ដោយ: គង់ លាងហួរ
អន្តរជាតិ: លោក Ho Yeon Chang ឬChris Chang អ្នកគ្រប់គ្រងក្រុមហ៊ុន Korean Air ប្រចាំនៅកម្ពុជា បានមានប្រសាសន៍ឱ្យដឹងថា ក្រុមហ៊ុនអាកាសចរណ៍កូរ៉េខាងត្បូង Korean Air កំពុងពិចារណាដាក់ឱ្យដំណើរការសេវាកម្មហោះហើរទៅកាន់ខេត្តព្រះសីហនុ។

លោក Chris Chang បានលើកឡើងថា “ប្រទេសកម្ពុជាគឺជាទីផ្សារដ៏មានសក្តានុពលមួយសម្រាប់ក្រុមហ៊ុនអាកាសចរណ៍ Korean Air ទាក់ទងនឹងអាជីវកម្ម និងទេសចរណ៍ ជាពិសេសនៅក្នុងខេត្តព្រះសីហនុ ដែលមានឱកាសវិនិយោគសក្តានុពលជាច្រើន ក៏ដូចជាអាស្រ័យលើការកើនឡើងនៃចំនួនភ្ញៀវទេសចរ ដែលធ្វើដំណើរទៅកាន់តំបន់ឆ្នេរនាពេលអនាគត”។លោកបន្តថា ក្រុមហ៊ុន Korean Air ក៏កំពុងពិចារណាយ៉ាងយកចិត្តទុកដាក់ក្នុងការបង្កើតទីស្នាក់ការកណ្តាលរបស់ខ្លួននៅខេត្តព្រះសីហនុ ក្នុងគោលបំណងផ្តល់ជើងហោះហើរពីអាកាសយានដ្ឋានអន្តរជាតិ Seoul Incheon ទៅកាន់អាកាសយានដ្ឋានអន្តរជាតិខេត្តព្រះសីហនុ និងតភ្ជាប់ភ្ញៀវទេសចរកូរ៉េទៅកាន់ឆ្នេរសមុទ្រល្អបំផុត និងកោះធម្មជាតិក្នុងប្រទេសកម្ពុជា។

លោក Chris បានបន្តទៀតថា នៅខែមករាខាងមុខ លោកក៏គ្រោងនឹងអញ្ជើញទៅខេត្តសៀមរាបដោយផ្ទាល់ផងដែរ ហើយលោកនឹងជួបជាមួយក្រុមការងាររបស់អាកាសយានដ្ឋានអន្តរជាតិសៀមរាបអង្គរ (SAI) ដើម្បីសិក្សាករណីលើតម្រូវការអ្នកដំណើរ ស្តង់ដារសណ្ឋាគារ និងសមត្ថភាពស្នាក់នៅ ព្រមទាំងទីតាំង និងស្ថានភាពដែលខេត្តនេះអាចផ្តល់ជូនដល់ភ្ញៀវទេសចរកូរ៉េ។

លោកបន្ថែមថា ចាប់តាំងពីឆ្នាំ២០២២ ក្រុមហ៊ុនអាកាសចរណ៍ Korean Air បាននិងកំពុងពិចារណាបើកសេវាកម្មហោះហើរឡើងវិញទៅកាន់ខេត្តសៀមរាប ក្នុងគោលបំណងសម្រួលដល់ភ្ញៀវទេសចរពីទីក្រុងសេអ៊ូល ដោយផ្ទាល់ទៅកាន់ប្រាសាទអង្គរវត្ត ដែលជាតំបន់បេតិកភណ្ឌពិភពលោក ប៉ុន្តែ ពេលវេលា នឹង អាស្រ័យ លើ ការ គាំទ្រ ពី ភ្នាក់ងារ ទេសចរណ៍ ដើម្បី ផ្សព្វផ្សាយ និង ទាក់ទាញ ភ្ញៀវ ទេសចរ ឱ្យ ចូល មក ក្នុង ខេត្តនេះ។

កម្ពុជា គឺជាទីផ្សារដ៏សំខាន់មួយសម្រាប់ក្រុមហ៊ុនអាកាសចរណ៍ Korean Air ហើយក្រុមហ៊ុននេះមិនត្រឹមតែបម្រើដល់អ្នកដំណើរ ដែលចង់ធ្វើដំណើររវាងប្រទេសកម្ពុជា និងកូរ៉េប៉ុណ្ណោះទេ ប៉ុន្តែក្រុមហ៊ុនថែមទាំងបម្រើដល់អ្នកដំណើរ ដែលចង់ហោះហើរហួសទៅប្រទេសនានាដូចជាអាមេរិកខាងជើង និងប្រទេសជប៉ុនផងដែរ៕

ដោយ: គង់ លាងហួរ
អន្តរជាតិ: លោក Koraphat Vorachet ប្រធានផ្នែកស្រាវជ្រាវនៃក្រុមហ៊ុន Krungsri Capital Securities លើកឡើងថា ការស្ទុះងើបឡើងវិញរបស់សេដ្ឋកិច្ចចិននឹងជះឥទ្ធិពលជាវិជ្ជមានដល់សេដ្ឋកិច្ចនៅទូទាំងតំបន់អាស៊ី រួមទាំងប្រទេសថៃផងដែរ។

