អាកាសយានដ្ឋានអន្តរជាតិសៀមរាបអង្គរបានបញ្ចប់ការធ្វើតេស្តទទួលជើងហោះហើរសាកល្បងដោយជោគជ័យ

ដោយ: គង់ លាងហួរ
សៀមរាប: រដ្ឋលេខាធិការដ្ឋាន អាកាសចរណ៍ ស៊ីវិល កម្ពុជា (SSCA)ប្រកាសថា អាកាសយានដ្ឋានអន្តរជាតិសៀមរាបអង្គរ ដែលស្ថិតនៅភាគពាយព្យនៃខេត្តសៀមរាប ប្រទេសកម្ពុជា បានបញ្ចប់ដោយជោគជ័យក្នុងការធ្វើតេស្ត ទទួលជើងហោះហើរសាកល្បងកាលពីថ្ងៃព្រហស្បតិ៍។

SSCA បានឱ្យដឹងនៅក្នុងសេចក្តីថ្លែងការណ៍មួយថា ក្រុមហ៊ុនអាកាសចរណ៍ចំនួន៣ បានចូលរួមក្នុងការធ្វើតេស្តនេះ ដូចជាយន្តហោះរបស់ក្រុមហ៊ុន Sky Angkor Airlines បានហោះហើរពីអាកាសយានដ្ឋានអន្តរជាតិភ្នំពេញ យន្តហោះក្រុមហ៊ុន Cambodia Airways មកពីអាកាសយានដ្ឋានអន្តរជាតិខេត្តព្រះសីហនុ និងយន្តហោះក្រុមហ៊ុន China Eastern Airlines មកពី អាកាសយានដ្ឋានអន្តរជាតិ Kunming របស់ប្រទេសចិន។

សេចក្តីថ្លែងការណ៍បានបន្តថា អាកាសយានដ្ឋានអន្តរជាតិកម្រិត 4E នេះមានច្រកចំនួន៣៨ ហើយវានឹងអាចផ្ទុកអ្នកធ្វើដំណើរតាមផ្លូវអាកាសចំនួន៧លាននាក់ក្នុងមួយឆ្នាំចាប់ពីឆ្នាំ២០២៤ និងចំនួន១២លាននាក់ជារៀងរាល់ឆ្នាំចាប់ពីឆ្នាំ២០៤០។ព្រលានយន្តហោះថ្មីនេះមានសមត្ថភាពផ្ទុកទំនិញតាមផ្លូវអាកាសបានចំនួន១០.០០០តោនជារៀងរាល់ឆ្នាំក្នុងឆ្នាំ២០២៤ និង២៦.០០០តោនក្នុងឆ្នាំ២០៤០ខាងមុខ និងអាចទទួលជើងហោះហើរបានចំនួន ៦៥.៨០០ជើងក្នុងឆ្នាំ២០២៤ និង១១២.៧០០ជើងក្នុងឆ្នាំ២០៤០។