ដោយៈ គង់ ហ្វីអូណា

             ភ្នំពេញៈ កម្ពុជា គ្រោងនឹងរៀបចំពិព័រណ៍វិស័យផ្គត់ផ្គង់ម្ហូបអាហារសណ្ឋាគារ និងបដិសណ្ឋារកិច្ចខ្នាតអន្តរជាតិ រយៈពេល៣ថ្ងៃ នាពាក់កណ្តាលខែកញ្ញា ឆ្នាំ២០២៣ខាងមុខនេះ នៅមជ្ឈមណ្ឌលពិព័រណ៍ និងសន្និបាតកោះពេជ្រ រាជធានីភ្នំពេញ។

             ថ្លែងក្នុងសន្និសីទសារព័ត៌មានស្តីពី ពិព័រណ៍វិស័យផ្គត់ផ្គង់ម្ហូបអាហារសណ្ឋាគារ និងបដិសណ្ឋារកិច្ចអន្តរជាតិ CAMFOOD​​/CAMHOTEL 2023 កាលពីរសៀលថ្ងៃទី៩សីហាលោក Andrew Siow ជាអគ្គនាយកក្រុមហ៊ុន AMB Tarsus Event group ដែលជាអ្នករៀបចំពិព័រណ៍នេះបានឱ្យដឹងថា ពិព័រណ៍នេះ នឹងប្រព្រឹត្តិទៅនៅថ្ងៃទី ១៤-១៦ ខែកញ្ញា ឆ្នាំ២០២៣ ជាមួយនឹងមានការត្រឡប់មកវិញសារជាថ្មី នៃការប្រកួតប្រជែងផ្នែកបដិសណ្ឋារកិច្ច ថ្នាក់ជាតិ ហើយពិព័រណ៍នេះ មានក្រុមហ៊ុន និងម៉ាកយីហោក្នុងស្រុក និងអន្តរជាតិចូលរួមជាង២៥០ និងត្រូវបានរំពឹងថា នឹងមានអ្នកចូលរួម​ទស្សនាជាង១២,០០០នាក់ ។

             លោកបានបន្តថា ពិព័រណ៍នេះ គ្រោងនឹងបើកជាផ្លូវការក្រោមអធិបតីភាព លោកអាំង សុវណ្ណរ័ត្ន អគ្គនាយកគ្រប់គ្រង​ឧស្សាហកម្មទេសចរណ៍ នៃក្រសួងទេសចរណ៍ និងលោកគឹម សេរីរដ្ឋ អគ្គលេខាធិការរងគ.ជ.វ.ទ និងប្រធាន​នាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារនៅថ្ងៃទី១៤ ខែកញ្ញា ឆ្នាំ២០២៣។

             លោកបានបញ្ជាក់ថា “នៅពេលដែលទីផ្សារទេសចរណ៍ និង F&B ស្ទុះងើបឡើងវិញជាលំដាប់ ក្នុងដំណាក់កាលក្រោយ COVID-19 នេះ”។ លោកបន្ថែមថា “យើងជឿជាក់ថា ពិព័រណ៍ ខេមហ្វួត/ខេម ហូតែលនឹងបន្ថែមទំនុកចិត្ត និងគុណតម្លៃដល់​ឧស្សា​ហកម្មនេះ តាមរយៈការប្រមូលផ្តុំ អ្នកនៅក្នុងឧស្សាហកម្មក្នុងការ ចែករំលែកបទពិសោធន៍ និងបង្កើតភាពជា​ដៃគូអាជីវកម្មថ្មីៗ”។

             ចំណែកសហព័ន្ធទេសចរណ៍កម្ពុជា នឹងធ្វើជាម្ចាស់ផ្ទះជាផ្លូវការ ដឹកនាំក្នុងការរៀបចំការប្រកួតប្រជែង ផ្នែកបដិសណ្ឋារ​កិច្ចផងដែរនៅក្នុងព្រឹត្តិការណ៍ CAMFOOD/CAMHOTEL 2023 រួមមាន ការប្រកួតចំអិនម្ហូបដោយផ្ទាល់ មាន​ដូចជា នំបញ្ចុកសៀមរាប សម្លកកូរខ្មែរ ត្រីអាម៉ុក សាច់គោ (Steak) ការតុបតែងនំខេក ជាដើម។

