ដោយៈ ជេស៊ីកា

សៀមរាបៈ តើសកម្មភាពទិញ លក់ និងតម្លៃដីធ្លីនៅទីក្រុងថ្មី​Airport Cityបាននិងកំពុងវិវត្តន៍បែបណា ខណៈក្រុមហ៊ុនYunan Development បាននិងកំពុងរៀបចំសម្ភោធព្រលានយន្តហោះសៀមរាប អង្គរតម្លៃ១១០០លានដុល្លារ នៅខែតុលាខាងមុខនេះ។

ថ្នាក់ដឹកនាំក្រុមហ៊ុននេះ ធ្លាប់បានស្នើសុំសម្តេចតេជោហ៊ុន សែនអតីតនាយករដ្ឋមន្រ្តីនៃកម្ពុជា ដើម្បីរៀបចំកសាងទីក្រុងព្រលានយន្តហោះលើទំហំផ្ទៃដី១០០០ហិកតា ដើម្បីគាំទ្រដល់ដំណើរការព្រលានយន្តហោះនេះ។លោកកែវ សុធារ៉ាប្រធានក្រុមហ៊ុនKW Cambodiaប្រចាំខេត្តសៀមរាបបានមានប្រសាសន៍ឲ្យដឹង កាលពីចុងសប្តាហ៍ថា បច្ចុប្បន្នការសាងសង់ហេដ្ឋារចនាសម្ព័ន្ឋ ពិសេសផ្លូវថ្មីតភ្ជាប់ពីព្រលានយន្តហោះថ្មី ក្នុងស្រុកសូទ្រនិគម មកកាន់ក្រុងសៀមរាបបានបញ្ចប់ហើយ។ លោកបន្តថា “ស្ថានភាពទីផ្សារអចលនទ្រព្យ នៅក្រុងសៀមរាប និងទីក្រុងថ្មីមានសភាពស្ងប់ស្ងាត់ ប៉ុន្តែតម្លៃមិនធ្លាក់ចុះនោះទេ ដោយតម្លៃដីនៅទីក្រុងនេះ ដែលជាប់ផ្លូវធំមានតម្លៃចន្លោះពី១០ ទៅ៥០ដុល្លារក្នុងមួយម៉ែត្រការ៉េ”។ លោកបន្តថា “សម្រាប់ដីមានទីតាំងនៅផ្នែកខាងក្នុង មានតម្លៃចន្លោះពី២ ទៅ២០ដុល្លារអាមេរិកក្នុងមួយម៉ែត្រការ៉េផងដែរ”។ ព្រលានយន្តហោះថ្មី ខេត្តសៀមរាប អង្គរ មានទីតាំងស្ថិតនៅប្រជុំនៃស្រុកចំនួន៣ គឺស្រុកបន្ទាយស្រី ស្រុកសូទ្រនិគម និងស្រុកប្រាសាទបាគង ។ជាមួយគ្នានេះ អ្នកស្រីជួន ផល្លី ភ្នាក់ងារអចលនទ្រព្យប្រចាំក្រុមហ៊ុនKPTបានមានប្រសាសន៍ឲ្យដឹងផងដែរថា តំបន់ផ្សេងៗនៅខេត្តសៀមរាប មានសភាពទ្រឹង ប៉ុន្តែតំបន់ទីក្រុងថ្មី ស្ថិតនៅកៀកនឹងព្រលានយន្តហោះថ្មី មានសកម្មភាពទិញលក់បណ្តើរៗ ដោយតម្លៃមានការប្រែប្រួលអាស្រ័យលើទីហំដីតូចៗ និងដីធំ ដែលដីជាប្រភេទដីឡ៏ត៍មានតម្លៃ៧៥ដុល្លារក្នុងមួយម៉ែត្រការ៉េ និងដីទំហំធំៗមានតម្លៃចន្លោះពី១៥ទៅ២០ដុល្លារក្នុងមួយម៉ែត្រការ៉េ។ អ្នកស្រីបន្តថា “ទីផ្សារកំពុងងើបឡើងវិញបណ្តើរៗ ប៉ុន្តែអ្វីៗត្រូវការរង់ចាំពេលវេលាបន្ថែមទៀត ដើម្បីឲ្យទីផ្សារនេះមានភាពប្រសើរឡើងវិញ”។

