ដោយៈ គង់ ហ្វីអូណា

ប្រទេសចិនៈ សម្តេចមហាបវរធិបតីហ៊ុន ម៉ាណែត នាយករដ្ឋមន្រ្តីនៃ​កម្ពុជា បានអនុញ្ញាតឲ្យលោក វ៉ាង តុងជូ (Wang Tongzhou) ប្រធាន ក្រុមហ៊ុនChina Road and Bridge Corporation (CRBC)និង គណៈប្រតិភូក្រុមហ៊ុន ចូលជួបសម្តែងការគួរសម និងពិភាក្សាការងារ ក្នុងដំណើរបំពេញទស្សនកិច្ចនៅប្រទេសចិន។

សម្តេចធិបតី បានសម្ដែងនូវការស្វាគមន៍យ៉ាងកក់ក្តៅជូនចំពោះលោក វ៉ាង តុងជូ និងគណៈប្រតិភូក្រុមហ៊ុនCRBC ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន China Communications Construction Company Limited ដែលបាន និងកំពុងវិនិយោគលើគម្រោងសាងសង់ផ្លូវ ស្ពាន និងហេដ្ឋារចនាសម្ព័ន្ធនៅកម្ពុជា ។

សម្តេចធិបតី ក៏បានអបអរសាទរចំពោះសមិទ្ធផលនានា ដែលក្រុមហ៊ុន CRBC សម្រេចបាននាពេលកន្លងមក និងបានវាយតម្លៃខ្ពស់ចំពោះការសិក្សាស្វែងយល់ និងការពិនិត្យលទ្ធភាពលើវិស័យដែលមានសក្តានុពលផ្សេងទៀតនៅកម្ពុជា ។

លោក វ៉ាង តុងជូ ក៏បានគោរពរាយការណ៍ជូន សម្តេចធិបតី អំពីគម្រោងវិនិយោគផ្លូវថ្នល់ ដែលកំពុងដំណើរការនៅកម្ពុជា ក៏ដូចជាគម្រោងថ្មីៗ ដែលក្រុមហ៊ុនកំពុងសិក្សា និងវាយតម្លៃ ព្រមទាំងគោរពស្នើសុំកិច្ចសហការ និងការជួយសម្របសម្រួលបន្ថែមទៀត ពីភាគីរាជរដ្ឋាភិបាលកម្ពុជា ។

សម្តេចធិបតី បានគូសបញ្ជាក់ពីតួនាទីដ៏សំខាន់ នៃគម្រោងវិនិយោគផ្លូវ ថ្នល់ ស្ពាន និងផ្លូវលឿន នៅក្នុងដំណើរការអភិវឌ្ឍសង្គម-សេដ្ឋកិច្ច ជាពិសេស ការលើកកម្ពស់ភាពប្រកួតប្រជែងរបស់កម្ពុជា តាមរយៈការកែលម្អប្រព័ន្ធឡូជីស្ទីក។

ចំពោះគម្រោងដែលកំពុងធ្វើការសិក្សា និងវាយតម្លៃ សម្តេចធិបតី បានស្នើឱ្យភាគីក្រុមហ៊ុនពន្លឿនកិច្ចការទាំងនេះ ដោយបន្តកិច្ចសហប្រតិបត្តិការជាមួយក្រសួង-ស្ថាប័ន ឬភាគីពាក់ព័ន្ធកម្ពុជាបន្ថែមទៀត។

សម្តេចធិបតីក៏បានណែនាំឱ្យក្រសួង- ស្ថាប័នពាក់ព័ន្ធ បន្តផ្តល់នូវកិច្ចសហការ និងសម្របសម្រួល ដើម្បីធានាឱ្យបាននូវនិរន្តភាពការងារ សំដៅជួយជំរុញឱ្យគម្រោង ដែលកំពុងសិក្សាទាំងនោះអាចបញ្ចប់ និងដាក់ឱ្យដំណើរការក្នុងពេលឆាប់ៗ។