លោកបន្តថា កំណើនសេដ្ឋកិច្ចរបស់ប្រទេសចិនបានកើនឡើង៤,៩% នៅក្នុងត្រីមាសទី៣ ពោលគឺលើសពីការព្យាករ៤,៥% ដែលបង្ហាញថា គោលនយោបាយរបស់រដ្ឋាភិបាលចិនបានជំរុញសេដ្ឋកិច្ចប្រកបដោយប្រសិទ្ធភាព។

លោកបានបញ្ជាក់ទៀតថា ក្នុងរយៈពេល៩ខែដំបូង ឆ្នាំ២០២៣នេះ សេដ្ឋកិច្ចរបស់ប្រទេសចិនបានកើនឡើង៥,២% ហើយប្រទេសចិននៅតែស្ថិតលើផ្លូវឆ្ពោះទៅសម្រេចបាននូវគោលដៅកំណើនសេដ្ឋកិច្ចពេញមួយឆ្នាំក្នុងរង្វង់៥% ។

ប្រធានផ្នែកស្រាវជ្រាវរូបនេះអះអាងថា “ស្របពេលដែលសកម្មភាពផលិតកម្មនៅប្រទេសចិនបានស្ទុះងើបឡើងវិញ ដូច្នេះ ក្រុមហ៊ុនដឹកជញ្ជូន និងក្រុមហ៊ុនគីមីឥន្ធនៈជាច្រើននៅលើទីផ្សារភាគហ៊ុននឹងអាចទទួលបានអត្ថប្រយោជន៍”។

លោក បាន បន្ថែមថា លោក រំពឹង ថា វិធានការ ជំរុញ បន្ថែម ទៀត នឹង ត្រូវ បាន ប្រកាស ដាក់ចេញដោយ រដ្ឋាភិបាល ចិន នៅ ចុង ឆ្នាំ ២០២៣នេះ។

បន្ទាប់ពីការិយាល័យស្ថិតិជាតិរបស់ប្រទេសចិនបានចេញផ្សាយទិន្នន័យសេដ្ឋកិច្ចប្រចាំត្រីមាសទី៣ ធនាគារ JP Morgan បានបង្កើនការព្យាករកំណើនសេដ្ឋកិច្ចចិននៅឆ្នាំនេះពី៥% ដល់៥,២% ខណៈដែលធនាគារ Citigroup និងធនាគារធំស្វីស UBS ក៏បានបង្កើនការព្យាករសម្រាប់កំណើនសេដ្ឋកិច្ចចិនផងដែរ។

ចំណែកឯ Nomura ដែលជាក្រុមហ៊ុនសេវាកម្មហិរញ្ញវត្ថុ មានមូលដ្ឋាននៅប្រទេសជប៉ុនបានបង្កើនការព្យាករកំណើនសេដ្ឋកិច្ចរបស់ប្រទេសចិននៅឆ្នាំ២០២៣នេះពី៤,៨% ដល់៥,១%។

មជ្ឈមណ្ឌលស្រាវជ្រាវ Kasikorn (K-Research) បានអះអាងថា គោលនយោបាយជំរុញទឹកចិត្ត ដូចជាការបញ្ចុះអត្រាការប្រាក់ដើម្បីបង្កើនការប្រើប្រាស់ទំនិញ និងសេវាកម្ម ក៏ដូចជាការលើកទឹកចិត្តផ្នែកពន្ធសម្រាប់ការទិញយានយន្តអគ្គិសនី និងផ្ទះថ្មី ដែលបានជំរុញឱ្យ GDP នៅត្រីមាសទី៣របស់ប្រទេសចិន កើនឡើងលើសពីការព្យាករទុក៕

ភ្នំពេញ៖ ក្រុមហ៊ុន ប៉េង ហួត គ្រុប បានរៀបចំកម្មវិធីសន្និសីទប្រចាំឆ្នាំ ឬ PH Conference 2023 សម្រាប់អ្នកចូលរួមដោយសេរី ក្រោមប្រធានបទ “ការរួមចំណែកជាវិជ្ជមានរបស់ឪពុកម្តាយចំពោះការលូតលាស់ផ្នែកបញ្ញាស្មារតីរបស់កូន”​ ក្នុងគោលបំណង បង្កើនការយល់ដឹងអំពីផលប៉ះពាល់ផ្លូវចិត្តទាំងឪពុកម្តាយ និងកូន ហើយក៏ជាការរួមចំណែកក្នុងការយកចិត្តទុកដាក់លើកិច្ចការសង្គម និងការគ្រប់គ្រងសុខុមាលភាពឱ្យមានភាពល្អប្រសើរផងដែរ។