ខេត្តសៀមរាប ជាប៉ូលទេសចរណ៍ដ៏សំខាន់មួយរបស់កម្ពុជា ដែ​លរាជរដ្ឋាភិបាលបាន និងកំពុងយកចិត្តទុកដាក់ ក្នុងការអភិវឌ្ឍន៍ហេដ្ឋារចនាសម្ព័ន្ឋ លើផ្លូវក្នុងទីក្រុងជាង៣០ខ្សែ ការសាងសង់ព្រលានយន្តហោះថ្មី ការសាងសង់ផ្លូវហាយវេថ្មី និងកាលពីពេលថ្មីៗនេះ ក្រុមហ៊ុនChina Metro Groupបាននិងកំពុងសិក្សា ដើម្បីសាងសង់ខ្សែរថភ្លើងធុនស្រាល តភ្ជាប់ពីព្រលានយន្តហោះថ្មី មកកាន់ក្រុងសៀម​រាបផងដែរ។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការអាកាសចរណ៍ស៊ីវិល លោកស៊ីន ចាន់សិរីវត្ថាបានមានប្រសាសន៍ឲ្យដឹងនាពេលកន្លងមកថា ការអភិវឌ្ឍន៍ព្រលានយន្តហោះ មិនងាយផ្តល់ផលចំណេ​ញទេ ហេតុនេះទើបក្រុមហ៊ុនសាងសង់ ទីក្រុងព្រលានយន្តហោះអម(Airport City) ដើម្បីទាក់ទាញការវិនិយោគ និងបង្កើតសកម្មភាពអាជីវកម្មបន្ថែម ដែលទីក្រុងថ្មីអាចនឹងមានភោជនីយដ្ឋាន សណ្ឋាគារ ផ្សារទំនើបជាដើម ដើម្បីបំរើឲ្យការកំសាន្ត ដើរទិញទំនិញ និងការស្នាក់នៅរបស់ភ្ញៀវធ្វើដំណើរនានា៕

ដោយ: គង់ លាងហួរ

ហាណូយ: ស្របពេលមានការធ្លាក់ចុះ នៃសេដ្ឋកិច្ចរបស់ប្រទេសចិន និងការពង្រឹងអំណាចនយោបាយ របស់ប្រធានាធិបតីចិនលោកស៊ី ជីនពីង លោកចូ បៃដិន មើល​ឃើញ​ឱកាស​មួយ​ ដើម្បី​ទាញប្រទេស​ជាច្រើន​ទៀត រួម​ទាំង​ប្រទេស​វៀតណាម និង​កម្ពុជា​ ចូលទៅក្នុង​គន្លង​របស់​អាមេរិក។

កាលពីថ្ងៃអាទិត្យចុងសប្តាហ៍កន្លងទៅ ប្រធានាធិបតីអាមេរិក លោកចូ បៃដិន បានបើកដំណើរទស្សនកិច្ចរយៈពេលខ្លី ទៅកាន់ប្រ​ទេសវៀតណាម ដោយលោកបៃដិន បានបញ្ជាក់ប្រាប់ទៅកាន់ថ្នាក់ដឹកនាំវៀតណាមថា ប្រទេសយើងទាំងពីរមានឱកាស ដើម្បីរៀបចំតំបន់ឥណ្ឌូប៉ាស៊ីហ្វិកសម្រាប់ទសវត្សរ៍ខាងមុខ។​

ទីប្រឹក្សា​កំពូល​មួយរូបរបស់លោក ចូ បៃដិន បាន​មានប្រសាសន៍ថា វៀតណាម​កំពុង​បង្កើន​ទំនាក់ទំនង​ជាមួយ​អាមេរិក ​ដល់​កម្រិត​ដៃគូ​យុទ្ធសាស្ត្រ​គ្រប់​ជ្រុងជ្រោយ ដែល​តំណាង​ឱ្យ​ភាពជាដៃគូ​អន្តរជាតិ​កម្រិតខ្ពស់បំផុត​របស់​វៀតណាម។

