាពចំពោះវា។ ទោះជាយ៉ាងណា តើយើងអាចស្គាល់ទង់ជាតិរបស់ពួកគេបានល្អកម្រិតណា?ដើម្បីស្រាយចម្ងល់នេះ គេហទំព័រទេសចរណ៍របស់អង់គ្លេស Travelbag បានធ្វើការស្ទង់មតិទៅលើមនុស្សពេញវ័យចំនួន២.០០០នាក់ ដោយស្នើឱ្យពួកគេជ្រើសរើសទង់ជាតិខុសៗគ្នាទូទាំងពិភពលោក ហើយទាយថាតើទង់ជាតិដែលពួកគេជ្រើសរើសតំណាងឱ្យប្រទេសណាខ្លះ។ ជាលទ្ធផលនៃការស្ទង់មតិបានបង្ហាញពីទង់ជាតិចំនួន១០ដែលពួកគេពិបាកសម្គាល់បំផុត។

ទង់ជាតិទាំង១០ដែលគេពិបាកសម្គាល់បំផុតនោះមានដូចខាងក្រោម៖
លេខ១៖ ទង់ជាតិនៃប្រទេសឥណ្ឌូនេស៊ី ៨៨%ឆ្លើយខុស
លេខ២៖ ទង់ជាតិនៃប្រទេស Canary Islands ៨៥%ឆ្លើយខុស
លេខ៣៖ ទង់ជាតិនៃប្រទេសថៃ ៨៤%ឆ្លើយខុស
លេខ៤៖ ទង់ជាតិនៃប្រទេស Puerto Rico ៨៤%ឆ្លើយខុស
លេខ៥៖ ទង់ជាតិនៃប្រទេស The Bahamas ៨៣%ឆ្លើយខុស
លេខ៦៖ ទង់ជាតិនៃប្រទេសហ្វីលីពីន ៨២%ឆ្លើយខុស
លេខ៧៖ ទង់ជាតិនៃសាធារណរដ្ឋដូមីនីក ៨១%ឆ្លើយខុស
លេខ៨៖ ទង់ជាតិខ្មែរ ៨១%ឆ្លើយខុស
លេខ៩៖ ទង់ជាតិនៃប្រទេសអារ៉ាប់រួមអេមីរ៉ាត ៧៩%ឆ្លើយខុស
លេខ១០៖ ទង់ជាតិនៃប្រទេសម៉ាឡេស៊ី ៧៨%ឆ្លើយខុស ៕ The Nation៕

ដោយ: គង់ លាងហួរ
អន្តរជាតិ: ក្រុមហ៊ុនអាមេរិកធំៗ ដូចជា ក្រុមហ៊ុន Boeing ក្រុមហ៊ុន Walmart និង Amazon កំពុងស្វែងរកអ្នកផ្គត់ផ្គង់របស់ពួកគេ នៅក្នុងប្រទេសវៀតណាម ក្នុងឱកាសចូលរួមព្រឹត្តិការណ៍ជាបន្តបន្ទាប់ ដែលរៀបចំឡើងដោយក្រសួងឧស្សាហកម្ម និងពាណិជ្ជកម្មវៀតណាម។

អ្នកតំណាងក្រុមហ៊ុនថាមពល AES ក្រុមហ៊ុនលក់រាយ Carrefour ក្រុមហ៊ុនលក់រាយឧបករណ៍កីឡា Decathlon ក្រុមហ៊ុនគ្រឿងសង្ហារឹម IKEA ក្រុមហ៊ុនលក់រាយ Aeon Uniqlo និងក្រុមហ៊ុន Central Group ស្ថិតក្នុងចំណោមក្រុមហ៊ុនជាច្រើនផ្សេងទៀត ដែលបានបង្ហាញវត្តមាននៅក្នុងវេទិកានាំចេញឆ្នាំ២០២៣ស្តីពីការតភ្ជាប់ខ្សែសង្វាក់ផ្គត់ផ្គង់អន្តរជាតិ ដែលរៀបចំធ្វើឡើងនៅទីក្រុងហូជីមិញ។លោក Lionel Adenot នាយកប្រតិបត្តិនៃក្រុមហ៊ុន Decathlon Vietnam បានមានប្រសាសន៍ថា ប្រទេសវៀតណាមមានឱកាសដ៏ធំមួយក្នុងការក្លាយជាកត្តាសំខាន់នៅក្នុងខ្សែសង្វាក់ផ្គត់ផ្គង់ពិភពលោក។