បន្ថែមលើស​ពីនេះក៏មាន ការប្រកួតឆុងកាហ្វេ (បារីស្តា) ថ្នាក់ជាតិ ការប្រកួតរៀបចំតុអារហារ ការប្រកួតក្រឡុកស្រា ការប្រកួត​ប្រជែងពីរសិល្ប:តុបតែងនិងរៀបចំគ្រែ ការប្រកួតប្រជែងពីររបៀបរចនាផ្កា តុបតែងផ្កា ជាដើម៕

តែម សុខុម

ភ្នំពេញ: ឧស្សាហកម្មធានារ៉ាប់រងនៅកម្ពុជា បានចុះបញ្ជីបុព្វលា​ភ​ធានារ៉ាប់រង (ចំនួនទឹកប្រាក់ដែលត្រូវបង់) សរុបចំនួន៨១,២លានដុល្លារអាមេរិក ក្នុងត្រីមាសទី២ ឆ្នាំ២០២៣ ដោយកើនឡើង៦,៣%ពី៧៦,៣៥លានដុល្លារ ក្នុងរយៈពេលដូចគ្នាក្នុងឆ្នាំ២០២២។

របាយការណ៍របស់និយ័តករធានារ៉ាប់រងកម្ពុជា (IRC) បានបង្ហាញកាលពីថ្ងៃព្រហស្បតិ៍ ទី១០ សីហា ថា កំណើននេះសម្រេចបាន ដោយក្រុមហ៊ុនធានារ៉ាប់រងទូទៅចំនួន១៨ ក្រុមហ៊ុនធានារ៉ាប់រងអាយុជីវិតចំនួន១៤ ក្រុមហ៊ុនធានារ៉ាប់រងខ្នាតតូចចំនួន៧ និងក្រុមហ៊ុនធានារ៉ាប់រងបន្តចំនួន១។

សំណងដែលក្រុមហ៊ុនធានារ៉ាប់រង បានទូទាត់ជូនអតិថិជនរបស់ខ្លួនមានចំនួនសរុប៧,៧លានដុល្លារ ក្នុងត្រីមាសទី២ ឆ្នាំនេះ ដោយកើនឡើង២៧,៦% ពី៦,០៣លានដុល្លារ ក្នុងរយៈពេលដូចគ្នាកាលពីឆ្នាំមុន។

យោងតាមរបាយការណ៍ដដែលបង្ហាញថា វិស័យធានារ៉ាប់រងនៅកម្ពុជា មានទ្រព្យសម្បត្តិសរុបចំនួន១,០៥ពាន់លានដុល្លារ គិតត្រឹមត្រីមាសទី២ឆ្នាំនេះ កើនឡើង១០,៨% បើធៀបនឹងឆមាសទី២ ឆ្នាំមុន។

លោកប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា (IRC) មានប្រសាសន៍ថា វិស័យធានារ៉ាប់រងបានរួមចំណែក ប្រមាណ១,១%​នៃផលទុនជាតិសរុប (GDP) ប្រចាំឆ្នាំរបស់កម្ពុជា។

លោកបានបន្ថែមថា “កំណើននៃវិស័យធានារ៉ាប់រង នៅកម្ពុជា មានកម្រិតទាបនៅឡើយ បើធៀបនឹងបណ្ដាប្រទេសក្នុងតំបន់ និងពិភពលោក”។

ទោះជាយ៉ាងណា លោកបានគូសបញ្ជាក់ថា “ទីផ្សារធានារ៉ាប់រងរបស់កម្ពុជា នៅមានឱកាសរីកចម្រើនបន្ថែមទៀត”៕ Xinhua៕

ដោយៈ គង់ សូរិយា

        ភ្នំពេញៈ អគ្គលេខាធិការរងក្រុមប្រឹក្សាអភិវឌ្ឈន៍កម្ពុជា លោកជា វុទ្ឋីបានថ្លែងថា ក្នុងឆ្នាំ២០២៣នេះ ប្រាក់ចំណូលរបស់មនុស្សម្នាក់កើនឡើងជិត២០០០ដុល្លារអាមេរិក។

លោកបាននិងកំពុងថ្លែងបែបនេះ ក្នុងកិច្ចប្រជុំរវាងសមាគមឧកញ៉ាកម្ពុជា និងក្រុមប្រឹក្សាអភិវឌ្ឍន៍កម្ពុជា នាល្ងាចថ្ងៃទី១១ សីហានេះ។