សន្និសីទ PH Conference នេះត្រូវបានរៀបចំឡើងនារសៀល ថ្ងៃសៅរ៍ ទី០២ ខែធ្នូ ឆ្នាំ២០២៣ ស្ថិតនៅទីតាំងអគារសាលសន្និបាត និងប្រារព្ធពិធីមង្គលការ ភីអេច ហ្រេ្គនហល (PH Grand Hall) ក្នុងគម្រោង បុរី ប៉េង ហួត ហ្គ្រេនស្តា ផ្លាទីនីម (បឹងស្នោ) ខណ្ឌច្បារអំពៅ​ រាជធានីភ្នំពេញ ដែលមានវត្តមានចូលរួមពីវាគ្មិនកិត្តិយសដែលមានជំនាញ និងបទពិសោធន៍ជាច្រើនឆ្នាំលើសុខភាពផ្លូវចិត្តកុមារ និង ជំទង់ ពីមជ្ឈមណ្ឌលថែទាំ និងស្រាវជ្រាវការប៉ះទង្គិចផ្លូវចិត្ត (CTRO) និងអ្នកជំនាញមកពីសាលាអប់រំពិសេសក្តីសង្ឃឹមកុមារ (Hope Kids)។

សន្និសីទប្រចាំឆ្នាំ PH Conference គឺជាការចែករំលែកចំណេះដឹង និងបទពិសោធន៍ទាក់ទងទៅនឹងប្រធានបទល្អៗ ពីវាគ្មិនដែលមានជំនាញផ្សេងៗចូលរួមក្នុងការចែករំលែកទៅកាន់សាធារណជន ដែលនេះគឺជាវប្បធម៌ចែករំលែកចំណេះដឹង និងបទពិសោធន៍ដល់សង្គម ហើយក៏ជាផ្នែកមួយនៃការរួមចំណែកលើកកម្ពស់វិស័យអប់រំផងដែរ ដោយស្របតាមបង្គោលទាំង៣ នៃការងារសង្គមរបស់ ប៉េង ហួត គ្រុប ពោលគឺ៖ ការអប់រំ បរិស្ថាន និង សង្គម៕

ដោយ: គង់ លាងហួរ

ភ្នំពេញ: កម្ពុជាទទួលបានជំនួយឥតសំណងចំនួន ៦,៣៧៥លានអឺរ៉ូ (ប្រហែល៧លានដុល្លារអាមេរិក) ពីសហភាពអឺរ៉ុប (EU) កាលពីថ្ងៃច័ន្ទ ដើម្បីគាំទ្រដល់កំណែទម្រង់ វិស័យជលផលនៅកម្ពុជា។

លោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានប្រកាសពីការផ្តល់ជំនួយនេះ ក្នុងជំនួបជាមួយលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកម្ពុជា ។ នេះបើយោងតាមសេចក្តីប្រកាសព័ត៌មាន របស់ភាគីខាងសហភាពអឺរ៉ុប។

លោក Driesmans បានមានប្រសាសន៍ឱ្យដឹងថា ភាពជាដៃគូសហភាពអឺរ៉ុប-កម្ពុជា លើវិស័យជលផលមានទំហំធំ និងរឹងមាំ ទោះបីជាមានបញ្ហាប្រឈមដ៏ធំធេងយ៉ាងណាក្តី។ជំនួយនេះនឹងត្រូវប្រើប្រាស់ ដើម្បីគាំទ្រលើផ្នែកសំខាន់ៗនៃកំណែទម្រង់វិស័យជលផលនៅកម្ពុជា ដូចជា ការត្រួតពិនិត្យ ការគ្រប់គ្រង និងតាមដាន ការការពារព្រៃលិចទឹក ការអភិរក្សជលផលសមុទ្រ ការផ្ទេរជំនួយដល់សហគមន៍នេសាទ ការស្រាវជ្រាវ និងសុវត្ថិភាពចំណីអាហារ។លោក ឌិត ទីណា បានមានប្រសាសន៍ឱ្យដឹងថា វិស័យកសិកម្ម រួមទាំងជលផល និងព្រៃឈើកំពុងប្រឈមមុខ នឹងបញ្ហាជាសកល ដែលបន្តទាមទារភាពជាដៃគូរឹងមាំ ជាមួយអ្នកពាក់ព័ន្ធទាំងអស់ ដើម្បីកាត់បន្ថយ និងសម្របខ្លួនទៅនឹងផលប៉ះពាល់អវិជ្ជមាន និងប្រែក្លាយឧបសគ្គទៅជាឱកាស។

ចំពោះវិស័យជលផល ក្រសួងកសិកម្ម រុក្ខាប្រមាញ់ និងនេសាទ បានប្តេជ្ញាចិត្តយ៉ាងពេញទំហឹង ក្នុងការជួយដល់ការអភិវឌ្ឍន៍ប្រកប​ដោយចីរភាព តាមរយៈខ្សែសង្វាក់តម្លៃទាំងមូល ដើម្បីជាប្រយោជន៍ដល់ប្រជានេសាទ កសិករវារីវប្បកម្ម និងសហគ្រិន ក៏ដូចជាអ្នកប្រើប្រាស់ផងដែរ។  នេះ​បើ​យោងតាម​ការ​លើក​ឡើង​ របស់​លោក​រដ្ឋមន្ត្រី​ ឌិត ទីណា ក្នុង​សេចក្តី​ថ្លែងការណ៍។