បណ្តាប្រទេសផ្សេងទៀត ដែលមានទំនាក់ទំនងកម្រិតខ្ពស់បំផុតជាមួយវៀតណាម រួមមាន ប្រទេសចិន និង រុស្ស៊ី។ ការ​លើក​កំពស់ទំនាក់ទំនងជាមួយសហរដ្ឋអាមេរិក ​ឱ្យ​ឡើង​ដល់កម្រិតខ្ពស់បំផុតដូចគ្នា​នេះបង្ហាញ​ថា​ វៀតណាម​ចង់​ពង្រីកមិត្តភាព​របស់​ខ្លួន​ ខណៈ​ក្រុមហ៊ុន​អាមេរិក​និង​អឺរ៉ុប​ជាច្រើន កំពុងស្វែងរក​ទីតាំងផលិតកម្មថ្មីចេញពីប្រទេសចិន។

លោក បៃដិន បានរីករាយស្វាគមន៍ ​ចំពោះចំណាត់ការនេះ ដោយលោកសង្ឃឹមថា វឌ្ឍនភាពអាចនឹងសម្រេចបាន លើបញ្ហាប្រ​ឈមមួយចំនួន ដូចជា អាកាសធាតុ សេដ្ឋកិច្ច និងបញ្ហាផ្សេងៗទៀត ក្នុងអំឡុងដំណើរទស្សនកិច្ច រយៈពេល២៤ម៉ោងរបស់លោក ទៅកាន់ទីក្រុងហាណូយ។

ក្នុងអំឡុងជំនួបដាច់ដោយឡែកមួយជាមួយលោក Nguyen Phu Trong អគ្គលេខាបក្សកុម្មុយនិស្តវៀតណាម លោកចូ បៃដិន បានចាត់ទុកសហរដ្ឋអាមេរិក និងវៀតណាមថា ជា “ដៃគូ​ដ៏​សំខាន់ក្នុង​ពេល​វេលា​ដ៏​សំខាន់មួយ”។

លោក Jon Finer ប្រធាន​ទីប្រឹក្សារង​ទទួល​បន្ទុក​ផ្នែក​សន្ដិសុខ​ជាតិ​របស់​លោក បៃដិន បានថ្លែង​ថា ស្ថានភាព​ទំនាក់ទំនង​បច្ចុប្បន្ន​នេះ​រវាង​សហរដ្ឋ​អាមេរិក ​និង​វៀតណាម ​បង្ហាញ​ពី​ទំនាក់ទំនង​ភាព​ជា​ដៃគូ​កម្រិត​ខ្ពស់​បំផុត​របស់​វៀតណាម ​នៅ​ក្នុង​ភាព​ជា​ដៃគូ​អន្តរជាតិ៕

ដោយៈ តែម សុខុម

សៀងហៃ: ក្រុមហ៊ុនផលិតយន្តហោះ របស់ប្រទេសចិន Commercial Aircraft Corporation of China, Ltd (COMAC) ទទួលបានការបញ្ជាទិញយន្តហោះធុនC919 របស់ខ្លួនយ៉ាងច្រើនសន្ធឹ​កសន្ធាប់រហូតដល់ទៅ១.០៦១គ្រឿង។

នេះបើយោងតាមលោក ហឺ តុងហ្វឹង (He Dongfeng) ប្រធានក្រុមប្រឹក្សាភិបាលនៃក្រុមហ៊ុននេះ បានទម្លាយឱ្យដឹងក្នុងវេទិកានវានុវត្តន៍ក្រុងភូជាំង (Pujiang Innovation Forum) លើកទី១៦ ដែលត្រូវបានប្រារព្ធឡើងកាលពីថ្ងៃអាទិត្យ ទី១០ ខែកញ្ញា។