លោកបានបន្ថែមថា ក្រុមហ៊ុននានាក៏គួរតែបង្កើតផែនការឱ្យបានឆាប់រហ័ស និងផ្តល់អាទិភាពដល់វត្ថុធាតុដើមក្នុងស្រុក និងត្រូវកំណត់ផលប៉ះពាល់ទៅលើបរិស្ថានផងដែរ។អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម លោក Do Thang Hai បានបញ្ជាក់ឲ្យដឹងថា ការចូលរួមរបស់អង្គភាពអាជីវកម្មមកពីជាង៣០ប្រទេស និងដែនដីនេះ នឹងជួយជំរុញប្រទេសវៀតណាមឱ្យចូលកាន់តែស៊ីជម្រៅទៅក្នុងខ្សែសង្វាក់ផ្គត់ផ្គង់របស់ពិភពលោក។

ក្នុងរយៈពេលប្រាំបីខែដំបូង ដើមឆ្នាំ២០២៣នេះ ទំហំពាណិជ្ជកម្មរបស់វៀតណាមសម្រេចបានទឹកប្រាក់ចំនួន៤៣៥ពាន់លានដុល្លារអាមេរិក ជាមួយនឹងអតិរេកពាណិជ្ជកម្មជាង២០ពាន់លានដុល្លារអាមេរិក៕

តែម សុខុម

បាងក: រដ្ឋមន្ត្រីទេសចរណ៍ និងកីឡាថ្មីរបស់ថៃ បានកំណត់គោលដៅថ្មីសម្រាប់ចំណូលទេសចរណ៍បរទេសឱ្យឈានដល់៣ទ្រីលានបាត (៨៤ពាន់លានដុល្លារ) ដោយកើនឡើងពី៥៣ពាន់លានដុល្លារ ក្នុងគោលបំណងប្រែក្លាយប្រទេសនេះទៅជាមជ្ឈមណ្ឌលកីឡា និងការកម្សាន្ត។

លោកស្រី Sudawan Wangsuphakijkosol រដ្ឋមន្ត្រីក្រសួងទេសចរណ៍ និងកីឡាថៃ លើកឡើងថា រដ្ឋាភិបាលចង់សម្រេចគោលដៅដ៏មានមហិច្ឆតានេះឱ្យបានឆាប់តាមដែលអាចធ្វើទៅបាន ប៉ុន្តែត្រូវការពេលវេលាបន្ថែមទៀតដើម្បីរៀបចំផែនការសកម្មភាព។ នេះបើយោងតាមកាសែត Bangkok Post ចុះផ្សាយនៅថ្ងៃសុក្រ ទី១៥ ខែកញ្ញា នេះ។

ជាវិធានការ គណៈរដ្ឋមន្ត្រីថ្មីរបស់ថៃ បានព្រមព្រៀងលើគោលនយោបាយលើកលែងទិដ្ឋាការសម្រាប់ពលរដ្ឋនៃប្រទេសមួយចំនួនកាលពីដើមសប្តាហ៍នេះ។

លោកស្រី Sudawan បានថ្លែងថា “លោកនាយករដ្ឋមន្ត្រី Srettha Thavisin បានផ្ដល់ឱ្យយើងនូវឧបករណ៍សម្រាប់ទាក់ទាញភ្ញៀវទេសចរកាន់តែច្រើន ដោយចាប់ផ្ដើមពីការលុបចោលលក្ខខណ្ឌតម្រូវឱ្យមានទិដ្ឋាការសម្រាប់ភ្ញៀវទេសចរមួយចំនួន និងបន្ធូរបន្ថយដំណើរការធ្វើដំណើរនៅតាមអាកាសយានដ្ឋាន”។