លោក​បាន​បន្ថែម​ថា​ “យើង​ក៏​ប្តេជ្ញា​ចិត្តចំពោះ​ការ​ការពារ និង​អភិរក្ស​ជម្រក និង​ធនធាន​ក្នុង​ទឹក​របស់​យើង​ផង​ដែរ”៕Xinhua៕

ដោយ: គង់ លាងហួរ

អន្តរជាតិ: រដ្ឋបាលរបស់លោកប្រធានាធិបតី ចូ បៃដិន កាលពីថ្ងៃចន្ទ ទី៤ ខែធ្នូ បានបញ្ជូនសញ្ញាព្រមានជាបន្ទាន់ ទៅកាន់សភាអាមេរិក អំពីតម្រូវការក្នុងការអនុម័តជំនួយយោធា និងជំនួយសេដ្ឋកិច្ចរាប់សិបពាន់លានដុល្លារដល់ប្រទេសអ៊ុយក្រែន។

រដ្ឋបាលរបស់លោកចូ បៃដិន បានអះអាងថា កិច្ចខិតខំប្រឹងប្រែងធ្វើសង្រ្គាមរបស់ទីក្រុងគៀវ ដើម្បីការពារខ្លួនពីការឈ្លានពានរបស់រុស្ស៊ី អាចនឹងថយចុះបន្តិចម្តងៗ ឬបាត់បង់សន្ទុះ ប្រសិនបើគ្មានជំនួយទាំងនេះ។

យោងតាមសារលិខិតមួយ ដែលបានផ្ញើជូនថ្នាក់ដឹកនាំសភា និងព្រឹទ្ធសភា និងបានចេញផ្សាយជាសាធារណៈ លោកស្រី Shalanda Young នាយកការិយាល័យគ្រប់គ្រង និងថវិកា បានព្រមានថា សហរដ្ឋអាមេរិក នឹងអស់ថវិកាក្នុងការបញ្ជូនសព្វាវុធ និងជំនួយទៅអ៊ុយក្រែននៅចុងឆ្នាំនេះ។

លោកស្រីបានបន្ថែមថា “សហរដ្ឋអាមេរិក ​បាន​អស់​លុយ​ហើយ​ ដែល​ខ្លួន​បាន​ប្រើ​ ដើម្បី​ជំរុញ​សេដ្ឋកិច្ច​អ៊ុយក្រែន ហើយ​ប្រសិនបើ​សេដ្ឋកិច្ច​អ៊ុយក្រែន​ដួលរលំ នោះពួកគេ​នឹង​មិន​អាច​បន្ត​ប្រយុទ្ធ​គ្នា​បាន​ឡើយ​។

លោកស្រី Shalanda Young បានសរសេរក្នុងសារលិខិតផ្ញើជូនថ្នាក់ដឹកនាំសភា និងព្រឹទ្ធសភាថា “យើងអស់លុយហើយ និងជិតអស់ពេលវេលាហើយ”។

សភាអាមេរិកបានបែងចែកថវិកា ចំនួន១១១ពាន់លានដុល្លារអាមេរិករួចមកហើយ ដើម្បីជួយដល់អ៊ុយក្រែន ក្នុងនោះថវិកា៦៧ពាន់លានដុល្លារសម្រាប់លទ្ធកម្មយោធា។ ថវិកាចំនួន២៧ពាន់លានដុល្លារសម្រាប់ជំនួយសេដ្ឋកិច្ច និងស៊ីវិល និង១០ពាន់លានដុល្លារសម្រាប់ជំនួយមនុស្សធម៌។

លោកស្រីសរសេរថា “ថវិកា ដែលសភាបានបែងចែកចំនួន១១១ពាន់លានដុល្លារអាមេរិក សម្រាប់ជួយដល់អ៊ុយក្រែន នៅសេសសល់ប្រហែល៣ភាគរយនៃមូលនិធិយោធា ហើយក្រៅពីនោះត្រូវបានប្រើប្រាស់អស់នៅត្រឹមពាក់កណ្តាលខែវិច្ឆិកា”។

រដ្ឋបាលលោក ចូ បៃដិន បាននិយាយថា ខ្លួនបានពន្យឺតល្បឿននៃការផ្តល់ជំនួយយោធាមួយចំនួនដល់ទីក្រុងគៀវ ក្នុងរយៈពេលប៉ុន្មានសប្តាហ៍ថ្មីៗនេះ ដើម្បីព្យាយាមពន្យារផ្គត់ផ្គង់ រហូតដល់សភាអនុម័តលើការផ្តល់មូលនិធិបន្ថែមទៀត។

លោកស្រី Shalanda Young បានសរសេរទៀតថា “យើង​អស់​លុយ​ដើម្បី​គាំទ្រ​អ៊ុយក្រែន​ក្នុង​ការ​ប្រយុទ្ធ។ នេះពុំមែនជាបញ្ហានៅឆ្នាំក្រោយទេ។ ពេល​វេលា​ដើម្បី​ជួយ​ប្រជាធិបតេយ្យ ​អ៊ុយក្រែន​ប្រយុទ្ធ​ប្រឆាំង​នឹង​ការ​ឈ្លានពាន​របស់​រុស្ស៊ី ​គឺ​នៅ​ពេល​នេះ។ ដូច្នេះ វាដល់ពេលហើយដែលសភាត្រូវធ្វើសកម្មភាព”៕AP៕