លោកជា វុទ្ឋីបានបន្តថា សេដ្ឋកិច្ចកម្ពុជា ត្រូវបានរំពឹងថានឹងសម្រេចបានកំណើន៥,៦ភាគរយ ដែលស្ថាប័នអន្តរជាតិធំៗជាច្រើន ក៏បានទទួលសា្គល់ពីកំណើនសេដ្ឋកិច្ចកម្ពុជាផងដែរ៕

ដោយៈ តែម សុខុម
បាងកក: ខណៈការងារក្នុងឧស្សាហកម្មអាកាសចរណ៍ មិនទាន់ស្ទុះងើបឡើងវិញពេញលេញ ក្រុមហ៊ុនអាកាសចរណ៍នានានៅប្រទេ​សថៃ កំពុងអនុវត្តកម្មវិធីដ៏គួរឱ្យភ្ញាក់ផ្អើល ដែលតម្រូវឱ្យពីឡុត ឬអ្នកបើកយន្តហោះ ដែលមានអាជ្ញាប័ណ្ណ បង់ត្រូវប្រាក់៤៣.០០០​ដុល្លារអាមេរិក សម្រាប់ការបណ្តុះបណ្តាល ដើម្បីទទួលបានការងារ។

ទោះជាយ៉ាងណា ប្រាក់បៀវត្សរ៍ជាមធ្យមរបស់ពីឡុត ក្នុងប្រទេ​សថៃ ទាបជាងកម្រិតមុនពេលផ្ទុះវិបត្តិកូវីដ-១៩នៅឡើយ ខណៈយន្តហោះ ដែលធ្វើការហោះហើររបស់ក្រុមហ៊ុន អាកាសចរណ៍មានចំនួនតិចជាងកម្រិតមុនពេលផ្ទុះវិបត្តិកូវីដ-១៩។ នេះបើយោងតាមកាសែត Bangkok Post ចុះផ្សាយកាលពីថ្ងៃព្រហស្បតិ៍ ទី១០ សីហា។ស្ថានភាពនេះ នឹងបង្កការលំបាកកាន់តែខ្លាំងឡើង សម្រាប់ពីឡុតជាសិក្ខាកាម ដែលគ្មានបទពិសោធន៍គ្រប់គ្រាន់ ដើម្បីប្រកួតប្រជែងជាមួយពីឡុតជើងចាស់។

យោងតាមសមាគមដឹកជញ្ជូនផ្លូវអាកាសអន្តរជាតិ (IATA) ឱ្យដឹងថា អាកាសចរណ៍នៅអាស៊ី-ប៉ាស៊ីហ្វិក មានសន្ទុះងើបឡើងវិញយឺតជាងតំបន់ផ្សេងៗទៀត នៃពិភពលោកកាលពីឆ្នាំមុន ប៉ុន្តែជាមួយនឹងការបើកប្រទេសចិន ឡើងវិញនៅដើមឆ្នាំ២០២៣ អាកាសចរណ៍នឹងស្ទុះងើបឡើងវិញ នៅក្នុងឆ្នាំ២០២៤ ជំនួសឱ្យឆ្នាំ២០២៥ ដែលត្រូវបានរំពឹងទុកកាលពីមុន។

ទោះជាយ៉ាងណា ស្របពេលពីឡុតក្នុងឧស្សាហកម្មអាកាសចរណ៍នៅក្នុងប្រទេសថៃ មានច្រើនគរជើងគ្នា ក្រុមហ៊ុនអាកាសចរណ៍មួយចំនួន ក្នុងប្រទេសនេះបានបន្ថែមកម្មវិធី “បង់ប្រាក់ដើម្បីក្លាយជាពីឡុត” ទៅលើកម្មវិធីជ្រើសរើសពីឡុត ដែលចង់ផ្តើមការងារថ្មីជាមួយពួកគេ ប៉ុន្តែតម្រូវឱ្យពីឡុតទាំងនោះ ត្រូវឆ្លងកាត់វគ្គបណ្តុះបណ្តាលជាមុនសិន ដើម្បីឱ្យពួកគេមានជំនាញ ដែលត្រូវគ្នានឹងប្រភេទយន្តហោះដែលក្រុមហ៊ុនកំពុងប្រើប្រាស់។