លោកស្រីបានបន្ថែមថា “ពេលនេះយើងត្រូវត្រៀមគម្រោងជាច្រើនទៀតដើម្បីសម្រេគោលដៅរបស់យើង”។

លោកស្រីលើកឡើងទៀតថា ក្រសួងទេសចរណ៍ និងកីឡាកំពុងផ្ដោតលើព្រឹត្តិការណ៍កីឡា និងព្រឹត្តិការណ៍កម្សាន្តដែលអាចទាក់ទាញប្រិយមិត្ត ឬ អ្នកចូលរួមបានយ៉ាងច្រើនដូចជាការប្រគំតន្ត្រីខ្នាតអន្តរជាតិ និងព្រឹត្តិការណ៍កីឡាជាដើម”៕ Bangkok Post៕

តែម សុខុម

សេអ៊ូល: ធនាគារកណ្តាលកូរ៉េ (BOK) បានលើកឡើងពីក្តីបារម្ភកាលពីថ្ងៃព្រហស្បតិ៍ ទី១៤ ខែកញ្ញា ថា ទីផ្សារលំនៅឋានក្នុងប្រទេសកូរ៉េខាងត្បូង នៅតែមានតម្លៃថ្លៃខ្លាំងនៅឡើយបើធៀបនឹងប្រាក់ចំណូលរបស់ពលរដ្ឋ។

យោងតាមធនាគារកណ្តាលកូរ៉េ ឱ្យដឹងថា ជាមធ្យមគ្រួសារមួយនឹងត្រូវការសន្សំប្រាក់ចំណូលប្រចាំឆ្នាំចំនួន២៦ឆ្នាំទម្រាំមានលទ្ធភាពទិញផ្ទះបានមួយសម្រាប់រស់នៅផ្ទាល់ខ្លួន។

នៅក្នុងរបាយការណ៍ប្រចាំត្រីមាសរបស់ខ្លួនដែលបានដាក់ជូនរដ្ឋសភា ធនាគារកណ្ដាលកូរ៉េ បានគូសបញ្ជាក់ថា អនុបាតថ្លៃលំនៅឋានធៀបនឹងប្រាក់ចំណូល (Housing price-to-income ratio) គឺ២៦ពិន្ទុ។

នេះមានន័យថា ជាមធ្យមអ្នកធ្វើការម្នាក់នឹងត្រូវសន្សំប្រាក់បៀវត្សរ៍ទាំងមូលរបស់ពួកគេរយៈពេល២៦ឆ្នាំពេញដើម្បីមានលទ្ធភាពទិញអាផាតម៉ិនទំហំមធ្យម៩០ម៉ែត្រការ៉េ។ អនុបាតថ្លៃលំនៅឋានធៀបនឹងប្រាក់ចំណូលស្ថិតក្នុងរង្វង់១៧,៦ពិន្ទុក្នុងឆ្នាំ២០១៩ ១៧,៤ពិន្ទុក្នុងឆ្នាំ២០២០ និង២៩,៤ពិន្ទុក្នុងឆ្នាំ២០២២។

ចាប់ពីខែមេសា ប្រាក់កម្ចីគ្រួសារដែលចេញដោយធនាគារបានកើនឡើងជាលំដាប់ដោយឈានដល់កម្រិតខ្ពស់គួរឱ្យព្រួយបារម្ភ។ គិតត្រឹមខែមុន ចំនួនទឹកប្រាក់កម្ចីបានកើនឡើងជាង១៨,៨ពាន់លានដុល្លារអាមេរិក ក្នុងរយៈពេលត្រឹមតែ៥ខែប៉ុណ្ណោះ ដោយប្រាក់កម្ចីទិញផ្ទះបានធ្វើឱ្យប្រាក់កម្ចីសរុបកើនឡើងខ្លាំង។

អ្វីដែលគួរឱ្យព្រួយបារម្ភជាងនេះទៅទៀត ប្រាក់កម្ចីគ្រួសារត្រូវបានព្យាករថានឹងកើនឡើងបន្ថែមទៀតក្នុងឆមាសទី២ ឆ្នាំនេះដែលជំរុញដោយការស្ទុះងើបឡើងវិញនៃប្រតិបត្តិការទិញលក់ផ្ទះ។

