ដោយ: គង់ លាងហួរ
អន្តរជាតិ: ការប្រឈមមុខរបស់ធនាគារចិនត្រូវបានគូសបញ្ជាក់ក្នុងសប្តាហ៍នេះ ខណៈដែលក្រុមហិរញ្ញវត្ថុបានចេញផ្សាយរបាយការណ៍ប្រាក់ចំណូលពេញមួយឆ្នាំដែលបង្ហាញថាអត្រាការប្រាក់ដ៏ទាបបានបង្អាក់ប្រាក់ចំណេញរបស់ពួកគេពីការឱ្យខ្ចី ស្របពេលបំណុលអចលនទ្រព្យបានហក់ឡើង។
ធនាគារនានាបានអះអាងថាប្រាក់ចំណេញបានកើនឡើងកាលពីឆ្នាំមុន ប៉ុន្តែលទ្ធផលរបស់ពួកគេបានបង្ហាញពីការលំបាកប្រឈមមុខនឹងអាជ្ញាធរចិន ខណៈដែលពួកគេព្យាយាមរក្សាអត្រាការប្រាក់ឱ្យនៅកម្រិតទាបក្នុងក្តីសង្ឃឹមនៃការស្តារសេដ្ឋកិច្ចធំបំផុតទីពីររបស់ពិភពលោកឡើងវិញ។
ធនាគារ China Construction Bank (CCB) ដែលជាធនាគារធំដំបូងគេក្នុងចំណោមធនាគារគ្រប់គ្រងរដ្ឋធំៗចំនួន៤ បានរាយការណ៍ថា ភាពខុសគ្នារវាងចំណូលការប្រាក់និងចំណាយការប្រាក់(Net interest margin)បានដាំក្បាលចុះដល់២,០២ភាគរយកាលពីឆ្នាំមុន។
ទន្ទឹមនឹងនោះ ប្រាក់កម្ចីដែលមិនដំណើរការ (NPLs) របស់ខ្លួនដែលផ្តល់ដល់ក្រុមហ៊ុនអភិវឌ្ឍន៍អចលនទ្រព្យបានកើនឡើង១៤៨,២៦ភាគរយរហូតដល់ប្រហែល៣៣,៦១ពាន់លានយ័ន(៤,៨៧ពាន់លានដុល្លារ)។
លោក Li Bin អនុប្រធានធនាគារ China Minsheng Bank បានថ្លែងក្នុងអំឡុងពេលសិក្ខាសាលាមួយថា “ ឧស្សាហកម្មធនាគារទាំងមូលប្រឈមនឹងសម្ពាធដ៏ធំមួយលើភាពខុសគ្នារវាងចំណូលការប្រាក់និងចំណាយការប្រាក់ (NIM) ខណៈធនាគាររបស់លោកបានរាយការណ៍ថា NIM របស់ខ្លួនបានធ្លាក់ដល់កម្រិតទាបរយៈពេល៥ឆ្នាំត្រឹម១,៦ភាគរយ”៕