ដោយៈ គង់ សូរិយា

ខេត្តកែបៈ សម្តេចធិបតី​ហ៊ុន ម៉ាណែ​តនាយករដ្ឋមន្រ្តីនៃកម្ពុជាបាន​ផ្ដល់​គោល​ការណ៍​ឱ្យ​ក្រសួង​ទេស​ចរណ៍ និង​គណៈ​អភិបាល​ខេត្ត​ទាំង​៤​ រួមមាន​ព្រះ​សីហនុ ​កំពត​ កោះ​កុង និង​ខេត្ដ​កែប ជំរុញ​ការ​រៀបចំ​ផែន​ការមេ​ អភិ​វឌ្ឍន៍​ខេត្ត​ជាប់​សមុទ្រ​ទាំង​៤​ របស់​កម្ពុជា ​ដោយ​រំពឹង​ថា នឹង​អាច​រួច​រាល់​នៅ​ឆ្នាំ​២០២៤​ ខាង​មុខ​នេះ​។​

ថ្លែង​នៅក្នុង​ពិធី​ប្រកាស​បិទ​បុណ្យ​សមុទ្រ ​លើក​ទី​១០ នៅ​ខេត្ដ​កែប នា​រសៀល​ថ្ងៃទី​៣ ខែធ្នូ ឆ្នាំ​២០២៣​ សម្តេចនាយក​រដ្ឋមន្ដ្រី​ ហ៊ុន ម៉ា​ណែ​ត បាន​លើក​ឡើង​ថា ការ​ផ្សព្វ​ផ្សាយ​កម្ពុជា ​ទៅ​កាន់​ឆាក​អន្តរ​ជាតិ​ គឺជា​រឿង​សំខាន់​ណាស់​ ដើម្បី​ទាក់​ទាញ​ទេស​ចរ​មក​កាន់​ប្រទេ​ស​កម្ពុជា​។​

សម្តេចបានបញ្ជាក់ថា “​ខ្ញុំ​សុំ​ឱ្យ​គណៈ​អភិ​បាល​រាជ​ធានី​ខេត្ត ​គណៈ​កម្ម​ការ​អភិវឌ្ឍ​ន៍​គ្រប់​គ្រង​ឆ្នេរ​ ត្រូវ​រៀបចំ​ផែន​ការមេ​មួយ​ដើម្បី​ភ្ជាប់​ឆ្នេរ​ទាំង​៤ របស់​យើង​”។​សម្តេចបន្តថា “​យើង​បាន​រៀបចំ​ផែន​ការអ​ភិវឌ្ឍន៍​ខេត្ត​ព្រះសីហនុ​ ទៅ​ជា​ខេត្ត​ដែល​មាន​សក្តានុ​ពល​ពហុ​បំណ​ង​។ ​ឥឡូវ​ត្រូវ​ភ្ជាប់​ទៅ​កាន់​ខេត្ត​៣​ទៀត ​ដែល​ផែន​ការមេ​កំពុង​កសាង ​សង្ឃឹម​ថានឹង​ចប់​នៅក្នុង​ឆ្នាំ​២០២៤​ ខាង​មុខ​នេះ​”​។​សម្តេចបាន​បន្ត​ថា ផែន​ការ​មេ​នេះកសាង​ឡើង ដើម្បីថែរក្សា​តម្លៃ និ​ង​ទាញ​ឱ្យបាន​នូវ​សក្តានុ​ពល ​នៅ​កន្លែង​នីមួយៗ​ឱ្យ​អស់​លទ្ធ​ភាព​ ដោយ​មិន​ត្រឹម​ផល​ប្រយោជន៍ ​រយៈ​ពេល​ខ្លី​នោះ​ទេ តែ​ត្រូវ​ថែ​រក្សា​នៅ​ក្នុង​រយៈ​ពេល​វែង​ផង​ដែរ​ ដែល​នេះ​គឺជា​គោល​ការណ៍​សំខាន់​របស់​រាជ​រដ្ឋាភិ​បាល​។​