ក្រុមហ៊ុនចិន ដែលផលិតយន្តហោះធុន C919 និងធុន ARJ21 ខាងលើនេះបានឱ្យដឹងថា វិស័យផលិតយន្តហោះ ដឹកអ្នកដំណើរក្នុងស្រុករបស់ប្រទេសចិន ដំបូងឡើយបានចាប់ផ្ដើមផលិតយន្តហោះធុនតូច ក្រោយមកក៏បន្តផលិតយន្តហោះធុនមធ្យម ហោះហើរក្នុងចម្ងាយជិត និងចម្ងាយមធ្យមរហូតដល់យន្តហោះធុនធំ ដែលហោះផលិតរួច ក្នុងចម្ងាយឆ្ងាយ។

កាលពីខែធ្នូ ឆ្នាំ២០២២ ក្រុមហ៊ុនអាកាសចរណ៍ចិន China Eastern ជាអតិថិជនដំបូង ដែលបានបញ្ជាទិញយន្តហោះធុន C919 បានទទួលយន្តហោះនេះ និងបានចាប់ផ្ដើមប្រតិបត្តិការពាណិជ្ជកម្មនៅខែឧសភា ឆ្នាំ២០២៣។

បច្ចុប្បន្នក្រុមហ៊ុនអាកាសចរណ៍ចិន China Eastern កំពុងដំណើរការយន្តហោះ២គ្រឿង ដែលហោះហើរយ៉ាងសកម្មលើផ្លូវអាកាសរវាងទីក្រុងសៀងហៃ និងក្រុងឈឹងទូ (Chengdu)៕ Xinhua៕

ដោយៈ គង់ សូរិយា

        បាត់ដំបងៈ ស្ថិតនៅក្នុងចំណោមបណ្តាខេត្ត ដែលជាប៉ូលសេដ្ឋកិច្ចទី៤របស់ប្រទេស ខេត្តបាត់ដំបងមានភាពទាក់ទាញជាងគេ លើការវិនិយោគអចលនទ្រព្យ និងវិស័យដទៃទៀត។

        មិនខុសពីបណ្តាខេត្តដទៃទៀត ខេត្តបាត់ដំបងក៏បាននិងកំពុងមានសភាពស្ងប់ស្ងាត់លើការទិញលក់ដីធ្លី និងអចលនទ្រព្យនានាផងដែរ។

លោកអ៊ិន ដារ៉ាអគ្គនាយកក្រុមហ៊ុនKW Cambodiaប្រចាំខេត្តបាត់ដំ​បងបានមានប្រសាសន៍ឲ្យដឹង តាមបណ្តាញតេឡេក្រាមកាលពីថ្ងៃទី១១ កញ្ញាថា ទីផ្សារអចលនទ្រព្យ ពិសេសដីធ្លីនៅក្នុងក្រុងបាត់ដំបង មិនធ្លាក់ចុះច្រើននោះទេ លើកលែងតែអ្នកប្រញាប់លុយ ទើបពួកគេលក់ចេញ ក្រោមតម្លៃទីផ្សាររហូតដល់៥០ភាគរយ។   លោកបន្តថា “សកម្មភាពទិញ លក់មានតិចតួច ដោយតម្លៃដីនៅតាមបណ្តោយផ្លូវក្រវ៉ាត់ក្រុងទី២ថ្មី មានតម្លៃចន្លោះពី២០ទៅ១៧០ដុល្លារក្នុងមួយម៉ែត្រការ៉េ”។ លោកបន្តថា “ចំណែកដីនៅលើផ្លូវក្រវ៉ាត់ក្រុងទី១ មានតម្លៃចន្លោះពី១៥០ ទៅ៣៥០ដុល្លារអាមេរិក ក្នុងមួយម៉ែត្រការ៉េ”។