សម្តេចធិបតី បានវាយតម្លៃខ្ពស់ចំពោះក្រុមហ៊ុន CRBC ដែលបានចូលរួមចំណែក ក្នុងកិច្ចដំណើរការអភិវឌ្ឍនៅកម្ពុជា តាមរយៈការសម្រេចបាន នូវគម្រោងវិនិយោគផ្លូវថ្នល់នានា ជាពិសេសផ្លូវលឿនភ្នំពេញ-ព្រះសីហនុ។

សម្តេចធិបតី បានគូសបញ្ជាក់ថា “រាជរដ្ឋាភិបាលកម្ពុជា ក្រោមការដឹកនាំផ្ទាល់របស់សម្តេច បានត្រៀមលក្ខណៈរួចជាស្រេចក្នុងការសហការ និងសម្របសម្រួលបន្តទៅមុខទៀតជាមួយក្រុមហ៊ុន និងសូមលើកទឹកចិត្តឱ្យក្រុមហ៊ុនCRBC បន្តការវិនិយោគបន្ថែមទៀតនៅកម្ពុជា”៕

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនដូចខាងក្រោម៖
១-“TX FOOD (CAMBODIA) CO., LTD” គម្រោងបង្កើតរោងចក្រផលិតមី និងគុយទាវ ដែលមានទីតាំងវិនិយោគស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ក្នុងទុនវិនិយោគប្រមាណ ៧លានដុល្លារអាម៉េរិក និងអាចបង្កើតការងារបានចំនួន ១២០កន្លែង។
២-“CORP TRIM (CAMBODIA) INDUSTRY CO., LTD” គម្រោងបង្កើតរោងចក្រផលិតកេសកាតុង និងស្លាកតម្លៃពីក្រដាស ដែលមានទីតាំងវិនិយោគស្ថិតនៅផ្លូវលេខ ១២២ ភូមិត្រកៀត ឃុំត្រពាំងសាប ស្រុកបាទី ខេត្តតាកែវ ក្នុងទុនវិនិយោគប្រមាណ ៦,៣លានដុល្លារអាម៉េរិក និងអាចបង្កើតការងារបានចំនួន ១៨០កន្លែង។
៣-“POWER CROWN FOOTWEAR (CAMBODIA) CO., LTD” គម្រោងបង្កើតរោងចក្រផលិតស្បែកជើង និងគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិទួលសាម៉ សង្កាត់កំបូល ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ ៥,៦លានដុល្លារអាម៉េរិក និងអាចបង្កើតការងារបានចំនួន ៤.០៤០កន្លែង។
៤-“YOUNG ME APPAREL (CAMBODIA) CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ក្នុងទុនវិនិយោគប្រមាណ ៥,៤លានដុល្លារអាម៉េរិក និងអាចបង្កើតការងារបានចំនួន ១.៣៥៨កន្លែង។
៥-“JIASHUN R PACKAGING MATERIAL (CAMBODIA) CO., LTD” គម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅភូមិចាក់កំបិត ឃុំវល្លិសរ ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ ៥,២លានដុល្លារអាម៉េរិក និងអាចបង្កើតការងារបានចំនួន ៣០០កន្លែង។
៦-“NEWSIGHT GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិដំណាក់ធំ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ក្នុងទុនវិនិយោគប្រមាណ ៥,១លានដុល្លារអាម៉េរិក និងអាចបង្កើតការងារបានចំនួន ១.៥៨៦កន្លែង។

ដោយ: គង់ លាងហួរ
ភ្នំពេញ: យោងតាមសេចក្តីប្រកាសពត៌មានមួយចុះផ្សាយនៅថ្ងៃសុក្រនេះ បានឱ្យដឹងថា ក្រុមហ៊ុន ជីស៊ី អូរឫស្សី ឯ.ក ដែលជាអ្នកអភិវឌ្ឍគម្រោងផ្សារ ជីស៊ី អូរឫស្សី បានប្រកាសបដិសេធចំពោះការចុះផ្សាយរបស់សារពត៌មានមួយចំនួន ដែលមានគោលដៅបង្ខូចឈ្មោះរបស់ខ្លួន។