សម្តេចហ៊ុន ម៉ា​ណែ​ត បាន​បញ្ជាក់​ថា​ ​ខេត្ត​ទាំង​៤​របស់​យើង ​បើ​ផ្គុំ​គ្នា​មិនធំ​ពេក​នោះ​ទេ ដោយ​យើង​មាន​ឆ្នេរ​ យើង​មាន​សក្តានុ​ពល​កំពង់​ផែ ​យើង​មាន​សក្តានុ​ពល​ពហុ​បំណង​ជាដើម​។​ កា​ររៀបចំ​ផែន​ការ​មេ​នេះ​គឺ ដើម្បី​ធានា​យ៉ាង​ណាឱ្យការ​អភិវឌ្ឍ​យើង ​មាន​ផែន​ការ ធានា​កុំ​ឱ្យ​ខេត្ត​ទាំង​៤ គឺជា​ខេត្ត​ប្រកួត​ប្រជែង​គ្នា តែ​គឺជា​ខេត្ត​គាំទ្រ​គ្នា​ទៅ​វិញ​ទៅ​មក ដើម្បី​យើង​បង្កើត​ខេត្ត​ឆ្នេរ​សមុទ្រ​របស់​យើង ទៅ​ជា​ខេត្ត​ដែលប្រមូល​កម្លាំង​រួម​ ជួយ​ជំរុញ​សក្តានុ​ពល​តំបន់​សមុទ្រ​របស់​កម្ពុជា​។ សម្តេចនាយក​រដ្ឋ​មន្ត្រី បាន​បន្ថែម​ថា ដោយ​សារ​ការ​ផ្សព្វ​ផ្សាយ ​ទេសចរ​បរទេស​ច្រើន​ណាស់ ​បាន​មក​លេង​កម្ពុជា​ ហើយ​ត្រឡប់​​ទៅវិញ បាន​ផ្សព្វ​ផ្សាយ​ពី​មាត់​មួយ​ ទៅ​មាត់​មួយ​នេះ​ គឺ​សំខាន់​ណាស់​ដែល​ឱ្យ​ពួកគា​ត់​ឃើញ​ជាក់​ស្ដែង​ ទុក​ចិ​ត្ដ​ជាក់​ស្ដែង​។​នេះ​ជា​សក្ដានុ​ពល​សំខាន់​ លើ​វិស័យ​ទេស​ចរណ៍​ដែល​ត្រូវ​លើក​កម្ពស់ ​ចំពោះ​សេដ្ឋ​កិច្ច​ជាតិ​។

ជា​មួយ​គ្នា​នោះ សម្តេច​ហ៊ុន ម៉ា​ណែ​ត ក៏បាន​ប្រាប់​ឱ្យ​ក្រសួ​ងសាមី​ខិតខំ​ បង្កើត​ផលិត​ផល​ទេសច​រណ៍​ឱ្យ​បាន​ច្រើន ដើ​ម្បី​ទាក់​ទាញ​អ្នក​ទេសចរ​ផង​ដែរ​ ខណៈ​ដែល​វិស័យ​នេះ ​មិន​ត្រឹម​តែ​បង្កើន​កំណើន​សេដ្ឋ​កិច្ច និង​បង្កើត​ការងារ​ជូន​ប្រជា​ជន​ កាត់​បន្ថយ​ភាព​ក្រីក្រ​នោះ​ទេ​ ប៉ុន្ដែ​ថែម​ទាំង​ផ្សព្វ​ផ្សាយ ​ទៅដល់​ប្រជា​ពលរដ្ឋ​ នៅ​លើ​ពិភព​លោក​ពី​កម្ពុជា ​ដែល​មាន​អរិយ​ធម៌​ខ្ពង់​ខ្ពស់​ វប្បធម៌​រុងរឿង ប្រ​វត្ដិ​យូរ​អង្វែង​ និង​ទាក់​ទាញ​ទាំង​ទេស​ចរណ៍ ទាំង​កា​រវិនិ​យោគ​ផ្សេងៗ​ថែម​ទៀត​ផង​។​

ប្រធាន​សមា​គម​ទីភ្នាក់​ងារ​ទេសច​រណ៍​កម្ពុជាលោកស្រីឆាយ ស៊ីវលីន ​បានមានប្រសាសន៍ថា ការ​លើក​កម្ពស់​កិ​ត្ដិ​នាម​របស់​ជាតិ ​និង​បង្កើត​ការ​ចាប់​អារម្មណ៍​ ក៏ដូច​ជា​ភាព​ជឿ​ជាក់ ​របស់​ប្រជា​ពលរដ្ឋ​ ជា​ពិសេស​ស្ថាន​ភាព​ដូច​ប្រទេស​កម្ពុជា​ ដែលប្រ​វត្ដិ​សាស្ដ្រ​ធ្លាប់​តែ​ជា​ប្រទេស​កើត​សង្គ្រាម​ ជា​ប្រទេស​អស្ថិ​រភាព ​ដែល​នៅ​ក្រៅ​ប្រទេស​ភាគ​ច្រើន​ និយាយ​ពី​កម្ពុជា ​គឺ​ភ្ជាប់​ជា​មួយ​នឹង​សង្គ្រាម​នៅ​វៀត​ណាម​។​លោក​ស្រី​បញ្ជាក់ថា “​យើង​គាំទ្រ ​ចំពោះ​ការ​លើក​ឡើង​របស់​សម្តេច​ធិបតី​នេះ ​ព្រោះថា​កា​រផ្សារ​ភ្ជាប់​ខេត្ត​ទាំង​៤នេះ​ គឺជា​ប្រមូល​ផ្តុំ​កម្លាំង​ដ៏​ធំ ដើម្បី​ជួយ​គ្នា​ក្នុង​ការ​អភិវឌ្ឍ​ តំប​ន់ឆ្នេរ​របស់​យើង​ឱ្យ​កាន់​មាន​ភាព​ទាក់​ទាញ ​និង​មាន​ភា​ពល្បី​ល្បាញ”​។លោកស្រីបន្តថា “វា​ក៏​នឹង​អាច​ជួយ​គាំទ្រ​គ្នា​ទៅ​វិញ ​លើ​ផ្នែក​ហេដ្ឋា​រចនា​សម្ព័ន្ធ​រវាង​ខេត្ត​នីមួយៗ ​សេវា​កម្ម និង​ផលិត​ផល​ទេសចរ​ណ៍ដទៃ​ទៀត​ផងដែ​រ​”។