លោកអ៊ិន ដារ៉ាបានបន្តថា ការប្រកាសលក់ជាទូទៅរបស់ម្ចាស់ដី មិនមានសភាពផុលផុសនោះទេ ភាគច្រើនពួកគាត់លក់គ្នាគាត់ ដែលស្គាល់គ្នា ឬនៅតាមហាងកាហ្វេ សម្រាប់អចលនទ្រព្យដែលលក់ប្រញាប់លុយ។ រដ្ឋាភិបាលបាន និងកំពុងរៀបចំផែនការកែលំអរឡើងវិញនូវព្រ​លា​នយន្តហោះក្នុងក្រុងបាត់ដំបង ប៉ុន្តែរហូតមកទល់ពេលនេះ ដំនើរការនេះហាក់ស្ងប់ស្ងាត់ ដោយមិនទាន់មានក្រុមហ៊ុនណាសម្រេចចិត្តបោះទុនវិនិយោគនៅឡើយទេ។

ក្រៅពីសក្តានុពលលើដំណាំកសិកម្ម និងកសិឧស្សាហកម្ម ខេត្តបាត់ដំបងជាប៉ូលទេសចរណ៍ដ៏សំខាន់មួយផងដែរ ដោយខេត្តនេះមានសម្បត្តិធម្មជាតិ និងរមណីយដ្ឋានប្រវត្តិសាស្រ្តជាច្រើន ដូចជារមណីយដ្ឋានឯកភ្នំ ភ្នំសំពៅ បឹងកំពីងពួយ ប្រាសាទស្នឹង រមណីយដ្ឋានសេកសកជាដើម។  ខេត្តបាត់ដំបង បាននិងកំពុងពង្រីកសក្តានុពល បន្ថែមរបស់ខ្លួនផងដែរ ដោយបច្ចុប្បន្នរដ្ឋាភិបាលបាន និងកំពុងសាងសង់ផ្លូវជាតិលេខ១០ ដែលតភ្ជាប់ពីស្រុកសំឡូត ទៅកាន់ខេត្តខេត្តពោធិសាត់ និងភ្ជាប់ជាមួយកំពង់ផែទឹកជ្រៅ ក្នុងខេត្តកោះកុង៕

ដោយ: គង់ លាងហួរ

ភ្នំពេញ: យោងតាមរបាយការណ៍ ដែលចេញផ្សាយដោយរដ្ឋលេខាធិការដ្ឋានអាកាសចរស៊ីវិល កាលពីថ្ងៃច័ន្ទដើមសប្តាហ៍នេះបានឱ្យដឹងថា កម្ពុជាបានទទួលអ្នកធ្វើដំណើរ តាមយន្តហោះចំនួន៣,៤លាននាក់ក្នុងរយៈពេល៨ខែដំបូង ឆ្នាំ២០២៣នេះ ហក់ឡើង១៨០ភាគរយ បើធៀបរយៈពេលដូចគ្នាកាលពីឆ្នាំមុន។

នេះបើយោងតាមសារពត៌មាន Xinhua ចុះផ្សាយនៅថ្ងៃចន្ទ ទី១១ ខែកញ្ញា ឆ្នាំ២០២៣។របាយការណ៍នេះបានបន្តថា ក្រុមហ៊ុនអាកាសចរណ៍អន្តរជាតិ និងក្នុងស្រុក បានដំណើរការជើងហោះហើរសរុប ចំនួន៣៣.១៤៦ មកកាន់អាកាសយានដ្ឋានអន្តរជាតិ ចំនួន៣របស់កម្ពុជា ក្នុងអំឡុងខែមករាដល់ខែសីហា ឆ្នាំ២០២៣នេះ ដែលហក់ឡើង១១៤ភាគរយបើធៀបនឹងឆ្នាំមុន។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរស៊ីវិល លោកស៊ិន ច័ន្ទសេរីវុត្ថា បានមានប្រសាសន៍ថា ប្រទេសកម្ពុជាត្រូវបានព្យាករថា នឹងទាក់ទាញអ្នកធ្វើដំណើរ តាមផ្លូវអាកាសបានប្រមាណ៤,៦លាននាក់នៅឆ្នាំនេះ ពោលគឺនឹងកើនឡើងពី២,៣៨លាននាក់កាលពីឆ្នាំមុន។