អ្នកអភិវឌ្ឍខាងលើអះអាងថា សារពត៌មានទាំងនោះបានចោទប្រកាន់ដោយគ្មានមូលដ្ឋានត្រឹមត្រូវ ដែលធ្វើឱ្យប៉ះពាល់ដល់កិត្តិយស និងទំនុកចិត្តរបស់អតិថិជនមកលើក្រុមហ៊ុន ដោយក្រុមហ៊ុនមិនអាចទទួលយកការចោទប្រកាន់បែបនោះបានឡើយ។

ដើម្បីជម្រះការចោទប្រកាន់ទាំងនេះ ក្រុមហ៊ុន ជីស៊ី អូរឫស្សី បានបញ្ជាក់នូវជំហររបស់ខ្លួន ក្នុងការចូលរួមអភិវឌ្ឍ និងវិនិយោគលើវិស័យអចលនវត្ថុនៅកម្ពុជាស្របតាមគោលនយោបាយរបស់រាជរដ្ឋាភិបាលកម្ពុជា ដូចខាងក្រោម៖
ទី១. គម្រោងផ្សារ ជីស៊ី អូរឫស្សី របស់ក្រុមហ៊ុនជីស៊ី អូរឫស្សី គឺជាគម្រោងមួយមានលក្ខណៈច្បាស់លាស់ និងបានសិក្សាយ៉ាងល្អិតល្អន់ ដើម្បីបំពេញនូវសេចក្តីត្រូវការរបស់អតិថិជន និងសាធារណជនទាំងអស់ ដែលចាប់អាម្មរណ៍លើគម្រោងរបស់ក្រុមហ៊ុន។ ក្រុមហ៊ុនជីស៊ី អូរឫស្សី លើកឡើងថា  បច្ចុប្បន្ននេះ ខ្លួនបាននិងកំពុងបុកគ្រឹះត្រៀមលក្ខណៈសាងសង់ ឱ្យស្របតាមគម្រោងរបស់ក្រុមហ៊ុនជូនអតិថិជន ដោយមិនមានការយឺតយ៉ាវនោះទេ។
ទី២. ក្រុមហ៊ុន ជីស៊ី អូរឫស្សី ឯ.ក នៅតែរក្សាជំហរយ៉ាងខ្ជាប់ខ្ជួនរបស់ខ្លួន លើការអនុវត្តគម្រោងផ្សារ ជីស៊ី អូរឫស្សី និងគោរពទៅតាមខ្លឹមសារនៃកិច្ចសន្យា  ដែលបានចុះជាមួយអតិថិជនទាំងអស់ ក្នុងស្មារតីសុចរិត និងការទទួលខុសត្រូវខ្ពស់បំផុត។

យោងតាមសេចក្តីប្រកាសពត៌មានរបស់ក្រុមហ៊ុនជីស៊ី អូរឫស្សី បានបង្ហាញទៀតថា  ប្រសិនបើក្រុមហ៊ុនមិនអាចបញ្ចប់ការសាងសង់ និងមិនអាចប្រគល់តូបផ្សារជូនអតិថិជនបានទាន់ពេលវេលា តាមកិច្ចសន្យាបានទេនោះ ក្រុមហ៊ុនសុខចិត្តបង់សំណងខូចខាតជូនអតិថិជនដូចមានចែងក្នុងកិច្ចសន្យា។

យោងតាមជំហរដែលបានរៀបរាប់ខាងលើនេះ ក្រុមហ៊ុនជីស៊ី អូរឫស្សី បានអំពាវនាវឱ្យអតិថិជនទាំងអស់ មានការយោគយល់ និងរង់ចាំនូវលទ្ធផលជាវិជ្ជមានពីសំណាក់ភាគីខាងក្រុមហ៊ុន។

ទន្ទឹមគ្នានេះ ក្រុមហ៊ុនក៏ប្រកាសរក្សាសិទ្ធិស្របច្បាប់របស់ខ្លួន ក្នុងការអនុវត្តវិធានការច្បាប់ ដើម្បីការពារផលប្រយោជន៍របស់អតិថិជន និងក្រុមហ៊ុនផងដែរ ក្នុងករណីដែលមានការផ្សព្វផ្សាយព័ត៌មានមិនពិត គ្មានមូលដ្ឋាន ឬមានខ្លឹមសារញុះញង់ ឬក្នុងចេតនាបង្ខូចកិត្តិយស និងកេរ្តិ៍ឈ្មោះរបស់ក្រុមហ៊ុន៕