យោង​តាម​របាយ​ការណ៍​​ក្រសួង​ទេសចរ​ណ៍បាន​ឱ្យ​ដឹង​ថា រ​យៈពេល១០​ខែ ឆ្នាំ​២០២៣​នេះ​ កម្ពុជាទទួលបា​ន​ភ្ញៀវ​អន្ដរ​ជាតិ ប្រមា​ណ៤,៤​លាន​នាក់ ​និង​ទេស​ចរ​ជាតិ​ប្រមាណ១២,២​​លាន​នាក់​៕

ដោយ: គង់ លាងហួរ
បាងកក: ទីភ្នាក់ងារសម្រាប់កិច្ចការអចលនទ្រព្យ (Area) បានព្យាករថា ជនបរទេសនឹងទិញអចលនទ្រព្យលំនៅដ្ឋានចំនួន២៧.៧៤១យូនីត នៅក្នុងប្រទេសថៃក្នុងឆ្នាំនេះ ដែលមានតម្លៃសរុប១៦១,៥៦ពាន់លានបាត(ប្រហែល៤,៤៤ពាន់លានដុល្លារ)។

លោក Sopon Pornchokchai ប្រធានទីភ្នាក់ងារសម្រាប់កិច្ចការអចលនទ្រព្យ បានមានប្រសាសន៍ឱ្យដឹងថា នៅទីក្រុងបាងកក អ្នកទិញបរទេសគ្របដណ្តប់១៨,៨% នៃការផ្ទេរកម្មសិទិ្ធអចលនទ្រព្យថ្មីនៅក្នុងឆមាសទីមួយនៃឆ្នាំនេះ ពោលគឺកើនឡើងពី១១,១% កាលពីឆ្នាំមុន។

មុនពេលផ្ទុះវិបត្តិជំងឺរាតត្បាតកូវីដ-១៩ ក្នុងឆ្នាំ២០១៩ អ្នកទិញបរទេសបានគ្របដណ្តប់១៥% នៃតម្លៃអចលនទ្រព្យលំនៅដ្ឋានសរុប ដែលត្រូវបានទិញនៅទីក្រុងបាងកក និងជាយក្រុងបាងកក។

នៅឆ្នាំនេះ ទីភ្នាក់ងារខាងលើបានព្យាករថា ជនបរទេសនឹងទិញលំនៅដ្ឋានចំនួន៤.២០៣យូនីតនៅក្នុងទីក្រុងបាងកក ដែលមានតម្លៃសរុប២០,៣៦ពាន់លានបាត។

អតិថិជនជាជនជាតិចិនត្រូវបានគេរំពឹងថានឹងនាំមុខគេ ជាមួយនឹងការទិញលំនៅដ្ឋាននៅប្រទេសថៃចំនួន១.៩៣៧យូនីត ដែលស្មើនឹងទំហំទឹកប្រាក់៧,២៤ពាន់លានបាត។

លោក Sopon បានបន្ថែមថា តំបន់ដែលពេញនិយមបំផុតសម្រាប់អ្នកទិញជាជនជាតិចិន គឺតំបន់ Ratchada-Huay Kwang ដែលមាន៧៣១យូនីត បន្ទាប់មកគឺតំបន់Bang Na-Thepharak ដែលមាន៦២៥យូនីត និងសង្កាត់ពាណិជ្ជកម្មកណ្តាលមាន២២៣យូនីត។

ទោះជាយ៉ាងណាក្តី ការកើនឡើងនៃអ្នកទិញបរទេសប្រហែលជាមិនអាចជំរុញសេដ្ឋកិច្ចថៃខ្លាំងក្លានោះទេ ដោយសារអចលនទ្រព្យជាច្រើនអាចត្រូវបានជួលបន្តទៅឱ្យអ្នកស្រុក។

លោក Sopon បានអះអាងថាបន្ថែមពីលើនេះ ប្រសិនបើអចលនទ្រព្យទាំងនេះត្រូវបានគេជួលបន្តនោះ ប្រាក់ចំណូល ដែលរកបានប្រហែលជាមិនអាចវិលទៅក្នុងចរន្តសេដ្ឋកិច្ចថៃវិញនោះទេ៕

ដោយៈ ជេស៊ីកា

ភ្នំពេញៈ គំរោងវិនិយោគព្រលានយន្តហោះ ខេត្តបាត់ដំបង និងមណ្ឌលគិរី បាននិងកំពុងស្ថិតក្នុងស្ថានភាពបែបណា ខណៈអ្នកវិនិយោគចិនបានដកខ្លួនចេញ។

អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកា​សចរណ៍ស៊ីវិល លោកស៊ិន ចាន់សិរីវុត្ថាបានមានប្រសាសន៍ឲ្យដឹង ​តាមបណ្តាញតេឡេក្រាម កាលពីសប្តាហ៍មុនថា គំរោងព្រលាននេះ កំពុងមានសភាពស្ងប់ស្ងាត់ មិនទាន់មានអ្នកវិនិយោគណាម្នាក់ ចូលមកចែចូវនៅឡើយទេ។

លោកបន្តថា “តាំងពីវិបត្តិកូវីដ១៩មក អ្វីៗមានដំណើរការយឺតៗ ដែលធ្វើឲ្យអ្នកវិនិយោគអន្តរជាតិធំៗ មិនទាន់សម្រេចចិត្តបោះទុនវិនិយោគ”។លោកបន្តថា “ ផលចំណេញពីការវិនិយោគ ក៏ជាចំណុចមួ​យ ដែលអ្នកវិនិយោគមិនទាន់សម្រេចចិត្តនៅឡើយផងដែរ”។លោកស៊ិន ចាន់សិរីវុត្ថាបានបន្តថា ការវិនិយោគលើព្រលានយន្តហោះនេះ មិនមែនគ្មានផលចំណេញទេ តែជាការចំណេញយឺត ដែលអាចធ្វើឲ្យអ្នកវិនិយោគមានភាពរារែកផងដែរ។

ក្រុមហ៊ុន China Power ដំបូងឡើយគ្រោងបោះទុន១០០លានដុល្លារ ដើម្បីវិនិយោគព្រលានយន្តហោះ ខេត្តមណ្ឌលគិរី។ យោងតាមផែនការមេរបស់ក្រសួងទេសចរណ៍ ឆ្នាំ២០២៣ ២០៣៨បានបង្ហាញពីគំរោងអភិវឌ្ឍន៍ ហេដ្ឋារចនាសម្ព័ន្ឋទេស​ចរណ៍ជាច្រើននៅខេត្តមណ្ឌលគិរី ក្នុងនោះមានព្រលានយន្តហោះលំដាប់អន្តរជាតិ ដែលអាចអនុញ្ញាត្តឲ្យយន្តហោះ ខ្នាតមធ្យមអាចចុះចតបានផងដែរ ប៉ុន្តែការមកដល់នៃវិបត្តិកូវីដ១៩ និងបញ្ហាសេដ្ឋកិច្ចសក​លបានធ្វើឲ្យក្រុមហ៊ុនChina Power សម្រេចដកខ្លួនចេញពីគំរោងនេះ៕

ដោយៈ​គង់ សូរិយា

ភ្នំពេញៈ ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោកអភិសន្តិបណ្ឌិតស សុខាបានស្នើអភិបាលរាជធានី ខេត្ត ពិនិត្យយកទីតាំងណាមួយនៅខេត្តរបស់ខ្លួន ដើម្បីបង្កើតផ្សាររាត្រី។
លោកបានមានប្រសាសន៍ឲ្យដឹងទៀតថា ការបង្កើតផ្សារាត្រី អាចធ្វើឡើងរយៈពេលពីរថ្ងៃ ក្នុងមួយសប្តាហ៍ ដោយយកថ្ងៃសៅរ៍ និងថ្ងៃអាទិត្យ ប៉ុន្តែបើមានភាពទាក់ទាញ អាចធ្វើឡើងបីថ្ងៃក្នុងមួយអាទិត្យ ព្រោះដូចករណីPub Streetនៅក្រុងសៀមរាបអញ្ចឹង ដំបូងឡើយផ្នែកឯកជនជាអ្នកផ្តួចផ្តើម គេរួមយោបល់គ្នា ដោយមិនឲ្យមានការប្រើប្រាស់ ឬមធ្យោបាយចេញចូល។

លោកឧបនាយករដ្ឋមន្រ្តីបន្តថា “សូមធ្វើម៉េចឲ្យមានភាពទាក់ទាញ តែសូមគិតផ្តោតលើរឿងធំៗចំនួន២ គឺសន្តិសុខ និងកន្លែង​ចំណតយានយន្ត ព្រោះបើបិទបាំងហើយស្ទះចរាចរណ៍ ប្រជាពលរដ្ឋ​នឹងជេរយើងថែមទៀត”។លោកឧបនាយករដ្ឋមន្រ្តីស សុខាបានបន្តថា ឥលូវនេះការផ្តោត​ដើម្បីទាក់ទាញភ្ញៀវទេស​ចរណ៍ គឺកំពុងមានភាពសកម្ម ដោយប្រទេ​សចិនក៏បានធ្វើ ព្រោះស្ថានភាពសេដ្ឋកិច្ចពិភពលោកឆ្នាំ២០២៤  និងឆ្នាំ២០២៥ យើងមិនដឹងទៅណាទេ ថ្វីត្បិតយើងមានភាពរ៉ឹងមាំកម្រិតណាមួយក៏ដោយ ក៏យើងត្រូវពង្រឹងសមត្ថភាពខ្លួនឯង ជាពិសេសចំណូល និងចំណាយក្នុងស្រុក៕