លោកបានបញ្ជាក់ប្រាប់សារពត៌មានចិន Xinhua ថា “សម្រាប់ឆ្នាំ២០២៣នេះ យើងព្យាករថា ចំនួនអ្នកដំណើរតាមផ្លូវអាកាសនឹងកើនឡើងទ្វេរដង ដោយសារការបើកដំណើរការឡើងវិញរបស់ប្រទេ​សចិននៅដើមឆ្នាំនេះ ដែលបានបញ្ចូលកម្លាំងរុញច្រានថ្មី ទៅក្នុងការអភិវឌ្ឍឧស្សាហកម្មអាកាសចរណ៍”។

យោងតាមរបាយការណ៍ដដែលខាងលើនេះ បានបង្ហាញទៀតថា ផ្ទុយពីការកើនឡើងនៃចំនួន អ្នកដំណើរតាមផ្លូវអាកាស កម្ពុជាសង្កេតឃើញមានការថយចុះ ចំនួន១០ភាគរយនៃបរិមាណដឹកទំនិញតាមផ្លូវអាកាស មកនៅត្រឹម៣៤.៨៨១តោន ក្នុងរយៈពេល៨ខែដំបូងនៃឆ្នាំនេះ៕

ដោយ: គង់ លាងហួរ

ញូវដែលីៈ ក្រុមមេដឹកនាំធំៗនៅលើពិភពលោក បានប្រកាសអំពីកិច្ចព្រមព្រៀងផ្លូវដែក និងកំពង់ផែពហុជាតិ ដើម្បីតភ្ជាប់តំបន់មជ្ឈិមបូព៌ា និងតំបន់អាស៊ីខាងត្បូងកាលពីថ្ងៃសៅរ៍ នៅខាងក្រៅកិច្ចប្រជុំកំពូលG20 ដែលរៀបចំឡើងនៅទីក្រុងញូវដេលី ប្រទេសឥណ្ឌា។

កតិកាសញ្ញានេះប្រកាសឡើងចំពេលដ៏សំខាន់មួយ ខណៈប្រធានាធិបតីអាមេរិកលោក ចូ បៃដិន កំពុងខិតខំទប់ទល់នឹងគម្រោងខ្សែក្រវាត់ និងផ្លូវរបស់ប្រទេសចិន ដោយកិច្ចព្រមព្រៀងនេះអាចធ្វើឱ្យទីក្រុងវ៉ាស៊ីនតោន ក្លាយជាដៃគូជំនួស និងក្លាយជាអ្នកវិនិយោគសម្រាប់បណ្តាប្រទេសកំពុងអភិវឌ្ឍន៍។

លោក ចូ បៃដិន បានមានប្រសាសន៍ថា “វាគឺជាកិច្ចព្រមព្រៀងដ៏ធំមួយ ដែលនឹងតភ្ជាប់កំពង់ផែឆ្លងកាត់ទ្វីបទាំងពីរ ហើយនឹងនាំឱ្យតំបន់មជ្ឈិមបូព៌ាកាន់តែមានស្ថិរភាព មានវិបុលភាពជាងមុន និងកាន់ តែរួមបញ្ចូលគ្នា”។ លោក បៃដិន បានថ្លែងនៅក្នុងព្រឹត្តិការណ៍មួយ ដោយប្រកាសអំពីកតិកាសញ្ញានេះថា “វានឹងបើកឱកាសដែលគ្មានទីបញ្ចប់ សម្រាប់ថាមពលស្អាត អគ្គិសនីស្អាត និងបណ្តាញខ្សែកាបដើម្បីតភ្ជាប់សហគមន៍”។លោក​នាយក​រដ្ឋមន្ត្រីឥណ្ឌា Narendra Modi ដែល​ជា​ម្ចាស់​ផ្ទះ​នៃជំនួប​កំពូល​ G20 បានមានប្រសាសន៍ថា “នៅថ្ងៃនេះ ខណៈយើងប្រកាសចាប់ផ្តើមគំនិតផ្តួចផ្តើម លើការតភ្ជាប់ហេដ្ឋារចនាសម្ព័ន្ធដ៏ធំសំបើមនេះ យើងកំពុងសាបព្រួសគ្រាប់ពូជ សម្រាប់មនុស្សជំនាន់ក្រោយ ដើម្បីសម្រេចក្តីសុបិន្តកាន់តែធំ”។