ទន្ទឹមនេះការបង្កើតក្រុមហ៊ុនអាកាសចរណ៍ថ្មីៗ ដូចជា ក្រុមហ៊ុន AirAsia Cambodia ដែលពេលនេះកំពុងជ្រើសរើសពីឡុតថ្មីៗជាដើម ក៏នឹងជួយផ្ដល់ការងារដល់ពីឡុត ដែលគ្មានការងារធ្វើបានមួយចំនួនផងដែរ៕ Bangkok Post៕

ដោយៈ គង់ សូរិយា
កណ្តាលៈ ធនាគារអភិវឌ្ឍន៍អាស៊ី(ADB) គ្រោងផ្តល់ជំនួយនិងរៀបចំក្រុងអរិយក្សត្រ ជាទីក្រុងគួរឲ្យចង់រស់នៅនាពេលអនាគត។

ព៌តមាននេះ ត្រូវបានលើកឡើង ក្នុងកិច្ចប្រជុំពិភាក្សាអំពីការត្រៀមរៀបចំឯកសារពាក់ព័ន្ធ សម្រាប់ទុកជាធាតុចូលដើម្បីក្រុមការងារថ្នាក់ជាតិ និងក្រុមការងារធនាគារអភិវឌ្ឍន៍អាស៊ី ADB រៀបចំផែនការ- គម្រោងសម្រាប់អភិវឌ្ឍក្រុងអរិយក្សត្រ ឱ្យក្លាយទៅជាទីក្រុងគួរឱ្យចង់រស់នៅ។

លោកផុន គឹមឡុង អភិបាលរងក្រុងកាលពីថ្ងៃទី១០ សីហា បានដឹកនាំកិច្ចប្រជុំ នៅសាលប្រជុំសាលាក្រុងអរិយក្សត្រ ដើម្បីពិភាក្សាអំពីការត្រៀមរៀបចំឯកសារពាក់ព័ន្ធ នឹងកិច្ចប្រជុំជាមួយក្រុមការងារថ្នាក់ជាតិ និងក្រុមការងារធនាគារអភិវឌ្ឍន៍អាស៊ីADB ក្នុងគោលបំណងប្រមូលនូវបញ្ហាប្រឈមនានា ក្នុងការអភិវឌ្ឍហេដ្ឋារចនាសម្ព័ន្ធនៅតាមបណ្ដាសង្កាត់នីមួយៗ សម្រាប់ទុកជាធាតុចូលដើម្បីក្រុមការងារថ្នាក់ជាតិ និងក្រុមការងារADB រៀបចំផែនការ-គម្រោងសម្រាប់អភិវឌ្ឍក្រុងអរិយក្សត្រ ឱ្យក្លាយទៅជាទីក្រុងគួរឱ្យចង់រស់នៅ ដោយមានការចូលរួមប្រជុំផ្ទាល់ ពីសំណាក់លោក សម សិរីពុទ្ធិ នាយ​ករងរដ្ឋបាលសាលាក្រុង លោកស្រី ហង្ស ដាឡែន ប្រធានការិ​យាល័យលទ្ធកម្ម, លោកស៊ុន ឡាយ ប្រធានការិយាល័យផែនការ និងគាំទ្រសង្កាត់ និងមន្រ្តីពាក់ព័ន្ឋ។

កិច្ចប្រជុំនេះ មានការចូលរួមប្រជុំតាមរយៈប្រព័ន្ធ ZOOM MEET​ING ពីសំណាក់លោកចៅសង្កាត់ និងលោក-លោកស្រីស្មៀនសង្កាត់ទាំង១១ នៃរដ្ឋបាលក្រុងអរិយក្សត្រ។

ក្រុងអរិយក្សត្រត្រូវបានរាជរដ្ឋាភិបាលបង្កើតឡើង កាលពីពេលថ្មីៗនេះ ជាមួយនឹងទីក្រុងពីរទៀតគឺទីក្រុងសំពៅពូន និងទីក្រុងឧត្តមម៉ែជ័យ ស្ថិតក្នុងខេត្តកណ្តាល។