ដោយៈ តែម សុខុម

ហាណូយ: គម្រោងរីហ្សតលំដាប់ផ្កាយ៦មួយទៀត ដែលមានវីឡាសរុបចំនួន១០០ នឹងត្រូវសាងសង់នៅឆកសមុទ្រ Vinh Hy ស្ថិតតាមបណ្តោយឆ្នេរសមុទ្រ ភាគខាងត្បូងប្រទេស ដែលល្បីល្បាញថាមានសម្រស់ស្រស់ដ៏ស្អាត និងពេញនិយមសម្រាប់អ្នកធ្វើដំណើរទេសច​រណ៍មុជទឹកមើលផ្កាថ្ម។

ក្រុមហ៊ុន Syrena Vietnam Investment and Development ដែលជាបុត្រសម្ព័ន្ធ នៃក្រុមហ៊ុនអភិវឌ្ឍន៍អចលនទ្រព្យ BMI Group និងអ្នកវិនិយោគលើគម្រោងនេះបញ្ជាក់ថា ខ្លួននឹងសាងសង់វីឡាលំដាប់ខ្ពស់ចំនួន៥៤ ក្នុងដំណាក់កាលដំបូង ហើយនឹងសាងសង់វីឡាចំនួន៤៦បន្ថែមទៀតនៅក្នុងដំណាក់កាលទី២។យោងតាមសារព័ត៌មានVN Express ចុះផ្សាយកាលពីថ្ងៃព្រហស្បតិ៍ ទី១៤ ខែកញ្ញា ឱ្យដឹងថា គម្រោងនេះ នឹងគ្របដណ្តប់លើផ្ទៃដីជិត៦៥ហិកតា ក្នុងស្រុកនិញ ហាយ (Ninh Hai) នៃខេត្តនិញ ធួន (Ninh Thuan) ប្រទេសវៀតណាម ហើយគ្រោងចំណាយដើមទុនប្រមាណ៦៦លានដុល្លារអាមេរិក។

បច្ចុប្បន្នរីហ្សត Amanoi Resort ដែលស្ថិតនៅឆកសមុទ្រ Vinh Hy ដែរនោះគឺជារីហ្សតលំដាប់ផ្កាយ៦ តែមួយគត់នៅក្នុងប្រទេសវៀតណាម។

ខេត្តនិញ ធួន (Ninh Thuan) មានតំបន់ទាក់ទាញទេសចរណ៍ជាច្រើនរួមទាំងតំបន់បម្រុងជីវមណ្ឌល លំដាប់ថ្នាក់ពិភពលោក វត្ថុបុរាណ និងវប្បធម៌របស់អាណាចក្រចាម និងវាលខ្សាច់ដ៏ស្រស់ស្អាតផងដែរ៕ VN Express៕

ដោយៈ ហ្វីអូណា

        ភ្នំពេញៈ ពិធីចុះហត្ថលេខាលើអនុស្សរណៈ នៃការយោគយល់គ្នា (MoU) រវាងសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា (LOSCBA) ជាមួយក្រុមហ៊ុន Simple Group (SG) របស់ប្រទេសសិង្ហបុរី។

ពិធីនេះត្រូវបានធ្វើឡើងនៅថ្ងៃទី១៤ ខែកញ្ញា ឆ្នាំ២០២៣ ដើម្បីទាក់ទាញវិនិយោគិន​ មកបោះទុនវិនិយោគនៅកម្ពុជា កាន់តែច្រើន។ នេះ គឺជាព្រឹត្តិការណ៍ដ៏សំខាន់នេះ ដែលជាកិច្ចខិតខំប្រឹងប្រែងរួមគ្នារបស់ភាគីទាំងពីរ ក្នុងការពង្រឹងកិច្ចសហប្រតិបត្តិការ នៅក្នុងវិស័យភស្តុភារ និងការផ្គត់ផ្គង់ ឧស្សាហកម្ម និងពាណិជ្ជកម្ម។

លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា បានឲ្យដឹងថា ជាមួយនឹងMoU នេះ វានឹងមានឱកាសកាន់តែច្រើន ត្រូវបានបង្កើតឡើងសម្រាប់អ្នកវិនិយោ​គ ក៏ដូចជាសមាជិករបស់សមាគម សម្រាប់ការអភិវឌ្ឍអាជីវកម្ម ការកសាងសមត្ថភាព កម្មវិធីផ្លាស់ប្តូរ និង/ឬបណ្តាញអាជីវកម្ម ជាដើម។លោកសង្ឃឹមថា LOSCBA និងSG នឹងចូលរួមក្នុងដំណើរនេះជាមួយគ្នាធ្វើការជាមួយគ្នា និងគាំទ្រគ្នាទៅវិញទៅមក ដើម្បីជម្នះរាល់បញ្ហាប្រឈមនានា ដែលកំពុងពិចារណាថា ជាឧបសគ្គសម្រាប់សមាជិករបស់យើង ទាក់ទងនឹងការដឹកជញ្ជូន និងច្រវាក់ផ្គត់ផ្គង់ និងវិស័យអាជីវកម្មផ្សេងទៀត។

លោកបន្តថា កម្ពុជាជាប្រទេសកំពុងអភិវឌ្ឍ ជាប្រទេសនាំចូលដូចជាសម្ភារសំណង់ សម្ភារស្បែកជើង និងសម្លៀកបំពាក់ អាហារ និងផលិតផលចាំបាច់មួយចំនួន ដែលត្រូវការផលិតសម្រាប់នាំចេញ និងលក់ក្នុងស្រុក។

សម្រាប់ពាណិជ្ជកម្មរវាងកម្ពុជា និងសិង្ហបុរី ការនាំចេញរបស់កម្ពុជាទៅកាន់ប្រទេសសឹង្ហបុរី បានកើនឡើងគួរឲ្យចាប់អារម្មណ៍ ៥៦៥.២ភាគរយ ក្នុងចន្លោះខែមករា ដល់ខែមិថុនា រយៈពេលពាក់កណ្តាលឆ្នាំ ក្នុងឆ្នាំ២០២៣ បើប្រៀបធៀបនឹងរយៈពេលដូចគ្នា កាលពីឆ្នាំមុន ឈានដល់ទឹកប្រាក់៤១៥លានដុល្លារ។ នេះបើយោងតាមទិន្នន័យពាណិជ្ជកម្មចុងក្រោយបំផុត ដែលចេញផ្សាយដោយអគ្គនាយកដ្ឋានគយ និងរដ្ឋាករ (GDCE)។

លោក ជា ចាន់ដារ៉ា ក៏សង្ឃឹមដែរថា ស្ថានភាពសេដ្ឋកិច្ចពិភពលោកនឹងមានភាពប្រសើរឡើង ក្នុងការធ្វើអាជីវកម្មបន្ថែមទៀតសម្រាប់ប្រទេសទាំងពីរ គឺប្រទេសកម្ពុជា សិង្ហបុរី និងពិភពលោកបន្ថែមពីលើឧស្សាហកម្មភស្តុភារ ចាំបាច់ត្រូវផ្តល់សេវាកម្មល្អនៃការដឹកជញ្ជូន ឃ្លាំង និងដំណើរការឯកសារដឹកជញ្ជូន ដើម្បីឱ្យមានភាពរហ័សរហួន សម្រាប់ការដឹកជញ្ជូនដល់អតិថិជន។

លោកបន្តថា កម្ពុជាមានផលិតផលចម្រុះ ហើយព្យាយាមពង្រឹងខ្លួនឯង ដើម្បីបង្កើនការនាំចេញ ជាពិសេសផលិតផលកសិកម្ម ដែលគាំទ្រយ៉ាងខ្លាំងពីរដ្ឋាភិបាលកម្ពុជា។

