ដោយៈ គង់ សូរិយា
កណ្តាលៈ អភិបាលនៃគណៈអភិបាលខេត្តកណ្តាល លោកគង់ សោភ័ណ្ឌ នៅថ្ងៃទី៣ ខែឧសភា ឆ្នាំ២០២៣នេះ បានអញ្ជើញប្រកាសឱ្យចូលកាន់តំណែងជាផ្លូវការ លោកចាន់ ដារ៉ា ជាអភិបាលក្រុងអរិយក្សត្រ (ទើបបង្កើតថ្មី) លោកអេង សុវិចិត្ត ជាអភិបាលក្រុងសំពៅពូន (ទើបបង្កើតថ្មី) និងលោក ឆែ វណ្ណឌី ជាអភិបាលស្រុកកោះធំ។
រដ្ឋបាលក្រុងអរិយក្សត្រ ត្រូវបានជ្រើសរើសទីតាំងក្នុងបុរីវីឡាទួលសង្កែអរិយក្សត្រ ដែលជាបុរីធំជាងគេទំហំជាង៦០ហិកតា នៅក្នុងតំបន់នេះ។
លោកអភិបាលខេត្តបានថ្លែងបន្តថា ពេលបានតំណែងហើយ ត្រូវចេះដាក់ខ្លួន ឥរិយាបថល្អចំពោះមន្ត្រីក្រោមឱវាទ និងពិសេសទៅចំពោះប្រជាពលរដ្ឋ ដោយប្ដេជ្ញា និងដឹងខ្លួនថា ជាអ្នកបម្រើរាស្ត្រមិនតាំងខ្លួនជាចៅហ្វាយរាស្ត្រទេ ហើយត្រូវបម្រើសេវាជូនពួកគាត់ឱ្យល្អ ត្រូវធ្វើយ៉ាងណាឱ្យពួកគាត់ពេញចិត្ត ពេញថ្លើម។
អភិបាលខេត្តបានសង្កត់ធ្ងន់ថា សម្ដេចតេជោ ហ៊ុន សែន បានខិតខំកសាងប្រទេសជាតិ តាំងពីបាតដៃទទេ មករហូតដល់មានការរីកចម្រើនលើគ្រប់វិស័យ និងមានភាពល្បីរន្ទឺទូទាំងសកលលោក ដូច្នេះសូមមន្ត្រីមូលដ្ឋាន ត្រូវតាំងចិត្ត តាំងស្មារតីខ្លួនឱ្យល្អ ក្នុងការបម្រើដល់ប្រជាពលរដ្ឋ កុំឱ្យមានការថ្នាំងថ្នាក់ មានបញ្ហាត្រូវដោះស្រាយឱ្យបានល្អ ជាពិសេសត្រូវធ្វើយ៉ាងណា បង្កើនការគាំទ្រពីសំណាក់ប្រជាពលរដ្ឋ មកលើរាជរដ្ឋាភិបាលកម្ពុជា ឱ្យបានកាន់តែខ្លាំងឡើងៗ។
