ដោយៈ គង់ សូរិយា
សឹង្ហបុរីៈ មន្រ្តីរដ្ឋាភិបាល ក្រុមអ្នកជំនាញ និងអ្នកអភិវឌ្ឍន៍បានចូលរួមកិច្ចប្រជុំកំពូលទីក្រុងពិភពលោក (WCS) 2024 រយៈពេលបីថ្ងៃនៅប្រទេសសឹង្ហបុរីកាលពីពេលថ្មីៗនេះ ។
កិច្ចប្រជុំនេះត្រូវបានធ្វើឡើង នៅប្រទេសសិង្ហបុរីក្រោមប្រធានបទ “ទីក្រុងដែលអាចរស់នៅបាន និងនិរន្តរភាព៖ រស់ឡើងវិញ បង្កើតឡើងវិញ ស្រមៃឡើងវិញ” ខណៈដែលកិច្ចប្រជុំកំពូលបានពិនិត្យមើលអនាគតនៃការអភិវឌ្ឍន៍ទីក្រុង។
-->
នេះគឺជាកិច្ចប្រជុំលើកទី៩របស់WCS ដែលត្រូវបានរៀបចំឡើងដោយមជ្ឈមណ្ឌល Centre for Liveable Cities (CLC) និងអាជ្ញាធរ Urban Redevelopment Authority (URA) ។
ការពិភាក្សាបានផ្តោតលើឱកាស និងយុទ្ធសាស្ត្រ ដើម្បីសម្រេចបាន “ទីក្រុងឆ្លាតវៃ និងមានភាពធន់ ទាំងបច្ចុប្បន្ន និងអនាគត”។
តាមរយៈកិច្ចប្រជុំដ៏មានសារៈសំខាន់នេះ ទិន្នន័យមួយចំនួនត្រូវបានបង្ហាញរួមមាន:
- ក្នុងឆ្នាំ២០០០ មានទីក្រុងចំនួន៣៧១ នៅទូទាំងពិភពលោក ដែលមានប្រជាជនរស់ នៅយ៉ាងហោចណាស់១លាននាក់ ប៉ុន្តែនៅឆ្នាំ២០៣០ ចំនួននេះត្រូវបានគេព្យាករណ៍ថា នឹងលើសពី៧០០ទីក្រុង (ជិត២ដងក្នុងរយៈពេលត្រឹមតែ៣ ទសវត្សរ៍)។
- តាមការសន្និដ្ឋាន នៅចុងសតវត្សន៍នេះ កម្រិតទឹកសមុទ្រត្រូវបានព្យាករណ៍ថា នឹងកើនឡើងដល់១,១៥ ម៉ែត្រ ឬច្រើនជាងនេះ។
- អាកាសធាតុក៏ត្រូវបានគេរំពឹងថា នឹងកាន់តែក្តៅផងដែរ ដោយសីតុណ្ហភាពជាមធ្យមប្រចាំឆ្នាំ កើនឡើងចន្លោះពី០,៦ ទៅ៥អង្សាសេនៅចុងសតវត្សរ៍។
- នេះមានន័យថា នៅចំពោះមុខមានភស្តុតាងបន្ថែមទៀត ដែលបង្ហាញពីការប្រែប្រួលអាកាសធាតុ និងការឡើងកំដៅផែនដី ទីក្រុងជាច្រើនទៀត នៅទូទាំងពិភពលោក កំពុងប្រឈមនឹងបញ្ហា ហើយចាំបាច់ត្រូវត្រៀមខ្លួនសម្រាប់ការផ្លាស់ប្តូរ។
- បញ្ហាសំខាន់ៗមួយចំនួន ដែលទីក្រុងកំពុងប្រឈម គឺទីធ្លាសាធារណៈមិនគ្រប់គ្រាន់ និងការប្រើប្រាស់ធនធាន មិនមានប្រសិទ្ធភាព ប៉ុន្តែក៏មានការសិក្សាថ្មីៗបន្ថែមទៀត ដែលពិចារណាទៅលើផលប៉ះពាល់នៃបរិស្ថានទីក្រុង ទៅលើសុខុមាលភាពផ្លូវចិត្តផងដែរ៕