លោក Jun Hao Seah តំណាងឲ្យក្រុមហ៊ុន Simple Group បានសម្តែងក្តីរីករាយ ដែលបានចុះ MoU ជាមួយ សមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា។ លោកបន្តថា នេះជាការប្តេជ្ញាចិត្ត របស់ភាគីទាំងពីរ ក្នុងការសម្រួលដល់វិនិយោគិន/សមាជិក ក្នុងការជួប និងផ្លាស់ប្តូរផលិតផល ដោយការនាំចេញនាំចូល និងពាណិជ្ជកម្មផ្សេងទៀត ដែលជាតម្រូវការរវាងប្រទេសទាំងពីរ។

ទន្ទឹមនឹង MoU នេះដែរ សមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា ក៏បានរៀបចំពិធីជំនួបរវាងម្ចាស់អាជីវកម្ម មកពីប្រទេសសឹង្ហបុរី ដែលមានចំនួន១០ក្រុមហ៊ុន ដើម្បីឲ្យសមាជិករបស់សមាគម មានឱកាសក្នុងការទំនាក់ទំនង ដោយផ្ទាល់ជាមួយម្ចាស់អាជីវកម្មមកពីសឹង្ហបុរី រួមមាន ក្រុមហ៊ុននាំចូលផ្លែឈើ អ្នកលក់ដុំ, ក្រុមហ៊ុន ឡូជីស្ទ៉ីក ក្រុមហ៊ុនចែកចាយទឹកដោះគោ និងចំណីអាហារ, ក្រុមហ៊ុនតំណាងហ្វ្រេនឆាយ និងចំណីអាហារជាដើម៕

ដោយៈ តែម សុខុម

គូឡាឡាំពួ: ខណៈក្រុមហ៊ុនអភិវឌ្ឍន៍ លំនៅឋានធំបំផុតរបស់ប្រទេសចិន Country Garden កំពុងស្វះស្វែងសុំពន្យារពេលទូទាត់បំណុល គម្រោងអភិវឌ្ឍន៍ខ្នាតយក្សតម្លៃ១០០លានដុល្លារ របស់ក្រុមហ៊ុននេះនៅម៉ាឡេស៊ី បានស្ថិតក្រោមការពិនិត្យពិច័យ ពីម្ចាស់បំណុ​ល ទោះបីជាប្រទេសនេះ ផ្ដល់គ្រឿងលើកទឹកចិត្តផ្នែកហិរញ្ញវត្ថុដើម្បីទាក់ទាញការវិនិយោគយ៉ាងណាក្ដី។

គម្រោងអភិវឌ្ឍន៍ខ្នាតយក្សForest City របស់ក្រុមហ៊ុន Country Garden លើផ្ទៃដី២.៨៣២ហិកតា ស្ថិតលើកោះចំនួន៤ក្នុងរដ្ឋ Johor ដែលអមដោយឆ្នេរខ្សាច់សដ៏ស្រស់ស្អាត និងសម្បូរដោយសត្វអណ្ដើក ប្រៀបប្រដូចឋានសួគ៌ខាងលើនេះ មានភូមិសាស្ត្រស្ថិតនៅជាប់ព្រំដែនប្រទេសសិង្ហបុរី។

តាមការគ្រោងទុក នៅពេលសាងសង់បញ្ចប់ជាស្ថាពរ នៅឆ្នាំ២០៣៥ គម្រោងខ្នាតយក្សនេះ នឹងមានសមត្ថភាពទទួលអ្នកស្នាក់នៅបាន៧០០.០០០នាក់។ នេះបើយោងតាមទីភ្នាក់ងារព័ត៌មាន Reuters ចុះផ្សាយកាលពីថ្ងៃព្រហស្បតិ៍ ទី១៤ ខែកញ្ញា។តំណាងគម្រោង Forest Cityបញ្ជាក់ថា ក្នុងរយៈពេល៧ឆ្នាំមកនេះ ក្រុមហ៊ុន Country Garden បានបោះទុនវិនិយោគចំនួន៤,៣ពាន់លានដុល្លារ រួចមកហើយលើគម្រោងនេះ។ ទោះជាយ៉ាងណា ការបោះទុននេះ គឺតិចតួចខ្លាំងណាស់ បើធៀបនឹងផែនការវិនិយោគ១០០ពាន់លានដុល្លារ ដែលបានគ្រោងទុកតាំងពីដើមមក។

