ដោយ: គង់ លាងហួរ
អន្តរជាតិ: ទីផ្សារលំនៅដ្ឋានថៃ នឹងត្រូវពឹងផ្អែកលើតម្រូវការបរទេសដើម្បីជំរុញកំណើន ដោយសារអ្នកទិញក្នុងស្រុកកំពុងប្រឈ មមុខ នឹងបញ្ហាក្នុងការទទួលបានប្រាក់កម្ចី ដែលបង្ហាញដោយការធ្លាក់ចុះនៃការផ្ទេរកម្មសិទ្ធិ លំនៅដ្ឋាននៅក្នុងត្រីមាសទីមួយ។
លោក Vichai Viratkapan អគ្គនាយកស្តីទីនៃមជ្ឈមណ្ឌលព័ត៌មានអចលនទ្រព្យ (REIC) បានមានប្រសាសន៍ថា “ទីផ្សារអចល នទ្រព្យនៅក្នុងត្រីមាសទី១ គឺមិនមានភាពល្អប្រសើរ ដូចដែលអ្នកអភិវឌ្ឍន៍ជាច្រើន បានប៉ាន់ប្រមាណក្នុងត្រីមាសទី៤ឆ្នាំមុននោះទេ”។
លោកបានបន្តថា “តួលេខនៅត្រីមាសទីមួយ ទាំងផ្នែកផ្គត់ផ្គង់ និងតម្រូវការបានបង្ហាញពីនិន្នាការអវិជ្ជមាន ហើយទីផ្សារត្រូវបានគេរំពឹងថា នឹងធ្លាក់ចុះចំនួនពីរខ្ទង់នៅឆ្នាំនេះ ដែលត្រូវបានជះឥទ្ធិពលដោយការផុតកំណត់ នៃការបន្ធូរបន្ថយដែនកំណត់ប្រាក់កម្ចី ទៅនឹងតម្លៃ (LTV) នៅចុងឆ្នាំ២០២២”។
នៅក្នុងត្រីមាសទីមួយ ចំនួនសរុបនៃការផ្ទេរកម្មសិទ្ធិលំនៅដ្ឋានទូទាំងប្រទេសបានធ្លាក់ចុះ០,៨% មកនៅត្រឹម៨៤.៦១៩យូនីត ពីចំនួន៨៥.៣២០យូនីត ដែលបានកត់ត្រាក្នុងអំឡុងពេលដូចគ្នា កាលពីឆ្នាំមុន។
ក្នុងចំណោមជនជាតិបរទេស ដែលទិញអចលនៈទ្រព្យ ជនជាតិចិន គឺជាក្រុមធំជាងគេដែលបានទិញ លំនៅដ្ឋាន១.៧៤៧យូនីតដែលមានតម្លៃ៨,២ពាន់លានបាត។ ចំណែក អតិថិជនរុស្ស៊ីគ្របដណ្តប់ចំណែកទិញចំនួន១០% ជាមួយនឹង៣៨៧យូនីតមានតម្លៃ១,៣៦ពាន់លានបាត បន្ទាប់មកគឺជនជាតិអាមេរិក ដែលបានទិញលំនៅដ្ឋានចំនួន១៥៦យូនីត មានតម្លៃ៧០៣លានបាត។
ចំណាត់ថ្នាក់លំដាប់ទី៤ និងទី៥ ត្រូវបានកាន់កាប់ដោយអ្នកទិញជនជាតិអង់គ្លេស និងអាល្លឺម៉ង់ ដែលមាន១៤៦យូនីត មានតម្លៃ៦៥៣លានបាត និង១៣១យូនីត ដែលមានតម្លៃ៦១១លានបាតរៀងៗគ្នា។ ចំណាត់ថ្នាក់ទី៨បានទៅលើអតិថិជន មកពីប្រទេសមីយ៉ាន់ម៉ា ជាមួយនឹងការទិញលំនៅដ្ឋានចំនួន៧៦យូនីត ដែលមានតម្លៃ៤៩៧លានបាត។
ចំណែកខាងផ្នែកផ្គត់ផ្គង់វិញ ចំនួនសរុបនៃលំនៅដ្ឋាន ដែលទើបនឹងបើកដាក់លក់ថ្មី នៅទីក្រុងបាងកកបានថយចុះ៥៩% មកត្រឹម១២.០២៦យូនីត នៅក្នុងត្រីមាសទីមួយក្នុងឆ្នាំ២០២៣នេះ៕
