ក្រុមហ៊ុនអភិវឌ្ឍន៍អចលនទ្រព្យចិន ប្រើយុទ្ធសាស្ត្រប្រូម៉ូសិនចម្លែកគ្មានពីរ “ស្រូវសាលីដូរយកផ្ទះ”

ដោយៈ សុខុម

ហុងកុង: ជាទូទៅ សម្រាប់ការទិញផ្ទះបង់រំលស់ ដែលក្រុមហ៊ុនអភិវឌ្ឍន៍តម្រូវឱ្យបង់ប្រាក់កក់ ឬ Down Payment គឺគេតម្រូវឱ្យយើងទូទាត់ជាសាច់ប្រាក់ តាមចំនួនភាគរយដែលក្រុមហ៊ុនកំណត់ ប៉ុន្តែក្រុមហ៊ុនអភិវឌ្ឍន៍មួយនៅប្រទេសចិន បានប្រើយុទ្ធសាស្ត្រប្រូម៉ូសិនចម្លែកគ្មានពីរ “ស្រូវសាលីដូរយកផ្ទះ។

យោងតាមសារព័ត៌មាន CNA ចុះផ្សាយកាលពីថ្ងៃអង្គារ ទី២១ ខែមិថុនាបានឱ្យដឹងថា ក្រុមហ៊ុនអភិវឌ្ឍន៍អចលនទ្រព្យ Central China Real Estate នៅក្នុងទីផ្សារអចលនទ្រព្យដ៏ទន់ខ្សោយនៃប្រទេសចិន កាលពីពេលថ្មីៗនេះ បានដាក់ចេញកម្មវិធីប្រូម៉ូសិន ដ៏គួរឱ្យភ្ញាក់ផ្អើលមួយ ដើម្បីទាក់ទាញអ្នកទិញ ដោយអ្នកទិញអាចយកស្រូវសាលី បង់ជាប្រាក់កក់បាន។

ផ្ទាំងផ្សាយពាណិជ្ជកម្មមួយរបស់ក្រុមហ៊ុន ដែលមានមូលដ្ឋាននៅខេត្តហឺណាន (Henan) សរសេរថា “យកស្រូវសាលីដូរយកផ្ទះ” ហើយនៅក្នុងនោះបានបញ្ជាក់ថា អ្នកទិញអាចយកស្រូវសាលី មកទូទាត់ថ្លៃប្រាក់កកដំបូង ដែលមានចំនួនដល់ទៅ២៣.៩០០ដុល្លារ សម្រាប់ការទិញផ្ទះដែលស្ថិតក្នុងគម្រោងអភិវឌ្ឍន៍របស់ខ្លួន។

ស្ត្រីជាភ្នាក់ងារលក់ម្នាក់របស់ក្រុមហ៊ុន Central China Real Estate បាននិយាយកាលពីថ្ងៃច័ន្ទ ទី២០ ខែមិថុនា ថា ប្រូម៉ូសិនដ៏ពិសេសនេះ គឺដើម្បីទាក់ទាញកសិករនៅក្នុងតំបន់នោះ ហើយនឹងផុតកំណត់ត្រឹមថ្ងៃទី១០ ខែកក្កដា ឆ្នាំ២០២២ នេះ។

ភ្នាក់ងារលក់ខាងលើ ដែលសុំមិនបញ្ចេញឈ្មោះនិយាយថា ផ្ទះនៅក្នុងគម្រោងអភិវឌ្ឍន៍ក្នុងខេត្តហឺណាន មានតម្លៃចន្លោះពី៩០.០០០ដុល្លារអាមេរិក ទៅ១៣៤.៥០០ដុល្លារអាមេរិក។

ទោះជាយ៉ាងណា ក្រុមហ៊ុនអភិវឌ្ឍន៍ Central China Real Estate មិនបានឆ្លើយតបទេ ពេលទីភ្នាក់ងារព័ត៌មាន Reuters ទាក់ទងទៅដើម្បីការឆ្លើយបំភ្លឺជុំវិញកម្មវិធីប្រូម៉ូសិនដ៏ចម្លែកនេះ៕ Reuters៕