បច្ចុប្បន្ន គម្រោងអភិវឌ្ឍន៍ដែលកំពុងដំណើរការ នៅឡើយនេះទទួលអ្នកស្នាក់នៅ បានតិចជាង១០.០០០នាក់ ដែលស្មើប្រមាណ១%ប៉ុណ្ណោះនៃគោលដៅរបស់គម្រោង។

គម្រោង Forest City បានឆ្លុះបញ្ចាំងយ៉ាងច្បាស់ពីហានិភ័យរបស់ក្រុមហ៊ុនCountry Garden ខណៈក្រុមហ៊ុនអភិវឌ្ឍន៍ចិន ជាច្រើនផ្សេងទៀត ក៏កំពុងជាប់ផុងក្នុងបំណុល ទាំងនៅក្នុងប្រទេសចិន និងនៅទីផ្សារបរទេស។

ក្រុមអ្នកវិភាគនិយាយថា ខណៈខ្លួនកំពុងជួបការលំបាកជាមួយនឹងរំហូរសាច់ប្រាក់ និងកាតព្វកិច្ចទូទាត់បំណុល ការព្យាយាមរបស់ក្រុមហ៊ុន Country Garden បញ្ចូលដើមទុនបន្ថែមចូល ក្នុងគម្រោង Forest City នៅពេលនេះហាក់កាន់តែលំបាក។

ពួកគេបានលើកឡើងថា ក្រុមហ៊ុនអភិវឌ្ឍន៍ចិនមួយនេះ ក៏ទំន​ងជាមិនអាចបង្កើនប្រាក់ចំណូល ពីគម្រោងនេះក្នុងពេលឆាប់ៗនោះដែរ៕ Reuters៕

ដោយៈ គង់ សូរិយា

        ភ្នំពេញៈ ក្រុមហ៊ុនសំណង់ជប៉ុនឈ្មោះ RISING និងក្រុមហ៊ុនSINAC INC. មានបំណងបើកដំណើរការ ក្រុមហ៊ុននៅប្រទេសកម្ពុជា លើវិស័យអចលនទ្រព្យ សំណង់នាំចេញ-នាំចូល និងការផ្តល់ប្រឹក្សាយោបល់ផ្នែកច្បាប់ និងជួយសម្រួលធុរកិច្ចដល់ពាណិជ្ជករ និងវិនិយោគិនជប៉ុន ដែលមានបំណងចង់វិនិយោគនៅកម្ពុជា។

ព័ត៌មាននេះ ត្រូវបានលើកឡើងក្នុងជំនួបរវាងលោក ICHIRO AISAWA សមាជិកសភាជប៉ុន ជាមួយលោកទុយ រី ឯកអគ្គរាជទូតកម្ពុជាប្រចាំ​ប្រទេស​ជប៉ុន អមដោយលោកស៊ីន សារ៉ាយ អនុព័ន្ធពាណិជ្ជកម្ម បានទទួលជួបពិភាក្សាការងារជាមួយ សមាជិកសភាប្រទេសជប៉ុន។​ នេះបើយោងតាមស្ថានទូតកម្ពុជាប្រចាំ​ប្រទេស​ជប៉ុន កាលពីថ្ងៃទី១២ ខែកញ្ញា ឆ្នាំ២០២៣។ ក្នុងទិសដៅជំរុញការវិនិយោគ ឯកអគ្គរាជទូតកម្ពុជា បានណែ​នាំឱ្យក្រុមហ៊ុនជួបពិភាក្សាបន្ថែម ជាមួយមន្រ្តីនៃក្រុមប្រឹក្សាអភិវឌ្ឍន៍កម្ពុជា ដើម្បីបានចុះពិនិត្យមើលរោងចក្រ និងទីតាំងដែលអាចអំណោយផល សម្រាប់ការវិនិយោគលើវិស័យខាងលើនេះ។