ធនាគារកណ្ដាលកូរ៉េ បានវាយតម្លៃថា ការកើនឡើងនេះត្រូវបានរំពឹងថានឹងកើនឡើងបន្ថែមទៀតដោយសារចំនួនអាផាតម៉ិនកាន់តែច្រើនឡើងនឹងត្រូវដាក់លក់នៅចុងឆ្នាំនេះ៕ Korea Times៕

ដោយ: គង់ លាងហួរ

អន្តរជាតិ: នៅថ្ងៃព្រហស្បតិ៍នេះ ទីភ្នាក់ងារវាយតម្លៃចំណាត់ថ្នាក់ឥណទាន Moody’s បានបន្ទាបទស្សនវិស័យរបស់វិស័យអចល​នទ្រព្យនៅប្រទេសចិន ពីសញ្ញាស្ថិរភាព ទៅជាសញ្ញាអវិជ្ជមានវិញ ខណៈបញ្ហាសេដ្ឋកិច្ចចិន នឹងធ្វើឱ្យការលក់ផ្ទះធ្លាក់ចុះ ទោះបីជាមានវិធានការគាំទ្រពីរដ្ឋាភិបាលយ៉ាងណាក្តី។

ទីភ្នាក់ងារ Moody’s ព្យាករថា ការលក់ផ្ទះនៅក្នុងប្រទេសចិននឹងធ្លាក់ចុះប្រហែល៥ភាគរយ ក្នុងរយៈពេលចន្លោះពី៦ខែ ទៅ១២ខែបន្ទាប់ ហើយឥទ្ធិពលនៃវិធានការរបស់រដ្ឋាភិបាលចិន ក្នុងការជំរុញការទិញអចលនទ្រព្យ ទំនងជាមានរយៈពេលខ្លីប៉ុណ្ណោះ។ការទម្លាក់ចំណាត់ថ្នាក់លើទស្សនវិស័យនេះ បានកើតមានឡើង ស្របពេលដែលក្រុមហ៊ុន អចលនទ្រព្យចិនជាច្រើនបានខកខាន ក្នុងការទូទាត់សងបំណុល ដោយសារវិបត្តិជាប់គាំងលំហូរសាច់ប្រាក់។

តួយ៉ាង China Evergrande Group ដែល​ជា​ក្រុមហ៊ុន​អភិវឌ្ឍន៍​អចលនទ្រព្យ​ជំពាក់​បំណុល​ច្រើនជាងគេ​បំផុត ​នៅលើពិភពលោក​ គឺ​ជា​ចំណុច​កណ្តាល​ស្នូលក្នុងវិបត្តិនេះ។វិបត្តិបំណុលនេះ ក៏បានលេបត្របាក់ក្រុមហ៊ុន អភិវឌ្ឍន៍អចលនទ្រព្យឯកជនដ៏ធំបំផុតរបស់ប្រទេសចិន គឺ Country Garden Holdings ដែលកំពុងប្រយុទ្ធតស៊ូ ដើម្បីជៀសផុតការខកខានទូទាត់សងបំណុល។ជាក់ស្តែង ក្រុមហ៊ុន Country Garden បានទទួលការយល់ព្រមពីម្ចាស់បំណុលរបស់ខ្លួន នៅក្នុងសប្តាហ៍នេះ ដើម្បីពន្យារពេលកាលកំណត់ទូទាត់សងសញ្ញាប័ណ្ណក្នុងស្រុកជាច្រើន។

លោក Cedric Lai អ្នកវិភាគប្រចាំទីភ្នាក់ងារ Moody’s បានគូសបញ្ជាក់នៅក្នុងសេចក្តីថ្លែងការណ៍មួយថា “ភាពតានតឹងផ្នែកឥណ​ទាននៅក្រុមហ៊ុន Country Garden គួបផ្សំជាមួយនឹងទស្សនវិស័យអវិជ្ជមានបន្ថែមទៀត បានជំរុញឱ្យអ្នកវិនិយោគ មិនហ៊ានប្រ​ឈ​មមុខ ឬមិនហ៊ានប្រថុយនឹងហានិភ័យឡើយ”៕