លោក Jon Finer ទីប្រឹក្សាសន្តិសុខជាតិរបស់សហរដ្ឋអាមេរិកបានប្រាប់អ្នកយកព័ត៌មានថា កិច្ចព្រមព្រៀងនេះនឹងផ្តល់អត្ថប្រ យោជន៍ដល់ប្រទេស ដែលមានប្រាក់ចំណូលទាប និងមធ្យមនៅក្នុងតំបន់ ហើយថែមទាំងផ្តល់តួនាទីសំខាន់ សម្រាប់តំបន់មជ្ឈិមបូព៌ាក្នុងពាណិជ្ជកម្មពិភពលោក។ក្រុមមន្ត្រីអាមេរិកបាននិយាយថា កិច្ចព្រមព្រៀងនេះមានគោលបំណងភ្ជាប់បណ្តាប្រទេស នៅមជ្ឈិមបូព៌ាដោយផ្លូវដែក និងតភ្ជាប់ពួកគេ ទៅកាន់ប្រទេសឥណ្ឌាតាមរយៈកំពង់ផែ និងជួយដល់លំហូរថាមពល និងពាណិជ្ជកម្មពីឈូងសមុទ្រទៅកាន់តំបន់អឺរ៉ុប ដើម្បីកាត់បន្ថយពេលវេលាដឹកជញ្ជូន ថ្លៃដើម និងការប្រើប្រាស់ប្រេងឥន្ធនៈ។

អនុស្សរណៈនៃការយោគយល់គ្នា សម្រាប់កិច្ចព្រមព្រៀងនេះនឹងត្រូវចុះហត្ថលេខា ដោយសហភាពអឺរ៉ុប ឥណ្ឌា អារ៉ាប៊ីសាអូឌីត អារ៉ាប់រួម សហរដ្ឋអាមេរិក និងដៃគូ G20 ផ្សេងទៀត៕

        ដោយៈ ស៊ីវ ម៉េង

        ភ្នំពេញៈ រយៈពេលមួយទសវត្សរ៍ចុងក្រោយនេះ(មុនវិបត្តិកូវីដ១៩មកដល់) រាជធានី និងក្រុងសំខាន់ៗចំនួន២ទៀតនៅកម្ពុជា បានផ្លាស់ប្តូរមុខមាត់ទាំងស្រុង ជាមួយនឹងការកើនឡើងនូវមជ្ឈមណ្ឌលពាណិជ្ជកម្ម និងអាគារកប់ពពកជាច្រើន។

នៅឆ្នាំ២០២៣នេះ ប្រទេសកម្ពុជានៅតែបន្តជាទិសដៅ សម្រា​ប់ការវិនិយោគអចលនទ្រព្យ ប៉ុន្តែល្បឿនរបស់វានៅមានកម្រិត ធៀបនឹងមុនវិបត្តិមកដល់។

១.រាជធានី​ភ្នំពេញ
ជា​រាជធានី​នៃ​ប្រទេស​កម្ពុជា និង​ជា​មជ្ឈមណ្ឌល​នៃ​សកម្មភាព​សេដ្ឋកិច្ច​ក្នុង​ប្រទេស។ ទីក្រុង​ភ្នំពេញ​ កំពុង​មានការ​កើន​ឡើង​នៃ​តម្រូវ​ការ​អចលន​ទ្រព្យ ជា​ពិសេស​ក្នុង​វិស័យ​លំនៅឋាន។ តម្រូវការអចលនទ្រព្យ នៅក្នុងរាជធានីភ្នំពេញនៅតែមាន ដោយសារចំនួនប្រជាជនកើនឡើង ការកើនឡើងនគរូបនីយកម្ម និងការកើនឡើងនៃប្រជាជនវណ្ណៈកណ្តាល។អ្នកវិនិយោគអចលនទ្រព្យ ដែលចង់វិនិយោគនៅទីក្រុងភ្នំពេញអាចពិចារណាតំបន់ដូចជា ខ័ណ្ឌចំការមន ដូនពេញ និងទួលគោក ដែលជាតំបន់កំពុងមានសក្តានុពល បើទោះជាស្ថានភាពក្នុងវិស័យនេះកំពុងប្រឈមបញ្ងាមួយចំនួនក្តី។