ថ្នាក់ដឹកនាំក្រុមហ៊ុនទាំងពីរ នឹងធ្វើដំណើរមកកាន់ប្រទេសកម្ពុជានៅថ្ងៃទី១៧ ខែកញ្ញា ឆ្នាំ២០២៣ខាងមុខ ហើយតាមរយៈការសម្របសម្រួល ពីលោកអនុព័ន្ធពាណិជ្ជកម្ម ក្រុមហ៊ុនទាំងពីរ នឹងជួបពិភាក្សាការងារជាមួយមន្រ្តីមួយចំនួន នៃក្រសួងពាណិជ្ជកម្ម និងក្រុមប្រឹក្សាអភិវឌ្ឍន៍កម្ពុជា ដើម្បីពិនិត្យលទ្ធភាព បើកការិយាល័យតំណា​ងក្រុមហ៊ុននៅកម្ពុជាឱ្យបានកាន់តែឆាប់៕

        ដោយៈ ស៊ីវ ម៉េង

        ភ្នំពេញៈ ក្រុមអ្នកជំនាញអចលនទ្រព្យ បានបង្ហើបពីវិធីសាស្រ្តសំខាន់ៗមួយចំនួន ដើម្បីលក់អចលនទ្រព្យ ពិសេសដីធ្លីបានលឿនក្នុងអំឡុងពេលមានវិបត្តិបែបនេះ។

      ក្រុមអ្នកជំនាញ ដែលមានក្រុមហ៊ុនអចលនទ្រព្យក្នុងដៃជាច្រើនបានបង្ហើបពីវិធីសាស្រ្តសំខាន់ៗចំនួនបី ដើម្បីលក់អចលនទ្រព្យបានលឿន ដូចជា ទី១ លក់ក្នុងតម្លៃទាបជាងទីផ្សារ៣០ ទៅ៥០ភាគរយ ទី២ ផ្តល់កម្រៃជើងសារខ្ពស់ ដល់ភ្នាក់ងារអចលនទ្រព្យនានា ទី៣ លក់ដី ដែលមានទីតាំងជាតំបន់ មានសក្តានុពលសេដ្ឋកិច្ច និងពាណិ ជ្ជកម្ម។

កាលពីថ្ងៃទី១៣ កញ្ញាកន្លងមកនេះ លោកឧកញ៉ាបណ្ឌិតគីម ហ៊ាងប្រធានKW Cambodia និងជាអ្នកអភិវឌ្ឍន៍បុរីវិមានសំណាងនិងលោកជំទាវឧកញ៉ាគង់ សំណាង បានជួបជាមួយថ្នាក់ដឹកនាំក្រុមហ៊ុនភ្នាក់ងារអចលនទ្រព្យល្បីៗ ដើម្បីពិភាក្សារកវិធីសាស្រ្ត និងពង្រីកកិច្ចសហប្រតិបត្តិការ ដោយឈរលើមូលដ្ឋានឈ្នះ ឈ្នះទាំងអស់គ្នា។

លោកឧកញ៉ាបណ្ឌិតគីម ហ៊ាងបានមានប្រសាសន៍ឲ្យដឹងថា ទីផ្សារអចលនទ្រព្យ ពិសេសផ្នែកលំនៅដ្ឋាននៅតែលក់បាន សម្រាប់ផ្ទះតម្លៃខ្ពស់ ឬសម្រាប់អ្នកមាន ព្រោះអ្នកមាននៅតែមានប្រាក់ច្រើន ទោះជាស្ថិតនៅក្នុងវិបត្តិក្តី។

ទីផ្សារអចលនទ្រព្យកម្ពុជាបាន និងកំពុងជាប់គាំងបណ្តើរ ស្របពេលលំហូរសាច់ប្រាក់ របស់ប្រជាពលរដ្ឋក្នុងស្រុក កំពុងជាប់គាំង និងលំហូរទុនវិនិយោគពីបរទេស(FDI) ស្ថិតនៅមានកម្រិតនៅឡើយ ខណៈពេលដែលស្ថានភាពទីផ្សារ ដែលពឹងផ្អែកខ្លាំងលើអ្នកធុរកិច្ចចិន កំពុងមានសញ្ញាមិនច្បាស់លាស់ ដោយសារប្រទេសចិនកំពុងមានវិបត្តិអចលនវត្ថុខ្លួនឯងផងដែរ៕