តំបន់អរិយក្សត្រ បាននិងកំពុងរីកចម្រើន ក្នុងរយៈពេលប៉ុន្មានឆ្នាំចុងក្រោយនេះ ដោយសារកំណើនប្រជាសាស្រ្ត នគរូបនីយកម្ម និងសេដ្ឋកិច្ចនៅមូលដ្ឋាន៕

ដោយ: គង់ លាងហួរ
អន្តរជាតិ: ក្រុមហ៊ុន Thai Airways (THAI) និងក្រុមហ៊ុន Turkish Airlines បានចុះហត្ថលេខាលើអនុស្សរណៈ នៃការយោគយល់គ្នា ដើម្បីឆ្ពោះទៅរកកិច្ចព្រមព្រៀងប្រតិបត្តិការ បណ្តាក់ទុនរួមគ្នា ក្នុងគោលបំណងជំរុញទេសចរណ៍រវាងប្រទេសទាំងពីរ។

លោក Chai Eamsiri នាយកប្រតិបត្តិក្រុមហ៊ុន THAI បានមានប្រសាសន៍ថា កិច្ចសហប្រតិបត្តិការនេះ នឹងជួយពង្រឹងការតភ្ជាប់ និងបណ្តាញផ្លូវហោះហើរ របស់ក្រុមហ៊ុន THAI និង Turkish Airlines។លោកបន្តថា “អតិថិជនរបស់យើង នឹងអាចធ្វើដំណើរបានយ៉ាងងាយស្រួលរវាងប្រទេសថៃ និងតួគី ក៏ដូចជាទៅកាន់តំបន់អឺរ៉ុប និងប្រទេសផ្សេងទៀត  ដោយក្រុមហ៊ុនអាកាសចរណ៍យើងទាំង២”។

ទីក្រុងអ៊ីស្តង់ប៊ុល ប្រទេសទួរគី ជាទីតាំងយុទ្ធសាស្ត្រ ដើម្បីដើរតួជាមជ្ឈមណ្ឌលរវាងតំបន់អាស៊ី អឺរ៉ុប និងអាហ្វ្រិក។  ហើយក្រុមហ៊ុន THAI នឹងណែនាំសេវាកម្មប្រចាំថ្ងៃ ទៅកាន់ទីក្រុងអ៊ីស្តង់ប៊ុល ពីមជ្ឈមណ្ឌលទីក្រុងបាងកក របស់ខ្លួននៅក្នុងខែធ្នូខាងមុខ។លោក​ Chai Eamsiri បញ្ជាក់ថា ភាព​ជា​ដៃគូ​នេះ​ក៏​នឹង​ជំរុញ​ដល់វិស័យ​ទេសចរណ៍​រវាង​ប្រទេស​ថៃ និងទួរគីផង​ដែរ។

​លោក Bilal Eksi នាយកប្រតិបត្តិនៃក្រុមហ៊ុនអាកាសចរណ៍​Turkish Airlines បានលើកឡើងថា កិច្ចសហប្រតិបត្តិការនេះ នឹងពង្រឹងការតភ្ជាប់រវាងតំបន់ទាំងពីរ ផ្តល់នូវបទពិសោធន៍ធ្វើដំណើរប្រកបដោយភាពរលូន និងផ្តល់ជូនអ្នកដំណើរនូវទិសដៅ និងសេវាកម្មដ៏ធំទូលាយ តាមរយៈបណ្តាញរបស់ក្រុមហ៊ុន អាកាសចរណ៍ទាំងពីរ។

ដោយត្រូវបានបង្កើតឡើងកាលពីឆ្នាំ១៩៣៣ ជាមួយយន្តហោះដំបូងចំនួន៥គ្រឿង  ឥឡូវនេះ ក្រុមហ៊ុន Turkish Airlines មានយន្តហោះរហូតដល់ទៅ៤២៥គ្រឿង ដែលហោះហើរទៅកាន់គោលដៅចំនួន៣៤៤ នៅក្នុងប្រទេសចំនួន១២៩។ ចំណែក ក្រុមហ៊ុនអាកាសចរណ៍THAI ដែលត្រូវបានបង្កើតឡើងក្នុងឆ្នាំ១៩៦០ កំពុងប្រតិបត្តិការហោះហើរ ទៅកាន់គោលដៅចំនួន៥៧ នៅក្នុងប្រទេសចំនួន១៩ ជាមួយយន្តហោះចំនួន៦៧គ្រឿង៕