២ ខេត្តព្រះសីហនុ
ក្រុងព្រះសីហនុ គឺជាទីក្រុងឆ្នេរសមុទ្រមួយ ក្នុងប្រទេសកម្ពុជា ហើយត្រូវបានគេស្គាល់ថា ជាឆ្នេរដ៏ស្រស់ស្អាតបំផុតរបស់កម្ពុជាផងដែរ។ទីក្រុង​នេះបាន ​និង​កំពុង​មាន​ការ​កើនឡើង ​នៃ​តម្រូវការ​អចលនទ្រព្យ ជាពិសេស​ក្នុង​វិស័យ​ពាណិជ្ជកម្ម ។ តម្រូវការអចលនទ្រព្យក្នុងក្រុងព្រះសីហនុ ត្រូវបានជំរុញដោយឧស្សាហកម្មទេសចរ​ណ៍ ដែលកំពុងកើនឡើង និងការកើនឡើងនៃចំនួនអាជីវកម្មដែលបង្កើតប្រតិបត្តិការនៅក្នុងទីក្រុងនេះ។អ្នកវិនិយោគអចលនទ្រព្យ ដែលកំពុងស្វែងរកការបណ្តាក់ទុននៅខេត្តព្រះសីហនុ អាចពិចារណាលើតំបន់មួយចំនួន ដូចជា ខ័ណ្ឌ​មិត្តភាព និងខ័ណ្ឌមួយចំនួនទៀត។

បច្ចុប្បន្នក្រុមមន្រ្តីអន្តរក្រសួង បាននិងកំពុងរៀបចំនិតិវិធី ដើម្បីត្រៀមប្រកាសផ្សព្វផ្សាយ ពីការដោះស្រាយអគារជាប់គាំងប្រមាណ​៥០០អាគារនៅទីក្រុងនេះផងដែរ ស្របពេលទីក្រុងនេះកាន់តែមានភាពទាក់ទាញ បន្ទាប់ពីផ្លូវល្បឿនលឿនទី១ តភ្ជាប់ពីរាជធានី ទៅកាន់ខេត្តនេះ បានបើកដំណើរការកាលពីខែតុលា ឆ្នាំ២០២២កន្លងមកនេះ។

៣.ខេត្តសៀមរាប
សៀបរាម គឺជាទីក្រុងមួយទៀតក្នុងប្រទេសកម្ពុជា ដែលបាន និងកំពុងមានការរីកចម្រើន ជាលំដាប់ក្នុងវិស័យអចលនទ្រព្យ ។ ទីក្រុងនេះល្បីល្បាញ ដោយសារប្រាសាទបុរាណ និងទាក់ទាញភ្ញៀវទេសចររាប់លាននាក់ជារៀងរាល់ឆ្នាំ។តម្រូវការអចលនទ្រព្យ នៅក្នុងខេត្តសៀមរាប ត្រូវបានជំរុញដោយឧស្សាហកម្មទេសចរណ៍ ដែលកំពុងកើនឡើង និងការកើនឡើងនៃចំនួនជនបរទេសដែលរស់នៅក្នុងទីក្រុង។

អ្នកវិនិយោគអចលនទ្រព្យ ដែលកំពុងស្វែងរកការវិនិយោគនៅខេត្តសៀមរាប អាចពិចារណាលើតំបន់មួយចំនួនដូចជា ស្វាយដង្គុំ សាលាកំរើក និងក្រុងសៀមរាប ខណៈខេត្តនេះកំពុងត្រៀមស្វាគមន៍ព្រលានយន្តហោះលំដាប់អន្តរជាតិថ្មី ការអភិវឌ្ឍហេដ្ឋារចនាសម្ព័ន្ឋថ្មីៗ និងផែនការកសាងផ្លូវល្បឿនលឿនខ្សែទី៣ នៅកម្ពុជានាពេលអនាគតផងដែរ៕