ដោយៈ គង់ សូរិយា

        ភ្នំពេញៈ រាជរដ្ឋាភិបាលកម្ពុជា បាន​សម្រេច​បង្កើត​ឧទ្យាន​ជាតិ​ជួរ​ភ្នំក្រវាញ មាន​ផ្ទៃដី​ទំហំ​សរុប​៩២៦,១២៣​ហិកតា ស្ថិតក្នុង​ភូមិសាស្ត្រ​ខេត្តកោះកុង ខេត្ត​​ពោធិ៍សាត់ ខេត្តកំពង់ស្ពឺ ខេត្ត​ព្រះសីហនុ និង​ខេត្តបាត់ដំបង។គោលបំណងនៃការបង្កើតឧទ្យានជាតិដថ្មីនេះ មានគោលដៅដើម្បី​ថែរក្សា ការពារ​សោ​ភណ​ភាព​ធម្មជាតិ និង​ទេសភាព ប្រព័ន្ធ​អេកូឡូស៊ី និង​ជីវចម្រុះ ការសិក្សា​ស្រាវជ្រាវ និង​ការ​កម្សាន្ត​។

យោងតាម​អនុក្រឹត្យ​របស់​រាជរដ្ឋាភិបាល ដែលបាន​នៅ​ថ្ងៃទី​ ៩ ខែ​​សីហា​នេះ បានឱ្យដឹងថា ផ្ទៃដី​ឧទ្យាន​ជាតិ​ជួរ​ភ្នំក្រវាញ​នេះ បានមកពី​ការបូកបញ្ចូល​គ្នា​នៃ ឧទ្យាន​ជាតិ​ជួរ​ភ្នំក្រវាញ​ខាង​ត្បូង ដែលមាន​ផ្ទៃដី​ទំហំ៤១០,៣៩២​ហិកតា។ ឧទ្យាន​ជាតិ​ជួរ​ភ្នំក្រវាញ​កណ្ដាល​ ដែលមាន​ផ្ទៃដី​ទំហំ​៤០១,៣១៣ហិ​ក​តា របៀង​អភិរក្ស​ជីវចម្រុះ​ជួរ​ភ្នំក្រវាញ ដែលមាន​ផ្ទៃដី​ទំហំ​១១៤,៤១៨​ហិកតា​។

យោង​តាមរយៈ​អនុក្រឹត្យ​ចុះ​ថ្ងៃទី​ ១៧ ខែកក្កដា ឆ្នាំ​ ២០២៣ ស្តីពី​ការបង្កើត​ឧទ្យាន​ជាតិ​ជួរ​ភ្នំ​ក្រវាញ បានបង្ហាញថា រាជ​រដ្ឋា​ភិ​​បាល​បាន​និរាករណ៍ អនុក្រឹត្យ ស្តីពី​ការបង្កើត​តំបន់​ឧទ្យាន​ជាតិ​ជួរ​ភ្នំក្រវាញ​កណ្តាល អនុក្រឹត្យ​ស្តីពី​ការបង្កើត​ឧទ្យាន​ជាតិ ជួរ​ភ្នំក្រវាញ​ខាងត្បូង អនុក្រឹត្យ​ស្តីពី​ ការបង្កើត​របៀង​អភិរក្ស​ជីវ​ចម្រុះ ​ប្រព័ន្ធ​តំបន់ការពារធម្មជាតិ ព្រមទាំង​បទ​ប្បញ្ញត្តិ​ទាំងឡាយណា ​ដែល​ផ្ទុយ​នឹង​អនុក្រឹត្យ​ថ្មី​នេះ​ក៏ត្រូវ​និរាករណ៍​ផងដែរ​។

អនុក្រឹត្យ​នេះ​បញ្ជាក់ថា​ “ការបង្កើត​ឧទ្យាន​ជាតិ​ជួរ​ភ្នំ​ក្រ​វា​ញ​ នេះ​រាជរដ្ឋាភិបាល​មានបំណង លើកកម្ពស់​តួនាទី សក្ដានុពល និង​កិត្យានុភាព​នៃ​ប្រព័ន្ធ​អេកូ​ឡូ​ស៊ី ឆ្លើយតប​ទៅនឹង​គោល​ដៅ​អភិវឌ្ឍន៍​ដោយ​ចីរភាព”​។

អនុក្រិតដដែលបានបញ្ជាក់ថា ការបង្កើតឧទ្យានជាតិនេះ ក៏ដើ​ម្បីរក្សា​លំនឹង​បរិស្ថាន និង​រួម​ចំ​​ណែ​ក​កាត់បន្ថយ​ ការប្រែប្រួល​អាកាសធាតុ និង​ហានិភ័យ​គ្រោះមហន្តរាយធម្មជាតិ​។ផ្តល់​ផលិត​ផល និង​សេវាកម្ម​ធម្មជាតិ ​សម្រាប់​ការប្រើប្រាស់​ប្រកបដោយ​និរន្តរភាព​។

​ជំរុញ ​និង​លើកកម្ពស់​ការអភិវឌ្ឍ​សេដ្ឋកិច្ចសង្គម និង​សហគមន៍​មូលដ្ឋាន ដើម្បី​រួម​​ចំណែក​ក្នុង​កិច្ច​គាំពារ​បរិស្ថាន ការអភិរក្ស​ជីវចម្រុះ ការការពារ​ធនធាន​ធម្មជាតិ និង​ការ​រស់​នៅ​ដោយ​ចីរភាព​។ ​ពិសេស លើកកម្ពស់​ការចូលរួម​របស់​សហគមន៍​មូលដ្ឋាន ក៏ដូចជា ​សាធារណជន​ ក្នុងការ​ចូលរួមចំណែក​ដល់​ការគ្រប់គ្រង ការ​ការពារ និង​ការអភិរក្ស​ជីវ​​ចម្រុះ និង​ធនធានធម្មជាតិ​ក្នុង​តំបន់​។

ក្នុង​អនុក្រឹត្យនេះ​បញ្ជាក់ទៀតថា​ ​ក្រសួងបរិស្ថាន​មាន​សមត្ថកិច្ច​រៀបចំ កែប្រែ និង​គ្រប់គ្រង​តំបន់​ឧទ្យាន​ជាតិ​ជួរ​​ភ្នំក្រវាញ ដោយ​សហការ​ជា​មួយ​ក្រសួង ស្ថាប័ន​ពាក់ព័ន្ធ រដ្ឋបាល​ខេត្តកោះកុង រដ្ឋបាល​ខេត្តពោធិ៍សាត់ រដ្ឋបាលខេត្ត​កំពង់ស្ពឺ រដ្ឋបាលខេត្ត​ព្រះសីហនុ និង​រដ្ឋបាល​ខេត្តបាត់ដំបង ដើម្បី​ធានា​ដល់​ការគ្រប់គ្រង​បរិស្ថាន ការអភិរក្ស​ជីវចម្រុះ ការប្រើប្រាស់ ធនធានធម្មជាតិ​ប្រកបដោយ​និរន្តរភាព​​។

អភិបាល​ខេត្តពោធិ៍សាត់ លោកខូយ រីដាបានឱ្យដឹង​នៅ​ថ្ងៃទី​៩ ខែសីហា​ថា ការបង្កើត​ឧទ្យាន​ជាតិ​ថ្មី ឬ​ចាស់​សុទ្ធតែ​មានបំណង​ថែរ​រក្សា​ការពារ​ធន​ធាន​ធម្មជាតិ​។​លោកបញ្ជាក់ថា “តំបន់​ឧទ្យាន​ជាតិ ​ដែល​ទើប​រួម​ប​ញ្ជូ​ល​បង្កើត​ថ្មី​នេះ មិនមែន​សម្រាប់តែ​ ១​ ជំនាន់​ថ្មី​នេះ​ទេ គឺ​សម្រាប់​គ្រប់​ជំនាន់​តកូនតចៅ ហេតុនេះ​ត្រូវ​​តែ​ថែទាំ​ការពារ​ ដើម្បី​និរន្តរភាព​ការគ្រប់គ្រង​ធនធានធម្មជាតិ​”៕

ដោយៈ គង់ សូរិយា
ភ្នំពេញៈ នៅទីបំផុតការសាងសង់អគារ ការិយាល័យកណ្តាលរបស់ធនាគារហត្ថា បានបញ្ចប់គ្រោងអគាររបស់ខ្លួនជាផ្លូវការហើយ។ នេះបើយោងតាមការបញ្ជាក់ឲ្យដឹងរបស់អគ្គនាយកធនាគារនេះ។

ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី៨ សីហានេះថា អាគារការិយាល័យកណ្តាល ដែលមានកំពស់២២ជាន់នេះ បានបញ្ចប់ហើយ ប៉ុន្តែលោកមិនបញ្ជាក់ឲ្យដឹង ពីទំហំនៃការចំណាយទេ ដោយសារវាជាព័ត៌មានសំងាត់របស់ក្រុមហ៊ុន។

អាគារការិយាល័យកណ្តាលនេះ ស្ថិតនៅលើមហាវិថីសម្តេចតេជោហ៊ុន សែនឬផ្លូវ៦០ម៉ែត្រ។ លោកឧកញ៉ាហួត អៀងតុងបានបន្តថា អគារការិយាល័យកណ្តាលនេះ នឹងប្រើប្រាស់សម្រាប់ការិយាល័យកណ្តាល សំរាប់របស់ធនាគារ ដែលនឹងមានភោជនីយដ្ឋាន ហាងកាហ្វេ និងការិយាល័យធ្វើការរបស់ថ្នាក់ដឹកនាំ និងបុគ្គលិកគ្រប់ជាន់ថ្នាក់។

ធនាគារហត្ថា ក្នុងរយៈពេល៧ខែដើមឆ្នាំនេះ នៅតែមានប្រតិ​បត្តិការឥណទាន និងការដាក់ប្រាក់បញ្ញើរល្អប្រសើរ ប៉ុន្តែទំហំនៃការ​សងត្រលប់មានភាពយឺតយ៉ាវ។ នេះបើតាមការបញ្ជាក់ឲ្យដឹងពីលោកឧកញ៉ាហួត អៀងតុង។

ធនាគារហត្ថា បានប្រែក្លាយពីគ្រឹះស្ថានមីក្រូហិរញ្ញវត្ថុកសិករ ហើយបានក្លាយជាធនាគារពាណិជ្ជធំ និងឈានមុខមួយនៅក្នុងចំណោមធនាគារធំៗ និងឈានមុខនៅកម្ពុជា បន្ទាប់ពីធនាគារនេះ​ត្រូវបានទិញយកពីធនាគារក្រុងស្រ៊ី ដែលជាធនាគារដ៏ធំនៅប្រទេសថៃ៕

ដោយៈ ម៉ាលីនណា

        ភ្នំពេញៈ ក្នុងជំនួបរវាងសមាជិករាជរដ្ឋាភិបាល អាណត្តិចាស់ និងរាជរដ្ឋាភិបាល​អាណត្តិថ្មី នៅល្ងាចថ្ងៃទី១០ ខែសីហា ឆ្នាំ២០២៣នេះ សម្តេចតេជោ ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា បានណែនាំឱ្យរាជរដ្ឋាភិបាល​អាណត្តិ​ថ្មី នូវចំណុចអាទិភាពសំខាន់ៗចំនួន៤។

សម្តេចតេជោបានណែនាំគណៈរដ្ឋមន្រ្តីថ្មី ដែលមានឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី​នោះ ត្រូវយកចិត្តទុកដាក់ទៅលើបញ្ហាសំខាន់ចំនួន៤ រួមមាន ស្ថេរភាពនយោ​បាយ សន្តិសុខសង្គម សេដ្ឋកិច្ច និងជីវភាពរបស់ប្រជាពលរដ្ឋ។

សម្តេចតេជោ ហ៊ុន សែន បានចាត់ទុកបញ្ហាទាំង៤ខាងលើនេះ គឺជាកិច្ចការដ៏សំខាន់ ដែលត្រូវយកចិត្តទុកដាក់ ជាពិសេសបញ្ហាសេដ្ឋកិច្ច ជាបញ្ហាដែលសាកលលោកកំពុងប្រឈម។

សម្តេចតេជោ ហ៊ុន សែន បានគាំទ្រចំពោះ​ការ​សម្រេចរបស់ឯកឧត្តមបណ្ឌិត ហ៊ុន ម៉ាណែត និងលោកឧបនាយករដ្ឋមន្ត្រី អូន ព័ន្ធមុនីរ័ត្ន ដែលនៅបន្តកម្មវិធីគាំពារសង្គមនានា ដើម្បីជួយដោះស្រាយ​ការលំបាក​របស់ប្រជាពលរដ្ឋ៕